Somo hili halijawekwa kwa ajili ya kipindi cha darasa kama yalivyo masomo mengine. Hata hivyo unaweza ukalitumia kwa kufundishia, na kuna mada nyingi kwa ajili ya majadiliano. Itakuwa ni jambo la umuhimu kukutana angalau zaidi ya mara moja kwa ajili ya somo hili.

Darasa linapaswa lichukue muda mahususi kujadili kuhusu hatua zao za baadaye. Watapaswa wapannge kwa pamoja jinsi watakavyoweza kusaidia makanisa ya mahali pamoja kwenye majukumu ya uinjilisti na ufuasi.

Huduma ya vikundi vidogo inakuwa na mifumo ya aina nyingi katika dunia yote. Kuna aina nyingi ya vikundi vodogo, vilivyoandaliwa kwa malengo tofauti. Vikundi vidogo vinaweza kukutana kwa ajili ya kujifunza, uwajibikaji wa kiroho, huduma, maombi, au kwa ajili ya miradi maalumu.

Baadhi ya makanisa yamegawanyika kwenye vikundi ambavyo vinakutana majumbani. Hivi vikundi vidogo hufanya kazi zake kama kanisa ndogo Makanisa ya wakati wa Agano Jipya inaonekana yalifanya kazi kwa jinsi hii.

Katika kukua, makanisa yenye ufanisi yana mfumo wa aina fulani ya vikundi vidogo.

Katika sehemu hii, tutazungumzia kuhusu ufanisi wa vikundi vidogo kwa ajili ya huduma ya ufuasi.

John Wesley (Uingereza, katika karne ya 18) alikuwa siyo wa kwanza kutengeneza mfumo wa vikundi vidogo ambavyo vilikuwa na ufanisi sana.

Wesley alikuza mfumo wa ufuasi akitumia vikundi vilivyokuwa na ukubwa unaotofautiana.[1] Mitindo ya Wesley haikuwa mifumo kamili iliyokuwa imekamilika pale mwanzoni, lakini iliendelezwa hatua kwa hatua kulingana na mahitaji. Wengi wa watu wa Wesley waliokuwa wameokoka walikuwa wanaomba kutiwa moyo, ushauri na maombi. Kwa kuwa walikuwa wengi sana, aliwapanga wawe wanakutana kila siku ya Alhamisi.

Katika kila eneo ambalo Wesley na wahubiri wake walipeleka injili waliwapanga waliookoka kwenye vikundi ambavyo vilikutana mara kwa mara. Kwa kuwa makusanyiko yalikuwa makubwa, wengi walikuwa hawawezi kuelezea kuhusu mahitaji yao ya kiroho na walikuwa hawapati uangalizi waliouhitaji. Vikundi vidogo viliundwa vikaitwa madarasa, ambapo viongozi wao walitumika kama wachungaji ili kuwatia moyo na kuwaongoza washirika. Kila mshirika aliyeonekana anaendelea kutumika kwenye dhambi iliyo Dhahiri na hataki mabadiliko, aliondolewa kwenye ushirika na hakuruhusiwa kuja tena kwenye mikutano ya kikundi.

Vikundi vidogo kuliko uwezo wa madarasa vilianzishwa ili washirika waweze kushirikishana katika vita vyao vya kiroho na kumpa kila mmoja uwajibikaji wa kiroho. Katika vikundi hivi kiongozi anaelezea hali yake yeye mwenyewe ya kiroho, kisha anauliza washirika wengine maswali kuhusiana na hali zao za kiroho, dhambi, na majaribu. Kwenye vikundi hivi, washirika wake wote walikuwa wa jinsia moja.

Mafanikio ya Wesley yalisababisha mtu aliyekuwa maarufu sana George Whitefield kutoa taarifa hii: “Ndugu yangu Wesley alifanya kwa busara sana - roho ambazo zilikuwa zimeamshwa chini ya huduma yake ziliunganishwa katika darasa, na kwa ajili hiyo akafaulu kutunza tunda la kazi yake. Katika hili mimi nilipuuzia, na watu wangu wakawa tepetepe.” Mtindo wa Wesley uliendelezwa na kanisa la Wamethodisti la Marekani kwenye miaka ya mwanzo, lakini kanuni zake za ufuasi pamoja na mafundisho yake ya imani yamepuuzwa na Umethodisti wa wakati huu.

Jengo la kanisa la kwanza lilijengwa takribani mwaka wa 250 B.K. Kwa karne mbili za mwanzo, kanisa lilijona lenyewe kama ni watu, siyo kama jengo au shirika. Kanisa limeundwa na vikundi vya Wakristo wanaoabudu kwa pamoja, wanaofanya uinjilisti, na wanaotii Biblia.

Vikundi vidogo vya watu ndiyo matofali yanayojenga kila kanisa lenye ufanisi. Programu ya ufuasi kwa ajili ya vikundi vidogo siyo taasisi mpya ambayo siku moja itakuwa imepitwa na wakati, Siyo mtindo mpya unaoweza kufanya kazi katika maeneo kadhaa na usifae kwenye maeneo mengine. Badala yake, vikundi vidogo ndio matofali ya msingi wa kanisa. Huduma kwenye vikundi vidogo inaweza ikafanywa kwa njia nyingi ili kukidhi changamoto ambazo kila kanisa linakutana nazo.

Kanisa halitaweza kukidhi malengo yake hadi pale watu wake watakapokuwa wameimarishwa na kufundishwa katika mfumo ulio wa kibinafsi zaidi kuliko ushirika wote kwa pamoja au wakati mwingi wa shule za Jumapili.

Tahadhari

Vikundi vidogo vitakuwa tu vya kiroho kama watu wanaohusika kwenye vikundi hivyo watakuwa watu wa kiroho. Kama hawatakuwa wafuasi waliojitoa kabisa katika kipaumbele cha kumpendeza Mungu, kuishi kwa uaminifu, na kukamilisha kazi ya umisheni ya kanisa, kuna njia nyingi ambazo kikundi kinaweza kupotoka na kwenda vibaya au visivyo.

Kuwa na uwajibikaji wa kiroho ni kuanzisha uhusiano na mtu au kikundi ambako hapo wewe unawajulisha hali yako ya kiroho, mafanikio yako ya kiroho, au kushindwa kwenye nidhamu za kiroho, na ahadi yako kwa ajili maendeleo. Watakuambia ni wapi wanapofikiri kwamba unaenda vibaya. Utawapa ahadi yako kwamba utatekeleza, na watakuuliza baadaye kama umetekeleza ahadi yako.

Msingi wa kibiblia wa uwajibikaji wa kiroho kwenye jumuiya yenye afya ya Kikristo umefafanuliwa kwa makini sana kwenye sehemu iliyotangulia. Pasipo uwajibikaji wa kiroho, hatutaweza kutimiza amri na maagizo yoye ya Maandiko; na, tutaipuuzia njia ambayo Mungu ameipanga kwa ajili ya kutupa sisi neema.

Ungameni dhambi zenu ninyi kwa ninyi, na kuombeana, mpate kuponywa. Kuomba kwake mwenye haki kwafaa sana, akiomba kwa bidii (Yakobo 5:16).

Mtu hatakiri madhaifu yake ya binafsi pasipokuwepo na uhusiano ambao utarahisisha jukumu hilo. Kama hatafanya ukiri wake kwa mtu ambaye atafanya maombi kwa ajili ya madhaifu yake, anapuuzia njia ya Mungu aliyoipanga kwa ajili ya kukutana na madhaifu hayo.

Mchukuliane mizigo na kuitimiza hivyo sheria ya Kristo (Wagalatia 6:2).

Kama hatumjui mtu vizuri, hatuwezi kujua ana mizigo gani mizito aliyo nayo. Hatuwezi kutimiza agizo hili la kimaandiko bila uhusiano ambao utawezesha hilo.

Tukaangaliane sisi kwa sisi na kuhimizana katika upendo na kazi nzuri (Waebrania 10:24).

Tunapaswa tujipime kila mmoja na mwenzake kwa ukaribu kwa nia yenye upendo ili tuweze kujua ni aina gani ya mambo ya kutia moyo na ya kurekebisha ambayo ni muhimu. Mambo ya kutia moyo yanaweza yakashindikana, na mambo ya kurekebisha yanaweza kukwama kama hatutakuwa na mahusiano na mtu mwingine.

Maswali yafuatayo yanaweza kusaidia mtu kujipima kama uwajibikaji wa kiroho upo au haupo katika maisha yake.

Je, nina mahusiano gani ambayo yanasababisha kuwe na uwezekano mtu kushikamana nami katika kubeba mizigo yangu mizito, ninakiri madhaifu yangu kwa mtu mwingine, ninasaidia mtu mwingine katika kubeba mizigo yake, na mtu mwingine anawajibika kwenye hali yangu ya sasa ya kiroho?

Je, kuna nyakati ambazo hakuna mtu yeyote ambaye naweza kumtegemea, nyakati ambazo nina furaha kwamba hakuna mtu anayejua hali yangu, na nyakati ambazo ninakwazika kutoa taarifa ya muda wangu wa maombi au muda wangu wa kujifunza Biblia?

Makanisa mengi hayatimizi wajibu wao wa uwajibikaji wa kiroho isipokuwa wawe wamepanga mfumo wa kufanya hivyo. Kwa wengi, huo ni mfumo wa vikundi vidogo.

Yesu alionyesha kipaumbele cha ufuasi. Tangu mwanzo wa huduma yake alichagua watu wachache ambao wangechukua jukumu la kuliongoza kanisa. Hakutumia muda wake mwingi katika kuhubiri kwa maelfu ya waatu waliokuwa wanamfuata; badala yake, mara kwa mara alikuwa anakuwa na muda wa kuwafundisha wale wanafunzi kumi na wawili. Aliiendeleza huduma yake kupitia kwa wale aliokuwa amewafundisha.

[1]Mtu ambaye anafanya huduma ya ufuasi anapaswa awe na tabia hizi zinazofuata hapa chini. Hawezi akawa ni mzuri sana katika kila sifa, lakini itabidi ajaribu kuziboresha zote. Ikiwa atakosa sifa moja katika hizo, ufanisi wake utakuwa wa kiwango cha chini.

(1) Aliyekomaa Kiroho

Anapaswa awe na sifa za kukomaa kiroho zilizoelezwa katika sehemu iliyotangulia. Kama siyo mtu aliyekomaa kiroho, hataweza kuonyesha mfano mzuri na hataweza kuwa na uzoefu atakaouhitaji.

(2) Anayepatikana

Kama ratiba yake tayari unakuta imeshajaa na haijasimamiwa vizuri, hawezi kupatikana kwa ajili ya huduma ya vikundi vidogo. Ni lazima kupatikana kwake kuwe kipaumbele.

(3) Anayeaminika

Ni lazima awe mtu anayetimiza ahadi zake. Ni lazima awe mtu anayetunza miadi anayofanya. Ni lazima awe mtu wa kuweza kuwafanya watu wengine waweze kuwajibika katika miadi yao.

(4) Mwenye kujiamini

Ni lazima aamini kwamba ana uwezo wa kujifunza jinsi ya kuongoza kikundi. Kama atakuwa ana uwezo lakini hajiamini, anahitaji kwanza uongozi wa mtu mwenye uzoefu ambao utamsaidia kujenga ujasiri wake.

(5) Uwezo wa kutatua migogoro

Anahitajika awe na uwezo wa kuweka mtazamo sahihi au kamili wakati inapotokea watu kutokubaliana na hatimaye kusababisha matatizo. Anahitajika awe na uwezo wa kusaidia kutatua migogoro kati ya watu wengine.

(6) Uwezo wa kufundisha

Je, watu wanaelewa maelezo yake? Kiongozi anatakiwa asiwe mtu mwenye kuwachanganya watu.

(7) Mwenye njaa ya Neno la Mungu

Ni lazima awe mtu wa kufurahia Neno la Mungu, ili aweze pia kuwaalika na watu wengine wakalifurahie Neno. Ni lazima ahakikishe anaifanya Biblia kuwa kitu cha muhimu sana katika uhusiano wake na Mungu.

(8) Mwenye kumtegemea Mungu

Ni lazima afahamu kuwa matokeo ya kiroho yaweza kusababishwa kwa kazi ya Roho Mtakatifu tu. Anapaswa awe tayari kushirikiana na Roho Mtakatifu. Ni lazima ategemee upako kutoka kwa Mungu. Hapaswi kujiamini kuwa ufafanuzi wake utafanikiwa kwa sababu ya uwezo wake tu.

(9) Aliye tayari kutumika

Ni lazima awe mtu ambaye anajisikia kwamba anafanya jambo la thamani wakati anapokuwa anahudumia wenzake. Hapaswi kuwa mtu anayetakakutumikiwa. Hapaswi kutafuta huduma kwa kusudi la kudhihirisha vipaji vyake. Anatakiwa awajibikie katika mahitaji na awe tayari kujitolea.

(10) Kukaa chini ya mamlaka ya kiroho

Anapaswa awe anawajibika chini ya mamlaka ya kiongozi wa kiroho. Anatakiwa awe anafuata maelekezo ya viongozi wa kiroho.

(11) Mwaminifu kwa kanisa

Kiongozi wa kikundi anapaswa awe mshirika aliyejitoa kabisa kwa kanisa la mahali pamoja. Huduma ya ufuasi inapaswa kusababisha watu kukubaliana na kanisa na zaidi wawe watu waliojitoa kwa kanisa kabisa.

(12) Ari ya mafanikio

Kam atakuwa ana ari ya mafanikio, hatakata tamaa kwa haraka. Atakabiliana na mazingira ya huduma. Atatafuta taarifa za kumsaidia aweze kuwa na ufanisi zaidi. Atatumia maarifa wakati kunapotokea matatizo au fursa. Atakuwa na nguvu na shauku ya huduma.

(13) Usahihi wa mafundisho ya imani

Anapaswa awe na msingi mzuri wa kibiblia, na mafundisho ya imani ya kufanya uinjilisti.

(14) Aliyefundishika kwa ajili ya huduma

Siyo lazima mafundisho yafanyikie kwenye taasisi ya taaluma. Mafundisho huanzia kwa uchunguzi, jinsi mwamini anavyoiona huduma ikifanyika. Mafunzo huongezeka kwa ushiriki, wakati anapopewa majukumu chini ya maelekezo. Kusoma na kujifunza kwa kutumia nyenzo nzuri za mafundisho ni jambo muhimu sana.

Njia nzuri sana ya kufanya huduma ya ufuasi iwepo ni kwa kanisa la mahali pamoja kuelewa majukumu, kipaumbele cha ufuasi na kufanya kazi kwa umoja.

Kwa hiyo, maelekezo haya ni kwa ajili ya viongozi na washirika waliojitoa kabisa kwa kanisa.

Kama kanisa litatambua kwamba wanataka wafanye vizuri kwenye ufuasi, kwanza inabidi wajifunze maandiko na vipengele vilivyoko katika kozi hii ya ufuasi. Viongozi wanaweza kuwasilisha nyenzo za mafundisho haya. Washirika wote waliojitoa kabisa kwa kanisa kama inawezekana wanaweza wakashirikishwa, ili waweze kushiriki maono haya.

Sehemu ya pili ya maendeleo ni kuchunguza kile ambacho tayari kanisa linafanya. Makanisa mengi yana vikundi ambavyo tayari vinafanya kazi, hata kama bado hawakuwa na makusudi hayo ya kuzindua programu ya vikundi vidogo. Kwa mfano, kunaweza kuwepo na kikundi cha wanamuziki ndani ya kanisa ambacho hukutana mara kwa mara. Kunaweza kuwepo na kikundi cha uimbaji kinachofanya mazoezi mara kwa mara. Kunaweza kuwepo na kikundi cha mashemasi. Kunaweza kuwepo na vikundi kwa ajili ya masomo ya shule ya Jumapili, na waalimu wa shule ya Jumapili pia wanaweza wakaunda kikundi chao. Vijana katika kanisa wanaweza wakawa wanakutana mara kwa mara. Kamati mbalimbali za kanisa zinaweza kuwepo na kukutana kwa ajili ya kuangalia majukumu kadhaa ya kanisa. Kikundi kisicho rasmi kinaweza kufanya kazi kwenye mradi pamoja. Kunaweza kuwepo na familia ndani ya kanisa ambazo hukutana kwa pamoja mara kwa mara kwa ajili ya urafiki. Inawezekana kukawepo na mafundisho ya Biblia majumbani na vikao vya maombi.

Vikundi hivi vyote havijaanzishwa kwa ajili ya huduma ya ufuasi au uwajibikaji wa kiroho, lakini vinaweza kusaidia katika kutimiza malengo hayo. Kanisa lolote ambalo lina uhai wa kiroho lina vikundi kadhaa ambavyo vinasaidia katika uhai wa kanisa. Wakati kanisa linapoamua kujiongeza kwenye programu yake kwa ajili ya ufuasi, linapaswa lifanye tathmini ya vikundi vilivyopo na kutaka kujua ni nini kinachoendelea, kisha tafakuri ifanyike kuona ni kwa jinsi gani lengo linaweza kufikiwa kwa njia iliyo bora zaidi.

Vikundi vipya vinaweza vikahitajika. Inawezekana aina nyingine ya vikundi ikahitajika. Kunaweza kukawepo na vikundi vya kutoa mafunzo ya vitendo kwa ajili ya huduma. Kunaweza kuwepo na vikundi ambavyo kimsingi ni kwa ajili ya mafundisho ya Biblia na maombi. Kunaweza kuwepo na vikundi vidogo kwa ajili ya uwajibikaji mzito wa kiroho.

Lengo la kikundi huamua nani awepo na kwa jinsi gani kikundi kitafanya majukumu yake. Kwa mfano, Kikundi kwa ajili ya uwajibikaji mzito wa kiroho kinapaswa kiwe na watu wasoizidi kumi. Endapo kikundi kitakuwa na watu wengi sana, uwajibikaji unapungua, ushirikishanaji unakuwa hauna nguvu, uangalizi mkubwa zaidi utahitajika, ushiriki mdogo ni jambo linalowezekana kutokea, na mahudhurio huenda yakawa mabaya sana. Undani wa ushiriki wa mtu utakuwa finyu kama wanaume na wanawake watachangamana pamoja.

Lengo la kikundi huamua kama nafasi kwa ajili ya washiriki wapya iwepo au isiwepo. Kama lengo ni kwa ajili ya uwajibikaji wa kiroho, haitakuwa jambo la busara kuongeza washiriki wapya baada ya kikundi kuwa kimeshakutana mara kadhaa. Watu wengi hawatataka kushirikisha hali zao za kiroho hadi pale watakapojiona wana usalama na watu wengine waliopo kwenye kikundi. Kama lengo la kikundi ni kukamilisha masomo ya mfululizo na au mfuatano, siyo jambo la busara kuongeza watu wengine wapya wakati wa mafunzo.

Kunaweza kuwa na kikundi cha watu wapya waliookoka.[1] Ni jambo muhimu kwamba watu hawa hawapaswi wakae nje kwa wiki kadhaa kabla hawajajiunga kwenye kikundi. Kwa hiyo, kikundi hiki kinahitaji mafunzo yanayozunguka ambayo yatatoa nafasi kwa watu wapya kujiunga wakati wowote. Viongozi watapaswa watambue kwamba baadhi ya watu wapya walioamua kuokoka wanaweza kuamua kutoendelea na mafunzo. Pamoja na ukweli kwamba watu wengine wataweza kuamua kuondoka kwenye kikundi, hiyo haimaniishi kwamba kikundi hakifanyi vizuri. Ingawaje watu wengine wanaweza wakaamua kuondoka, kikundi cha waamini wapya kinapaswa kiwe wazi kwa ajili ya watu wapya.

Kama kikundi ni kwa ajili ya kutoa huduma ya mafunzo au maendeleo zaidi ya kina ya kiroho, watu wa kikundi wanapaswa wawe walio na shauku ya kukua kiroho na wanaotaka kuwajibikia kwa moyo wote makusudio ya kikundi. Endapo baadhi ya washirika katika kikundi siyo wenye kuwajibika kikamlifu, kikundi hakitakuwa na uwezo wa kufanya vizuri na hakitafikia malengo yao.

Washiriki wengi ni lazima wapewe mafunzo ya awali kwa mwaliko wa binafsi. Usngojee watu watake au waombe wenyewe kujiunga.

Siyo kila mtu katika kanisa atakayeweza kujihusisha katika progaramu ya vikundi vidogo. Kama wewe ni kiongozi kwenye kanisa, usiwakimbize watu kwa kuwalaumu kwa kutoshiriki katika kikundi kidogo. Kuza huduma ya kikundi kwa kuelezea faida zake.

Kwenye kikao cha kwanza, hakikisha kila mmoja anaelewa umuhimu wa kikundi. Shirikisha maandiko na taarifa ambazo zinaonyesha umuhimu wa ufuasi.

Ili kusaidia mahudhurio, kikundi kinaweza kupangwa kukutana kwa majuma kadhaa. Elezea kwamba kikundi kina mpango wa kukamilisha mfululizo wa masomo maalumu, na uwaeleze mwisho wa huo mfululizo wa masomo utakuwa lini. Kwa njia hiyo, kila mwanachama anajua hasa anachojitolea. Sisitiza kuhusu hitaji la mahudhurio yaliyo mazuri. Muda wa mafunzo ukishamalizika, kikundi kinaweza kikaanza tena na wale watu ambao bado watahitaji kuendelea.

Andrea amekuwa Mkristo kwa miaka kadhaa. Yeye ni mshirika wa kanisa na huwa anasaidia majukumu kwenye kanisa. Anachojali sana ni kwamba kanisa lake halina mpango wa kufanya huduma ya ufuasi. Anawaza kama kanisa lingeanzisha vikundi vidogo, lakini viongozi wa kanisa hawana mpango katika hilo.

► Je, Andrea afanye nini?

Itabidi Andrea aongee na viongozi wa kanisa na aombe kibali cha kuongoza kikundi kidogo. Hapaswi kulaumu huduma ya kanisa, lakini badala yake ataelezea faida zitakazopatikana kutokana na kikundi. Kama kikundi kitafanya vyema, kanisa litaanza kuelewa faida za aina ile ya huduma.

Mwanzoni kabisa kikundi kinapoanza, kuna msisimko na matarajio, Washirika wengi wa kikundi hawajui ni nini hasa cha kutarajia, lakini wanakuwa na matumaini ya kupata msaada kutoka kwenye kikundi.

Maelekezo yafuatayo yatasaidia kikundi kuwa cha ufanisi na kutimiza makusudi yake. Kuna kanuni muhimu kwa ajili ya vikundi kuweza kufanya majukumu yao. Kama kiongozi atasaidia kikundi kufuata kanuni hizi, atakuwa amepunguza kuchanganyikiwa na kukata tamaa.

Kikao cha kwanza kitakuwa tofauti na vikao vingine kwa sababu kikundi kinajifunza jinsi vikao vitakavyokuwa. Hata hivyo, kikao cha kwanza kitaweka mfumo kwa ajili ya vikao vitakavyofuata. Kama mtu hatapata nafasi ya kuzungumza kwenye kikao cha kwanza, mtu huyo ategemee kuwa kimya katika vikao vingine vya baadaye. Kama mtu atatawala mazungumzo, kikundi kitategemea mtu huyo aendelee kumiliki vikao vingine vya baadaye. Kama kikao kimekuwa hakina utaratibu na mpangilio mzuri, watategemea hali hiyo hiyo kwenye viako vitakavyofuata. Kama kikao ni kama darasa lililo na ushiriki hai mchache, wategemee mfumo huo huo kwenye vikao vinavyofuata.

Baadhi ya wajumbe wanaweza wakajiondoa baada ya kufanyika kwa vikao vichache kwa sababu kikundi kimekuwa siyo tegemeo lililokuwa linatarajiwa. Ni muhimu kuongoza kikundi kwa usahihi ili washiriki waliokuwa wanategemea mambo mazuri wasikatishwe na tamaa.

(1) Kipange kikundi kiweze kukutana kila wiki, kama itawezekana. Wengine wanaweza wakahitaji msaada kwa ajili ya malezi ya watoto wao wachanga.

(2) Mtiririko wa vikao utakuwa kama ifauatavyo: (1) Muda wa kujifunza, kisha, (2) Kushirikishana mahitaji mbalimbali ya kuombea, kisha, (3) Maombi.

Kama msingi mkuu wa kikundi ni kujifunza, muda wa kujifunza unaweza ukawa mrefu na sehemu nyingine zikawa fupi; lakini sehemu hizi tatu ni lazima zihusishwe. Kama kusudi la kikundi ni kwa ajili ya uwajibikaji wa kiroho, muda wa kujifunza utapaswa uwe mfupi, lakini watakuwa wanazo nyenzo nyingine za mafunzo ambazo wanajifunza.

Kama kikundi kina mambo binafsi ya kushirikishana na kujadiliana lakini hakuna vifaa vya masomo yeyote ya kujifunza, inawezekana kukawa na kutoelewana. Kikao kitatawaliwa na baadhi ya washiriki walio na haiba kuzidi wengine. Vifaa vya kujifunzia huwafanya watu wote washughulike zaidi na ukweli kuliko yale waliyo nayo kwenye mawazo yao.

(3) Anza na kumaliza kikao katika muda uliopangwa.

Kama utaanza na kumaliza vikao kwa kuchelewa, wale wanaojali muda wao wataanza na wao kuja kwa kuchelewa au kukwepa baadhi ya vikao.

(4) Weka muda wa kusitisha kikundi.

Washirika wa kikundi watahitaji kujua ni kwa muda gani wataendelea kuwepo kwenye kikundi. Kwa kawaida washirika wapya wasiruhusiwe kujiunga na kikundi baada ya kuwa kumefanyika vikao kadhaa, labda iwe kikunda kina mzunguko wa masomo kwa ajili ya waamini wapya. Kama kikundi kinajifunza mafunzo ya mzunguko ya mfululizo wingi wa masomo unaweza kuwa kipimo cha wiki ambazo wataweza kukutana. Kama wanakutana kwa ajili ya uwajibikaji wa kiroho, wanaweza wakajiwekea kiwango cha miezi sita. Wakifika mwisho, wataanda tena upya. Kwa wakati huo baadhi ya washirika katika kikundi wanaweza wakaondoka, na kikundi kinaweza kikafikiria tena aidha kuwaingiza au kutowaingiza washirika wapya kujiunga.

(5) Wakati wa kujifunza, sisitiza kuhusu kusudi linalobadilisha maisha badala ya maarifa kama maarifa.

Mshirika wa kikundi atajihisi kwamba kikundi kinafaa kama atapata kitu cha kipekee cha kutumia katika Maisha yake binafsi kutoka katika mafundisho.

(6) Kufuatilia ahadi.

Kama mtu ameshirikishana tatizo lake kisha akakubali kuchukua hatua, uliza kwenye kikao kinachofuata endapo kama amefanya kama alivyoahidi kwamba atafanya.

(7) Kiongozi anapaswa kupatikana ili kukutana binafsi ili kutoa maelekezo ya kiroho.

Washirika wengine mara nyingine wanaweza wakakaa pamoja kwa ajili ya kutiana moyo.

(8) Chagua eneo zuri la kufanyia kikao.

Mahali pa kufanyia kikao pasiwe mahali rasmi lakini pawe ni eneo lenye mazingira ya nyumbani. Kikao kifanyike katika mazingira ya mkao wa mviringo kwa kadri inavyowezekana kusudi kila mshirika wa kikao aweze kumwona mwenzake usoni. Hali hii itamtia moyo mshiriki. Kikao kifanyike mahali ambapo hapatakuwa na usumbufu au vikwazo.

(9) Jenga tabia nzuri za kusikiliza.

Ishara za kusikiliza vizuri ni kwa macho kukutana, kujieleza kwa hisia, kupuuzia usumbufu, na kuwa na mwitikio kwa ucheshi wa mnenaji na hisia zingine.

(10) Hakikisha hakuna mshirika wa kikundi ambaye kila siku ananyamaza bila kuongea chochote.

Elekeza swali kwa mtu ambaye siyo mwongeaji sana katika kikao (“Charles, unafikirije kuhusu suala hili?”).

(11) Usimlazimishe mshirika wa kikundi kushirikisha kitu chake binafsi.

Badala yake, tengeneza mazingira ambayo atajisikia huru kuongea. Jenga ujasiri wa mshirika wa kikundi kwa kumtazama machoni na kumpongeza kwa kile atakachosema.

(12) Jaribu kuuliza maswali watakayoweza kujibu ili kujenga ujasiri wao.

Kama mtu atatoa jibu lisilo sahihi, jaribu kuthibitisha kitu kizuri kilichoko kwenye jibu lake kabla ya kufanyia tahakiki jibu lake.

(13) Jaribu kuthibitisha kila ushauri unaotolewa kabla ya kuanza kusahihisha

(14) Kama kuna mtu wa kuzungumza sana na kutaka kujibu kila swali, tafuta namna ya kumthibiti.

Njia mojawapo ya kuweza kufanya hivyo ni kuelekeza maswali kwa baadhi ya washirika wengine wa kikundi waliopo. Au unaweza kuuliza, “Je, ninyi wengine mliobakia mnasemaje?” Kwenye majadiliano, unaweza ukasema, “Tusikilize kutoka kwa mtu mwingine ambaye hajaongea kabisa kuhusu jambo hilo.”

Kama bado mshirika huyo anaendelea kuongea sana, kiongozi anaweza kumwomba atoke naye nje ya eneo la kikao kwa mazungumzo. Anaweza akakuambia jambo kama hili, “Charles, wewe ni mtu unayefikiri kwa haraka na una uwezo wa kuingilia jambo lolote kwa haraka kwenye majadiliano, lakini ninajisikia kwamba wengine wetu hawataweza kushiriki kama tutajibu kila kitu kwa haraka. Je, unaweza kunisaidia kumfanya kila mmoja aweze kuhusika?”

(15) Usiruhusu washirka wengine wawili au watatu kuwa na vikao vyao vya chini chini huku wakipuuzia kikundi.

Kama kuna mtu ambaye anataka aendelee na kubishania kuhusu jambo fulani, mwambie kwamba majadiliano yatakamilishwa baadaye nje ya kikao.

(16) Usiruhusu mtu mwingine aingilie kati ili awavuruge wasemaji wengine.

Nyoosha mkono wako, na mzuie kwa dhati yule mtu anayeingilia kati kuvuruga, na ruhusu msemaji wa kwanza aendelee kuzungumza hadi kumaliza. Vinginevyo, majadiliano wakati wote yatakuwa yanatawaliwa na watu wachache wasiokuwa na maadili. Watu ambao hawana uthabiti wa mambo, watajisikia kufadhaishwa kwamba wanashindwa kumalizia sentesi zao katika majadiliano hayo.

(17) Sikiliza malalamiko.

Lalamiko lolote linaweza kuonyesha tatizo ambalo linaweza kurekebishwa. Usipuuzie hali zinazojitokeza za kuonyesha kutoridhika. Kama mtu ataonyesha kutoridhika na kikao hicho cha kikundi, hataweza kuelewa kusudio, au inawezekana akawa na lalamiko sahihi na lenye sababu thabiti.

(18) Endapo mshirika wa kikundi anaonyesha uadui, kuchafua, ubishi, anaweza kuwa hakubaliani na malengo ya kikundi.

Kikundi kinaweza kisifikie kuwa pale kilipokuwa kimekusudiwa. Zungumza na mtu huyu pembeni umsaidie aweze kuliona kusudi la kikundi.

(19) Kiongozi siyo lazima awe na jibu la kila tatizo.

Dhima ya kiongozi siyo kuwa na jibu la kila tatizo bali ni kukiongoza kikundi kubeba mizigo yao katika maombi.

(20) Kuwa mtu mwenye uwezo wa kubadilisha mipango na mvumilivu wakati ratiba inapovurugika.

Kumbuka kwamba matukio mengi katika maisha yetu ni sehemu ya mpango wa Mungu wa maendeleo kwa ajili yetu. Tatizo linaleta uwepo wa fursa nyingine.

(21) Kama mshirika wa kikao mara kwa mara atakuwa anataka akifanye kikao chote ni cha kushirikisha mahitaji yake, mpatie siku nyingine ya kumpa ushauri.

Vinginevyo, washirika wengine katika kikundi watajihisi kwamba wanapokonywa kikao chao. Usitoe fursa kwa kikundi kupoteza kusudi lake, labda iwe washirika wote wa kikundi wamekubaliana kwa pamoja kwamba kusudi hilo linapaswa libadilishwe.

(22) Usiruhusu majadiliano yawe ya kichochezi.

Usitoe fursa kwa kikundi kuwa ni jukwaa la kutolea lawama dhidi ya kanisa la mahali pamoja na viongozi wa aina zote.

(23) Kumbuka kwamba ufanisi wa kikundi unategemea sana nguvu za Mungu zinazofanya kazi kupitia katika kikundi hicho.

Kikundi ni muundo tu wa kimaandiko ambao Mungu anautumia.