کچھ لوگ یہ سمجھتے ہیں کہ چونکہ ہم سب خدا کے نزدیک یکساں اہمیت رکھتے ہیں، اس لیے کلیسیا میں کسی کو دوسرے پر اختیار نہیں ہونا چاہیے۔ دوسری طرف، کچھ لوگ زبان سے تو رہنمائی پر ایمان رکھتے ہیں، لیکن عملی طور پر کسی روحانی اختیار کے تابع نہیں ہوتے، گویا وہ خودمختار ہوں۔

◄کیا بائبل یہ سکھاتی ہے کہ کلیسیا میں اختیار ہونا چاہیے؟ مثالیں دیں۔

بائبل مقدس میں کئی مقامات پر کلیسیائی قیادت اور اختیار کا ذکر کیا گیا ہے۔[1](چند مثالیں عبرانیوں 13: 7، 17 ، ططس 1: 5، رومیوں 12: 8 ، 1 کرنتھیوں 14: 40 اور 1 تیمتھیس 5: 17 ہیں )

جب ہم قیادت کو "اثر و رسوخ" کے طور پر سمجھتے ہیں، تو ہمیں کلیسیا میں قیادت کے کردار زیادہ واضح نظر آتے ہیں۔ خدا نے کچھ خاص کرداروں کو تشکیل دیا تاکہ رہنما کلیسیا کی مدد کریں کہ وہ اپنے مقاصد کو پورا کرے۔

◄ایک طالب علم گروپ کے لیے افسیوں 4: 11-12 پڑھے۔

[2]ہر خدمت کا کردار اس مخصوص فہرست میں شامل نہیں ہوتا۔ مثال کے طور پر، ایک موسیقار یا عبادت کا رہنما ان میں سے کوئی مخصوص بلاہٹ نہیں ہو سکتی ، لیکن ہر قیادت کا کردار کلیسیا کو اُس کے مقاصد کی تکمیل میں مدد دینے پر مرکوز ہونا چاہیے۔

قیادت کے کردار صرف منادی، تعلیم، یا بشارت تک محدود نہیں ہیں۔ کلیسیا کی ذمہ داریاں ان سے کہیں زیادہ وسیع ہیں۔ خدا کے لوگ مل کر نہ صرف روحانی بلکہ عملی ضروریات کو بھی پورا کرتے ہیں۔ مثال کے طور پر، اگر کوئی شخص لوگوں کو باغبانی کے اوزار آپس میں بانٹنے کی ترغیب دیتا ہے، تو وہ کلیسیا کے اُس مقصد کو پورا کرنے میں مدد دے رہا ہے جو اپنے ارکان کی نگہداشت سے متعلق ہے۔ کلیسیا کی ذمہ داریاں یہ تقاضا کرتی ہیں کہ قیادت کے بہت سے کردار کلیسیا کی عمارت سے باہر بھی نبھائے جائیں۔

اس سبق میں جو صحیفہ ہم مطالعہ کریں گے، وہ خاص طور پر پاسبانوں اور خدمت گزاروں کے لیے ہے۔ لیکن ان تقاضوں میں سے زیادہ تر کا تعلق قابلیت سے نہیں بلکہ کردار سے ہے۔ ایسا کردار جو یہاں بیان ہوا ہے، وہ ہر مسیحی میں ہونا چاہیے۔ رہنما اگر یہ کردار رکھتے ہوں، تو ان کی خدمت زیادہ مؤثر ہوتی ہے۔ جب آپ ہر ایک خوبی پر غور کریں، تو یہ سوچیں کہ وہ خوبی ایک شخص کے اثر و رسوخ کو کس طرح متاثر کرتی ہے۔

پولس رسول نے جہاں کہیں نئے ایمان داروں کے گروہ تھے، وہاں نئے کلیسیاؤں کے لیے رہنما مقرر کیے (اعمال 14: 23)۔ ان میں سے بہت سے پاسبان حال ہی میں ایمان لائے تھے۔ یقیناً وہ سب ان صفات پر مکمل طور پر پورے نہیں اترتے تھے، لیکن پولس نے دستیاب بہترین لوگوں کو چُنا وہ لوگ جن میں ترقی کی صلاحیت تھی۔ خدا اُس شخص کو استعمال کر سکتا ہے جو مسیح اور خدمت کے لیے مکمل طور پر وقف ہو، چاہے اُس میں تمام صفات ابھی مکمل طور پر نہ بھی پائی جائیں۔

ہمارے پاس پاسبانوں اور خدمت گزاروں کی صفات کے بارے میں دو اہم حوالہ جات ہیں۔ یہ دونوں پولس رسول نے تیمتھیس اور ططس کو لکھے۔ تیمتھیس افسس کی کلیسیاؤں کا نگران تھا، اور ططس کریتے کی کلیسیاؤں کا۔

اُن کے ذمے یہ کام تھا کہ وہ ہر مقامی کلیسیا کے لیے پاسبان مقرر کریں۔

◄ایک طالب علم گروپ کے لیے 1-تیمتھیس 3: 1-7 پڑھے۔

(1) بے عیب ہونا

پاسبان کو کسی غلطی یا بدچلنی کا مجرم نہیں ہونا چاہیے۔ اگر وہ خود درست زندگی نہیں گزار رہا، تو دوسروں کو راستبازی کی طرف کیسے رہنمائی دے سکتا ہے؟

پاسبان کو ایسا شخص ہونا چاہیے جس کی مسیحی زندگی مسلسل طور پر قابلِ اعتماد اور ثابت قدم رہی ہو، تاکہ کلیسیا اُس پر بھروسا کر سکے اور وہ معاشرے میں اچھی گواہی دے سکے۔

جہاں کلیسیا کو قائم ہوئے زیادہ عرصہ نہ گزرا ہو، وہاں ممکن ہے کہ پاسبان کو ایمان میں زیادہ وقت نہ ہوا ہو۔ شاید اُس میں ابھی مسیحی پختگی کی تمام صفات نہ ہوں،

لیکن اُس کی زندگی خدا کے لیے وقف اور فرمانبردار ہونی چاہیے۔ وہ اپنی غلطیوں کو تسلیم کرنے اور اپنے رویے کو درست کرنے کے لیے آمادہ ہو۔

ایک حقیقی واقعہ میں، ایشیا کے ایک گاؤں میں کئی سال تک ایک پاسبان کو خدا نے بڑی قدرت سے استعمال کیا۔ لیکن جب خدمت میں کامیابی ملی، تو وہ غرور اور روحانی لاپرواہی کا شکار ہو گیا۔ ایک رات دیر سے، ایک نوجوان لڑکی نے اُس سے موٹر سائیکل پر لفٹ مانگی۔ حالانکہ اُسے معلوم تھا کہ یہ ایک خطرناک آزمائش ہو سکتی ہے اور اس سے اُس کی ساکھ کو نقصان پہنچے گا، پھر بھی اُس نے نادانی سے ہاں کر دی۔ جب کلیسیا کے ارکان کو یہ بات معلوم ہوئی، تو انہوں نے اُس کی دیانت پر اعتماد کھو دیا۔

نتیجتاً اُسے اپنی خدمت سے استعفیٰ دینا پڑا۔ لیکن خدا کے فضل سے اُس پاسبان نے خدا اور اُن لوگوں کے سامنے توبہ کی جن کو اُس نے مایوس کیا تھا۔ اُس نے اپنے روحانی نگران کی تربیت اور تادیب کو قبول کیا۔ وقت کے ساتھ ساتھ اعتماد بحال ہوا اور اُس کی خدمت میں پھر سے برکت آنے لگی۔

◄اگر ایک رہنما پر اعتماد نہ کیا جائے تو کیا نتائج سامنے آتے ہیں؟

(2) ایک بیوی کا شوہر ہونا:

دنیا کے بہت سے حصوں میں کثرتِ ازدواج ایک عام رسم رہی ہے، لیکن خدا کی ترتیب یہ ہے کہ ایک مرد کی ایک بیوی ہو۔ پاسبان کو اس پاک نمونہ کا مظاہرہ کرنا چاہیے۔ یہ شرط یہ ظاہر کرتی ہے کہ پاسبان کو ایک اچھا شوہر بننے کی پوری کوشش کرنی چاہیے۔ وہ اپنی بیوی کے ساتھ وفادار اور محبت کرنے والا ہو۔

[1] (3) سنجیدہ ہونا :

پاسبان کو اپنی خدمت کے بارے میں سنجیدہ ہونا چاہیے۔ وہ ایسا شخص نہ ہو جو جلدبازی سے یا صرف جذبات کی بنیاد پر فیصلے کرے۔ اُسے اہم معاملات پر ٹھنڈے دل و دماغ سے سوچنے کی صلاحیت ہونی چاہیے۔ اُس کا ذہن ذاتی معاملات، تفریح، یا آزمائشوں سے اپنی خدمت سے ہٹنا نہیں چاہیے۔

(4) خوش اطوار اور باادب ہونا:

پاسبان کا رویہ مرتب اور مناسب ہونا چاہیے۔ اُسے ایسے طریقے سے برتاؤ نہیں کرنا چاہیے جو نامناسب ہو یا اُس کی تعلیمات کے خلاف ہو۔ اُس کا طرزِ عمل اُس پرہیزگاری کے اصولوں کے مطابق ہو جو وہ سکھاتا ہے۔ ایک پاسبان کو چاہیے کہ جہاں وہ خدمت کر رہا ہو، وہاں کے رسم و رواج کی عزت کرے۔ اگر وہ محسوس کرے کہ اُس سے کوئی ایسی غلطی ہو گئی ہے جس سے کسی کو دکھ پہنچا ہے، تو اُسے انکساری سے معافی مانگنی چاہیے۔

(5) مہمان نواز ہونا :

مہمان نوازی کا مطلب ہے کہ جو شخص سفر میں ہے اور اُسے خوراک یا قیام کی ضرورت ہے، اُس کی مدد کی جائے۔ پاسبان کو ایسا شخص ہونا چاہیے جو دوسروں کی ضرورتوں پر دھیان دے۔ اُسے دل کھول کر بانٹنے والا ہونا چاہیے۔ وہ اجنبی لوگوں کے ساتھ بھی خندہ پیشانی اور مددگار رویہ اختیار کرے۔

◄ایک رہنما کے لیے یہ صفت کیوں ضروری ہے؟

(6) تعلیم دینے کے قابل ہونا :

پاسبان کو سچائی کو اس طرح سمجھانے کے قابل ہونا چاہیے کہ لوگ اُس کو آسانی سے سمجھ سکیں۔ اُسے خود بھی کلام کو پڑھنا اور علم حاصل کرنا اپنی ذمہ داری سمجھنی چاہیے۔

(7) شرابی نہ ہو :

پاسبان کو شراب کے اثر میں آکر اپنے رویے یا فیصلے کو بگاڑنے کی اجازت نہیں دینی چاہیے۔ اُس کا طرزِ عمل ہمیشہ با ہوش میں اور سنجیدہ ہونا چاہیے۔ یہ اصول اُن تمام چیزوں پر لاگو ہوتا ہے جو شراب کی طرح ذہن کو متاثر کرتی ہیں۔

(8) جھگڑالو یا مارنے والا نہ ہو :

پاسبان کو زبردستی یا دھمکی دے کر اپنا مقصد حاصل کرنے کی کوشش نہیں کرنی چاہیے۔ وہ ایسا شخص نہ ہو جو انتقام لینے یا مارنے پر تُلا ہو اگر کوئی اُس کو ناراض کر دے۔

(مزید دیکھیں: 2 تیمتھیس 2: 24-25)

◄ایک پاسبان کو کب اور کیسے درست غصہ ظاہر کرنا چاہیے؟

(9) لالچی نہ ہو

وکلا، سیلز مین، سیاست دان اور اسی طرح کے لوگ اکثر سچ کو چھوڑ کر لوگوں کو خوش کرنے کی کوشش کرتے ہیں تاکہ اپنا فائدہ حاصل کریں۔ پاسبان پر بھی یہی آزمائش آتی ہے، کیونکہ خدا کے کلام کی سچائی سب کو پسند نہیں آتی۔ پاسبان کو سچائی کے ساتھ وفادار رہنا چاہیے، چاہے اُس سے مالی فائدہ ہو یا نہ ہو۔

پاسبان کو یہ خواہش ضرور ہونی چاہیے کہ کلیسیا کی خدمت مالی طور پر مضبوط ہو۔ لیکن اُسے کلیسیا کو ایسا خاندان سمجھنا چاہیے جو ایک دوسرے کی فکر کرتا ہے، نہ کہ ایسا گروہ جو صرف اُسے کچھ دینے کے لیے موجود ہو۔

(10) اپنے گھرانے کو اچھی طرح سنبھالنا :

پاسبان کی قیادت کی قابلیت سب سے پہلے اُس کے اپنے گھر میں ظاہر ہونی چاہیے۔اُس کے بچے اُس کی فرمانبرداری میں ہوں۔ اگر کوئی شخص اپنے ہی گھر کو درست طور پر راہ پر نہیں رکھ سکتا، تو وہ کلیسیا کو بھی راہنمائی فراہم نہیں کر سکے گا۔اس کا مطلب یہ نہیں کہ بچے مکمل طور پر بےعیب ہوں، بلکہ یہ کہ پاسبان اپنے بچوں کو وفاداری سے سنبھالتا اور درست کرتا ہے۔یہ اصول اُن بالغ بچوں پر لاگو نہیں ہوتا جو گھر سے جا چکے ہیں اور اُس کی اختیار میں نہیں ہیں۔

(11) نیا ایمان والا نہ ہو :

اگر کسی شخص کو بہت جلد قیادت کی ذمہ داری دے دی جائے، تو غرور اُس پر حملہ آور ہو سکتا ہے۔ یہ وہی گناہ ہے جس کے باعث شیطان گرا تھا۔ ترقی اور قیادت تجربے اور وقت کے ساتھ آنی چاہیے۔

◄اگر کسی شخص کو بہت جلد منصب دے دیا جائے تو کیا نقصان ہو سکتا ہے؟

(12) اچھی شہرت رکھتا ہو :

پاسبان بننے سے پہلے ایک شخص کو غیر مسیحیوں کے درمیان بھی اچھی شہرت حاصل ہونی چاہیے۔ لوگوں کو معلوم ہونا چاہیے کہ وہ شخص ایماندار اور وفادار ہے۔

اگر وہ مسیح میں آنے سے پہلے بدنام رہا ہو، تو اُسے وقت درکار ہوگا تاکہ ایک نئی شہرت قائم کر سکے۔

افریقہ میں ایک پاسبان نے اتوار کو ایمانداری پر واعظ دیا۔ وعظ کے بعد وہ بس میں سوار ہوا۔ کنڈکٹر نے اُسے کرایہ واپس کرتے وقت زیادہ پیسے دے دیے۔ پاسبان نے فوراً وہ رقم لوٹا دی اور کہا: "معاف کیجیے، آپ نے زیادہ پیسے دے دیے ہیں۔" کنڈکٹر نے جواب دیا: "میں نے جان بوجھ کر دیا، میں باہر آپ کا واعظ سن رہا تھا،

میں دیکھنا چاہتا تھا کہ آپ واقعی اُس پر عمل بھی کرتے ہیں یا نہیں!" کتابِ مقدس فرماتی ہے: "نیک نام بے قیاس خزانہ سے اور اِحسان سونے چاندی سے بِہتر ہے۔"(امثال 22: 1) جب آپ کا نام لیا جائے تو لوگوں کے ذہن میں کیا خیال آتا ہے؟

◄ایک طالب علم گروپ کے لیے ططس 1: 5-11 پڑھے۔

ططس اور1- تیمتھیس کی فہرست میں کئی صفات مشترک ہیں۔

◄ططس کی فہرست میں اور کون سی اضافی صفات ہیں؟

(13) چوکس اور ہوشیار :

ططس کے متن میں خاص زور اُس پاسبان پر ہے جو جھوٹی تعلیمات کے خلاف کھڑا ہو۔ پاسبان ایک چرواہے کی مانند ہے جو اپنے ریوڑ کی حفاظت کرتا ہے۔ اُسے چاہیے کہ وہ غلط تعلیمات اور غلط اثرات کے خلاف چوکنا رہے۔ اُسے اپنی جماعت کو ایسا سکھانا چاہیے کہ وہ ایمان میں مضبوط ہوں۔ وہ افراد کو روحانی خطرات سے آگاہ کرنے کے لیے تیار ہو۔ اسے کلیسیا میں نقصان دہ تعلیمات کو سکھانے کی اجازت نہیں دینی چاہیے۔

پاسبان کو سچے عقائد میں مضبوط تربیت یافتہ ہونا چاہیے، اور اسے سچائی کو مؤثر انداز میں بیان کرنے کی قابلیت ہونی چاہیے۔ اس کا مقصد نہ صرف گمراہ لوگوں کی اصلاح کرنا ہے، بلکہ اپنی جماعت کو بھی بچانا ہے کہ وہ غلط تعلیم میں نہ چلے جائیں۔ اُسے مسلسل مطالعہ اور سیکھنے کے عمل میں رہنا چاہیے۔

◄ایک طالب علم گروپ کے لیے اعمال 6: 1-6 پڑھے۔ اس حصے میں کون سا مسئلہ بیان کیا گیا ہے؟

پہلے خادم پنتی کوست کے فوراً بعد مقرر کیے گئے رسولوں کو دعا اور کلام کی خدمت پر توجہ دینی تھی، اس لیے سات آدمیوں کو کلیسیا کے انتظامی معاملات میں مدد

دینے کے لیے مقرر کیا گیا۔

خادم پاسبان کی مدد کرتا ہے تاکہ وہ خدمت کی تفصیلات کو سنبھالے۔خادم واعظ بھی ہو سکتا ہے، لیکن وعظ کرنا اُس کی بنیادی خدمت کا حصہ نہیں۔

◄پہلے خدّام کی کیا اہلیت تھی؟

اِن آدمیوں کا اچھی شہرت ہونی چاہیے تھی، وہ رُوح‌القدس سے بھرے ہوئے اور حکمت والے ہوں۔ چونکہ وہ کلیسیا کے پیسے کو سنبھالتے تھے، اس لیے دیانت داری ضروری تھی۔ چونکہ اُن کی خدمت کا کلیسیا پر روحانی اثر ہونا تھا، اُن کا روح‌القدس سے بھرنا، اُس کی رہنمائی، مسح اور پاکیزگی ضروری تھی۔ چونکہ اُنہیں

کئی مشکل حالات کا سامنا کرنا تھا، اس لیے حکمت بھی ضروری تھی۔ رسول پولُس نے خُدّام کے لیے مزید مفصل اہلیتیں لکھی ہیں۔

◄ایک طالب علم گروپ کے لیے 1-تیمتھیس 3: 8-13 پڑھے۔

(1) باعزت

خادم کو اپنی فیملی، دوستوں اور برادری میں عزت دار ہونا چاہیے۔

(2) مخلص

خادم جو کہتا ہے، اُسے اُسی کے مطابق ایمان رکھنا اور عمل بھی کرنا چاہیے۔ اُسے ہر بات میں سچا اور قابلِ اعتبار ہونا چاہیے۔

(3) شرابی نہ ہو

خادم ایسا شخص نہ ہو جو شراب سے متاثر ہو۔ اُس کا رویہ ہروقت شائستہ اور قابو میں ہو۔

(4) لالچی نہ ہو

خادم کلیسیا کے مالی معاملات سنبھالنے کا ذمہ دار ہوگا، اور کلیسیا کے لوگوں کی ضروریات کا خیال رکھنا بھی اُس کی ذمہ داری ہوگی۔ اسے اپنی خدمت کو ذاتی فائدے کے لیے استعمال نہیں کرنا چاہیے۔

(5) ایمان کو پاک دل سے تھامے ہوئے

جب کوئی شخص گناہ میں گِرتا ہے تو وہ غلط تعلیمات ماننے لگتا ہے۔لیکن جب کوئی روحانی فتح میں جیتا ہے، وہ سچی تعلیم پر قائم رہتا ہے۔

(6) پرکھا ہوا ہو

خدمت کی ذمہ داری دینے سے پہلے اُسے موقع دیا جائے کہ وہ اپنی دانائی اور وفاداری ظاہر کرے۔ سمجھدار راہنما پہلے خدمت کے چھوٹے مواقع دیتے ہیں تاکہ قابلیت ظاہر ہو سکے۔

◄وہ کون سے طریقے ہیں جن سے کوئی شخص کلیسیا میں کسی عہدے کے بغیر بھی خدمت کر سکتا ہے؟

(7) وفادار بیوی ہو

اگر خادم کی بیوی اپنی گفتگو، رویہ اور چال چلن میں اچھی مسیحی نہ ہو تو خادم کی خدمت متاثر ہو گی۔

(8) اپنے گھرانے کو اچھی طرح سنبھالتا ہو

جس طرح پاسبان کے لیے ضروری ہے، خادم کو بھی اپنے خاندان کی قیادت کرنی آنی چاہیے۔

◄ ہر نکتہ پر گفتگو کی جائے اور سوال کیا جائے: "یہ صفت کیوں ضروری ہے؟"

1. اُس کی وفاداری کسی اور ادارے کے ساتھ منقسم نہ ہو۔

2. وہ ایک خدمت کی ٹیم بنانے اور دوسروں کی قابلیتوں کو استعمال کرنے کے لیے تیار ہو۔

3. وہ اپنی جماعت کو روحانی خاندان کی طرح زندگی گزارنے کی ترغیب دے، جو ایک دوسرے کی ہر ضرورت کا خیال رکھے۔

4. وہ خدا اور لوگوں کی محبت کی خاطر خدمت کرے، نہ کہ ذاتی فائدے کے لیے۔

5. اُس کی خدمت کی ترجیحات میں عبادت، خوشخبری اور روحانی ترقی شامل ہو۔

6. وہ اپنی جماعت کا اعتماد اور بھروسا حاصل کرے۔

7. وہ کلیسیا کو ایک ایسا ادارہ بنانا چاہے جو کسی ایک فرد کی ملکیت نہ ہو بلکہ ایک پائیدار کلیسیا ہو۔

8. وہ جماعت کو بلوغت کی طرف لے جائے، جیسے کہ دہ یکی دینا اور ایک ایسی شراکت داری سکھانا جو ضرورتیں پوری کرے۔

9. وہ ہر معاملے میں دیانت داری دکھائے، خاص طور پر مالی معاملات میں۔

10. وہ پیسے اور کارکنان کو اچھی طرح سنبھالنے کی صلاحیت رکھتا ہو۔

کلیسیا کے کسی منصوبے یا خدمت کے لیے جس شخص کو راہنما مقرر کیا جائے، اُس میں یہ خوبیاں ہونی چاہئیں۔ کلیسیا کے راہنماؤں کو چاہیے کہ وہ ایسے افراد میں یہ خوبیاں پیدا کرنے میں مدد دیں تاکہ وہ کلیسیا کی ذمہ داریوں میں حصہ لے سکیں اور راہنماؤں کی ٹیم میں شامل کیے جا سکیں۔

◄ہر نکتہ پر گفتگو کیجیے اور سوال کیجیے: "یہ خوبی کیوں ضروری ہے؟"

1. وہ اپنی مقامی کلیسیا کے ساتھ وفادار ہو—حاضری، دہ یکی ، اور شمولیت میں—اور اُس کی مسیحی گواہی قابلِ عزت ہو۔

2. وہ پہلے ہی مقامی کلیسیا میں اپنی محنت اور جوش و جذبہ سے شامل ہو۔

3. وہ بالکل دیانتدار ہو اور اعلیٰ اخلاقی معیار رکھتا ہو۔

4. وہ پہلے ہی پہل کرنے والا، پُرجوش، اور بہترین کارکردگی دکھانے کے لیے تیار ہو۔

5. وہ ذاتی طور پر نظم و ضبط والا، خود سے متحرک ہونے والا، اور مسلسل بہتری کی کوشش کرنے والا ہو۔

6. وہ دوسروں کو منظم کرنے اور اُن کی قیادت کرنے کی صلاحیت رکھتا ہو، نہ کہ صرف کسی اور کے کہنے پر کام کرنے والا۔

7. وہ منصوبے میں اپنی مخصوص ذمہ داری کو سنبھالنے کے لیے ضروری مہارت اور قابلیت رکھتا ہو۔

◄آپ اس سبق کے نتیجے میں اپنے مقاصد یا اعمال میں کس طرح تبدیلی کی توقع رکھتے ہیں؟

1. خُدا نے کلیسیا کو روحانی قیادت کے تحت کام کرنے کے لیے مقرر کیا ہے۔

2. کلیسیا کی ذمہ داریوں کو نبھانے کے لیے کئی قیادتی کرداروں کی ضرورت ہوتی ہے۔

3. زیادہ تر قیادت کی اہلیتیں اچھے کردار سے متعلق ہوتی ہیں۔

4. ایک پادری یا خدمت کا راہنما مسلسل اچھی صفات کو ترقی دیتا رہے۔

5. ایک خدمت گزار راہنما کو قابلِ بھروسا، پُرعزم، اور قابلِ اعتماد ہونا چاہیے۔

1. اس سبق سے کوئی ایک زندگی بدل دینے والا نکتہ چنیں اور ایک پیراگراف میں اُس کا خلاصہ لکھیں۔ وضاحت کریں کہ یہ کیوں اہم ہے۔ اس سے کیا بھلائی حاصل ہو سکتی ہے؟ اور اگر اسے نہ جانا جائے تو کیا نقصان ہو سکتا ہے؟

2. اس سبق میں دیے گئے اصولوں کو آپ اپنی ذاتی زندگی میں کس طرح لاگو کریں گے؟ یہ سبق آپ کے اہداف کو کس طرح بدلتا ہے؟ آپ اپنے طرزِ عمل میں کیا تبدیلی لانے کا ارادہ رکھتے ہیں؟

3. سبق نمبر 2 کے پانچ خلاصہ بیانات زبانی یاد کریں۔ اگلی کلاس کے آغاز پر انہیں زبانی یا تحریری طور پر پیش کرنے کے لیے تیار رہیں۔

4. اگلی کلاس سے پہلے 1 سموئیل 2: 12-36 کا مطالعہ کریں۔ ایلی کی قیادت کے لیے کے بارے میں چند مشاہدات لکھیں۔