Lesson 3: సువార్త యొక్క అత్యవసరత

► సువార్త వినకుండా ఒక వ్యక్తి రక్షించబడగలడా? సువార్త ప్రకటన అవసరమా?

ఇశ్రాయేలు ప్రజలతో లేదా మరియు సంఘముతో సంబంధం లేకుండా దేవుని కృప ద్వారా రక్షణ పొందినవారి ఉదాహరణలను లేఖనంలో మనం చూడగలము. మోషే జీవించడానికి ముందు మరియు బైబిల్ గ్రంథం యొక్క ఒక పేజీ కూడా రాయడానికి ముందే యోబు యధార్థవర్తనుడుగా ఉన్నాడు మరియు చెడుతనమును విసర్జించాడు. బిలాము దేవునితో సంబంధములో ఉన్నాడు మరియు కలల ద్వారా కాకుండా నేరుగా దేవుని నుండి సందేశాలను అందుకున్న దీర్గదర్శిగా పిలువబడ్డాడు. "ఖచ్చితంగా దేవుని భయం ఈ ప్రదేశంలో లేదు" అని అబ్రాహాము అనుకున్న తరువాత, అబీమెలెకు అబ్రాహాము కంటే నీతిమంతుడు అని చెప్పబడినది. రోమీయులకు 1:21-32లో అన్యజనులు దేవుని గురించి నేర్చుకోగలిగినప్పటికీ, వారు దేవుని గురించి నేర్చుకున్న వాటిని తిరస్కరిస్తారు, ఇది వారిని దుర్స్థితిలో ఉన్నారని వివరిస్తుంది; (కీర్తన 19 మరియు రోమా 10:18 చూడండి).

"యెహోవా మర్మము ఆయన యందు భయభక్తులుగల వారికి తెలిసియున్నది ఆయన తన నిబంధనను వారికి తెలియజేయును” (కీర్తన 25:14). నిబంధన అనేది మానవునితో దేవునికి సంబంధించిన నిబంధనలు. అందరూ పాపం చేసినందున, దీనికి కృప అవసరం. ఒక వ్యక్తి పూర్తిగా దేవుని పూజిస్తూ ఉంటే, దేవుడు అతనితో సంబంధం కలిగి ఉండి, అతడు తన యొద్దకు వచ్చు మార్గమును చూపును.

యేసు తప్ప వేరే నామము ద్వారా రక్షణ లేదని బైబిలు చెబుతోంది (అపొస్తలుల కార్యములు 4:12). అయితే, పాత నిబంధనలో రక్షింపబడిన ప్రజలకు యేసు పేరు తెలియదు. వారు దేవుడు వాగ్దానము చేసిన విమోచన మరియు క్షమాపణను నమ్మినవారు, అది యేసు ద్వారా అనుగ్రహించబడెను. అదేవిధంగా, ఇంకా యేసు యొక్క నామము విని ఉండకపోయిన వ్యక్తులు, రక్షణ కొరకు దేవుని యందు నమ్మిక ఉంచి అది యేసు ద్వారా అనుగ్రహించబడును అని ముందుగానే నమ్మిరి.

అందుచేత, రక్షణ వేరే నామము ద్వారా కలుగదు అంటే అర్థం ఏమిటి? రక్షణకు ప్రత్యామ్నాయ మార్గాలు ఏవి లేవని అర్థం. విమోచన యొక్క ఇతర ప్రణాళిక ద్వారా ఒక వ్యక్తి రక్షించబడలేడు. యేసు గురించి తెలిసిన వ్యక్తి యేసును తిరస్కరించకూడదు అని కూడా దీని అర్థం, ఎందుకంటే యేసును తిరస్కరించడం అంటే రక్షణను తిరస్కరించడం లేదా రక్షణకు ఇతర మార్గాల కొరకు ఎదురు చూడటం లాంటిదే.

యేసు ఇలా చెప్పాడు, “ఎవరైనా తన చిత్తాన్ని చేస్తారో, ఆయన బోధను తెలుసుకుంటారు.” ఇది ఒక వ్యక్తి నిజాయితీగా దేవుణ్ణి వేడుకొనుచున్న వ్యక్తికి ఇవ్వబడిన వాగ్దానము, అతడు ఏమి తెలుసుకోనవలేనో అతనికి దేవుడు చెబుతాడు. "నిజమైన వెలుగు ఉండెను; అది లోకములోనికి వచ్చుచు ప్రతి మనుష్యుని వెలిగించుచున్నది." (యోహాను 1:9). ఒక వ్యక్తి యేసును గురించి వినకపోయినా పరిశుద్దాత్మ వారికి యేసు యొక్క వెలుగును బయలుపరచును.

మానవ సువార్తికుల నుండి సువార్త వినడానికి ముందే చాలా మందికి దర్శనాలు లేదా ఇతర ప్రత్యేక ప్రత్యక్షతల ద్వారా వారు దేవుని యొద్దకు వచ్చిరి. ఉదాహరణకు, ఆధునిక కాలంలో చాలా మంది ముస్లింలు దేవుని నుండి సందేశం అందుకున్న తరువాత మారుమనస్సు పొందిరి.

► సువార్తను నిజముగా అర్థం చేసుకోవడానికి ముందు దేవుని నుండి ప్రత్యేక సంభాషణను పొందిన ఒకరి గురించి మీరు విన్నారా?

[1]కాబట్టి, మానవ సువార్తికుల ద్వారా సువార్త వినకుండా ఒక వ్యక్తి దేవుణ్ణి కనుగొని, రక్షింపబడటం సాధ్యమని మనం చూస్తాము. అయినప్పటికీ, ప్రతి ఒక్కరూ అత్యవసరంగా వినవలసిన సందేశం సువార్త అని బైబిల్ వివరిస్తుంది.

రోమా పత్రిక సువార్త యొక్క అత్యవసరతను వివరిస్తుంది. అపోస్తులుడైన పౌలు రోమీయులకు వ్రాసిన పత్రికలో “రక్షణ కలుగజేయుటకు అది దేవుని శక్తియై యున్నది అని చెప్పాడు (రోమా 1:16). సువార్తను వారి వద్దకు తీసుకెళ్లడానికి ప్రతి ఒక్కరికీ తాను రుణస్థుడనని చెప్పాడు (రోమా 1:14). అతడు మనము కేవలం దేవుని క్షమాపణ వాగ్దానమును నమ్మి నీతిమంతులమైతిమి అనే సత్యమును స్థాపించాడు (రోమా 3:26; రోమా 5:1).

అప్పుడు, సువార్త యొక్క అత్యవసర భావన వస్తుంది. అతడు వారు ఎలా నమ్మారు అని చెప్పాడు, "వారు విశ్వసింపనివానికి ఎట్లు ప్రార్థన చేయుదురు? విననివానిని ఎట్లు విశ్వసించుదురు? ప్రకటించువాడు లేకుండ వారెట్లు విందురు?” (రోమా 10:14). “కాగా వినుట వలన విశ్వాసము కలుగును; వినుట క్రీస్తును గూర్చిన మాటవలన కలుగును” (రోమా 10:17). వినేవారిలో విశ్వాసాన్ని కలిగించడానికి దేవుడు సువార్తను ఉపయోగిస్తాడు. సువార్త ప్రకటించడం పాపులను రక్షించే దేవుని సాధారణ పద్ధతి.

వర్తమానికుడు లేకుండా వారు రక్షణ పొందగలిగితే, ఒకవర్తమానికుడు ఎందుకు అంత ముఖ్యమైనవాడు?

మిషనరీ స్టీవ్ హైట్ ఈ ప్రశ్నకు మిషనరీలు ఎందుకు అవసరం? ఇలా సమాధానం ఇచ్చారు:

సాధారణ సమాధానం ఏమిటంటే, మనుష్యులు, వారు వెలుగును చూసినప్పుడు, దానిని తిరస్కరించారు. యేసు “నిజమైన వెలుగు ఉండెను; అది లోకములోనికి వచ్చుచు ప్రతి మనుష్యుని వెలిగించుచున్నది” అని యోహాను 1:9 మనకు తెలియజేస్తుంది. సృష్టి దేవుణ్ణి తెలియజేయుచున్నదని పౌలు ప్రకటించాడు (రోమా 1:19-20) మరియు మనుష్యులు “వారు దేవుని నెరిగియు ఆయనను దేవునిగా మహిమపరచలేదు ” (రోమా 1:21). యోహాను ఈ విధమైన పరిస్థితిని అంచనా వేసాడు: “ఆ తీర్పు ఇదే; వెలుగు లోకములోనికి వచ్చెను గాని తమ క్రియలు చెడ్డవైనందున మనుష్యులు వెలుగును ప్రేమింపక చీకటినే ప్రేమించిరి” (3:19). మానవుని నశించిన హృదయం చీకటిని ఇష్టపడుతుంది. హృదయము యొక్క మోసం మరియు తీరని దుష్టత్వం కారణంగా (యిర్మీయా 17:9), మానవుని పాపపు హృదయం దేవుని నుండి దూరమైనది.

అందుచేత, మిషనరీలు మళ్ళీ సువార్త వెలుగును తప్పక తీసుకోన వెళ్ళాలి! రెండవ సారి అవకాశాలు సువార్త వెలుగుతున్న మంటతో రాయబారులను దేవుడు పంపుచున్నాడు "వారు చీకటిలో నుండి వెలుగులోకి తిరిగిరి" అని ఉంటుంది (అపొస్తలుల కార్యములు 26:18).

యేసు శిష్యులను సువార్త ప్రకటించుటకు పంపినప్పుడు, ఒక పట్టణము వారి సందేశాన్ని ఒప్పుకోవడం లేదు అంటే, వారు పట్టణన్ని విడిచి వారి పాద ధూళిని అక్కడ దులపాలి అన్నారు. తీర్పు రోజు ధూళి వారికి వ్యతిరేకంగా సాక్ష్యంగా ఉంటుందని ఆయన అన్నారు. వారి పాదాల నుండి వచ్చిన దుమ్ము సువార్త ప్రకటించే దూత వారి పట్టణనికి వచ్చాడని రుజువు చేస్తుంది. సువార్తను తిరస్కరించేవారికి ఎప్పుడూ సువార్త వినని వారికంటే దారుణమైన తీర్పు ఉంటుంది. సొదొమ నుండి వచ్చిన ప్రజలకన్నా వారు తీవ్రంగా తీర్పు తీర్చబడతారని యేసు చెప్పాడు. సువార్త విన్నవారికి గొప్ప ప్రయోజనాన్ని ఇస్తుందని ఈ సంగతి మనకు చెబుతుంది (మార్కూ 6:11).

కాపరి ఈరిక్ హిమెలిక్ ఈ వివరణతో (మిషనరీలు ఎందుకు అవసరం?) ప్రశ్నకు సమాధానమిచ్చారు:

మనము మిషనరీలను పంపుతాము, ఎందుకంటే మిషనరీలను పంపుట ద్వారా సువార్త సందేశం వ్యక్తిగతంగా ఉత్తమంగా తెలియజేయబడుతుంది. సువార్త సత్యం దేవుని గురించి లేదా పరిశీలన చేయవలసిన మత విశ్వాసాలను గురించి వ్యక్తిత్వం లేని వాస్తవాల సమీక్ష కాదు; ఇది యేసుక్రీస్తు వ్యక్తిత్వము మూర్తీభవించింది. మిషనరీలు క్రీస్తుకు రాయబారులు, ఆయన సందేశం, మరియు ఆయనతో సమాధానపరచు పరిచర్యకు రాయబారులు (2 కొరింథీయులకు 5:20).

మిషనరీలు అవసరం ఎందుకంటే సువార్త సందేశం యొక్క ప్రత్యక్ష, సంబంధ సంభాషణ లేకుండా, సువార్త ప్రభావితముగా ఉండదు. చాలా మంది కోల్పోతారు. మన నిష్క్రియాత్మకత కారణంగా ప్రజలు కోల్పోతున్నారని మనము నమ్మాలనుకోవడం లేదు, కానీ రోమా 10:13-15 స్పష్టంగా ఉంటుంది: “విననివానిని ఎట్లు విశ్వసించుదురు?” విచారకరమైన సత్యం, వారు వినలేరు. మిషనరీలను పంపడం మరియు వారికి మద్దతు ఇవ్వడం అత్యవసరం. దేవుడు మనలను పిలిచిన పనిని పూర్తి చేస్తాడని అనుకోవడం పరిష్కారం కాదు. దేవుడు మనకు గొప్ప ఆజ్ఞ ఇచ్చాడు; మరియు ఎవరికి ఎక్కువగా ఇవ్వబడుతుందో, వారి దగ్గర నుండి ఎక్కువ ఆశిస్తాడు. మనము దేవుని కృపకు ప్రతిస్పందనగా మనము మిషనరీలను పంపుతాము. మరియు దేవుడు తన గొప్ప హృదయము ద్వారా మన విశ్వాసమును బట్టి ప్రజలను తనవైపునకు ఆకర్షించుకోనును.

[1]సువార్త అనేది నశించిపోయిన వారిని రక్షించడానికి దేవుడు రూపొందించిన ప్రభావవంతమైన సాధనం. ఇది “రక్షించుటకు దేవుని శక్తియై ఉన్నది” (రోమా 1:16). ఈ ప్రశ్నను మళ్ళీ పరిశీలిద్దాం: సువార్త వినకుండా ఒక వ్యక్తి రక్షించబడగలిగితే, మనం మిషనరీలను ఎందుకు పంపాలి? ఇలాంటి కొన్ని ప్రశ్నలను పరిశీలిద్దాం. నా ప్రార్థనలు లేకుండా ఒక వ్యక్తి రక్షించబడగలిగితే, నేను అతని కొరకు ఎందుకు ప్రార్థించాలి? ఒక వ్యక్తి ఒకటి కంటే ఎక్కువసార్లు సువార్త వినకుండా రక్షించబడగలిగితే, మనం మరలా అతనికి ఎందుకు సువార్త చెప్పాలి? సంఘము లేకుండా ఒక వ్యక్తి రక్షించబడగలిగితే, మనకు సంఘములు ఎందుకు ఉండాలి? స్పష్టమైన సమాధానం, "అవును, అతన్ని రక్షించవచ్చు, కానీ దానికి చాలా తక్కువ అవకాశం ఉంటుంది." ప్రజలను రక్షించడానికి దేవుడు రూపొందించిన మార్గాలు ఇవి.

పాపులను దేవుని వద్దకు తీసుకురావడానికి పరిశుద్ధాత్మ ఉపయోగించే సాధనం దేవుని వాక్యం. దేవుని వాక్యము ద్వారా ప్రజలు తిరిగి జన్మించారని బైబిల్ కూడా చెబుతుంది (1 పేతురు 1:23, 25).

సువార్త వినడానికి ముందు రక్షింపబడిన వారు మిషనరీలకు దాదాపు ఎవరూ దొరకరు. సువార్త లేకుండా దేవుడు నిజాయితీగల వ్యక్తిని రక్షిస్తాడనే వాస్తవం ఆయన న్యాయాన్ని చూపిస్తుంది, కానీ ఆయన రూపొందించిన సాధారణ మార్గాలను మనం నిర్లక్ష్యం చేయడాన్ని ఇది సమర్థించదు. సాధారణంగా, సువార్త వినని వారు నశించిపోతారు. “నేను సువార్త ప్రకటించకపోతే నాకు శ్రమ” (1 కొరింథీయులకు 9:16).

► ఒక విద్యార్థి, సమూహం కొరకు మత్తయి 9:35-38 చదవాలి.

ప్రజల అవసరాల పట్ల యేసుకు బలమైన కనికరము ఉంటుంది. అతడు బోధించుటలో మరియు స్వస్థపరచుటలో రద్దీగా ఉన్నాడు.

ప్రజల అధ్యాత్మిక అవసరాల గురించి యేసు చాలా శ్రద్ధ వహించాడు. వారు రక్షింపబడి దేవుణ్ణి తెలుసుకోవాలని ఆయన కోరుకున్నారు. ఈ భాగములో, యేసు ప్రజల సమూహాలను చూశాడు మరియు వారి అధ్యాత్మిక అవసరాలకు బలమైన కనికరము కలిగి ఉన్నాడు. వారు కాపరి లేని గొర్రెలవలె ఉన్నారని ఆయన చూశాడు. ఆయన కోత విస్తారముగా ఉన్నది, కోతకు పనివారిని పంపుమని కోత యజమానుని వేడుకోనుడని చెప్పాడు.

యేసు తన శిష్యులకు ప్రార్థన చేయమని చెప్పాడు. దేవుడు పనివారిని పంటను కోయుటకు పంపమని ప్రార్థించమని చెప్పాడు.

► ప్రార్థనను ప్రార్థించమని యేసు శిష్యులకు ఎందుకు చెప్పాడు? మనం ప్రార్థించినా, ప్రార్థన చేయకపోయినా దేవుడు దీన్ని చేయాలనుకుంటున్నాడు, ఇది సరియైనదా?

దేవుడు పనివారిని పంపుతాడని మనం ప్రార్థించినప్పుడు, మనము దేవుని చిత్తానుసారముగా ప్రార్థిస్తున్నాము. ఈ కారణం చేత, దేవుడు మన ప్రార్థనకు సమాధానం ఇస్తాడని మనకు తెలుసు.

విశ్వాసులు ఈ ప్రార్థనను ప్రార్థించటానికి మరొక కారణం ఉంటుంది. యేసు తన కనికరమును, సువార్త ప్రకటించే మనస్సును శిష్యులు కలిగి ఉంటారని ఈ ప్రార్థన చేయమన్నాడు. వారు ఈ ప్రార్థనను తరచుగా ప్రార్థిస్తే, వారు పంటను గురించి గట్టిగా పట్టించుకోవడం ప్రారంభిస్తారు. వారు పనిలో పాల్గొనాలని మరియు ఇతరులను కూడా ఒప్పించాలని కోరుకుంటారు.

యేసు కోరుకోన్నవాటి విషయాల గురించి మనం పట్టించుకోవాలనుకోవాలి. శిష్యులు చేసిన ప్రార్థన మనము చేయాలి, తద్వారా మన మీద అదే ప్రభావము చూపును.

జైలులో బోధించడానికి మిషనరీల బృందం వెళ్ళింది. అక్కడ వేలాది మంది ఖైదీలు ఉన్నారు, వారిలో ఎక్కువ మంది హంతకులు మరియు ఉగ్రవాదులు ఉన్నారు. మిషనరీలు ఆరుబయట ఒక వేదికపై వారికి బోధించారు. వేదిక చుట్టూ, మిషనరీలను రక్షించడానికి తుపాకులతో కాపలాదారులను ఉంచారు. సువార్త ప్రసంగం ముగింపులో, ఖైదీలలో ఎవరైనా క్రొత్త నిబంధనను తీసుకొనుటకు ముందుకు రావాలనుకుంటున్నారా? అని బోధకుడు అడిగాడు. ముప్పై మంది ఖైదీలు ముందుకు వచ్చారు.

కొన్ని వారాల తరువాత మిషనరీలు మళ్ళీ అదే జైలును సందర్శించారు. వాక్య పరిచర్యకు ముందు, వార్డెన్ వారితో మాట్లాడుతూ, క్రొత్త నిబంధనలను తీసుకున్న ముప్పై మంది ఖైదీలను ఇతర ఖైదీలు చంపారు అని చెప్పాడు. మిషనరీలు మళ్ళీ సువార్త బోధించిన తరువాత చివరిలో వారు, మళ్ళీ, ఎవరికైన క్రొత్త నిబంధన కావాలా అని మరల పిలుపును ఇచ్చారు. ఇప్పుడు మూడువందల మంది ఖైదీలు ముందుకు వచ్చారు. సువార్తకు ప్రతిస్పందించినందుకు ముప్పై మంది చనిపోయారని వారికి తెలుసు, కాని సువార్త వారికి విలువైనది కనుక, వారు తమ ప్రాణాలను పణంగా పెట్టడానికి ఈ మూడువందల మంది సిద్ధంగా ఉన్నారు. వారు విన్న సందేశం విలువను వారు గ్రహించారు.

(1) ఈ రెండు ప్రశ్నలకు సమాధానం ఇవ్వడానికి కొన్ని వాక్యాలను వ్రాయండి. సువార్తను ఎప్పుడూ వినని వ్యక్తికి రక్షణపొందడానికి ఏదైనా అవకాశం ఉందా? మనం మిషనరీలను, సువార్తికులను ఎందుకు పంపించాలి?

(2) యోనా గ్రంథము చదవండి. సువార్త ప్రకటించువారి యొక్క అత్యవసరతను గమనించండి. ఈ చరిత్రలో దేవుని ఆందోళన ఏమిటి? యోనా యొక్క ఆందోళనలు ఏమిటి? మీ పరిశీలనలలో మీరు గ్రహించిన వాటిని 1-2 పేజీలను వ్రాయండి.