Lesson 14: ანგია–მალაქია

ამ გაკვეთილის ბოლოს, სტუდენტმა უნდა:

(1) იცოდეს ანგიას, ზაქარიას და მალაქიას დაწერის სავარაუდო თარიღი და ისტორიული გარემო.

(2) შეეძლოს ანგიას, ზაქარიას და მალაქიას ძირითადი თემების და მიზნების გამოკვეთა.

(3) აღიარებდეს ღვთის კანონისადმი ერთგულების შენარჩუნების მნიშვნელობას.

(4) აფასებდეს ძველი აღთქმის მესიანურ დაპირებებს.

(5) უკავშირებდეს ანგიას, ზაქარიას და მალაქიას გზავნილებს დღევანდელ ქვეყნიერებას.

წაიკითხეთ ანგია, ზაქარია, და მალაქია.

დაიზეპირეთ ანგია 2:7-9 და მალაქია 3:1.

გადასახლების შემდგომი წინასწარმეტყველები საუბრობდნენ იმ სირთულეებზე, რომლებიც იუდას შეექმნა გადასახლებიდან დაბრუნების შემდეგ:

• პოლიტიკური სირთულეები: იუდას სპარსეთი განაგებდა, არ ჰყავდათ მეფე დავითის შტოდან და იერუსალიმის მახლობლად მცხოვრებნი ეწინააღმდეგებოდნენ ქალაქის აღდგენის მცდელობებს.

• სულიერი გამოწვევები: ტაძარი არ იყო აღდგენილი, ურწმუნო წარმართებთან ქორწინებებმა გამოიწვია რელიგიური სინკრეტიზმი და ბევრი ებრაელი აღარ იცავდა შაბათს.

• სოციალური პრობლემები: არსებობდა დაძაბულობა დაბრუნებულებსა და იერუსალიმში დარჩენილებს შორის, მდიდრები ცუდად ეპყრობოდნენ ღარიბებს, ფართოდ გავრცელდა განქორწინებები.

ძვ. წ. 539 წ., ბაბილონი დაეცა სპარსეთის წინაშე. სპარსეთის მმართველმა კიროსმა გამოსცა განკარგულება, რომელიც უფლებას აძლევდა ებრაელებს იუდაში დაბრუნებულიყვნენ. მომდევნო წელს ზერუბაბელი 50 000 ადამიანს წაუძღვა ბაბილონიდან იერუსალიმში. ჩასვლიდან მალევე, მათ დაიწყეს ტაძრის აღდგენა. თუმცა, მტრები ეწინააღმდეგებოდნენ ამ საქმეს და ტაძარზე მუშაობა მალე შეწყდა.

ძვ. წ. 520 წ., ანგიამ და ზაქარიამ ხალხს შთააგონეს განეახლებინათ ტაძარზე მუშაობა. ამის გამო მათ იცნობენ, როგორც „ტაძრის წინასწარმეტყველებს“. ტაძარზე მუშაობა ძვ. წ. 520 წ.-ში განახლდა ხოლო ტაძრის აღდგენა დასრულდა ძვ. წ. 516 წ.

ძვ. წ. 458 წ., ეზრამ გადასახლებულთა ნაწილი იერუსალიმში დააბრუნა. აღთქმაზე აქცენტის გაკეთებით, ეზრა ხელმძღვანელობდა ღვთისმსახურების აღორძინებას და სოციალურ რეფორმებს.

ნეემია დაბრუნდა იერუსალიმში ძვ. წ. 444 წ. და ქალაქის კედლების აღდგენის მცდელობებს ხელმძღვანელობდა. ისიც ბევრ მსაგავს პრობლემას წააწყდა, რაც ეზრას წინაშე იდგა: ქორწინების პრობლემები, შაბათის დაუცველობა და აღთქმისადმი ერთგულების ნაკლებობა. მალაქიაც, რომელიც იმავე პერიოდში მსახურობდა, საუბრობდა ბევრ მსგავს საკითხზე.

ანგიას მიზანი

ანგიამ ქადაგება ძვ.წ. 520 წლის ბოლოს დაიწყო. მან გადმოგვცა ტაძართან დაკავშირებული ოთხი გზავნილი. იერუსალიმში ცხოვრების სირთულის გამო, ხალხმა ტაძრისადმი მოშურნეობა დაკარგა. ზერუბაბელის დაბრუნებიდან თითქმის ორი ათწლეულის შემდეგ ტაძარი ჯერ კიდევ დანგრეული იყო. ანგია იყო ღვთის მაცნე ღვთის სახლის სახელით.

ანგიას გზავნილი

გზავნილი პრიორიტეტების შესახებ (ანგია 1)

ხალხმა აღადგინა თავიანთი სახლები, მაგრამ ღვთის ტაძარი არ აღუდგენიათ. ღმერთმა ჰკითხა: „იმის დრო ხომ დადგა, რომ შეფიცრულ სახლებში ცხოვრობდეთ, ეს სახლი კი მიგდებული იყოს?” (ანგია 1:4).

ხალხი საკუთარ საჭიროებებს უფრო მეტ ყურადღებას უთმობდა, ვიდრე ღვთის სახლს. ღმერთმა გააფრთხილა, რომ მათი ცუდი მოსავალი, საკვების ნაკლებობა, შეუსაბამო ტანსაცმელი და შემოსავალი, რომელიც უცებ ქრებოდა - ანუ ყველაფერი, რასაც განიცდიდნენ, იმის გამო იყო, რომ ისინი მას არ აყენებდნენ პირველ ადგილზე.

ღმერთმა მოუწოდა ხალხს, მისი პრიორიტეტები საკუთარ ინტერესებზე მაღლა დაეყენებინათ. ამის საპასუხოდ, „შეშინდა ხალხი უფლის წინაშე“ და „მივიდნენ და დაიწყეს მუშაობა ცაბაოთ უფლის, მათი ღმერთის სახლში” (ანგია 1:12, 14).

ანგაის 1-ლი თავის გზავნილი თანხვედრაშია 3 იოანეს 1:2-თან. „საყვარელო! ვლოცულობ, რომ ჯანმრთელად იყო და მიაღწიო ისეთ წარმატებას, როგორ წარმატებასაც შენი სულით მიაღწიე.“ ეს ასევე ჩანს მეორე რჯულის 27-28-ე თავებში, სადაც ღმერთმა აღუთქვა მატერიალური კურთხევა მორჩილებს, ხოლო ურჩებს კი მატერიალური წყევლა.

მიუხედავად იმისა, რომ ეს მნიშვნელოვანი სწავლებაა, ის არ არის ბიბლიის სრული გზავნილი. ზოგიერთმა მქადაგებელმა აიღო წმინდა წერილი, როგორიცაა ანგიას 1-ლი თავი, რათა ასწავლოს, რომ ყოველ ერთგულ მორწმუნეს ფინანსური კეთილდღეობა და ფიზიკური ჯანმრთელობა ექნება. ჩვენ ანგაის 1-ლი თავი და 3 იოანეს 1:2 წმინდა წერილების სინათლეზე უნდა წავიკითხოთ, როგორიცაა მაგალითად იობის წიგნი და ებრაელთა 11:37, ისევე როგორც იერემიას მსგავსი ადამიანების გამოცდილების გათვალისწინებით, რომლებიც ერთგულად ემსახურებოდნენ ღმერთს, მატერიალური კურთხევის გარეშე. მართლაც, ბევრმა ადამიანმა განიცადა მატერიალური ზიანი ღვთისადმი მორჩილების გამო. სულიერი აყვავება, მიწიერი კურთხევების ხილვის გარეშე, შესაძლებელია. ანგია კონკრეტულ სიტუაციაზე ლაპარაკობდა; მას არ ჩამოუყალიბებია უნივერსალური პრინციპი, რომელიც ღვთის ყოველ ერთგულ შვილს კეთილდღეობას უქადის.

ანგიას გზავნილი (გაგრძელება)

შეტყობინება იმედგაცრუების, სასოწარკვეთის შესახებ (ანგია 2:1-9)

პირველი გზავნილიდან ექვსი კვირის შემდეგ ანგია დაბრუნდა ღვთის კიდევ ერთი გზავნილით. მან ჰკითხა: "თქვენს შორის ვინ შემორჩა, ვისაც ეს სახლი აქვს ნანახი მისი პირვანდელი დიდებისას? ახლა როგორ გიჩანთ თვალში? განა არარაობა არაა თქვენს თვალში მასთან შედარებით?" ზოგიერთი უხუცესი, რომლებსაც ახსოვდათ სოლომონის ტაძრის დიდება, ატირდა, როდესაც დაინახეს ამ ახალი ტაძრის შემცირებული ზომები და უხარისხო მშენებლობა.[1]

საპასუხოდ, ღმერთმა აღუთქვა, რომ ახალი ტაძრის დიდება უფრო დიდი იქნებოდა, ვიდრე პირველი ტაძრისა. ეს დაპირება შესრულდა, როდესაც ჩვილი იესო მიიყვანეს ტაძარში. სიმონი ლოცულობდა: „რადგან იხილეს ჩემმა თვალებმა ხსნა შენმიერი... შენი ხალხის, ისრაელის სადიდებლად” (ლუკა 2:28-32).

გზავნილი დაუმორჩილებლობის შესახებ (ანგია 2:10-19)

ორი თვის შემდეგ ანგია დაბრუნდა ღვთის სხვა გზავნილით. მან შეახსენა მღვდლებს სიწმინდისა და უწმინდურების კანონები. კანონის თანახმად, მსხვერპლშეწირვის საგანი უწმინდურდებოდა, თუ ის, რაიმე უწმინდურს შეეხებოდა. უწმინდურება გადამდები იყო.

შემდეგ ანგიამ მიუთითა იერუსალიმის მკვიდრთა ცხოვრებაზე. ისინი ტაძარზე მუშაობდნენ, მაგრამ მათმა უწმინდურმა ცხოვრებამ წაახდინა მათი შრომა. ანგიამ თავის მსმენელს შეახსენა გზავნილი, რომელსაც დღეს დიდი მნიშვნელობა აქვს ქრისტიანი მუშაკებისთვის; “ღმერთთან თქვენი სიარული უფრო მნიშვნელოვანია, ვიდრე თქვენი შრომა ღმერთისთვის.”

ანგიამ ხალხს მორჩილებისკენ მოუწოდა. მან თავისი გზავნილი ღვთის დაპირებით დაასრულა: „ამ დღიდან ვაკურთხებ!.”

გზავნილი შიშის შესახებ (ანგია 2:20-23)

ანგიას კითხვისას უნდა გვახსოვდეს, რომ იერუსალიმი მტრებით იყო გარშემორტყმული. ამ მტრებმა ერთხელ უკვე მოახერხეს ტაძრის სამუშაოების შეჩერება (ეზრა 4). ღმერთი დაჰპირდა, რომ დაამხობდა მათ, ვინც იუდას ეწინააღმდეგებოდა. მიუხედავად იმისა, რომ იუდეა უმნიშვნელო იყო გარშემომყოფ ერებთან შედარებით, ის ღმერთმა აირჩია და მისი კუთვნილება იყო. ის დაიცავს თავის ხალხს ბოროტებისგან. მათ არ ჰქონდათ შიშის საფუძველი.

ზაქარიას მიზეზი

ზაქარია იყო მღვდლთა ოჯახის წევრი, რომლებიც ზერუბაბელთან ერთად დაბრუნდნენ იუდეაში (ნეემია 12:4). ანგიას მსგავსად, ზაქარია იყო „ტაძრის წინასწარმეტყველი“. მისი პირველი წინასწარმეტყველების გაჟღერება მოხდა ანგიას პირველი წინასწარმეტყველებიდან დაახლოებით ორი თვის შემდეგ. ტაძარზე გაკეთებულ აქცენტთან ერთად, ზაქარია ხაზს უსვამს, რომ ღმერთი აღადგენს თავის სამეფოს დღესაც და მომავალშიც.

ზაქარიას გზავნილი

რვა ღამეული ხილვა (ზაქარია 1:1 – 6:8)

ზაქარია იწყებს იუდას ღმერთთან დაბრუნების მოწოდებით. ვინაიდან მათმა წინაპრებმა უარყვეს წინასწარმეტყველები, ღმერთმა ისინი გადასახლებაში გაგზავნა. ახლა ისინი დაბრუნდნენ და ზაქარია მათ განახლებული ერთგულებისკენ მოუწოდებს.

ამ შესავალს რვა ღამისეული ხილვის რიგი მოჰყვება. ზაქარია რვაჯერ ხედავს ხილვას, ახსნას სთხოვს ზეციურ მაცნეს და იღებს ხილვის განმარტებას. ეს ხილვები ეხმიანება გადასახლების შემდგომ საზოგადოებასთან დაკავშირებულ საკითხებს: იმ ერების სამსჯავროს, რომლებიც ჩაგრავდნენ იუდას, დაცვას მათი მტრებისგან, ტაძარს და ცოდვას საზოგადოებაში.

1. მხედრები პატრულირებენ მიწას (ზაქარია 1:7-17) გზავნილი: ღმერთი ემზადება აღადგინოს თავისი ხალხი და განსაჯოს მათი მჩაგვრელები.

2. ოთხი რქა და ოთხი მჭედელი (ზაქარია 1:8-21) გზავნილი: ღმერთი განსჯის იუდას მტრებს. ისინი გაიფანტებიან ისევე, როგორც ღვთის ხალხი გაიფანტა.

3. კაცი საზომი საბელით (ზაქარია 2:1-13) გზავნილი: ღმერთმა იერუსალიმი თავის საკუთრებად მონიშნა. ის არის კედელი, რომელიც იცავს ქალაქს.

4. იეშუა მღვდელმთავარი (ზაქარია 3:1-10) გზავნილი: მღვდლობის აღდგენა. იერემიას 13:1-11-ში მღვდლობის სელის ტანსაცმელი დაბინძურებული იყო. მიუხედავად იმისა, რომ სატანა იდგა მღვდელმთავარი იეშუას მარჯვნივ, რათა ბრალი დაედო მისთვის, ღმერთმა გახადა მას დალაქავებული ტანისამოსი და სუფთა ტანსაცმელი მისცა. ღმერთი მუდამ აღადგენდა მღვდლობას და გამოგზავნის მომავალ „შტოს“ (მორჩს), რომელიც ისრაელში მშვიდობის ახალ დღეს დაადგენს.

5. სასანთლე და ორი ზეთისხილის ხე (ზაქარია 4:1-14) გზავნილი: ტაძრის ხელახლა აშენება. ტაძრის აღდგენა ღვთის საქმეა და მისი მხარდაჭერა ექნება.

6. აფრიალებული გრაგნილი (ზაქარია 5:1-4) გზავნილი: ცოდვის განკითხვა. დიდი გრაგნილი, რომლის ზომაცაა 9 მეტრი 4,5 მეტრზე, შეიცავდა აღთქმისეულ წყევლას მათთვის, ვინც არღვევდა ღვთის კანონს. ცოდვა გადასახლების შემდგომ საზოგადოებაში ისევე გასამართლდება, როგორც გადასახლებამდე.

7. ქალი საწყაულში (ზაქარია 5:5-11) გზავნილი: ცოდვა გადასახლების შემდგომ საზოგადოებაში. ქალი, რომელიც სიმბოლურად ცოდვას წარმოადგენდა, ჩასვეს საწყაულში და ტყვიის საფარით დალუქეს. ფრთიანმა ანგელოზებმა საწყაული ბაბილონში წაიღეს და ცოდვა მოაშორეს იერუსალიმს.

8. ოთხი ეტლი (ზაქარია 6:1-8) გზავნილი: იუდას მტრების სამსჯავრო. ეს ხილვა თანხვედრაშია პირველ ხილვასთან. ოთხი ეტლი, რომლებიც წარმოადგენენ ღვთის სულის მოქმედებას ქვეყნიერებაზე, გვაჩვენებს მის უზენაესობას მთელს სამყაროზე. ღმერთმა გაასამართლა იუდას მტრები და განაგრძობს თავისი ხალხის აღდგენას.

წინასწარმეტყველებები (ზაქარია 6:9-14:21)

ზაქარია მოიცავს მთელ რიგ წინასწარმეტყველებებს. ღმერთი აგზავნის ზაქარიას, რათა გვირგვინი დაადგას მღვდელმთავარ იეშუას. ეს განასახიერებდა მომავალ „შტოს“ (მორჩს), რომელიც იმეფებს და მღვდლობასაც გასწევს. ეს მესიანური გზავნილი მიუთითებს იესო ქრისტეს მოსვლაზე.

ზაქარია 7-8-ე თავებში წინასწარმეტყველმა უპასუხა ბეთელიდან წარმოგზავნილების შეკითხვას. გადასახლების დროს ხალხი წლის მეხუთე თვეს მარხულობდა ტაძრის დანგრევაზე გლოვის ნიშნად. ამ დელეგაციამ იკითხა, იყო თუ არა საჭირო ეს მარხვა ახლა, როცა ტაძრის აღდგენა თითქმის დასრულდა.

ზაქარიას პასუხი ბევრად უფრო ფართო იყო, ვიდრე თავდაპირველი შეკითხვა. ღმერთმა ჰკითხა: "თქვენი მარხვა ჭეშმარიტი მონანიების ნიშანი იყო, თუ მხოლოდ და მხოლოდ რიტუალი?" თუ მარხვა იყო ჭეშმარიტი მონანიების ნიშანი და თუ იუდამ გადასახლებაში ისწავლა გაკვეთილი, მაშინ მარხვა საჭირო აღარ იყო. თუ მარხვები რიტუალის მეტს არაფერს წარმოადგენდა, მათ არც მაშინ და არც ახლა აზრი არ ჰქონია.

შემდეგ ღმერთი დაჰპირდა დროს, როცა იუდას მარხვას დღესასწაულად გადააქცევდა. დადგება დღე, როდესაც ებრაელ ხალხს დედამიწის ყველა ხალხზე მეტად მიაგებენ პატივს. „მარხვა მეოთხე თვისა...სიხარულად, ლხინად და საამურ ზეიმად იქცევა იუდას სახლისთვის... და მოვლენ ხალხნი მრავალნი და ერნი ძლიერნი, რათა ეძიონ ცაბაოთ უფალი იერუსალიმში და ილოცონ მის წინაშე” (ზაქარია 8:19, 22).

ზაქარიას 9-14 თავები ასახავს მესიის მოსვლას. ისრაელის მტრები (სირია და ფილისტიმელები) აღიგვებიან ქვეყნიდან. ღმერთი საოცარი გამოხატულებით გვპირდება, რომ გადაარჩენს წარმართთა ნატამალს (ზაქარია 9:5-7).[1] ზაქარია წინასწარმეტყველებს იმ დღეს, როდესაც ისრაელის ჭეშმარიტი მეფე ვირზე ამხედრებული შევა იერუსალიმში და გადაარჩენს თავის ხალხს. ამაყი მმართველებისგან განსხვავებით, რომლებმაც იუდა უბედურებამდე მოიყვანეს, ეს მმართველი თავმდაბალი და მართალი იქნება. ის იმოქმედებს როგორც მწყემსი კეთილი, რომელიც დაიცავს ფარას. როცა ცხვრები უარყოფენ ამ მწყემსს, ისინი გაიფანტებიან. თუმცა, საბოლოოდ, ღმერთი გამოისყიდის თავის სამწყსოს და გადაარჩენს იერუსალიმს. იუდეა აღდგება და ყველა ერი მოვა იერუსალიმში თაყვანისცემის მიზნით.

ზაქარია ახალ აღთქმაში

ზაქარიას ციტირება ხშირად ხდება ახალ აღთქმაში. კომენტატორებმა ახალ აღთქმაში შენიშნეს სამოცდაშვიდი ციტატა ზაქარიას წინასწარმეტყველებიდან.[2] სახარებისეულ ვნების კვირის ამბებში, ზაქარიას 9-14 თავები არის ძველი აღთქმის ყველაზე ხშირად მოხსენიებული ნაწილი. ზაქარია მეორეა ეზეკიელის შემდეგ, რომელიც ასევე ხშირად არის ციტირებული გამოცხადების წიგნში. ზაქარიას მესიანური წინასწარმეტყველებები მოიცავს:

• მართალი შტო, ანუ მორჩი (3:8; 6:12-13)

• თავმდაბალი, ამხედრებული სახედარზე (9:9-10)

• მწყემსს უარყოფენ და ოცდაათ შეკელ ვერცხლად ყიდიან (11:4-13; 13:7)

• ის ვინც განგმირეს (12:10)

• მომავალი მსაჯული (14)

მალაქიას მიზანი

სახელი მალაქია ნიშნავს "ჩემს წარგზავნილს". ვინაიდან ის ლაპარაკობდა ეზრასა და ნეემიას მიერ ნახსენები მრავალი ცოდვის შესახებ, სავარაუდოა, რომ მალაქია ამ ორი ლიდერის თანამედროვე იყო. მალაქია სავარაუდოდ ქადაგებდა ძვ. წ. 475-425 წლებს შორის პერიოდში

მიუხედავად იმისა, რომ იუდა არ დაბრუნებია კერპთაყვანისმცემლობას, მათი რელიგიური მსახურება სულიერობისგან დაცლილი იყო. იაჰვესადმი ერთგულების სიტყვიერ აღიარებებს არ ახლდა ცხოვრების შეცვლა. მალაქია დაიწერა იმისთვის, რათა გაცხადებულიყო ღმერთის ბრალდებები იუდას წინააღმდეგ.

მალაქიამ ასევე უპასუხა იუდას წუწუნს იაჰვეს წინააღმდეგ. ანგია და ზაქარია დაჰპირდნენ, რომ ტაძრის აღდგენა მოიტანდა მშვიდობას, კეთილდღეობას და ღვთის თანდასწრების დაბრუნებას. ამის ნაცვლად, იუდა გვალვას, ეკონომიკურ ბრძოლებს და პოლიტიკურ სისუსტეს განიცდიდა. ხალხი იაჰვეს ადანაშაულებდა მისი დანაპირების შეუსრულებლობაში. მალაქია დაიწერა, რათა მათთვის ამ ჩივილებზე ღვთის პასუხი მიეტანა.

► მალაქია დაუპირისპირდა იუდას, რადგან ის არ აკმაყოფილებდა ღვთის მოთხოვნებს. მიუხედავად იმისა, რომ ისინი მსხვერპლს სწირავდნენ ტაძარში და იცავდნენ რჯულის წესებს, ისინი პატივს არ სცემდნენ ღმერთს. ვიდრე მალაქიას ბრალდებებს წაიკითხავთ, განიხილეთ, თუ რითი შეიძლება თანამედროვე ქრისტიანებმა შეურაცხყონ ღმერთი.

მალაქიას გზავნილი

მალაქიას წიგნი შედგება ექვსი „დავის“ (კამათის) ანუ განხილვისგან. თითოეული განხილვა წარმოდგენილია სამ ნაწილად:

1. ღმერთი აკეთებს განცხადებას იუდას საქციელთან დაკავშირებით.

2. ხალხი პასუხობს შეკითხვით.

3. ღმერთი პასუხობს კითხვას.

განხილვა 1: ღვთის სიყვარული თავისი ხალხის მიმართ (მალაქია 1:2-5)

1. შესავალი: “მე შეგიყვარეთ“ - ამბობს უფალი.

2. შეკითხვა: “როგორ შეგვიყვარეო?”

3. პასუხი: ღმერთმა პატივი მიაგო ისრაელს (იაკობს), იმ დროს როცა დასაჯა ედომი (ესავი).[1]

განხილვა 2: მღვდლების უპატივიმცემლობა ღმერთის მიმართ (მალაქია 1:6-2:9)

1. შესავალი: ძე პატივს სცემს მამას, თუ მამა ვარ, სად არის ჩემი პატივისცემა? რატომ მოიძულეთ ჩემი სახელი, მღვდლებო?

2. შეკითხვა: “როგორ მოვიძულეთ შენი სახელი?”

3. პასუხი: შებილწული პური მოგაქვთ ჩემს სამსხვერპლოზე. უფლის სამსხვერპლოს პატივისცემის ნაცვლად, მღვდლები კოჭლ და სნეულ ცხოველებს სწირავდნენ.

განხილვა 3: ქორწინების აღთქმის უპატივცემულობა და შეუსრულებლობა (მალაქია 2:10-16)

1. შესავალი: იუდა ორგული იყო და შებღალა აღთქმა.

2. შეკითხვა: “როგორ შევბღალეთ აღთქმა?”

3. პასუხი: (1) კერპთაყვანისმცემლებზე დაქორწინებით და (2) ქორწინების აღთქმის დარღვევით განქორწინების გზით.

განხილვა 4: ღვთის სამართლიანობა (მალაქია 2:17-3:5)

1. შესავალი: “დაღალეთ უფალი თქვენი სიტყვებით.”

2. შეკითხვა: “რითი დავღალეთ?”

3. პასუხი: ღმერთის დადანაშაულებით ბოროტების უგულებელყოფაში.

ღმერთი არწმუნებს იუდას, რომ წარმოგზავნის მაცნეს, რომელიც მოუმზადებს გზას თვით უფალს, რათა ის თავის ტაძარში მივიდეს. ის ყველგან განიკითხავს ცოდვას სადაც მას იპოვის.

განხილვა 5: ღვთის მეათედის ქურდობა (მალაქია 3:6-12)

1. შესავალი: “რადგან მე, უფალი, არ ვიცვლები. მოიქეცით ჩემკენ და მეც მოვიქცევი თქვენკენ.”

2. შეკითხვა: “როგორ მოვიქცეთ?”

3. პასუხი: ერთგულების გამოჩენით ღვთის მეათედის გადახდაში.

განხილვა 6: ქედმაღლური სიტყვები უფლის მიმართ (მალაქია 3:13-4:3)

1. შესავალი: “ქედმაღლური იყო თქვენი სიტყვები ჩემს მიმართ - ამბობს უფალი.”

2. შეკითხვა: “რა გვითქვამს შენზე?”

3. პასუხი: ამბობდით: "ფუჭია ღმერთის წინაშე მსახურება“. ხალხი ღმერთს ადანაშაულებს, რომ ის არ აკურთხებს მორჩილებს და არ განიკითხავს ურჩებს. ამის საპასუხოდ ღმერთი გვპირდება, რომ უფლის დღე მოდის. იმ დღეს ღმერთი გაასამართლებს ბოროტმოქმედებს და დაინდობს ერთგულებს.

დასკვნა (მალაქია 4:4-6)

თავის დასკვნაში მალაქია კვლავ იმეორებს მთელი წიგნის გზავნილს. ის მოუწოდებს იუდას, გაიხედოს უკან („გახსოვდეთ მოსეს... რჯული“) და გაიხედოს წინ („აჰა, გამოგიგზავნი... ელიას“, რათა მოგამზადოს „უფლის უდიდესი და საშინელი დღის მოსვლისთვის“).

როდესაც დავასრულებთ ძველი აღთქმის კვლევას, დაუთმეთ დრო და მოძებნეთ რამდენიმე წინასწარმეტყველება, რომლებიც შესრულდა ქრისტეს მოსვლისას. იესოს დაბადებამდე ასობით წლით ადრე ღმერთმა გაამხილა მისი ცხოვრების ზუსტი დეტალები. ამ წინასწარმეტყველებების შესრულება მოწმობს იესოზე, როგორც აღთქმულ მესიაზე.

ანგია გვახსენებს, რომ ჩვენ ღვთის ხალხი ვართ და რომ ის თავის მიზანს ეკლესიის მეშვეობით ასრულებს. ანგიას 2:9-ში ჩაწერილი დაპირება აღდგენილ ტაძარზე სრულად არასოდეს შესრულებულა. წმიდათა წმიდაში აღარასოდეს ყოფილა აღთქმის კიდობანი და ღვთის დიდება აღარასოდეს გამოჩენილა იმ ხარისხით, რაც თან ახლდა პირველი ტაძრის მიძღვნას (2 ნეშტთა 5:13-14).

და მაინც, დაწყებული ჩვილი იესოს მიერ ტაძრის მონახულებით და ეკლესიის მსახურების გაგრძელებით დღეს, ეს დაპირება სრულდება. იესოს მიწიერი მსახურებისას „ჩვენ ვიხილეთ მისი დიდება, როგორც მამისგან მხოლოდშობილის დიდება” (იოანე 1:14). ადრეული ეკლესიის მსახურებისას ღვთის დიდება მთელ რომის იმპერიაში ჩანდა. დღეს, როგორც ღვთის ტაძრები, (1 კორინთელთა 3:16). ჩვენ ვაგრძელებთ ქვეყნიერებისთვის ღვთის დიდების ჩვენებას.

ანგიას გზავნილის ნაწილი ეფუძნება რიტუალური სიწმინდის ძველ აღთქმისეულ კანონებს. მოსეს რჯულში რიტუალურად წმიდაა ნივთი, რომელიც შეხებაში იყო უწმინდურ ნივთთან, უწმინდურდებოდა. თუმცა, იესოს მოსვლით, ყველაფერი შეიცვალა. იესო (წმიდა) ეხება კეთროვნებს (უწმინდურებს) და წმენდს მათ. ქრისტიანებს დედამიწის მარილს უწოდებენ, ვისაც უწმინდურ სამყაროში სიწმინდე უნდა შემოჰქონდეთ. ფილიპელებში პავლე შეახსენებს თავის მკითხველებს, რომ მიუხედავად იმისა, რომ „ჭირვეულ და უკუღმართ თაობაში“ ვცხოვრობთ, ჩვენ უნდა „ვანათებდეთ, როგორც მნათობები სამყაროში“ (ფილიპელთა 2:15). ჩვენ არ უნდა გვეშინოდეს უწმინდურ სამყაროსთან შეხების. პირიქით, ჩვენ მოწოდებულნი ვართ შემოვიტანოთ ღვთის სიწმინდე ჩვენს სამყაროში და გარდავქმნათ ისინი, ვისთან შეხებაშიც ვართ.

ზაქარია და მალაქია აჩვენებენ, რომ ღმერთი მუდმივ ერთგულებას მოითხოვს. გადასახლებიდან დაბრუნების შემდეგ დაწერილი ეს წინასწარმეტყველებები აჩვენებენ, რომ გუშინდელ კურთხევებს ვერ დავენდობით. შესაძლოა მოსალოდნელი იყო, რომ გადასახლებისას ნასწავლი გაკვეთილები შეაკავებდა ისრაელს თავის ორგულობაში დაბრუნებისგან. თუმცა ზაქარია ძვ. წ. 520 წ. და მალაქია ორი თაობის შემდეგ გვააჩვენებენ, თუ რამდენად სწრაფად შეგვიძლია დავივიწყოთ ის გაკვეთილები, რომლებსაც ღმერთი გვასწავლის. ჩვენ მუდმივად უნდა დავუბრუნდეთ ღვთის სიტყვის ავტორიტეტს.

(1) შეასრულეთ შემდეგი დავალებებიდან ერთ-ერთი.

ვარიანტი 1: ჯგუფური დავალება

მე-13 გაკვეთილში წარმოდგენილი მოდელის გამოყენებით (თავდაპირველი გზავნილიდან „მათი ქალაქი“ გადადით მის გამოყენებაზე „ჩვენი ქალაქი“), გამოიყენეთ მალაქიას ერთ-ერთი "დავა" დღევანდელი ეკლესიის მიმართ. განიხილეთ თავდაპირველი გზავნილი იუდასადმი, განსხვავებები იუდასა და თანამედროვე ეკლესიას შორის, მალაქიას მიერ ნასწავლი პრინციპი და როგორ გამოიყენება ის თანამედროვე ეკლესიაში.

ვარიანტი 2: ინდივიდუალური დავალება

მოამზადეთ ქადაგების ან ბიბლიის შესწავლის დეტალური გეგმა მალაქიას თანახმად, თემაზე „ღმერთისადმი ერთგულება“. გამოიყენეთ "დავების" სტრუქტურა იმის საჩვენებლად, თუ როგორ შეუძლია ღმერთს დაელაპარაკოს ეკლესიას დღეს.

(2) გაიარეთ ამ გაკვეთილის ტესტი. ტესტი მოიცავს საზეპირო მუხლებს წმიდა წერილებიდან.

(1) რომელ სამ სულიერ პრობლემას შეეხნენ წინასწარმეტყველები გადასახლების შემდეგ?

(2) რა დროით არის დათარიღებული ანგიას და ზაქარიას წიგნები?

(3) ანგიამ ოთხი გზავნილი გადმოგვცა. მიუთითეთ თითოეული გზავნილის თემა.

(4) რა არის ზაქარიას თემა?

(5) დაასახელეთ ზაქარიას ორი მესიანური წინასწარმეტყველება.

(6) რატომ გვჯერა, რომ მალაქია ქადაგებდა ძვ.წ. 475-425 წლებში?

(7) ჩამოთვალეთ მალაქიაში ღმერთის თითოეული „დავის“ სამი ნაწილი.

(8) დაწერეთ ზეპირად ნასწავლი მუხლები: ანგიის 2:7-9 და მალაქია 3:1.