Lesson 1: Библийн хөрвүүлгийг танилцуулах нь

(1) Христэд итгэгчийн хувьд Библийг гүнзгий судлах нь яагаад чухал болохыг мэдэх.

(2) Библийг судлахад шаардлагатай гурван алхмыг нэрлэж чаддаг болно.

(3) Бичвэрийн багц хэсгийг анхааралтай судлах үйл явцыг эхлүүлнэ.

(4) Библийг хөрвүүлэхэд Ариун Сүнсний гэрэлтүүлэг чухал болохыг үнэлж сурна.

Энэхүү курсын нэг зорилго нь Бичвэрийн хэрэгжүүлэлт болон бие даан судлах тал дээр өсөхөд тань туслах юм. Үүний эхний сайн алхам нь одоо Библи уншиж байгаа дадал хэвшлээ шударгаар үнэлэх билээ.

► Одоо байгаа Библи унших дадал хэвшлийнхээ талаар хэдэн минут ярилцаарай. Энэ нь бие биенээ шүүмжлэх цаг биш, харин “Би Бурханы Үгийг хэрхэн уншиж байна вэ?” гэсэн асуултын талаар эргэцүүлэн бодох цаг юм. Энд таны бодлыг хөглөх хэдэн асуулт байна. Үүнд:

• Би Библийг хэр тогтмол уншдаг вэ?

• Би Библийг уншихдаа хэр их цаг зарцуулдаг вэ?

• Би унших багц эшлэлүүдээ хэрхэн сонгодог вэ?

• Би юу уншиж байгаагаа ойлгож байна уу?

• Би уншсан зүйлээ санадаг уу?

• Би амьдралдаа хэрэгжүүлэлт болгож чадаж байна уу?

• Библийг илүү уншихад саад болж буй 2-3 шалтгаан юу вэ?

Тайвань улсын иргэн, итгэгч Самуел нь Христэд итгэгч болоод 15 жил өнгөрсөн ч, сүнслэг төлөвшилтийн шинж тэмдэг түүнд бага байв. Тэр өөрийн сүнслэг өсөлтдөө сэтгэл дундуур явдаг байжээ. Нэгэн Ням гарагийн цуглааны дараа тэрээр ихэд бухимдан “Пастораа, та надад Библиэ унш, Бурхан Үгээрээ дамжуулан чамтай ярина гэж байнга хэлдэг. Би ч хичээсэн. Өглөө бүр Библийг уншсан ч надад Тэр юу ч хэлдэггүй, яагаад тэр вэ?” гэж асуулаа.

Харин пастор нь түүнд “Самуел аа, чи Библиэ хэрхэн уншдаг талаараа надад хэлээч” гэж хариулав. Самуелын хариултаас тэр яагаад бүтэлгүйтсэнийг харах боломжтой байв. Тэр “Би өглөө бүр ажилдаа явахын өмнө Библиэ нээгээд, нэг эшлэл уншдаг” гэж хариулжээ. Пастор нь лавшруулан “Чи Библиэ цааш үргэлжлүүлэн уншихдаа бүтэн ном эсвэл бүтэн бүлгийг уншдаггүй байсан юм уу?” гэж асуухад, тэр “Үгүй ээ, би зүгээр л өглөө бүр Библиэ нээхэд таарсан нэг эшлэлийг л уншдаг. Гэхдээ энэ нь надад бараг тус болдоггүй!” гэж хариулсан юм.

Самуелд Библийг ийм маягаар уншихад тулгарч буй бэрхшээлийг ойлгоход нь туслахын тулд пастор нь түүнээс Библиэ нээж, таарсан анхны эшлэлийг уншихыг хүслээ. Самуел “Дараа нь Есавын уулыг негевчүүд, Филистийн талыг шефелачууд эзэмших болно. Тэд Ефраимын нутаг, Самарийн нутгийг эзэмших бөгөөд Гилеадыг Бениамин эзэмших болно” (Обадиа 1:19) гэсэн хэсгийг уншив.

Дараа нь пастор Самуелаас хэдэн асуулт асуув. “Негев хаана байдаг вэ? Шефела хаана байдаг вэ? Ефраимын нутаг хаана байдаг вэ? Самари, Бениамин, Гилеад хаана байдаг вэ?” гэж асуухад тэр “Би мэдэхгүй” гэж хариулсан. Дараагийн долоо хоногт нь тэд “Библийг хэрхэн унших вэ” сэдэвтэй Библийн хичээл эхлүүлжээ. Үүний дараагийн хэдэн долоо хоногт Самуел Библийг хөрвүүлэх зарчмуудаас суралцаж эхлэв. Улмаар тэр Бичвэр өнөөдөр хэрхэн бидэнд ярьдагийг ойлгож суралцсан юм.

Энэхүү курсын зорилго нь Библийн хөрвүүлгийн зарчмуудыг сурч, хэрэгжүүлэхэд тань туслах юм. Эдгээр хичээлүүд болон дасгалуудаар дамжуулан та Бурханы Үгийг ойлгох, амьдралдаа хэрэгжүүлэх, бусдад заахад туслах арга хэрэгслүүдийг олж авах болно.

Зарим хүмүүс Библийг ойлгоход дэндүү хэцүү гэж үздэг учраас уншихаас зайлсхийдэг. Библийг Бурханы Үг гэж итгэдэг олон хүн үүнийг хэрхэн хөрвүүлж, хэрэгжүүлэхээ мэддэггүй. Библийг судлах нь хэцүү ажил юм. Харин үүний төлөө хөдөлмөрлөх нь үнэ цэнтэй зүйл мөн үү? Бид яагаад Библийг судлах ёстой вэ?

Бурхан Бичвэрээр дамжуулан өөрийгөө илчилдэг

Бичвэр бидэнд Бурхан гэж хэн болохыг харуулдаг. Бурханы Үг нь Бурханы мөн чанарын илэрхийлэл юм (Дуулал 119:15, 27). Бурхан хэрхэн боддог, Түүнд юу чухал, Тэр хүмүүстэй хэрхэн харилцаж, хүн төрөлхтний түүхэнд хэрхэн ажилладгийг Бичвэр бидэнд харуулдаг. Бурханы хууль (Түүний шаарддаг зүйл) нь Түүний зан чанар, шударга ёс, мэргэн ухааныг тусган харуулдаг (Дуулал 119:137). Бид Библийг унших бүрдээ энэ нь Бурханы талаар бидэнд юуг харуулж байгаад анхаарлаа хандуулах ёстой юм.

Бурханыг мөргөн хүндэлдэг нэгэнд Бичвэр Бурханыг илчилдэг. Энэ нь мөргөн хүндлэгчдийн Бурханд хандах хандлагыг зааварлан чиглүүлж, бидний амьдрах ёстой арга замыг харуулдаг.

Библи бол дэнлүү юм

Дуулаач Бурханы Үгийг бидний амьдрах замыг чиглүүлдэг дэнлүүтэй зүйрлэсэн байдаг (Дуулал 119:105). Библи бол бидэнд хэрхэн бодож, амьдрахыг заадаг Бурханы үнэн билээ.

► Дуулал 19:7-11, Дуулал 119:160, болон 2 Тимот 3:16-17 эшлэлийг унших.

Бурханы Үг нь зөв онол сургаалын эх сурвалж юм. Библи нь аврал болон ариун байдалд шаардлагатай бүх мэдлэгийг агуулдаг. Энэ зарчим нь бид өөр тусламжгүйгээр Бичвэр дэх бүх зүйлийг ойлгож чадна гэсэн үг биш юм. Энэ нь мөн уламжлал чухал биш гэсэн үг ч биш. Харин энэ нь Бурханы Үг бол итгэгч хүний эцсийн эрх мэдэл гэсэн утгатай.

Бурханы Үг нь үнэний эх сурвалж учраас Бичвэрийн мэдлэг нь биднийг үйлчлэлд бэлтгэж, сургадаг. Бид Бурханы Үгийг үнэн зөвөөр заахдаа Бурханы эрх мэдлээр зааж сургадаг. Үнэн бол Түүнийх болохоос биднийх биш билээ.

Библи бол сүнслэг сүү юм

Шинэ төрсөн хүүхэд сүүг хүсдэг шиг итгэгчид Библийг хүсэх ёстой гэж элч Петр хэлжээ (1 Петр 2:2). Хүүхэд бие бялдрын хувьд өсөхийн тулд сүү хэрэгтэй шиг Христэд итгэгч хүн сүнслэг байдалд өсөхийн тулд Бичвэр хэрэгтэй юм. Бурханы Үгийг тогтмол хэрэглэхгүй бол бид хэзээ ч сүнслэг төлөвшилд хүрч чадахгүй.

Бид Библийг хөрвүүлэх ур дүйд болон Бурханы Үгээс үнэнийг ялган таних чадварт суралцсанаар төлөвшдөг (Еврей 5:14). Бусдад заахдаа Бурханы Үгийг ашиглах чадвар маань хөгждөг.

Библи бол зөгийн бал мэт амттай

Дуулаач Бурханы Үгийг зөгийн балтай зүйрлэсэн байдаг (Дуулал 19:10, Дуулал 119:103). Зөгийн бал нь эрүүл бөгөөд маш амттай. Бидний хувьд Бурханы Үгийг судлах нь дургүй ажил биш, харин баярлууштай зүйл байх ёстой. Дайны талбарт буй цэрэг эр гэр бүлийнхнээсээ захидал аваад баярладаг шиг, Бурхан хүүхдүүддээ бичсэн захидал болох Библийг уншихдаа бид баярлан догдлох учиртай.

Еврей хүүхдүүд багаасаа Хуулийг уншиж сурахын тулд багш нь хичээлийн эхний өдөр цагаан толгойн эхний үсгүүд дээр зөгийн бал түрхэж, хүүхдүүдээр хуудсыг долоолгосноор амтлаг амтыг мэдрүүлдэг. Багш энэхүү биет хичээлээр “хүүхэд баярлан догдлох болон сайхан амтыг [Хуультай] холбон заадаг ажээ.”[1]

Библи бол Сүнсний сэлэм юм

Библи нь сүнслэг тулаанд бидний зэр зэвсэг болдог (Ефес 6:17). Есүс цөлд сорилттой тулгарахдаа Дэд хууль номоос эш татан, Сатаны дайралтад хариулсан юм (Матай 4:1-11).

Бичвэр биднийг сүнслэг ялалт болон үр нөлөөтэй үйлчлэлд хүчирхэгжүүлдэг. Библи судлалаар дамжуулан бид хуурамч сургаалд хариулах, үнэн зөв сургаалын дагуу чуулганаа байгуулж, өнөөгийн ертөнцөд үр дүнтэй үйлчлэхэд бэлэн болдог.

Бичвэрийг судлах зохисгүй шалтгаанууд

► Еврей 4:12-13 эшлэлийг унших.

Бичвэрийг судлах олон сайн шалтгаан байдаг ч, заримдаа хүмүүс буруу сэдлээр Бичвэрийг унших болон судлах нь бий.

Зарим хүмүүс зөвхөн үзэл бодлоо хамгаалахын тулд нотлох баримт цуглуулах зорилгоор Бичвэрийг судалж болох юм. Магадгүй тэд өөрсдийн нөлөөн дор байгаа хүмүүсийг хянахын тулд мэдлэгийг ашиглахыг хүсдэг ч байх боломжтой.

Зарим хүмүүс бардамналын шалтгаанаар Бичвэрээс суралцаж болох юм. Магадгүй тэд сүнслэг байдлыг олж авснаар бусад хүмүүсээс давуу байх болно гэж боддог байх. Магадгүй өөрсдийнх нь ололт амжилтын төлөө хүмүүс тэднийг сайнаар бодоосой гэж боддог ч байж мэднэ. Эсвэл тэд Бичвэрээс суралцах нь Бурханы тааллыг хүртэхэд тусална гэж боддог ч байж магадгүй.

Эдгээр нь бүгд Бичвэрийг унших болон судлах буруу шалтгаанууд юм. Еврей 4:12-13 эшлэлд Бичвэрт хандах зөв хандлагын талаар өгүүлдэг. Хувиа хичээсэн зорилгодоо хүрэхийн тулд Бичвэрийг ашиглахын оронд энэ нь биднийх биш, Бурханы Үг гэдгийг санах хэрэгтэй юм. Бид үүнийг Бурханыг эмээн хүндэтгэсэн хандлагаар судлах учиртай. Библи нь бидний эрх мэдэл бөгөөд бид үүнд захирагдах ёстой. Бид үүнийг бусдад заахдаа даруу байдлаар зааж сургах учиртай.

Бид Бурханы Үгийг ийнхүү судалж, заах үед энэ нь бидний амьдрал дахь нүгэл эсвэл алдааг илчилж, түүнээс хэрхэн эргэхийг бидэнд харуулдаг. Энэ нь бидний болон бидний үйлчилж, удирдаж буй хүмүүсийн амьдралыг өөрчилдөг.

► Та Бичвэрийн багц хэсгийг судлахдаа одоогоор ямар үйл явцыг ашиглаж байна вэ? Библийн текстийн утгыг ойлгохын тулд хийх тодорхой алхмуудын талаар ярилц.

Самуел Библи судлах нь чухал гэдэгтэй санал нийлсэн. Гэсэн хэдий ч тэр Бичвэрээс хэрхэн суралцахаа мэддэггүй байлаа. Түүнд аргачлал хэрэгтэй байв.

Энэ курс нь Библи судлах үр нөлөөтэй аргачлалыг танилцуулах зорилготой юм. Пасторууд номлолд бэлтгэхдээ эдгээр алхмуудыг ашиглах боломжтой. Библийн багш нар ч Библийн хичээл бэлтгэхдээ эдгээрийг ашиглаж болно. Итгэгч бүр хувийн сүнслэг өсөлтийнхөө төлөө энэ аргыг хэрэглэхдээ ашиг тусыг нь хүртэж чадна.

Энэ курсын дагуух аргачлал нь гурван алхмаас бүрдэнэ.

Ажиглалт

Энэ алхмаар бид “Би Библиэс юу харж байна вэ?” гэж асуудаг. Энэ үе шатанд бид Бичвэрийн талаар аль болох олон нарийн ширийн зүйлсийг ажигладаг. Маш олон тооны уншигчид энэхүү ажиглалт алхмыг алгасаад шууд хөрвүүлэг шат руу шилждэг. Бид энэ нь юу гэж хэлж байгааг сайтар ажиглахаас нааш Бичвэрийн жинхэнэ утгыг ойлгож чадахгүй. Ажиглалт алхмаар бид Бичвэрийн текст дэх нарийн ширийн зүйлсийг хардаг. Бид Бичвэрийн сургаалд чухал ач холбогдолтой нарийн ширийн зүйлсийг тодорхойлж сурах болно. Ялангуяа нэр томьёо, бүтэц, утга зохиолын хэлбэр, хам сэдвийг судална.

Нэр томьёо

Библийн номыг судлахдаа тухайн номын туршид хэд хэдэн удаа дурдагдсан үгсийг хайж олдог. 1 Иохан захидлын 5 бүлэгт “мэдэх” гэдэг үгийн зарим хэлбэрийг 30 гаруй удаа ашигласан байдаг. Иоханы захидлыг судлахдаа номын туршид давтагдсан эдгээр үгсээс эхлэн мөшгин суралцах боломжтой. Иохан захидалдаа “мэдэх” гэдэг үгийг дурдсан хэсгүүд нь түүний сургаалыг хөрвүүлж эхлэхэд бидэнд туслах болно. Иоханы захидлыг ойлгохын тулд “Иохан биднийг юуг мэдэж чадна гэж хэлсэн бэ?”, “Тэдгээр таньж мэддэг хүмүүсийн шинж чанарууд нь юу вэ?” гэж асууж болно.

Бүтэц

Библийн номууд нь Ариун Сүнсний онгодоор маш хянуур байдлаар бүтсэн. Та Иоханы Сайнмэдээ шиг номыг судалж байхдаа Иохан Сайнмэдээгээ Есүс гэж хэн болохыг харуулдаг долоон тэмдгийн эргэн тойронд өрнөж буйгаар бичсэнийг олж мэдэх болно. Номын бүтцийг ажигласнаар энэ нь бидэнд Иоханы зорилгыг илүү сайн ойлгох боломжийг олгодог.

Бид нэг багц хэсгийг судлахдаа бүтэц нь тухайн хүүрнэлийн үргэлжлэл байгааг харж болох юм (Лук 9:28-36-д өгүүлдэг шиг). Энэ нь магадгүй дүгнэлт хийх үндэслэл ч байж болно (Ром 6:1-13-д дурдсан шиг). Энэ нь гол санаануудыг харуулахын тулд нарийн ширийн зүйлсийг ч дурдсан байж болно (Ефес 6:13-18-д хэлсэн шиг). Мөн өөр төрлийн бүтэц ч бий.

Утга зохиолын хэлбэр

Паул дээд цэгт нь тултал мэтгэлцээн өрнүүлж буй хуульчтай адил, санаагаа нотлох маш нарийн зохион байгуулалттай захидлыг бичсэн байдаг. Ром эсвэл бусад захидлыг сайн ойлгохын тулд Паулын логикийг анхааралтай дагах хэрэгтэй болдог.

Харин эсрэгээр, Иона ном нь бүх хүмүүсийн төлөөх Бурханы хайрыг харуулахын тулд бичигдсэн богино түүхэн хүүрнэл юм. Үүнийг сайн ойлгохын тулд бид “Юу нь үүнийг гайхмаар, ер бусын түүх болгож байна вэ?” хэмээн асуух хэрэгтэй. Үүний дараа та “Энэ түүхийн нарийн ширийн зүйлс нь ямар утга учиртай вэ?” гэж асууснаар Иона номыг хөрвүүлэхэд бэлэн болох болно.

Хам сэдэв

Энэ хүрээнд бид “Паул баяр хөөрийн сургаал бүхий Филиппой захидлыг бичих үедээ хаана байсан бэ?” гэх зэрэг асуултуудыг асуудаг. Тэр энэ үед Ромд байсан бөгөөд шүүх хурал болон болзошгүй цаазын ялыг хүлээж байлаа. Нөхцөл байдал нь биднийг Паул баяр хөөртэй байсан гэж хэлсэн шалтгааныг олж харахад хүргэдэг. Учир нь тэрээр хувь хүнийхээ хувьд муу нөхцөл байдалд байсан ч энэхүү баяр хөөрийг мэдэрч байсан юм.

“Илчлэл номд Бурханы мөнхийн төлөвлөгөөг илчлэхээр тэнгэр нээгдэх үед элч Иохан хаана байсан бэ?” Тэр Патмос арал дээр цөллөгт байжээ. Хавчлагын цаг үе нь Бурханы ялалтын тухай сургаалыг итгэлийн агуу урам зориг болгосон юм.

Хөрвүүлэг

Энэ алхмаар бид “Библи юу гэсэн утгатай вэ?” гэж асуудаг. Бид аль болох олон ажиглалт цуглуулсны дараа Бичвэрийн дамжуулж буй сургаалыг хайдаг. Бид бие даасан эшлэл болон бүлгүүдийг нэг ном болгон нэгтгэж буй сургаалын томоохон сэдвүүдийг олж сурах болно. Бид “Энэ номын анхны уншигчдад зориулсан сургаал нь юу байсан бэ?” гэж асуух болно. Бид бүх цаг үе, бүх газар орон, бүх соёлд үнэн байх зарчмуудыг эрж хайна.

Хэрэгжүүлэлт

Энэ алхмаар бид “Би Библийг өнөөдөр амьдрал, үйлчлэлдээ хэрхэн хэрэгжүүлэх вэ?” гэж асуудаг. Амьдралдаа хэрэгжүүлэхгүйгээр үүний утга учрыг ойлгох нь хангалтгүй юм.

Howard Hendricks сурах бичигтээ хэрэгжүүлэлтийн талаар хоёр асуултыг өгсөн байдаг.[1]

1. Энэ нь надад хэрхэн хэрэгжих вэ? Энэ нь Бичвэрийн миний амьдрал дахь хэрэгжүүлэлтийг харуулдаг.

2. Энэ нь бусдад хэрхэн хэрэгжих вэ? Энэ нь миний үйлчилж буй хүмүүсийн амьдрал дахь Бичвэрийн хэрэгжүүлэлтийг харуулдаг.

Англи улсад чуулганы түүх заадаг нэгэн нэр хүндтэй их сургуулийн профессор байжээ. Эрдмийн хувьд тэр Библийг маш сайн мэддэг байсан ч, хувь хүнийхээ хувьд тэрээр Бурханд болон Бурханы Үгэнд итгэх талаарх аливаа итгэл үнэмшлийг үгүйсгэдэг байж. Энэ хүний хувьд ажиглалт болон хөрвүүлгийн талаар ихийг мэддэг ч харамсалтай нь, хэзээ ч Бичвэрийн үнэнийг амьдралдаа хэрэгжүүлж байсангүй.

Иаков ийм хүний талаар “Учир нь үгийг сонссон атлаа эс үйлдэгч нь төрөлх царайгаа толинд харж байгаа боловч, өөрийгөө харчхаад эргэхдээ ямар байснаа даруй мартдаг хүнтэй адил юм” (Иаков 1:23-24) гэж өгүүлсэн. Англи профессорын жишээ нь хэтрүүлэгтэй байж болох ч, Бичвэрт юу гэж хэлснийг мэддэг ч өдөр тутмын амьдралдаа үүнийг хэрэгжүүлдэггүй олон хүн байдаг. Библийг жинхэнээсээ судалж мэдсэн бол үр дүнд нь практик хэрэгжүүлэлт бий болдог.

► Үл итгэгч хүн Бичвэрийн утгыг ойлгож чадах уу?

Энэ асуултын хариулт нь “Тийм, гэхдээ зөвхөн хэсэгчлэн.” Энэхүү курсээр бид хөрвүүлгийг чиглүүлэх үйл явцыг судлах болно. Эдгээр алхмууд нь Бурханы Үгийн дамжуулж буй сургаалыг ойлгоход бидэнд тусална. Библи нь бусад номын адил уншсан хүндээ маш их үнэнийг илчлэн харуулах болно.

Гэсэн хэдий ч, Ариун Сүнсний гэрэлтүүлэггүйгээр хүний ойлголт үргэлж хязгаарлагдмал байдаг. Оюуны судалгаа нь дангаараа хэзээ ч сүнслэг үнэнийг илчилж чадахгүй. Паул бичихдээ:

Хүний бодлыг доторх сүнснээс нь өөр хэн мэдэх билээ? Түүнчлэн Бурханыхыг Бурханы Сүнснээс өөр хэн ч эс мэднэ. Бурханы бидэнд бэлэглэсэн юмсыг мэдэхийн тулд бид ертөнцийн сүнсийг бус, харин Бурханы Сүнсийг хүлээн авсан юм. Бид үүнийг хүний мэргэн ухааны сургасан үгсээр бус, харин Сүнсний сургасан үгээр ярьдаг бөгөөд сүнслэг зүйлсийг сүнслэг хүнд тайлбарладаг юм. Харин төрөлх хүн Бурханы Сүнсний зүйлсийг хүлээж авдаггүй. Ийм хүнд эдгээр нь мунхаглал бөгөөд сүнслэгээр тунгаан цэгнэх учиртай зүйлсийг тэр мэдэж чадахгүй (1 Коринт 2:11-14).

Үл итгэгч хүн Бичвэрийн зарим сургаалыг ойлгож чаддаг ч, Библийн гүн гүнзгий үнэнүүд Ариун Сүнсний гэрэлтүүлгээр илчлэгддэг. Бичвэрийг судлах нь мэдээлэл олж авахаас илүү зүйл бөгөөд энэ нь итгэл, дуулгавартай байдлыг шаарддаг. Биднийг Бурханы Үгийн эрх мэдэлд захирагдах хүртэл Бурханы Сүнс амьдралд маань өөрчлөлт авчрах ажлыг хийж чадахгүй. Учир нь:

1. Бид Бичвэрийг судлахын өмнө залбирах ёстой. Биднийг суралцахад удирдан чиглүүлэхийг Ариун Сүнснээс бид хүсэн гуйдаг. Иаков “Харин та нарын хэн нэг нь мэргэн ухаанаар дутвал, бүх хүнд өгөөмрөөр, буруушаалгүй өгөгч Бурханаас гуйг. Тэгээд түүнд өгөгдөх болно” (Иаков 1:5) гэжээ.

2. Бид Бичвэрийг судалсныхаа дараа хувьчлан хариу үйлдэх ёстой. Библийг судлах зорилго нь оюуны мэдээлэл авахаас илүү бөгөөд энэ нь хувийн өөрчлөлт юм. Хэрэв бид судлах явцдаа өөрчлөгдөөгүй бол суралцах зорилгоо алдсан гэсэн үг. Энэхүү өөрчлөлт нь зөвхөн Ариун Сүнсээр дамжуулан ирдэг.

Тариачин ба үрийн тухай заасан Есүсийн сургаалт зүйрлэлд зарим үр зам дагуу унахад шувууд тэдгээрийг иддэг. Зарим үр нь үндэсгүй учир нар төөнөхөд хатаж орхидог. Зарим үрийг зэрлэг ургамал боомилж орхидог. Гэсэн ч зарим үр нь сайн хөрсөнд унаж, үр жимсээ ургуулдаг. Сайн хөрс бол Үгийг сонсож ойлгодог хүн хэмээн Есүс тайлбарлажээ (Матай 13:3-23). Энэ сургаалт зүйрлэл нь Үгийг ойлгохгүйгээр сонсох боломжтойг харуулдаг. Бид Ариун Сүнсний дуу хоолойд зүрх сэтгэлээ нээх үед л Бурханы Үгийг бүрэн ойлгож ухаардаг.

Хичээл бүрийн гол санаанууд

(1) Библийг судлах шалтгаанууд:

• Бурхан Бичвэрээр дамжуулан өөрийгөө илчилдэг.

• Библи бол дэнлүү юм.

• Библи бол сүнслэг сүү юм.

• Библи бол зөгийн бал мэт амттай.

• Библи бол Сүнсний сэлэм юм.

(2) Библийг судлах үйл явц гурван алхамтай.

• Ажиглалт: Би Библиэс юу харж байна вэ? Судлахдаа:

  • Нэр томьёо

  • Бүтэц

  • Утга зохиолын хэлбэр

  • Хам сэдэв

• Хөрвүүлэг: Библи юу гэсэн утгатай вэ?

• Хэрэгжүүлэлт: Би Библийг өнөөдөр амьдрал, үйлчлэлдээ хэрхэн хэрэгжүүлэх вэ? Асуух:

  • Энэ нь надад хэрхэн хэрэгжих вэ?

  • Энэ нь бусдад хэрхэн хэрэгжих вэ?

(3) Библийг судлахад бидэнд Ариун Сүнсний гэрэлтүүлэг хэрэгтэй. Учир нь:

• Бид Бичвэрийг судлахын өмнө залбирах ёстой.

• Бид Бичвэрийг судалсныхаа дараа хувьчлан хариу үйлдэх ёстой.

Дараах Бичвэрийн хэсгээс нэгийг сонгоод хөрвүүлэх үйл явцыг эхлүүлээрэй.

• Дэд хууль 6:1-9

• Иошуа 1:1-9

• Матай 6:25-34

• Ефес 3:14-21

• Колоссай 3:1-16

Та энэхүү курсын туршид энэ Бичвэрийг судлах болно. Энэ эхний хичээлийн хувьд Бичвэрийг анхааралтай уншаарай. Гурван хэсэг дээр тэмдэглэл хийх:

1. Ажиглалт: Сонгосон Бичвэрийн багц хэсгийнхээ нарийн ширийн зүйлсийг аль болох дэлгэрэнгүй бич. Бичвэрийн багц хэсгээс хамааран нарийн ширийн зүйлс нь харилцан адилгүй байх болно. Танд тусалж болох зарим асуултууд:

• Энэ Бичвэрт тэмдэглэгдсэн үйл явдлууд хаана болсон бэ?

• Энэ Бичвэрийн дүрүүд нь хэн хэн бэ?

• Энэ Бичвэр юу гэж тушааж байна вэ?

• Энэ Бичвэрт ямар үгс давтагдсан бэ?

2. Хөрвүүлэг: Энэхүү багц хэсгийн анхдагч мэдээ сургаалыг 2-3 өгүүлбэрт хураангуйлан бичнэ үү.

3. Хэрэгжүүлэлт: Та Бичвэрийг амьдрал болон үйлчлэлдээ хэрэгжүүлэх 2-3 арга замыг бичнэ үү.