چرچ پر لازم ہے کہ وہ تعلیم دینے کا کام کرے۔ یسوع نے کلیسیا سے کہا کہ وہ اپنے حکموں کی تعلیم دیتے ہوئے ہر جگہ جائے (متی 28:19)۔ پولس نے کہا کہ ایک پادری کو تعلیم دینے کے قابل ہونا چاہیے (1 تیمتھیس 3:2)۔ یہ تعلیم شاگردیت کے کام کا حصہ ہے۔ چرچ لوگوں کو سکھاتا ہے کہ کس طرح ایمانداروں کے طور پر جینا ہے، خُدا کے جلال کے لیے جینا ہے۔ یہ تعلیم ہر جگہ دی جانی چاہیے جہاں جہاں بھی ایماندار موجود ہوں۔ مضبوط گرجا گھر اپنے لوگوں کو بامقصد تعلیم دینے کے لیے بائبل کی سچائی اور عملی طریقوں سے لیس ہوتے ہیں۔

چرچ کو تربیت دینی چاہیے

’’اور جو باتیں تُو نے بُہت سے گواہوں کے سامنے مُجھ سے سُنی ہیں اُن کو اَیسے دِیانت دار آدمِیوں کے سپُرد کر جو اَوروں کو بھی سِکھانے کے قابِل ہوں‘‘ (2 تیمتھیس 2:2)۔

تعلیم دینے کی ضرورت منسٹری میں تربیت کی ضرورت کو جنم دیتی ہے۔ پولس نے تیمتھیس سے کہا کہ وہ ایسے مردوں کو تربیت دے جو دوسروں کو سکھا سکیں (2 تیمتھیس 2:2)۔ تربیت صرف معلومات کی فراہمی نہیں ہے۔ تربیت صرف ایمانداروں کو اپنے فائدے کے لیے سکھانا نہیں ہے۔ تربیت ایمانداروں کو دوسروں کی مدد کرنے کے لیے تیار کرتی ہے۔

یسوع نے ظاہر کیا کہ منسٹری کی تربیت کتنی اہم ہے۔ اپنی منسٹری کے آغاز میں ہی ، اُس نے چند آدمیوں کا انتخاب کیا جو کلیسیا کی رہنمائی اور توسیع کا کام کریں گے۔ اس نے اپنا سارا وقت لوگوں کے ہجوم کو تعلیم دینے میں ہی صرف نہیں کیا۔ اِس کی بجائے، وہ اپنے چُنے ہوئے بارہ شاگروں کی راہنماؤں کے طور پر تربیت کرنے کے لئے وقت نکالتا تھا۔ بعد میں اس نے اپنی خدمت کو ان لوگوں کے ذریعے بڑھایا جنہیں اس نے تربیت دی تھی۔

اعمال8: 26 -31 میں فلپس کی کہانی بیان کی گئی ہے جب خُدا نے اُسے سامریہ چھوڑ کر غزہ کے قریب ایک خاص راستے پر جانے کے لیے بلایا۔ وہاں اُس کی ملاقات ایک حبشی شخص سے ہوئی جو اپنے رتھ میں بیٹھا تھا اور یسعیاہ نبی کی پیشگوئیاں پڑھ رہا تھا۔ فلپس نے اُس سے پوچھا: ”جو تُو پڑھتا ہے اُسے سمجھتا بھی ہے؟“ اُس حبشی نے جواب دیا: ” یہ مُجھ سے کیوں کر ہو سکتا ہے جب تک کوئی مُجھے ہدایت نہ کرے؟“

” یہ مُجھ سے کیوں کر ہو سکتا ہے جب تک کوئی مُجھے ہدایت نہ کرے؟“ یہ جملہ ہمیں دکھاتا ہے کہ لوگوں کو بائبلی سچائی کو سمجھنے کے لیے خُدا کی طرف سے بھیجے گئے انسانی استادوں کی ضرورت ہے۔ اگرچہ رُوح القدس کئی معجزاتی کام کر رہا تھا، خُدا پھر بھی انسانی استادوں کو استعمال کر رہا تھا۔ یہی خُدا کا عام طریقہ ہے تربیت کی ضرورت کا جواب دینے کے لیے۔ Shepherds Global Classroom ایسا نصاب مہیا کرتا ہے جو ایسے اساتذہ کے ہاتھوں میں دیا جاتا ہے جو مردوں اور عورتوں کو خُدا کے کلام کی سچائی میں رہنمائی فراہم کر سکیں۔

Shepherds Global Classroom ایک قابل منتقلی تربیتی پروگرام فراہم کرتا ہے جسے مقامی منسٹریز کے ذریعے چلایا جائے گا۔

پادریوں کو تربیت دینا

پادریوں کو عقیدے، بائبل کی تشریح، مُنادی اور شاگردیت کے طریقوں میں تربیت دی جانی چاہیے۔ دنیا بھر میں ہزاروں چرچز کی قیادت ایسے پادری کر رہے ہیں جن کے پاس چند طباعت شدہ وسائل ہیں اور کوئی بامقصد تربیت نہیں ہے۔ بہت سے پادری نہ تو خود تربیت یافتہ ہیں اور نہ ہی وہ دوسروں کو تربیت دینے کے قابل ہیں۔

David Livermore نے کہا ہے:

دنیا بھر میں کلیسیا کی تیزی سے بڑھتی ہوئی ترقی ایک ایسا مسئلہ پیدا کر رہی ہے کہ تھیالوجی (الٰہیات) کی تربیت یافتہ پاسبانوں اور کلیسیائی رہنماؤں کی شدید کمی ہے۔ دنیا بھر میں تقریباً 22 لاکھ ایوینجلیکل کلیسیائیں موجود ہیں۔ ان میں سے 85٪ ایسے مردوں اور عورتوں کی قیادت میں ہیں جنہوں نے کوئی باقاعدہ الٰہیات کی تربیت حاصل نہیں کی۔ بڑھتی ہوئی کلیسیا کی نگہداشت کے لیے روزانہ 7,000 نئے کلیسیائی رہنماؤں کی ضرورت ہے۔[1]

دنیا بھر میں زیادہ تر ممکنہ پادری بائبل کالج میں نہیں جا سکتے۔ یہ اُن کے لیے اچھی حکمت عملی ثابت نہیں ہوسکتی کہ وہ اپنے خاندان، ملازمت اور منسٹریز کو چھوڑ کر کئی سالوں کے لئے کہیں کلاسزز میں شرکت کرنے کے لئے نہیں جا سکتے۔ ایسی صورتحال میں اُنہیں مقامی تربیت کی ضرورت ہے۔

Shepherds Global Classroom کا مقصد ایسے کلیسیائی رہنماؤں کو بائبلی، الٰہٰیاتی، اور عملی تربیت فراہم کرنا ہے جنہوں نے الٰہیات یا خدمتِ کلیسیا میں کوئی باقاعدہ تعلیم حاصل نہیں کی۔

گواہوں کو تربیت دینا

کوئی بھی شخص جس نے خدا کے نجات بخش فضل کا تجربہ کیا ہے وہ انجیل کی مُنادی کرنے کا اہل ہے۔ نجات یافتہ لوگ یہ بتا سکتے ہیں کہ خدا نے اُن کے لیے کیا کیا ہے۔ اُن کی گواہیاں دوسروں کو قائل کر سکتی ہیں، خاص طور پر اُن لوگوں کو جو انھیں جانتے ہیں اور ان کی زندگیوں میں تبدیلی واقع ہوتے ہوئے دیکھ رہے ہوتے ہیں۔

تاہم، بعض اوقات ایک شخص انجیل کے ضروری نکات کی وضاحت کرنے کے قابل نہیں ہوتا ہے۔ اگر سامعین ایسی حالت میں ہیں جو اِس شخص کی گواہی سے مختلف ہے، تو اُنہیں یہ سمجھا پانا مشکل ہو سکتا ہے کہ وہ ایسی تبدیلی کا تجربہ کیسے کر سکتے ہیں۔

یہاں تک کہ ایک شخص جو برسوں سے ایک ایماندار رہا ہے وہ اپنی کمیونٹی میں مُنادی کرنے سے قاصر محسوس کر سکتا ہے کیونکہ وہ مسیحیت کے بارے میں مشکل سوالات کے جواب دینے سے قاصر ہے۔ ایسا ایماندار اپنے تبدیلی کے تجربے، روحانی احساسات، اور مسیح کے بدن میں دوسروں کے ساتھ رفاقت رکھنے کو جانتا ہے لیکن اِن چیزوں کی وضاحت کرنے کے قابل نہیں ہوتا۔

بعض اوقات کسی کمیونٹی کے لوگ کسی ایسے مذہب سے ہو سکتے ہیں جو مسیحیت کا دشمن ہو۔ایسی صورت میں اُنہیں محض مسیح کے پیروکاروں کے ساتھ امن سے رہنا سیکھانے کے علاوہ اِس بات کی ضرورت بھی ہو گی کہ انہیں مسیحی عقیدے کی سچائی وضاحت سے بتائی جائے۔

ایک شخص خوشخبری کے اصولوں اور انجیل کی حمایت کرنے والے بنیادی عقائد کو سیکھ کر زیادہ موثر گواہ بن سکتا ہے۔

کلیسیا کی نگہبانی کے لیے

پادری درست تعلیم دینے کے ساتھ ساتھ اپنے گرجا گھروں کی حفاظت کے لئے بھی ذمہ دار ہیں (ططس 14-9:1)۔ جھوٹے چرچز اور جھوٹے مذاہب لوگوں کو الجھانے اور دھوکہ دینے کے لیے جھوٹے خیالات کا استعمال کرتے ہیں۔ یہ ایک افسوسناک حقیقت ہے کہ روحانی تبدیلی کا تجربہ کرنے والے بہت سے لوگ بعد میں جھوٹے چرچز میں شامل ہو جاتے ہیں۔

پادری کو چاہیے کہ وہ لوگوں کو بائبل کے اصول سکھائے تاکہ لوگ اپنے ایمان پر مضبوطی سے قائم ہوں۔ کلیسیا کے تمام لوگوں تک پہنچنے کے لیے تعلیم بامقصد اور منظم اور مختلف سطحوں پر فراہم کی جانی چاہیے۔

Richmond Wandera ، جو یوگنڈا، افریقہ کے ایک بااثر پادری ہیں، مشاہدہ کرتے ہیں کہ بہت سے مسیحی جھوٹے مذاہب کی رسومات پر عمل کر رہے ہیں۔ وہ کہتے ہیں، "اتوار کو لوگ ہاتھ اُٹھا کر خُدا کی عبادت کرتے ہیں، اور پیر کو اگر بچہ بیمار ہو جائے تو وہ کسی جادوگر کے پاس چلے جاتے ہیں۔ اور یہی بات مجھے راتوں کو جگائے رکھتی ہے۔" [2]انہوں نے مشاہدہ کیا کہ جھوٹے مذاہب کی رسومات بہت سی افریقی کلیسیاؤں میں معمول کی بات لگتی ہیں۔ یہ مسئلہ دنیا بھر کی کلیسیاؤں میں مختلف شکلوں میں پایا جاتا ہے۔

◄ آپ کے ملک میں کون سے جھوٹے عقائد ہیں جو ایمان داروں پر اثرانداز ہوتے دکھائی دیتے ہیں؟

منسٹری ٹیم کو بڑھانے کے لیے

کھیلوں کی ٹیمز میں ایسے کھلاڑی بھی ہوتے ہیں جو ہر وقت میدان میں نہیں ہوتے ہیں۔ وہ میدان میں موجود کھلاڑیوں سے کم عمر اور کم تجربہ کار ہو سکتے ہیں، لیکن وہ تربیت کے مرحلے سے گزر رہے ہوتے ہیں۔ ان میں سے کچھ خاص صلاحیتوں کے حامل ہوتے ہیں جن کی مخصوص اوقات میں ضرورت پڑتی رہتی ہے۔

ایک صحت مند، بڑھتے ہوئے گرجہ گھر میں بھی ایسے لوگ ضرور ہونے چاہیے۔ یہ سوچنا غلط ہے کہ چونکہ قیادت کے عہدوں پر لوگ فائز ہیں اِس لئے ٹیم مکمل ہے۔ایسی صورت میں ایک منسٹری محدود ہو کر رہ جاتی ہے اور اُس وقت تک ترقی نہیں کر پاتی جب تک کہ منسٹری کی حدود کو بڑھانے اور اِسکی نئی شکلیں شروع کرنے میں مدد کرنے کے لیے نئے رہنما موجود نہ ہوں۔

ایک صحت مند گرجہ گھر میں ایسے لوگ ہونے چاہئیں جو تربیت پا رہے ہوں اور مشق کر رہے ہوں۔ اس کے لیے مقامی تربیت کی ضرورت ہوتی ہے۔ یعنی منسٹری کی تربیت صرف ان لوگوں کے لیے دستیاب نہیں ہونی چاہیے جو پہلے ہی سے منسٹری میں مختلف عہدوں پر فائز ہیں۔

تربیت کے مقامی کام کی ذمہ داری پادری پر عائد ہوتی ہے۔ یہ بھی سچ ہے کہ پادری تمام تربیت کا کام خود سے نہیں کر سکت، لیکن ایسی صورت میں وہ مقامی تربیت کے لئے اہتمام اور اس کی حوصلہ افزائی کرسکتے ہیں۔ اسے لوگوں کی ایک ایسی ٹیم کی ضرورت ہو گی جو مختلف کرداروں میں خدمات انجام دے سکیں۔

’’اور اُسی نے بعض کو رسُول اور بعض کو نبی اور بعض کو مُبشِّر اور بعض کو چرواہا اور اُستاد بنا کر دے دِیا۔ تاکہ مُقدّس لوگ کامِل بنیں اور خِدمت گُذاری کا کام کِیا جائے اور مسِیح کا بدن ترقّی پائے۔ جب تک ہم سب کے سب خُدا کے بیٹے کے اِیمان اور اُس کی پہچان میں ایک نہ ہو جائیں اور کامِل اِنسان نہ بنیں یعنی مسِیح کے پُورے قَد کے اندازہ تک نہ پُہنچ جائیں۔ تاکہ ہم آگے کو بچّے نہ رہیں اور آدمِیوں کی بازِیگری اور مَکّاری کے سبب سے اُن کے گُمراہ کرنے والے منصُوبوں کی طرف ہر ایک تعلِیم کے جھوکے سے مَوجوں کی طرح اُچھلتے بہتے نہ پِھریں۔ بلکہ مُحبّت کے ساتھ سچّائی پر قائِم رہ کر اور اُس کے ساتھ جو سر ہے یعنی مسِیح کے ساتھ پَیوستہ ہو کر ہر طرح سے بڑھتے جائیں۔ ‘‘(افسیوں15-11:4)۔

خدا مقامی گرجہ گھر کے لوگوں کو گرجہ گھر کے مشن کو پورا کرنے کے لیے درکار نعمتیں اور صلاحیتیں دیتا ہے۔ کلیسیا کواپنے لوگوں کی تربیت کی ذمہ داری لینی چاہیے۔

مقامی چرچ کو مضبوط بنانے کے لیے

ایک مقامی چرچ کی مقامی طور پر قیادت کی جاتی ہے، مقامی طور پر حمایت کی جاتی ہے، اور وہ مقامی لوگوں کی ملکیت ہوتا ہے۔ یہ باہر کے لوگوں حمایت یا رہنمائی کا مرہونِ منت نہیں ہوتا۔ گرجا گھروں کی صحت اور ترقی کے لیے مقامی طاقت اہم ہے۔

مقامی چرچ اپنی ثقافت سے واقفیت رکھتا ہے۔ یہ کبھی بھی کلیسیا کے لوگوں کو کسی غیر علاقے کے چرچ میں ہونے کا احساس نہیں دے گا۔

ایک صحت مند مقامی چرچ کے بہت سے فوائد ہیں:

1. یہ اپنے ثقافتی حلقے میں مؤثر طریقے سے مُنادی کرنے اور شاگرد بنانے کا کام کر سکتا ہے۔

2. کلیسیا بالغ ہو جاتی ہے اور غیر لوگوں کی مدد کے بغیر مسیح کے بدن کے طور پر کام کرسکتی ہے۔

3. مقامی چرچ میں رہنما اپنی پوری صلاحیت کے مطابق ترقی کرتے ہیں۔

4. مقامی شرکاء منسٹری کے لیے مدد اور جوابدہی فراہم کرتے ہیں۔

کچھ مقامی گرجا گھر صحت مند نہیں ہوتے ہیں کیونکہ ان میں نظریاتی استحکام اور عملی مسیحی زندگی کے لئے بائبل کے معیارات کی پیروی کا فقدان ہوتا ہے۔ وہ ایک طاقتور، مستقل گواہ کے طور پر اپنی کمیونٹی پر اثر انداز ہونے میں ناکام رہتے ہیں۔ اِس بات کا خطرہ ہوتا ہے کہ وہ ایسے راہنماؤں کو آگے لا رہے ہیں جن کے پاس صلاحتیں تو ہیں لیکن کردار کمزور ہے۔ ان کے پاس قیادت کی ترقی کے لیے کوئی پروگرام نہیں ہوتا۔ انہیں مقامی منسٹری کی ترقی کے لئے ایک تربیتی پروگرام کی ضرورت ہوتی ہے۔

بعض اوقات ایک چرچ اس مقصد کے تحت غیر ملکی مشنریوں کی مدد سے شروع کیا جاتا ہے کہ یہ چرچ بالآخر مقامی طور پر خود مختار ہوجائے گا۔ مقامی رہنماؤں کی آگے بڑھنے کی خواہش کی شدت اور مقامی کلیسیا کی حمایت ہی اِس مقصد کے حصول کی رفتار طے کرتی ہے۔

مقامی رہنماؤں کی ترقی کے لیے مقامی تربیت ضروری ہے، جس میں عقیدہ کی درست تعلیم ، عملی زندگی میں ایمان کا اطلاق ، اور منسٹری کے لئے نئے طریقہ کار اور حکمت عملی شامل ہو۔

نئے گرجا گھروں کی شروعات کرنا

یہ افسوسناک حقیقت ہے کہ بہت سے گرجا گھر برسوں تک کام کرتے رہتے ہیں لیکن کبھی بھی انجیل کی مُنادی کے لئے دوسری کمیونٹیز میں کسی کو نہیں بھیجتیں۔ گرجا گھروں کو اپنے اراکین کو تربیت دینی چاہیے اور مبشروں کی ٹیموں کو ایسے علاقوں میں بھیجنا چاہیے جہاں گرجا گھروں کی کمی ہے۔ ایسی ٹیم کا مقصد نو مرُید مسیحیوں کا ایک ایسا نیا گروہ تشکیل دینا ہوتا ہے جو ایک چرچ بنتا ہے۔

کچھ مبشرین کو خصوصی طور پر اِس بات کی تربیت دی جانی چاہیے کہ وہ نو مرُید مسیحیوں کے گروہوں کو ایک چرچ کی شکل اختیار کرنے میں مدد کریں۔ انہیں اِس قابلِ ہونا چاہیے کہ وہ عملی مسیحی زندگی کی تعلیم دے سکیں تاکہ نومرُید مسیحیوں میں شاگردیت کا کام کیا جا سکے۔ انہیں مُنادی کرنے اور منسٹری کی ذمہ داریاں لینے کے لیے نومرُید مسیحیوں کو تربیت دینے کے قابل ہونا چاہیے۔

زیادہ تر نئے گرجا گھروں کی قیادت ایک مقامی شخص کرے گا، نہ کہ کوئی پادری جو کمیونٹی میں رہنے کے لیے کہیں اور سے آیا ہو۔ تعلیمی تربیت کے حامل زیادہ تر پادری نئے گرجہ گھر میں پادری یا چھوٹے شہر میں خدمت کرنے کے لیے تیار نہیں ہیں۔ ہمیں مقامی ایماندار کو وزارت کی تربیت فراہم کرنی چاہیے جسے خدا نے جماعت کی قیادت کے لیے بلایا ہے۔

مشنریوں کو تیار کرنا

ایک مشنری وہ شخص ہوتا ہے جسے چرچ کی طرف سے انجیل کے اثر کو آگے بڑھانے کے مقصد سے کہیں بھیجا جاتا ہے۔ مشنری کی اصطلاح خاص طور پر اُس شخص کے لیے استعمال ہوتی ہے جو کسی دوسرے ملک یا کسی اور ثقافت میں جاتا ہے، لیکن بعض اوقات اِس سے مراد وہ شخص ہوتا ہے جو اپنے ہی ملک میں کسی دوسری کمیونٹی کے پاس جاتا ہے۔

خوشخبری دنیا کے کچھ علاقوں میں تیزی سے پھیل رہی ہے، زیادہ تر ایسے علاقوں میں جہاں مشنری اپنے ہی ملک کے دوسرے علاقے میں جاتے ہیں۔ تربیت سے اُن کی تاثیر اور نظریاتی پختگی میں اضافہ ہوتا ہے۔

10/40 ونڈو خط استوا کے 10 ڈگری جنوب سے 40 ڈگری شمال تک ایک علاقہ ہے، جو شمالی افریقہ اور جنوبی ایشیا اور چین اور ہندوستان کے ممالک تک پھیلا ہوا ہے۔ 10/40 ونڈو میں دنیا کی 2/3 آبادی شامل ہے۔ 10/40 ونڈو میں 80% سے زیادہ لوگوں تک ابھی بھی خوشخبری نہیں پہنچی ہے۔

دنیا کے کچھ ممالک کے زیادہ تر حصے انجیل سے محروم ہیں حالانکہ اُن کے بڑے شہروں میں کئی سالوں سے گرجا گھر موجود ہیں۔ یہ ممکن ہے کہ ایک شخص کسی چرچ میں کئی سالوں تک خدمت کرنے کے باوجود بھی نہ جانتا ہو کہ کسی نئی جگہ پر منسٹری کا آغاز کیسے کیا جائے۔ ایسی صورت میں وہ صرف یہ جانتا ہو گا کہ چرچ کی عمارت میں ایمانداروں کے گروپ سے کیسے بات کرنی چاہیے جبکہ وہ اِس بارے میں کچھ نہیں جانتا ہو گا کہ چرچ کے باہر بے ایمانوں کو مسیحی عقیدہ کے بارے میں کیسے بتانا ہے ۔ ایک کلیسیا کو مشنریوں کو انجیل کے پیغام اور ایمانداروں کے مقامی خاندان کی تشکیل کے مقصد کے ساتھ جانے کی تربیت دینی چاہیے۔

◄آپ کے علم میں جو کلیسیائیں ہیں، اُن میں خدمت کی تربیت کے لیے کون سی وجوہات سب سے زیادہ فوری اور ضروری محسوس ہوتی ہیں؟ کیوں؟