(1) NAPAKAHALAGA: Bago simulan ang Leksyon 8, gawin ang debate na itinakda sa Aralin 7. Depende sa laki ng klase, ang debateng ito ay maaaring makagamit ng buong miting. Huwag magmadali sa pagsasagawa ng gawaing ito. Ito ang iyong pagkakataon upang tiyakin na maaari mong isabuhay ang impormasyon sa Aralin 7.
(2) Sabihin sa mga mag-aaral na magbigay ng maikling buod ng kanilang pag-uusap para sa takdang-aralin ng “Apologetics at mga Kamay” sa dulo ng Aralin 7.
(3) Isasaulo ng mga mag-aaral ang Juan 20:30-31.
(4) Talakayin ang bawat tanong na may markang ►.
(5) Itanong ang bawat Tanong sa Pagbabalik-Aral sa panahon ng leksiyon at muli sa dulo ng klase.
“Jia,” may pag-aatubiling sabi ni Lee, “Matagal kong pinag-iisipan ang ating mga pag-uusap. Kung tunay na muling nabuhay si Hesus mula sa mga patay, iyon ay tunay na makapangyarihan! Inaamin ko, nabigyan mo ako ng mabuting ebidensiya para sa Muling Pagkabuhay upang patunayan iyon bilang katotohanang pangkasaysayan sa halip na isang kathang-isip lamang. Impressive ang lahat ng iyon. Sana hindi mo ikagagalit kung mayroon akong isa pang katanungan.”
“Siyempre naman, hindi,” tugon ni Jia. “Hindi ko naman sinisikap na manalo sa isang pangangatwiran. Sinisikap ko lang ibahagi sa iyo ang pinakamahalagang bagay sa aking buhay. Ano ang iyong tanong?”
“Ang lahat ng iyong mga sinabi ay may katuturan. Subali’t paano niyon pinatutunayan na si Hesus ay Dios? Isang dakilang tao? Oo! Isang dakilang tagapagturo? Oo! Marahil mas dakila pa kaysa kay Buddha. Subali’t Dios? Bakit hindi mo matanggap na isa lamang siyang dakilang tagapagturo? Bakit kailangan mong sabihin na si Hesus ay Dios?”
► Paano mo tutugunin si Lee? Paano natin malalaman na si Hesus ay Dios?
Inangkin ba ni Hesus na Siya ay Dios?
Si Kenneth Copeland ay isang pangunahing tagapagturo sa prosperity gospel movement. Ayon kay Copeland, dumating si Kristo sa kanya sa isang pangitain at nagsabi:
“Huwag kang maguluhan kapag ibinababa ka ng mga tao at nagsasalita sila ng marahas laban sa iyo. Gayun din sila nagsalita sa akin. Hindi ba sila dapat magsalita ng gayun sa iyo? Mas higit na ikaw ay nagiging katulad ko, mas lalo silang mag-iisip ng gayun sa iyo. Ipinako nila ako sa krus sa pag-aangkin ko na ako ay Dios. Subali’t hindi ko inaangkin na ako ay Dios; sinabi ko lang na ako ay lumakad nang kasama niya at siya ay sumasaakin.”[1]
Sinasabi ni Copeland na hindi inangkin ni Hesus na siya ay Dios. Maraming sumang-ayon kay Copeland; sinabi nila na hindi inangkin ni Hesus na siya ay Dios. Totoo ba ito? O inangkin ba ni Hesus na siya ay Dios?
►Paano mo sasagutin si Kenneth Copeland? Inangkin ba ni Hesus na siya ay Dios?
Kung inangkin ni Jesus na siya ay Dios, siya lamang ang tanging lider ng pangunahing relihiyon sa mundo na nag-angkin ng ganito. Hindi inangkin ni Mohammed na siya ay Dios; hindi kailanman inangkin ni Buddha na siya ay Dios. Kung inangkin ni Hesus na siya ay Dios, ito ang nagbubukod sa Kristiyanismo mula sa ibang pangunahing relihiyon. Titingnan natin ang inaangkin ni Hesus sa dalawang bahagi — ang kanyang inaangkin sa panahon ng kanyang ministeryo at ang kanyang inaangkin sa panahon ng kanyang paglilitis.
Ano ang Sinabi ni Hesus sa Panahon ng Kanyang Ministeryo?
Inangkin ni Hesus na siya ang “AKO NGA” ng Lumang Tipan.
Sinabi ni Hesus, “…bago pa man si Abraham, AKO’Y AKO NA”.[2] Nang marinig ng mga tagapakinig na Hudio ang mga salitang ito, alam nila na tinutukoy ni Hesus ang pagpapahayag ni Jehovah sa lumiliyab na halaman. Itinanong ni Moises, “Sino ang sasabihin kong nagsugo sa akin?” Sumagot ang Dios, “Sabihin mo ito sa bayan ng Israel, “Isinugo ako ni ‘Ako Nga’ sa inyo.”[3] Nang sabihin ni Jesus na “Ako’y Ako Nga”, nalalaman ng kanyang mga tagapakinig na inaangkin niyang siya si Jehovah.
Inangkin ni Hesus na Kaisa Siya ng Dios Ama.
Sinabi ni Hesus, “Ako at ang Ama ay iisa.” Nang sabihin niya ito, pumulot ng bato ang mga Hudio upang batuhin siya. Bakit? Dahil alam nila na inaangkin niya na siya ay Dios; “…ikaw, na isang tao, ginagawa mong Dios ang iyong sarili.”[4] Hindi nila sinikap na batuhin siya dahil siya’y isang dakilang tagapagturo; hindi nila sinubok na batuhin siya dahil sa kanyang mabubuting gawa; sinikap nilang batuhin siya dahil inaangkin niyang siya ay Dios.
Nang sabihin ni Kenneth Copeland na, “Hindi kailanman inangkin ni Hesus na siya ay Dios”, ipinapakita nito na hindi lubos na nauunawaan ni Copeland ang itinuturo ni Hesus na katulad sa pagkaunawa ng mga Hudiong tagapakinig ni Hesus! Kahit ang mga kaaway ni Hesus ay nakakaalam na inaangkin niyang siya ay Dios.
Ipinilit ni Buddha na ituturo niya sa kanyang mga tagasunod “ang daan.” Subali’t hindi sinabi ni Hesus, “Ituturo ko sa inyo ang daan.” Sa halip, sinabi ni Hesus, “Ako ang Daan.”[5] Maaari mong tanggihan ang pag-angkin ni Hesus na siya ay Dios, subali’t hindi mo dapat itanggi na inangkin niya iyon. Inangkin ni Hesus na siya ay Dios.
Inangkin ni Hesus na taglay niya ang mga katangian ng Dios.
►Basahin ang bawat isa sa mga talatang ito at ilista ang katangiang inaangkin ni Hesus.
Mateo 18:20 __________________
Juan 17:5, 24 _________________
Inangkin ni Hesus ang mga katangian o katauhan ng Dios. Inangkin niya na siya’y nasa lahat ng lugar (omnipresent), inangkin niyang siya’y walang hanggan. Ang mga ito ay kalidad na tanging sa Dios lamang totoo. Nang ihayag ni Jesus ang mga pangungusap na ito, alam ng mga nakikinig sa kanya na inaangkin niya na taglay niya ang mga katangiang tanging sa Dios lamang.
Inangkin ni Hesus ang kapangyarihang magsagawa ng mga bagay na Dios lang ang makagagawa.
Inangkin ni Hesus na siya’y may kapangyarihang magpatawad ng kasalanan. Sa Marcos 2, sinabi ni Hesus sa paralitiko, “Anak, pinatatawad na ang iyong mga kasalanan.” Ang mga Judiong nakarinig ay nagreklamo, “Sino ang makapagpapatawad ng mga kasalanan, kundi ang Dios lamang?” Bilang tugon, gumawa si Hesus ng isang bagay upang patunayan na mayroon siyang kapangyarihang magpatawad. Pinagaling niya ang paralitiko.[6] Ang pagpapagaling ay patunay sa maka-Dios na kapangyarihan ni Hesus.
Inangkin ni Hesus ang kapangyarihang makapagbigay ng buhay na walang hanggan sa mga naniniwala sa Kanya. Sinabi ni Hesus sa kanyang mga tagapakinig na “siya’y bumaba mula sa langit.” Sinabi niya na “Sinumang tumingin sa Anak at sumampalataya sa kanya ay magkakaroon ng buhay na walang hanggan, at siya’y muli kong bubuhayin sa huling araw.”[7]
Nang sabihin ng mga Hudio kay Hesus na “sabihin mo sa amin nang malinaw” kung sino ka, sinabi niya, “Sinabi ko na sa inyo, at hindi kayo naniwala.” Subali’t para sa mga naniwala, “Bibigyan ko sila ng buhay na walang hanggan, at hindi sila mapapahamak.”[8] Tanging ang Dios lamang ang makapagbibigay ng buhay na walang hanggan. Nang ipangako niya ang buhay na walang hanggan, inaangkin ni Hesus na Siya ay Dios.
Ano ang sinabi ni Hesus sa Kanyang Paglilitis?
Nang litisin si Hesus, inangkin Niya na Siya ay Dios. Matapos magpatotoo ang mga saksi, tinanong ng punong saserdote si Hesus, “Ikaw ba ang Kristo, ang Anak ng Kataas-taasan?” Sumagot si Hesus, “Ako nga, at makikita ninyo ang Anak ng Tao na nakaupo sa kanan ng Makapangyarihan at dumarating sa mga ulap sa kalangitan.”
Agad na nabatid ng punong-pari na inaangkin ni Jesus ang pagiging Dios. “Winasak ng punong pari ang kanyang damit” at nagsabi… “Narinig ninyo ang kanyang pamumusong/blasphemy.”[9]
Ang tugon ni Hesus ay may tatlong bahagi:
“Ikaw ba ang Kristo?” “Ako nga.”
“Ikaw ba ang Anak ng Kataas-taasan?” “Ako nga.”
“Makikita ninyo ang Anak ng Tao…”
“Ikaw ba ang Kristo?” Inangkin ni Hesus na Siya ang Mesiyas.
Ang salitang “Kristo” ay salin ng griegong salita para sa “Mesiyas.” Sa pag-aangkin na siya ang Mesiyas, inangkin ni Hesus na siya ay Dios. Ipinangako ni Jeremias ang isang araw na ang pangalan ng Mesiyas ay magiging “Ang Panginoon (Jehovah) ang Aming Katwiran.”[10] Propesiya ni Isaias na ang Mesiyas ay tatawaging “Makapangyarihang Dios.”[11] Nang magpatotoo ni Hesus, “Ako ang Kristo”, inaangkin niya ang tatlong titulo (“Ang Panginoon”, “Ang Aming Katwiran” at “Makapangyrihang Dios”) para sa kanyang sarili.
“Ikaw ba ang Anak ng Pinagpala?” Inangkin ni Hesus na Siya ay Anak ng Dios.
Madalas tinutukoy ni Hesus ang Dios bilang “Ang Aking Ama.” Inaangkin ba ni Hesus na siya ay Anak ng Dios sa kaisipang tayong lahat ay mga anak ng Dios? Hindi. Inaangkin ni Hesus ng siya lamang ang tanging Anak ng Dios.
Sinabi ni Hesus, “Gayun na lang ang pag-ibig ng Dios sa sanlibutan, kaya’t ibinigay niya ang kanyang nag-iisang Anak.”[12] Upang si Hesus ay maging ang nag-iisang Anak ng Dios ay nangangahulugan na mayroon siyang natatangi (one-of-a-kind) na kaugnayan sa Ama. Sinabi rin ni Hesus na siya’y nanahan sa sinapupunan ng Ama.[13] Ito ay isang napakaespesyal na kaugnayan ng Ama sa Anak.
Sinabi ni Hesus na Siya at ang Ama ay iisa.[14] Sa katotohanan, sinabi ni Hesus na dapat nating igalang ang Anak tulad ng paggalang natin sa Ama.[15] Nang angkinin ni Hesus na Siya ang Anak ng Dios, inaangkin niya na kaisa siya sa katayuan sa Dios Ama. Ibig sabihin nito siya ay Dios Anak, nagtataglay ng parehong katangian tulad sa Ama. Ito ang dahilan kung bakit nagalit ang mga lider na Hudio sa pagpapatunay na siya ang Anak ng Dios.
“Makikita ninyo ang Anak ng Tao.” Inangkin ni Hesus na siya ang Anak ng Tao.
Bilang tugon sa tanong ng punong-saserdote, sinabi ni Hesus, “Makikita ninyo ang Anak ng Tao na nakaupo sa kanang kamay ng Makapangyarihan at dumarating sa alapaap ng Kalangitan.” Isang pagbanggit ito sa Aklat ng Daniel sa Lumang Tipan.
Sinabi ni Daniel, “Nakita ko sa gabi ang mga pangitain, at nakita ko ang isang tila taong nakasakay sa ulap.[16] (Bumaba ito at lumapit sa nabubuhay magpakailanman). Ang salitang “Anak ng Tao” ay isang titulo para sa Mesiyas. Nang marinig ng punong-saserdote ang sagot ni Hesus, alam niya na inaangkin ni Hesus na Siya ang Mesiyas.
Konklusyon
Si Hesus ay hindi hinatulan dahil sa kanyang mga ginawa; hindi siya ipinako sa krus dahil pinagaling niya ang mga tao o dahil sa kanyang pagtuturo sa mga tao na mahalin ang kanilang mga kapitbahay. Ipinako sa krus si Hesus dahil sa sinabi niya kung sino siya. Nalalaman ng mga nakarinig kay Hesus na inaangkin niyang Siya ay Dios. Hindi naiintindihan ng mga nagsasabi na “Hindi kailanman inangkin ni Hesus na Siya ay Dios” ang sinasabi ni Hesus nang katulad ng pagkaunawa ng mga Hudio na nakarinig sa kanyang pagsasalita sa panahon ng kanyang ministeryo sa lupa.
Tiyak na inangkin ni Hesus na Siya ay Dios . At sinuportahan niya ang mga pag-angkin na iyon ng kanyang mga kilos. Hindi lamang pinagaling ni Hesus ang paralitiko upang ipakita na na siya ay may kapangyarihang patawarin siya; subali’t gumawa rin siya ng marami pang ibang himala, nagpapakita ng kanyang kapangyarihan sa kalikasan at maging sa kamatayan mismo. Muli niyang binuhay mula sa mga patay si Lazaro, tinawag ang kanyang sarili na ang “Muling Pagkabuhay at ang Buhay.” Ang sariling muling pagkabuhay ni Hesus ay espesyal na patunay na Siya nga ayon sa kanyang sinasabi, na siya ang Dios na nagkatawang tao.
Mga Tanong sa Pagbabalik-Aral
(1) Maglista ng apat na pangungusap sa panahon ng kanyang ministeryo na nagpapakita na naniwala si Hesus na siya ay Dios.
(2) Maglista ng tatlong pangungusap sa kanyang paglilitis na nagpapakita na si Hesus ay naniwala na siya ay Dios
[1] Kenneth Copeland, binanggit ni Hank Hanegraaff, sa Christianity in Crisis, (Oregon Harvest House, 1993), pp. 137-138.
Pagsasabuhay ng Apologetics - Ang Pagbabalik-loob ni Chuck Colson
Miyembro ng staff ni Presidente Richard Nixon sa White House si Chuck Colson (1931-2012). Gayunman, nagsimulang mapagtanto ni Mr. Colson na hungkag ang kanyang buhay. Habang nakaupo siya sa kanyang opisina sa White House, isang araw, tinanong niya ang kanyang sarili, “Ano ang kahulugan ng buhay? Mayroon pang ibang dahilan ang buhay, hindi ito lamang.” Nang araw na iyon, napagtanto ni Chuck Colson na hindi niya alam ang tunay na kahulugan ng buhay.
Taong 1972, matapos iwan ang kanyang trabaho sa White House, nakipagpulong si Chuck Colson kay Tom Philips, ang pangulo ng isang malaking kompanya. Napansin ni Colson na tila mas payapa si Tom kaysa sa nakalipas na panahon. Nang tanungin niya kung bakit, sinabi ni Tom na ibinigay na niya ang kanyang buhay kay Kristo.
Dalawang taon ang nakalipas, nabaligtad ang mundo ni Chuck Colson. Dahil sa ilang mga ginawa niya habang nagtatrabaho pa sa pamahalaan, nalaman ni Colson na kailangan niyang makulong. Sa gitna ng kanyang kaguluhan, muli silang nagkita ni Tom Philips. Ibinahagi ni Philips ang ebanghelyo kay Chuck Colson. Nang gabing iyon, habang nagmamaneho pauwi, inihinto ni Colson ang kanyang sasakyan at nanalangin sa Dios upang patawarin siya sa kanyang mga kasalanan.
Nang matapos niya ang kanyang sentensiya sa kulungan, nagpatuloy si Chuck Colson sa paglilingkod nang matapat sa Dios. Sa katotohanan, iniukol niya ang kanyang buhay sa pagmiministeryo sa mga tao sa kulungan. Halos apatnapung taon siya sa ministeryo. Nagbiyahe siya sa buong mundo at bumisita sa mga nakakulong sa mga pinakamasasamang kulungan sa mundo; sinimulan niya ang Prison Fellowship, isang organisasyon na nagpapatuloy sa pagdadala ng ebanghelyo sa mga nakakulong.
Taong 1984, nagtalumpati si Chuck Colson sa National Religious Broadcasters Convention kung saan siya’y nagpatotoo sa ebidensiya para sa katotohanan ng mga ebanghelyo. Sa kanyang talumpati, sinabi ni Mr. Colson na ang Watergate ang kumumbinsi sa kanya na ang Muling Pagkabuhay ay nangyari tulad nang sinabi sa mga Ebanghelyo. Ito ang bahagi ng talumpati ni Mr. Colson:
“Ano ang ebidensiya ng Muling Pagkabuhay ni Hesus? Ang patotoo ng mga apostol. Ang labing-isang apostol at si Pablo ay naglakbay sa kanilang mundo sa loob ng 40 taon na ipinapahayag na si Hesus ay muling nabuhay mula sa mga patay. Hindi kailanman—bagaman sila’y nagdanas ng pag-uusig, pambubugbog, pagkakulong, at sa wakas, lahat maliban sa isa, ng kamatayan ng isang martir—nila itinatwa ang katotohanan ng literal na muling pagkabuhay ni Kristo Hesus mula sa mga patay.
“Ano naman ang kinalaman nito sa Watergate? Sina Ehrlichman, Haldeman, Mitchell at ako (ang mga lider sa White House sa panahon ni Nixon) ay lubos na naniwala sa Pangulo. Halos nasa dulo ng aming mga daliri ang lahat na kapangyarihan at pribilehiyong maaari mong isipin. Gayunman sa kabila ng lahat ng mga pribilehiyo ng pinakamakapangyarihang opisina sa mundo, ang banta ng pagkakulong ay napakalakas kaya’t isa-isang iniwan ng lahat nang kasangkot ang kanilang lider upang iligtas ang kanyang sarili.
“Paano nito sinusuportahan ang katotohanan ng Muling Pagkabuhay? Simple lang: Ipinapakita ng Watergate ang likas ng tao. Walang sinumang makapagpapaniwala sa akin na ang labing-isang ordinaryong mga tao ay magtitiis ng pagpapahirap, pagkakulong at maging kamatayan nang hindi ikinakaila na si Kristo Hesus ay muling nabuhay mula sa mga patay.
“Tanging ang isang pakikipagtagpo sa isang buhay na Dios ang magpapanatiling matatag sa mga lalaking iyon. Kung hindi gayun, maaaring itatwa ni Apostol Pedro si Hesus upang iligtas ang kanyang buhay. Nagawa na niya iyon ng tatlong beses.
“Nakakapuspos ang ebidensiya. Pinanghawakan ng mga lalaking iyon ang kanilang patotoo dahil nakita nila si Kristo na muling nabuhay mula sa mga patay. At kung siya’y muling nabuhay, pinatutunayan nito ang kanyang pagiging Dios.”[1]
[1] Ito ay sinipi sa talumpati na binigkas ni Chuck Colson sa National Religious Broadcasters Convention noong Pebrero, 1984.
Ang Pasya: Dios Ba Si Hesus?
Isa pang paraan upang harapin ang mga inaangkin ni Kristo ay pag-isipan ang mga alternatibong bagay. Ipinapakita ng Bagong Tipan si Hesus bilang isang tao na nag-aangkin na siya ay Dios. Anong gagawin natin dito? May limang pagpipilian, na isa lamang ang puwedeng totoo: Si Hesus ay isang alamat, isang guru, isang sinungaling, isang Baliw o ang Panginoon.
Si Hesus ba ay isang alamat?
Maaari bang si Hesus ay isa lamang alamat? May mga hindi madaling maniwala na nagsabing hindi naman nabuhay si Hesus, o ang Hesus ayon sa kasaysayan ay hindi naman nagsabi o gumawa ng mga bagay na inaangkin ng Bagong Tipan.
►Posible ba na ang Bagong Tipan ay hindi mapagkakatiwalaan at ang mga Ebanghelyo ay mga alamat lamang?
Hindi maaaring alamat lamang ang mga kuwento ni Hesus. Nakita na natin na ang Bagong Tipan ay mapagtitiwalaan kung patungkol sa kasaysayan. Ang pagiging mapagkakatiwalaan ng Bagong Tipan ay napatunayan na ng Bibliograpikal na Pagsubok, ng Pagsubok sa Ebedensiya ng Nilalaman at Ebedensiya Mula sa Labas ng Biblia. Nagbibigay ng tumpak na larawan ni Hesus ang Bagong Tipan—kung sino siya, ano ang kanyang ginawa, at kung ano ang kanyang mga sinabi. Hindi isang alamat si Hesus.
Si Hesus ba ay isang Guru?
Maaari bang si Hesus ay isang guru o mystic na Silanganin? May mga hindi madaling maniwala ang nagsasabi na si Hesus ay katulad ng mga tagapagturo ng teolohiyang Hindu. Itinuturo daw ni Hesus na tayong lahat ay mga dios.
►Posible ba na si Hesus ay isang Silanganing guru na naniniwalang ang bawat tao ay dios?
Si Hesus ay isang Hudio na pinalaki sa isang mahigpit na monotheistic[1] culture/kulturang naniniwala sa iisang Dios. Walang Hudio na maniniwala na tayong lahat ay dios. Ang bawat batang Hudio ay nagsaulo ng Shama: “Pakinggan mo, O Israel: Ang Panginoon ating Dios, ang Panginoon ay iisa.”[2]
Ang mga itinuro ni Hesus ay hindi katuruan ng isang Silanganing mystic, kundi ang katuruan ng isang Hudiong tagapagturo/rabbi na naniwala sa iisang transcendent Creator/Manlilikhang nabubuhay magpakailanpaman.
Si Hesus ba ay isang Sinungaling?
Maaari bang si Hesus ay isang sinungaling? May mga hindi madaling maniwala na nagsasabing alam ni Hesus na hindi siya Dios. Nagsinungaling daw si Hesus sa kanyang mga tagasunod. Katulad daw siya ni Jim Jones, isang Amerikanong lider ng kulto na nag-akay sa 900 katao upang magpakamatay sa Guyana; o si Shoko Asahara, isang lider ng kulto sa Japan na nanguna sa kanyang mga tagasunod sa isang sarin gas attack sa Tokyo subway.[3]
►Posible bang si Hesus ay isang sinungaling na nanlinlang sa kanyang mga tagasunod?
Sinabi ni Peter Kreeft na hindi maaaring maging sinungaling si Hesus dahil sa kanyang katauhan. Siya ay “hindi makasarili, mapagmahal, makalinga, mahabagin at madamdamin sa pagtuturo ng katotothanan. ”[4] Kahit ang mga sumasalungat kay Hesus ay hindi nakakita ng anumang maaaring sabihin laban sa kanya. Sa kanyang paglilitis, kinailangan nilang humanap ng mga bulaang mga saksi.
Sinabi ni Kreeft na hindi maaaring maging sinungaling si Hesus dahil wala siyang dahilan upang magsinungaling. “Nagsisinungaling ang mga sinungaling para sa makasariling dahilan, tulad ng pera, katanyagan, kasiyahan o kapangyarihan. Iniwan ni Hesus ang lahat ng kayamanan ng mundo at maging ang buhay mismo.” Sa halip, ang pag-angkin ni Hesus na Siya ay Dios ay “nagdulot sa kanya ng pagkamuhi, pagtanggi, di pagkaunawa, pag-uusig, pagpapahirap at kamatayan.”[5]
Hindi maaaring maging sinungaling si Hesus dahil sa Muling Pagkabuhay. Kung tinatanggap natin ang Biblia na mapagkakatiwalaan tungkol sa kasaysayan, dapat nating tanggapin na totoo rin ang Muling Pagkabuhay. Tanging ang Dios ang makakabuhay ng patay at hindi bubuhayin ng Dios si Hesus mula sa mga patay kung siya ay isang sinungaling.
Si Hesus ba ay Isang Baliw?
May mga nagsasabi na hindi nagsinungaling si Jesus, subalit tunay siyang naniwala na Siya ang Anak ng Dios. Sa sinabi sa itaas, ipinakita ni C.S.Lewis na ang isang ordinaryong tao na naniniwala na siya ay Dios ay maaaring baliw.
►Batay sa buhay ni Hesus na ipinakita sa Ebanghelyo, posible ba na si Hay isang baliw na nagkamali sa paniniwalang siya ay Dios?
Tanging ang isang taong may sakit sa pag-iisip ang maniniwala na siya ang Makapangyarihang Manlilikha. Halimbawang may makita kang isang tao sa kalsada na magsasabi at tunay na maniniwala, “Ako si Napoleon” o “Ako si Alexander the Great.” Malalaman mo agad na ang taong ito ay may sakit sa pag-iisip.
Kung si Hesus ay isang ordinaryong tao na naniniwalang siya ang Dios, maaaring siya ay may sakit sa pag-iisip. Subalit ang mga psychologists ay nagsasabi na walang tanda ng sakit sa pag-iisip si Hesus. Perpektong balanse ang kanyang pagkatao.
Nagpakita ng kanyang praktikal na katalinuhan ang mga pagtuturo ni Hesus. Ang kanyang pagkalinga para sa mga nagdurusa ay nagpakita ng pagmamahal niya sa iba na hindi mo maaasahang makita mula sa isang taong may sakit sa pag-iisip. Tiyak na hindi isang baliw si Jesus.
Panginoon ba si Hesus?
Kung si Hesus ay hindi isang alamat, isang guru, isang sinungaling, o isang baliw, ang tanging natitirang mapagpipilian ay siya ang eksaktong kung sino siya, ayon sa kanyang mga sinasabi; si Hesus ang Panginoon. Tulad ng kanyang mga alagad pagkatapos ng Muling Pagkabuhay, dapat nating sambahin si Hesus bilang Panginoon at Dios!
Ang ating konklusyon mula sa pagtingin sa limang pagpipiliang ito ay tumutugma sa pangkalahatang pangangatwiran para sa Kristiyanismo na napag-aralan na natin. Dahil ang Bagong Tipan ay tumpak ayon sa kasaysayan, mayroon tayong sapat na dahilan upang maniwala na si Hesus ay muling nabuhay mula sa mga patay at tumupad sa maraming propesiya patungkol sa Mesiyas. Ang dalawang bagay na ito ay nagpapakita na si Hesus ay siya nga ayon sa kanyang inaangkin—ang Anak ng Dios, ang Dios na nagkatawang-tao.
Sa araling ito, nakita natin na si Hesus ay ang Dios na inaangkin niya. Dahil si Hesus ay Dios, kailangan natin Siyang tanggapin bilang isang awtoridad na hindi maaaring magkamali. Siya ay lubusang mapagkakatiwalaan. Samakatuwid, dapat nating tanggapin ang kanyang inaangking na siya lamang ang tanging daan patungo sa Dios. Kailangan din nating tanggapin ang kanyang inaangkin na ang Biblia ay nagmula sa Dios. Totoo ang Kristiyanismo. Kung paano tayo tutugon sa katotohanang iyon ay napakahalaga/crucial.
Mga Tanong sa Pagbabalik-Aral
(3) Ano- ano ang limang pagpipilian na dapat pag-isipan tungkol sa pag-angkin ni Hesus na siya ay Dios?
(4) Maikling ipahayag ang problema sa bawat isa sa unang apat na pagpipilian.
[1] Ang ibig sabihin ng monotheistic ay paniniwala sa isa lamang na transcendent ng Dios.
[3] “Sinusubukan kong pigilan ang sinuman na nagsasabi ng napakatanga na madalas sabihin ng mga tao: Handa kong tanggapin si Jesus bilang isang mahusay na guro sa moral, ngunit hindi ko tinanggap ang kanyang pag-angkin na Diyos. Iyon ang iisang bagay na hindi natin dapat sabihin. Ang isang tao na isang tao lamang, at sinabi ang mga sinabi ni Jesus, ay hindi magiging isang mahusay na guro sa moral. Siya ay magiging isang baliw, o kung hindi man ang Diyablo ng Impiyerno.
Dapat kang pumili. Alinman ang taong ito ay naging, at ngayon ay, Anak ng Diyos, o kung hindi man ay isang baliw o isang mas masahol pa. Kung sa palagay mo ay Siya ay tanga, maaari mo siyang ikulong. Kung sa palagay mo ay demonyo Siya, maaari mo siyang dumura at patayin. O maaari kang mahulog sa kanyang paanan at tawagan siyang Panginoon at Diyos. Ngunit hindi natin dapat isipin na siya ay isang mahusay na guro lamang sa moral. Hindi niya iyon ginawang pagpipilian para sa amin. Hindi iyon ang hangarin niya.”
-C.S. Lewis, Mere Christianity
[4] Peter Kreeft, Handbook on Christian Apologetics, (IL: InterVarsity Press, 1994), p. 160.
“Lee,” sabi ni Jia, “tayo ay nasa crucial na punto. Nakita na natin ang ebidensiya para patunayan na may Dios; nakita na natin ang ebidensiya para sa paglikha; nakita na natin ang ebidensiya na mapagkakatiwalaan ang Bagong Tipan; nakita na natin ang ebidensiya na si Hesus ay siya nga ayon sa kanyang sinabi.
“Lee, sa ating mga pag-uusap, nakita na natin na:
Ang Bagong Tipan ay maaasahan at mapagtitiwalaan patungkol sa kasaysayan.
Si Jesus ay muling nabuhay mula sa mga patay, at siya’y tumupad sa dosenang propesiya tungkol sa Mesiyas.
Ang Muling Pagkabuhay ni Jesus at ang pagtupad sa propesiya ay nagpapakita na siya ay siya nga tulad ng kanyang inaangkin—ang Mesiyas, ang Anak ng Dios, ang Dios na nagkatawang-tao.
Bilang Anak ng Dios, si Hesus ay isang awtoridad na hindi maaaring magkamali.
Itinuro ni Cristo na ang Biblia ay ang Salita ng Dios at siya ang tanging daan patungo sa Dios.
“Dahil ang lahat ng ito ay totoo, iisa lamang ang posibleng konklusyon. Kung si Hesus ay Dios, dapat nating paniwalaan ang kanyang sinabi: Ang Biblia ay ang Salita ng Dios, at si Hesus ang tanging daan patungo sa Dios. Samakatuwid, totoo ang Kristiyanismo.
“Lee, ang tanong ko ay, ‘Maniniwala ka ba? Handa ka bang isuko ang iyong buhay sa awtoridad ni Hesus, ang tanging nag-iisang Anak ng Dios?’”
Sumagot si Lee, na may luha sa kanyang mga mata, “Jia, naaalala mo ba na ikinuwento mo sa akin ang tungkol kay ‘Tomas na Mapag-alinlangan’? Iyon ako; kailangan ko ng maraming ebidensiya. Subalit noong nakaraang lingo, nabasa ko ang mas marami pang bagay tungkol kay Tomas sa iyong Biblia. Pagkatapos niyang makita ang ebidensiya, sinabi ni Tomas, “Aking Panginoon at aking Dios!’[1] Nabuksan ang mga mata ni Tomas, Nakita niya ang ebidensiya, at siya ay sumampalataya.
“Jia, nakita ko ang ebidensiya- at ako ay naniniwala. Habang binabasa ko ang tungkol kay Tomas, binuksan ng Dios ang aking mga mata sa katotohanan ng Biblia. Ako ay bulag, subali’t ngayo’y nakakikita na! Nakahanda na akong isuko ang aking buhay kay Hesus. Maaari mo ba akong samahang manalangin?”
(1) Apologetics at ang Ulo: Sisimulan mo ang susunod na klase sa isang pagsusulit gamit ang mga Tanong sa Pagbabalik-aral mula sa Aralin 8. Pag-aralang mabuti ang mga tanong na ito bilang paghahanda sa pagsusulit.
(2) Apologetics at ang Puso: Maraming Kristiyano sa kasalukuyan ang nagsasabi, “Ako’y naniniwala,” subalit ito ay isa lamang pagpapasya sa isip. Sa Juan, ang salitang “naniniwala” ay nagpapahayag rin ng kahandaang sumunod. Kung hindi tayo susunod, hindi tayo naniniwala. Naniniwala ka ba? Nabubuhay ka ba nang may lubos na pagsunod? Kung hindi, italaga ang iyong sarili sa kumpleto at lubos na pagsunod sa Dios.
(3) Apologetics at ang mga Kamay: Makipag-usap sa isang hindi mananampalataya tungkol sa pag-angkin ni Jesus na siya ay Dios. Bago mo ipakita sa kanila kung ano ang sinabi ni Hesus, itanong, “Ano ang iniisip mo tungkol kay Hesus? Kung hindi siya Dios, sino siya sa iyong palagay?” Ipakita sa kanila na ang tanging makatwirang pagpipilian ay si Hesus ang Anak ng Dios (ang Dios Anak), tulad ng kanyang sinabi. Kumuha ng mga notes tungkol sa inyong pag-uusap upang maibahagi sa klase sa inyong susunod na pagkikita.
Mga Tanong sa Pagsusulit sa Aralin 8
Mga Tanong sa Pagsusulit sa Aralin 8
(1) Maglista ng apat na pangungusap sa panahon ng kanyang ministeryo na nagpapakita na si Hesus ay naniwala na siya ay Dios.
(2) Maglista ng tatlong pangungusap sa kanyang paglilitis na nagpapakita na naniwala si Hesus na siya ay Dios.
(3) Ano ang limang pagpipilian na kailangang pag-isipan tungkol sa pag-angkin ni Hesus na siya ay Dios?
(4) Maikling ihayag ang problems para sa bawat isa sa unang apat na pagpipilian.
(5) Isulat ang limang pahayag at konklusyon para sa pangkalahatang pangangatwiran para sa Kristiyanismo.
SGC exists to equip rising Christian leaders around the world by providing free, high-quality theological resources. We gladly grant permission for you to print and distribute our courses under these simple guidelines:
No Changes – Course content must not be altered in any way.
No Profit Sales – Printed copies may not be sold for profit.
Free Use for Ministry – Churches, schools, and other training ministries may freely print and distribute copies—even if they charge tuition.
No Unauthorized Translations – Please contact us before translating any course into another language.
All materials remain the copyrighted property of Shepherds Global Classroom. We simply ask that you honor the integrity of the content and mission.
.jpg)
