ਇਸ ਪਾਠ ਦੇ ਅੰਤ ਵਿੱਚ, ਵਿਦਿਆਰਥੀ ਹੇਠਾਂ ਦੱਸੇ ਕੰਮ ਕਰਨ ਦੇ ਯੋਗ ਹੋਣੇ ਚਾਹੀਦੇ ਹਨ:

(1) ਉਨ੍ਹਾਂ ਪੰਜ ਭਾਸ਼ਾਵਾਂ ਨੂੰ ਸਮਝਣਾ ਜਿਨ੍ਹਾਂ ਵਿੱਚ ਪਿਆਰ ਨੂੰ ਪਰਗਟ ਕੀਤਾ ਜਾਂਦਾ ਹੈ।

(2) ਪਿਆਰ ਦੀਆਂ ਪੰਜ ਭਾਸ਼ਾਵਾਂ ਦੇ ਵਿੱਚੋਂ ਹਰੇਕ ਭਾਸ਼ਾ ਦੀ ਗਲਤ ਵਰਤੋਂ ਜਾਂ ਅਣਵੇਖਿਆ ਕਰਨ ਨਾਲ ਸੰਬੰਧਤ ਖਤਰੇ ਬਾਰੇ ਚਰਚਾ ਕਰਨਾ।

(3) ਇੱਕ ਬੱਚੇ ਦੇ ਭਾਵਨਾਤਮਕ ਟੈਂਕ ਦੇ ਭਰੇ ਹੋਣ ਦੇ ਲਾਭਾਂ ਦਾ ਵਰਣਨ ਕਰਨਾ।

(4) ਪਰਿਵਾਰ ਦੇ ਕਰੀਬੀ ਮੈਂਬਰਾਂ ਦੀਆਂ ਪਿਆਰ ਦੀਆਂ ਮੁੱਖ ਭਾਸ਼ਾਵਾਂ ਨੂੰ ਪਛਾਨਣਾ।

(5) ਪਿਆਰ ਦੀਆਂ ਪੰਜ ਭਾਸ਼ਾਵਾਂ ਦੇ ਵਿੱਚੋਂ ਹਰੇਕ ਭਾਸ਼ਾ ਵਿੱਚ ਪਰਿਵਾਰ ਦੇ ਮੈਂਬਰਾਂ ਲਈ ਪਿਆਰ ਵਿਖਾਉਣ ਦੇ ਵਿਸ਼ੇਸ਼ ਤਰੀਕਿਆਂ ਦੀ ਸੂਚੀ ਬਣਾਉਣਾ।

(6) ਪਰਿਵਾਰ ਦੇ ਮੈਂਬਰਾਂ ਲਈ ਉਨ੍ਹਾਂ ਦੀਆਂ ਪਿਆਰ ਦੀਆਂ ਮੁੱਖ ਭਾਸ਼ਾਵਾਂ ਵਿੱਚ ਪਿਆਰ ਵਿਖਾਉਣ ਲਈ ਸਮਰਪਣ ਕਰਨਾ।

ਪਿਛਲੇ ਪਾਠ ਵਿੱਚ, ਅਸੀਂ ਸਵੈ ਦਾ ਤਿਆਗ ਕਰਨ ਵਾਲੇ ਬਿਨਾਂ ਸ਼ਰਤ ਦੇ ਪਿਆਰ ਬਾਰੇ ਸਿੱਖਿਆ ਸੀ। ਅਸੀਂ ਇਹ ਵੀ ਸਿੱਖਿਆ ਸੀ ਕਿ ਘੱਟੋ-ਘੱਟ ਪੰਜ ਵੱਖ-ਵੱਖ ਤਰੀਕੇ (ਭਾਸ਼ਾਵਾਂ) ਹਨ ਜਿਨ੍ਹਾਂ ਵਿੱਚ ਪਿਆਰ ਨੂੰ ਪਰਗਟ ਕੀਤਾ ਜਾ ਸਕਦਾ ਹੈ। ਬਹੁਤੇ ਲੋਕ ਉਨ੍ਹਾਂ ਪੰਜਾਂ ਵਿੱਚੋਂ ਇੱਕ ਜਾਂ ਦੋ ਵਿੱਚ ਸੁਭਾਵਕ ਤੌਰ ’ਤੇ ਪਿਆਰ ਨੂੰ ਮਹਿਸੂਸ ਕਰਦੇ ਜਾਂ ਪਰਗਟ ਕਰਦੇ ਹਨ।

ਅਸੀਂ ਪੁਸ਼ਟੀ ਦੇ ਸ਼ਬਦਾਂ ਬਾਰੇ ਚਰਚਾ ਕੀਤੀ ਸੀ ਅਤੇ ਸਾਡੇ ਪਰਿਵਾਰਕ ਮੈਂਬਰਾਂ ਲਈ ਪਿਆਰ ਦਾ ਸੰਚਾਰ ਕਰਨ ਦੇ ਵਿਹਾਰਕ ਤਰੀਕਿਆਂ ਨੂੰ ਜਾਣਿਆ ਸੀ। ਇਸ ਪਾਠ ਵਿੱਚ, ਅਸੀਂ ਪਿਆਰ ਦੀਆਂ ਬਾਕੀ ਚਾਰ ਭਾਸ਼ਾਵਾਂ ਬਾਰੇ ਸਿੱਖਾਂਗੇ, ਫਿਰ ਸਾਡੇ ਬੱਚਿਆਂ ਲਈ ਸਾਡੇ ਪਿਆਰ ਨੂੰ ਵਿਖਾਉਣ ਵਾਸਤੇ ਵਿਸ਼ੇਸ਼ ਅਮਲ ਕਰਾਂਗੇ।

ਉਹ ਲੋਕ ਜਿਨ੍ਹਾਂ ਦੀ ਪਿਆਰ ਦੀ ਮੁੱਖ ਭਾਸ਼ਾ ਮਹੱਤਵਪੂਰਣ ਸਮਾਂ ਇਕੱਠੇ ਬਿਤਾਉਣਾ ਹੈ ਉਹ ਤਦ ਪਿਆਰੇ ਮਹਿਸੂਸ ਕਰਦੇ ਹਨ ਜਦੋਂ ਦੂਸਰੇ ਜਾਣਬੁੱਝ ਕੇ ਉਨ੍ਹਾਂ ਨਾਲ ਮਹੱਤਵਪੂਰਣ ਸਮਾਂ ਬਿਤਾਉਣ ਲਈ ਸਮਾਂ ਕੱਢਦੇ ਹਨ। ਇਹ ਸਮਾਂ ਚੌਕਸੀ ਨਾਲ ਇੱਕ ਦੂਸਰੇ ਲਈ ਰੱਖਿਆ ਜਾਂਦਾ ਹੈ, ਇੱਕ ਦੂਸਰੇ ਉੱਤੇ ਧਿਆਨ ਦਿੰਦੇ ਹੋ। ਇਹ ਅਨੰਦ ਅਤੇ ਸੰਗਤੀ ਦੇ ਲਈ ਸਮਾਂ ਹੈ।

ਮਹੱਤਵਪੂਰਣ ਸਮਾਂ ਇਕੱਠੇ ਬਿਤਾਉਣਾ ਅਚਾਨਕ ਆਉਣ ਵਾਲਾ ਸਮਾਂ ਜਾਂ ਬਚਿਆ ਹੋਇਆ ਸਮਾਂ ਨਹੀਂ ਹੈ। ਜੇ ਤੁਸੀਂ ਟ੍ਰੈਫ਼ਿਕ ਜਾਮ ਦੇ ਵਿੱਚ ਫਸੇ ਹੋਏ ਹੋ ਜਾਂ ਇੱਕ ਮੁਲਾਕਾਤ ਦੇ ਲਈ ਉਡੀਕ ਕਰ ਰਹੇ ਹੋ, ਤੁਹਾਨੂੰ ਇਸ ਸਮੇਂ ਨੂੰ ਸਮਝਦਾਰੀ ਨਾਲ ਵਰਤਣਾ ਚਾਹੀਦਾ ਹੈ, ਪਰ ਇਹ ਸਮਾਂ ਆਮ ਤੌਰ ’ਤੇ ਇਕੱਠੇ ਸਮਾਂ ਬਿਤਾਉਣ ਲਈ ਜਾਣਬੁੱਝ ਕੇ ਠਹਿਰਾਏ ਗਏ ਸਮੇਂ ਦੇ ਵਾਂਗ ਨਹੀਂ ਹੁੰਦਾ ਹੈ। ਇੱਕ ਜੀਵਨ ਸਾਥੀ ਜਾਂ ਇੱਕ ਬੱਚਾ ਤੁਹਾਡੇ ਨਾਲ ਇੱਕ ਪ੍ਰੋਜੈਕਟ ’ਤੇ ਕੰਮ ਕਰ ਸਕਦਾ ਹੈ, ਅਤੇ ਇਹ ਮਹੱਤਵਪੂਰਣ ਹੈ, ਪਰ ਇਹ ਸਮਾਂ ਤੁਹਾਡੇ ਨਾਲ ਉਨ੍ਹਾਂ ਦੇ ਇਕੱਠੇ ਸਮਾਂ ਬਿਤਾਉਣ ਦੀ ਲੋੜ ਨੂੰ ਹਮੇਸ਼ਾ ਪੂਰਾ ਨਹੀਂ ਕਰ ਸਕੇਗਾ।

ਬਿਨਾਂ ਵਿਘਨ ਦੇ ਇੱਕ ਗੱਲਬਾਤ, ਮਹੱਤਵਪੂਰਣ ਸਮਾਂ ਇਕੱਠੇ ਬਿਤਾਉਣ ਦੀ ਇੱਕ ਉੱਤਮ ਉਦਾਹਰਣ ਹੈ। ਅਜਿਹੇ ਵਾਰਤਾਲਾਪਾਂ ਦੇ ਵਿੱਚ, ਹਰੇਕ ਵਿਅਕਤੀ ਦੂਸਰੇ ਨੂੰ ਧਿਆਨ ਨਾਲ ਸੁਣਦਾ ਹੈ। ਹਰੇਕ ਵਿਅਕਤੀ ਟੈਕਸਟ ਮੈਸਜ਼ ਅਤੇ ਫੋਨ ਕਾਲਾਂ ਵਰਗੀਆਂ ਵਿਘਨ ਪਾਉਣ ਵਾਲੀਆਂ ਚੀਜ਼ਾਂ ਨੂੰ ਹਟਾਉਂਦਾ ਹੈ ਤਾਂ ਕਿ ਉਹ ਦੂਸਰੇ ਵਿਅਕਤੀ ਉੱਤੇ ਅਤੇ ਚਰਚਾ ਉੱਤੇ ਧਿਆਨ ਕੇਂਦਰਿਤ ਕਰ ਸਕੇ।

ਇੱਥੇ ਹੋਰ ਕੁਝ ਤਰੀਕੇ ਦੱਸੇ ਗਏ ਹਨ ਜਿਨ੍ਹਾਂ ਦੁਆਰਾ ਤੁਸੀਂ ਵਿਖਾ ਸਕਦੇ ਹੋ ਕਿ ਤੁਸੀਂ ਧਿਆਨ ਨਾਲ ਸੁਣ ਰਹੇ ਹੋ:

1. ਅੱਖਾਂ ਦਾ ਸੰਪਰਕ ਬਣਾ ਕੇ ਰੱਖੋ।

2. ਸਰਗਰਮੀ ਦੇ ਨਾਲ ਸੁਣੋ। ਜੋ ਦੂਸਰਾ ਵਿਅਕਤੀ ਆਖ ਰਿਹਾ ਹੈ ਉਸ ਆਈ ਜਵਾਬ ਦਿਓ। ਕੇਵਲ ਉਸ ਬਾਰੇ ਨਾ ਸੋਚੋ ਜੋ ਤੁਸੀਂ ਅੱਗੇ ਆਖਣਾ ਚਾਹੁੰਦੇ ਹੋ। ਇਸ ਦੇ ਬਜਾਏ, ਉਸ ਬਾਰੇ ਆਪਣੀ ਸਮਝ ਦੀ ਜਾਂਚ ਕਰਨ ਲਈ ਸਮਾਂ ਲਵੋ ਜੋ ਦੂਸਰਾ ਵਿਅਕਤੀ ਸੋਚ ਰਿਹਾ ਹੈ ਅਤੇ ਆਖ ਰਿਹਾ ਹੈ। ਤੁਸੀਂ ਅਜਿਹਾ ਕੁਝ ਆਖਣ ਦੇ ਦੁਆਰਾ ਪੁਸ਼ਟੀ ਕਰ ਸਕਦੇ ਹੋ ਕਿ ਤੁਸੀਂ ਸਹੀ ਤਰ੍ਹਾਂ ਦੇ ਨਾਲ ਸਮਝਦੇ ਹੋ, “ਜੇ ਮੈਂ ਸਹੀ ਸੁਣਿਆ ਹੈ, ਤਾਂ ਤੁਸੀਂ ਮਹਿਸੂਸ... ਕਰਦੇ ਹੋ।”

3. ਟੋਕੋ ਨਾ। ਸੁਣਨ ਵਾਲਾ ਅਕਸਰ ਸੋਚਦਾ ਹੈ ਕਿ ਉਹ ਪੂਰੇ ਵਿਚਾਰ ਨੂੰ ਸਮਝ ਗਿਆ ਹੈ ਅਤੇ ਫਿਰ ਜਲਦੀ ਨਾਲ ਆਪਣੀ ਸਲਾਹ ਦੇਣ ਲਈ ਟੋਕਦਾ ਹੈ। ਇਸ ਦੇ ਨਾਲ ਬੋਲਣ ਵਾਲਾ ਇਸ ਤਰ੍ਹਾਂ ਮਹਿਸੂਸ ਕਰਦਾ ਹੈ ਕਿ ਸੁਣਨ ਵਾਲੇ ਨੇ ਸੱਚਮੁੱਚ ਸਮਝਣ ਦੇ ਲਈ ਸਮਾਂ ਨਹੀਂ ਲਿਆ ਹੈ।

4. ਭਾਵਨਾਵਾਂ ਨੂੰ ਸੁਣੋ, ਕੇਵਲ ਤੱਥਾਂ ਨੂੰ ਹੀ ਨਹੀਂ। ਜਦੋਂ ਅਸੀਂ ਦੂਸਰੇ ਵਿਅਕਤੀ ਦੇ ਨਜ਼ਰੀਏ ਨੂੰ ਸਮਝਣ ਦੀ ਕੋਸ਼ਿਸ਼ ਕਰਦੇ ਹਾਂ, ਅਸੀਂ ਉਨ੍ਹਾਂ ਨੂੰ ਵਿਖਾਉਂਦੇ ਹਾਂ ਕਿ ਅਸੀਂ ਸੋਚਦੇ ਹਾਂ ਕਿ ਉਹ ਮਹੱਤਵਪੂਰਣ ਹਨ। ਸਾਡੇ ਦਿਲਾਂ ਦੇ ਨਾਲ ਸੁਣਨ ਦੁਆਰਾ, ਅਸੀਂ ਇਹ ਦੱਸ ਰਹੇ ਹਾਂ ਕਿ ਉਨ੍ਹਾਂ ਦੇ ਖਿਆਲ ਅਤੇ ਉਨ੍ਹਾਂ ਦੀਆਂ ਭਾਵਨਾਵਾਂ ਸਾਡੇ ਲਈ ਮਹੱਤਵਪੂਰਣ ਹਨ; ਅਤੇ ਉਹ ਆਪ ਵੀ ਸਾਡੇ ਲਈ ਮਹੱਤਵਪੂਰਣ ਹਨ1

ਮਹੱਤਵਪੂਰਣ ਸਮਾਂ ਇਕੱਠੇ ਬਿਤਾਉਣ ਦਾ ਸਭ ਤੋਂ ਉੱਤਮ ਢੰਗ ਉਹ ਹੈ ਜਦੋਂ ਤੁਸੀਂ ਕੁਝ ਵੀ ਨਹੀਂ ਕਰਦੇ ਹੋ ਪਰ ਇੱਕ ਦੂਸਰੇ ਦੇ ਨਾਲ ਗੱਲਬਾਤ ਕਰਦੇ ਹੋ, ਪਰ ਮਹੱਤਵਪੂਰਣ ਸਮਾਂ ਇਕੱਠੇ ਬਿਤਾਉਣ ਦੀਆਂ ਹੋਰ ਕਿਸਮਾਂ ਵੀ ਮਹੱਤਵਪੂਰਣ ਹਨ। ਪਰਿਵਾਰ ਖਾਣੇ ਦੇ ਸਮੇਂ ਹਰ ਦਿਨ ਇਕੱਠੇ ਸਮਾਂ ਬਿਤਾ ਸਕਦੀਆਂ ਹਨ, ਜਾਣਬੁੱਝ ਕੇ ਇੱਕ ਦੂਸਰੇ ਵੱਲ ਧਿਆਨ ਦਿੰਦੇ ਹੋਏ, ਜਦੋਂ ਉਹ ਖਾਂਦੇ ਹਨ।

ਛੋਟੇ ਬੱਚਿਆਂ ਦੇ ਲਈ ਕਹਾਣੀਆਂ ਪੜ੍ਹਨਾ, ਇਕੱਠੇ ਖੇਡਣਾ, ਜਾਂ ਮਿਲਕੇ ਕੁਝ ਮੰਨੋਰੰਜਕ ਕਰਨਾ, ਹੋਰ ਤਰੀਕੇ ਹਨ ਜਿਨ੍ਹਾਂ ਦੁਆਰਾ ਪਰਿਵਾਰ ਮਹੱਤਵਪੂਰਣ ਸਮਾਂ ਇਕੱਠੇ ਬਿਤਾਉਂਦੇ ਹਨ। ਇਕੱਠੇ ਇੱਕ ਪ੍ਰੋਜੈਕਟ ਜਾਂ ਕਰਾਫਟ ਕਰਨਾ ਵੀ ਮਹੱਤਵਪੂਰਣ ਸਮਾਂ ਇਕੱਠੇ ਬਿਤਾਉਣਾ ਹੈ, ਜੋ ਕੇਵਲ ਮਜ਼ੇ ਦੇ ਲਈ ਹੈ, ਸਕੂਲ, ਜਾਂ ਕੰਮ, ਜਾਂ ਸੇਵਕਾਈ, ਦੇ ਲਈ ਨਹੀਂ ਹੈ।

ਜਦੋਂ ਕੋਈ ਪਰਿਵਾਰ ਤੋਂ ਦੂਰ ਹੁੰਦਾ ਹੈ, ਤਾਂ ਫੋਨ ’ਤੇ ਗੱਲ ਕਰਨ ਦੁਆਰਾ ਮਹੱਤਵਪੂਰਣ ਸਮਾਂ ਇਕੱਠੇ ਬਿਤਾਇਆ ਜਾ ਸਕਦਾ ਹੈ।

ਮਹੱਤਵਪੂਰਣ ਸਮਾਂ ਇਕੱਠੇ ਬਿਤਾਉਣਾ ਰਾਖਵਾਂ, ਬਿਨਾਂ ਵਿਘਨ ਦੇ, ਜਾਂ ਬਿਨਾਂ ਜਲਦਬਾਜ਼ੀ ਦੇ ਇੱਕ ਸਮਾਂ ਹੁੰਦਾ ਹੈ ਜੋ ਇੱਕ ਦੂਸਰੇ ਉੱਤੇ ਧਿਆਨ ਦੇਣ ਅਤੇ ਇੱਕ ਦੂਸਰੇ ਦੇ ਸਾਥ ਦਾ ਅਨੰਦ ਮਾਣਣ ਦਾ ਸਮਾਂ ਹੁੰਦਾ ਹੈ। ਆਪਣੇ ਜੀਵਨ ਸਾਥੀ ਅਤੇ ਬੱਚਿਆਂ ਨਾਲ ਹਰ ਦਿਨ ਮਹੱਤਵਪੂਰਣ ਸਮਾਂ ਇਕੱਠੇ ਬਿਤਾਉਣ ਲਈ ਕੁਝ ਸਮਾਂ ਕੱਢਣਾ ਉੱਤਮ ਹੈ।

ਜਦੋਂ ਸਮਾਂ ਨਹੀਂ ਕੱਢਿਆ ਜਾਂਦਾ

ਜਦੋਂ ਇੱਕ ਜੀਵਨ ਸਾਥੀ ਜਾਂ ਮਾਂ/ਪਿਓ ਸੇਵਕਾਈ ਦੇ ਵਿੱਚ ਆਗੂ ਹੁੰਦੇ ਹਨ, ਤਦ ਪਰਿਵਾਰ ਦੇ ਨਾਲ ਮਹੱਤਵਪੂਰਣ ਸਮਾਂ ਇਕੱਠੇ ਬਿਤਾਉਣ ਲਈ ਸਮਾਂ ਕੱਢਣਾ ਖਾਸ ਕਰਕੇ ਮੁਸ਼ਕਲ ਹੋ ਜਾਂਦਾ ਹੈ। ਪਾਸਟਰਾਂ ਦੇ ਬੱਚੇ ਅਕਸਰ ਮਹਿਸੂਸ ਕਰ ਸਕਦੇ ਹਨ ਕਿ ਕਿਸੇ ਵੀ ਸਮੇਂ ਕੋਈ ਵੀ ਕਾਲ ਕਰ ਸਕਦਾ ਹੈ ਅਤੇ ਉਨ੍ਹਾਂ ਦੇ ਪਿਤਾ ਦੇ ਧਿਆਨ ਨੂੰ ਖਿੱਚ ਸਕਦਾ ਹੈ, ਪਰ ਉਹ ਬਹੁਤ ਰੁੱਝਿਆ ਹੋਇਆ ਹੈ ਕਿ ਆਪਣੇ ਬੱਚਿਆਂ ਲਈ ਸਮਾਂ ਨਹੀਂ ਕੱਢ ਸਕਦਾ। ਇਸ ਤਰ੍ਹਾਂ ਲੱਗ ਸਕਦਾ ਹੈ ਕਿ ਆਮ ਤੌਰ ’ਤੇ ਸੇਵਕਾਈ ਦੇ ਲਈ ਪਰਿਵਾਰਕ ਸਮੇਂ ਨੂੰ ਬਲੀਦਾਨ ਕਰ ਦਿੱਤਾ ਜਾਂਦਾ ਹੈ।

ਜਿਹੜਾ ਵਿਅਕਤੀ ਸੇਵਕਾਈ ਦੇ ਵਿੱਚ ਹੈ ਉਸ ਲਈ ਪੂਰੀ ਤਰ੍ਹਾਂ ਵਿਘਨਾਂ ਤੋਂ ਬਚ ਨਹੀਂ ਸਕਦਾ, ਪਰ ਤੁਹਾਨੂੰ ਆਪਣੇ ਪਰਿਵਾਰ ਦੇ ਲਈ ਸਮਾਂ ਕੱਢਣ ਦੀ ਕੋਸ਼ਿਸ਼ ਕਰਨੀ ਚਾਹੀਦੀ ਹੈ। ਜੇ ਤੁਸੀਂ ਇਹ ਕਰਦੇ ਹੋ, ਤਾਂ ਇਸ ਦੀ ਸੰਭਾਵਨਾ ਜ਼ਿਆਦਾ ਹੈ ਕਿ ਉਹ ਤੁਹਾਡੇ ਨਿਯਮਤ ਫ਼ਰਜ਼ਾਂ ਅਤੇ ਵਾਧੂ ਗਤੀਵਿਧੀਆਂ ਨੂੰ ਸਮਝਣਗੇ, ਉਨ੍ਹਾਂ ਆਉਣ ਵਾਲੇ ਵਿਘਨਾਂ ਨੂੰ ਸਮਝਣਗੇ ਜਿਨ੍ਹਾਂ ਤੋਂ ਬਚਿਆ ਨਹੀਂ ਜਾ ਸਕਦਾ।

ਜਿਸ ਵਿਅਕਤੀ ਦੀ ਪਿਆਰ ਦੀ ਮੁੱਖ ਭਾਸ਼ਾ ਮਹੱਤਵਪੂਰਣ ਸਮਾਂ ਇਕੱਠੇ ਬਿਤਾਉਣਾ ਹੈ, ਉਹ ਤਦ ਸਭ ਤੋਂ ਘੱਟ ਪਿਆਰਾ ਮਹਿਸੂਸ ਕਰ ਸਕਦਾ ਹੈ ਜਦੋਂ ਉਸ ਨੂੰ ਪਰਿਵਾਰ ਦੇ ਨਾਲ ਜਾਣਬੁਝ ਕੇ, ਕੇਂਦਰਿਤ ਸਮਾਂ ਬਿਤਾਉਣ ਲਈ ਨਹੀਂ ਮਿਲਦਾ। ਉਹ ਤਦ ਸਭ ਤੋਂ ਜ਼ਿਆਦਾ ਦੁਖੀ ਮਹਿਸੂਸ ਕਰਦਾ ਹੈ ਜਦੋਂ ਇਕੱਠੇ ਸਮਾਂ ਬਿਤਾਉਣ ਨੂੰ ਤਰਜੀਹ ਨਹੀਂ ਦਿੱਤੀ ਜਾਂਦੀ, ਅਤੇ ਜਦੋਂ ਵਿਘਨ ਪੈਦਾ ਹੁੰਦੇ ਹਨ ਤਦ ਮਹੱਤਵਪੂਰਣ ਸਮਾਂ ਇਕੱਠੇ ਬਿਤਾਉਣ ਲਈ ਰੱਖੇ ਗਏ ਸਮੇਂ ਨੂੰ ਹਟਾ ਕਰ ਦਿੱਤਾ ਜਾਂਦਾ ਹੈ। ਇਹ ਉਸ ਦੇ ਲਈ ਉਦੋਂ ਬਹੁਤ ਮੁਸ਼ਕਲ ਹੁੰਦਾ ਹੈ ਜਦੋਂ ਉਸ ਦਾ ਪਰਿਵਾਰ ਐਨਾ ਰੁੱਝਿਆ ਹੋਇਆ ਹੁੰਦਾ ਹੈ ਉਨ੍ਹਾਂ ਕੋਲ ਉਸ ਨਾਲ ਬਿਤਾਉਣ ਲਈ ਸਮਾਂ ਹੀ ਨਹੀਂ ਹੁੰਦਾ। ਉਹ ਉਦੋਂ ਘੱਟ ਮਹੱਤਵਪੂਰਣ ਮਹਿਸੂਸ ਕਰਦਾ ਹੈ ਜਦੋਂ ਪਰਿਵਾਰ ਦੇ ਮੈਂਬਰ ਬਿਨਾਂ ਐਧਰ ਓਧਰ ਧਿਆਨ ਦਿੱਤੇ ਉਸ ਦੀ ਗੱਲ ਨਹੀਂ ਸੁਣਦੇ ਹਨ।

ਜੇ ਤੁਸੀਂ ਆਪਣੇ ਜੀਵਨ ਸਾਥੀ ਜਾਂ ਬੱਚੇ ਵੱਲ ਨਿੱਜੀ ਧਿਆਨ ਦੇਣ ਵਿੱਚ ਅਸਫ਼ਲ ਹੋ ਰਹੇ ਹੋ, ਤਾਂ ਉਹ ਉਸ ਪਿਆਰ ਨੂੰ ਮਹਿਸੂਸ ਨਹੀਂ ਕਰਨਗੇ ਜੋ ਤੁਹਾਡੇ ਅੰਦਰ ਉਨ੍ਹਾਂ ਲਈ ਹੈ, ਭਾਵੇਂ ਤੁਸੀਂ ਉਨ੍ਹਾਂ ਦੇ ਲਈ ਸਭ ਕੁਝ ਕਰ ਰਹੇ ਹੋਵੋ। ਹੋ ਸਕਦਾ ਹੈ ਕਿ ਇੱਕ ਪੁਰਸ਼ ਆਪਣੇ ਪਰਿਵਾਰ ਦੇ ਲਈ ਕਠੋਰ ਮਿਹਨਤ ਕਰ ਰਿਹਾ ਹੋਵੇ, ਹੋ ਸਕਦਾ ਹੈ ਕਿ ਫਿਰ ਵੀ ਉਸ ਦੀ ਪਤਨੀ ਪਿਆਰ ਮਹਿਸੂਸ ਨਾ ਕਰੇ ਕਿਉਂਕਿ ਉਹ ਬਹੁਤ ਜ਼ਿਆਦਾ ਰੁੱਝਿਆ ਹੋਇਆ ਹੈ ਅਤੇ ਉਸ ਕੋਲ ਆਪਣੀ ਪਤਨੀ ਦੇ ਲਈ ਸਮਾਂ ਨਹੀਂ ਹੈ।

ਇੱਕ ਛੋਟਾ ਲੜਕਾ ਆਪਣੇ ਪਿਤਾ ਕੋਲ ਉਨ੍ਹਾਂ ਨੂੰ ਉਹ ਕਹਾਣੀ ਸੁਣਾਉਣ ਲਈ ਗਿਆ ਜੋ ਉਸ ਨੇ ਹਾਲ ਹੀ ਵਿੱਚ ਸੁਣੀ ਸੀ। ਪਿਤਾ ਇੱਕ ਪੁਸਤਕ ਨੂੰ ਪੜ੍ਹ ਰਹੇ ਸਨ, ਪਰ ਇੱਕ ਮਿੰਟ ਲਈ ਸੁਣਨ ਵਾਸਤੇ ਰੁਕ ਗਏ, ਫਿਰ ਜਦੋਂ ਉਨ੍ਹਾਂ ਦਾ ਬੱਚਾ ਕਹਾਣੀ ਸੁਣਾ ਹੀ ਰਿਹਾ ਸੀ ਉਹ ਵਾਪਸ ਪੁਸਤਕ ਪੜ੍ਹਨ ਲੱਗ ਗਏ। ਆਪਣੇ ਬਾਕੀ ਦੇ ਜੀਵਨ ਵਿੱਚ, ਲੜਕੇ ਨੇ ਯਾਦ ਰੱਖਿਆ ਕਿ ਉਸ ਨੇ ਕਿਵੇਂ ਮਹਿਸੂਸ ਕੀਤਾ ਸੀ।

► ਆਮ ਤੌਰ ’ਤੇ ਤੁਹਾਡੇ ਪਰਿਵਾਰ ਲਈ ਮਹੱਤਵਪੂਰਣ ਸਮਾਂ ਇਕੱਠੇ ਬਿਤਾਉਣਾ ਕਿਸ ਤਰ੍ਹਾਂ ਦਾ ਲੱਗਦਾ ਹੈ? ਕਿਹੜੀਆਂ ਮੁਸ਼ਕਲਾਂ ਉੱਤੇ ਤੁਸੀਂ ਜਿੱਤ ਪਾਉਣੀ ਹੈ ਤਾਂ ਕਿ ਤੁਸੀਂ ਇਕੱਠੇ ਇੱਕ ਮਹੱਤਵਪੂਰਣ ਸਮਾਂ ਬਿਤਾ ਸਕੋ?

ਜਿਨ੍ਹਾਂ ਲੋਕਾਂ ਦੀ ਪਿਆਰ ਦੀ ਮੁੱਖ ਭਾਸ਼ਾ ਤੋਹਫ਼ੇ ਪ੍ਰਾਪਤ ਕਰਨਾ ਹੁੰਦੀ ਹੈ ਉਹ ਤਦ ਸਭ ਤੋਂ ਜ਼ਿਆਦਾ ਪਿਆਰੇ ਮਹਿਸੂਸ ਕਰਦੇ ਹਨ ਜਦੋਂ ਦੂਸਰੇ ਉਨ੍ਹਾਂ ਨੂੰ ਕੁਝ ਅਜਿਹਾ ਦਿੰਦੇ ਹਨ ਜੋ ਵਿਖਾਉਂਦਾ ਹੈ ਕਿ ਉਹ ਉਨ੍ਹਾਂ ਬਾਰੇ ਸੋਚ ਰਹੇ ਸਨ।

ਜਿਹੜੇ ਤੋਹਫ਼ੇ ਕਿਸੇ ਨੂੰ ਪਿਆਰਾ ਮਹਿਸੂਸ ਕਰਾਉਂਦੇ ਹਨ, ਉਹ ਤੋਹਫ਼ੇ ਹਨ ਜੋ ਸੋਚ ਸਮਝ ਕਰ ਦਿੱਤੇ ਜਾਂਦੇ ਹਨ। ਉਹ ਪ੍ਰਾਪਤ ਕਰਨ ਵਾਲੇ ਦੇ ਹਿੱਤ ਨੂੰ ਧਿਆਨ ਵਿੱਚ ਰੱਖ ਕੇ ਖਰੀਦੇ ਜਾਂਦੇ ਹਨ। ਜ਼ਰੂਰੀ ਨਹੀਂ ਹੈ ਕਿ ਉਹ ਵਿਹਾਰਕ ਜਾਂ ਲੋੜੀਂਦੇ ਹੋਣ। ਪਿਆਰ ਦੇ ਤੋਹਫ਼ੇ ਇਸ ਲਈ ਨਹੀਂ ਦਿੱਤੇ ਜਾਂਦੇ ਕਿਉਂਕਿ ਦੇਣ ਵਾਲੇ ਨੂੰ ਹੁਣ ਇਨ੍ਹਾਂ ਦੀ ਲੋੜ ਨਹੀਂ ਹੈ। ਤੋਹਫਿਆਂ ਨੂੰ ਦੇਣ ਵਾਲੇ ਦੁਆਰਾ ਸੋਚ ਸਮਝ ਕੇ ਚੁਣਿਆ ਜਾਂ ਬਣਾਇਆ ਜਾਣਾ ਚਾਹੀਦਾ ਹੈ।

ਇੱਕ ਤੋਹਫ਼ਾ ਜੋ ਕਿਸੇ ਨੂੰ ਪਿਆਰਾ ਮਹਿਸੂਸ ਕਰਾਉਂਦਾ ਹੈ, ਜ਼ਰੂਰੀ ਨਹੀਂ ਹੈ ਕਿ ਉਹ ਤੋਹਫ਼ਾ ਜ਼ਿਆਦਾ ਮਹਿੰਗਾ ਹੋਵੇ। ਇਹ ਕੁਝ ਅਜਿਹਾ ਹੋ ਸਕਦਾ ਹੈ ਜੋ ਇੱਕ ਪਲ ਦੇ ਲਈ ਹੁੰਦਾ ਹੈ, ਜਿਵੇਂ ਕਿ ਵਿਸ਼ੇਸ਼ ਭੋਜਨ ਜਾਂ ਟੋਫੀ; ਜਾਂ ਇਹ ਦੇਣ ਵਾਲੇ ਦੇ ਨਾਲ ਰਿਸ਼ਤੇ ਬਾਰੇ ਇੱਕ ਪ੍ਰਤੱਖ ਠੋਸ ਯਾਦਗਾਰ ਹੋ ਸਕਦੀ ਹੈ। ਜਿਸ ਦੀ ਪਿਆਰ ਦੀ ਮੁੱਖ ਭਾਸ਼ਾ ਤੋਹਫ਼ੇ ਪ੍ਰਾਪਤ ਕਰਨਾ ਹੈ, ਉਸ ਲਈ ਜਨਮ ਦਿਨ, ਸਾਲਗਿਰਾ, ਅਤੇ ਛੁੱਟੀਆਂ ਬਹੁਤ ਮਹੱਤਵਪੂਰਣ ਹੁੰਦੀਆਂ ਹਨ। ਪਰਿਵਾਰ ਦੇ ਮੈਂਬਰਾਂ ਲਈ ਇਹ ਖਾਸ ਕਰਕੇ ਮਹੱਤਵਪੂਰਣ ਹੈ ਕਿ ਉਹ ਇਸ ਵਿਅਕਤੀ ਦੇ ਲਈ ਇੱਕ ਖਾਸ ਤੋਹਫ਼ੇ ਦੇ ਨਾਲ ਉਨ੍ਹਾਂ ਦਿਨਾਂ ਨੂੰ ਯਾਦ ਰੱਖਣ। ਇਨ੍ਹਾਂ ਵਿਸ਼ੇਸ਼ ਦਿਨਾਂ ’ਤੇ ਤੋਹਫ਼ੇ ਨਾ ਪ੍ਰਾਪਤ ਕਰਨਾ ਇਸ ਵਿਅਕਤੀ ਦੇ ਲਈ ਦਰਦਨਾਕ ਹੋ ਸਕਦਾ ਹੈ।

ਤੋਹਫ਼ੇ ਦੇਣਾ ਵਿਸ਼ੇਸ਼ ਦਿਨਾਂ ਤਕ ਹੀ ਸੀਮਿਤ ਨਹੀਂ ਹੋਣਾ ਚਾਹੀਦਾ; ਇਹ ਜੀਵਨ ਦਾ ਚੱਲਦਾ ਰਹਿਣ ਵਾਲਾ ਤਰੀਕਾ ਹੋਣਾ ਚਾਹੀਦਾ ਹੈ। ਜੇ ਕਿਸੇ ਦੇ ਜੀਵਨ ਸਾਥੀ, ਮਾਂ/ਪਿਓ, ਜਾਂ ਬੱਚੇ ਦੀ ਪਿਆਰ ਦੀ ਮੁੱਖ ਭਾਸ਼ਾ ਤੋਹਫ਼ੇ ਪ੍ਰਾਪਤ ਕਰਨਾ ਹੈ, ਤਾਂ ਉਸ ਨੂੰ ਉਨ੍ਹਾਂ ਤੋਹਫਿਆਂ ਦੀ ਭਾਲ ਕਰਨ ਦੀ ਆਦਤ ਬਣਾਉਣੀ ਚਾਹੀਦੀ ਹੈ ਜੋ ਉਸ ਦੇ ਪਿਆਰਿਆਂ ਨੂੰ ਮਹਿਸੂਸ ਕਰਾਉਂਦੇ ਹਨ ਕਿ ਉਨ੍ਹਾਂ ਬਾਰੇ ਸੋਚਿਆ ਜਾਂਦਾ ਹੈ ਅਤੇ ਉਹ ਪਿਆਰੇ ਹਨ।

ਇੱਕ ਪਤਨੀ ਜਿਸ ਦੀ ਪਿਆਰ ਦੀ ਮੁੱਖ ਭਾਸ਼ਾ ਤੋਹਫ਼ੇ ਪ੍ਰਾਪਤ ਕਰਨਾ ਹੈ, ਹੋ ਸਕਦਾ ਹੈ ਕਿ ਉਹ ਪਿਆਰ ਮਹਿਸੂਸ ਨਾ ਕਰੇ ਜੇ ਉਹ ਸੋਚਦੀ ਹੈ ਕਿ ਉਸ ਦੇ ਪਤੀ ਨੇ ਖਰਚ ਨੂੰ ਬਚਾਉਣ ਲਈ ਉਸ ਨੂੰ ਤੋਹਫ਼ੇ ਵਿੱਚ ਉਹ ਚੀਜ਼ ਦਿੱਤੀ ਹੈ ਜਿਸ ਦੀ ਉਸ ਨੂੰ ਵੈਸੇ ਵੀ ਲੋੜ ਸੀ। ਸ਼ਾਇਦ ਉਸ ਨੂੰ ਇੱਕ ਨਵੇਂ ਝਾੜੂ ਦੀ ਲੋੜ ਹੈ, ਅਤੇ ਉਹ ਉਸ ਨੂੰ ਦਿੰਦਾ ਹੈ। ਇੱਕ ਨਵਾਂ ਝਾੜੂ ਪ੍ਰਾਪਤ ਕਰਨਾ ਉਸ ਦੇ ਲਈ ਚੰਗਾ ਹੈ, ਪਰ ਇਹ ਤੋਹਫ਼ਾ ਉਸ ਦੀ ਇਹ ਮਹਿਸੂਸ ਕਰਨ ਵਿੱਚ ਮਦਦ ਨਹੀਂ ਕਰੇਗਾ ਕਿ ਉਸ ਨੂੰ ਪਿਆਰ ਕੀਤਾ ਗਿਆ ਹੈ।

ਤੋਹਫ਼ੇ ਉਦੋਂ ਮਹੱਤਵਪੂਰਣ ਹੁੰਦੇ ਹਨ ਜਦੋਂ ਉਹ ਵਿਖਾਉਂਦੇ ਹਨ ਵਿਅਕਤੀ ਨੇ ਪ੍ਰਾਪਤ ਕਰਨ ਵਾਲੇ ਨੂੰ ਸਮਝਿਆ ਹੈ ਅਤੇ ਉਸ ਦੀ ਪਰਵਾਹ ਕੀਤੀ ਹੈ। ਉਹ ਤਦ ਮਹੱਤਵਪੂਰਣ ਹੁੰਦੇ ਹਨ ਜਦੋਂ ਉਨ੍ਹਾਂ ਨੂੰ ਖਰੀਦਣਾ ਇੱਕ ਲੋੜ ਨਹੀਂ ਸੀ। ਇੱਕ ਤੋਹਫ਼ਾ ਉਦੋਂ ਮਹੱਤਵਪੂਰਣ ਹੁੰਦਾ ਹੈ ਜਦੋਂ ਇਸ ਵਿੱਚ ਕੁਝ ਸੋਚ ਵਿਚਾਰ, ਮਿਹਨਤ, ਅਤੇ ਕੀਮਤੀ ਲਈ ਜਾਂਦੀ ਹੈ।

ਬੱਚੇ ਜਿਨ੍ਹਾਂ ਦੀ ਪਿਆਰ ਦੀ ਮੁੱਖ ਭਾਸ਼ਾ ਤੋਹਫ਼ੇ ਪ੍ਰਾਪਤ ਕਰਨਾ ਹੈ ਉਹ ਤਦ ਜ਼ਿਆਦਾ ਪਿਆਰ ਮਹਿਸੂਸ ਕਰਦੇ ਹਨ ਜਦੋਂ ਉਨ੍ਹਾਂ ਦਾ ਪਿਤਾ ਉਨ੍ਹਾਂ ਦੇ ਲਈ ਆਇਸਕ੍ਰੀਮ ਖਰੀਦਦਾ ਹੈ, ਉਸ ਨਾਲੋਂ ਜਦੋਂ ਉਹ ਉਨ੍ਹਾਂ ਦੇ ਸਕੂਲ ਦੀ ਫੀਸ ਭਰਦਾ ਹੈ, ਭਾਵੇਂ ਕਿ ਸਕੂਲ ਦੀ ਫੀਸ ਕਿਤੇ ਜ਼ਿਆਦਾ ਹੈ ਅਤੇ ਜ਼ਿਆਦਾ ਮਹੱਤਵਪੂਰਣ ਹੈ। ਇਹ ਮੰਗ ਕਰਨ ਦੇ ਬਜਾਏ ਕਿ ਤੁਹਾਡੇ ਪਰਿਵਾਰ ਦੇ ਮੈਂਬਰ ਉਸ ਲਈ ਤੁਹਾਡੀ ਪ੍ਰਸ਼ੰਸ਼ਾ ਕਰਨ ਜੋ ਤੁਸੀਂ ਉਨ੍ਹਾਂ ਲਈ ਹਰ ਦਿਨ ਕਰਦੇ ਹੋ, ਉਨ੍ਹਾਂ ਲਈ ਕੁਝ ਕਰਨ ਦੇ ਉਹ ਤਰੀਕੇ ਭਾਲੋ ਜੋ ਉਨ੍ਹਾਂ ਲਈ ਮਹੱਤਵਪੂਰਣ ਹਨ।

ਕੁਝ ਲੋਕ ਆਪਣੇ ਬੱਚਿਆਂ ਜਾਂ ਜੀਵਨ ਸਾਥੀ ਨੂੰ ਇਸ ਲਈ ਮਜ਼ਬੂਰ ਕਰਦੇ ਹਨ ਕਿ ਉਹ ਹਰ ਚੀਜ਼ ਉਨ੍ਹਾਂ ਤੋਂ ਮੰਗਣ। ਇੱਕ ਵਿਅਕਤੀ ਜੋ ਕੰਜੂਸ ਹੈ ਅਤੇ ਘੱਟ ਹੀ ਰੁੱਝਿਆ ਹੋਇਆ ਹੁੰਦਾ ਹੈ, ਉਸ ਲਈ ਉਦਾਰ ਬਣਨਾ ਅਤੇ ਬੇਲੋੜੇ ਤੋਹਫ਼ੇ ਦੇਣਾ ਆਸਾਨ ਨਹੀਂ ਹੋ ਸਕਦਾ। ਉਹ ਨਹੀਂ ਚਾਹੁੰਦਾ ਕਿ ਉਸ ਦੇ ਪਰਿਵਾਰ ਦੇ ਮੈਂਬਰ ਤੋਹਫਿਆਂ ਦੀ ਉਮੀਦ ਰੱਖਣ ਸ਼ੁਰੂ ਕਰਨ। ਪਰ ਜੇ ਉਸ ਦਾ ਜੀਵਨ ਸਾਥੀ ਜਾਂ ਬੱਚਾ ਹੈ ਜਿਸ ਲਈ ਤੋਹਫ਼ੇ ਮਹੱਤਵਪੂਰਣ ਹਨ, ਉਸ ਨੂੰ ਆਪਣੇ ਸੁਭਾਵਕ ਰੁਝਾਨ ਤੋਂ ਬਾਹਰ ਨਿੱਕਲਣ ਲਈ ਕੰਮ ਕਰਨਾ ਚਾਹੀਦਾ ਹੈ। ਉਸ ਨੂੰ ਤੋਹਫਿਆਂ ਨੂੰ ਉਸ ਤਰ੍ਹਾਂ ਹੀ ਵੇਖਣ ਦੀ ਕੋਸ਼ਿਸ਼ ਕਰਨੀ ਚਾਹੀਦੀ ਹੈ ਜਿਵੇਂ ਉਹ ਵੇਖਦੇ ਹਨ – ਮਹੱਤਵਪੂਰਣ ਅਤੇ ਬਹੁਮੁੱਲੇ। ਜਦੋਂ ਤੋਹਫ਼ੇ ਦਿੰਦੇ, ਤਾਂ ਮੁਫ਼ਤ ਅਤੇ ਅਨੰਦ ਨਾਲ ਦਿਓ!

► ਇੱਕ ਵਿਦਿਆਰਥੀ ਨੂੰ ਸਮੂਹ ਲਈ 2 ਕੁਰਿੰਥੀਆਂ 9:6-9 ਨੂੰ ਪੜ੍ਹਨਾ ਚਾਹੀਦਾ ਹੈ। ਇਸ ਭਾਗ ਵਿੱਚ, ਪੌਲੁਸ ਕੁਰਿੰਥੀਆਂ ਦੇ ਵਿਸ਼ਵਾਸੀਆਂ ਨੂੰ ਬੇਨਤੀ ਕਰ ਰਿਹਾ ਹੈ ਕਿ ਉਹ ਆਪਣੇ ਸਾਥੀ ਵਿਸ਼ਵਾਸੀਆਂ ਨੂੰ ਖੁੱਲ੍ਹੇ ਦਿਲ ਨਾਲ ਦੇਣ, ਜੋ ਲੋੜਵੰਦ ਹਨ। ਇਨ੍ਹਾਂ ਆਇਤਾਂ ਤੋਂ, ਉਦਾਰਤਾ ਦੇ ਲਈ ਚਾਰ ਜਾਂ ਪੰਜ ਪ੍ਰੇਰਣਾਵਾਂ ਨੂੰ ਪਛਾਨਣ ਦੀ ਕੋਸ਼ਿਸ਼ ਕਰੋ। ਇਨ੍ਹਾਂ ਆਇਤਾਂ ਦੇ ਵਿੱਚੋਂ ਉਦਾਰਤਾ ਦੇ ਸਿਧਾਂਤ ਕਿਹੜੇ ਤਰੀਕਿਆਂ ਸਾਡੇ ਪਰਿਵਾਰਾਂ ਦੇ ਵਿੱਚ ਲਾਗੂ ਹੁੰਦੇ ਹਨ?

► ਤੋਹਫ਼ੇ ਦੇਣ ਦਾ ਤੁਹਾਡੇ ਪਰਿਵਾਰ ਵਿੱਚ ਕਿਹੜਾ ਸਥਾਨ ਹੈ? ਕੀ ਤੁਸੀਂ ਤੋਹਫ਼ੇ ਦੇਣ ਦੁਆਰਾ ਪਿਆਰ ਪਰਗਟ ਵਿੱਚ ਕੁਝ ਮੁਸ਼ਕਲਾਂ ਦਾ ਸਾਹਮਣਾ ਕਰਦੇ ਹੋ? ਉਹ ਕਿਹੜੀਆਂ ਮੁਸ਼ਕਲਾਂ ਹਨ ਅਤੇ ਤੁਸੀਂ ਉਨ੍ਹਾਂ ਉੱਤੇ ਜਿੱਤ ਕਿਵੇਂ ਪਾ ਸਕਦੇ ਹੋ?

ਜਿਹੜੇ ਲੋਕਾਂ ਦੀ ਪਿਆਰ ਦੀ ਮੁੱਖ ਭਾਸ਼ਾ ਸੇਵਾ ਦੇ ਕੰਮ ਹੈ ਉਹ ਤਦ ਸਭ ਤੋਂ ਜ਼ਿਆਦਾ ਪਿਆਰੇ ਮਹਿਸੂਸ ਕਰਦੇ ਹਨ ਜਦੋਂ ਦੂਸਰੇ ਉਨ੍ਹਾਂ ਦੇ ਲਈ ਕੁਝ ਕਰਦੇ ਹਨ।

ਸੇਵਾ ਦੇ ਕੰਮ ਵਿਹਾਰਕ ਲੋੜਾਂ ਨੂੰ ਪੂਰਾ ਕਰਦੇ ਹਨ। ਇਹ ਉਹ ਕੰਮ ਹੋ ਸਕਦੇ ਹਨ ਜੋ ਇੱਕ ਵਿਅਕਤੀ ਆਪਣੇ ਲਈ ਆਪ ਕਰ ਸਕਦਾ ਹੈ ਜਾਂ ਨਹੀਂ ਕਰ ਸਕਦਾ ਹੈ। ਸੇਵਾ ਇੱਕ ਸਧਾਰਣ ਕੰਮ ਹੋ ਸਕਦੀ ਹੈ ਜਿਵੇਂ ਕਿਸੇ ਨੂੰ ਪੀਣ ਲਈ ਕੁਝ ਦੇਣਾ। ਇਹ ਕਿਸੇ ਬੀਮਾਰ ਦੀ ਦੇਖਭਾਲ ਕਰਨਾ ਹੋ ਸਕਦਾ ਹੈ। ਇਹ ਲੋੜ ਦੇ ਸਮੇਂ ਮਦਦ ਕਰਨਾ ਹੋ ਸਕਦਾ ਹੈ।

ਬਹੁਤੇ ਪਰਿਵਾਰਾਂ ਦੇ ਵਿੱਚ, ਅਜਿਹੇ ਲੰਬੇ ਸਮੇਂ ਹੋ ਸਕਦੇ ਹਨ ਜਦੋਂ ਇੱਕ ਪਰਿਵਾਰ ਦੇ ਮੈਂਬਰ ਨੂੰ ਲਗਾਤਾਰ ਨਿੱਜੀ ਦੇਖਭਾਲ ਦੀ ਲੋੜ ਹੁੰਦੀ ਹੈ। ਵਿਅਕਤੀ ਦੇ ਲਈ ਪਰਿਵਾਰ ਦੇ ਪਿਆਰ ਅਤੇ ਸਮਰਪਣ ਦੇ ਕਾਰਣ, ਉਹ ਲਗਾਤਾਰ ਸੇਵਾ ਦੇ ਬਹੁਤ ਸਾਰੇ ਕੰਮ ਕਰਦੇ ਹਨ। ਭਾਵੇਂ ਕਿ ਸੇਵਾ ਦੇ ਕੰਮਾਂ ਲਈ ਬਹੁਤ ਸਾਰਾ ਸਮਾਂ ਦਿੱਤਾ ਜਾਂਦਾ ਹੈ, ਪਰਿਵਾਰ ਦੇ ਮੈਂਬਰਾਂ ਨੂੰ ਦੂਸਰੇ ਹੋਰ ਅਰਥਪੂਰਣ ਤਰੀਕਿਆਂ ਨਾਲ ਪਿਆਰ ਵਿਖਾਉਣਾ ਯਾਦ ਰੱਖਣਾ ਚਾਹੀਦਾ ਹੈ, ਖਾਸ ਕਰਕੇ ਜੇ ਇਸ ਵਿਅਕਤੀ ਦੀ ਪਿਆਰ ਦੀ ਮੁੱਖ ਭਾਸ਼ਾ ਸੇਵਾ ਦੇ ਕੰਮ ਨਹੀਂ ਹੈ।

ਸੇਵਾ ਦੇ ਕਈ ਕੰਮ ਰੁਟੀਨ ਦੇ ਵਿੱਚ ਹੁੰਦੇ ਹਨ ਅਤੇ ਉਨ੍ਹਾਂ ਨੂੰ ਆਸਾਨੀ ਨਾਲ ਅਣਵੇਖਿਆ ਕੀਤਾ ਜਾ ਸਕਦਾ ਹੈ ਜਾਂ ਹਲਕੇ ਵਿੱਚ ਲਿਆ ਜਾ ਸਕਦਾ ਹੈ। ਬਹੁਤ ਸਾਰੀਆਂ ਔਰਤਾਂ ਰੋਜ਼ਾਨਾ ਖਾਣਾ ਬਣਾਉਣ ਅਤੇ ਘਰ ਦੀ ਸਾਂਭ ਸੰਭਾਲ ਕਰਨ ਦੁਆਰਾ ਆਪਣੇ ਪਿਆਰ ਨੂੰ ਪਰਗਟ ਕਰ ਰਹੀਆਂ ਹਨ। ਇੱਕ ਪੁਰਸ਼ ਆਪਣੇ ਪਰਿਵਾਰ ਲਈ ਮੁਹੱਈਆ ਕਰਾਉਣ ਵਾਸਤੇ ਕੰਮ ਕਰ ਸਕਦਾ ਹੈ। ਜੇ ਤੁਸੀਂ ਪਹਿਲਾਂ ਹੀ ਹਰ ਦਿਨ ਆਪਣੇ ਪਰਿਵਾਰ ਦੀ ਸੇਵਾ ਇਨ੍ਹਾਂ ਤਰੀਕਿਆਂ ਨਾਲ ਕਰ ਰਹੇ ਹੋ, ਤਾਂ ਤੁਹਾਨੂੰ ਫਿਰ ਵੀ ਪਰਿਵਾਰ ਦੇ ਇੱਕ ਮੈਂਬਰ ਲਈ ਪਿਆਰ ਦੀ ਇਸ ਮੁੱਖ ਭਾਸ਼ਾ ਦੇ ਨਾਲ, ਸੇਵਾ ਦੇ ਕੰਮ ਕਰਨ ਲਈ ਖਾਸ ਤਰੀਕਿਆਂ ਨੂੰ ਭਾਲਣਾ ਚਾਹੀਦਾ ਹੈ।

ਜਦੋਂ ਇੱਕ ਪਤਨੀ ਆਪਣੇ ਪਤੀ ਦੀਆਂ ਛੋਟੀਆਂ-ਛੋਟੀਆਂ ਲੋੜਾਂ ਦੇ ਵਿੱਚ ਕੋਈ ਰੁਚੀ ਨਹੀਂ ਵਿਖਾਉਂਦੀ, ਉਹ ਪਿਆਰ ਦੀ ਇਸ ਭਾਸ਼ਾ ਨੂੰ ਬੋਲਣ ਵਿੱਚ ਅਸਫ਼ਲ ਹੋ ਰਹੀ ਹੈ। ਸ਼ਾਇਦ ਉਹ ਸੋਚਦੀ ਹੈ, “ਉਹ ਆਪ ਪੀਣ ਦੇ ਲਈ ਪਾਣੀ ਲੈ ਸਕਦਾ ਹੈ।” ਪਰ ਜੇ ਉਹ ਉਸ ਦੇ ਲਈ ਪਾਣੀ ਲਿਆਉਂਦੀ ਹੈ, ਤਾਂ ਇਹ ਪਤੀ ਲਈ ਉਸ ਦੇ ਵਿਸ਼ੇਸ਼ ਪਿਆਰ ਨੂੰ ਪਰਗਟ ਕਰੇਗਾ।

ਇਸੇ ਤਰ੍ਹਾਂ, ਇੱਕ ਪਤੀ ਨੂੰ ਵੀ ਵਿਖਾਉਣਾ ਚਾਹੀਦਾ ਹੈ ਕਿ ਉਹ ਉਸ ਬਾਰੇ ਸੋਚਦਾ ਹੈ। ਜਦੋਂ ਉਹ ਆਪਣੀ ਪਤਨੀ ਨੂੰ ਉਹ ਕੰਮ ਕਰਨ ਦੁਆਰਾ, ਉਸ ਕੰਮ ਤੋਂ ਛੁੱਟੀ ਦਿੰਦਾ ਹੈ ਜੋ ਉਹ ਆਮ ਤੌਰ ’ਤੇ ਕਰਦੀ ਹੈ, ਉਹ ਉਸ ਦੀ ਭੂਮਿਕਾ ਦਾ ਆਦਰ ਕਰ ਰਿਹਾ ਹੈ ਅਤੇ ਇਹ ਦੱਸ ਰਿਹਾ ਹੈ ਕਿ ਉਸ ਦਾ ਕੰਮ ਮੁਸ਼ਕਲ ਅਤੇ ਮਹੱਤਵਪੂਰਣ ਹੈ।

ਇੱਕ ਪਤੀ ਮਹਿਸੂਸ ਕਰ ਸਕਦਾ ਹੈ ਕਿ ਉਹ ਪਹਿਲਾਂ ਹੀ ਕਾਫ਼ੀ ਕੰਮ ਕਰਦਾ ਹੈ, ਅਤੇ ਇਹ ਕਿ ਇਹ ਉਸ ਦੀ ਪਤਨੀ ਦਾ ਕੰਮ ਹੈ ਕਿ ਉਹ ਘਰ ਦੇ ਕੰਮਾਂ ਦੀ ਦੇਖਭਾਲ ਕਰੇ। ਉਹ ਇਹ ਵੀ ਸੋਚ ਸਕਦਾ ਹੈ ਕਿ ਉਸ ਨੂੰ ਹੋਰ ਮਿਹਨਤੀ ਹੋਣਾ ਚਾਹੀਦਾ ਹੈ। ਜੇ ਉਹ ਇਹ ਮੰਨਦਾ ਹੈ ਕਿ ਘਰ ਦੇ ਕੰਮ ਉਸ ਦੇ ਆਦਰ ਤੋਂ ਨੀਵੇਂ ਹਨ, ਤਾਂ ਇਹ ਵਿਖਾਉਂਦਾ ਹੈ ਕਿ ਉਹ ਔਰਤਾਂ ਨੂੰ ਨੀਵੀਆਂ ਸਮਝਦਾ ਹੈ ਅਤੇ ਛੋਟੇ ਕੰਮਾਂ ਦੀਆਂ ਹੱਕਦਾਰ ਸਮਝਦਾ ਹੈ। ਔਰਤਾਂ ਨੀਵੀਆਂ ਨਹੀਂ ਹਨ, ਅਤੇ ਘਰ ਦਾ ਕੰਮ ਕਿਸੇ ਬਾਹਰਲੇ ਕੰਮ ਦੇ ਨਾਲੋਂ ਨੀਵਾਂ ਨਹੀਂ ਹੈ।

ਇੱਕ ਪੁਰਸ਼ ਮਹਿਸੂਸ ਕਰ ਸਕਦਾ ਹੈ ਕਿ ਜਦੋਂ ਉਹ ਘਰ ਵਿੱਚ ਮਦਦ ਕਰਦਾ ਹੈ ਤਦ ਉਹ ਇੱਕ ਸੇਵਕ (ਆਪਣੀ ਪਤਨੀ ਦੇ ਹੇਠਾਂ) ਦੀ ਭੂਮਿਕਾ ਨਿਭਾ ਰਿਹਾ ਹੈ, ਪਰ ਇਹ ਸੱਚ ਨਹੀਂ ਹੈ। ਜੇ ਆਪਣੀ ਇੱਛਾ ਦੇ ਨਾਲ ਮਦਦ ਕਰਦਾ ਹੈ, ਤਾਂ ਉਹ ਉਸ ਕੰਮ ਦੇ ਮਹੱਤਵ ਨੂੰ ਅਤੇ ਜਿਸ ਵਿਅਕਤੀ ਦੀ ਉਹ ਮਦਦ ਕਰ ਰਿਹਾ ਹੈ ਉਸ ਦੇ ਮਹੱਤਵ ਨੂੰ ਵਿਖਾਉਂਦਾ ਹੈ। ਉਸ ਦੀ ਸੇਵਾ ਉਸ ਵਿਅਕਤੀ ਦਾ ਆਦਰ ਕਰਦੀ ਹੈ ਜੋ ਆਮ ਤੌਰ ’ਤੇ ਇਹ ਕੰਮ ਕਰਦੀ ਹੈ ਅਤੇ ਉਨ੍ਹਾਂ ਦੇ ਲਈ ਆਪਣੀ ਪੁਸ਼ਟੀ ਨੂੰ ਵਿਖਾਉਂਦਾ ਹੈ। ਉਸ ਦੀ ਪਤਨੀ ਉਸ ਨੂੰ ਇੱਕ ਸੇਵਕ ਦੇ ਵਾਂਗ ਨਹੀਂ ਵੇਖੇਗੀ ਸਗੋਂ ਹੋਰ ਆਦਰਯੋਗ ਵਿਅਕਤੀ ਦੇ ਰੂਪ ਵਿੱਚ ਵੇਖੇਗੀ।

ਜੇ ਲੋਕ ਝਿਜਕਦੇ ਹੋਏ ਅਤੇ ਕ੍ਰਿੱਝਦੇ ਹੋਏ ਮਦਦ ਕਰਦੇ ਹਾਂ, ਉਹ ਵਿਖਾਉਂਦੇ ਹਨ ਕਿ ਉਨ੍ਹਾਂ ਨੂੰ ਮਦਦ ਕਰਨ ਦੇ ਲਈ ਮਜ਼ਬੂਰ ਕੀਤਾ ਜਾ ਰਿਹਾ ਹੈ। ਉਨ੍ਹਾਂ ਦਾ ਸੇਵਾ ਦਾ ਕੰਮ ਪਿਆਰ ਨੂੰ ਪਰਗਟ ਨਹੀਂ ਕਰਦਾ ਹੈ। ਜੇ ਉਹ ਸੇਵਾ ਦੇ ਕੰਮ ਖੁਸ਼ੀ ਨਾਲ ਕਰਦੇ ਹਨ ਅਤੇ ਆਪਣੀ ਉੱਤਮ ਕੋਸ਼ਿਸ਼ ਕਰਦੇ ਹਾਂ, ਤਾਂ ਇਹ ਵਿਖਾਉਂਦਾ ਹੈ ਕਿ ਉਹ ਆਪ ਸੇਵਾ ਕਰਨ ਦੀ ਚੋਣ ਕਰ ਰਹੇ ਹਨ, ਕਿਉਂਕਿ ਕੋਈ ਵੀ ਉਨ੍ਹਾਂ ਨੂੰ ਇਸ ਤਰ੍ਹਾਂ ਸੇਵਾ ਕਰਨ ਲਈ ਮਜ਼ਬੂਰ ਨਹੀਂ ਕਰ ਸਕਦਾ। ਇਹ ਖੁਸ਼ੀ ਨਾਲ ਕੀਤੀ ਗਈ ਸੇਵਾ ਉਨ੍ਹਾਂ ਦੇ ਪਿਆਰ ਨੂੰ ਸਪਸ਼ਟ ਰੂਪ ਵਿੱਚ ਵਿਖਾਉਂਦੀ ਹੈ। ਇਹ ਉਨ੍ਹਾਂ ਦੇ ਪਿਆਰੇ ਤੋਂ ਆਦਰ ਪ੍ਰਾਪਤ ਕਰਨ ਵਿੱਚ ਵੀ ਮਦਦ ਕਰਦੀ ਹੈ।

► ਕਦੋਂ ਤੁਹਾਡੇ ਲਈ ਆਪਣੇ ਪਰਿਵਾਰ ਦੀ ਸੇਵਾ ਕਰਨਾ ਸਭ ਤੋਂ ਜ਼ਿਆਦਾ ਮੁਸ਼ਕਲ ਹੁੰਦਾ ਹੈ? ਸੇਵਾ ਬਾਰੇ ਇਹ ਸੋਚਣਾ ਕਿ ਇਹ ਪਿਆਰ ਦਾ ਇੱਕ ਪਰਗਟਾਵਾ ਹੈ, ਕਿਸ ਤਰ੍ਹਾਂ ਸੇਵਾ ਬਾਰੇ ਤੁਹਾਡੇ ਨਜ਼ਰੀਏ ਨੂੰ ਬਦਲਦਾ ਹੈ?

ਜਿਹੜੇ ਲੋਕਾਂ ਦੀ ਪਿਆਰ ਦੀ ਮੁੱਖ ਭਾਸ਼ਾ ਸਰੀਰਕ ਸਪਰਸ਼ ਹੈ ਉਹ ਉਦੋਂ ਸਭ ਤੋਂ ਜ਼ਿਆਦਾ ਪਿਆਰੇ ਮਹਿਸੂਸ ਕਰਦੇ ਹਨ ਜਦੋਂ ਉਨ੍ਹਾਂ ਨੂੰ ਉਨ੍ਹਾਂ ਦੇ ਪਰਿਵਾਰਕ ਮੈਂਬਰਾਂ ਦੁਆਰਾ ਸਪਰਸ਼ ਕੀਤਾ ਜਾਂਦਾ ਹੈ।

ਸਰੀਰਕ ਸਪਰਸ਼ ਦੇ ਦੁਆਰਾ ਸਨੇਹ ਵਿਖਾਉਣ ਦੇ ਵੱਖ-ਵੱਖ ਢੰਗ ਹਨ। ਕੁਝ ਢੰਗ ਕੁਝ ਰਿਸ਼ਤਿਆਂ ਅਤੇ ਕੁਝ ਹਾਲਾਤਾਂ ਵਿੱਚ ਉਚਿੱਤ ਹਨ ਪਰ ਹੋਰ ਰਿਸ਼ਤਿਆਂ ਵਿੱਚ ਉਚਿੱਤ ਨਹੀਂ ਹਨ। ਇੱਥੇ ਕੁਝ ਉਦਾਹਰਣਾਂ ਹਨ:

• ਇੱਕ ਦੂਸਰੇ ਨੂੰ ਜੱਫੀ ਪਾਉਣਾ

• ਕਿਸੇ ਦੀ ਪਿੱਠ ਜਾਂ ਮੋਢੇ ਦੇ ਦੁਆਲੇ ਆਪਣੀ ਬਾਂਹ ਰੱਖਣਾ

• ਕਿਸੇ ਦੇ ਮੋਢਿਆਂ ਉੱਤੇ ਆਪਣੇ ਹੱਥਾਂ ਨੂੰ ਰੱਖਣਾ

• ਕਿਸੇ ਦੀ ਪਿੱਠ ਜਾਂ ਮੋਢੇ ਨੂੰ ਥਪ-ਥਪਾਉਣਾ

• ਇਕੱਠੇ ਬੈਠਣਾ

• ਇੱਕ ਦੂਸਰੇ ਦੇ ਹੱਥ ਫੜ੍ਹਨਾ

• ਇੱਕ ਦੂਸਰੇ ਨੂੰ ਚੁੰਮਣਾ

• ਪਿੱਠ ਦੀ ਮਾਲਿਸ਼ ਕਰਨਾ

• ਇੱਕ ਬੱਚੇ ਨੂੰ ਚੁੱਕਣਾ

• ਇੱਕ ਬੱਚੇ ਦੇ ਵਾਲਾਂ ਨੂੰ ਸਵਾਰਨਾ ਜਾਂ ਕੰਘੀ ਕਰਨਾ

• ਜਦੋਂ ਕੋਈ ਬੀਮਾਰ ਹੈ ਜਾਂ ਸਰੀਰਕ ਤੌਰ ’ਤੇ ਕਮਜ਼ੋਰ ਹੈ ਤਾਂ ਉਸ ਦੀ ਨਰਮਾਈ ਦੇ ਨਾਲ ਦੇਖਭਾਲ ਕਰਨਾ

ਜਦੋਂ ਕੋਈ ਇੱਕ ਮੁਸ਼ਕਲ ਸਮੇਂ ਦੇ ਵਿੱਚੋਂ ਲੰਘ ਰਿਹਾ ਹੁੰਦਾ ਹੈ ਤਦ ਸਰੀਰਕ ਸਪਰਸ਼ ਖਾਸ ਕਰਕੇ ਅਰਥਪੂਰਣ ਹੋ ਸਕਦਾ ਹੈ। ਦੁੱਖ, ਦਰਦ, ਇਕੱਲੇਪਣ, ਜਾਂ ਨਿਰਾਸ਼ਾ ਦੇ ਸਮੇਂ, ਉਸ ਵਿਅਕਤੀ ਦੇ ਲਈ ਇੱਕ ਜੱਫੀ ਜ਼ਿਆਦਾ ਅਰਥਪੂਰਣ ਹੋ ਸਕਦੀ ਹੈ ਜਿਸ ਦੀ ਪਿਆਰ ਦੀ ਮੁੱਖ ਭਾਸ਼ਾ ਸਰੀਰਕ ਸਪਰਸ਼ ਹੈ, ਸ਼ਬਦਾਂ ਜਾਂ ਸੇਵਾ ਦੇ ਕੰਮਾਂ ਨਾਲੋਂ ਜ਼ਿਆਦਾ ਅਰਥਪੂਰਣ ਹੋਵੇਗੀ।

ਜਿਸ ਵਿਅਕਤੀ ਦੀ ਪਿਆਰ ਦੀ ਮੁੱਖ ਭਾਸ਼ਾ ਸਰੀਰਕ ਸਪਰਸ਼ ਹੈ, ਇਹ ਮਹੱਤਵਪੂਰਣ ਹੈ ਕਿ ਉਸ ਲਈ ਤੁਸੀਂ ਆਪਣੇ ਪਿਆਰ ਨੂੰ ਸਰੀਰਕ ਤੌਰ ’ਤੇ ਪਰਗਟ ਕਰਦੇ ਰਹੀ, ਜੇ ਸੰਭਵ ਹੋਵੇ ਤਾਂ ਤਦ ਵੀ ਜਦੋਂ ਉਹ ਬੀਮਾਰ ਹਨ। ਯਾਦ ਰੱਖੋ ਕਿ ਪਿਆਰ ਬਿਨਾਂ ਸ਼ਰਤ ਦੇ ਅਤੇ ਸਵੈ-ਤਿਆਗ ਕਰਨ ਵਾਲਾ ਹੁੰਦਾ ਹੈ। ਲੂਕਾ 15:20 ਵਿਚਲੇ ਪਿਤਾ ਨੇ ਆਪਣੇ ਤੋਬਾ ਕਰਨ ਵਾਲੇ ਪੁੱਤਰ ਨੂੰ ਜੱਫੀ ਪਾਈ ਅਤੇ ਚੁੰਮਿਆ, ਭਾਵੇਂ ਕਿ ਉਸ ਦੇ ਪੁੱਤਰ ਵਿੱਚ ਬਦਬੂ ਆ ਰਹੀ ਸੀ, ਉਹ ਗੰਦਾ ਸੀ, ਅਤੇ ਹਰ ਤਰੀਕੇ ਨਾਲ ਨਾ-ਪਿਆਰਾ ਸੀ।

ਜ਼ਰੂਰੀ ਨਹੀਂ ਹੈ ਸਰੀਰਕ ਸਪਰਸ਼ ਵਾਲੀ ਪਿਆਰ ਦੀ ਭਾਸ਼ਾ ਲਿੰਗਕ ਸੰਬੰਧਾਂ ਬਾਰੇ ਹੋਵੇ। ਲਿੰਗਕ ਕਿਰਿਆ ਸਪਰਸ਼ ਦੀ ਇੱਕ ਸ਼੍ਰੇਣੀ ਹੈ, ਪਰ ਜਿਸ ਵਿਅਕਤੀ ਦੀ ਪਿਆਰ ਦੀ ਮੁੱਖ ਭਾਸ਼ਾ ਸਰੀਰਕ ਸਪਰਸ਼ ਹੈ ਉਸ ਲਈ ਕੇਵਲ ਲਿੰਗਕ ਕਿਰਿਆ ਹੀ ਕਾਫ਼ੀ ਨਹੀਂ ਹੋਵੇਗੀ।

ਸਰੀਰਕ ਸਪਰਸ਼ ਦੇ ਦੁਆਰਾ ਪਿਆਰ ਨੂੰ ਮਹਿਸੂਸ ਕਰਨ ਦੀ ਇੱਛਾ ਇੱਕ ਵਿਅਕਤੀ ਨੂੰ ਅਨੈਤਿਕ ਲਿੰਗਕ ਕਿਰਿਆ ਦੇ ਲਈ ਪਰਤਾਵੇ ਵਿੱਚ ਪਾ ਸਕਦੀ ਹੈ। ਮਾਪਿਆਂ ਦੇ ਲਈ ਇਹ ਮਹੱਤਵਪੂਰਣ ਹੈ ਕਿ ਉਹ ਆਪਣੇ ਪੁੱਤਰਾਂ ਅਤੇ ਧੀਆਂ ਨੂੰ ਉਚਿੱਤ, ਗੈਰ-ਲਿੰਗਕ ਸਰੀਰਕ ਸਪਰਸ਼ ਦੇ ਕਾਫ਼ੀ ਪ੍ਰਗਟਾਵੇ ਦੇਣ, ਤਾਂ ਕਿ ਸਰੀਰਕ ਸਪਰਸ਼ ਲਈ ਉਨ੍ਹਾਂ ਦੇ ਬੱਚਿਆਂ ਨੂੰ ਪੂਰਾ ਕੀਤਾ ਜਾ ਸਕੇ। ਇੱਕ ਬੱਚਾ ਜੋ ਪਿਆਰਾ ਮਹਿਸੂਸ ਕਰਦਾ ਹੈ ਉਸ ਕੋਲ ਪਰਤਾਵੇ ਦਾ ਵਿਰੋਧ ਕਰਨ ਲਈ ਇੱਕ ਦ੍ਰਿੜ੍ਹ ਉਤਸ਼ਾਹ ਹੁੰਦਾ ਹੈ।

ਸਰੀਰਕ ਸਪਰਸ਼ ਦੇ ਪਾਪ

ਜਿਨ੍ਹਾਂ ਲਈ ਪਿਆਰ ਦੀ ਮੁੱਖ ਭਾਸ਼ਾ ਸਪਰਸ਼ ਹੈ, ਉਹ ਖਾਸ ਕਰਕੇ ਸਰੀਰਕ ਰੁੱਖੇਪਣ ਦੁਆਰਾ ਪੀੜਤ ਹੁੰਦੇ ਹਨ। ਕਿਸੇ ਨੂੰ ਗੁੱਸੇ ਦਾ ਨਾਲ ਮਾਰਨਾ (ਗਲਾਤੀਆਂ 5:20), ਕਿਸੇ ਦੀ ਬੇਇੱਜ਼ਤੀ ਕਰਨ ਲਈ ਉਸ ਦੇ ਮੂੰਹ ’ਤੇ ਥੱਪੜ ਮਾਰਨਾ (ਮੱਤੀ 5:39) ਜਾਂ ਅਧਿਕਾਰ ਦੀ ਦੁਰਵਰਤੋਂ ਕਰਦੇ ਹੋਏ ਕਿਸੇ ਨੂੰ ਕੁੱਟਣਾ (ਮੱਤੀ 24:48-49) ਬੁਰਾਈ ਹੈ। ਇਨ੍ਹਾਂ ਵਚਨਾਂ ਦੇ ਕਾਰਨ, ਅਸੀਂ ਜਾਣਦੇ ਹਾਂ ਕਿ ਮਾਪਿਆਂ ਕੋਲ ਕਦੇ ਵੀ ਆਪਣੇ ਬੱਚਿਆਂ ਨੂੰ ਚੋਟ ਪਹੁੰਚਾਉਣ ਦਾ ਹੱਕ ਨਹੀਂ ਹੈ, ਤਦ ਵੀ ਨਹੀਂ ਹੈ ਜਦੋਂ ਉਹ ਗੁੱਸਾ ਜਾਂ ਨਿਰਾਸ਼ਾ ਮਹਿਸੂਸ ਕਰਦੇ ਹਨ। ਪਰਮੇਸ਼ੁਰ ਇਹ ਵੀ ਆਖਦਾ ਹੈ ਕਿ ਮਾਪਿਆਂ ਨੂੰ ਮਾਰਨਾ ਵੀ ਬੱਚਿਆਂ ਦੇ ਲਈ ਬੁਰਾਈ ਹੈ (ਕੂਚ 21:15)।

ਸੁਧਾਰਨ ਦੇ ਮਕਸਦ ਨਾਲ ਅਤੇ ਧਾਰਮਿਕਤਾ ਵਿੱਚ ਨਿਰਦੇਸ਼ ਦੇ ਲਈ, ਮਾਪਿਆਂ ਵੱਲੋਂ ਨਰਮਾਈ ਦੇ ਆਤਮਾ ਨਾਲ ਬੱਚਿਆਂ ਨੂੰ ਦਿੱਤੀ ਗਈ ਢੁੱਕਵੀਂ, ਨਿਯੰਤਰਿਤ, ਸਰੀਰਕ ਤਾੜਨਾ (ਕੁਲੁੱਸੀਆਂ 3:21), ਪਾਪ ਨਹੀਂ ਹੈ। ਇਸ ਦੇ ਬਜਾਏ, ਪਰਮੇਸ਼ੁਰ ਮਾਪਿਆਂ ਦੇ ਕੋਲੋਂ ਇਹ ਮੰਗ ਕਰਦਾ ਹੈ, ਉਨ੍ਹਾਂ ਨੂੰ ਉਨ੍ਹਾਂ ਦੇ ਬੱਚਿਆਂ ਦੀਆਂ ਰੂਹਾਂ ਨੂੰ ਛੁਡਾਉਣ ਦੇ ਯੋਗ ਬਣਾਉਂਦੇ ਹੋਏ (ਕਹਾਉਤਾਂ 13:24, ਕਹਾਉਤਾਂ 19:18, ਕਹਾਉਤਾਂ 29:15, ਇਬਰਾਨੀਆਂ 12:5-7)।

ਸਾਰੀ ਲਿੰਗਕ ਅਨੈਤਿਕਤਾ ਅਤੇ ਸ਼ੋਸ਼ਣ, ਅਤੇ ਰਿਸ਼ਤਿਆਂ ਵਿੱਚ ਲਿੰਗਕ ਰਿਸ਼ਤੇ (ਲੇਵੀਆਂ ਦੀ ਪੋਥੀ 20:11-12, 14) ਵੀ ਬੁਰਾਈ ਹਨ।

ਲੋਕ ਹਮੇਸ਼ਾ ਆਪਣੀ ਪਿਆਰ ਦੀ ਮੁੱਖ ਭਾਸ਼ਾ ਦੇ ਬਾਰੇ ਜਾਗਰੂਕ ਨਹੀਂ ਹੁੰਦੇ ਹਨ। ਹੋ ਸਕਦਾ ਹੈ ਕਿ ਉਨ੍ਹਾਂ ਤਰੀਕਿਆਂ ਬਾਰੇ ਨਾ ਸੋਚਦੇ ਹੋਣ ਜਿਨ੍ਹਾਂ ਦੁਆਰਾ ਉਹ ਦੂਸਰਿਆਂ ਲਈ ਆਪਣੇ ਪਿਆਰ ਨੂੰ ਅਕਸਰ ਪਰਗਟ ਕਰਦੇ ਹਨ। ਹੋ ਸਕਦਾ ਹੈ ਕਿ ਉਹ ਇਸ ਬਾਰੇ ਨਾ ਜਾਣਦੇ ਹੋਣ ਕਿ ਅਜਿਹਾ ਕੀ ਹੈ ਜੋ ਦੂਸਰੇ ਕਰਦੇ ਹਨ ਜੋ ਉਨ੍ਹਾਂ ਨੂੰ ਪਿਆਰੇ ਮਹਿਸੂਸ ਕਰਾਉਂਦਾ ਹੈ। ਜੋ ਤੁਸੀਂ ਪਿਆਰ ਦੀਆਂ ਪੰਜ ਭਾਸ਼ਾਵਾਂ ਬਾਰੇ ਜਾਣਦੇ ਹੋ ਉਸ ’ਤੇ ਵਿਚਾਰ ਕਰਨ ਲਈ ਇੱਕ ਪਲ ਦਾ ਸਮਾਂ ਲਵੋ।

► ਪਿਆਰ ਦੀ ਕਿਹੜੀ ਭਾਸ਼ਾ ਦੇ ਨਾਲ ਤੁਸੀਂ ਜ਼ਿਆਦਾ ਸੁਭਾਵਕ ਢੰਗ ਨਾਲ ਅਤੇ ਅਕਸਰ ਦੂਸਰਿਆਂ ਲਈ ਆਪਣੇ ਪਿਆਰ ਨੂੰ ਪਰਗਟ ਕਰਦੇ ਹੋ?

► ਤੁਹਾਡ ਪਿਆਰ ਦੀ ਮੁੱਖ ਭਾਸ਼ਾ ਕਿਹੜੀ ਹੈ ਅਤੇ ਦੂਸਰੇ ਦਰਜੇ ਦੀ ਭਾਸ਼ਾ ਕਿਹੜੀ ਹੈ? ਜੇ ਤੁਹਾਨੂੰ ਇਹ ਸਮਝਣ ਵਿੱਚ ਮੁਸ਼ਕਲ ਆ ਰਹੀ ਹੈ ਕਿ ਪਿਆਰ ਦਾ ਕਿਹੜਾ ਪਰਗਟਾਵਾ ਤੁਹਾਡੇ ਲਈ ਸਭ ਤੋਂ ਜ਼ਿਆਦਾ ਮਹੱਤਵ ਰੱਖਦਾ ਹੈ, ਤਾਂ ਇੱਥੇ ਤੁਹਾਡੀ ਮਦਦ ਕਰਨ ਲਈ ਕੁਝ ਸਵਾਲ ਦਿੱਤੇ ਗਏ ਹਨ:

• ਉਨ੍ਹਾਂ ਚੀਜ਼ਾਂ ਦੀਆਂ ਕਿਹੜੀਆਂ ਉਦਾਹਰਣਾਂ ਹਨ ਜੋ ਤੁਹਾਨੂੰ ਖੁਸ਼ੀ ਦਿੰਦੀਆਂ ਹਨ?

• ਤੁਹਾਡੀਆਂ ਪਸੰਦੀਦਾ ਯਾਦਾਂ ਕਿਹੜੀਆਂ ਹਨ?

• ਤੁਸੀਂ ਕਿਸ ਗੱਲ ਬਾਰੇ ਸ਼ਕਾਇਤ ਕਰਦੇ ਹੋ (ਇੱਥੋਂ ਤਕ ਕਿ ਚੁੱਪਚਾਪ ਵੀ)?

• ਕੀ ਹੈ ਜੋ ਤੁਹਾਨੂੰ ਦੁਖੀ ਕਰਦਾ ਹੈ?

ਸਾਰੇ ਲੋਕਾਂ ਨੂੰ ਨਿਯਮਤ ਤੌਰ ’ਤੇ ਪਿਆਰ ਦੀਆਂ ਸਾਰੀਆਂ ਪੰਜ ਭਾਸ਼ਾਵਾਂ ਵਿੱਚ ਪਿਆਰ ਦੇ ਪ੍ਰਗਟਾਵੇ ਪ੍ਰਾਪਤ ਕਰਨ ਦੀ ਲੋੜ ਹੁੰਦੀ ਹੈ, ਪਰ ਬੱਚਿਆਂ ਨੂੰ ਖਾਸ ਕਰਕੇ ਇਸ ਦੀ ਲੋੜ ਹੁੰਦੀ ਹੈ। ਸੰਤੁਲਿਤ, ਭਾਵਨਾਤਮਕ ਤੌਰ ’ਤੇ ਤੰਦਰੁਸਤ ਬੱਚੇ ਬਣਨ ਲਈ, ਉਨ੍ਹਾਂ ਨੂੰ ਲੋੜ ਹੈ ਕਿ ਉਨ੍ਹਾਂ ਨੂੰ ਲਗਾਤਾਰ ਅਤੇ ਵਾਰ-ਵਾਰ ਇਹ ਦੱਸਿਆ ਜਾਵੇ ਅਤੇ ਵਿਖਾਇਆ ਜਾਵੇ ਕਿ ਮਾਪੇ ਉਨ੍ਹਾਂ ਨੂੰ ਬਿਨਾਂ ਸ਼ਰਤ ਦੇ ਪਿਆਰ ਕਰਦੇ ਹਨ। ਜਦੋਂ ਮਾਪੇ ਹਰ ਦਿਨ ਕਈ ਵਾਰ ਆਪਣੇ ਬੱਚਿਆਂ ਦੇ ਲਈ ਵੱਖ-ਵੱਖ ਤਰੀਕਿਆਂ ਨਾਲ ਆਪਣੇ ਪਿਆਰ ਨੂੰ ਪਰਗਟ ਕਰਦੇ ਹਨ, ਇਹ ਉਨ੍ਹਾਂ ਦੇ ਬੱਚਿਆਂ ਦੇ ਦਿਲਾਂ ਦੀ ਮਿੱਟੀ ਉੱਤੇ ਨਰਮ, ਪੋਸ਼ਣ ਦੇਣ ਵਾਲੇ ਮੀਂਹ ਦੇ ਵਾਂਗ ਹੁੰਦਾ ਹੈ।

ਇਸ ਬਾਰੇ ਅਨੁਮਾਨ ਨਾ ਲਗਾਓ ਕਿ ਤੁਹਾਡੇ ਬੱਚੇ ਉਨ੍ਹਾਂ ਲਈ ਤੁਹਾਡੇ ਪਿਆਰ ਨੂੰ ਜਾਣਦੇ ਹਨ ਅਤੇ ਮਹਿਸੂਸ ਕਰਦੇ ਹਨ। ਜ਼ਰੂਰੀ ਹੈ ਕਿ ਉਹ ਵਾਰ-ਵਾਰ ਅਤੇ ਨਿਯਮਤ ਤੌਰ ’ਤੇ ਉਨ੍ਹਾਂ ਲਈ ਤੁਹਾਡੇ ਪਿਆਰ ਨੂੰ ਪਿਆਰ ਦੀਆਂ ਦੂਸਰੀਆਂ ਭਾਸ਼ਾਵਾਂ ਦੇ ਨਾਲ-ਨਾਲ ਉਨ੍ਹਾਂ ਲਈ ਪਿਆਰ ਦੀ ਮੁੱਖ ਭਾਸ਼ਾ ਦੇ ਵਿੱਚ ਪਰਗਟ ਹੁੰਦਾ ਵੇਖਣ।

ਬੱਚੇ ਦੀ ਪਿਆਰ ਦੀ ਮੁੱਖ ਭਾਸ਼ਾ ਨੂੰ ਨਿਰਧਾਰਤ ਕਰਨਾ

ਗੈਰੀ ਚਾਪਮੈਨ ਅਤੇ ਰੋਸ ਕੈਮਬੈਲ, ਇਸ ਲਈ ਇਨ੍ਹਾਂ ਵਿਚਾਰਾਂ ਨੂੰ ਦੱਸਦੇ ਹਨ ਕਿ ਤੁਸੀਂ ਕਿਵੇਂ ਆਪਣੇ ਬੱਚੇ ਦੀ ਪਿਆਰ ਦੀ ਮੁੱਖ ਭਾਸ਼ਾ ਨੂੰ ਖੋਜ ਸਕਦੇ ਹੋ:[1]

1. ਧਿਆਨ ਦੇਵੋ ਕਿ ਤੁਹਾਡਾ ਬੱਚਾ ਤੁਹਾਡੇ ਲਈ ਪਿਆਰ ਨੂੰ ਕਿਵੇਂ ਪਰਗਟ ਕਰਦਾ ਹੈ।

2. ਧਿਆਨ ਦੇਵੋ ਕਿ ਤੁਹਾਡਾ ਬੱਚਾ ਦੂਸਰਿਆਂ ਲਈ ਪਿਆਰ ਨੂੰ ਕਿਵੇਂ ਪਰਗਟ ਕਰਦਾ ਹੈ।

3. ਸੁਣੋ ਕਿ ਤੁਹਾਡਾ ਬੱਚਾ ਅਕਸਰ ਕਿਸ ਚੀਜ਼ ਲਈ ਬੇਨਤੀ ਕਰਦਾ ਹੈ।

4. ਧਿਆਨ ਦੇਵੋ ਕਿ ਤੁਹਾਡਾ ਬੱਚਾ ਅਕਸਰ ਕਿਸ ਚੀਜ਼ ਬਾਰੇ ਸ਼ਕਾਇਤ ਕਰਦਾ ਹੈ।

5. ਆਪਣੇ ਬੱਚੇ ਨੂੰ ਦੋ ਵਿਕਲਪਾਂ ਦੇ ਵਿੱਚ ਚੋਣ ਕਰਨ ਦਿਓ।

ਹੋ ਸਕਦਾ ਹੈ ਕਿ ਪੰਜ ਸਾਲ ਦੀ ਉਮਰ ਤੋਂ ਪਹਿਲਾਂ ਬੱਚੇ ਲਈ ਪਿਆਰ ਦੀ ਮੁੱਖ ਭਾਸ਼ਾ ਨੂੰ ਨਿਰਧਾਰਤ ਕਰਨਾ ਸੰਭਵ ਨਾ ਹੋਵੇ।

ਬੱਚਿਆਂ ਲਈ ਪਿਆਰ ਦੀਆਂ ਭਾਸ਼ਾਵਾਂ ਬਾਰੇ ਵਿਸ਼ੇਸ਼ ਨੋਟਸ

ਇੱਥੇ ਅਸੀਂ ਪਿਆਰ ਦੀ ਹਰੇਕ ਭਾਸ਼ਾ ਬਾਰੇ ਵਿਸਥਾਰ ਨਾਲ ਗੱਲ ਨਹੀਂ ਕਰਾਂਗੇ ਕਿਉਂਕਿ ਅਸੀਂ ਹਰੇਕ ਬਾਰੇ ਪਹਿਲਾਂ ਹੀ ਚਰਚਾ ਕੀਤੀ ਹੈ। ਇਸ ਦੇ ਬਜਾਏ, ਅਸੀਂ ਬੱਚਿਆਂ ਲਈ ਪਿਆਰ ਵਿਖਾਉਣ ਦੇ ਕੁਝ ਵਿਸ਼ੇਸ਼ ਪ੍ਰਗਟਾਵਿਆਂ ਅਤੇ ਉਪਯੋਗਾਂ ਉੱਤੇ ਧਿਆਨ ਦੇਵਾਂਗੇ।

ਪੁਸ਼ਟੀ ਦੇ ਸ਼ਬਦ

ਜਦੋਂ ਕੋਈ ਅਕਸਰ ਗਲਤ ਕਰ ਰਿਹਾ ਹੁੰਦਾ ਹੈ ਜਾਂ ਚੰਗਾ ਪ੍ਰਦਰਸ਼ਨ ਨਹੀਂ ਕਰ ਰਿਹਾ ਹੁੰਦਾ, ਤਦ ਪੁਸ਼ਟੀ ਦੇਣਾ ਖਾਸ ਕਰਕੇ ਮੁਸ਼ਕਲ ਲੱਗਦਾ ਹੈ। ਪਰ ਜੇ ਤੁਸੀਂ ਬੋਲਣ ਲਈ ਕੁਝ ਗੰਭੀਰ ਅਤੇ ਪੁਸ਼ਟੀ ਦੇਣ ਵਾਲਾ ਭਾਲ ਸਕਦੇ ਹੋ ਤਾਂ ਇਹ ਤੁਹਾਡੇ ਬੱਚਿਆਂ ਨੂੰ ਪ੍ਰੇਰਿਤ ਕਰੇਗਾ, ਅਤੇ ਇਸ ਦੀ ਜ਼ਿਆਦਾ ਸੰਭਾਵਨਾ ਹੈ ਕਿ ਉਹ ਉੱਨਤੀ ਕਰ ਸਕਣਗੇ।

ਮਹੱਤਵਪੂਰਣ ਸਮਾਂ ਇਕੱਠੇ ਬਿਤਾਉਣਾ

ਪਰਿਵਾਰਾਂ ਦੇ ਲਈ ਇਹ ਬਹੁਤ ਲਾਭਦਾਇਕ ਹੈ ਕਿ ਉਹ ਘੱਟੋ-ਘੱਟ ਦਿਨ ਵਿੱਚ ਇੱਕ ਵਾਰ ਇਕੱਠੇ ਖਾਣਾ ਖਾਣ ਅਤੇ ਇਸ ਸਮੇਂ ਦੌਰਾਨ ਇੱਕ ਦੂਸਰੇ ਨਾਲ ਗੱਲ ਕਰਨ ਉੱਤੇ ਧਿਆਨ ਦੇਣ।

ਜਿਹੜੇ ਪਰਿਵਾਰਾਂ ਦੇ ਵਿੱਚ ਜ਼ਿਆਦਾ ਬੱਚੇ ਹਨ, ਤਾਂ ਇੱਕ ਬੱਚੇ ਦੇ ਨਾਲ ਮਹੱਤਵਪੂਰਣ ਸਮਾਂ ਬਿਤਾਉਣ ਨੂੰ ਅਣਦੇਖਿਆ ਕਰ ਦੇਣਾ ਆਸਾਨ ਹੁੰਦਾ ਹੈ। ਹਾਲਾਂਕਿ, ਹਰ ਇੱਕ ਬੱਚੇ ਦੇ ਨਾਲ ਕੁਝ ਖਾਸ ਕਰਨ ਲਈ ਸਮਾਂ ਕੱਢਣਾ ਉਨ੍ਹਾਂ ਲਈ ਤੁਹਾਡੇ ਪਿਆਰ ਨੂੰ ਮਹਿਸੂਸ ਕਰਨ ਵਿੱਚ ਉਨ੍ਹਾਂ ਦੀ ਮਦਦ ਕਰੇਗਾ। ਹਰੇਕ ਬੱਚੇ ਦੇ ਨਾਲ ਇਕੱਲੇ ਸਮਾਂ ਬਿਤਾਉਣ ਦੇ ਨਾਲ ਉਨ੍ਹਾਂ ਨੂੰ ਆਪਣੇ ਨਿੱਜੀ ਵਿਚਾਰਾਂ ਨੂੰ ਸਾਂਝਾ ਕਰਨ ਦੇ ਲਈ ਇੱਕ ਸੁਰੱਖਿਅਤ ਮੌਕਾ ਮਿਲੇਗਾ ਜਿਨ੍ਹਾਂ ਵਿਚਾਰਾਂ ਨੂੰ ਆਪਣੇ ਭੈਣ-ਭਰਾਵਾਂ ਜਾਂ ਪਰਿਵਾਰ ਦੇ ਹੋਰ ਮੈਂਬਰਾਂ ਸਾਹਮਣੇ ਸਾਂਝਾ ਕਰਨ ਲਈ ਉਹ ਝਿਜਕਦੇ ਹੋਣਗੇ।

ਬਹੁਤ ਵਾਰ, ਬੱਚੇ ਅਚਾਨਕ ਆਪਣੀ ਮਾਂ ਜਾਂ ਆਪਣੇ ਪਿਤਾ ਦੇ ਨਾਲ ਇਕੱਲੇ ਸਮਾਂ ਬਿਤਾਉਣ ਦੇ ਲਈ ਬੇਨਤੀ ਕਰਨਗੇ। ਕਈ ਵਾਰ ਸੌਣ ਦੇ ਸਮੇਂ ਇੱਕ ਬੱਚਾ ਕਿਸੇ ਚੀਜ਼ ਬਾਰੇ ਗੱਲ ਕਰਨਾ ਚਾਹੇਗਾ ਜੋ ਉਨ੍ਹਾਂ ਦੇ ਦਿਲਾਂ ਉੱਤੇ ਇੱਕ ਬੋਝ ਹੈ। ਮਾਪਿਆਂ ਦੇ ਲਈ ਇਹ ਬਹੁਤ ਮਹੱਤਵਪੂਰਣ ਹੈ ਕਿ ਉਹ ਅਜਿਹੇ ਪਲਾਂ ਦੇ ਵਿੱਚ ਆਪਣੇ ਬੱਚਿਆਂ ਦੀ ਗੱਲ ਸੁਣਨ। ਬਹੁਤ ਵਾਰ, ਇੱਕ ਬੱਚਾ ਆਤਮਿਕ ਮਸਲੇ ਦੇ ਨਾਲ ਨਜਿੱਠ ਰਿਹਾ ਹੁੰਦਾ ਹੈ, ਅਤੇ ਆਪਣੀ ਮਾਂ ਜਾਂ ਆਪਣੇ ਪਿਤਾ ਕੋਲ ਨਿੱਜੀ ਤੌਰ ’ਤੇ ਆਉਣ ਦੁਆਰਾ, ਉਹ ਆਤਮਿਕ ਮਦਦ ਦੀ ਭਾਲ ਕਰ ਰਿਹਾ ਹੁੰਦਾ ਹੈ। ਅਜਿਹੇ ਸਮਿਆਂ ਵਿੱਚ ਮਾਪਿਆਂ ਦੇ ਕੋਲ ਇੱਕ ਵਿਸ਼ੇਸ਼ ਮੌਕਾ ਹੁੰਦਾ ਹੈ ਕਿ ਉਹ ਆਪਣੇ ਬੱਚਿਆਂ ਦੀ ਯਿਸੂ ਵੱਲ ਅਗਵਾਈ ਕਰ ਸਕਣ।

ਜਦੋਂ ਤੁਸੀਂ ਆਪਣੇ ਬੱਚਿਆਂ ਦੇ ਨਾਲ ਸਮਾਂ ਬਿਤਾਉਂਦੇ ਹੋ, ਤਾਂ ਉਨ੍ਹਾਂ ਤੋਂ ਅਜਿਹੇ ਸਵਾਲ ਪੁੱਛੋ ਜਿਨ੍ਹਾਂ ਲਈ ਵਿਸਥਾਰ ਨਾਲ ਜਵਾਬ ਦੇਣ ਦੀ ਲੋੜ ਹੁੰਦੀ ਹੈ, ਇਹ ਤੁਹਾਡੀ ਇਹ ਸਮਝਣ ਵਿੱਚ ਮਦਦ ਕਰੇਗਾ ਕਿ ਉਹ ਕਿਵੇਂ ਸੋਚ ਰਹੇ ਹਨ ਅਤੇ ਉਹ ਕੀ ਮਹਿਸੂਸ ਕਰ ਰਹੇ ਹਨ। ਵਿਸਥਾਰ ਸਹਿਤ ਜਵਾਬ ਵਾਲੇ ਸਵਾਲਾਂ ਦਾ ਜਵਾਬ “ਹਾਂ” ਜਾਂ “ਨਾਂਹ” ਦੇ ਨਾਲ ਨਹੀਂ ਦਿੱਤਾ ਜਾ ਸਕਦਾ। ਇਨ੍ਹਾਂ ਸਵਾਲਾਂ ਦੇ ਲਈ ਇੱਕ ਵਿਸ਼ੇਸ਼ ਉੱਤਰ ਨਹੀਂ ਹੁੰਦਾ ਹੈ। ਅਜਿਹੇ ਸਵਾਲ ਆਮ ਤੌਰ ’ਤੇ “ਕਿਉਂ...” “ਕਿਵੇਂ...” ਜਾਂ “ਕੀ...” ਦੇ ਨਾਲ ਸ਼ੁਰੂ ਹੁੰਦੇ ਹਨ। ਵਿਸਥਾਰ ਨਾਲ ਗੱਲਬਾਤ ਕਰਨ ਦੀ ਸ਼ੁਰੂਆਤ ਅਜਿਹੀਆਂ ਪੰਕਤੀਆਂ ਦੇ ਨਾਲ ਹੁੰਦੀ ਹੈ “ਮੈਨੂੰ... ਬਾਰੇ ਦੱਸੋ” ਜਾਂ “ਤੁਸੀਂ... ਬਾਰੇ ਕੀ ਸੋਚਦੇ ਹੋ।”

ਜਦੋਂ ਤੁਹਾਡਾ ਬੱਚਾ ਤੁਹਾਡੇ ਸਵਾਲਾਂ ਦੇ ਜਵਾਬ ਦਿੰਦਾ ਹੈ, ਉਨ੍ਹਾਂ ਦੇ ਜਵਾਬ ਨੂੰ ਧਿਆਨ ਨਾਲ ਸੁਣਨਾ ਯਕੀਨੀ ਬਣਾਓ ਅਤੇ ਢੁੱਕਵੇਂ ਢੰਗ ਨਾਲ ਜਵਾਬ ਦਿਓ। ਕੁਝ ਮਸਲਿਆਂ ਵਿੱਚ, ਤੁਸੀਂ ਫਾਲੋਅਪ ਦੇ ਲਈ ਸਵਾਲ ਪੁੱਛਣਾ ਚਾਹੋਗੇ। ਹੋਰ ਸਮਿਆਂ ’ਤੇ, ਤੁਸੀਂ ਇਹ ਯਕੀਨੀ ਬਣਾਉਣ ਲਈ ਸਪਸ਼ਟ ਕਰਨਾ ਚਾਹੋਗੇ ਕਿ ਤੁਸੀਂ ਉਹ ਸਮਝਦੇ ਹੋ ਜੋ ਉਹ ਸਮਝਾਉਣ ਦੀ ਕੋਸ਼ਿਸ਼ ਕਰ ਰਹੇ ਹਨ। ਕਈ ਵਾਰ ਤੁਹਾਨੂੰ ਉਸ ਵਿੱਚ ਉਨ੍ਹਾਂ ਦੀ ਪੁਸ਼ਟੀ ਕਰਨੀ ਚਾਹੀਦੀ ਹੈ ਜੋ ਉਹ ਸਮਝ ਰਹੇ ਹਨ ਜਾਂ ਮਹਿਸੂਸ ਕਰ ਰਹੇ ਹਨ। ਇਹ ਮਹੱਤਵਪੂਰਣ ਹੈ ਕਿ ਬੱਚਾ ਇਹ ਮਹਿਸੂਸ ਨਾ ਕਰੇ ਕਿ ਉਸ ਤੋਂ ਪੁੱਛਗਿੱਛ ਕੀਤੀ ਜਾ ਰਹੀ ਹੈ, ਪਰ ਇਹ ਕਿ ਗੱਲਬਾਤ ਸੁਭਾਵਕ ਹੋਵੇ। ਤੁਹਾਡਾ ਧਿਆਨ ਦੇ ਨਾਲ ਸੁਣਨਾ ਬੱਚੇ ਦੀ ਇਹ ਮਹਿਸੂਸ ਕਰਨ ਵਿੱਚ ਮਦਦ ਕਰੇਗਾ ਕਿ ਉਸ ਦੀ ਗੱਲ ਸੁਣੀ ਗਈ ਹੈ, ਉਸ ਨੂੰ ਮਹੱਤਵ ਦਿੱਤਾ ਗਿਆ ਹੈ, ਅਤੇ ਉਸ ਨੂੰ ਪਿਆਰ ਕੀਤਾ ਗਿਆ ਹੈ।

ਇੱਕ ਬੱਚੇ ਦੀ ਇੱਕ ਕਹਾਣੀ ਨੂੰ ਸੁਣਨ ਦੇ ਲਈ ਸਮਾਂ ਕੱਢਣਾ ਵੀ ਉਨ੍ਹਾਂ ਦੇ ਲਈ ਤੁਹਾਡੇ ਪਿਆਰ ਨੂੰ ਉਸ ਤਰੀਕੇ ਨਾਲ ਪਰਗਟ ਕਰਦਾ ਹੈ ਜੋ ਉਨ੍ਹਾਂ ਲਈ ਬਹੁਤ ਮਹੱਤਵਪੂਰਣ ਹੈ। ਬੱਚਿਆਂ ਨੂੰ ਕਹਾਣੀਆਂ ਸੁਣਾਉਣਾ ਜਾਂ ਉਨ੍ਹਾਂ ਲਈ ਕਿਤਾਬਾਂ ਨੂੰ ਪੜ੍ਹਨ ਵਾਸਤੇ ਸਮਾਂ ਕੱਢਣਾ ਵੀ ਮਹੱਤਵਪੂਰਣ ਸਮਾਂ ਇਕੱਠੇ ਬਿਤਾਉਣ ਦਾ ਇੱਕ ਅਦਭੁਤ ਤਰੀਕਾ ਹੈ।

ਮਿਲਕੇ ਗੇਮਾਂ ਖੇਡਣਾ ਜਾਂ ਮਜ਼ੇਦਾਰ ਪ੍ਰੋਜੈਕਟ ਉੱਤੇ ਮਿਲਕੇ ਕੰਮ ਕਰਨਾ ਬੱਚਿਆਂ ਦੇ ਨਾਲ ਮਹੱਤਵਪੂਰਣ ਸਮਾਂ ਬਿਤਾਉਣ ਦੇ ਹੋਰ ਤਰੀਕੇ ਹਨ।

ਕਈ ਮਾਪੇ ਆਪਣੇ ਬੱਚਿਆਂ ਦੇ ਨਾਲ ਲੋੜ ਅਨੁਸਾਰ ਸਮਾਂ ਨਹੀਂ ਬਿਤਾਉਂਦੇ ਹਨ। ਉਹ ਆਪਣੇ ਬੱਚਿਆਂ ਨੂੰ ਤੋਹਫ਼ੇ ਦੇਣ ਨਾਲ ਇਸ ਦੀ ਭਰਪਾਈ ਕਰਨ ਦੀ ਕੋਸ਼ਿਸ਼ ਕਰਦੇ ਹਨ। ਤੋਹਫ਼ੇ ਮਹੱਤਵਪੂਰਣ ਸਮਾਂ ਇਕੱਠੇ ਬਿਤਾਉਣ ਦਾ ਸਥਾਨ ਨਹੀਂ ਲੈ ਸਕਦੇ। ਬੱਚਿਆਂ ਨੂੰ ਆਪਣੇ ਮਾਪਿਆਂ ਦੇ ਨਾਲ ਜ਼ਿਆਦਾ ਸਮਾਂ ਬਿਤਾਉਣ ਦੀ ਲੋੜ ਹੁੰਦੀ ਹੈ, ਭਾਵੇਂ ਉਨ੍ਹਾਂ ਲਈ ਪਿਆਰ ਦੀ ਮੁੱਖ ਭਾਸ਼ਾ ਕੋਈ ਵੀ ਹੋਵੇ। ਤੋਹਫਿਆਂ ਦੀ ਕੋਈ ਵੀ ਗਿਣਤੀ, ਤੁਹਾਡੇ ਬੱਚਿਆਂ ਦੇ ਨਾਲ ਮਹੱਤਵਪੂਰਣ ਸਮਾਂ ਬਿਤਾਉਣ ਦਾ ਸਥਾਨ ਨਹੀਂ ਲਵੇਗੀ।

ਤੋਹਫ਼ੇ

ਬਹੁਤੇ ਮਾਪੇ ਆਪਣੇ ਬੱਚੇ ਲਈ ਕਦੇ ਹੀ ਕੋਈ ਖਿਡਾਉਣਾ ਜਾਂ ਕੋਈ ਦਿਲਚਸਪ ਕਿਤਾਬ ਖਰੀਦਦੇ ਹਨ, ਕਿਉਂਕਿ ਉਹ ਚੀਜ਼ਾਂ ਜ਼ਰੂਰੀ ਨਹੀਂ ਜਾਪਦੀਆਂ। ਇਹ ਚੀਜ਼ਾਂ ਪਿਆਰ ਦਾ ਇੱਕ ਪ੍ਰਗਟਾਵਾਂ ਹੋਣ ਤੋਂ ਇਲਾਵਾ, ਬੱਚੇ ਦੇ ਵਿਕਾਸ ਲਈ ਮਦਦਗਾਰ ਹੋ ਸਕਦੀਆਂ ਹਨ।

ਸੇਵਾ ਦੇ ਕੰਮ

ਸੇਵਾ ਦੇ ਕੰਮਾਂ ਵਿੱਚ ਆਪਣੇ ਬੱਚੇ ਦੇ ਲਈ ਪਿਆਰ ਨੂੰ ਪਰਗਟ ਕਰਨ ਵਾਸਤੇ ਕੁਝ ਸੁਝਾਅ:

• ਉਨ੍ਹਾਂ ਦੇ ਜਨਮ ਦਿਨ ਲਈ ਉਨ੍ਹਾਂ ਦਾ ਪਸੰਦੀਦਾ ਖਾਣਾ ਬਣਾਓ

• ਜਦੋਂ ਉਹ ਬੀਮਾਰ ਹਨ ਤਾਂ ਕੋਮਲਤਾ ਨਾਲ ਉਨ੍ਹਾਂ ਦੀ ਦੇਖਭਾਲ ਕਰੋ

• ਆਪਣੇ ਬੱਚੇ ਦੀ ਸਕੂਲ ਦੇ ਇੱਕ ਪ੍ਰੋਜੈਕਟ ਵਿੱਚ ਮਦਦ ਕਰੋ

• ਆਪਣੇ ਬੱਚੇ ਦੇ ਨਾਲ ਘਰ ਦੇ ਕੰਮ ਕਰੋ ਅਤੇ ਉਨ੍ਹਾਂ ਦੇ ਕਾਮ ਦੀ ਪ੍ਰਸ਼ੰਸ਼ਾ ਕਰੋ

• ਆਪਣੇ ਬੱਚੇ ਦੇ ਨਾਲ ਕਿਸੇ ਲਈ ਕੁਝ ਮਦਦਗਾਰ ਕਰੋ ਜੋ ਤੁਹਾਡੇ ਘਰ ਦਾ ਮੈਂਬਰ ਨਹੀਂ ਹੈ

ਸਰੀਰਕ ਸਪਰਸ਼

ਸਾਰੇ ਬੱਚਿਆਂ ਅਤੇ ਛੋਟਿਆਂ ਨੂੰ ਸਰੀਰਕ ਛੋਹ ਰਾਹੀਂ ਪਿਆਰ ਦਾ ਅਨੁਭਵ ਕਰਨਾ ਚਾਹੀਦਾ ਹੈ। ਬੱਚਿਆਂ ਦੀਆਂ ਵਿਹਾਰਕ ਜ਼ਰੂਰਤਾਂ ਹੁੰਦੀਆਂ ਹਨ, ਜਿਵੇਂ ਕਿ ਖੁਆਉਣਾ ਅਤੇ ਉਨ੍ਹਾਂ ਦੇ ਡਾਇਪਰ ਬਦਲਣਾ, ਪਰ ਉਨ੍ਹਾਂ ਨੂੰ ਚੁੱਕਣ, ਜੱਫੀ ਪਾਉਣ, ਪਿਆਰ ਕਰਨ ਅਤੇ ਚੁੰਮਣ ਦੀ ਵੀ ਜ਼ਰੂਰਤ ਹੁੰਦੀ ਹੈ। ਇਹ ਕੋਮਲ ਸਰੀਰਕ ਛੋਹ ਪਿਆਰ ਨੂੰ ਇਸ ਤਰੀਕੇ ਨਾਲ ਪਰਗਟ ਕਰਦੀ ਹੈ ਜਿਸ ਤਰ੍ਹਾਂ ਉਹ ਮਹਿਸੂਸ ਕਰਦੇ ਹਨ ਅਤੇ ਉਨ੍ਹਾਂ ਦੀ ਭਾਵਨਾਤਮਕ ਅਤੇ ਮਾਨਸਿਕ ਸਿਹਤ ਲਈ ਜ਼ਰੂਰੀ ਹੈ।

ਇੱਕ ਪਿਤਾ ਲਈ ਆਪਣੇ ਪੁੱਤਰਾਂ ਨਾਲ ਮਸਤੀ ਕਰਨਾ ਪਿਆਰ ਦਾ ਪ੍ਰਗਟਾਵਾ ਹੋ ਸਕਦਾ ਹੈ। ਮੁਕਾਬਲਾ ਦੁੱਖਦਾਇਕ, ਹਾਵੀ, ਕਾਬੂ ਤੋਂ ਬਾਹਰ, ਜਾਂ ਗੁੱਸੇ ਦਾ ਕਾਰਨ ਨਹੀਂ ਹੋਣਾ ਚਾਹੀਦਾ।

ਮਾਪਿਆਂ ਦੇ ਕੰਮਾਂ ਅਤੇ ਸ਼ਬਦਾਂ ਦੇ ਲੰਬੇ ਸਮੇਂ ਲਈ ਪ੍ਰਭਾਵ

ਮਾਪਿਆਂ ਨੂੰ ਆਪਣੇ ਬੱਚਿਆਂ ਨਾਲ ਆਪਣੇ ਵਿਹਾਰ ਵਿੱਚ ਪਰਮੇਸ਼ੁਰ ਦੀ ਮਿਸਾਲ ਦੀ ਪਾਲਣਾ ਕਰਨੀ ਚਾਹੀਦੀ ਹੈ। ਉਹ ਹਮੇਸ਼ਾ ਆਪਣੇ ਬੱਚਿਆਂ ਦੀ ਦੇਖਭਾਲ ਸੰਪੂਰਣ, ਸਵੈ-ਤਿਆਗ ਵਾਲੇ, ਬਿਨਾਂ ਸ਼ਰਤ ਦੇ ਪਿਆਰ ਨਾਲ ਕਰਦਾ ਹੈ। ਉਹ ਆਪਣੇ ਬੱਚਿਆਂ ਨੂੰ ਉਨ੍ਹਾਂ ਲਈ ਆਪਣੇ ਪਿਆਰ ਦੇ ਕਾਰਨ ਤਾੜਦਾ, ਸੁਧਾਰਦਾ ਹੈ ਅਤੇ ਸਿਖਲਾਈ ਦਿੰਦਾ ਹੈ (ਇਬਰਾਨੀਆਂ 12:5-7)। ਇਹ ਇੱਕ ਪਿਤਾ/ਬੱਚੇ ਦੇ ਰਿਸ਼ਤੇ ਦੇ ਸੰਦਰਭ ਵਿੱਚ ਹੈ ਕਿ ਉਹ ਵਿਸ਼ਵਾਸੀਆਂ ਦੇ ਜੀਵਨਾਂ ਵਿੱਚ ਉਨ੍ਹਾਂ ਨੂੰ ਆਪਣੇ ਵਰਗੇ ਬਣਾਉਣ ਲਈ ਕੰਮ ਕਰਦਾ ਹੈ (ਇਬਰਾਨੀਆਂ 12:10-11)।

ਮਾਪਿਆਂ ਦਾ ਆਪਣੇ ਬੱਚਿਆਂ ਲਈ ਪਿਆਰ, ਉਨ੍ਹਾਂ ਦੇ ਬੱਚਿਆਂ ਦੇ ਵਿਹਾਰ 'ਤੇ ਨਿਰਭਰ ਨਹੀਂ ਹੋਣਾ ਚਾਹੀਦਾ। ਬੇਸ਼ੱਕ, ਵਿਹਾਰ ਲਈ ਸਕਾਰਾਤਮਕ ਇਨਾਮ ਜਾਂ ਨਕਾਰਾਤਮਕ ਨਤੀਜੇ ਬੱਚਿਆਂ ਦੀ ਸਿਖਲਾਈ ਦਾ ਇੱਕ ਢੁਕਵਾਂ ਹਿੱਸਾ ਹਨ, ਪਰ ਪਿਆਰ ਦੇ ਪ੍ਰਗਟਾਵੇ ਵਿਹਾਰ ਦੇ ਕਾਰਣ ਨਹੀਂ ਦਿੱਤੇ ਜਾਣੇ ਚਾਹੀਦੇ ਜਾਂ ਵਿਹਾਰ ਦੇ ਕਾਰਣ ਰੋਕੇ ਨਹੀਂ ਜਾਣੇ ਚਾਹੀਦੇ।

ਜੇਕਰ ਇੱਕ ਬੱਚਾ ਆਪਣੇ ਮਾਪਿਆਂ ਦੇ ਬਿਨਾਂ ਸ਼ਰਤ ਦੇ ਪਿਆਰ ਦਾ ਅਨੁਭਵ ਲਗਾਤਾਰ ਕਰਦਾ ਹੈ, ਤਾਂ ਉਹ ਆਪਣੇ ਲਈ ਪਰਮੇਸ਼ੁਰ ਦੇ ਪਿਆਰ ਨੂੰ ਵਧੇਰੇ ਆਸਾਨੀ ਨਾਲ ਸਮਝੇਗਾ ਅਤੇ ਇਸ ’ਤੇ ਵਿਸ਼ਵਾਸ ਕਰੇਗਾ। ਹਾਲਾਂਕਿ, ਉਨ੍ਹਾਂ ਲਈ ਉਨ੍ਹਾਂ ਦੇ ਵੱਡੇ ਹੋ ਜਾਣ ਤੋਂ ਬਾਅਦ ਵੀ ਇੱਕ ਪਿਆਰ ਕਰਨ ਵਾਲੇ ਸਵਰਗੀ ਪਿਤਾ ਨੂੰ ਸਮਝਣਾ ਅਤੇ ਉਸ ਉੱਤੇ ਵਿਸ਼ਵਾਸ ਕਰਨਾ ਵਧੇਰੇ ਮੁਸ਼ਕਲ ਹੁੰਦਾ ਹੈ ਜਿਨ੍ਹਾਂ ਨਾਲ ਬੱਚਿਆਂ ਦੇ ਰੂਪ ਵਿੱਚ ਦੁਰਵਿਹਾਰ ਕੀਤਾ ਗਿਆ ਸੀ ਜਾਂ ਜਿਨ੍ਹਾਂ ਨੂੰ ਅਣਵੇਖਿਆ ਕੀਤਾ ਗਿਆ ਸੀ।

ਬੱਚਿਆਂ ਦੀ ਆਪਣੇ ਆਪ ਬਾਰੇ ਸਮਝ - ਖਾਸ ਕਰਕੇ ਵਿਅਕਤੀਗਤ ਤੌਰ 'ਤੇ ਉਨ੍ਹਾਂ ਦਾ ਮਹੱਤਵ - ਲਗਭਗ ਹਮੇਸ਼ਾ ਉਸ ਤੋਂ ਆਉਂਦੀ ਹੈ ਜੋ ਉਹ ਦੂਸਰਿਆਂ ਤੋਂ ਸੁਣਦੇ ਅਤੇ ਸਮਝਦੇ ਹਨ। ਉਨ੍ਹਾਂ ਦੇ ਮਾਪਿਆਂ ਦੇ ਕੰਮ ਅਤੇ ਸ਼ਬਦ ਸਭ ਤੋਂ ਪ੍ਰਭਾਵਸ਼ਾਲੀ ਹੁੰਦੇ ਹਨ, ਪਰ ਰਿਸ਼ਤੇਦਾਰਾਂ ਅਤੇ ਦੋਸਤਾਂ ਦਾ ਵੀ ਵੱਡਾ ਪ੍ਰਭਾਵ ਹੁੰਦਾ ਹੈ। ਬੱਚਿਆਂ ਨੂੰ ਪਿਆਰ ਦੇ ਪ੍ਰਗਟਾਵੇ ਮਿਲਦੇ ਹਨ ਜਾਂ ਨਹੀਂ ਜਿਨ੍ਹਾਂ ਦੀ ਉਨ੍ਹਾਂ ਨੂੰ ਲੋੜ ਹੁੰਦੀ ਹੈ, ਇਹ ਉਸ ਦਾ ਹਿੱਸਾ ਹੈ ਜੋ ਉਨ੍ਹਾਂ ਦੀ ਖੁਦ ਬਾਰੇ ਤਸਵੀਰ ਨੂੰ ਬਣਾਉਂਦਾ ਹੈ। ਜਦੋਂ ਬੱਚਿਆਂ ਤੋਂ ਪਿਆਰ ਨੂੰ ਰੋਕਿਆ ਜਾਂਦਾ ਹੈ, ਜਾਂ ਬੱਚੇ ਭਾਵਨਾਤਮਕ ਜਾਂ ਸਰੀਰਕ ਸ਼ੋਸ਼ਣ ਦਾ ਅਨੁਭਵ ਕਰਦੇ ਹਨ, ਤਾਂ ਇਹ ਉਨ੍ਹਾਂ ਦੇ ਖੁਦ ਦੇ ਮਹੱਤਵ ਪ੍ਰਤੀ ਉਨ੍ਹਾਂ ਦੇ ਨਜ਼ਰੀਏ ਨੂੰ ਇਸ ਤਰੀਕੇ ਨਾਲ ਨੁਕਸਾਨ ਪਹੁੰਚਾਉਂਦਾ ਹੈ ਜੋ ਉਨ੍ਹਾਂ ਦੇ ਪੂਰੇ ਜੀਵਨ ਨੂੰ ਪ੍ਰਭਾਵਿਤ ਕਰਦਾ ਹੈ।

ਮਾਪਿਆਂ ਦੇ ਸ਼ਬਦ ਬੱਚਿਆਂ ਦੀ ਉਨ੍ਹਾਂ ਦੇ ਆਪਣੇ ਬਾਰੇ ਸਮਝ ਨੂੰ ਪ੍ਰਭਾਵਿਤ ਕਰਦੇ ਹਨ। ਉਦਾਹਰਣ ਦੇ ਲਈ:

• ਪੁਸ਼ਟੀ ਦੇ ਸ਼ਬਦ: “ਤੁਹਾਡੇ ਐਨੀ ਮਿਹਨਤ ਕਰਨ ਕਰਨ ਲਈ ਮੈਨੂੰ ਤੁਹਾਡੇ ’ਤੇ ਮਾਣ ਹੈ! ਮੈਂ ਜਾਣਦਾ ਹਾਂ ਕਿ ਤੁਸੀਂ ਇਹ ਕਰ ਸਕਦੇ ਹੋ!” ਇਹ ਬੱਚਿਆਂ ਨੂੰ ਦੱਸਦਾ ਹੈ ਕਿ ਕੋਸ਼ਿਸ਼ ਮਹੱਤਵਪੂਰਣ ਹੈ, ਅਤੇ ਤੁਸੀਂ ਵਿਸ਼ਵਾਸ ਕਰਦੇ ਹੋ ਕਿ ਉਹ ਪ੍ਰਾਪਤੀਆਂ ਕਰਨ ਵਾਲੇ ਬਣ ਸਕਦੇ ਹਨ।

• ਵਿਨਾਸ਼ਕਾਰੀ ਸ਼ਬਦ: “ਤੁਸੀਂ ਬਹੁਤ ਆਲਸੀ ਹੋ। ਮੈਂ ਕਿਸੇ ਵੀ ਚੀਜ਼ ਲਈ ਤੁਹਾਡੇ ’ਤੇ ਭਰੋਸਾ ਨਹੀਂ ਕਰ ਸਕਦਾ!” ਇਹ ਇੱਕ ਬੱਚੇ ਨੂੰ ਇਹ ਵਿਸ਼ਵਾਸ ਕਰਨ ਲਈ ਪ੍ਰੇਰਿਤ ਕਰ ਸਕਦਾ ਹੈ ਕਿ ਉਹ ਬਦਲਣ ਦੇ ਯੋਗ ਨਹੀਂ ਹਨ; ਇਸ ਦਾ ਕੋਈ ਕਾਰਨ ਨਹੀਂ ਹੈ ਕਿ ਉਨ੍ਹਾਂ ਨੂੰ ਬਦਲਣ ਜਾਂ ਤੁਹਾਡਾ ਆਦਰ ਪਾਉਣ ਦੀ ਕੋਸ਼ਿਸ਼ ਕਰਨੀ ਚਾਹੀਦੀ ਹੈ, ਕਿਉਂਕਿ ਤੁਸੀਂ ਪਹਿਲਾਂ ਹੀ ਉਨ੍ਹਾਂ ਲਈ ਹਾਰ ਮੰਨ ਲਈ ਹੈ। ਇਹ ਬੱਚਿਆਂ ਨੂੰ ਮਹਿਸੂਸ ਕਰਵਾ ਸਕਦਾ ਹੈ ਕਿ ਤੁਸੀਂ ਉਨ੍ਹਾਂ ਨੂੰ ਰੱਦ ਕਰ ਦਿੱਤਾ ਹੈ।

• ਪੁਸ਼ਟੀ ਦੇ ਸ਼ਬਦ: “ਇਹ ਠੀਕ ਹੈ। ਅਸੀਂ ਸਾਰੇ ਕਈ ਵਾਰ ਗਲਤੀਆਂ ਕਰਦੇ ਹਾਂ, ਅਤੇ ਫਿਰ ਅਸੀਂ ਸਿੱਖਦੇ ਹਾਂ ਕਿ ਅਗਲੀ ਵਾਰ ਬਿਹਤਰ ਕਿਵੇਂ ਕਰਨਾ ਹੈ।” ਇਹ ਬੱਚਿਆਂ ਨੂੰ ਦੱਸਦਾ ਹੈ ਕਿ ਗਲਤੀਆਂ ਕਰਨਾ ਸੁਰੱਖਿਅਤ ਹੈ—ਉਨ੍ਹਾਂ ਲਈ ਤੁਹਾਡਾ ਪਿਆਰ ਉਨ੍ਹਾਂ ਦੇ ਸਿੱਧ ਪ੍ਰਦਰਸ਼ਨ 'ਤੇ ਨਿਰਭਰ ਨਹੀਂ ਹੈ। ਇਹ ਬੱਚਿਆਂ ਨੂੰ ਇਹ ਵੀ ਦੱਸਦਾ ਹੈ ਕਿ ਉਨ੍ਹਾਂ ਨੂੰ ਵਧਣ ਦੇ ਯੋਗ ਹੋਣ ਦੀ ਉਮੀਦ ਕਰਨੀ ਚਾਹੀਦੀ ਹੈ, ਕੋਸ਼ਿਸ਼ ਕਰਦੇ ਰਹਿਣ ਦਾ ਇੱਕ ਕਾਰਨ ਹੁੰਦਾ ਹੈ।

• ਵਿਨਾਸ਼ਕਾਰੀ ਸ਼ਬਦ: “ਤੁਸੀਂ ਬਹੁਤ ਮੂਰਖ ਹੋ। ਤੁਸੀਂ ਹਮੇਸ਼ਾ ਗੜਬੜ ਕਰਦੇ ਹੋ।” ਇਹ ਇੱਕ ਬੱਚੇ ਨੂੰ ਇਹ ਵਿਸ਼ਵਾਸ ਕਰਨ ਲਈ ਪ੍ਰੇਰਿਤ ਕਰ ਸਕਦਾ ਹੈ ਕਿ ਕੋਸ਼ਿਸ਼ ਕਰਨਾ ਨਿਰਾਸ਼ਾਜਨਕ ਹੈ। ਇਹ ਉਨ੍ਹਾਂ ਨੂੰ ਆਸਾਨੀ ਨਾਲ ਦੱਸ ਸਕਦਾ ਹੈ ਕਿ ਉਨ੍ਹਾਂ ਦਾ ਮਹੱਤਵ ਉਨ੍ਹਾਂ ਦੇ ਸਿੱਧ ਪ੍ਰਦਰਸ਼ਨ 'ਤੇ ਨਿਰਭਰ ਕਰਦਾ ਹੈ; ਅਤੇ ਕਿਉਂਕਿ ਉਹ ਹਮੇਸ਼ਾ ਗੜਬੜ ਕਰਦੇ ਹਨ, ਉਹ ਕਦੇ ਵੀ ਮਹੱਤਵਪੂਰਣ ਬਣਨ ਦੇ ਯੋਗ ਨਹੀਂ ਹੋਣਗੇ। ਉਹ ਕਦੇ ਵੀ ਪਿਆਰ ਪ੍ਰਾਪਤ ਕਰਨ ਦੇ ਯੋਗ ਨਹੀਂ ਹੋਣਗੇ... ਤੁਹਾਡੇ ਤੋਂ ਜਾਂ ਕਿਸੇ ਹੋਰ ਤੋਂ।

ਇੱਕ ਬੱਚੇ ਦੀ ਆਪਣੇ ਆਪ ਨੂੰ ਇੱਕ ਵਿਅਕਤੀ ਵਜੋਂ ਸਮਝਣ ਦੀ ਸਮਰੱਥਾ ਉਸ ਪਿਆਰ ਦੁਆਰਾ ਆਕਾਰ ਵਿੱਚ ਆਉਂਦੀ ਹੈ ਜੋ ਉਸ ਨੂੰ ਦਿੱਤਾ ਜਾਂਦਾ ਹੈ ਜਾਂ ਉਸ ਤੋਂ ਰੋਕਿਆ ਜਾਂਦਾ ਹੈ। ਦੂਸਰਿਆਂ ਨਾਲ ਸਿਹਤਮੰਦ ਤਰੀਕਿਆਂ ਨਾਲ ਰਿਸ਼ਤੇ ਬਣਾਉਣ ਦੀ ਉਸ ਦੀ ਯੋਗਤਾ, ਜਾਂ ਤਾਂ ਉਸ ਦੇ ਮਾਪਿਆਂ ਨਾਲ ਉਸ ਦੇ ਰਿਸ਼ਤੇ ਦੁਆਰਾ ਵਿਕਸਤ ਹੁੰਦੀ ਹੈ ਜਾਂ ਅਪਾਹਜ ਹੁੰਦੀ ਹੈ। ਜਿਸ ਬੱਚੇ ਨੂੰ ਚੰਗੀ ਤਰ੍ਹਾਂ ਪਿਆਰ ਕੀਤਾ ਜਾਂਦਾ ਹੈ ਉਹ ਦੂਸਰੇ ਲੋਕਾਂ ਨੂੰ ਸਵੈ-ਤਿਆਗ ਵਾਲੇ, ਬਿਨਾਂ ਸ਼ਰਤ ਦੇ ਪਿਆਰ ਨਾਲ ਪਿਆਰ ਕਰਨਾ ਸਿੱਖ ਸਕਦਾ ਹੈ। ਉਸ ਕੋਲ ਪਿਆਰ ਦਾ ਭੰਡਾਰ ਵੀ ਹੈ, ਜਿਸ ਤੋਂ ਲਿਆ ਜਾ ਸਕਦਾ ਹੈ।

ਅਸਲੀ ਪਿਆਰ ਬੱਚਿਆਂ ਲਈ ਭਾਵਨਾਤਮਕ ਈਂਧਣ ਹੈ, ਜਿਵੇਂ ਕਿ ਇਹ ਬਾਲਗਾਂ ਲਈ ਹੈ।

ਭਰੇ ਹੋਏ ਭਾਵਨਾਤਮਕ ਟੈਂਕ ਦੇ ਲਾਭ

ਬਹੁਤ ਸਾਰੇ ਤਰੀਕੇ ਹਨ ਜਿਨ੍ਹਾਂ ਦੁਆਰਾ ਬੱਚੇ ਭਾਵਨਾਤਮਕ ਈਂਧਣ ਦੇ ਭਰੇ ਹੋਏ ਟੈਂਕਾਂ ਦਾ ਲਾਭ ਉਠਾ ਸਕਦੇ ਹਨ। ਜਦੋਂ ਬੱਚੇ ਜਾਣਦੇ ਹਨ ਕਿ ਉਨ੍ਹਾਂ ਨੂੰ ਪਿਆਰ ਕੀਤਾ ਜਾਂਦਾ ਹੈ, ਤਾਂ ਉਨ੍ਹਾਂ ਕੋਲ ਚੁਣੌਤੀਆਂ ਦਾ ਸਾਹਮਣਾ ਕਰਨ ਅਤੇ ਸਹੀ ਢੰਗ ਨਾਲ ਵਿਕਾਸ ਕਰਨ ਲਈ ਲੋੜੀਂਦੀ ਤਾਕਤ ਅਤੇ ਸਥਿਰਤਾ ਹੁੰਦੀ ਹੈ।

ਉਹ ਬੱਚੇ ਜੋ ਜਾਣਦੇ ਹਨ ਕਿ ਉਨ੍ਹਾਂ ਨੂੰ ਬਿਨਾਂ ਸ਼ਰਤ ਦੇ ਪਿਆਰ ਕੀਤਾ ਜਾਂਦਾ ਹੈ, ਉਹ ਭਾਵਨਾਤਮਕ ਤੌਰ 'ਤੇ ਸੁਰੱਖਿਅਤ ਹੁੰਦੇ ਹਨ। ਇਸ ਕਰਕੇ, ਉਹ ਆਪਣੇ ਮਾਪਿਆਂ ਵੱਲੋਂ ਅਨੁਸ਼ਾਸਨ, ਤਾੜਨਾ ਅਤੇ ਮਾਰਗਦਰਸ਼ਨ ਨੂੰ ਸਵੀਕਾਰ ਕਰਨ ਲਈ ਹੋਰ ਤਿਆਰ ਹੁੰਦੇ ਹਨ, ਜਿੰਨਾ ਕਿ ਉਹ ਇਸ ਦਾ ਉਲਟਾ ਕਰਨ ’ਤੇ ਨਹੀਂ ਹੁੰਦੇ। ਉਹ ਹਾਣੀਆਂ ਦੇ ਦਬਾਅ ਕਾਰਨ ਆਉਣ ਵਾਲੇ ਪਰਤਾਵੇ ਦਾ ਵਿਰੋਧ ਕਰਨ ਦੇ ਵੀ ਵਧੇਰੇ ਯੋਗ ਹੁੰਦੇ ਹਨ, ਕਿਉਂਕਿ ਉਹ ਇਸ ਗੱਲ ਵਿੱਚ ਸੁਰੱਖਿਅਤ ਹੁੰਦੇ ਹਨ ਕਿ ਉਹ ਕੌਣ ਹਨ ਅਤੇ ਉਨ੍ਹਾਂ ਨੂੰ ਦੂਸਰਿਆਂ ਸਾਹਮਣੇ ਆਪਣੇ ਆਪ ਨੂੰ ਸਾਬਤ ਕਰਨ ਦੀ ਜ਼ਰੂਰਤ ਨਹੀਂ ਹੁੰਦੀ।

ਇੱਕ ਕੁੜੀ ਜੋ ਆਮ ਤੌਰ 'ਤੇ ਲੜਕਿਆਂ ਨੂੰ ਛੇੜਦੀ ਹੈ, ਇਸ ਤਰ੍ਹਾਂ ਦਾ ਵਿਹਾਰ ਇਸ ਲਈ ਕਰ ਸਕਦੀ ਹੈ ਕਿਉਂਕਿ ਉਸ ਨੂੰ ਡਰ ਹੈ ਕਿ ਉਹ ਉਸ ਨੂੰ ਪਸੰਦ ਨਹੀਂ ਕਰਨਗੇ ਜਾਂ ਉਸ ਵੱਲ ਧਿਆਨ ਨਹੀਂ ਦੇਣਗੇ। ਇੱਕ ਕੁੜੀ ਜੋ ਲੜਕਿਆਂ ਨਾਲ ਸ਼ਰਮੀਲੀ ਹੈ, ਉਸ ਨੂੰ ਡਰ ਹੋ ਸਕਦਾ ਹੈ ਕਿ ਉਹ ਉਸਨੂੰ ਪਸੰਦ ਨਹੀਂ ਕਰਨਗੇ, ਜੇ ਉਹ ਸੱਚਮੁੱਚ ਆਪਣੀ ਸ਼ਖਸੀਅਤ ਨੂੰ ਪਰਗਟ ਕਰਦੀ ਹੈ। ਜਿਨ੍ਹਾਂ ਧੀਆਂ ਨੂੰ ਆਪਣੇ ਪਿਤਾਵਾਂ ਤੋਂ ਪੁਸ਼ਟੀ ਅਤੇ ਪਿਆਰ ਮਿਲਦਾ ਹੈ, ਉਹ ਲੜਕਿਆਂ ਨੂੰ ਛੇੜਨ ਜਾਂ ਸ਼ਰਮੀਲੇ ਹੋਣ ਤੋਂ ਬਿਨਾਂ ਚੰਗੇ ਤਰੀਕਿਆਂ ਨਾਲ ਗੱਲਬਾਤ ਕਰ ਸਕਦੀਆਂ ਹਨ। ਉਹ ਆਪਣੇ ਪਿਤਾ ਦੇ ਪਿਆਰ ਕਾਰਨ ਆਪਣੀ ਪਛਾਣ ਵਿੱਚ ਸੁਰੱਖਿਅਤ ਹਨ।

ਪਿਆਰ ਦੀਆਂ ਪੰਜ ਭਾਸ਼ਾਵਾਂ ਵਿੱਚ ਅਕਸਰ ਪਰਗਟ ਕੀਤਾ ਗਿਆ ਮਾਪਿਆਂ ਦਾ ਸੱਚਾ, ਬਿਨਾਂ ਸ਼ਰਤ ਦਾ ਪਿਆਰ ਬੱਚਿਆਂ ਨੂੰ ਬਹੁਤ ਨੁਕਸਾਨ ਤੋਂ ਬਚਾਉਂਦਾ ਹੈ। ਜਿਨ੍ਹਾਂ ਬੱਚਿਆਂ ਨੂੰ ਚੰਗੀ ਤਰ੍ਹਾਂ ਪਿਆਰ ਕੀਤਾ ਜਾਂਦਾ ਹੈ, ਉਹ ਆਮ ਤੌਰ ’ਤੇ ਉਨ੍ਹਾਂ ਦੂਸਰਿਆਂ ਤੋਂ ਪਿਆਰ ਅਤੇ ਸੁਰੱਖਿਆ ਨਹੀਂ ਭਾਲਦੇ ਜੋ ਉਨ੍ਹਾਂ ਨੂੰ ਨੁਕਸਾਨ ਪਹੁੰਚਾਉਣ ਦਾ ਇਰਾਦਾ ਰੱਖਦੇ ਹਨ।

ਸੰਖੇਪ ਵਿੱਚ, ਇੱਕ ਬੱਚੇ ਦੇ ਰੂਪ ਵਿੱਚ ਇੱਕ ਭਾਵਨਾਤਮਕ ਈਂਧਣ ਦੇ ਭਰੇ ਹੋਏ ਟੈਂਕ ਦੇ ਬਹੁਤ ਸਾਰੇ ਲਾਭ ਹਨ:

• ਕਿਸੇ ਦੇ ਮਹੱਤਵ ਅਤੇ ਇਸ ਦੇ ਸਰੋਤ ਬਾਰੇ ਸਹੀ ਸਮਝ

• ਕੋਸ਼ਿਸ਼ਾਂ, ਗਲਤੀਆਂ, ਵਿਕਾਸ ਅਤੇ ਬਿਨਾਂ ਸ਼ਰਤ ਦੇ ਪਿਆਰ ਬਾਰੇ ਸਹੀ ਸਮਝ

• ਦੂਸਰਿਆਂ ਨੂੰ ਚੰਗੀ ਤਰ੍ਹਾਂ ਪਿਆਰ ਕਰਨਾ ਸਿੱਖਣ ਦੀ ਯੋਗਤਾ

• ਚੁਣੌਤੀਆਂ ਦਾ ਸਾਹਮਣਾ ਕਰਨ ਅਤੇ ਸਹੀ ਢੰਗ ਨਾਲ ਵਿਕਾਸ ਕਰਨ ਲਈ ਤਾਕਤ ਅਤੇ ਸਥਿਰਤਾ

• ਭਾਵਨਾਤਮਕ ਸੁਰੱਖਿਆ

• ਅਨੁਸ਼ਾਸਨ, ਸੁਧਾਰ ਅਤੇ ਮਾਰਗਦਰਸ਼ਨ ਨੂੰ ਸਵੀਕਾਰ ਕਰਨ ਦੀ ਯੋਗਤਾ

• ਸਾਥੀਆਂ ਦੇ ਗਲਤ ਪ੍ਰਭਾਵਾਂ ਨੂੰ ਰੱਦ ਕਰਨ ਦੀ ਯੋਗਤਾ

• ਭਵਿੱਖ ਦੇ ਰਿਸ਼ਤਿਆਂ ਵਿੱਚ ਦੁਰਵਿਹਾਰ ਹੋਣ ਦੀ ਸੰਭਾਵਨਾ ਦਾ ਘੱਟ ਹੋਣਾ

• ਜਿਹੜੇ ਬੱਚਿਆਂ ਨੂੰ ਚੰਗਾ ਪਿਆਰ ਮਿਲਦਾ ਹੈ ਤੁਸੀਂ ਉਨ੍ਹਾਂ ਨੂੰ ਹੋਰ ਕਿਹੜੇ ਤਰੀਕਿਆਂ ਨਾਲ ਲਾਭ ਉਠਾਉਂਦੇ ਵੇਖਿਆ ਹੈ?

ਇੱਕ ਖਾਲੀ ਭਾਵਨਾਤਮਕ ਟੈਂਕ ਦੇ ਨੁਕਸਾਨ

ਜਿਹੜੇ ਬੱਚੇ ਪਿਆਰ ਮਹਿਸੂਸ ਨਹੀਂ ਕਰਦੇ, ਉਹ ਅਗਵਾਈ ਦਾ ਵਿਰੋਧ ਕਰ ਸਕਦੇ ਹਨ ਕਿਉਂਕਿ ਉਨ੍ਹਾਂ ਵਿੱਚ ਆਪਣੀ ਮਾਂ ਜਾਂ ਪਿਤਾ ਨੂੰ ਖੁਸ਼ ਕਰਨ ਦੀ ਪ੍ਰੇਰਣਾ ਦੀ ਘਾਟ ਹੁੰਦੀ ਹੈ। ਭਾਵਨਾਤਮਕ ਈਂਧਣ ਦੇ ਇੱਕ ਭਰੇ ਹੋਏ ਟੈਂਕ ਤੋਂ ਬਿਨਾਂ, ਬਹੁਤ ਸਾਰੇ ਬੱਚਿਆਂ ਵਿੱਚ ਉਸ ਮਾਤਾ ਜਾਂ ਪਿਤਾ ਨਾਲ ਵਫ਼ਾਦਾਰੀ ਦੇ ਮਜ਼ਬੂਤ, ਸਕਾਰਾਤਮਕ ਰਿਸ਼ਤੇ ਦੀ ਘਾਟ ਹੁੰਦੀ ਹੈ ਜੋ ਉਨ੍ਹਾਂ ਦੀ ਅਗਵਾਈ ਕਰਨ ਦੀ ਕੋਸ਼ਿਸ਼ ਕਰ ਰਿਹਾ ਹੈ।

ਜਿਨ੍ਹਾਂ ਬੱਚਿਆਂ ਦੇ ਭਾਵਨਾਤਮਕ ਈਂਧਣ ਦੇ ਟੈਂਕ ਖਾਲੀ ਹੁੰਦੇ ਹਨ, ਉਹ ਉਨ੍ਹਾਂ ਬੱਚਿਆਂ ਦੇ ਨਾਲੋਂ ਸ਼ੋਸ਼ਣ ਲਈ ਜ਼ਿਆਦਾ ਕਮਜ਼ੋਰ ਹੁੰਦੇ ਹਨ ਜਿਨ੍ਹਾਂ ਬੱਚਿਆਂ ਦੇ ਪਰਿਵਾਰਕ ਮੈਂਬਰਾਂ ਨਾਲ ਸਿਹਤਮੰਦ, ਪਿਆਰ ਭਰੇ ਰਿਸ਼ਤੇ ਹੁੰਦੇ ਹਨ। ਕਿਉਂਕਿ ਉਹ ਪਿਆਰ ਮਹਿਸੂਸ ਨਹੀਂ ਕਰਦੇ, ਇਸ ਲਈ ਉਹ ਉਨ੍ਹਾਂ ਲੋਕਾਂ ਤੋਂ ਪਿਆਰ ਦੀ ਮੰਗ ਕਰ ਸਕਦੇ ਹਨ ਜੋ ਉਨ੍ਹਾਂ ਨੂੰ ਵਰਤਣਾ ਚਾਹੁੰਦੇ ਹਨ ਜਾਂ ਉਨ੍ਹਾਂ ਨੂੰ ਨੁਕਸਾਨ ਪਹੁੰਚਾਉਣਾ ਚਾਹੁੰਦੇ ਹਨ।

ਇਨ੍ਹਾਂ ਪਾਠਾਂ ਵਿੱਚ ਅਸੀਂ ਪਿਆਰ ਦੀਆਂ ਪੰਜ ਮੁੱਖ ਭਾਸ਼ਾਵਾਂ ਬਾਰੇ ਸਿੱਖਿਆ ਹੈ। ਭਾਵੇਂ ਵਿਅਕਤੀਆਂ ਕੋਲ ਆਮ ਤੌਰ 'ਤੇ ਇੱਕ ਜਾਂ ਦੋ ਪਿਆਰ ਦੀਆਂ ਮੁੱਖ ਭਾਸ਼ਾਵਾਂ ਹੁੰਦੀਆਂ ਹਨ, ਪਰ ਹਰੇਕ ਵਿਅਕਤੀ ਨੂੰ ਨਿਯਮਿਤ ਤੌਰ 'ਤੇ ਪੰਜਾਂ ਤਰੀਕਿਆਂ ਨਾਲ ਪਿਆਰ ਪ੍ਰਾਪਤ ਕਰਨ ਦੀ ਜ਼ਰੂਰਤ ਹੁੰਦੀ ਹੈ। ਇੱਕ ਸਿਹਤਮੰਦ ਪਰਿਵਾਰ ਉਹ ਹੁੰਦਾ ਹੈ ਜਿਸ ਵਿੱਚ ਹਰੇਕ ਵਿਅਕਤੀ ਜਾਣਬੁੱਝ ਕੇ ਰੋਜ਼ਾਨਾ ਸਕਾਰਾਤਮਕ ਸ਼ਬਦ ਬੋਲ ਕੇ, ਮਹੱਤਵਪੂਰਣ ਸਮਾਂ ਇਕੱਠੇ ਬਿਤਾ ਕੇ, ਸੇਵਾ ਕਰਕੇ ਅਤੇ ਪਿਆਰ ਭਰਿਆ ਸਪਰਸ਼ ਕਰਕੇ, ਦੂਸਰਿਆਂ ਨਾਲ ਆਪਣੇ ਰਿਸ਼ਤਿਆਂ ਨੂੰ ਪੋਸ਼ਣ ਦਿੰਦਾ ਹੈ। ਇੱਕ ਦੂਸਰੇ ਨੂੰ ਤੋਹਫ਼ੇ ਹਰ ਰੋਜ਼ ਨਹੀਂ ਦਿੱਤੇ ਜਾ ਸਕੇ ਪਰ ਫਿਰ ਵੀ ਇਹ ਪਰਿਵਾਰ ਦੇ ਅੰਦਰ ਸਿਹਤਮੰਦ ਰਿਸ਼ਤਿਆਂ ਦਾ ਇੱਕ ਮਹੱਤਵਪੂਰਣ ਹਿੱਸਾ ਹੈ।

► ਤੁਹਾਡੇ ਪਰਿਵਾਰ ਵਿੱਚ ਪਿਆਰ ਸਭ ਤੋਂ ਵੱਧ ਕਿਵੇਂ ਪਰਗਟ ਕੀਤਾ ਜਾਂਦਾ ਹੈ? ਕੀ ਪਿਆਰ, ਪਿਆਰ ਦੀਆਂ ਪੰਜਾਂ ਭਾਸ਼ਾਵਾਂ ਵਿੱਚ ਪ੍ਰਗਟ ਕੀਤਾ ਜਾਂਦਾ ਹੈ? ਪਿਆਰ ਦੇ ਪ੍ਰਗਟਾਵੇ ਕਿੰਨੀ ਵਾਰ ਸਾਂਝੇ ਕੀਤੇ ਜਾਂਦੇ ਹਨ?

14,000 ਪਰਿਵਾਰਾਂ ’ਤੇ 25 ਸਾਲਾਂ ਵਿੱਚ ਕੀਤੇ ਗਏ ਇੱਕ ਗੈਰ-ਧਾਰਮਿਕ ਅਧਿਐਨ ਨੇ ਵਿਖਾਇਆ ਹੈ ਕਿ ਵੱਖ-ਵੱਖ ਸੱਭਿਆਚਾਰਕ ਪਿਛੋਕੜ ਵਾਲੇ ਬਹੁਤ ਸਾਰੇ ਸਿਹਤਮੰਦ, ਸਫਲ ਅਤੇ ਸੰਤੁਲਿਤ ਪਰਿਵਾਰਾਂ ਵਿੱਚ ਛੇ ਗੁਣ ਸਾਂਝੇ ਹੁੰਦੇ ਹਨ।[1] ਇਨ੍ਹਾਂ ਵਿੱਚੋਂ ਕੁਝ ਗੁਣ ਸਿੱਧੇ ਤੌਰ 'ਤੇ ਪਿਆਰ ਦੀਆਂ ਵੱਖ-ਵੱਖ ਭਾਸ਼ਾਵਾਂ ਨਾਲ ਸਬੰਧਤ ਹਨ, ਜੋ ਪਿਆਰ ਦੇ ਵੱਖ-ਵੱਖ ਪ੍ਰਗਟਾਵਿਆਂ ਦੇ ਮਹੱਤਵ ’ਤੇ ਜ਼ੋਰ ਦਿੰਦੇ ਜਾਪਦੇ ਹਨ। ਸਟਿੰਨੇਟ ਅਤੇ ਬੀਮ ਨੇ ਹਰੇਕ ਲਈ ਉਨ੍ਹਾਂ ਛੇ ਗੁਣਾਂ ਅਤੇ ਵਰਣਨਾਂ ਨੂੰ ਸੂਚੀਬੱਧ ਕੀਤਾ:

1. ਸਮਰਪਣ। ਮਜ਼ਬੂਤ ਪਰਿਵਾਰਾਂ ਦੇ ਮੈਂਬਰ ਇੱਕ ਦੂਸਰੇ ਦੀ ਭਲਾਈ ਅਤੇ ਖੁਸ਼ੀ ਨੂੰ ਉਤਸ਼ਾਹਿਤ ਕਰਨ ਲਈ ਸਮਰਪਿਤ ਹੁੰਦੇ ਹਨ। ਉਹ ਪਰਿਵਾਰ ਦੀ ਏਕਤਾ ਨੂੰ ਮਹੱਤਵ ਦਿੰਦੇ ਹਨ।

2. ਪ੍ਰਸ਼ੰਸ਼ਾ ਅਤੇ ਪਿਆਰ। ਮਜ਼ਬੂਤ ਪਰਿਵਾਰਾਂ ਦੇ ਮੈਂਬਰ ਅਕਸਰ ਇੱਕ ਦੂਸਰੇ ਦੀ ਪ੍ਰਸ਼ੰਸ਼ਾ ਕਰਦੇ ਹਨ। ਉਹ ਮਹਿਸੂਸ ਕਰ ਸਕਦੇ ਹਨ ਕਿ ਉਨ੍ਹਾਂ ਦਾ ਪਰਿਵਾਰ ਚੰਗਾ ਹੈ।

3. ਸਕਾਰਾਤਮਕ ਗੱਲਬਾਤ। ਚੰਗੇ ਪਰਿਵਾਰਾਂ ਦੇ ਮੈਂਬਰਾਂ ਕੋਲ ਵਧੀਆ ਗੱਲਬਾਤ ਕਰਨ ਦੇ ਹੁਨਰ ਹੁੰਦੇ ਹਨ ਅਤੇ ਉਹ ਇੱਕ ਦੂਸਰੇ ਨਾਲ ਗੱਲ ਕਰਨ ਵਿੱਚ ਬਹੁਤ ਸਮਾਂ ਬਿਤਾਉਂਦੇ ਹਨ।

4. ਮਹੱਤਵਪੂਰਣ ਸਮਾਂ ਇਕੱਠੇ ਬਿਤਾਉਣਾ। ਮਜ਼ਬੂਤ ਪਰਿਵਾਰ ਇੱਕ ਦੂਸਰੇ ਨਾਲ ਸਮਾਂ ਬਿਤਾਉਂਦੇ ਹਨ—ਖੁੱਲ੍ਹੇ ਦਿਲ ਨਾਲ ਵਧੀਆ ਸਮਾਂ ਬਿਤਾਉਂਦੇ ਹਨ।

5. ਆਤਮਿਕ ਤੰਦਰੁਸਤੀ। ਭਾਵੇਂ ਉਹ ਧਾਰਮਿਕ ਸੇਵਾਵਾਂ ਵਿੱਚ ਜਾਂਦੇ ਹਨ ਜਾਂ ਨਹੀਂ, ਮਜ਼ਬੂਤ ਪਰਿਵਾਰਾਂ ਵਿੱਚ ਇਹ ਭਾਵਨਾ ਹੁੰਦੀ ਹੈ ਕਿ ਜੀਵਨ ਵਿੱਚ ਇੱਕ ਵੱਡੀ ਭਲਾਈ ਜਾਂ ਸ਼ਕਤੀ ਹੁੰਦੀ ਹੈ। ਇਹ ਵਿਸ਼ਵਾਸ ਉਨ੍ਹਾਂ ਨੂੰ ਤਾਕਤ ਅਤੇ ਉਦੇਸ਼ ਦਿੰਦਾ ਹੈ।

6. ਤਣਾਅ ਅਤੇ ਸੰਕਟ ਨਾਲ ਸਿੱਝਣ ਦੀ ਯੋਗਤਾ। ਮਜ਼ਬੂਤ ਪਰਿਵਾਰਾਂ ਦੇ ਮੈਂਬਰ ਤਣਾਅ ਜਾਂ ਸੰਕਟ ਨੂੰ ਵਧਣ ਦੇ ਮੌਕਿਆਂ ਵਜੋਂ ਵੇਖਣ ਦੇ ਯੋਗ ਹੁੰਦੇ ਹਨ।

ਅਸੀਂ ਇਨ੍ਹਾਂ ਦੋ ਪਾਠਾਂ ਵਿੱਚ ਬਹੁਤ ਸਾਰੀਆਂ ਗੱਲਾਂ 'ਤੇ ਵਿਚਾਰ ਕੀਤਾ ਹੈ। ਅਸੀਂ ਸੱਚੇ ਪਿਆਰ ਬਾਰੇ ਚਰਚਾ ਨਾਲ ਸ਼ੁਰੂਆਤ ਕੀਤੀ ਸੀ, ਫਿਰ ਉਨ੍ਹਾਂ ਪੰਜ ਭਾਸ਼ਾਵਾਂ ਨੂੰ ਪਛਾਣਿਆ ਜਿਨ੍ਹਾਂ ਵਿੱਚ ਪਿਆਰ ਆਮ ਤੌਰ 'ਤੇ ਪਰਗਟ ਕੀਤਾ ਜਾਂਦਾ ਹੈ। ਅਸੀਂ ਭਾਵਨਾਤਮਕ ਈਂਧਣ ਟੈਂਕਾਂ ਬਾਰੇ ਸਿੱਖਿਆ ਅਤੇ ਸਾਡੇ ਪਰਿਵਾਰ ਦੇ ਮੈਂਬਰਾਂ ਨੂੰ ਉਨ੍ਹਾਂ ਲਈ ਪਿਆਰ ਦੀ ਮੁੱਖ ਭਾਸ਼ਾ ਵਿੱਚ, ਉਨ੍ਹਾਂ ਲਈ ਸਾਡੇ ਪਿਆਰ ਦਾ ਅਨੁਭਵ ਕਰਨ ਦੀ ਜ਼ਰੂਰਤ ਬਾਰੇ ਸਿੱਖਿਆ। ਅਸੀਂ ਇਸ ਬਾਰੇ ਗੱਲ ਕੀਤੀ ਕਿ ਕਿਵੇਂ ਇੱਕ ਪਰਿਵਾਰ ਦੇ ਅੰਦਰ ਸ਼ਖਸੀਅਤਾਂ ਦੇ ਵਿੱਚ ਭਿੰਨਤਾਵਾਂ ਸਾਡੇ ਪਿਆਰ ਵਿੱਚ ਵਧਣ ਦਾ ਕਾਰਨ ਬਣ ਸਕਦੀਆਂ ਹਨ।

ਇਸ ਤੋਂ ਬਾਅਦ, ਅਸੀਂ ਪਿਆਰ ਦੀਆਂ ਪੰਜ ਭਾਸ਼ਾਵਾਂ ਵਿੱਚੋਂ ਹਰੇਕ ਦੀ ਡੂੰਘਾਈ ਨਾਲ ਪੜਚੋਲ ਕੀਤੀ, ਹਰੇਕ ਦੀਆਂ ਉਦਾਹਰਣਾਂ ਨੂੰ ਵੇਖਿਆ, ਅਤੇ ਜਦੋਂ ਹਰੇਕ ਨੂੰ ਅਣਗੌਲਿਆ ਜਾਂਦਾ ਹੈ ਜਾਂ ਜਦੋਂ ਹਰੇਕ ਦੀ ਦੁਰਵਰਤੋਂ ਕੀਤੀ ਜਾਂਦੀ ਹੈ, ਤਾਂ ਉਸ ਤੋਂ ਹੋਣ ਵਾਲੇ ਨੁਕਸਾਨ ਬਾਰੇ ਜਾਣਿਆ। ਅਸੀਂ ਸਿੱਖਿਆ ਕਿ ਬੱਚਿਆਂ ਨੂੰ ਭਾਵਨਾਤਮਕ ਈਂਧਣ ਦੇ ਟੈਂਕ ਦੇ ਭਰੇ ਹੋਣ ਤੋਂ ਕਿਵੇਂ ਲਾਭ ਹੁੰਦਾ ਹੈ, ਅਤੇ ਜਦੋਂ ਉਨ੍ਹਾਂ ਦੇ ਟੈਂਕ ਖਾਲੀ ਹੋ ਜਾਂਦੇ ਹਨ ਤਾਂ ਉਨ੍ਹਾਂ ਨੂੰ ਕਿਵੇਂ ਦੁੱਖ ਹੁੰਦਾ ਹੈ। ਅਸੀਂ ਆਪਣੇ ਬੱਚਿਆਂ ਲਈ ਆਪਣਾ ਪਿਆਰ ਪਰਗਟ ਕਰਨ ਬਾਰੇ ਹੋਰ ਵਿਸਥਾਰ ਵਿੱਚ ਗੱਲ ਕੀਤੀ। ਫਿਰ, ਅਸੀਂ ਵੇਖਿਆ ਕਿ ਪਿਆਰ ਦੀਆਂ ਪੰਜ ਭਾਸ਼ਾਵਾਂ ਦਾ ਅਭਿਆਸ ਸਿਹਤਮੰਦ ਪਰਿਵਾਰਾਂ ਦੇ ਛੇ ਸਾਂਝੇ ਗੁਣਾਂ ਨਾਲ ਕਿਵੇਂ ਜੁੜਿਆ ਹੋਇਆ ਹੈ।

ਜਿਵੇਂ ਹੀ ਅਸੀਂ ਇਨ੍ਹਾਂ ਪਾਠਾਂ ਨੂੰ ਸਮਾਪਤ ਕਰਦੇ ਹਾਂ, ਅਸੀਂ ਤੁਹਾਡੀ ਨਿੱਜੀ ਜ਼ਿੰਮੇਵਾਰੀ ਬਾਰੇ ਚਰਚਾ ਕਰਾਂਗੇ - ਤੁਸੀਂ ਕੀ ਕਰ ਸਕਦੇ ਹੋ ਅਤੇ ਜੋ ਤੁਸੀਂ ਸਿੱਖਿਆ ਹੈ ਉਸ ਨਾਲ ਤੁਹਾਨੂੰ ਕੀ ਕਰਨਾ ਚਾਹੀਦਾ ਹੈ।

(1) ਤੁਸੀਂ ਆਪਣੇ ਪਰਿਵਾਰ ਦੇ ਲਈ ਜ਼ਿੰਮੇਵਾਰ ਹੋ।

ਤੁਹਾਨੂੰ ਇਹ ਉਡੀਕ ਕੀਤੇ ਬਿਨਾਂ ਕਿ ਤੁਹਾਡੇ ਪਰਿਵਾਰ ਦੇ ਮੈਂਬਰ ਤੁਹਾਨੂੰ ਪਿਆਰ ਕਰਨ, ਕਿਸੇ ਵੀ ਤਰੀਕੇ ਨਾਲ ਬਦਲਣ ਲਈ ਤਿਆਰ ਰਹਿਣਾ ਚਾਹੀਦਾ ਹੈ। ਸੱਚਾ ਪਿਆਰ ਉਦੋਂ ਤੱਕ ਉਡੀਕ ਨਹੀਂ ਕਰਦਾ ਜਦੋਂ ਤੱਕ ਦੂਸਰਾ ਵਿਅਕਤੀ ਤੁਹਾਨੂੰ ਪਿਆਰ ਨਹੀਂ ਵਿਖਾਉਂਦਾ। ਇਹ ਉਦੋਂ ਵੀ ਆਪਣੇ ਆਪ ਨੂੰ ਪਰਗਟ ਕਰਦਾ ਹੈ ਜਦੋਂ ਦੂਸਰਾ ਵਿਅਕਤੀ ਸਭ ਤੋਂ ਘੱਟ ਯੋਗ ਜਾਪਦਾ ਹੈ, ਕਿਉਂਕਿ ਪਿਆਰ ਪ੍ਰਾਪਤ ਕਰਨ ਵਾਲੇ ਦੀ ਯੋਗਤਾ 'ਤੇ ਅਧਾਰਤ ਨਹੀਂ ਹੁੰਦਾ।

(2) ਤੁਸੀਂ ਆਪਣੇ ਪਰਿਵਾਰ ਲਈ ਆਪਣੇ ਪਿਆਰ ਨੂੰ ਉਨ੍ਹਾਂ ਤਰੀਕਿਆਂ ਨਾਲ ਪਰਗਟ ਕਰਨ ਵਾਸਤੇ ਆਪਣੀ ਪੂਰੀ ਕੋਸ਼ਿਸ਼ ਕਰਨ ਲਈ ਜ਼ਿੰਮੇਵਾਰ ਹੋ, ਜੋ ਤਰੀਕੇ ਉਨ੍ਹਾਂ ਲਈ ਸਭ ਤੋਂ ਮਹੱਤਵਪੂਰਣ ਹਨ।

ਇਹ ਸੰਭਾਵਨਾ ਹੈ ਕਿ ਤੁਹਾਨੂੰ ਇੱਕ ਜਾਂ ਇੱਕ ਤੋਂ ਵੱਧ ਭਾਸ਼ਾਵਾਂ ਵਿੱਚ ਪਿਆਰ ਦਿਖਾਉਣ ਲਈ ਵਾਧੂ ਕੋਸ਼ਿਸ਼ ਕਰਨੀ ਪਵੇਗੀ ਜੋ ਤੁਹਾਡੇ ਕੋਲ ਸੁਭਾਵਕ ਤੌਰ ’ਤੇ ਨਹੀਂ ਹੁੰਦੀਆਂ। ਪਹਿਲਾਂ, ਪਿਆਰ ਦੇ ਕੁਝ ਪ੍ਰਗਟਾਵੇ ਤੁਹਾਨੂੰ ਗੈਰ-ਕੁਦਰਤੀ, ਅਜੀਬ ਜਾਂ ਮੂਰਖਤਾਪੂਰਣ ਲੱਗ ਸਕਦੇ ਹਨ।

ਆਪਣੇ ਪਰਿਵਾਰ ਦੇ ਮੈਂਬਰਾਂ ਲਈ ਪਿਆਰ ਵਿਖਾਉਣ ਦੇ ਮੌਕਿਆਂ ’ਤੇ ਧਿਆਨ ਦੇਣਾ ਸਿੱਖੋ। ਇਸ ਗੱਲ ਪ੍ਰਤੀ ਸੁਚੇਤ ਰਹੋ ਕਿ ਤੁਹਾਡੇ ਪਰਿਵਾਰ ਦੇ ਮੈਂਬਰਾਂ ਨੂੰ ਕਿਸੇ ਸਮੇਂ ’ਤੇ ਕੀ ਲੋੜ ਹੋ ਸਕਦੀ ਹੈ। ਇੱਥੇ ਪਿਆਰ ਦੀ ਹਰੇਕ ਭਾਸ਼ਾ ਲਈ ਕੁਝ ਉਦਾਹਰਣਾਂ ਹਨ:

• ਪੁਸ਼ਟੀ ਦੇ ਸ਼ਬਦ: ਸੋਚੋ, "_____ ਸ਼ਾਇਦ ਉਸ ਨੇ ਜੋ ਕਿਹਾ ਉਸ ਬਾਰੇ ਅਨਿਸ਼ਚਿਤ ਮਹਿਸੂਸ ਹੋ ਰਿਹਾ ਹੈ। ਪਰ ਉਸ ਨੇ ਜੋ ਕਿਹਾ ਉਸ ਵਿੱਚ ਉਹ ਸਹੀ ਸੀ। ਮੈਨੂੰ ਕੁਝ ਪੁਸ਼ਟੀ ਕਰਨ ਵਾਲੀ ਗੱਲ ਆਖਣ ਦੀ ਲੋੜ ਹੈ।"

• ਮਹੱਤਵਪੂਰਣ ਸਮਾਂ ਇਕੱਠੇ ਬਿਤਾਉਣਾ: ਪੁੱਛੋ, "ਕੀ ਤੁਸੀਂ ਇਸ ਬਾਰੇ ਗੱਲ ਕਰਨਾ ਚਾਹੋਗੇ?" ਫਿਰ ਜੋ ਤੁਸੀਂ ਕਰ ਰਹੇ ਹੋ ਉਸ ਨੂੰ ਬੰਦ ਕਰ ਦਿਓ, ਉਨ੍ਹਾਂ ਵੱਲ ਆਪਣਾ ਪੂਰਾ ਧਿਆਨ ਦਿਓ, ਅਤੇ ਆਪਣੀ ਸਰੀਰਕ ਭਾਸ਼ਾ ਨਾਲ ਦਿਖਾਓ ਕਿ ਤੁਸੀਂ ਸੱਚਮੁੱਚ ਸੁਣ ਰਹੇ ਹੋ।

• ਤੋਹਫ਼ੇ: ਜਦੋਂ ਤੁਸੀਂ ਉਨ੍ਹਾਂ ਨੂੰ ਤੋਹਫ਼ਾ ਦਿੰਦੇ ਹੋ ਤਾਂ ਆਖੋ, "ਮੈਂ ਇਹ ਵੇਖਿਆ ਅਤੇ ਇਸ ਨੇ ਮੈਨੂੰ ਤੁਹਾਡੇ ਬਾਰੇ ਸੋਚਣ ਲਈ ਮਜਬੂਰ ਕਰ ਦਿੱਤਾ।"

• ਸੇਵਾ ਦੇ ਕੰਮ: ਉਤਸ਼ਾਹ ਦੇ ਨਾਲ ਪੁੱਛੋ, "ਕੀ ਮੈਂ ਤੁਹਾਡੇ ਇਹ ਲਿਆਵਾਂ?" ਜਾਂ "ਕੀ ਮੈਂ ਇਸ ਵਿੱਚ ਤੁਹਾਡੀ ਮਦਦ ਕਰ ਸਕਦਾ ਹਾਂ?"

• ਸਰੀਰਕ ਸਪਰਸ਼: ਉਨ੍ਹਾਂ ਕੋਲ ਜਾਓ ਅਤੇ ਆਖੋ, "ਤੁਹਾਨੂੰ ਵੇਖ ਕੇ ਲੱਗ ਰਿਹਾ ਹੈ ਕਿ ਤੁਹਾਨੂੰ ਜੱਫੀ ਪਾ ਲਵਾਂ" ਜਦੋਂ ਤੁਸੀਂ ਉਨ੍ਹਾਂ ਦੇ ਦੁਆਲੇ ਆਪਣੀਆਂ ਬਾਹਾਂ ਪਾਉਂਦੇ ਹੋ।

(3) ਤੁਸੀਂ ਆਪਣੀਆਂ ਭਾਵਨਾਵਾਂ ਲਈ ਜ਼ਿੰਮੇਵਾਰ ਹੋ।

ਪਰਮੇਸ਼ੁਰ ਨੇ ਤੁਹਾਨੂੰ ਇਸ ਤਰ੍ਹਾਂ ਬਣਾਇਆ ਹੈ ਕਿ ਤੁਹਾਨੂੰ ਦੂਸਰਿਆਂ ਨਾਲ ਸਿਹਤਮੰਦ ਰਿਸ਼ਤਿਆਂ ਵਿੱਚ ਰਹਿਣ ਦੀ ਲੋੜ ਹੈ। ਪਰ ਭਾਵੇਂ ਇਹ ਸੰਭਵ ਹੋਵੇ ਜਾਂ ਨਾ, ਪਰਮੇਸ਼ੁਰ ਖੁਦ ਤੁਹਾਡਾ ਅੰਤਮ ਸਰੋਤ ਅਤੇ ਅੰਤਮ ਸੰਤੁਸ਼ਟੀ ਹੈ। ਤੁਹਾਡਾ ਪਰਿਵਾਰ ਤੁਹਾਡੀ ਭਾਵਨਾਤਮਕ ਤੰਦਰੁਸਤੀ ਲਈ ਅੰਤਮ ਤੌਰ 'ਤੇ ਜ਼ਿੰਮੇਵਾਰ ਨਹੀਂ ਹੈ। ਪਰਮੇਸ਼ੁਰ ਤੁਹਾਨੂੰ ਪੂਰੀ ਤਰ੍ਹਾਂ ਪਿਆਰ ਕਰਦਾ ਹੈ, ਭਾਵੇਂ ਹੋਰ ਕੋਈ ਕਦੇ ਵੀ ਅਜਿਹਾ ਪਿਆਰ ਨਹੀਂ ਕਰ ਸਕਦਾ। ਉਹ ਤੁਹਾਡੀ ਕਿਸੇ ਵੀ ਕਮੀ ਨੂੰ ਪੂਰਾ ਕਰ ਸਕਦਾ ਹੈ, ਜਦੋਂ ਤੁਸੀਂ ਉਸ ਦੇ ਪਿਆਰ ਵਿੱਚ ਬਣੇ ਰਹਿੰਦੇ ਹੋ (ਯੂਹੰਨਾ 15:9-11)।

ਸ਼ਾਇਦ ਤੁਹਾਡਾ ਪਰਿਵਾਰ ਤੁਹਾਡੀ ਪਿਆਰ ਦੀ ਮੁੱਖ ਭਾਸ਼ਾ ਵਿੱਚ ਤੁਹਾਡੇ ਲਈ ਪਿਆਰ ਪਰਗਟ ਨਾ ਕਰ ਸਕੇ। ਸ਼ਾਇਦ ਉਹ ਤੁਹਾਡੀ ਪਿਆਰ ਦੀ ਮੁੱਖ ਭਾਸ਼ਾ ਅਤੇ ਤੁਹਾਡੀਆਂ ਭਾਵਨਾਤਮਕ ਜ਼ਰੂਰਤਾਂ ਤੋਂ ਅਣਜਾਣ ਹੋਣ। ਸ਼ਾਇਦ ਉਨ੍ਹਾਂ ਕੋਲ ਤੁਹਾਡੇ ਲਈ ਉਸ ਤਰੀਕੇ ਨਾਲ ਪਿਆਰ ਪਰਗਟ ਕਰਨ ਦੀ ਪ੍ਰੇਰਣਾ ਦੀ ਘਾਟ ਹੈ, ਜੋ ਤਰੀਕਾ ਤੁਹਾਡੇ ਲਈ ਸਭ ਤੋਂ ਮਹੱਤਵਪੂਰਣ ਹੈ। ਤੁਸੀਂ ਉਨ੍ਹਾਂ ਨੂੰ ਸਮਝਾ ਸਕਦੇ ਹੋ ਕਿ ਤੁਸੀਂ ਸਭ ਤੋਂ ਵੱਧ ਪਿਆਰ ਕਿਵੇਂ ਮਹਿਸੂਸ ਕਰਦੇ ਹੋ। ਪਰ ਤੁਸੀਂ ਉਨ੍ਹਾਂ ਨੂੰ ਮਜ਼ਬੂਰ ਨਹੀਂ ਕਰ ਸਕਦੇ ਕਿ ਉਹ ਇਸ ਤਰੀਕੇ ਨਾਲ ਤੁਹਾਡੇ ਲਈ ਪਿਆਰ ਪਰਗਟ ਕਰਨ।

ਸ਼ਾਇਦ ਤੁਹਾਡਾ ਪਰਿਵਾਰ ਹੋਰ ਤਰੀਕਿਆਂ ਨਾਲ ਤੁਹਾਡੇ ਲਈ ਆਪਣਾ ਪਿਆਰ ਪਰਗਟ ਕਰ ਰਿਹਾ ਹੈ। ਜਿਵੇਂ ਹੀ ਤੁਸੀਂ ਪਿਆਰ ਦੀਆਂ ਭਾਸ਼ਾਵਾਂ ਨੂੰ ਜਾਣ ਲੈਂਦੇ ਹੋ, ਤੁਸੀਂ ਉਨ੍ਹਾਂ ਤਰੀਕਿਆਂ ਵੱਲ ਧਿਆਨ ਦੇਣਾ ਸ਼ੁਰੂ ਕਰ ਦਿਓਗੇ ਜਿਨ੍ਹਾਂ ਤਰੀਕਿਆਂ ਨਾਲ ਤੁਹਾਡਾ ਪਰਿਵਾਰ ਪਹਿਲਾਂ ਹੀ ਤੁਹਾਡੇ ਲਈ ਆਪਣਾ ਪਿਆਰ ਵਿਖਾ ਰਿਹਾ ਹੈ। ਜਦੋਂ ਕਿ ਤੁਸੀਂ ਉਨ੍ਹਾਂ ਨੂੰ ਬਦਲ ਨਹੀਂ ਸਕਦੇ, ਤੁਸੀਂ ਉਨ੍ਹਾਂ ਦੇ ਪਿਆਰ ਦੇ ਪ੍ਰਗਟਾਵੇ ਨੂੰ ਸਵੀਕਾਰ ਕਰਨ ਦੀ ਚੋਣ ਕਰ ਸਕਦੇ ਹੋ ਅਤੇ ਉਸ ਪਿਆਰ ਲਈ ਉਨ੍ਹਾਂ ਦੀ ਪ੍ਰਸ਼ੰਸ਼ਾ ਕਰ ਸਕਦੇ ਹੋ।

ਸਵਰਗੀ ਪਿਤਾ,

ਮੈਨੂੰ ਮੇਰਾ ਪਰਿਵਾਰ ਦੇਣ ਲਈ ਤੇਰਾ ਧੰਨਵਾਦ। ਮੇਰੀ ਮਦਦ ਕਰ ਕਿ ਮੈਂ ਉਨ੍ਹਾਂ ਵਿੱਚੋਂ ਹਰੇਕ ਦੀ ਕਦਰ ਕਰਾਂ ਜਿਵੇਂ ਮੈਨੂੰ ਕਰਨੀ ਚਾਹੀਦੀ ਹੈ, ਅਤੇ ਉਨ੍ਹਾਂ ਵਿੱਚੋਂ ਹਰੇਕ ਨਾਲ ਇੱਕ ਚੰਗਾ ਰਿਸ਼ਤਾ ਕਾਇਮ ਕਰਨ ਵਿੱਚ ਮੇਰੀ ਮਦਦ ਕਰ।

ਉਨ੍ਹਾਂ ਤਰੀਕਿਆਂ ’ਤੇ ਵਿਚਾਰ ਕਰਨ ਦਾ ਮੌਕਾ ਦੇਣ ਲਈ ਤੇਰਾ ਧੰਨਵਾਦ, ਜਿਨ੍ਹਾਂ ਤਰੀਕਿਆਂ ਦੁਆਰਾ ਮੈਂ ਆਪਣੇ ਪਿਆਰ ਲਈ ਆਪਣਾ ਪਿਆਰ ਵਿਖਾ ਸਕਦਾ ਹਾਂ। ਯਿਸੂ ਵਰਗਾ ਬਣਨਾ ਸਿੱਖਣ ਵਿੱਚ ਮੇਰੀ ਮਦਦ ਕਰ: ਮੈਂ ਆਪਣੇ ਪਰਿਵਾਰ ਨੂੰ ਅਸੀਸ ਦੇਣ ਅਤੇ ਉਤਸ਼ਾਹਿਤ ਕਰਨ ਲਈ ਆਪਣਾ ਸਮਾਂ, ਭਾਵਨਾਤਮਕ ਅਤੇ ਸਰੀਰਕ ਊਰਜਾ, ਅਤੇ ਸੰਸਾਧਨ ਦੇ ਸਕਾਂ। ਮੇਰੀ ਮਦਦ ਕਰ ਕਿ ਮੈਂ ਇੱਕ ਹਲੀਮ ਮਨ ਰੱਖਾਂ, ਤਾਂ ਜੋ ਮੈਂ ਆਪਣੇ ਨਾਲੋਂ ਦੂਸਰਿਆਂ ਦੀਆਂ ਜ਼ਰੂਰਤਾਂ ਨੂੰ ਤਰਜੀਹ ਦੇਵਾਂ। ਮੇਰੀ ਉਨ੍ਹਾਂ ਮੌਕਿਆਂ ਨੂੰ ਜਾਣਨ ਵਿੱਚ ਮਦਦ ਕਰ ਜੋ ਮੇਰੇ ਕੋਲ ਪਰਿਵਾਰ ਦੇ ਹਰੇਕ ਮੈਂਬਰ ਲਈ ਆਪਣਾ ਪਿਆਰ ਪਰਗਟ ਕਰਨ ਵਾਸਤੇ ਹਨ।

ਤੂੰ ਮੈਨੂੰ ਵਿਖਾਇਆ ਹੈ ਕਿ ਅਸਲ ਪਿਆਰ ਕੀ ਹੈ। ਤੂੰ ਮੇਰੇ ਤੋਂ ਉਮੀਦ ਰੱਖਦਾ ਹੈਂ ਕਿ ਮੈਂ ਆਪਣੇ ਪਰਿਵਾਰ ਪ੍ਰਤੀ ਪਿਆਰ ਦਾ ਉਹੀ ਸਮਰਪਣ ਕਰਾਂ ਜੋ ਤੂੰ ਮੇਰੇ ਨਾਲ ਕੀਤਾ ਹੈ। ਮੈਂ ਆਪਣੇ ਜੀਵਨ ਸਾਥੀ ਅਤੇ ਬੱਚਿਆਂ ਨੂੰ ਬਿਨਾਂ ਸ਼ਰਤ, ਸਵੈ-ਤਿਆਗ ਵਾਲੇ ਪਿਆਰ ਨਾਲ ਪਿਆਰ ਕਰਨ ਦੀ ਚੋਣ ਕਰਦਾ ਹਾਂ। ਮੇਰੇ ’ਤੇ ਉਨ੍ਹਾਂ ਕਈ ਤਰੀਕਿਆਂ ਲਈ ਕਿਰਪਾ ਅਤੇ ਦਯਾ ਕਰ ਜਿਨ੍ਹਾਂ ਵਿੱਚ ਮੈਂ ਅਸਫਲ ਹੋਇਆ ਹਾਂ। ਮੈਨੂੰ ਉਨ੍ਹਾਂ ਨਾਲ ਓਵੇਂ ਪਿਆਰ ਕਰਨ ਦੇ ਯੋਗ ਬਣਾ ਜਿਵੇਂ ਮੈਨੂੰ ਕਰਨਾ ਚਾਹੀਦਾ ਹੈ।

ਆਮੀਨ

(1) ਆਪਣੇ ਜੀਵਨ ਸਾਥੀ ਅਤੇ ਆਪਣੇ ਹਰੇਕ ਬੱਚੇ ਲਈ ਪਿਆਰ ਦੀਆਂ ਸੰਭਾਵਿਤ ਮੁੱਖ ਭਾਸ਼ਾਵਾਂ ਬਾਰੇ ਸੋਚੋ। ਆਪਣੇ ਪਰਿਵਾਰ ਦੇ ਮੈਂਬਰਾਂ ਦੇ ਨਾਮਾਂ ਦੀ ਸੂਚੀ ਬਣਾਓ। ਫਿਰ ਹਰੇਕ ਦੀਆਂ ਪਿਆਰ ਦੀਆਂ ਇੱਕ ਜਾਂ ਦੋ ਮੁੱਖ ਭਾਸ਼ਾਵਾਂ ਦੀ ਸੂਚੀ ਬਣਾਓ।

(2) ਪਿਆਰ ਦੇ ਕਿਹੜੇ ਪ੍ਰਗਟਾਵੇ ਲਈ ਤੁਹਾਨੂੰ ਵਾਧੂ ਮਿਹਨਤ ਦੀ ਲੋੜ ਪਵੇਗੀ? ਉਨ੍ਹਾਂ ’ਤੇ ਨਿਸ਼ਾਨ ਲਾਓ। ਇਸ ਲਈ ਕੁਝ ਵਿਚਾਰ ਲਿਖੋ ਕਿ ਤੁਸੀਂ ਉਨ੍ਹਾਂ ਤਰੀਕਿਆਂ ਨਾਲ ਆਪਣੇ ਪਰਿਵਾਰ ਲਈ ਆਪਣੇ ਪਿਆਰ ਨੂੰ ਜਾਣਬੁੱਝ ਕੇ ਕਿਵੇਂ ਪਰਗਟ ਕਰਨਾ ਸ਼ੁਰੂ ਕਰੋਗੇ।

(3) ਆਪਣੇ ਸੱਭਿਆਚਾਰ ਦੀ ਜਾਂਚ ਕਰੋ, ਖਾਸ ਕਰਕੇ ਤੁਹਾਡੇ ਆਪਣੇ ਸਮਾਜਿਕ ਸਮੂਹ ਦੀ। ਪਿਆਰ ਦੀਆਂ ਪੰਜ ਭਾਸ਼ਾਵਾਂ ਦੀ ਸੂਚੀ ਬਣਾਓ। ਤੁਹਾਡੇ ਸੱਭਿਆਚਾਰ ਵਿੱਚ, ਪਿਆਰ ਦੀ ਹਰੇਕ ਭਾਸ਼ਾ ਨੂੰ ਕਿਵੇਂ ਪ੍ਰਦਰਸ਼ਿਤ ਕੀਤਾ ਜਾਂਦਾ ਹੈ? ਕੀ ਪੰਜਾਂ ਵਿੱਚੋਂ ਕੋਈ ਅਜਿਹੀ ਭਾਸ਼ਾ ਹੈ ਜਿਸ ਨੂੰ ਆਮ ਤੌਰ 'ਤੇ ਨਜ਼ਰਅੰਦਾਜ਼ ਕੀਤਾ ਜਾਂਦਾ ਹੈ? ਤੁਹਾਡੇ ਸਮਾਜਿਕ ਸਮੂਹ ਦੇ ਲੋਕ ਤੁਹਾਡੇ ਸੱਭਿਆਚਾਰ ਵਿੱਚ ਆਮ ਨਾਲੋਂ ਬਿਹਤਰ ਤਰੀਕਿਆਂ ਨਾਲ ਪਿਆਰ ਦਾ ਪਰਗਟਾਵਾ ਕਿਵੇਂ ਕਰ ਸਕਦੇ ਹਨ? ਇਨ੍ਹਾਂ ਸਵਾਲਾਂ ਦੇ ਜਵਾਬ ਦਿੰਦੇ ਹੋਏ ਕਈ ਪੈਰੇ ਲਿਖੋ।