Lesson 4: Хөрвүүлэг: Танилцуулга

(1) Бичвэрийг зөв хөрвүүлэхийн ач холбогдлыг ойлгох.

(2) Библийн хөрвүүлэг хийхэд тулгардаг бэрхшээлийг таних.

(3) Буруу хөрвүүлэг хийхэд хүргэж болзошгүй нийтлэг алдааг мэдэж авах.

(4) Библийн хөрвүүлэг хийх өөр өөр үзэл бодлыг хүндэтгэх, даруу байдлыг сахих.

1-р хичээл дээр гарсан Самуелын жишээг санаж байна уу? Самуел өдөр бүр Библи уншдаг байсан ч уншсан зүйлээсээ Бурханы дуу хоолойг сонсдоггүй байжээ. Юу буруу байсан бэ? Самуелд уншсанаа хөрвүүлэх үйл явц байгаагүй. Тэр уншдаг ч ойлгодоггүй байжээ.

[1]Үйлс 8-р бүлэгт уншдаг ч ойлгохгүй байсан өөр нэг хүний түүхийг өгүүлдэг. Эртний чуулганы диакон Филипийг Ариун Сүнс Йерусалимаас Газа руу хөтөлдөг цөлийн зам руу удирдсан. Тэнд тэрээр Йерусалимын сүмд мөргөл үйлдээд буцаж явсан Этиопийн нэгэн түшмэлтэй таарчээ. Тэр түшмэл аялж явахдаа Исаиа номоос уншиж байв.

Филип тэр түшмэлээс "Та уншиж байгаагаа ойлгож байна уу?" (Үйлс 8:30) гэж асуусан. Түшмэл хариуд нь "Хэн нэгэн зааж өгөхгүй бол би хэрхэн чадах билээ?" (Үйлс 8:31) хэмээн хэлсэн. Филип Бурханы Үгийг тайлбарлаж өгөхөд тэр хүн Есүсийг Бурханы Хүү гэдэгт итгэж, шинэ итгэгч болж баптисм хүртжээ.

Уншсанаа хэрхэн хөрвүүлэхээ мэдэх нь маш чухал. Дараагийн хэдэн хичээлээр бид Бичвэрийг хөрвүүлэх үйл явцыг судлах болно. Бид хөрвүүлэх практик алхмуудад суралцана.

Шүүх хуралдаан дээр гурван шүүгч ажлынхаа талаар ярилцаж байна. Эхний шүүгч, "Гэм буруутай хүмүүс байдаг, гэмгүй ч хүмүүс байдаг. Би тэднийг хэн болохыг нь тогтоодог" гэж хэлэв. Энэ шүүгч туйлын үнэн байдагт итгэдэг ажээ. Гэм буруутай хүмүүс, гэмгүй хүмүүс гэж байдаг бөгөөд шүүгчийн үүрэг бол үнэнийг зарлах явдал юм.

Хоёр дахь шүүгч, "Гэм буруутай хүмүүс байдаг, гэмгүй ч хүмүүс байдаг. Би хүнийг гэм буруутай эсэх, гэмгүй эсэхийг ялгахыг хичээдэг" гэж хэлэв. Энэ шүүгч туйлын үнэн байдгийг мэддэг ч хэн нэгний талаарх өөрийн бодол нь алдаатай байж болохыг мэддэг ажээ.

Гурав дахь шүүгч, "Намайг шийдвэрээ гаргах хүртэл шүүгдэгч нь гэм буруутай эсвэл гэм буруугүй" гэж хэлсэн. Энэ шүүгч туйлын үнэнд итгэдэггүй. Өөрийнх нь мэдэгдэл ямар нэгэн зүйлийг үнэн болгодог гэж тэр боддог ажээ.

Харамсалтай нь, олон итгэгчид Бичвэрт туйлын утга санаа байхгүй гэж үздэг. Тэд "Таны хувьд үнэн байж болох зүйл миний хувьд үнэн биш байх боломжтой" гэж хэлдэг. Энэ үзлийн дагуу уншигч бүр өөрийн "үнэн"-ийг бүтээдэг. Библид өгүүлсэн зүйлсийг тэд хүссэн утгаараа ойлгож болно гэж үздэг.

Дээр өгүүлсэн хоёр дахь шүүгчийн адил Христэд итгэгчид хоёр чухал үнэнийг ойлгох хэрэгтэй:

1. Бичвэрийн агуулдаг утга санаа нь туйлын бөгөөд текст дэх Бурханы үнэнийг ойлгохыг хичээх нь бидний ажил юм.

2. Бидний ойлголт хязгаарлагдмал. Үүнээс болж бидний хөрвүүлэг буруу байх боломжтой. Бид даруу байх учиртай.

Ажиглалт хийх үе шатанд бид "Текстээс би юу харж байна вэ?" гэж асуусан. Хөрвүүлгийн үе шатанд бид "Текст ямар утгатай вэ?" гэж асуудаг. Дараа нь бид Бичвэрийг амьдралдаа хэрэгжүүлэх талаар авч үзэх болно.

Бид хөрвүүлгийн үйл явцыг "Бичигч юу хэлэхийг зорьсон бэ?" гэсэн асуултаар эхлүүлдэг. Энэ нь биднийг "Энэ Бичвэр надад ямар утга санааг харуулж байна вэ?" гэж асуухад бэлтгэдэг.

Библи зэрэг эртний текстийг хөрвүүлж буй орчин үеийн уншигчдад олон бэрхшээл тулгардаг. Биднийг анхны бичигчээс тусгаарлаж буй цаг хугацаа, орон зай нь хөрвүүлгийг хүндрүүлдэг. Бид өөр хэлээр ярьдаг. Бидний соёл Библийн бичигчдийн соёлоос өөр.

Библийг хөрвүүлэх нь[1]

Энэ зураг бидний өнөөгийн цаг үед зориулан Библийг хөрвүүлэхэд тулгарч буй бэрхшээлийг харуулж байна. Библи нь эртний ертөнцийнхөнд (1) зориулагдан бичигджээ. Анхны уншигчид нь өнөөгийн уншигчийнхаас өөр ахуй соёлд амьдарч байсан. Тэдний ертөнцийг өнөөгийн биднээс тусгаарлаж буй гол (2) нь Библийг ойлгоход хүндрэл үүсгэдэг. Энэ гол нь бидний ахуй соёл болон Библийн ертөнцийн хоорондын ялгааг харуулдаг. Орчин үеийн уншигч болон анхны бичигчийн хооронд ямар ялгаа байна вэ?

Хэлний ялгаа

Библи еврей, грек, арамей гурван хэл дээр бичигдсэн. Өнөөдөр бидний ихэнх нь Библийг төрөлх хэл дээрээ уншдаг. Энэ нь бичигч болон бидний хооронд орон зай үүсгэдэг. Хоёр дахь хэлээр ярьдаг хэн бүхэн хэлний бэрхшээлийг ойлгодог.

Ахуй соёлын ялгаа

Хэлний бэрхшээлтэй адил ахуй соёлын ялгаа нь мөн хүндрэл үүсгэдэг. Бичвэрийн хүмүүн бичигчид нь бидний цаг үеэс ихээхэн ялгаатай ахуй соёлд амьдарч байжээ. Бид Бичвэрийг судлахдаа "Библийн дамжуулж буй сургаалыг илүү сайн ойлгож, хөрвүүлэхэд надад туслах эртний ертөнцийн соёлын талаар би юу мэдэх ёстой вэ?" гэж асуух хэрэгтэй юм.

Танил биш газарзүй

Библийн үйл явдлууд бодит хүмүүсийн амьдралд, бодит газар оронд тохиолдсон. Газарзүйг сайн ойлгох тусам бид өөрсдийн ертөнц болон тэдний ертөнцийг хувааж буй голыг гатлахад төдий чинээ сайн байх болно.

Иерихо болон Йерусалимын хоорондох зам аюултай, уулархаг газраар дайрдгийг мэдсэнээр тахилч болон левичүүдийн болгоомжлолыг тайлбарлаж чадна (Лук 10:31-32). Мөн шархдаж гэмтсэн харь хүнийг аврахын тулд өөрийн аюулгүй байдлыг эрсдэлд оруулсан самари хүний энэрэнгүй сэтгэлд талархахад тусалдаг (Лук 10:33-34).

Уншигчид "Марк 6-р бүлэгт Есүс 5000 хүнийг хооллосоны дараа Марк 8-р бүлэгт 4000 хүнийг хооллох Түүний чадварт дагалдагч нар яагаад эргэлзэх болов?" хэмээн асуудаг. Үүнд газрын зураг хариулдаг. Марк 7-р бүлэгт Есүс харь үндэстнүүд суурьшсан Декаполь руу аялсан байдаг. Дагалдагч нар "Есүс эдгээр хүмүүсийг хооллож чадах уу?" гэж асуугаагүй, харин "Тэр тэднийг хооллох болов уу?" гэж асуусан юм. Харь үндэстнүүд ижил гайхамшгийг хүртэх зохистой гэдэгт тэд хараахан итгэхгүй байжээ. Есүс бүх хүмүүсийн төлөө ирснийг тэд хараахан ойлгоогүй байв.

Марк 4-р бүлэгт Есүс Галил нууранд дэгдсэн шуургыг хэрхэн намжаасан талаар өгүүлдэг. Библийн атласаас харвал Галил нуур нь далайн түвшнээс 210 метрийн нам дор оршдог том нуур юм. Нуурын эргэн тойрон дахь өндөрлөг газрууд нь салхины хөндий үүсгэдэг тул ихэвчлэн хэдхэн минутын дотор хүчтэй шуурга үүсдэг байжээ. Энэ нууранд насаараа загасчилсан дагалдагчид баргийн хүчтэй шуургыг ажрахааргүй хүмүүс байсан. Тийм хүмүүс амиа алдахаас айж байгаа нь энэ нь ердийн шуурга байгаагүй болохыг харуулдаг. Энэ нь ер бусын хүчтэй шуурга байсан хэдий ч, Есүс хэдхэн үг хэлэхэд л нуур нам гүм болжээ. Тэд "Салхи, нуур хүртэл Түүнд дуулгавартай байдаг, Тэр ер нь хэн бэ?" (Марк 4:36-41) гэж хэлсэн нь гайхах зүйл биш юм.

Танил биш утга зохиолын хэлбэрүүд

Утга зохиолын олон төрлийг бид өөрөөр унших ёстой. Ром номыг уншихдаа Бурхан биднийг хэрхэн зөвт болгосон талаарх Паулын баримт нотолгоог анхааралтайгаар унших хэрэгтэй болдог. Сургаалт зүйрлэлийг уншихдаа бид гайхамшигтай хүүрнэлээр дамжуулан сургаал айлдаж буй түүх өгүүлэгчийг сонсдог.

Дүгнэлт

Зургийг дахин хараарай. Хэл, ахуй соёл, газарзүй, утга зохиолын гол биднийг тусгаарлаж байгаа ч, Библи бүх ахуй соёлд хамаатай мэдээг агуулдаг. Энэ бол голын дээгүүрх гүүр (3) юм. Гүүр нь Библийн заадаг зарчмуудаас бүрддэг. Эдгээр зарчмууд нь бүх цаг үеийн бүх ахуй соёлд үнэн байдаг.

Газрын зураг (4) нь биднийг Библийн түүхэнд хаана байгаагаа бодож үзэхэд тусалдаг. Христийн ирэлт Хуучин гэрээний олон эш үзүүллэг, хуулийг биелүүлсэн. Үүнийг санаснаар Бичвэрийн эдгээр хэсгийг хэрхэн хөрвүүлж, хэрэгжүүлэхэд өөрчлөлт ирдэг.

Эцэст нь бид өнөөгийн ертөнцөд (5) хүрэлцэн ирдэг. Энэ алхмаар бидний олж мэдсэн зарчим нь (3) өнөөгийн ертөнцөд хэрхэн хэрэгжих вэ гэдгийг асуудаг.

Бид дараагийн хичээлүүдээр энэ зургийг дахин ашиглах болно. Өнөөдрийн хувьд та эдгээр алхмуудыг мэдсэн байх хэрэгтэй.

Библийг хөрвүүлэгчдийн гаргадаг хэд хэдэн нийтлэг алдаа бий.

Текстийг буруу унших

Зарим номлогчид Паулыг "Мөнгө бол бүх бузар муугийн үндэс" гэж хэлсэн хэмээн номлодог. Гэхдээ Паул тэгж хэлээгүй! Тэр "Учир нь мөнгөнд дурлах нь хамаг муугийн үндэс мөн" (1 Тимот 6:10) гэж хэлсэн. Мөнгөтэй байсан ч түүнд дурлахгүй байх боломжтой, мөнгө багатай байсан ч мөнгөнд дурлах боломжтой. Паулын сэрэмжлүүлэг нь гол төлөв мөнгөний тухай биш, харин мөнгөнд дурлаж, зүрх сэтгэлээ эзэмдүүлэх талаар байжээ.

Зарим итгэгчид Дуулал 37:4 хэсгийг "Бурхан миний зүрхний хүслийг надад өгөхөө амлаж байна. Би баян болохыг хүсэж байна, тиймээс Бурхан намайг баян болгоно" гэж буруугаар уншдаг. Дуулаач "ЭЗЭНд баярлагтун Тэр чамд зүрхний чинь хүслийг өгнө" гэсэн юм. Энэ дуулалд хэрэв бид Эзэнийхээ дотор баярлавал бидний баяр хөөрийг буюу Эзэнийг өгнө хэмээн амласан юм. Хожим нь Есүс хэрэв бид зөвт байдлын төлөө өлсөж, цангагч хүмүүс бол бид зөвт байдлаар цадах болно (Матай 5:6) хэмээн амласан байдаг. Энэ нь санхүүгийн хөгжил дэвшлийн талаарх амлалт биш, харин илүү сайн зүйлийн буюу сүнслэг хөгжил дэвшлийн талаарх амлалт юм.

Энэ курс хичээлээр бидний сурсан эхний алхам нь ажиглалт байсан. Бидний ажиглалт үнэн зөв байх ёстой, эс бөгөөс бидний хөрвүүлэг буруу байх болно. Текстийг буруу уншихаас болгоомжил. Нэгэн хүн Библи судлалын эхний гурван алхмыг ийнхүү хэлсэн байдаг:

1. Текстийг унших.

2. Текстийг дахин унших.

3. 2-р алхмын дараа текстийг дахин унших!

Текстийг гуйвуулах

Түүхийн туршид хуурамч багш нар өөрсдийн алдааг зөвтгөх гэж Бичвэрийг гуйвуулсаар ирсэн. Паул зарим хүмүүс зөвхөн итгэлээр зөвтгөгдөх тухай түүний сургаалыг санаатайгаар нүгэл үйлдэх хүслээ зөвтгөх гэж гуйвуулахыг сэрэмжлүүлсэн байдаг (Ром 6:1-2). Зарим үед хүмүүс боолчлолыг өмгөөлөхөд эсвэл төр засаг нь үндэстний цөөнхийг устгахыг зөвтгөхийн тулд Бичвэрийг ашиглаж байжээ. Өнөөдөр зарим сайнмэдээг тунхаглагчид Бурханы амлалтыг Бичвэрийн үнэнд үл нийцэх хөгжил дэвшлийн сайнмэдээ болгон гуйвуулж байна.

Петр өөрсдийгөө сүйрэлд хүргэхээр Бичвэрийг гуйвуулдаг хүмүүсийн талаар сэрэмжлүүлсэн байдаг (2 Петр 3:16). Үүнтэй адилаар Иаков багшлах хүмүүсийн хүлээх хариуцлагын талаар анхааруулсан (Иаков 3:1). Библийг заадаг хүмүүс бид худал хуурмаг санааг дэмжихийн тулд Бичвэрийг гуйвуулахгүй байхад маш болгоомжтой хандах ёстой.

Төсөөллийн утга нэмэх

Өмнө өгүүлсэн гурван шүүгчийн түүх нь Библийг хөрвүүлэгчдийн гаргадаг өөр нэг нийтлэг алдааг харуулдаг: Энэ нь Бичвэрийн утга нь уншигчийн төсөөллөөс үүдэлтэй гэсэн санаа юм. Зарим хүмүүс зөвхөн "Бичвэрийн утга санаа надад юуг мэдрүүлж байна вэ?" гэж асуудаг. Сэтгэл хөдлөл, мэдрэмж чухал боловч Бичвэрийн эцсийн үнэн бичигчийн бичсэн зүйлд агуулагддаг бөгөөд түүний бичсэн зүйлийн талаар би ямар мэдрэмжтэй байгаагаас хамаардаггүй.

Өөртөө хэт итгэлтэй байх

Хөрвүүлэгч өөрийнхөө талаар хэзээ ч алдаа гаргахгүй гэж бодвол өөрийн бодол үндэслэлдээ хэт найдах болно. Бид текстийн утгын талаар дүгнэлтэд хүрэхийн тулд Үгийг судалдаг хэдий ч, дүгнэлт маань буруу байх үед алдаагаа хүлээн зөвшөөрөх даруу хандлагатай байх учиртай. Хэн ч бүх хариултыг мэдэхгүй.

Хөрвүүлэгт даруу чанар маш чухал. Библийг судалж байхдаа бурханлаг итгэгчид ч санал зөрөлддөг хэсгүүдийг бид олж харна. Энэ нь аль нэг тал нь санаатайгаар Бичвэрийг гуйвуулсан гэсэн үг биш юм. Харин энэ нь Бичвэрийн үнэний төлөө өөрсдийгөө зориулсан хоёр талын хоорондох чин сэтгэлийн зөрөлдөөн байх боломжтой. Бид өөрсдийн хөрвүүлгийн талаар даруу байдлыг сахиж, бусад хүмүүсийн өөр үзэл бодлыг хүндэлж хүлээцтэй байх ёстой.

Таны ээлж

Хүмүүс Библиэс эш татаж байна гэж бодоод буруу зүйлийг хэлдэг зарим жишээг доор дурдлаа. Анхааралтай уншихын ач холбогдлыг илүү сайн ойлгохын тулд жишээ бүрээс гуйвуулсан текстийг олж, Библид үнэндээ юу гэж бичсэн байгааг тэмдэглээрэй. Эхний жишээг танд зориулан бүтнээр нь оруулсан.

Хэвлэж болох PDF-ийг эндээс авах боломжтой.

Хичээл бүрийн гол санаанууд

(1) Хөрвүүлгийн алхамд “Текст ямар утгатай вэ?” гэж асуудаг.

(2) Хөрвүүлгийг хүндрүүлдэг зарим бэрхшээлүүд нь:

• Хэлний ялгаа

• Ахуй соёлын ялгаа

• Танил биш газарзүй

• Танил биш утга зохиолын хэлбэрүүд

(3) Буруу хөрвүүлэг хийхэд хүргэдэг зарим нийтлэг алдаанууд:

• Текстийг буруу унших

• Текстийг гуйвуулах

• Төсөөллийн утга нэмэх

• Өөртөө хэт итгэлтэй байх