Si Dan ay isang kampeong boksingero sa kategoryang heavy-weight. Sa isang pagbisita sa Turkey narinig niya ang pagtawag sa panalangin ng Islam, at ito ay lubhang nagbigay ng malaking interes sa kanya. Nagsimula siyang mag-aral ng Islam at nadama niya na ito ang tamang relihiyon para sa kanya. Siya ay nagsabing Kristiyano noon ngunit kumbinsido siya na may mga pagkakamali sa Bibliya.

► Basahin nang malakas ang 1 Juan 1 nang sabay-sabay. Dapat magsulat ang bawat mag-aaral ng isang talata na nagbubuod sa talata ng banal na kasulatan na ito. Ano ang sinasabi ng talatang ito tungkol sa kaugnayan ng mananampalataya sa Diyos? Ang bawat mag-aaral ay dapat magsulat ng isang listahan ng mga pahayag. Bilang isang pangkat, talakayin kung ano ang iyong isinulat.

Pinagmulan ng Islam

Ang Islam ang pangalawang pinakamalaking relihiyon sa mundo, na may humigit-kumulang 1.9 bilyong tagasunod.[1] Ang buong mga bansa ay pinamumunuan ng mga prinsipyo ng Islam. Ang salitang Islam ay nangangahulugang “pagsuko,” na tumutukoy sa pagpapasakop kay Allah. Ang isang tagasunod ng Islam ay tinatawag na isang Muslim. Ang salitang Muslim ay nangangahulugang "isa na nagpapasakop." Tinatawag ng mga Muslim ang kanilang sarili na "mga mananampalataya," at ang mga taong hindi Muslim ay tinatawag nilang "mga infidel" (hindi naniniwala).

Si Muhammad ang nagtatag ng relihiyong Islam. Nabuhay siya noong A.D. 570-632.

Sinabi ni Muhammad na tumanggap siya ng mga paghahayag. Maraming tao ang sumulat tungkol sa kanyang mga paghahayag, at ang mga ito ay tinipon upang mabuo ang Qur’an pagkaraan ng kanyang kamatayan. Ang Qur’an ay nahahati sa mga seksyon na tinatawag na Sura.

► Paano naiiba ang pinagmulan ng Qur’an sa pinagmulan ng Bibliya?

Ang relihiyon ni Muhammad ay naiiba sa karamihan ng mga relihiyon sa paligid niya dahil ito ay monoteistiko at laban sa pagsamba sa diyus-diyosan. Alam niya ang tungkol sa Hudaismo at Kristiyanismo, ngunit tinanggihan niya ang mga ito.

Si Muhammad ay nagmula sa isang mahirap na pamilya, ngunit nagpakasal sa isang mayamang balo. Pagkamatay niya, nagpakasal pa siya sa 12 pang asawa. Ayon sa Qur’an, ang mga lalaki ay limitado sa apat na asawa.

Nang magkaroon ng sapat na mga tagasunod si Muhammad, kinuha niya ang kontrol sa lungsod ng Medina, na ngayon ay matatagpuan sa modernong bansa ng Saudi Arabia. Pagkatapos ng ilang labanan, kinuha niya ang kontrol sa Mecca, at lumipat doon. Sinalakay at sinakop niya at ng kanyang mga tagasunod ang mga lugar sa paligid nila. Sa kalaunan ay nasakop nila ang ilang mga bansa at pinilit ang mga tao na maging Muslim.

Karamihan sa mga Muslim ngayon ay hindi marahas. Sinisikap nilang mamuhay nang payapa kasama ng kanilang mga kapitbahay na hindi Muslim. Gayunpaman, may mga utos ng karahasan ang Qur’an. Ang Qur’an ay nag-uutos sa mga Muslim na salakayin at patayin ang mga sumasamba sa diyus-diyosan.[2] Sinasabi ng Qur’an na ang mga taong lumalaban sa Islam ay dapat patayin o putulin ang kanilang mga kamay at paa.[3] Sineseryoso ng mga radikal na Islamista ang mga utos na iyon. Sinira ni Muhammad ang mga nayon ng mga Hudyo, pinatay ang mga lalaki at ipinagbili ang kanilang mga pamilya sa pagkaalipin.

► Paano naiiba ang paglaganap ng Islam sa paglaganap ng Kristiyanismo?

Mga Paniniwala ng Islam

[4]Ang pinaka paulit-ulit na paniniwala ng Islam, na tinatawag na shahada ay: "Walang Diyos maliban sa Allah, at si Muhammad ay kanyang mensahero."

[5]Naniniwala ang mga Muslim na ang Allah ay ang tanging Diyos, ang Tagapaglikha ng mundo. Naniniwala sila na siya ang nagbigay ng paghahayag sa mga indibidwal sa Bibliya tulad nina Noe, Abraham, at Moses.

Ang mga Muslim ay hindi naniniwala sa isang Trinidad o kahit na anumang pagkakatawang-tao ng Diyos ay posible.

► Paano naiiba ang pananaw ng Muslim kay Muhammad sa pananaw ng Kristiyano kay Kristo?

Naniniwala ang mga Muslim na si Jesus ay isang propeta mula sa Diyos na gumawa ng mga himala, ang Mesiyas, at walang kasalanan. Hindi sila naniniwala na siya ay namatay sa krus, ngunit siya ay kinuha ng Allah nang siya ay tangkaing patayin ng mga Hudyo.[6] Hindi sila naniniwala na siya ang Anak ng Diyos o isang pagkakatawang-tao ng Diyos.[7] Hindi sila naniniwala na siya ang Tagapagligtas ng mundo.

Naniniwala ang mga Muslim na ang Bibliya ay mula sa Diyos, ngunit naniniwala sila na kung may mga kontradiksyon sa pagitan nito at ng kanilang banal na aklat, ang Qur’an, ang Qur’an pa rin ang huling awtoridad dahil ito ang huling kapahayagan. Naniniwala sila na ang susunod na paghahayag ay maaaring sumalungat sa nauna.[8]

Sinasabi ng Bibliya na ang Salita ng Diyos ay hindi lilipas ngunit mananatili magpakailanman, tingnan ang Isaias 40:8 at 1 Pedro 1:25.

Naniniwala ang mga Muslim na ang kaligtasan ay nakukuha sa pamamagitan ng pagtupad sa ilang mga obligasyon na tinatawag na Limang Haligi ng Islam. Ang Limang Haligi ng Islam ay:

1. Shahada: taos-pusong pagbigkas ng pananampalatayang Muslim

2. Salat: pagsasagawa ng mga ritwal na pagdarasal ng limang beses bawat araw

3. Zakat: pagbibigay ng limos sa mga mahihirap

4. Sawm: pag-aayuno sa buwan ng Ramadan

5. Hajj: paglalakbay sa Mecca isang beses habang nabubuhay

Mga Mahihirap na Doktrina ng Islam

Upang makita kung anong uri ng pamumuhay ang pinaniniwalaan ng mga Muslim, maaari nating tingnan ang mga bansang kinokontrol ng batas ng Islam. Ang batas ng Islam ay tinatawag na batas ng Sharia. Maraming mga bansang Arabe ang medyo sumusunod sa batas ng Sharia. Hindi pinahihintulutan ng batas ng Islam ang kalayaan sa pagsasalita, kalayaan sa relihiyon, kalayaan sa pagpupulong, o kalayaan sa pamamahayag habang nauunawaan at isinasagawa ng kanlurang mundo ang gayong mga kalayaan.[9]

Sa ilang mga lipunang Islam, maaaring patayin ang isang tao dahil sa pagbabalik-loob sa Kristiyanismo o sa pagtatangkang mag-ebanghelyo ng ibang tao. Gayunpaman, kadalasan [10]ang isang tao ay pinapatay dahil sa nagkakagulong mga tao, hindi dahil sa isang opisyal na aksyon ng estado.

Ayon sa batas ng Sharia, maaaring hiwalayan kaagad ng isang lalaki ang kanyang asawa sa anumang dahilan. Ang isang babae ay hindi maaaring makipaghiwalay nang walang kasunduan ng kanyang asawa. Ang mga lalaki ay pinahihintulutan na bugbugin ang kanilang mga asawa, ayon sa Qur’an.[11] Ang isang lalaki ay maaaring ikasal sa apat na asawa.[12] Ang isang babae ay maaaring patayin ng kanyang mga kamag-anak kung siya ay hindi sumunod sa mga kahilingan ng Islam. Sa ilang bansa, ang mga babae ay hindi pinapayagang magmaneho ng kotse, pumunta sa paaralan, o magpakita sa publiko nang hindi nakatakip ang kanilang mga mukha. Ang isang babae ay maaaring bugbugin sa publiko kung lalabag siya sa mga patakaran.

Ang mga Kristiyano ay sinabihan na maging magiliw sa kanilang mga asawa, tingnan ang 1 Pedro 3:7. Ang isang lalaki ay dapat na mahalin ang kanyang asawa gaya ng kanyang sarili, tingnan ang Efeso 5:28-29.

Naniniwala ang mga Muslim na ang tama at mali ay nagmumula lamang sa kalooban ng Allah. Maaaring baguhin ng Allah kung ano ang tama kung pipiliin niya, dahil ang kanyang kalooban ang mas mahalaga kaysa sa hindi nagbabagong katangian.

Sinasabi sa atin ng Bibliya na ang Diyos ay mabuti at ang pinagmulan ng lahat ng mabuti. Hindi nagbabago ang Diyos, tingnan ang Santiago 1:17.

Hindi sinasabi ng Qur’an na ang mga tao ay nilikha ayon sa larawan ni Allah. Sinasabing si Allah ay transendente at hindi nakikilala at ganap na naiiba.

Nilikha ang mga tao ayon sa larawan ng Diyos. Kaya naman, mauunawaan natin ang ilang bagay tungkol sa kalikasan ng Diyos at maaaring magkaroon ng kaugnayan sa kanya, tingnan ang Genesis 1:27 .

Hindi umaasa ang mga Muslim na magkaroon ng personal na kaugnayan kay Allah. Si Allah ay tinatawag na "mapagmahal sa lahat," ngunit sa kabilang banda, hindi kailanman sinabi sa Qur'an na mahal niya ang mga tao. Ang Qur’an ay madalas na nagsasabi na ang Allah ay mapagpatawad at mahabagin sa mga taong nagiging mananampalataya sa Islam. Ang mga tao ay dapat magsisi at humiling na maligtas sa paghuhukom na may pag-asa na si Allah ay maawain, ngunit walang karanasan sa kaligtasan o katiyakan ng kapatawaran.

Ipinapangako sa atin ng Bibliya na pinatatawad ng Diyos ang nagkumpisal at sumasampalataya, tingnan ang 1 Juan 1:9.

► Paano naiiba ang relasyon ng isang Kristiyano sa Diyos sa relasyon ng Muslim sa Allah?

Ang mga benepisyo ng Islam ay kadalasang inaalok sa mga lalaki, at ang Qur'an ay tumutugon sa bawat isyu mula sa pananaw ng mga lalaki. Ang mga babae ay pag-aari lamang ng mga lalaki. Ang paraiso ng Islam pagkatapos ng kamatayan ay para sa mga lalaki, kung saan ang mga babae ay inilaan doon para sa kanilang kasiyahan.[13]

► Ngayon bumalik at basahin ang naka-bold at naka-italic na teksto at bawat kasulatan.

Hindi sapat na patunayan lamang ang mga doktrinang Kristiyano mula sa Bibliya, dahil naniniwala ang mga Muslim na pinapalitan ng Qur’an ang Bibliya bilang pinakamataas na awtoridad.

Maaari tayong sumang-ayon sa ilang mahahalagang paniniwala ng Islam. Sumasang-ayon ang mga Kristiyano na may isang Diyos na lumikha ng mundo. Sumasang-ayon ang mga Kristiyano na mayroong huling paghatol, at ang bawat tao ay ipapadala sa langit o impiyerno.

Dapat ipakita sa Bibliya ang iba pang mahahalagang katotohanan. Naniniwala ang mga Muslim na ang Bibliya ay mula sa Diyos ngunit pinapalitan ito ng Qur’an. Gayunpaman, maaari mong bigyan ng diin na ang ilang mga katotohanan ay napaka simple na hindi nila mababago. Gayundin, hindi maaaring magbago ang mga makasaysayang katotohanan.

Ginawa ng Diyos ang mga tao ayon sa kanyang larawan (Genesis 1:27). Mahal niya ang mga ito at nais niyang magkaroon ng ugnayan sa kanila.

Sumasang-ayon ang mga Kristiyano sa Islam na si Jesus ang Mesiyas at walang kasalanan. Ipakita na nangako siyang magbibigay ng buhay na walang hanggan sa mga naniniwala sa kanya (Juan 10:28), nangako siyang bubuhayin ang mga patay sa pamamagitan ng kanyang tinig (Juan 5:28-29), at sinabi na walang sinumang makalalapit sa Ama maliban sa pamamagitan niya (Juan 14:6).

Ipakita mula sa banal na kasulatan na siya ay higit pa sa isang taong walang kasalanan; Tingnan ang Manwal ng Doktrina para sa

(5) Si Jesus ay Diyos.

Hindi siya maaaring maging isang mabuting tao at isang propeta ng Diyos maliban kung ang kanyang mga pag-aangkin tungkol sa kanyang sarili ay totoo. Itinuturo ng Islam na si Jesus ay isang propeta ng Diyos, ngunit dapat na siya ay totoo sa kanyang pag-aangkin at kayang magbigay ng buhay na walang hanggan, o siya ay isang masama o nalinlang niya na din ang kanyang sarili na naging dahilan upang ang mga tao ay magtiwala sa kanya.

Dumating si Jesus upang ipakita ang pag-ibig ng Diyos. Ipinakita niya na mahal ng Diyos ang bawat tao, kabilang ang mga kababaihan at mga taong mababa ang uri. Ang mga tao ay hindi hiwalay sa Diyos dahil sa kanilang kasarian o panlipunang uri. Ang mga tao ay nahiwalay sa Diyos sa pamamagitan lamang ng kanilang kasalanan, at nag-aalok ang Diyos ng kapatawaran. Inaanyayahan ng Diyos ang makasalanan na mapatawad at pumasok sa isang personal na kaugnayan sa kanya.

Si Jalal ay nanirahan sa Saudia Arabia. Noong bata pa siya ay tapat siya sa relihiyong Islam. Naisaulo niya ang malalaking bahagi ng Qur’an at tumulong sa mosque. Noong siya ay 16 taong gulang, gusto niyang sumali sa isang banal na digmaan at ipaglaban ang Islam, ngunit sinabi ng kanyang mga magulang na siya ay napakabata pa. Nang maglaon ay nakahanap siya ng trabaho at naging abala at nagsimulang magpabaya sa relihiyon. Siya ay nagkaroon ng problema at nais na manalangin para sa tulong, ngunit natakot siya na si Allah ay nagalit sa kanya dahil sa kanyang pagpapabaya sa relihiyon. Nanalangin siya kay Jesus para sa tulong, at nalutas ang problema pagkaraan ng dalawang araw. Nanaginip din siya at nakita niyang ipinakita ni Jesus sa mga tao ang daan patungo sa langit. Inilagay niya ang kanyang pananampalataya kay Kristo para sa kaligtasan. Sabi ni Jalal, “Nararamdaman ko ang pagmamahal sa aking puso, at napakasaya kong makilala si Jesus. Noong Muslim ako, hindi ko maisip na tama ang mga Kristiyano. Pagkatapos noon, nalaman ko kung gaano ako kamahal ng Diyos, at naging Kristiyano ako. Oo, mahal niya ako, mahal ka niya, at mahal niya ang buong mundo. Minahal tayo ni Jesukristo, at mahal pa rin niya tayo. At huwag kalimutan sa huling araw na walang makapagliligtas sa atin, tanging si Jesukristo lamang."

► Ngayon basahin muli ang 1 Juan 1. Ang bawat mag-aaral ay dapat magsulat ng isang talata na nagpapaliwanag sa mensahe ng talatang ito para sa isang tagasunod ng Islam. Maaaring ibahagi ng ilang mag-aaral ang kanilang isinulat.

Tandaan na humanap ng pagkakataong ipahayag ang ebanghelyo sa isang tao mula sa relihiyosong grupong ito. Maghandang ibahagi sa iyong mga kamag-aral ang tungkol sa pag-uusap na mayroon kayo. Isulat ang iyong 2-pahinang nakasulat na ulat at ibigay ito sa iyong pinuno ng klase.