Lesson 9: Amafaranga

Ku musozo w’iri somo, umunyeshuri akwiye kuba ashoboye:

(1) Kwiyemeze gukurikiza amahame y’Imana mu gukoresha no gucunga neza amafaranga n’umutungo.

(2) Gusobanukirwa ibyago byo mu buryo bw’umwuka bijyana no kwemera no gukoresha amafaranga mu buryo butari bwo, ndetse n’uko wabyirinda.

John Wesley yabaye mu Bwongereza kuva mu 1703 kugeza mu 1791. Yigishirizaga ubutumwa bwiza hanze, akibanda ku bakene batemererwaga kwinjira mu nsengero. Yabayeho yitonda, agerageza guhesha Imana icyubahiro m’ubuzima bwe bwose, harimo n’imikoreshereze y’amafaranga. Yigishaga ko abizera, iyo bamaze kubona amafaranga, bakwiye kuzigama uko bashoboye kose no gutanga uko bashoboye kose. Yari urugero rwiza mu myitwarire ihamye yo gukoresha amafaranga neza. Yagabanyije uko yakoreshaga amafaranga buri mwaka kugira ngo abone amafaranga menshi yo gufashisha. Uko amafaranga yinjizaga yiyongeraga, we ntiyongeraga ibyo akeneye ahubwo byagumaga hamwe, ahubwo yatangaga ayarengaga ho ku byo yari akeneye. Nubwo yinjije ubutunzi bwinshi mu buzima bwe, igihe yapfaga yari afite amafaranga make mu ntoki. Wesley yari azi ko Imana yizera abantu ikabaha amafaranga ngo bayacunge, kandi yigishaga ko abemera bagomba gukurikiza amahame y’Imana mu ikoreshwa ry’amafaranga.

Isezerano Rishya rivuga amafaranga kenshi kurusha izindi ngingo nyinshi, si uko amafaranga ari ingenzi cyane ku Mana, ahubwo ni uko abantu bafite ibibazo byinshi bijyanye n’amafaranga.

Nk’Umuremyi, Imana ni yo nyir’abantu bose n’ubutunzi bwabo. Nk’abizera, turi ab’Imana mu buryo bwihariye kuko yaducunguye. Tugomba kwiyumvamo ko turi abacungamutungo b’umutungo ugomba gukoreshwa mu izina ry’Imana.

Si bibi kwishimira ibintu byiza. Imana ishimishwa no kuduha umugisha niba twakira byose dushima kandi twicisha bugufi.

Ariko amafaranga ni ibyago mu buryo bw’umwuka ku bantu benshi.

► Bivuze iki kuba umutunzi?

Hari impamvu zitandukanye zituma umuntu afatwa nk’umutunzi.

Niba ufite amafaranga yo kugura ibirenze ibyo ukeneye by’ibanze, urusha ubutunzi nibura kimwe cya kabiri cy’abantu bo ku isi. Abantu benshi bakora buri munsi kugira ngo babone ibyo kurya uwo munsi; iyo habaye ikibabuza gukora, ntibabona ibyo kurya.

Abantu akenshi bafata umuntu nk’umutunzi iyo arusha abandi bantu benshi mu muryango we ubutunzi. Imibereho ye igaragaza ko akoresha amafaranga menshi kurusha abandi bantu benshi. Abantu bamufata nk’uri mu rwego rwo hejuru rw’imibereho. Ashobora kwishimira ibintu by’agaciro abandi benshi batabasha kugura. Agira ijambo ku bantu bafite ububasha. Abantu baba biteguye kumukorera kubera umutungo afite.

Bibiliya ifite amabwiriza n’imbuzi zihariye zagenewe abatunzi.

Amagambo Yesu yavuze ko bikomeye cyane ko umutunzi yinjira mu ijuru (Matayo 19:24) akwiye kuba icyitonderwa gikomeye cyane.

Dushobora gusobanukirwa ibyago by’ubutunzi twumvise ubutumwa intumwa Pawulo yagejeje ku batunzi.

► Umunyeshuri nasomere itsinda muri 1 Timoteyo 6:17-19.

Pawulo aburira abatunzi kutiyemera ngo biyumve ko baruta abandi. Hariho ikigeragezo ku batunzi ko kwiyumvamo ko baruta abandi. Yakobo aburira itorero kutagwa muri ako kaga, ko guha abantu icyubahiro bitewe n’ubutunzi cyangwa icyubahiro bafite mu muryango (Yakobo 2:1-4).

Umutunzi ntakwiye kwiringira ubutunzi bwe, ahubwo akwiye kwizera Imana. Biraruhije ko umutunzi yumva ko akeneye ibyo Imana itanga iyo afite amafaranga yizigamiye. Hariho ikigeragezo cyo kwirara mu buryo bw’umwuka kubera kutumva ko ukeneye ubufasha bw’Imana (Gutegeka kwa kabiri 8:6-18).

Abatunzi bakwiye gutanga n’umutima ukunze kandi bagakoresha amafaranga yabo mu gukora ibyiza.

Kimwe mu byo abantu b’abatunzi b’isi bashinjwa muri Yakobo 5:5 ni uko babayeho mu byishimo mu gihe abandi bababaraga. Ibintu byinshi byiza bishobora kugerwaho binyuze mu gutangana ubwenge. Amafaranga ntiyagura ibyishimo, ariko ashobora kugabanya imibabaro myinshi. Ni bibi ko umuntu yirengagiza imibabaro y’abandi mu gihe we abayeho mu buzima buhenze.

Binyuze ku muhanuzi Amosi, Imana yagaragaje umutima wayo ku butabera bw’abantu (imbabazi n’impuhwe ku bakene n’abahohotewe) muri aya magambo: “Ahubwo ureke imanza zitabera zigende nk’amazi, no gukiranuka gukwire hose nk’uruzi rusandaye” (Amosi 5:24). Imana yaciriye urubanza ubutunzi aho bwayoboraga abantu bugatera uburangare, kwinezeza birenze urugero, no kwirengagiza imibabaro y’abakene (Amosi 6:1, 3-6; 8:4-7, 11-12).

Uwizera wese akwiye gutanga atizigamye kugira ngo afashe abakene n’abahohoterwa, akwiye gutanga icyacumi kugirango ashyigikire itorero rye, kandi akwiye gutanga ngo ashyigikire umurimo w’ubumisiyoneri wo gukwirakwiza ubutumwa bwiza. John Wesley yavuze ko hari impamvu eshatu zatumaga itorero ryo mu gihe cye ritagira umusaruro mu isi:

1. Kubura inyigisho z’ukuri

2. Kubura kutirinda

3. Kubura kwigomwa

► Umunyeshuri nasomere itsinda muri 1 Timoteyo 6:8-10.

Imbuzi zitangwa ku bijyanye n’amafaranga ntizireba abanyamafaranga gusa. Abakene benshi bumva ko batazashobora kugira ibyishimo kubera ko ari abakene. Ibyanditswe bitubwira ko urukundo rw’amafaranga ari umuzi w’ibibi byose. Icyo cyitonderwa kireba buri muntu wese.

Urukundo rw’amafaranga ntirushobora guhazwa. Nta mubare w’amafaranga wahaza umuntu uyakunda (Umubwiriza 5:10). Bibiriya itubwira ko dukwiriye kwirinda gukunda amafaranga, tukanyurwa n’ibyo dufite (Abaheburayo 13:5).

Umuntu wifuza gutunga cyane ahura n’ibigeragezo byinshi bishobora kwangiza imyitwarire ye. Mu rugendo rwo gushaka ubutunzi, umuntu ashobora kuva mu kwizera, maze aho kugira ibyishimo yateganyaga, akabona umubabaro mwinshi.

Hari igihe abayobozi b’idini bakurura abayoboke babasezeranya ubutunzi. Bavuga ko umuntu ufite kwizera akwiye kugira ubutunzi. Abantu benshi mu miryango ikennye bakururwa n’ayo masezerano kubera ubuzima bugoye babayemo. Aba bayobozi bavuga kandi bakabwiriza ku bijyanye n’amafaranga buri gihe, bishimira kwerekana ibimenyetso by’ubukire bigaragara ku bantu bo mu isi.

Ibyanditswe bitubwira ko iyo kubaha Imana bivanze no kunyurwa, bigira umumaro munini (1 Timoteyo 6:6). Umuntu ukurikira ubutunzi akoresheje idini ahura n’ibyago bisa n’iby’umuntu uwo ari we wese wo ku isi ukurikira ubutunzi. Amatorero asezeranya ubutunzi akurura abantu batahindutse, abashishikariza ku byifuzo byabo bwite. Ariko, ayo matorero yuzuyemo abantu bafite ibyiringiro ariko bakaba batazigera babona ibyo basezeranyijwe. Abantu bonyine bakira ubutunzi kubera ubutumwa bwigisha k’ubutunzi ni abavugabutumwa bateranya impano zivuye ku bantu babizera.

► Umunyeshuri nasomere itsinda mu Abafilipi 4:10-13.

Pawulo yashimye abakirisitu bo muri Filipi ko bamwoherereje impano yo kumutera inkunga. Yababwiye ko yize kunyurwa mu bihe byose, n’igihe cy’inzara. Iri jambo ritwereka ko Pawulo atahoraga afite amafaranga menshi. Yavuze ko abifashijwemo n’Imana ashobora byose. Ayo magambo agaragaza ko Pawulo yashakaga kuvuga ko yashoboraga kunyurwa no gukomeza kuba indahemuka ku Mana, aho ari hose n’uko yaba ameze kose.

► Umunyeshuri nasomere itsinda mu Imigani 11:1.

Uyu murongo uvuga ku bipimo bikoreshwa mu kugurisha ibintu bipimwa ku ibiro, nk’imbuto, imboga cyangwa inyama. Hari igihe abantu bakoresha ibipimo byagenewe kwerekana ibiro bitari byo kugira ngo babone amafaranga y’inyongera. Uyu murongo uvuga ko Imana yanga uburiganya.

Abantu benshi bakora ibikorwa by’uburiganya kubera amafaranga. Isomo rikurikira iri rizagaruka ku ngingo yo kuba umunyakuri.

Intumwa Pawulo yandikiye abizera bo muri Filipi, ibizeza ko Imana izabaha ibyo bakeneye. Iri ni isezerano ryiza. Tugomba kureba aho ayo magambo yanditse kugira ngo dusobanukirwe ibihe byariho.

► Umunyeshuri nasomere itsinda Abafilipi 4:15-19.

Itorero ryohereje inkunga y’amafaranga kuri Pawulo. Yavuze ko ari igitambo ku Mana. Yabasezeranije ko Imana izabaha ibyo bakeneye. Ntabwo yabasezeranije ko amafaranga yabo aziyongera cyane.

Iri sezerano ntiryari rigenewe abantu batitwaye neza cyangwa bakoresheje nabi ibyo bahawe. Ryari rigenewe abantu bari baracunze amafaranga yabo hakurikijwe iby’ingenzi by’umwuka.

► Umunyeshuri nasomere itsinda muri Matayo 6:25-33.

Yesu yavuze uburyo Imana igaburira inyoni n’uburyo irimbisha uburabyo, yadusezeranije ko izitwitaho. Atubwira ko tudakwiye guhangayikishwa n’uko tuzabaho. Yadusezeranije ko ni dushyira ubwami bw’Imana imbere ibyo dukeneye tuzabihabwa.

Akenshi abantu ntibahangayikira iby’uwo munsi ahubwo bahangayikishwa n’iby’ejo hazaza. Imana ntiyasezeranije gutanga iby’ejo hazaza mbere y’igihe. Wibuke ko mu isezerano rya kera igihe manu yamanukaga yazaga buri munsi (Kuva 16). Yesu na we yavuze ko dukwiriye gusaba Imana umugati wacu w’uwo munsi (Matayo 6:11). Imana ishaka ko tuyizera buri munsi.

Yakobo avuga ko Imana yahinduye abakene ikabaha kuba abatunzi mu kwizera (Yakobo 2:5). Abakene bafite amahirwe menshi yo kwizera Imana kurusha abibwira ko bafite umutekano w’imari.

Kwizera Imana ariko ntibivuze ko tudakwiye gukurikiza amahame yayo. Ubusanzwe Imana itugenera ibyo dukeneye binyuze mu gukora akazi (Abefeso 4:28). Niba umuntu adashaka gukora, ntakwiye kwitega ko Imana izamugaburira, kandi abandi bantu ntibakwiye kumva ko bafite inshingano zo kumuha (2 Abatesalonike 3:10).

Ntidukwiye kwitega ko ibyo Imana iduha bizatugira abatunzi. Imana iha umugisha abantu bamwe kuba abatunzi, ariko gutunga ntabwo ari umugambi w’Imana ku bantu bose. Umuntu wifuza ubukire cyane azahura n’ibibazo mu mwuka.

Umutungo ukoreshwa ni ibintu umuntu atunze bimufasha gukora no gutanga umusaruro. Urugero twavuga nk’ubutaka, ibikoresho, cyangwa mudasobwa. Umuntu ashobora gukoresha umutungo ukoreshwa kugira ngo yunguke, ariko agomba kuwitaho kandi ntibikwiye ko yawugurisha, kuko bitabaye ibyo umusaruro uzahagarara. Urugero ruboneka muri Bibiliya ruvuga k’umutungo ukoreshwa ruri mu Imigani 14:4, “Urugo rutarimo inka rubamo isuku, ariko intege z’inka zihinga zitera kunguka.”

Umukene ashobora kutumva igitekerezo cy’umutungo ukoreshwa. Urugero, ashobora gutekereza ko inshuti ye ifite amafaranga menshi kubera ko ifite ibikoresho bihenze, cyangwa mudasobwa, cyangwa imodoka. Atekereza ko inshuti cyangwa uwo bafitanye isano ufite ibintu nk’ibyo akwiye kumuha amafaranga igihe ayakeneye. Ariko ibyo bintu bishobora kuba umutungo ukoreshwa utagurishwa kuko kubitakaza byatuma nyirabyo abura aho akura amafaranga.

► Ni izihe ngero zindi z’umutungo ukoreshwa ubona mu buzima bwaho ukunze kuba uri?

Niba umuntu atumva uko umutungo ukoreshwa ukorera abandi, birashoboka ko na we atazi uko uwo mutungo nawe wamufasha. Ashobora kutabasha gusobanura neza icyo akeneye cyane cyangwa ubufasha bwamuhindurira imibereho. Ashobora gusobanura ubufasha nk’inkunga y’ako kanya imufasha mu mirimo ye ya buri munsi, aho kubufata nk’impinduka ihamye mu buzima bwe.

Kimwe mu biranga ubukene ni ukubura uwo mutungo ukoreshwa. Keretse iyo umuntu ukennye yize akamaro ko kubona, kubungabunga no kuzigama umutungo ukoreshwa, bitabaye ibyo ntashobora kuva mu buzima bwo gushingira ku bandi.

Mu mico imwe, biragorana ko umuntu azigama amafaranga no guteza imbere umutungo ukoreshwa, kuko abantu bamukikije baba bategereje ko abasangiza byose afite. Ntibumva impamvu abika amafaranga mu gihe hari undi uyakeneye. Bategereza gusangira ibyo afite ndetse niyo baba bataritwaye neza.

Umwigishwa wa Kristo agomba kubaha ibyo umuco we umwitegaho, ariko kandi agashyira mu bikorwa amahame ya Bibiliya. Ibyanditswe bitubwira ko tutagomba gufasha umuntu utazakora icyo ashoboye (2 Abatesalonike 3:10). Iyo umuntu ahaye umutungo ukoreshwa mugenzi we utita ku bintu mu buryo bwo kumufasha, birangira bombi bagumye mu bukene.

Bisa nkaho Ibyanditswe Byera bivuga ko kuba ubutunzi Imana itanga ari ugutunga umutungo ukoreshwa ku muntu ku giti cye bwite. Umuhanuzi Mika yavuze ko mu muryango wahawe umugisha, buri muntu azagira umuzabibu n’igiti cy’umutini cye (Mika 4:4). Ibyo bivuga umutungo bwite w’umuntu n’ibimufasha gutanga umusaruro. Mu bice bimwe na bimwe, ubuhinzi bushobora kutaba uburyo bwiza bwo gutanga umusaruro, ariko ihame ni uko abantu bahawe umugisha bagomba kugira ibibafasha kuzana umutungo.

Akenshi abakene bahindutse abizera batangira gutera imbere, atari gusa kubera umugisha uturuka ku Mana, ahubwo no kubera imibereho myiza batangiye kugenderaho. Batangira kureka gusesagura amafaranga ku bintu nk’inzoga, urusimbi, n’imyidagaduro itari myiza. Batangira gukora neza kurushaho kandi bakagira isura nziza mu bandi. Imana iha umugisha inkunga batanga mu murimo wayo. Kenshi abana b’umukirisitu baba bafite imibereho myiza kurusha ababyeyi babo.

► Ni izihe nzira abantu bo mu gace utuyemo bashobora kuba bakoresha mu gukora no kwizigama bikabafasha guteza imbere ubukungu bwabo?

Urusimbi ni ugusheta amafaranga ugamije kubona andi ku buryo bworoshye. Buri muntu utsinze atwara amafaranga y’uwatsinzwe, nta ngurane nimwe amuhaye. Abantu benshi bagwa mu ngeso yo gukina urusimbi, bagapfusha ubusa amafaranga yabo bakaba batagishoboye kwita ku miryango yabo. Hari abantu benshi bakoreshesheje amafaranga y’abandi mu gukina urusimbi, bizera ko nibatsinda bazayishyura. Abandi nabo benshi bari mu buroko bazira ubujura kubera gushaka kwiba ngo babone uko bakina urusimbi. Abantu benshi bari mu bukene nabo bakina urusimbi kuberako nta cyizere bifitiye cyuko ubuzima barimo buzahinduka bizera ko umunsi umwe bashobora kugira amahirwe bagatsindira amafaranga.

Gukina urusimbi bihabanye n’amahame menshi ya gikristu:

1. Ihame rigena kunguka binyuze mu gukora akazi (Abefeso 4:28)

2. Ihame ryo kunyurwa (1 Timoteyo 6:6)

3. Ihame ryo kubiba no gusarura (Abagalatiya 6:7)

Ikindi, Imana ishaka ko tubona inyungu dutanze serivisi cyangwa ibicuruzwa, aho gukura amafaranga ku bandi binyuze mu mahirwe. Urusimbi ni rubi kuko ni ingeso kandi rugatuma ibyaha byiyongera.

Gukina urusimbi bihabanye no kwiringira Imana. Umuntu akwiye kwibaza ati: “Ese nemera ko Imana iri kunyitaho?” “Ese nshobora gusenga nsaba ko Imana yampa ibyo nkeneye?” “Ese nemera ko uburyo Imana ishaka kumpa ibyo nkeneye ari uko nshyira amafaranga yanjye mu kaga, nizeye kuyakura ku wundi muntu?” “Ese ntekereza ko Imana izampa ibihembo byo gukina urusimbi, ikandwanira ngo ntsindire amafaranga menshi?” Umuntu ukina urusimbi ntaba yiringira Imana ku bijyanye n’imibereho ye y’amafaranga. Iyo twizeye Imana by’ukuri, twimvira amabwiriza yayo, tukamenya neza ko izaduha ibyo dukeneye igihe tuyumviye.

Iyo umuntu agujije amafaranga, aba yizeye ko azabasha kuyishyura mu mafaranga ateganye azaza mu bihe biza. Nuko rero, kuguza ni ugukoresha amafaranga yo mu gihe kizaza nubwo igihe kizaza nacyo kizazana n’ ibikenewe bishya.

Bibiliya ivuga ko uguze ari umugarugu w’ugurije (Imigani 22:7). Uwikopesha yishyiraho inshingano zimubuza ubwisanzure.

Ubwoko bumwe bwo kwikopesha buba bubi kurusha ubundi. Iyo umuntu yikopesheje amafaranga yo kugura ibikenewe nk’ibiribwa, aba yinjira mu bibazo bikomeye kurushaho. Ibiribwa bizakoreshwa bishire, kandi umwenda nawo uzagumaho, azarushaho kuba umukene kurusha uko yarari mbere.

Iyo umuntu afashe amadeni ku bintu bidakenewe, nko kwiyitaho birenze urugero, imyambaro idakenewe, imyidagaduro cyangwa imitako yo mu rugo, aba akoresheje amafaranga y’ejo hazaza. Aba yishyiriyeho imipaka ku bwisanzure bwe bwo mu minsi iri imbere; ejo hazaza ntazabasha guhitamo ibyo agura, kuko ayo mafaranga yamaze kuyakoresha.

Bimwe mu bigo by’ubucuruzi bitanga amadeni ku nyungu iri hejuru cyane. Abafata amadeni kuri ibyo bigo by’ucuruzi, bidatinze, bisanga babereyemo amafaranga menshi kurusha ayo bari barafashe mbere. Amaduka amwe agurisha ibintu ku nguzanyo ariko ku nyungu iri hejuru cyane. Abantu bishyura ibiciro byo hejuru ku bintu baguze ku nguzanyo kuko badashaka gutegereza kugeza bafite amafaranga ahagije yo kwishyura igiciro gisanzwe.

Hari igihe abantu bafata amadeni kugira ngo bitegure ubukwe buhenze nk’uko umuco wabo ubisaba. Bagatangira urushako rwabo bafite umwenda munini cyane. Itorero nk’umuryango w’abizera rikwiye gufasha abarigize, rihanga imigenzo mishya cyangwa rigashaka uburyo ubukwe bwaba bwiza ariko bidasabye amafaranga menshi cyane.

► Umunyeshuri nasomere itsinda mu Abaroma 13:7-8.

Iyi mirongo itubwira ko dukwiriye guha abandi ibyo tubabereyemo. Dufite umwenda wo kubaha no kumvira abadutegeka. Dufite umwenda wo kwishyura imisoro. Interuro ya mbere y’umurongo wa 8 ishyira mu ncamake ibyavuzwe mu murongo wa 7. Ntidukwiriye kubura guha umuntu icyo tugomba kumuha. Ibi ntibisobanura ko tudakwiye kuguza na rimwe, kuko iyo twishyuye nk’uko twumvikanye n’uwadukopesheje, tuba tutarenze ku byo tugomba gutanga.

Ni bibi ko umuntu aguza adafite umutima wo kuzishyura, cyangwa kuguza nyuma ukaza gufata umwanzuro wo kutishyura (Zaburi 37:21).

Amategeko yo mu Isezerano rya Kera yarebaga ishyanga rya Isirayeli ryari ribayeho mu buhinzi butari bufite ibikoresho bigezweho bikoreshwa mu buhinzi. Ubuhinzi ni bwo bwari isoko nyamukuru y’imibereho, imiryango yihazaga mu byo ikeneye mu buzima bwa buri munsi. Imiryango yabaga ifite ubutaka bumwe mu ibisekuru byinshi. Ni yo mpamvu bitari ibintu bisanzwe ko umuntu aguza amafaranga ngo agure ubutaka cyangwa atangire ubucuruzi. Iyo umuntu yaguzaga amafaranga, byaterwaga n’uko yabaga ari mu bibazo kandi akeneye amafaranga yo guhaza ibikenewe by’ibanze. Imana yashakaga ko Isirayeli iba umuryango w’abizera wita ku bawugize. Imana yababwiye kujya baguriza abantu bakeneye amafaranga ariko badashyizeho inyungu (Kuva 22:25). Kimwe mu biranga umuntu ukiranuka kigarukwaho muri Zaburi 15 ni uko ataguriza amafaranga ngo asabe n’inyungu (Ezekiyeri 18:5-9 ihuye Zaburi 15).

Si bibi iyo umushoramari asabye inyungu ku mafaranga agurije umuntu ushaka gutangira ubucuruzi (Matayo 25:27). Inyungu iba ari igihembo cy’umushoramari kubera ko yafashije ubucuruzi kubaho.

Abantu bakorana ubucuruzi n’abakene ntibakwiye gutekereza gusa ku nyungu (Imigani 22:16a). Ni bibi kugurisha ibicuruzwa bifite ireme riri hasi cyangwa gusaba ibiciro bidakwiye, witwaje ko abakene baba badafite izindi nzira. Ni bibi gutanga amadeni cyangwa kugurisha ku nguzanyo ugamije inyungu iri hejuru cyane ku bantu bakugujije kubera ibibazo bikomeye bafite. Umucuruzi akwiye gushaka uburyo yafasha abakiriya be kugira imibereho myiza kurushaho.

Umuhanuzi Ezekiyeli yavuze ko icyaha cya Sodomu kitari gusa ubusambanyi, ahubwo ko abantu babagamo mu buzima bw’ibinezeza ntibafashe abakene n’abari mu bukene (Ezekiyeli 16:49). Imana idusaba kudaha abakene gusa, ahubwo no kubafasha mu buryo bufite umugambi kandi bunoze kugira ngo barusheho gukomera.

Amategeko y’Imana ku Abisirayeli atwereka ibyo Imana ishyira imbere. Muri iyi minsi ya none amategeko y’igihugu cyacu si amwe n’ayo Imana yahaye Isirayeli, ariko ibyo Imana yitaho biracyari bimwe kandi n’amahame yayo ni amwe. Itorero rikwiye gushaka uburyo bwo gufasha abakene kugira imbaraga, rihereye ku kwita ku muryango w’abizera, hanyuma rikagira uruhare mu guhindura imibereho y’abaturage muri rusange.

Bamwe mu bantu bakoresha amafaranga yabo yose ako kanya bakiyabona. Kenshi bahura n’ibibazo by’ibyo bakeneye mbere y’uko bongera kubona amafaranga. Bakaba batabasha gufasha abandi.

Ingengo y’imari ni umugambi wo gucunga neza uko amafaranga akoreshwa buri munsi. Abantu benshi bafite ibikenerwa baba bateganya igihe runaka, kandi bakwiye kuzigama amafaranga y’ibyo mbere y’igihe. Urugero, umuntu ashobora kuba akodesha inzu. Ashobora kuba yishyura ku kwezi cyangwa ku mwaka. Akwiye kuba abasha kuzigama igice cy’amafaranga kuyo yinjiza kugirango abashe kwishyura ubwo bukode. Niba ubukode bwe ari ubwo yishyura ku mwaka, azaba afite amafaranga amwe igihe kirekire, ashobora kugwa mu gishuko cyo kuyakoresha, ariko akwiye kuyabika nk’aho yamaze kuyakoresha.

Amafaranga ya mbere umuntu akwiye kuzigama ni icyacumi (Imigani 3:9-10). Ugomba kwiyemeza gutanga 10% ku inyungu zawe mu gushyigikira umurimo w’Imana. Ntugategereze gukoresha amafaranga ngo asigaye abe ariyo utekereza gutangaho icyacumi. Imana izaha umugisha kudahemuka kwawe.[1]

Nyuma yo guhaza ibikenewe by’ibanze mu mafaranga yasigaye hamaze gutangwa icyacumi, umuntu akwiye kuzigama igice kimwe cyo muri ayo mafaranga asigaye kugira ngo azamufashe mu bihe bidasanzwe. Agomba kuzigama amafaranga amwe yo kuzamura imibereho ye, nko kuzigama kugira ngo azagure inzu ye bwite. Agomba no kugerageza gushora amafaranga mu bikorwa bizamura ibyo yinjiza. Urugero rw’ishoramari rito ni nko kugura ibikoresho bimufasha kubona amafaranga menshi ku kazi.

Umuntu ufite umutungo ukoreshwa, nk’imodoka cyangwa inyubako, akwiye guteganyiriza amafaranga yo kuwitaho. Niba umuntu akoresha imodoka ye kugira ngo abone inyungu ariko ntazigame amafaranga, ntazashobora kwishyura gusana imodoka cyangwa kugura indi, kandi inyungu ye izahagarara.

Umuntu utateganyiriza amafaranga ashobora kenshi kudashobora kwita ku nshingano ze. Ashobora kwiringira abandi kumufasha, ariko we ntazashobora gufasha abandi. Imibereho ye ntihinduka na rimwe kuko nta buryo na bumwe ashoramo amafaranga.

Yesu yavuze ku musamariya mwiza wafashije umuntu wakomeretse (Luka 10:25–37). Uyu musamariya yari afite amafaranga ndetse n’indogobe yo gukoresha ngo atware uriya muntu wari akomeretse. Ese tuvuge nkiyo uyu musamariya aza kuba yaragurishije indogobe ye yakoresheje gutwara uyu muntu wari yarakomeretse ndetse agakoresha ayo mafaranga yose? Nubwo yari kuba afite ibyifuzo byiza byo gufasha, yari kuba afite imbogamizi mu bushobozi bwo kugira icyo akora kuri icyo kibazo.

Gutegura ingengo y’imari bifasha umuntu kwiteganyiriza ibyo akeneye, kwita ku bamwinshingirikijeho, gushora imari mu hazaza he, kwitabara mu bihe bidasanzwe, no gushyigikira umurimo w’Imana.

Mu minsi ya mbere y’Itorero, nyuma gato ya Pentekote, abizera bari bafite ukwiyemeza gukomeye ku muryango w’abizera ku buryo bitaga ku byo buri wese akeneye. Basangiraga ibyo bari batunze, kandi muri bo nta numwe wavugaga ko icyo atunze ari icye bwite. Benshi muri bo bagurishaga ibyabo maze bagaha ayo mafaranga itorero (Ibyakozwe n’Intumwa 2:44–45). Nubwo tudategereza ko ubuzima mu itorero buri gihe buzaba bumeze gutyo, tubona ko iyo itorero riri ku rwego rwiza habaho ubugwaneza no kwiyemeza kwita ku muryango w’abizera.

Abizera bo muri Tesalonike bitaga ku kuba buri wese abona ibyo kurya, ariko hari bamwe batakoraga. Abo bantu babaga mu kwinezeza, bategereje gufashwa n’itorero. Pawulo ntiyigeze abwira itorero ko kwita ku bagize umuryango wabo ari ikosa, ahubwo yavuze ko umuntu udashaka gukora adakwiye guhabwa ibyo kurya (2 Abatesalonike 3:10). Kuri bamwe, umurimo ushobora kutaba akazi k’umushahara, ahubwo bikaba nko gufasha abandi bizera mu byo bakeneye. Abantu bamwe bashobora kutabona akazi kabaha ibihembo, ariko hafi y’abantu bose bashobora kugira icyo bafasha.

Mu zindi nzandiko za Pawulo yatanze amabwiriza yo gufasha abapfakazi ndetse no gufasha abashumba (1 Timoteyo 5:3-18, Abagalatiya 6:6).

Uwizera wese akwiye kuba umunyamuryango w’itorero ry’aho atuye, kandi akiyemeza gufasha mu bibazo by’abarigize no gushyigikira umurimo w’Imana.

► Ni gute abantu b’itorero bashobora gufatanya kwita ku bibazo biri mu itorero, ariko banategeka abantu gukora inshingano zabo?

► Ni ayahe mahirwe aboneka mu muryango wanyu abantu b’itorero bashobora gukoreshereza hamwe kugira ngo bateze imbere umutungo ukoreshwa?

Data uri mu Ijuru,

Ndagushimira kubw’isezerano ryo kumpaza mubyo nkeneye. Mfasha kuba indahemuka mu nshingano zanjye zo kwiyitaho no gufasha abanyishingikirijeho. Mfasha gutanga n’umutima ukunze ku byo ntunze. Mfasha kugira ubwenge bwo kubasha gufasha abakennye.

Ndasaba ngo umpe umugisha mu by’ubutunzi, ariko cyane cyane nshaka gukomeza gushyira imbere iby’umwuka no kunyurwa kubera umubano mfitanye nawe.

Amena

(1) Senga usuzume witonze amahame yo muri Bibiliya yigishijwe muri iri somo. Subiza buri kibazo gikurikira mu nyandiko:

• Ni ibihe bigeragezo nahuye nabyo bijyanye n’amafaranga n’umutungo?

• Kuri ubu, ni ubuhe buryo mbonamo amafaranga cyangwa/n’umutungo?

• Ni ubuhe buryo ncungamo kandi nkakoreshamo amafaranga cyangwa/n’umutungo?

• Bishatse gusobanura iki kwizera Imana k’umutungo cyangwa/ku mafaranga?

• Ni uwuhe mutungo ukoreshwa ntunze?

• Ese haba hari imitungo ikoreshwa nkwiye kuba nteganya kugira mu bihe biza? Niba ari uko biri, nzabigeraho nte?

• Ni mu buhe buryo naba narangije amafaranga cyangwa/umutungo?

• Ni gute nakwikosora ku kibazo cyo gukoresha umutungo cyangwa/n’amafaranga nabi?

(2) Andika ipaji imwe usobanura amahame y’iri somo, ushyiremo n’uko yakwifashishwa mu buzima bwawe bwa buri munsi. Ni iki abantu bo mu muryango wawe bakwiye gusobanukirwa ku myumvire ya gikristu ku mafaranga?

(3) Fata mu mutwe Imigani 3:13-17 kandi wandike igika cyigaragaza ibyo watekerejeho. Mu gutangira isomo rikurikira, andika uyu murongo uwukuye mu mutwe hanyuma utange umukoro wawe k’umuyobozi w’isomo.