Lesson 10: Бичвэрийн хэсгийг судлах дасгал ажил

(1) Сонгосон Бичвэрийн хэсгүүдэд хөрвүүлгийн алхмыг хэрэгжүүлэх дасгал хийх.

(2) Бичвэрийн хэсгийг нарийвчлан судалсан талаар бичгийн ажил эсвэл аман танилцуулга бэлтгэх.

Ангийн удирдагчид өгөх зөвлөмж: Энэ хичээлийн дасгал ажлыг хийхэд ангид хангалттай цаг гаргаарай. Нэгээс илүү хичээлийн цаг шаардлагатай бол үүнийг гаргана уу.

Энэ курсээр бид ажиглалт, хөрвүүлэг, хэрэгжүүлэлт гэсэн Библийн хөрвүүлгийн алхмуудыг үзсэн. Бид мөн Библийн хөрвүүлэг хийхэд гаргадаг нийтлэг алдаанаас зайлсхийх талаар суралцсан. Бид Бичвэрийг судлах чухал зарчмуудын талаар ярилцсан. Бид алхам бүр дээр дасгал ажил хийсэн. Энэ хичээлээр бид бүх үйл явцыг эргэн харах болно. Дараа нь ангид нийтээр Хуучин гэрээ болон Шинэ гэрээний багц хэсгүүдийг ижил үйл явцын дагуу хамт судлах болно. Та үүнийг хийх өөрийн ур чадвараа ч дадлагажуулна. Улмаар та 1-р хичээл дээр эхлүүлсэн курсын төслөө дуусгах болно.

Эхлэхийн өмнө дараах зургийг хараарай:

Библийг хөрвүүлэх нь[1]

Энэ хичээлийн дараагийн хэсэгт Библийн хөрвүүлгийн бүх үйл явцыг эргэн харна. Хөрвүүлгийн үйл явцын алхам бүрд хөрвүүлэгчид зөв дүгнэлтэд хүргэх асуултуудыг асуух ёстой.

Эдгээр асуулт нь хөрвүүлгийн зарчмуудад тулгуурладаг. Үйл явц болгонд асуух ёстой асуултуудыг жагсаасан байгаа. Өгөгдсөн жишээнүүд нь асуултуудыг хэрхэн ашиглах, тэдгээр нь зөв хөрвүүлэгт яагаад хэрэгтэй болохыг харуулна.

Асуултуудын багцыг хөрвүүлэгт ашиглах багажны хайрцаг гэж үзэх хэрэгтэй. Барилгачин хүн тодорхой барилгын төсөлд бүх багажаа ашиглах шаардлагагүй байдаг шиг энд байгаа бүх асуулт бүх хэсэгт хамаарахгүй. Хэрэв хариулт нь байхгүй мэт санагдах, эсвэл ямар нэгэн утга нэмэхгүй тохиолдолд асуултыг багц хэсэгт хамааралгүй гэж үзэх боломжтой.

Бичигч

• Бичигч нь хэн байсан бэ?

• Түүний үүрэг оролцоо нь ямар байсан бэ?

• Хүлээн авагч хүмүүстэй ямар харилцаатай байсан бэ?

1 Тимот 5:20: “Нүгэл үйлдсээр байгаа хүмүүсийг бүгдийн өмнө зэмлэ”

1 Тимот захидлыг бичигч элч Паул нь Тимотын багш байв. Энэ нь залуу пастор Тимотод Паулын өгсөн заавар юм.

Эдгээр зүйлийг ойлгох нь Паулын заавар нь итгэгч хүн бүрд шууд хамааралгүй байж болохыг ойлгоход тусалдаг.

Анхны сонсогчид

• Тэд хэн байсан бэ?

• Тэд ямар хүмүүс байв?

Филемон захидал нь нэг итгэгчид хувьчлан бичсэн захидал юм.

Еврей захидал нь хавчигдаж буй иудей итгэгчдэд зориулагджээ.

Нөхцөл байдал

• Энэ Бичвэр нь авралын түүхийн аль үед бичигдсэн бэ?

2 Шастир 7:14: “Нэрээр минь дуудагдсан Миний хүмүүс өөрсдийгөө даруу байлган залбирч, нүүрийг минь эрэлхийлж, хорон муу замуудаасаа эргэх аваас, Би тэнгэрээс сонсож, тэдний нүглийг уучлан, тэдний газар нутгийг эдгээнэ.”

"Миний хүмүүс" гэдэг нь Бурханы ард түмэн болох тодорхой нэг үндэстнийг хэлж байна.

"Тэдний газар нутгийг эдгээнэ" гэсэн амлалт нь чуулганд шууд хамааралгүй байж болно.

• Ахуй соёлын нөхцөл байдал ямар байсан бэ? Хэрэв боломжтой бол анхдагч соёлыг судлахын тулд Библийн толь бичгийг ашиглана уу. Энэ нь тэдний соёл болон бидний соёлыг харьцуулах/эсрэгцүүлэх боломжийг олгоно.

2 Коринт 13:12: “Ариун үнсэлтээр харилцан мэндчилээрэй.”

Тухайн цаг үед Христэд итгэгчид ариун үнсэлтээр мэндчилэх нь тэдний соёлын нэг хэсэг байжээ.

• Тухайн үеийн үйл явдлууд юу байсан бэ?

• Чуулганы нөхцөл байдал ямар байсан бэ? (Зөвхөн Шинэ гэрээний багц хэсгүүдэд)

Номын болон багц хэсэг дэх утга зохиолын хэлбэрийн шинж чанарыг авч үзнэ.

• Энэ ном/багц хэсгийн утга зохиолын хэлбэр юу вэ?

• Энэ утга зохиолын хэлбэрийн шинж чанарууд юу вэ?

Дуулал 124:4-5:

• Утга зохиолын хэлбэр: Яруу найраг

• Шинж чанар: Параллелизм

Илчлэл 12:3:

• Утга зохиолын хэлбэр: Апокалиптик зохиол

• Шинж чанар: Амьтад нь бэлгэдлийн шинжтэй

• Бичсэн зорилго нь юу байсан бэ? Бичигчийн онцолж буй зүйл, бичигч санаа зовнилоо илэрхийлсэн байдал, тайлбар өгсөн, эсвэл уншигчдыг уриалсан зүйлсийг хайж олоорой.

1 Коринт 7:1: “Эм хүнд хүрэхгүй байх нь эр хүнд зүгээр…”

1 Коринт захидал нь Коринтын чуулганд Паулын өмнө нь асуулт асууж бичсэн захидалд хариу болгон бичигдсэн захидал юм.

• Хүлээн авагчдын асуудал/хэрэгцээ юу байсан бэ?

1 Коринт 1:10: “Ах дүү нар аа, та нар бүгд адил юм ярьж, хоорондоо хагаралдалгүй, харин адил бодол, адил шүүлт дотор нэгдэн нягтрахыг бидний Эзэн Есүс Христийн нэрээр би та нараас хүсэмжлэн гуйя.”

Хагаралын талаар захидлын туршид яригджээ.

• Бичигч хүлээн авагч хүмүүст юу хэлж байсан бэ? Бичигчийн ажиглалтын дараа өгсөн тушаалууд нь бичигч тэднээс юу хүлээж байсныг тодорхой харуулдаг. Тэдгээр нь энэ багц хэсгийг хэрхэн хэрэгжүүлэх ёстойг бидэнд харуулдаг.

Ихэвчлэн гэхдээ үргэлж биш, бүлгийн хуваалт нь багц хэсгийн төгсгөл эсвэл эхлэлийг таних тэмдэг болдог. Заримдаа бүхэл бүтэн бүлэг нэг багц хэсэг байх боломжтой. Зарим тохиолдолд бүлгийн хуваалт нь буруу хийгдсэн байдаг бөгөөд үүнийг багц хэсгийн хуваалт болгон ашиглах шаардлагагүй байдаг. Шилжилтийн мэдэгдлээр тэмдэглэгдсэн сэдвийн өөрчлөлтийг анзаараарай. Хэрэв та багц хэсэгт хэтэрхий их хэсгийг хамруулбал тухайн багц хэсэгт нэг үндсэн сэдэв байхгүй байх боломжтой. Хэрэв та багц хэсгийг хангалттай хамруулахгүй бол тухайн багц хэсгийн бүрэн утга санаа харагдахгүй байх боломжтой.

• Энэ багц хэсэгт ямар эшлэлүүд багтсан бэ?

2 Коринт 7:1: “Хайртууд минь, эдгээр амлалт байгаа тул бид…”

Энэ нь өмнөх бүлгийн төгсгөлд байрлах 2 Коринт 6:14-18 эшлэлийн нэг хэсэг юм.

Исаиа 52:13-15 эшлэл нь Исаиа 53-р бүлэгт байдаг багц хэсэгтэй ижил юм.

• Энэ нь илүү томоохон сэдэвтэй нийцсэн хүүрнэл мөн үү?

Шүүгчид 17:5: “Мика гэгч нь бурхдын өргөөтэй байсан бөгөөд ефод болон гэрийн шүтээнүүдийг хийж, хөвгүүдийнхээ нэгэнд сахил хүртээн, өөрийнхөө тахилч болгожээ.”

Нэгэн хүн өөрийн гэсэн тахилч, шүтээнүүдтэй байжээ. Энэ эшлэл болон Шүүгчид 17-18-р бүлгийн эргэн тойронд өрнөх хүүрнэл нь Шүүгчид номын ерөнхий сэдвийг харуулж байна. "Хүн бүр өөр өөрийн нүдэнд зөв зүйтэй гэж үзсэнээ үйлдэж байлаа" (Шүүгчид 17:6, Шүүгчид 21:25).

• Энэ нь дараа хэрэгжүүлэлттэй холбоотой теологийг харуулж байна уу?

• Энэ нь номын өмнөх багц хэсгүүдийн хэрэгжүүлэлт мөн үү?

Ефес 4-6-р бүлэг нь гол төлөв Ефес 1-3-р бүлэгт заасан теологийн практик хэрэгжүүлэлт болдог.

Ефес 4:1-д өгүүлсэн "Иймд" гэдэг үг нь теологийг зааж байгаад практик хэрэгжүүлэлтийг заах шилжилтийг харуулдаг.

Ефес 4:1: "Иймд та нар дуудагдсан тэрхүү дуудлагадаа зүй зохистой явахыг... би хичээнгүйлэн ятгая”

• Зарим материал зөвхөн үндсэн сургаалд бэлдэж байна уу?

Марк 2:2: “Олон хүн цугларснаас үүд хавиар нь хүртэл зайгүй болов.”

Эдгээр нарийн ширийн зүйлс нь уншигчийг дээврээс бууж буй хүний тухай сонсоход бэлтгэдэг.

• Санаа бодлыг цаг хугацааны дараалалтай холбохын тулд ямар үгсийг ашигласан байна вэ?

Матай 24-р бүлэгт "Тэгэхэд" гэсэн үгийг олон дахин ашигласан байдаг.

• Асуулт тавьсан уу эсвэл асуудлыг гаргаж ирж байна уу?

Ром 6:1: “Тэгвэл бид юу гэх вэ? Нигүүлслийг ихэсгэх гээд бид нүгэлдээ байсаар байх уу?”

• Санаа бодлыг логиктой холбохын тулд ямар үгсийг ашигласан байна вэ?

Логик дарааллыг харуулахын тулд Ром 6-р бүлэгт "Учир нь" гэсэн үгийг олон дахин ашиглажээ.

• Харьцуулалт эсвэл эсрэгцэл ашигласан уу?

Ром 6:19: “Та нар өөрсдийн эрхтнүүдийг ёс бус явдалд хүргэх цэвэр бус, ёс бусын боол болгон өргөж байсан бол одоо өөрсдийн эрхтнүүдийг ариусалд хүргэх зөвт байдлын боол болгож өргө.”

Өнгөрсөн дэх боолчлол (ёс бус, хууль бус байдал) болон одоогийн боолчлолыг (зөвт байдал) хооронд нь эсрэгцүүлсэн.

• Давталт эсвэл ижил төстэй нэр томьёо ашигласан уу?

Ром 6-р бүлэгт давтагдсан/ижил төстэй нэр томьёо: үхэх, үхсэн, үхэгсэд, үхэл, цовдлогдсон, оршуулагдсан, хүчингүй болгохын тулд.

Эдгээр нь бүгд эцсийн, дуусгавар болсныг тодорхойлдог үгс юм.

• Жагсаалт (тоочих) байна уу?

1 Тимот 4:12: “Харин чи итгэгчдэд үг, зан байдал, хайр, итгэл хийгээд цэвэр ариунаараа үлгэр дуурайл бол.”

• Ямар дүрслэл эсвэл хэлц үг ашигласан байна вэ?

Ром 6-р бүлэгт цовдлолыг хэлц үг болгон ашигладаг.

• Зорилгодоо хүрэх арга замыг дүрсэлсэн үү?

Ром 8:13: “Харин та нар Сүнсээр биеийн үйлсийг үхэлд хүргэвэл амьдрах болно.”

“Сүнсээр” – арга зам

“биеийн үйлсийг үхэлд хүргэвэл” – зорилго

“амьдрах болно” – эцсийн зорилго

• Мэдэгдэл эсвэл шаардлагын үндэслэлийг өгсөн үү?

Ром 6-р бүлэгт дэвшүүлж буй санаагаа тайлбарлахдаа "учир нь" гэсэн үгийг олон дахин ашигласан байдаг.

• Оргил цэг эсвэл эргэлтийн цэг байна уу? Энэ асуултыг ялангуяа хүүрнэлээс их асуудаг.

Матай 21:33-41 хэсэгт өгүүлсэн зүйрлэлд 38-39-р эшлэл нь оргил цэг юм.

• Шалтгаан ба үр дагаврыг дүрсэлсэн үү?

Галат 5:16: “Харин би та нарт хэлье. Сүнсээр яв, тэгвэл та нар махбодын хүслээ гүйцэлдүүлэх гэхгүй.”

Шалтгаан: “Сүнсээр яв”

Үр дагавар: “та нар махбодын хүслээ гүйцэлдүүлэх гэхгүй.”

• Тухайн хэсэг нь өмнөх эсвэл дараагийн хэсгээ хураангуйлж байна уу?

Шүүгчид 2:11-23 хэсэг нь Шүүгчид номыг хураангуйлдаг.

Ефес 5:1 эшлэл нь Ефес 4:25-32 хэсгийг хураангуйлдаг.

• Тухайн хэсэгт өөр Бичвэрийг эш татсан, дурдсан хэсэг байна уу? Шинэ гэрээний бичигчид Хуучин гэрээнээс эш татаж, дүрслэлүүдийг олон удаа ашигласан байдаг.

Ром 12:1: “Иймд ах дүү нар аа, Бурханы өрөвч сэтгэлээр та нараас хичээнгүйлэн гуйя. Өөрсдийн биеийг Бурханд тааламжтай, амьд, ариун тахил болгож өргө. Ингэх нь та нарын сүнслэг мөргөл мөн.”

Энэ эшлэл дэх тахил гэдэг үг Хуучин гэрээний ямар нэг зүйлийг хэлсэн үгэн зураглал юм.

• Энэ хэсэгт ямар чухал нэр томьёо байна вэ?

1 Коринт 2:14-15 эшлэл дэх чухал нэр томьёо:

• төрөлх хүн

• Сүнслэг хүн

Ром 8-р бүлгийн чухал нэр томьёо:

• махбод

• Сүнс

• Эдгээр нь энэ хам сэдэвт юу гэсэн утгатай вэ? Нэр томьёо бүр дээр үгийн судлал хий.

• Энэ юу гэсэн утгатай вэ? Өгүүлбэр яг юуны талаар хэлж байгааг өөрийн үгээр бич.

• Яагаад үүнийг оруулсан бэ? Яагаад энд байрлуулсан бэ? Энэ өгүүлбэр байхгүй бол ямар ялгаа гарахыг бодож үз.

Одоо та эшлэл болон багц хэсгийн нарийн ширийн зүйлсийг анхааралтай ажигласан тул бичигчийн анхны сонсогчдод хандсан сургаалыг хураангуйлна уу. Эшлэлийн хураангуй нь нэг өгүүлбэр байж болно. Багц хэсгийн хураангуй нь хэд хэдэн өгүүлбэр эсвэл бүр хэд хэдэн догол мөр байх боломжтой.

Энэ алхмын зорилго нь бичигчийн анхны уншигчдад юу хэлж байсныг энгийнээр тодорхойлох юм. Энэ нь төсөөлөх эсвэл бүтээлч байх цаг биш юм. Та номлож, заахдаа сургаалыг хүмүүст хүргэх аргыг боловсруулахдаа бүтээлч байж болно, гэхдээ одоо та Бичвэрийн утгыг олохыг хичээж байна. Утга нь таны төсөөллөөс бус Бичвэрээс гарах ёстой.

• Бичигч анхны уншигчдад юу хэлж байсан бэ?

1 Коринт 1:10-13 эшлэлийг дараах байдлаар хураангуйлах боломжтой: "Онол сургаал болон нөхөрлөлд хамтдаа санал нэгдэж, эсрэг бүлгүүдэд хуваагдахгүй байхыг хүсье. Би Хлоегийн гэр бүлээс та нарын маргалдаж байгаа талаар сонссон. Та нар янз бүрийн удирдагчдыг дагахаар сонгож байгаа ч, харин зөвхөн Христ та нарын төлөө нас барсан билээ.

Та хураангуйгаа дахин шалгаж үзээрэй. Та ажиглалтаас гаргаж авсан материалаасаа дараах асуултуудыг асууж болно:

• Би Бичвэрийн анхны сонсогчдын нөхцөл байдлыг хангалттай авч үзсэн үү?

• Бичигчийн санааг чилээсэн болон энэ хэсгийг бичих болсон зорилго юу байв?

• Багц хэсэгт хийсэн миний хөрвүүлэг номын сэдэвтэй нийцэж байна уу?

• Багц хэсэгт хийсэн миний хөрвүүлэг номын үүрэг оролцоог харуулж байна уу?

• Багц хэсгийн онцолж буй бүтэц миний хураангуйтай нийцэж байна уу?

• Багц хэсэг дэх өгүүлбэр бүрийн утга миний хураангуйг дэмжиж байна уу?

• Би бичигчийн ашиглаж байгаа чухал нэр томьёог зөвөөр хөрвүүлж байна уу?

Энэ багц хэсгээс бүх цаг үе, бүх хүмүүст хамаарах нэг зарчмыг олоорой (Багц хэсэг хэд хэдэн зарчмыг зааж болох ч, дасгал хийхийн тулд нэгийг сонгоорой). Үүнийг нэг өгүүлбэрээр илэрхийл.

Ефес 4:25 эшлэлд байгаа зарчмуудын нэг нь: "Бүх харилцаандаа үнэнийг хэл."

Дараа нь таны зарчим текстийн анхны уншигчдад зориулсан сургаалыг зөв тусгаж байгаа эсэхийг шалгаарай:

• Энэ зарчим текстэд тодорхой заагдсан уу?

• Энэ зарчим бусад Бичвэртэй нийцэж байна уу?

• Энэ зарчим бүх цаг үе, бүх хүмүүсийн хувьд үнэн үү?

Зарчмыг бусад үнэнтэй холбох:

• Бичвэрийн өөр хэсэгт үүнтэй холбоотой ямар үнэн илчлэгдсэн бэ?

• Энэ үнэн бидний мэдлэгт юу нэмэрлэж байна вэ?

• Миний хөрвүүлэг Бичвэрийг бүхэлд нь хамруулж харвал засаж залруулахаар байна уу?

• Энэ үнэн өөр багц хэсэгтэй зөрчилдөж байгаа мэт санагдаж байна уу? Хэрэв тийм бол тэдгээрийг эвцэлдүүлэх боломжтой юу?

Таны олсон зарчмыг янз бүрийн аргаар хэрэгжүүлж болно. Нэг тодорхой орчин үеийн хэрэгжүүлэлт бий болгоорой.

• Энэ үнэнийг ямар тодорхой, орчин үеийн нөхцөл байдалд хэрэглэж болох вэ?

• Энэхүү зарчим нь хэзээ, хаана, хэнд хамаатай вэ?

• Энэ үнэнийг үзэл баримтлалын хувьд төдийгүй үйлдлээр хэрхэн хэрэгжүүлж болох вэ?

• Хэрэв би энэ багц хэсгийг үнэхээр нухацтай авч үзвэл, миний амьдралд ямар өөрчлөлт гарах вэ?

Бурханы Үгийг өдөр тутмын амьдралдаа хэрэгжүүлэхэд Ариун Сүнснээс танд удирдамж өгөхийг хүсээрэй.

Шинэ гэрээний захидлуудыг хөрвүүлэхдээ бид захидлын талаар аль болох их зүйлийг ажигласнаар судлалаа эхлүүлдэг. Бид захидлын дамжуулж буй сургаалыг тодорхойлохын тулд судлалаа үргэлжлүүлдэг. Улмаар бид зарчмуудыг өөрсдийн амьдралд хэрэгжүүлснээр судлалаа дуусгадаг. Энэхүү хөрвүүлгийн аялал нь биднийг захидлын анхны хүлээн авагчдын ертөнцөөс орчин үеийн уншигчдын ертөнцөд хүргэдэг.

Хамтдаа хийх дасгал ажил

► Ангиараа хамтдаа 1 Иохан 2:15-17 эшлэл дээр хөрвүүлгийн үйл явцын дагуу ажилла. Дээр дурдсан асуултууд, хөрвүүлгийн үйл явцаас гадна утга зохиолын хэлбэр болох Шинэ гэрээний захидлын онцлогуудыг авч үзэхээ мартуузай (6-р хичээлийг үз).

Бие даан хийх дасгал ажил

► Суралцагч бүр эдгээр багц хэсгийн нэгийг сонгож хөрвүүлгийн үйл явцын дагуу ажилла. Дараа нь суралцагчид дүгнэлтээ бүлгийн бусад гишүүдтэйгээ хуваалцаарай.

• Ром 13:8-10

• Ефес 6:18-20

• 2 Тимот 4:6-8

• Иаков 3:13-18

• 1 Петр 2:9-10

Хуучин гэрээний хуулийг хөрвүүлэхдээ бид эхлээд энэ нь анхны сонсогчдод юу гэсэн утгатай байсныг ойлгох ёстой. Бид тэдний нөхцөл байдал болон бидний нөхцөл байдлын ялгааг, ялангуяа бид Шинэ гэрээний дор амьдарч байгаа зэрэг нөхцөл байдлын ялгааг авч үзэх ёстой. Хуучин гэрээний хуулиас бүх цаг үеийн, бүх хүмүүст хамаарах зарчмыг бид олж мэдэх ёстой. Дараа нь бид энэхүү зарчмыг амьдралдаа хэрэгжүүлж чадна.

Хамтдаа хийх дасгал ажил

► Ангиараа хамтдаа Тооллого 15:37-41 эшлэл дээр хөрвүүлгийн үйл явцын дагуу ажилла. Дээр дурдсан асуултууд, хөрвүүлгийн үйл явцаас гадна утга зохиолын хэлбэр болох Хуучин гэрээний хуулийн онцлогуудыг авч үзэж, 6-р хичээлийн асуултуудыг ашиглахаа мартуузай.

Бие даан хийх дасгал ажил

► Суралцагч бүр эдгээр багц хэсгийн нэгийг сонгож хөрвүүлгийн үйл явцын дагуу ажилла. Дараа нь суралцагчид дүгнэлтээ бүлгийн бусад гишүүдтэйгээ хуваалцаарай.

• Леви 19:9-10

• Гэтлэл 20:4-6

• Гэтлэл 22:10-13

• Дэд хууль 14:1-2

1-р хичээл дээр та дараах Бичвэрийн багц хэсгүүдийн нэгийг сонгосон.

• Дэд хууль 6:1-9

• Иошуа 1:1-9

• Матай 6:25-34

• Ефес 3:14-21

• Колоссай 3:1-16

Одоо та хөрвүүлгийн аяллын алхам бүрийг дадлагажуулсан тул сонгосон Бичвэрийн багц хэсгээ сайтар судална уу. Судлалаа дуусгаад дараах хэлбэрүүдийн аль нэгээр бэлдэнэ үү:

1. Хэрэв та энэ курсыг бүлгээр судалж байгаа бол судлал ажлаа хуваалцаж танилцуулга хийнэ. (1) Ажиглалтаа харуулж, (2) текстээс зарчмуудыг зааж, (3) текст өнөөгийн итгэгчдэд хэрхэн хамаатай болохыг харуулна уу.

2. Хэрэв та ганцаараа судалж байгаа бол (1) ажиглалт, (2) текстэд заасан зарчмууд, (3) өнөөгийн итгэгчдэд зориулсан хэрэгжүүлэлт зэргийг багтаан 5-6 хуудас бичнэ үү.