چونکہ SGC کے پروگرام کا مقصد منسٹری کی تربیت ہے، اس لیے طالب علم کو ایک اچھی گواہی اور خدا کی عزت کرنے والا طرز زندگی کے ساتھ ایک مسیحی ایماندار ہونا چاہیے۔ ایک بے ایمان کورسز کے زیادہ تر مواد کو نہیں سمجھے گا اور نہ ہی اس کی تعریف کرے گا۔

طالب علم کو تاریخی مسیحی عقیدے بشمول ایوینجیلیکل عقیدہ پر یقین ہونا چاہیے۔ یہ پروگرام ہر جگہ مسیح کے بدن کی خدمت کے لیے تیار کیا گیا ہے، اس لیے مختلف فرقوں کے مخصوص عقائد کو ماننا ضروری نہیں۔

طالب علم کو کسی چرچ کا رکن ہونا چاہیے جہاں وہ باقاعدگی سے چرچ کی سرگرمیوں میں حصہ لینے کے لئے جاتا ہو۔ جو طلبا گرجا گھروں سے وابستگی کے لیے تیار نہیں ہیں وہ منسٹری کی تربیت کے لیے اچھے امیدوار نہیں ہیں۔ طلبا کو کسی ایسے گرجا گھر کا حصہ ہونا چاہیے جو انہیں موقع فراہم کرتا ہو کہ وہ اُس سب کی عملی مشق کر سکیں جو وہ سیکھ رہے ہیں۔ کچھ اسائنمنٹس کے لئے طلبا کو دوسرے ایمانداروں کا ساتھ درکار ہوگا۔

ایک مقامی انسٹی ٹیوٹ کو ایسے طلباء کی تربیت کے لئے تیار کیا جانا چاہئے جو اچھی طرح سے پڑھ اور لکھ سکتے ہیں۔ یہ ضروری نہیں ہے کہ سب طلبا گریجویٹس ہوں، لیکن کورسز کو سمجھنے اور اسائنمنٹس کو مکمل کرنے کے لیے انھیں پڑھنا لکھنا آنا چاہیے۔ انسٹی ٹیوٹ اِس کورس کے اختتام پر اُن طلبا کو سرٹیفکیٹ دیں جو پڑھنے لکھنے کے قابلِ ہیں اور اپنی تمام اسائنمنٹس کو پورا کرتے ہیں۔

تدریس کی دوسری سطحیں ان طلباء کو پیش کی جا سکتی ہیں جو سیکھنا چاہتے ہیں لیکن اسائنمنٹس کرنے کے قابل نہیں ہیں۔مثال کے طور پر، اساتذہ عام کلیسیاؤں یا ہوم بائبل اسٹڈی گروپس میں ایسے لوگوں کو سکھا سکتے ہیں جو اچھی طرح سے پڑھ لکھ نہ پانے کی وجہ سے اسائنمنٹس نہیں کر سکتے۔

مقامی SGC اداروں میں داخلہ لینے والے طلباء دوسرے قسم کے اداروں کے طلباء سے مختلف ہوتے ہیں۔ وہ اسکول کے بچوں کی طرح نہیں ہیں۔ وہ یونیورسٹی کے طلباء اور بائبل کالج کے بہت سے طلباء سے بھی مختلف ہیں۔ اس قسم کی کلاس کو پڑھانے کے لئے اساتذہ کو کلاس کے مطابق ایک منفرد طریقہِ تدریس اپنانا چاہیے۔ مثلاً ہو سکتا ہے کہ کچھ طلباء کی تعلیمی قابلیت کسی کالج کے طالب علم کی قابلیت سے کم ہو۔ اساتذہ کو اپنی توقعات کو ایڈجسٹ کرنا چاہئے۔ انہیں بتانا چاہیے کہ طالب علموں کو اسائنمنٹس کیسے کرنے چاہئیں۔ انہیں سستی اور لاپرواہی کی سرزنش ضرور کرنی چاہئے، لیکن طلباء کے کام پر ان کی تنقید مددگار اور حوصلہ افزا ہونی چاہئے۔ اور طلبہ کو کبھی ایسا محسوس نہیں ہونا چاہئے کہ اُنکی بے عزتی ہو رہی ہے۔

یاد رکھیں، اگر خدا نے لوگوں کو خدمت کے لئے بلایا ہے، تو خدا انہیں وہ صلاحیتیں بھی دے گا جن کی انہیں ضرورت ہے۔ ہو سکتا ہے کہ طلباء پہلے ہی سے اپنی نعمتوں کو خدمت میں استعمال کر رہے ہوں لیکن اُن کی ترقی میں مدد کرنا ہماری ذمہ داری ہے۔ ان کی حوصلہ شکنی کرنا غلط ہوگا۔

SGC کے زیادہ تر گروپس میں طلباء کی عمروں میں بھی بڑا فرق ہو سکتا ہے۔ ہو سکتا ہے کہ کچھ نے حال ہی میں کالج سے ڈگری لی ہو اور دوسرے دادا دادی کی عمر کے ہو سکتے ہیں۔ شاید کچھ بہت سالوں سے پادری رہے ہوں۔ بعض اوقات کوئی طالب علم عمر میں استاد سے بھی بڑا ہو سکتا ہے۔

بیس سال کا ایک طالب علم جس نے حال ہی میں کالج ختم کیا ہے اُس میں ساٹھ سال کے پادری کی نسبت زیادہ تعلیمی قابلیت ہو سکتی ہے۔ تاہم، ہر ایک کا احترام کیا جانا چاہئے۔ ہمیں تعلیمی قابلیت کا اس طرح احترام نہیں کرنا چاہیے جس سے پختگی اور تجربے کی توہین ہو۔ اگرچہ ہم تعلیمی تقاضوں پر زور دیتے ہیں، ہمیں ایسے طلبا کو شرمندہ کرنے سے گریز کرنا چاہیے جو پڑھنے اور لکھنے کے اسائنمنٹس کے عادی نہیں ہیں۔

◄جب ہم بڑوں کو تعلیم دے رہے ہوں بجائے بچوں کے، تو ہماری تعلیم دینے کے طریقہ کار میں کیا مختلف ہونا چاہیے؟

بالغ متعلمین ایک اصطلاح ہے جو اس طالب علم کو بیان کرنے کے لیے استعمال ہوتی ہے جس نے بالغ زندگی کا آغاز کر لیا ہو۔ بالغ طلبا شادی شدہ اور بچوں والے ہو سکتے ہیں۔ ہو سکتا ہے کہ وہ کسی پیشے یا منسٹری میں پہلے ہی سے کام کر چُکے ہوں۔ وہ پہلے ہی زندگی میں مختلف تجربات کر چکے ہوں۔ جب بالغ افراد دوبارہ طالب علم بننے کا انتخاب کرتے ہیں، تو وہ کچھ ذاتی اہداف کا ارتکاب کر رہے ہوتے ہیں۔

استاد اور کلاس میں تعلیم و تدریس کا انداز بالغ طلبا کی ضروریات کو پورا کرنے کے لیے ڈیزائن کیا جانا چاہیے۔

1. بالغ متعلمین ایسی تربیت چاہتے ہیں جو ان کے لئے فوری طور پر قابلِ استعمال ہو۔ انہیں اس بات پر بحث کرنے کی ضرورت ہے کہ وہ جو کچھ سیکھ رہے ہیں اسے عملی طور پر کیسے استعمال کیا جا سکتا ہے۔ کلاس کو وقت نکال کر طلباء سے یہ بیان کرانے کی ضرورت ہے کہ وہ علم کو کیسے عملی طور پر استعمال کرنے کی توقع رکھتے ہیں۔ استاد کو کلاس کا سارا وقت طلبہ کے ساتھ بات چیت کیے بغیر محض مواد کی پیشکش میں صرف نہیں کرنا چاہیے۔

2. بالغ متعلمین احترام کا مطالبہ کرتے ہیں۔ وہ اپنی اپنی زندگیوں میں پہلے ہی سے بہت سی ذمہ داریاں اُٹھا رہے ہوتے ہیں اور وہ نہیں چایہں گے کہ اُنکے ساتھ بچوں جیسا سلوک کیا جائے۔ اساتذہ کا رویہ سیکھنے والوں جیسا ہونا چاہیے اور اُنہیں دوسروں کے خیالات کو سُننے کے لیے کھلے پن کا مظاہرہ کرنا چاہیے۔ انہیں اپنے طلباء کے تجربے اور بصیرت کا احترام کرنا چاہیے۔

◄ آپ کی ثقافت میں بڑی عُمر کے سیکھنے والوں کی عزت کرنے کا بہترین طریقہ کیا ہے؟ ایک بالغ طالبعلم کے طور پر ، آپ کیاچاہتے ہیں کہ آپ کے ساتھ کیسا سلوک کیا جائے۔

3. بالغ متعلمین مطالعہ کے دوران خود فیصلے لینا چاہتے ہیں۔ اُن کے تجربات اور اہداف چند قسم کے مطالعے کو ہی ان کے لیے پرکشش اور متعلقہ بناتے ہیں۔ پس انہیں اپنی دلچسپیوں کی پیروی کرنے اور مطالعہ کے اپنے انداز کو تیار کرنے کی آزادی کی ضرورت ہوتی ہے۔

4. بالغ متعلمین کلاس میں مشق کرنا چاہتے ہیں۔ استاد کو طالب علموں کو پریزنٹیشنز بنانے، مواد کے حصوں کی وضاحت کرنے، اور سوالات کے جوابات دینے میں مدد کرنی چاہیے۔ بعض اوقات طلباء اپنے تجربات سے کہانیاں سنا سکتے ہیں۔ یہ درست ہے کہ ایک استاد کو وقت ضائع کرنے سے گریز کرنا چاہیے، لیکن ایک استاد کا یہ سمجھنا بھی ضروری ہے کہ ایک کہانی طالب علم کی پہلے ہی سے سیکھی ہوئی چیز کو لاگو کرنے کا طریقہ کار ہو سکتی ہے۔

5. بالغ متعلمین دوسرے طلباء کے ساتھ تعلقات استوار کرتے ہیں۔ وہ ایک دوسرے کے تاثرات سے سیکھتے ہیں۔ وہ عزت دیتے اور لیتے ہیں۔ بالغ طلبا اِن نئے رشتوں میں سے کچھ کو اپنی باقی کی تمام زندگی یاد رکھیں گے اور ان کی قدر کریں گے۔ اِس مقصد کے حصول کے لئے کلاس کو کبھی کبھار بحث کے لیے چھوٹے گروپوں میں تقسیم کرنے کی ضرورت پڑ سکتی ہے۔

6. بالغ متعلمین اپنے اپنے نتیجے پر پہنچنا چاہتے ہیں۔ وہ توقع کرتے ہیں کہ مختلف قسم کی رائے کو برداشت کیا جائے گا۔

7. بالغ متعلمین استاد کو پسند کرنا اور اُسکا احترام کرنا چاہتے ہیں۔ وہ اپنے اور استاد کے درمیان رُتبے کے فاصلے کو اُتنی اہمیت نہیں دیتے جتنی کہ کسی یونیورسٹی میں ایک طالب علم اور پروفیسر کے درمیان رُتبے کو اہمیت دی جاتی ہے۔ وہ استاد کی طرف سے ملنے والی انفرادی اور شخصی توجہ کی قدر کرتے ہیں۔ وہ نہ صرف علم بلکہ استاد کی پرعزم زندگی اور کردار کو جاننے اور اُسے سراہنے میں دلچسپی رکھتے ہیں۔

استاد کو کلاس میں اور انفرادی طلباء کے ساتھ مطالعہ کی اچھی عادات کے بارے میں بات کرنے کے لیے وقت نکالنا چاہیے۔ طلباء کو یہ سیکھنا چاہئے کہ کس طرح خود کو نظم و ضبط رکھ کر روزانہ مطالعہ کے لئے وقت طے کرسکتے ہیں۔

استاد کو اسائنمنٹس اور حاضری کا ریکارڈ رکھنا چاہیے۔ کورس کے اختتام پر، ریکارڈ کو گریڈ کی بنیاد بنایا جائے گا۔ کورس کے دوران، جب انفرادی طلباء اچھی کارکردگی کا مظاہرہ نہیں کر رہے ہوتے ہیں، تو استاد کو ان سے بات کرنی چاہیے اور انہیں بتانا چاہیے کہ وہ کس طرح اپنی کارکردگی کو بہتر کر سکتے ہیں۔

استاد کے لیے ضروری ہے کہ وہ اِس بات کو یقینی بنائے کہ طالب علم یہ سمجھتا ہے کہ اُسے اسائنمنٹس کیسے کرنی ہوں گی۔ جن اسائنمنٹس میں بہتری کی ضرورت ہو اُن پر مزید کام کرنے کے لئے انہیں طالب علم کو واپس کیا جانا چاہیے، لیکن استاد کو یہ یقینی بنانا چاہیے کہ طالب علم یہ سمجھ چُکا ہو کہ اسائنمنٹ کو بہتر بنانے کے لئے کیا کرنے اکی ضرورت ہے۔

اگر طلباء کی حاضری یا اسائنمنٹس کی وجہ سے انکے گریڈز کم ہو رہے ہیں، تو استاد کو ان سے بہتری کی ضرورت کے بارے میں بات کرنی چاہیے۔ تاکہ طالب علم کورس کے اختتام پر اپنے درجات سے حیران نہ ہوں۔