Lesson 8: Madai ya Yesu kuwa Yeye ni Mungu

MUHIMU SANA: kabla ya kuanza somo la 8, fanya mdahalo uliotolewa mwishoni mwa somo la 7. Kutegemea ukubwa wa darasa lako, mdahalo huu unaweza kuchukua kipindi chote. Tafadhali usiharakishe katika zoezi hili. Huu ni wakati wako wa kujihakikishia kwamba unaweza kutumia taarifa iliyoko katika somo la 7.

“Jia,” Lee alisema kwa mashaka, “Nimekuwa nikifikiria sana kuhusu mazungumzo yetu. Kama kweli Yesu alifufuka kutoka kwa wafu, hiyo ni vizuri sana! Ni lazima nikiri kwamba unao ushahidi mzuri wa Ufufuo kama historia ya ukweli na siyo hadithi za kutunga na kusimuliwa. Hayo yate yanavutia. Naamini sitakuwa nimekukwaza kama bado nitaendelea kukuuliza swali lingine.”

“Hapana,” Jia alijibu. “sio kwamba nataka kushinda hoja. Ninachojaribu ni kukushirikisha jambo muhimu katika maisha yangu. Swali lako ni nini?”

“Kila kitu ulichokisema kinaleta maana. Lakini hiyo itathibitishaje kwamba Yesu ni Mungu? Mtu maarufu sana? Hakika! Mwalimu mashuhuri? Hakika! Inawezekana mkubwa kuliko Buddha. Lakini, ni Mungu? Kwa nini usikubali tu kwamba alikuwa mwalimu mashuhuri? Kwa nini ni lazima useme kwamba Yesu alikuwa Mungu?”

► Utamjibuje Lee? Tutajuaje kwamba Yesu alikuwa Mungu?

Kenneth Copeland ni mwalimu maarufu sana katika harakati ya injili ya mafanikio. Kwa mujibu wa Copeland, Kristo alikuja kwake kwa njia ya maono akamwambia:

Usitaabike wakati watu wanapokushusha na kusema vibaya juu yako. Walisema hivyo kwangu. Je,hawatazungumza vivyo hivyo kuhusu wewe? Kwa kiwango kile unachoendelea kufanana na mimi, ndivyo watakavyozidi kufikiria zaidi juu yako. Walinisulubisha kwa kuwa nilisema kwamba mimi ni Mungu. Lakini sikusema kwamba mimi ni Mungu; nilisema tu kwamba nilitembea pamoja naye na kwamba alikuwa ndani yangu. [1]

Copeland anasema kwamba Yesu hakusema kwamba yeye ni Mungu. Watu wengine wengi walikubaliana na Copeland; wanasema kwamba Yesu hakuwahi kusema kwamba yeye ni Mungu. Je! hii ni kweli? Au je, Yesu alidai kuwa Mungu?

► Utamjibuje Kenneth Copeland? Je! Yesu alidai kuwa Mungu?

Kama Yesu alidai kwamba yeye ni Mungu, alikuwa ni kiongozi pekee wa dini kubwa kuliko zote duniani kutoa madai haya. Mohammedi hakuwahi kujinasibu kwamba yeye ni Mungu; Buddha hakuwahi kujinasibu kuwa Mungu. Kama Yesu alijinasibu kuwa Mungu, hii inaitenga dini ya Kikristo mbali na dini nyingine kubwa duniani. Tutayaangalia madai ya Yesu katika sehemu mbili- madai yake wakati wa huduma na madai yake wakati wa mateso yake.

Yesu alisema nini wakati wa Huduma Yake?

Yesu alisema kuwa yeye ni “MIMI NIPO” wa Agano la Kale.

Yesu alisema, “…Yeye Ibrahimu asijakuwako, MIMI NIKO.”[2] Wakati umati wa Wayahudi waliposikia maneno hayo, walijua kwamba Yesu alikuwa analenga kujifunua kwa Yehova kwenye kichaka kilichokuwa kinawaka moto. Musa aliuliza, “Niwaambie nani aliyenituma?” Mungu akajibu, “Ndivyo utakavyowaambia wana wa Israeli, ‘MIMI NIKO amenituma kwenu.’”[3] Wakati Yesu aliposema, “MIMI NIKO,” wasikilizaji wake walijua kwamba alikuwa anajinasibu kwamba yeye ni Yehova.

Yesu alisema yeye ni mmoja pamoja na Mungu Baba.

Yesu alisema, “Mimi na Baba tu Umoja.” Wakati aliposema haya, Wayahudi walichukua mawe ya kumpiga. Kwa nini? Kwa sababu walitambua kwamba anajnasibu yeye ni Mungu. Walisema, “wewe uliye mwanadamu wajifanya mwenyewe u Mungu. ”[4] Hawakudiriki kumpiga mawe kwa sababu alikuwa mwalimu mwenye hadhi; hawakudiriki kumpiga mawe kwa ajili ya kazi zake njema; walijaribu kumpiga mawe kwa sababu alijifanya mwenyewe kuwa ni Mungu.

Wakati Kenneth Copeland anaposema, “Yesu hakuwahi kujinasibu kwamba yeye ni Mungu,” inaonyesha kwamba Copeland haelewi mafundisho ya Yesu kama vile wasikilizaji wa Yesu wa Kiyahudi walivyokuwa wanamwelewa! Hata maadui wa Yesu walitambua kwamba alikuwa anasema kwamba ni Mungu.

Buddha alisisitiza kwamba atawaelekeza watu wake “kwanye njia.” Lakni Yesu hakuwahi kusema, “Nitaonyesha njia.” Badala yake Yesu alisema, “Mimi ndimi njia.” [5] Hata kama utakataa dai la Yesu la kuwa Mungu, hupaswi kukataa kwamba alisema maelezo hayo. Yesu alidai kuwa Mungu.

Yesu alisema anazo sifa za Kimungu.

► Soma kila mstari ulioko hapa na orodhesha orodha ya hizo sifa za kimungu Yesu anazodai kuwa nazo.

Mathayo 18:20 __________________

Yohana 17:5, 24 __________________

Yesu alijinasibu kuwa na sifa za Mungu, au tabia za Mungu. Alijinasibu kuwa anapatikana mahali pote kwa wakati mmoja; alijinasibu kuwa yeye ni wa milele. Hizi ni sifa ambazo zinahusika na Mungu wa kweli tu. Wakati Yesu alipotoa kauli hizi, wasikilizaji wake walijua alikuwa anadai kwamba anazo sifa ambazo zinahusika na Mungu peke yake.

Yesu alisema kuwa anao uweza wa kutenda mambo ya kiungu.

Yesu alijinasibu kuwa na nguvu za kusamehe dhambi. Katika Marko 2 Yesu alimwambia yule mwenye kupooza, “Mwanangu, dhambi zako zimesamehewa.” Wasikilizaji wake wa Kiyahudi walilalamika, ”Nani awezaye kusamehe dhambi isipokuwa Mungu mwenyewe?” Katika kujibu, Yesu alifanya jambo jingine la kuthibitisha kwamba alikuwa na mamlaka ya kusamehe dhambi. Alimponya mwenye kupooza.[6] Uponyaji ule ulikuwa ni ushuhuda wa uwezo wa kiungu wa Yesu

Yesu alijinasibu kuwa ana uwezo wa kuwapa uzima wa milele kwa wale wote watakaomwamini yeye. Yesu aliwaambia wasikilizaji wake kwamba alikuwa “ameshuka duniani kutoka mbinguni.” Alisema, “kila amtazamaye Mwana na kumwamini yeye, awe na uzima wa milele; nami nitamfufua siku ya mwisho.”[7]

Wakati Wayahudi walipomwuliza Yesu “awaeleze waziwazi” yeye ni nani, alisema, “Naliwaambia, lakini ninyi hamsadiki,” Lakini kwa wale watakaoamini, “nawapa uzima wa milele; wala hawatapotea kamwe.”[8] Ni Mungu peke yake mwenye uwezo wa kutoa uzima wa milele. Kwa kuahidi uzima wa milele, Yesu alijinasibu kuwa Mungu.

Yesu alisema nini katika Kesi yake?

Wakati wa kuendelea kwa kesi yake, alidai kuwa yeye ni Mungu. Baada ya mashahidi kutoa ushahidi wao, Kuhani Mkuu alimwuliza Yesu, “Wewe ndiwe Kristo, Mwana wake Mtukufu?” Yesu akasema, “Mimi ndiye, nanyi mtamwona Mwana wa Adamu ameketi mkono wa kuume wa nguvu, akija na mawingu ya mbinguni.”

Kuhani Mkuu alijua mara moja kwamba Yesu anadai uungu. Kuhani Mkuu “akararua nguo zake” akasema,… “Mmesikia kufuru yake.”[9]

Jibu la Yesu lilikuwa katika sehemu tatu:

• “Wewe ni Kristo?” “Mimi ndiye.”
• “Wewe ndiwe Mwana wake Mtukufu?” “Mimi ndiye.”
• “Mtamwona Mwana wa Adamu…”

“Wewe ni Kristo?” Yesu alidai kuwa ni Masihi.

Neno “Kristo” ni tafsiri ya neno la Kiyunani kwa “Masihi”. Kwa kujinasibu kwamba yeye ni Masihi, Yesu alijinasibu pia kuwa ni Mungu. Yeremia alitabiri siku ambayo jina la Masihi litaitwa “Bwana (Yehova) ni haki yetu.”[10] Isaya alitabiri kwamba Masihi ataitwa “Mungu mwenye nguvu.”[11] Wakati Yesu aliposhuhudia, ‘Mimi ni Kristo’ alikuwa anasemea nyadhifa hizi (“Bwana ni haki yetu” na “Mungu mwenye nguvu.”)

“Wewe ndiwe Mwana wake Mtukufu?” Yesu alidai kuwa Mwana wa Mungu.

Mara nyingi Yesu alikuwa akimtaja Mungu kama “Baba.” Je! Yesu alikuwa anajinasibu kuwa Mwana wa Mungu kwa maana ya kwamba sisi sote ni wana wa Mungu? Hapana. Yesu alijinasibu kuwa Mwana pekee wa Mungu.

Yesu alisema, “Kwa maana jinsi hii Mungu aliupenda ulimwengu, hata akamtoa Mwanawe pekee.”[12] Kwa Yesu kuwa Mwana wa Mungu inamaanisha kwamba ana aina ya uhusiano wa pekee na Baba. Yesu alisema pia kwamba yeye ni Mungu Mwana pekee aliye katika kifua cha Baba.[13] Huu ulikuwa ni uhusiano maalumu sana wa Baba na Mwana.

Yesu alisema kwamba Yeye na Baba ni wamoja. [14] Kwa kweli, Yesu alisema kwamba tunapaswa kumuenzi Mwana kama tunavyofanya kwa Baba.[15] Wakati Yesu alipodai kuwa Mwana wa Mungu, alikuwa anamaanisha kuwa mmoja katika asili na Mungu aliye Baba. Inamaanisha kwamba yeye ni Mungu Mwana, mwenye asili moja na Baba. Hii ndiyo sababu viongozi wa Kiyahudi walikasirika kwa Yesu kuthibitisha kwamba alikuwa Mwana wa Mungu.

“Mtamwona Mwana wa Adamu.” Yesu alidai kuwa Mwana wa Mtu.

Katika kujibu swali la Kuhani Mkuu, Yesu alisema, “Mtamwona Mwana wa Adamu ameketi mkono wa kuume wa Nguvu, akija juu ya mawingu ya mbinguni.” Hii ilikuwa ni kurejea kwenye kitabu cha Danieli katika Agano la Kale.

Danieli alisema, “Nikaona katika njozi za usiku, na tazama, mmoja aliye mfano wa mwanadamu akaja pamoja na mawingu ya mbingu.”[16] Neno “Mwana wa Adamu” kilikuwa ni cheo cha Masihi. Wakati Kuhani Mkuu aliposikia jibu la Yesu, alijua kwamba Yesu alikuwa anajinasibu ni Masihi.

Hitimisho

Yesu hakuhukumiwa kwa aliyoyatenda; hakusulubiwa kwa kuponya watu au kwa kuwafundisha watu kuwapenda jirani yao. Yesu alisulubiwa kwa kile alichosema yeye ni nani. Wale watu waliomsikia Yesu akisema walijua kwamba alikuwa anajinasibu kuwa Mungu. Wale waliosema, “Kamwe Yesu hajawahi kujinasibu kwamba ni Mungu” hawaelewi maneno ya Yesu kama na vile Wayahudi walivyokuwa wanamwelewa walipokuwa wanamsikia wakati wa huduma yake duniani.

Yesu kwa uhakika alijinasibu kuwa ni Mungu. Na aliyathibitisha maneno yake yote kwa matendo yake. Siyo tu kwamba alimponya yule aliyekuwa na mwenye kupooza kuonyesha kwamba alikuwa na uwezo wa kumsamehe dhambi; bali pia alifanya miujiza mingine mingi, kuonyesha uwezo wake juu ya mambo ya asili na hata kifo chenyewe. Alimfufua Lazaro kutoka kwa wafu, akijiita mwenyewe kwamba ni “Ufufuo na Uzima.” Kipekee kufufuka kwa Yesu kunathibitisha kwamba alikuwa ni yeye aliyejiita kama alivyo, aliyekuwa ni Mungu katika mwili.

Chuck Colson (1931-2012) alikuwa ni mmoja wa watendakazi wa Raisi Richard Nixon katika Ikulu ya Raisi wa Marekani (Jumba Jeupe.)[1] Hata hivyo, Bw. Colson akaanza kujitambua kwamba maisha yake yalikuwa matupu. Alipokuwa ofisini kwake Ikulu, siku moja akajiuliza mwenyewe, “Maisha ni kitu gani? Ni lazima kuna kitu cha ziada katika maisha kuliko hivi nilivyo.” Siku hiyo, Chuck Colson akajitambua kwamba hajui maana halisi ya ukweli wa maisha.

Mwaka 1972, baada ya kuacha utumishi katika Ikulu ya Raisi wa Marekani, Chuck Colson alikutana kwenye kikao na Tom Filipo, raisi wa kampuni moja kubwa. Colson akagundua kwamba Tom anaonekana mwenye Amani zaidi kuliko wakati uliopita. Alipomwuliza sababu za kuwa hivyo, alimwambia alikuwa ameyatoa maisha yake kwa Kristo.

Miaka miwili baadaye, dunia ilimgeuka kinyume kabisa Chuck Colson. Kwa sababu ya mambo aliyoyafanya alipokuwa mfanyakazi wa serikali, Colson alijijua kwamba ni lazima atafungwa gerezani. Akiwa katikati ya msukosuko huu, alimtembelea tena Tom Filipo. Filipo alimshirikisha Injili Bwana Chuck Colson. Akiwa anaendesha gari kurejea nyumbani usiku ule, Colson alilisimamisha gari lake pembeni na akaanza kuomba kwamba Mungu amsamehe dhambi zake.

Baada ya kumaliza kifungo chake gerezani, Chuck Colson aliendelea kumtumikia Mungu kwa uaminifu. Kwa kweli alijitoa maisha yake kuhudumia watu waliokuwa wamefungwa magerezani. Alihudumu kwenye huduma hii takribani miaka arobaini. Alitembea karibu dunia nzima akitembelea wafungwa kwenye magareza mabaya sana duniani; alianzisha Ushirika wa wafungwa wa Magereza, shirika linaloendelea kuwafikia wafungwa kwa Injili.

Mwaka 1984, Chuck Colson alitoa hotuba kwenye kongamano la Kitaifa la Watangazaji wa mambo ya kidini ambako alithibitisha ushahidi kuhusu ukweli wa Vitabu vya Injili. Katika hotuba yake, Bwana Colson alisema kwamba Watergate ilimshawishi kwamba Kufufuka kulitokeaa kweli kama Vitab vya injili vinavyotaarifu. Hii ni sehemu ya hotuba ya Bw. Colson:

Kuna ushahidi gani wa kufufuka kwa Yesu? Maelezo ya mitume walioshuhudia kwa macho. Mitume wote kumi na moja pamoja na Paulo walikwenda kwenye dunia iliyojulikana ya wakati ule kwa miaka 40 wakitangaza kwamba Yesu amefufuka kutoka kwa wafu. Kamwe, ingawaje walipitishwa kwenye mateso, vipigo, kufungwa jela, na hatimaye, wote isipokuwa mmoja, kifo cha mashahidi wafia imani – hawakuukana ufufuo wa ukweli wa Yesu Kristo.

Haya yote yana nini cha kufanya na Watergate? Ehrlichman, Haldeman, Mitchell, na mimi mwenyewe (viongozi katika Ikulu ya Nixon) tulimwamini Raisi kwa shauku kubwa. Tulikuwa katika mamlaka yetu na uwezo na marupurupu makubwa yasiyokuwa na kipimo. Hata pamoja na marupurupu ya ofisi yenye nguvu sana duniani, tishio la kwenda jela lilikuwa na nguvu sana, kiasi kwamba mmoja baada ya mwingine, wale waliohusika, waliachana na viongozi wao ili kujinusuru wasiadhibiwe kwa kuhusika katika uhalifu.

Hali hii inaungaje mkono ukweli wa kufufuka? Kirahisi ni hivi: Watergate inaonyesha asili ya mwanadamu. Kamwe hakuna anayeweza kunifanya niamini kwamba viumbe vya kibinadamu vya kawaida kumi na moja watavumilia kupigwa, kufungwa gerezani, na kifo bila kukataa kwamba Yesu Kristo alifufuka kutoka kwa wafu.

Ni kukutana tu na Mungu anayeishi kulikoweza kuwaweka katika kutoyumba. Vinginevyo, mtume Petro angeweza kumkataa Yesu ili kuokoa maisha yake mwenyewe. Alishafanya hivyo mara tatu.

Ushahidi ni mkubwa sana. Watu wale walishikamana na ule ushuhuda kwa sababu walimwona Kristo aliyekuwa amefufuka kutoka kwa wafu. Na kama alikuwa amefufuliwa, hiyo inathibitisha uungu wake.[2]

Njia nyingine ya kushughulikia madai kuhusiana na Kristo ni kufikiria njia mbadala. Agano jipya humwonyesha Yesu kama mtu aliyejinasibu kwamba ni Mungu. Tufanyeje na jambo hili? Kuna chaguzi tano, na mojawapo tu ndiyo inaweza kuwa sahihi: Aidha Yesu alikuwa ni Hadithi, ni Guru, ni Mwongo, ni Kichaa (Majinuni) au Bwana.

Je! Yesu alikuwa ni Hadithi?

Je! Yesu atakuwa ilikuwa ni hadithi? Baadhi ya wakosoaji husema kwamba Yesu hakuwahi kuwepo, au kwamba Yesu wa historia hakuwahi kusema au kutenda mambo yanayodaiwa katika Agano Jipya.

► Je! Itawezekana kwamba Agano Jipya haiaminiki au kwamba Vitabu vya Injili vilikuwa ni hadithi?

Taarifa za Yesu haziwezi zikawa ni hadithi. Tumeona kwamba Agano Jipya kihistoria inaaminika. Kuaminika kwa Agano Jipya kunathibishwa na kipimo cha Bibliografia, kipimo cha Ushahidi wa Ndani, na kipimo cha Ushahidi wa Nje. Agano Jipya hutoa picha halisi ya Yesu – alikuwa nani, alifanya nini, na alisema nini. Yesu hakuwa ni hadithi.

Je! Yesu alikuwa ni Guru?

Je! Yesu atakuwa alikuwa ni guru au ni mchaji wa Mashariki? Baadhi ya wakosoaji husema kwamba Yesu alikuwa ni sawa na waalimu wa theolojia ya Kihindu. Wanasema kwamba Yesu alifundisha kwamba sisi wote ni miungu.

► Je! Itawezekana kwamba Yesu alikuwa ni guru wa Mashariki aliyeamini kwamba kila mwanadamu ni mungu?

Yesu alikuwa ni Myahudi aliyekuzwa kikamilifu kabisa katika utamaduni wa Mungu mmoja.[1] Alikuwa ni mwalimu wa maandiko ya Kiyahudi. Hakuna Myahudi atakayetokea kusema kwamba sisi wote ni miungu. Kila mtoto wa Kiyahudi amekariri Shema: “Sikiza, Ee Israeli; Bwana, Mungu wetu, Bwana ndiye mmoja.”[2]

Mafundisho ya Yesu hayakuwa ya uchaji wa Kimashariki, bali mafundisho ya rabi wa Kiyahudi anayeamini katika Muumbaji mmoja aliye bora.

Je! Yesu alikuwa ni Mwongo?

Je! Yesu atakuwa alikuwa ni mwongo? Baadhi ya wakosoaji wanasema kwamba Yesu alikuwa anajitambua kwamba hana uungu. Wanasema kwamba aliwadanganya wafuasi wake. Wanasema kwamba alikuwa kama Jim Jones, Mmarekani aliyekuwa kiongozi wa ibada za madhehebu ya mafundiso potofu aliyewaongoza watu 900 kujiua huko Guyana; au Shoko Asahara, kiongozi mwingine wa aina hiyo wa Japani aliyewaongoza wafuasi wake kufia kwenye shambulio la gesi ya sarin kwenye njia ya chini kwa chini huko Tokyo.

► Je! Itawezekana kwamba Yesu alikuwa ni Mwongo aliyewadanganya wafuasi wake?

Petro Kreeft alisema kwamba Yesu hangeweza kuwa mwongo kwa sababu ya tabia yake. Hakuwa mchoyo, alikuwa na upendo, anayejali, mwenye huruma, na mwenye shauku katika kufundisha ukweli.”[3] Hata wapinzani wake hawakuwa na lolote la kusema kinyume chake. Wakati wa kuendelea kwa kesi yake, ilibidi watafute mashahidi wa uongo.

[4]Kreeft alisema kwamba Yesu hangeweza kuwa mwongo kwa sababu hakuwa na sababu ya kumfanya aseme uongo. Waongo hudanganya kwa sababu za ubinafsi, kupenda fedha, umaarufu, starehe au madaraka. Yesu aliachana na vitu vyote vizuri vya ulimwengu huu pamoja maisha yaliyokuwemo ndani yake. Badala yake, kujinasibu kwa Yesu kuwa Mungu kulimletea chuki, kukataliwa, kutoelewana, mateso, maumivu makali na kifo.”[5]

Yesu hangeweza kuwa mwongo kwa sababu ya Ufufuo. Kama tutaiamini Biblia kwamba kihistoria inaaminika, ni lazima tukubali Kufufuka kuwa ni jambo la kweli. Ni Mungu peke yake anayeweza kufufua aliyekufa, na Mungu hangeweza akamfufua Yesu kutoka kwa wafu kama angekuwa mwongo.

Je! Yesu alikuwa ni Kichaa (Mtu punguani)?

Baadhi ya watu watasema kwamba Yesu hakudanganya, lakini kwa makosa aliamini kwamba yeye ni Mwana wa Mungu, Katika nukuu ya hapo juu, C.S.Lewis alionyesha kwamba mwanadamu wa kawaida anayeamini kwamba yeye ni Mungu, mtu huyo ni mwenda wazimu.

► Kwa kuangalia maisha ya Yesu kama inavyooneshwa kwenye Vitabu vya Injili, Je! Itawezekana kwamba Yesu alikuwa ni mtu punguani ambaye kimakosa alijinasibu kwamba alikuwa Mungu?

Ni mtu ambaye ana ugonjwa wa akili tu anayeweza kuamini kwamba yeye ndiye Mwenyezi Mungu Muumba. Fikiria kwamba umekutana na mtu barabarani anayesema kwa kujiamini kabisa, “Mimi ni Napoleoni” au ni “Alexanda Mkuu.” Utajua kwamba huyu mtu alikuwa mgonjwa wa akili.

Kama Yesu angekuwa ni mtu wa kawaida aliyeamini kwamba alikuwa Mungu, angekuwa ni mgonjwa wa akili. Lakini wanasaikolojia wanasema kwamba Yesu hakuwahi kuwa na alama ya ugonjwa wa kuchanganyikiwa. Alikuwa mkamilifu katika ujumla wa nafsi yake.

Mafundisho ya Yesu yalionyesha hekima yake kwa vitendo. Kitendo chake cha kuwajali wale waliokuwa kwenye mateso kilionyesha upendo kwa wengine ambao huwezi kutegemea kuupata kwa mtu ambaye ana ugonjwa wa akili. Kwa uhakika Yesu hakuwa mtu punguani.

Je! Yesu alikuwa ni Bwana?

Kama Yesu hakuwa ni hadithi, hakuwa guru, hakuwa mwongo, au hakuwa mtu punguani, uchaguzi wa mwisho utakaokuwa umebakia ni kwamba alikuwa ni yeye kabisa kama alivyokuwa amejisema mwenyewe; Yesu alikuwa ni Bwana. Kama wanafunzi wake baada ya kufufuka, ni lazima tumwabudu Yesu kama Bwana na Mungu!

Hitimisho letu kutokana na kuangalia hizi chaguzi tano unaendana na hoja ya ujumla ya Ukristo tuliojifunza hapo awali. Kwa kuwa Agano Jipya kihistoria ni sahihi, tunazo sababu za kutosha za kuamini kwamba Yesu alifufuka kutoka katika wafu na kutimiza dazani za unabii zilizohusiana na Masihi. Haya mambo mawili yanaonesha kwamba Yesu ni yeye yule aliyejinasibu kuwa – Mwana wa Mungu, na Mungu aliyekuja katika mwili.

Katika somo hili, tumeona kwamba Yesu ni Mungu kama alivyojinasibu kuwa. Kwa kuwa Yesu ni Mungu, ni lazima tumkubali kama mamlaka isiyoweza kukosea. Yeye anaaminika kwa kila hali. Kwa hiyo ni lazima tukubaliane na madai yake ya kuwa yeye ndiye peke yake njia ya kwenda kwa Mungu. Ni lazima pia tukubaliane na madai yake kwamba, Biblia (Neno la Mungu) inatoka kwa Mungu, Ukristo ni wa kweli. Ni kwa jinsi tunajibu ukweli huu ndio jambo la muhimu sana.

“Lee,” Jia alisema, “Tuko katika mahali muhimu sana. Tumeona ushahidi wa uwepo wa Mungu; tumeona ushahidi wa uumbaji; tumeona ushahidi wa kuaminika kwa Agano Jipya; tumeona ushahidi kwamba Yesu ni yeye yule kama alivyojinasibu alikuwa.

“Lee, katika mazungumzo yetu yote, tumeona kwamba:

• Agano Jipya kihistoria linaaminika na ni la kutegemewa.

• Yesu alifufuka kutoka katika wafu na kutimiza dazani za unabii zilizohusiana na Masihi.

• Kufufuka kwa Yesu na kutimilika kwa unabii kunaonesha kwamba Yesu ni yeye yule aliyejinasibu kuwa – Masihi, Mwana wa Mungu, na Mungu aliyekuja katika mwili.

• Akiwa ni Mwana wa Mungu, Yesu ni mamlaka isiyoweza kukosea.

• Yesu Kristo alifundisha kwamba Biblia ni Neno la Mungu na kwamba yeye ndiye peke yake njia ya kwenda kwa Mungu.

“Kwa kuwa yote haya ni kweli, kuna hitimisho moja tu la uhakika. Kama Yesu alikuwa Mungu, tunapaswa tuamini alichosema: Biblia ni Neno la Mungu, na Yesu ndiye njia peke ya kwenda kwa Mungu. Kwa hiyo, Ukristo ni wa kweli.

“Lee, swali langu ni hili, ‘Je! Utaamini?’ Uko tayari kusalimisha maisha yako kwenye mamlaka ya Yesu, Mwana pekee wa Mungu?”

Kwa machozi katika macho yake, Lee alijibu,”Jia, Je, unakumbuka uliponiambia kuhusu “Thomasi mwenye mashaka?” Hivyo ndivyo mimi nilivyo; ninahitaji ushahidi kwa wingi. Lakini wiki iliyopita, nilisoma zaidi kuhusu Tomaso katika Biblia yako. Baada ya kuuona ushahidi, Tomaso alisema, “Bwana wangu na Mungu wangu!” [1] Macho ya Tomaso yalifumbuliwa, aliuona ushahidi, na akaamini.

“Jia, nimeuona ushahidi – na ninaamini. Nilipokuwa nasoma habari za Tomaso, Mungu alifungua macho yangu katika kuuona ukweli wa BiBlia. Nilikuwa kipofu, lakini sasa ninaona! Niko tayari kuyasalimisha maisha yangu kwa Yesu. Uko tayari kuomba pamoja nami?”

(1) Elimu ya kuitetea imani na Kichwa: Utaanza kipindi kinachofuata kwa mtihani kutokana na maswali ya tafakuri yaliyoko katika Somo la 8. Jifunze maswali haya kwa uangalifu kwa maandalizi ya mtihani

(2) Elimu ya kuitetea imani na Moyo: Watu wengi wanaodai kwamba wao ni Wakristo husema, “Mimi nimeamini,” lakini hizo ni fikra za akili zao tu zinzoujua ukweli lakini siyo watiifu kwa Yesu. Katika kitabu cha Yohana, neno “Ninaamini” lina maana ya kutii kwa hiari. Kama hatutatii, basi hutaamini. Je! Unaamini? Je! Unaishi kwa utii? Kama sivyo, jiachilie sasa kwa ukamilifu na kwa utii kabisa kwa Mungu.

(3) Elimu ya kuitetea imani na Mikono: Zungumza na asiyeamini kuhusu Yesu kujinasibu kwamba yeye ni Mungu. Kabla hujawaonyesha yale Yesu aliyosema, uliza, “Unafikiri nini kuhusu Yesu? Kama hakuwa Mungu, unadhani alikuwa nani? Waonyeshe kwamba uchaguzi mmoja tu wenye maana ni kwamba Yesu alikuwa Mwana wa Mungu (Mungu Mwana), kama alivyosema. Toa taarifa kuhusu mazungumzo yenu katika kipindi cha darasa kitakachofuata.

(1) Orodhesha kauli nne za wakati wa huduma yake kuonyesha kwamba Yesu alijiamini kwamba ni Mungu.

(2) Orodhesha kauli tatu za wakati wa kuendelea kwa kesi yake kuonyesha kwamba Yesu alijiamini kwamba ni Mungu.

(3) Je, ni chaguzi ngapi tano za kuzingatia kwenye madai ya Yesu ya kujinasibu kwamba yeye ni Mungu?

(4) Kwa kifupi elezea tatizo la kila kipengele katika chaguzi nne za mwanzo.

(5) Andika Kauli sita na hitimisho kwa ajili ya hoja ya Ujumla ya Ukristo.

(6) Nukuu kutoka kichwani Yohana 20:30-31.