ਇਸ ਪਾਠ ਦੇ ਅੰਤ ਵਿੱਚ, ਵਿਦਿਆਰਥੀ ਹੇਠਾਂ ਦੱਸੇ ਕੰਮ ਕਰਨ ਦੇ ਯੋਗ ਹੋਣੇ ਚਾਹੀਦੇ ਹਨ:

(1) ਜੋ ਰਿਸ਼ਤਾ ਪਰਮੇਸ਼ੁਰ ਸਾਡੇ ਨਾਲ ਰੱਖਣਾ ਚਾਹੁੰਦਾ ਹੈ ਉਸ ਨੂੰ ਸਮਝਣਾ ਅਤੇ ਉਸ ਦੀ ਕਦਰ ਕਰਨਾ।

(2) ਹਰੇਕ ਵਿਅਕਤੀ ਵਿੱਚ ਪਰਮੇਸ਼ੁਰ ਦੇ ਸਰੂਪ ਨੂੰ ਸਮਝਣਾ ਅਤੇ ਇਸ ਦੀ ਕਦਰ ਕਰਨਾ।

(3) ਇਹ ਜਾਣਨਾ ਕਿ ਸਾਡੇ ਰਿਸ਼ਤਿਆਂ ਵਿੱਚ ਅਸੀਂ ਜੋ ਚੋਣਾਂ ਕਰਦੇ ਹਾਂ ਉਨ੍ਹਾਂ ਲਈ ਅਸੀਂ ਪਰਮੇਸ਼ੁਰ ਅੱਗੇ ਜਵਾਬਦੇਹ ਹਾਂ।

(4) ਇਹ ਜਾਣਨਾ ਕਿ ਬਾਈਬਲ ਧਰਮੀ ਰਿਸ਼ਤਿਆਂ ਲਈ ਸਾਡਾ ਹਿਦਾਇਤ ਦਸਤਾਵੇਜ਼ ਹੈ, ਅਤੇ ਇਹ ਕਿ ਅਸੀਂ ਆਪਣੇ ਰਿਸ਼ਤਿਆਂ ਵਿੱਚ ਪਰਮੇਸ਼ੁਰ ਦੀ ਰੀਸ ਕਰਨੀ ਹੈ।

ਵਚਨ ਵਿੱਚ, ਅਸੀਂ ਸਿੱਖਦੇ ਹਾਂ ਕਿ ਪਰਮੇਸ਼ੁਰ ਇੱਕ ਨਿੱਜੀ ਪਰਮੇਸ਼ੁਰ ਹੈ, ਜਿਸ ਦੇ ਰਿਸ਼ਤੇ ਹਨ ਅਤੇ ਉਹ ਦੂਸਰਿਆਂ ਨਾਲ ਗੱਲਬਾਤ ਕਰਦਾ ਹੈ (ਇਬਰਾਨੀਆਂ 1:1-2)। ਵਚਨ ਸਾਨੂੰ ਵਿਖਾਉਂਦਾ ਹੈ ਕਿ ਪਰਮੇਸ਼ੁਰ ਪਿਤਾ, ਪਰਮੇਸ਼ੁਰ ਪੁੱਤਰ, ਅਤੇ ਪਰਮੇਸ਼ੁਰ ਪਵਿੱਤਰ ਆਤਮਾ ਪੂਰੀ ਸਦੀਪਕਤਾ ਤੋਂ ਇੱਕ ਦੂਸਰੇ ਦੇ ਨਾਲ ਰਿਸ਼ਤੇ ਦੇ ਵਿੱਚ ਰਹੇ ਹਨ।[1]

ਪਰਮੇਸ਼ੁਰ ਨੇ ਅਕਾਸ਼ਾਂ, ਧਰਤੀ, ਸਮੁੰਦਰ, ਅਤੇ ਜੋ ਸਭ ਕੁਝ ਉਨ੍ਹਾਂ ਵਿੱਚ ਹੈ, ਉਸ ਨੂੰ ਬਣਾਇਆ ਹੈ (ਕੂਚ 20:11) ਜ਼ਬੂਰ 8:3-8 ਸਾਨੂੰ ਵਿਖਾਉਂਦਾ ਹੈ ਕਿ ਮਨੁੱਖਤਾ ਉਸ ਦੀ ਉੱਤਮ ਅਤੇ ਸਭ ਤੋਂ ਮਹੱਤਵਪੂਰਣ ਰਚਨਾ ਸੀ। ਪਰਮੇਸ਼ੁਰ ਨੇ ਲੋਕਾਂ ਨੂੰ ਰਿਸ਼ਤੇ ਰੱਖਣ ਵਾਲੇ ਪ੍ਰਾਣੀਆਂ ਦੇ ਰੂਪ ਵਿੱਚ ਬਣਾਇਆ ਹੈ, ਜਿਵੇਂ ਕਿ ਉਹ ਆਪ ਇੱਕ ਰਿਸ਼ਤੇ ਰੱਖਣ ਵਾਲਾ ਪ੍ਰਾਣੀ ਹੈ। ਪੂਰੇ ਧਰਮ ਸ਼ਾਸਤਰ ਦੇ ਵਿੱਚ, ਪਰਮੇਸ਼ੁਰ ਲੋਕਾਂ ਨੂੰ ਉਸ ਨਾਲ ਇੱਕ ਜੀਵਨ ਦੇਣ ਵਾਲੇ ਰਿਸ਼ਤੇ ਵਿੱਚ ਬੁਲਾਉਂਦਾ ਹੈ।[2]

ਇਹ ਜਾਣਨਾ ਕਿੰਨਾ ਅਦਭੁਤ ਹੈ ਕਿ ਇਸ ਸੰਸਾਰ ਦਾ ਸਿਰਜਣਹਾਰ ਪਰਮੇਸ਼ੁਰ, ਤੁਹਾਡੇ ਅਤੇ ਮੇਰੇ ਨਾਲ ਇੱਕ ਰਿਸ਼ਤਾ ਰੱਖਣਾ ਚਾਹੁੰਦਾ ਹੈ!

► ਇੱਕ ਵਿਦਿਆਰਥੀ ਨੂੰ ਸਮੂਹ ਲਈ ਉਤਪਤ 3:8-9 ਨੂੰ ਪੜ੍ਹਨਾ ਚਾਹੀਦਾ ਹੈ।

ਇੱਕ ਪਲ ਲਈ ਰੁਕੋ, ਆਪਣੀਆਂ ਅੱਖਾਂ ਨੂੰ ਬੰਦ ਕਰੋ, ਅਤੇ ਉਸ ਦ੍ਰਿਸ਼ ਦੀ ਕਲਪਨਾ ਕਰੋ ਜਿਸ ਨੂੰ ਤੁਸੀਂ ਹੁਣੇ ਪੜ੍ਹਿਆ ਹੈ। ਇਨ੍ਹਾਂ ਆਇਤਾਂ ਵਿੱਚ ਦਿੱਤੇ ਦ੍ਰਿਸ਼ ਦੀ ਕਲਪਨਾ ਇਸ ਤਰ੍ਹਾਂ ਕਰੋ ਜਿਵੇਂ ਇਹ ਹੁਣੇ ਹੋ ਰਿਹਾ ਹੈ। ਕਲਪਨਾ ਕਰੋ ਕਿ ਤੁਸੀਂ ਦਿਨ ਦੇ ਠੰਡੇ ਸਮੇਂ ਸਭ ਤੋਂ ਸੁੰਦਰ ਬਾਗ ਵਿੱਚ ਖੜ੍ਹੇ ਹੋ, ਅਤੇ ਮਹਿਸੂਸ ਕਰੋ ਕਿ ਸੁਹਾਵਣੀ ਹਵਾ ਤੁਹਾਡੇ ਚਿਹਰੇ ਉੱਤੇ ਪੈ ਰਹੀ ਹੈ। ਪਰਮੇਸ਼ੁਰ ਦੇ ਕਦਮਾਂ ਦੀ ਆਵਾਜ਼ ਨੂੰ ਸੁਣੋ ਅਤੇ ਉਸ ਦੇ ਬਣਾਏ ਗਏ ਪ੍ਰਾਣੀਆਂ ਦੇ ਚੁੱਪ ਜਵਾਬ ਨੂੰ ਸੁਣੋ; ਫਿਰ ਪਰਮੇਸ਼ੁਰ ਦੇ ਸਵਾਲ ਨੂੰ ਸੁਣੋ, “ਤੂੰ ਕਿੱਥੇ ਹੈਂ?”

ਕੀ ਤੁਸੀਂ ਕਲਪਨਾ ਕਰ ਸਕਦੇ ਹੋ ਉਹ ਪਲ ਕਿਹੋ ਜਿਹਾ ਹੋਵੇਗਾ, ਜਦੋਂ ਪਰਮੇਸ਼ੁਰ ਆਦਮੀ ਅਤੇ ਔਰਤ ਨੂੰ ਉਸ ਨਾਲ ਸੰਗਤੀ ਕਰਨ ਲਈ ਬੁਲਾਉਂਦਾ ਹੈ? ਪਰਮੇਸ਼ੁਰ ਦੇ ਦਿਲ ਬਾਰੇ ਵਿਚਾਰ ਕਰਨ ਲਈ ਇੱਕ ਵਾਰ ਫਿਰ ਰੁਕੋ। ਪਰਮੇਸ਼ੁਰ ਆਦਮ ਅਤੇ ਹੱਵਾਹ, ਤੁਹਾਡੇ, ਅਤੇ ਮੇਰੇ ਨਾਲ ਸੰਗਤੀ ਰੱਖਣ ਦੀ ਇੱਛਾ ਰੱਖਦਾ ਹੈ ਅਤੇ ਇਸ ਲਈ ਤਾਂਘ ਰੱਖਦਾ ਹੈ!

ਭਾਵੇਂ ਕਿ ਅਸੀਂ ਉਸ ਦੀ ਆਗਿਆ ਨਾ ਮੰਨਣ ਦੇ ਕਾਰਨ ਆਪਣੇ ਆਪ ਨੂੰ ਉਸ ਨਾਲੋਂ ਵੱਖ ਕਰ ਲਿਆ ਹੈ (ਯਸਾਯਾਹ 59:2), ਪਰ ਪਰਮੇਸ਼ੁਰ ਫਿਰ ਵੀ ਹਰੇਕ ਜੀਉਂਦੇ ਵਿਅਕਤੀ ਨਾਲ ਰਿਸ਼ਤਾ ਰੱਖਣਾ ਚਾਹੁੰਦਾ ਹੈ। ਲੂਕਾ 19:10 ਸਾਨੂੰ ਵਿਖਾਉਂਦੀ ਹੈ ਕਿ ਪਰਮੇਸ਼ੁਰ ਹਰ ਇੱਕ ਪਾਪੀ ਨੂੰ ਭਾਲ ਰਿਹਾ ਹੈ। ਪਰਮੇਸ਼ੁਰ ਅਜੇ ਵੀ ਪੁੱਛ ਰਿਹਾ ਹੈ, “ਤੂੰ ਕਿੱਥੇ ਹੈਂ?” ਕਿਉਂਕਿ ਯਿਸੂ ਸਾਡੇ ਲਈ ਮਰਿਆ ਹੈ, ਅਸੀਂ ਪਰਮੇਸ਼ੁਰ ਨਾਲ ਸਹੀ ਰਿਸ਼ਤੇ ਵਿੱਚ ਵਾਪਸ ਆ ਸਕਦੇ ਹਾਂ (ਅਫ਼ਸੀਆਂ 2:13, 19)। ਤੁਹਾਨੂੰ ਅਤੇ ਮੈਨੂੰ ਪਰਮੇਸ਼ੁਰ ਨਾਲ ਰਿਸ਼ਤਾ ਰੱਖਣ ਲਈ ਰਚਿਆ ਗਿਆ ਹੈ।

ਜਿਹੜੇ ਪਰਮੇਸ਼ੁਰ ਦੀ ਪਿਆਰ ਭਰੀ ਅਤੇ ਉਦੇਸ਼ਪੂਰਣ ਸਿਰਜਣਾ ’ਤੇ ਵਿਸ਼ਵਾਸ ਨਹੀਂ ਕਰਦੇ ਹਨ, ਉਹ ਆਪਣੀ ਖੁਦ ਦੀ ਪਹਿਚਾਣ ਅਤੇ ਆਪਣਾ ਉਦੇਸ਼ ਬਣਾਉਣ ਲਈ ਸੰਘਰਸ਼ ਕਰਦੇ ਹਨ। ਪਰਮੇਸ਼ੁਰ ਦੇ ਨਾਲ ਰਿਸ਼ਤੇ ਤੋਂ ਬਿਨਾਂ ਮਨੁੱਖਤਾ ਨੂੰ ਸਹੀ ਢੰਗ ਨਾਲ ਸਮਝਣਾ ਅਸੰਭਵ ਹੈ। ਇੱਕ ਵਿਅਕਤੀ ਜੋ ਸੰਸਾਰਿਕ ਬੁੱਧੀ ਦੀ ਸਲਾਹ ਨਾਲ ਚੱਲਦਾ ਹੈ, ਉਹ ਅਸਲ ਵਿੱਚ ਜੀਵਨ ਨੂੰ ਸਮਝ ਨਹੀਂ ਸਕਦਾ। ਸੰਸਾਰਿਕ ਬੁੱਧੀ, ਮਨੁੱਖ ਕੇਦ੍ਰਿਤ ਹੋ ਕੇ ਖੁਸ਼ੀ ਦਾ ਪਿੱਛਾ ਕਰਨਾ ਹੈ।

ਸਾਡੀ ਪਹਿਚਾਣ (ਅਸੀਂ ਕੌਣ ਹਾਂ), ਸਾਡਾ ਉਦੇਸ਼ (ਅਸੀਂ ਕਿਉਂ ਹਾਂ), ਅਤੇ ਸਾਨੂੰ ਕਿਵੇਂ ਬਣਾਇਆ ਗਿਆ ਹੈ, ਇਹ ਸਭ ਸਮਝਣ ਲਈ ਸਾਨੂੰ ਆਪਣੇ ਸਿਰਜਣਹਾਰ ਦੇ ਉਦੇਸ਼ ਨੂੰ ਜਾਣਨਾ ਚਾਹੀਦਾ ਹੈ, ਜੋ ਪਵਿੱਤਰ ਬਾਈਬਲ ਦੇ ਵਿੱਚ ਪਾਇਆ ਜਾਂਦਾ ਹੈ। ਪਰਮੇਸ਼ੁਰ ਨੇ ਪਹਿਲਾਂ ਹੀ ਸਾਡੀ ਪਹਿਚਾਣ ਨੂੰ ਸਥਾਪਿਤ ਕੀਤਾ ਹੈ; ਇਹ ਕੁਝ ਅਜਿਹਾ ਨਹੀਂ ਹੈ ਜਿਸ ਦੀ ਅਸੀਂ ਖੋਜ ਕਰਦੇ ਹਾਂ। ਉਸ ਨੇ ਸਾਨੂੰ ਇੱਕ ਉਦੇਸ਼ ਦੇ ਨਾਲ ਰਚਿਆ ਹੈ ਅਤੇ ਸਾਨੂੰ ਸੋਚ ਸਮਝ ਕੇ ਬਣਾਇਆ ਹੈ। ਜਦੋਂ ਅਸੀਂ ਸਾਡੇ ਜੀਵਨਾਂ ਅਤੇ ਸਾਡੇ ਰਿਸ਼ਤਿਆਂ ਬਾਰੇ ਉਸ ਦੀ ਯੋਜਨਾ ਨੂੰ ਸਮਝਦੇ ਹਾਂ, ਤਦ ਹੀ ਅਸੀਂ ਉਹ ਬਣ ਸਕਦੇ ਹਾਂ ਜੋ ਸਾਨੂੰ ਬਣਨਾ ਚਾਹੀਦਾ ਹੈ ਅਤੇ ਅਸੀਂ ਸਾਡੇ ਵਜੂਦ ਦੇ ਲਈ ਉਸ ਦੇ ਉਦੇਸ਼ ਨੂੰ ਪੂਰਾ ਕਰ ਸਕਦੇ ਹਾਂ।

ਪਰਮੇਸ਼ੁਰ ਦੇ ਸਰੂਪ ’ਤੇ ਬਣਾਏ ਹੋਣ ਦਾ ਅਰਥ ਹੈ ਕਿ ਲੋਕਾਂ ਨੂੰ ਰਿਸ਼ਤੇ ਰੱਖਣ ਲਈ ਅਨੋਖੇ ਢੰਗ ਨਾਲ ਬਣਾਇਆ ਗਿਆ ਹੈ। ਜਿਵੇਂ ਕਿ ਪਰਮੇਸ਼ੁਰ ਰਿਸ਼ਤੇ ਰੱਖਣ ਵਾਲਾ ਪਰਮੇਸ਼ੁਰ ਹੈ, ਉਸੇ ਤਰ੍ਹਾਂ ਉਸ ਨੇ ਲੋਕਾਂ ਨੂੰ ਵੀ ਰਿਸ਼ਤੇ ਰੱਖਣ ਵਾਲੇ ਪ੍ਰਾਣੀ ਬਣਾਇਆ ਹੈ। ਪਰਮੇਸ਼ੁਰ ਨੇ ਹਰੇਕ ਵਿਅਕਤੀ ਦੇ ਪ੍ਰਾਣ, ਆਤਮਾ, ਅਤੇ ਸਰੀਰ ਨੂੰ ਪਰਮੇਸ਼ੁਰ ਅਤੇ ਦੂਸਰਿਆਂ ਨਾਲ ਰਿਸ਼ਤੇ ਰੱਖਣ ਲਈ ਬਣਾਇਆ ਹੈ।

ਮਨੁੱਖੀ ਰਿਸ਼ਤਿਆਂ ਲਈ ਸਾਡਾ ਹਿਦਾਇਤ ਦਸਤਾਵੇਜ਼

ਇਹ ਸੱਚਾਈ ਕਿ ਪਰਮੇਸ਼ੁਰ ਨੇ ਲੋਕਾਂ ਨੂੰ ਰਿਸ਼ਤੇ ਰੱਖਣ ਲਈ ਬਣਾਇਆ ਹੈ, ਇਹ ਸਪਸ਼ਟ ਕਰਦੀ ਹੈ ਕਿ ਉਸ ਕੋਲ ਸਾਡੇ ਰਿਸ਼ਤਿਆਂ ਲਈ ਸਿਧਾਂਤ ਅਤੇ ਨਿਰਦੇਸ਼ ਹਨ। ਇੱਕ ਉਤਪਾਦ ਨੂੰ ਬਣਾਉਣ ਵਾਲਾ ਇੱਕ ਉਤਪਾਦ ਦਸਤਾਵੇਜ਼ ਲਿਖਦਾ ਹੈ ਜੋ ਉਤਪਾਦ ਦੀ ਬਣਤਰ ਦੀ ਵਿਆਖਿਆ ਕਰਦਾ ਹੈ ਅਤੇ ਦੱਸਦਾ ਹੈ ਕਿ ਇਸ ਨੂੰ ਕਿਵੇਂ ਵਰਤਣਾ ਹੈ। ਉਸੇ ਤਰ੍ਹਾਂ ਹੀ, ਪਰਮੇਸ਼ੁਰ ਨੇ ਸਾਨੂੰ ਆਪਣਾ ਵਚਨ ਬਾਈਬਲ ਦਿੱਤੀ ਹੈ, ਜੋ ਸਾਡੀ ਬਣਤਰ ਦੀ ਵਿਆਖਿਆ ਕਰਦੀ ਹੈ ਅਤੇ ਦੱਸਦੀ ਹੈ ਕਿ ਸਾਡੇ ਜੀਵਨ ਅਤੇ ਸਾਡੇ ਰਿਸ਼ਤੇ ਕਿਵੇਂ ਸਹੀ ਤਰ੍ਹਾਂ ਚੱਲ ਸਕਦੇ ਹਨ।

ਬਾਈਬਲ ਸਪਸ਼ਟ ਰੂਪ ਵਿੱਚ ਉਨ੍ਹਾਂ ਭੂਮਿਕਾਵਾਂ ਦਾ ਵਰਣਨ ਕਰਦੀ ਹੈ ਜੋ ਪਰਮੇਸ਼ੁਰ ਨੇ ਮਨੁੱਖੀ ਰਿਸ਼ਤਿਆਂ ਲਈ ਠਹਿਰਾਈਆਂ ਹਨ। ਇਹ ਪਤੀਆਂ ਅਤੇ ਪਤਨੀਆਂ; ਪਿਤਾਵਾਂ, ਮਾਵਾਂ, ਅਤੇ ਬੱਚਿਆਂ; ਭਰਾਵਾਂ ਅਤੇ ਭੈਣਾਂ; ਦਾਦਾ-ਦਾਦੀ ਅਤੇ ਨਾਨਾ-ਨਾਨੀ; ਦੋਸਤਾਂ; ਦੁਸ਼ਮਣਾਂ; ਗੁਆਂਢੀਆਂ; ਸਰਕਾਰਾਂ ਅਤੇ ਨਾਗਰਿਕਾਂ; ਅਤੇ ਮਾਲਕਾਂ ਅਤੇ ਨੌਕਰਾਂ ਦੀਆਂ ਭੂਮਿਕਾਵਾਂ ਅਤੇ ਉਨ੍ਹਾਂ ਦੇ ਰਿਸ਼ਤਿਆਂ ਨੂੰ ਸੰਬੋਧਿਤ ਕਰਦੀ ਹੈ। ਪਰਮੇਸ਼ੁਰ ਦੇ ਵਚਨ ਦੇ ਸਿਧਾਂਤ ਸਾਡੇ ਲਈ ਉਸ ਦੇ ਨਮੂਨੇ ਨੂੰ ਸਿਖਾਉਂਦੇ ਹਨ, ਭਾਵੇਂ ਸਾਡੇ ਹਾਲਾਤ ਜਾਂ ਮਹੌਲ ਕੁਝ ਵੀ ਹੋਣ। ਬਾਈਬਲ ਸਾਨੂੰ ਸਾਡੇ ਜੀਵਨ ਦੇ ਹਰੇਕ ਪੜਾਆ ਲਈ ਪਰਮੇਸ਼ੁਰ ਦੀ ਇੱਛਾ ਬਾਰੇ ਸਿਖਾਉਂਦੀ ਹੈ।

ਮਨੁੱਖੀ ਸਮਾਜ ਅਤੇ ਸੱਭਿਆਚਾਰ ਪਰਮੇਸ਼ੁਰ ਦੇ ਨਮੂਨੇ ਨੂੰ ਪ੍ਰਦਰਸ਼ਿਤ ਕਰਦੇ ਹਨ, ਭਾਵੇਂ ਕਿ ਇਹ ਅਸਿੱਧ ਹੈ। ਸੱਭਿਆਚਾਰ ਸਾਰੇ ਰਿਸ਼ਤਿਆਂ ਅਤੇ ਹਾਲਾਤਾਂ ਵਿੱਚ ਆਮ ਮਨੁੱਖੀ ਵਿਹਾਰ ਦਾ ਵਰਣਨ ਕਰਦੇ ਹਨ। ਬੱਚਿਆਂ ਦੀ ਪਰਵਰਿਸ਼ ਕਰਨ ਅਤੇ ਵਿਆਹੁਤਾ ਸੰਬੰਧਾਂ ਨੂੰ ਬਣਾਈ ਰੱਖਣ ਲਈ ਹਰੇਕ ਸੱਭਿਆਚਾਰ ਦੇ ਆਪਣੇ ਤਰੀਕੇ ਹਨ। ਸੱਭਿਆਚਾਰ ਪਰੰਪਰਾਵਾਂ, ਮਹੌਲਾਂ, ਸਰੀਰਕ ਬਣਤਰ, ਅਤੇ ਮੁੱਖ ਘਟਨਾਵਾਂ ਵਿੱਚ ਵੱਡੀ ਵਿਭਿੰਨਤਾ ਨੂੰ ਵਿਖਾਉਂਦੇ ਹਨ, ਪਰ ਹਰੇਕ ਸੱਭਿਆਚਾਰ ਸਾਂਝੀ ਬੁਨਿਆਦੀ ਨੈਤਿਕਤਾ ਰੱਖਦਾ ਹੈ। ਉਦਾਹਰਣ ਲਈ, ਹਰੇਕ ਸੱਭਿਆਚਾਰ ਵਿੱਚ ਵਿਆਹ ਦੀ ਇੱਕ ਕਿਸਮ ਹੁੰਦੀ ਹੈ। ਹਾਲਾਂਕਿ, ਸਾਰੇ ਵਿਹਾਰ ਦਾ ਮੁਲਾਂਕਣ ਬਾਈਬਲ ਦੇ ਸਿਧਾਂਤਾਂ ਅਨੁਸਾਰ ਕੀਤਾ ਜਾਣਾ ਚਾਹੀਦਾ ਹੈ, ਨਾ ਕਿ ਸੱਭਿਆਚਾਰ ਦੇ ਨਿਯਮਾਂ ਦੁਆਰਾ। ਬਾਈਬਲ ਸਾਡੇ ਉੱਤੇ ਅਧਿਕਾਰ ਰੱਖਦੀ ਹੈ; ਸੱਭਿਆਚਾਰ ਨਹੀਂ (ਰੋਮੀਆਂ 12:2)।

ਜ਼ਰੂਰੀ ਨਹੀਂ ਕਿ ਸੱਭਿਆਚਾਰ ਦੇ ਵਿਸਥਾਰ ਨਿਰਪੱਖ ਹੋਣ, ਅਤੇ ਸਾਨੂੰ ਇਨ੍ਹਾਂ ਦੇ ਨਿਰਪੱਖ ਹੋਣ ਦੀ ਉਮੀਦ ਵੀ ਨਹੀਂ ਰੱਖਣੀ ਚਾਹੀਦੀ (ਅਫ਼ਸੀਆਂ 2:2)। ਸੱਭਿਆਚਾਰ ਨੂੰ ਪਤਿਤ ਲੋਕਾਂ ਦੁਆਰਾ ਵਿਕਸਤ ਕੀਤਾ ਜਾਂਦਾ ਹੈ ਜਿਨ੍ਹਾਂ ਦੇ ਅੰਦਰ ਗਲਤ ਇੱਛਾਵਾਂ ਅਤੇ ਸਵਾਰਥ ਹੈ। ਹੋ ਸਕਦਾ ਹੈ ਕਿ ਇੱਕ ਸਮਾਜ ਨੂੰ ਬਾਈਬਲ ਦੀ ਸੱਚਾਈ ਦੀ ਕੁਝ ਜਾਣਕਾਰੀ ਹੋਵੇ, ਫਿਰ ਵੀ ਕੋਈ ਵੀ ਸਮਾਜ ਸਹੀ ਅਤੇ ਗਲਤ ਸੰਬੰਧੀ ਪਰਮੇਸ਼ੁਰ ਦੇ ਮਿਆਰ ਨਾਲ ਲਗਾਤਾਰ ਨਹੀਂ ਚੱਲਦਾ। ਕਿਸੇ ਵੀ ਗੱਲ ਨੂੰ ਇਸ ਲਈ ਜਾਇਜ਼ ਨਹੀਂ ਠਹਿਰਾਇਆ ਜਾਣਾ ਚਾਹੀਦਾ ਕਿਉਂਕਿ ਇਹ ਸੱਭਿਆਚਾਰਕ ਹੈ। ਕੇਵਲ ਬਾਈਬਲ ਹੀ ਹੈ ਜੋ ਸਾਨੂੰ ਸਿੱਧਤਾ ਦੇ ਨਾਲ ਪਰਮੇਸ਼ੁਰ ਦਾ ਮਿਆਰ ਵਿਖਾਉਂਦੀ ਹੈ (ਜ਼ਬੂਰ 19:7-11)।

ਜੇ ਤੁਸੀਂ ਲੀਬਿਆ ਦੇਸ ਵਿੱਚ ਜਾਓ ਅਤੇ ਵੇਖੋ ਕਿ ਲੀਬਿਆ ਦੇ ਡ੍ਰਾਈਵਰ ਸੁਰੱਖਿਆ ਦੀ ਪਰਵਾਹ ਕੀਤੇ ਬਿਨਾਂ ਗੱਡੀ ਚਲਾਉਂਦੇ ਹਨ, ਤੁਸੀਂ ਸੋਚ ਸਕਦੇ ਹੋ, “ਇਹ ਉਨ੍ਹਾਂ ਦਾ ਸੱਭਿਆਚਾਰ ਹੈ; ਗੱਡੀ ਚਲਾਉਣ ਦੀ ਉਨ੍ਹਾਂ ਦੀ ਸ਼ੈਲੀ ਉਨ੍ਹਾਂ ਲਈ ਠੀਕ ਹੈ।” ਇਹ ਸੱਚ ਹੈ ਕਿ ਉਨ੍ਹਾਂ ਨੇ ਗੱਡੀ ਚਲਾਉਣ ਦੀ ਆਪਣੀ ਸੱਭਿਆਚਾਰਕ ਸ਼ੈਲੀ ਨੂੰ ਵਿਕਸਤ ਕੀਤਾ ਹੈ। ਪਰ, ਸੰਸਾਰ ਭਰ ਵਿੱਚ ਸੜਕ ਹਾਦਸਿਆਂ ਵਿੱਚ ਹੋਣ ਵਾਲੀਆਂ ਮੌਤਾਂ ਵਿੱਚੋਂ ਸਭ ਤੋਂ ਜ਼ਿਆਦਾ ਲੀਬਿਆ ਵਿੱਚ ਹੁੰਦੀਆਂ ਹਨ। ਲੀਬਿਆ ਵਿੱਚ ਸੜਕ ਹਾਦਸਿਆਂ ਵਿੱਚ ਹੋਣ ਵਾਲੀਆਂ ਮੌਤਾਂ ਦੀ ਦਰ ਉਸ ਦੇਸ ਨਾਲੋਂ ਦੁੱਗਣੀ ਹੈ ਜੋ ਦੇਸ ਸੰਸਾਰ ਵਿੱਚ ਇਨ੍ਹਾਂ ਮੌਤਾਂ ਲਈ ਦੂਸਰੇ ਨੰਬਰ ’ਤੇ ਆਉਂਦਾ ਹੈ। ਇਹ ਸਪਸ਼ਟ ਹੈ ਕਿ ਉਨ੍ਹਾਂ ਦੇ ਸੱਭਿਆਚਾਰ ਨੇ ਗੱਡੀ ਚਲਾਉਣ ਦੀ ਇੱਕ ਚੰਗੀ ਸ਼ੈਲੀ ਨੂੰ ਵਿਕਸਤ ਨਹੀਂ ਕੀਤਾ ਹੈ।

ਪਰਮੇਸ਼ੁਰ ਜਾਣਦਾ ਹੈ ਕਿ ਜੀਵਨ ਕਿਵੇਂ ਚੱਲਣਾ ਚਾਹੀਦਾ ਹੈ ਅਤੇ ਉਸ ਨੇ ਸਾਡੇ ਲਈ ਨਿਯਮ ਦਿੱਤੇ ਹਨ। ਅਸੀਂ ਕੇਵਲ ਪ੍ਰਯੋਗ ਅਤੇ ਪੜਚੋਲ ਕਰਨ ਲਈ ਨਹੀਂ ਹਾਂ। ਅਸੀਂ ਬੱਸ ਓਹੀ ਨਹੀਂ ਕਰਨਾ ਹੈ ਜੋ ਜਾਪਦਾ ਹੈ ਕਿ ਸਾਨੂੰ ਉਹ ਦੇਵੇਗਾ ਜੋ ਸਾਨੂੰ ਚਾਹੀਦਾ ਹੈ। ਸਾਨੂੰ ਸਿਰਫ ਓਹੀ ਪ੍ਰਾਪਤ ਕਰਨ ਦੀ ਕੋਸ਼ਿਸ਼ ਨਹੀਂ ਕਰਨੀ ਚਾਹੀਦੀ ਜਿਸ ਬਾਰੇ ਅਸੀਂ ਕਲਪਨਾ ਕਰਦੇ ਹਾਂ ਕਿ ਉਹ ਇੱਕ ਖੁਸ਼ੀ ਭਰਿਆ ਜੀਵਨ ਹੋਵੇਗਾ। ਸਾਨੂੰ ਆਪਣੇ ਰਿਸ਼ਤਿਆਂ ਦੇ ਲਈ ਪਰਮੇਸ਼ੁਰ ਦੇ ਨਮੂਨੇ ਦੀ ਪਾਲਣਾ ਕਰਨੀ ਚਾਹੀਦੀ ਹੈ।

ਇਹ ਸੁੰਦਰ ਗੱਲ ਹੈ ਕਿ ਪਰਮੇਸ਼ੁਰ ਦੇ ਨਿਰਦੇਸ਼ਾਂ ਦੀ ਪਾਲਣਾ ਕਰਨਾ ਸਾਡੇ ਲਈ ਚੰਗਾ ਹੈ। ਪਰਮੇਸ਼ੁਰ ਨੇ ਸਾਨੂੰ ਹੁਕਮ ਦਿੱਤੇ ਹਨ ਕਿਉਂਕਿ ਉਹ ਸਾਨੂੰ ਪਿਆਰ ਕਰਦਾ ਹੈ (ਬਿਵਸਥਾ ਸਾਰ 6:24)। ਉਨ੍ਹਾਂ ਹੁਕਮਾਂ ਦੀ ਪਾਲਣਾ ਕਰਨ ਦੁਆਰਾ ਅਸੀਂ ਚੰਗੇ ਨਤੀਜਿਆਂ ਦਾ ਅਨੰਦ ਮਾਣਦੇ ਹਾਂ ਅਤੇ ਬੁਰੇ ਨਤੀਜਿਆਂ ਤੋਂ ਸੁਰੱਖਿਅਤ ਰਹਿੰਦੇ ਹਾਂ। ਸਾਨੂੰ ਬਣਾਉਣ ਵਾਲਾ ਜਾਣਦਾ ਹੈ ਕਿ ਸਾਡੇ ਲਈ ਉੱਤਮ ਕੀ ਹੈ, ਅਤੇ ਜਦੋਂ ਅਸੀਂ ਉਸ ਦੀ ਯੋਜਨਾ ਅਨੁਸਾਰ ਚੱਲਦੇ ਹਾਂ, ਅਸੀਂ ਧੰਨ ਹੁੰਦੇ ਹਾਂ।

ਰਿਸ਼ਤਿਆਂ ਵਿੱਚ ਪਰਮੇਸ਼ੁਰ ਅੱਗੇ ਜਵਾਬਦੇਹ

► ਦੂਸਰੇ ਲੋਕਾਂ ਪ੍ਰਤੀ ਸਾਡਾ ਵਿਹਾਰ ਪਰਮੇਸ਼ੁਰ ਨਾਲ ਸਾਡੇ ਰਿਸ਼ਤਿਆਂ ਨੂੰ ਕਿਵੇਂ ਪ੍ਰਭਾਵਿਤ ਕਰਦਾ ਹੈ?

► ਵਿਦਿਆਰਥੀਆਂ ਨੂੰ ਹੇਠਾਂ ਦਿੱਤੇ ਵਚਨ ਦੇ ਹਰੇਕ ਭਾਗ ਨੂੰ ਸਮੂਹ ਲਈ ਪੜ੍ਹਨਾ ਚਾਹੀਦਾ ਹੈ। ਸੰਖੇਪ ਵਿੱਚ ਚਰਚਾ ਕਰੋ ਕਿ ਇਨ੍ਹਾਂ ਮਨੁੱਖੀ ਰਿਸ਼ਤਿਆਂ ਵਿੱਚ ਪਰਮੇਸ਼ੁਰ ਕੀ ਮੰਗ ਕਰਦਾ ਹੈ, ਅਤੇ ਆਗਿਆਕਾਰੀ ਪਰਮੇਸ਼ੁਰ ਨਾਲ ਸਾਡੇ ਰਿਸ਼ਤੇ ਨੂੰ ਕਿਵੇਂ ਪ੍ਰਭਾਵਿਤ ਕਰਦੀ ਹੈ। ਪਰਮੇਸ਼ੁਰ ਦੇ ਨਿਰਦੇਸ਼ ਦੀ ਪਾਲਣਾ ਨਾ ਕਰਨਾ ਪਰਮੇਸ਼ੁਰ ਨਾਲ ਸਾਡੇ ਰਿਸ਼ਤੇ ਨੂੰ ਕਿਵੇਂ ਪ੍ਰਭਾਵਿਤ ਕਰੇਗਾ?

ਅਸੀਂ ਨੈਤਿਕ ਪ੍ਰਾਣੀ ਹਾਂ, ਜਿਸ ਦਾ ਅਰਥ ਹੈ ਕਿ ਅਸੀਂ ਸਮਝਦੇ ਹਾਂ ਕਿ ਕੁਝ ਕੰਮ ਸਹੀ ਅਤੇ ਕੁਝ ਕੰਮ ਗਲਤ ਹਨ, ਅਤੇ ਅਸੀਂ ਸਾਡੇ ਫੈਸਲਿਆਂ ਲਈ ਪਰਮੇਸ਼ੁਰ ਦੇ ਅੱਗੇ ਜਵਾਬਦੇਹ ਹਾਂ। ਇਹ ਸਾਨੂੰ ਵੱਡੀ ਸੰਭਾਵਿਤ ਸਮਰੱਥਾ ਅਤੇ ਵੱਡੀ ਜ਼ਿੰਮੇਵਾਰੀ ਦਿੰਦਾ ਹੈ। ਸਾਡੇ ਫੈਸਲੇ ਪਰਮੇਸ਼ੁਰ ਨਾਲ ਸਾਡੇ ਰਿਸ਼ਤੇ ਨੂੰ ਪ੍ਰਭਾਵਿਤ ਕਰਦੇ ਹਨ। ਰਿਸ਼ਤਿਆਂ ਬਾਰੇ ਪਰਮੇਸ਼ੁਰ ਦੇ ਨਿਰਦੇਸ਼ਾਂ ਦਾ ਪਾਲਣ ਕਰਨਾ, ਇਸ ਬਾਰੇ ਕੇਵਲ ਇੱਕ ਵਿਹਾਰਕ ਮਸਲਾ ਹੀ ਨਹੀਂ ਹੈ ਕਿ ਅਸੀਂ ਕਿਵੇਂ ਖੁਸ਼ ਰਹਿ ਸਕਦੇ ਹਾਂ ਅਤੇ ਕਿਵੇਂ ਆਪਣੇ ਜੀਵਨ ਤੋਂ ਉੱਤਮ ਪ੍ਰਾਪਤ ਕਰ ਸਕਦੇ ਹਾਂ। ਰਿਸ਼ਤਿਆਂ ਵਿੱਚ ਸਾਡੇ ਫੈਸਲਿਆਂ ਅਤੇ ਸਾਡੇ ਵਿਹਾਰ ਲਈ ਅਸੀਂ ਪਰਮੇਸ਼ੁਰ ਅੱਗੇ ਜਵਾਬਦੇਹ ਹਾਂ (ਰੋਮੀਆਂ 14:10, 12)।

ਪਰਮੇਸ਼ੁਰ ਸਾਨੂੰ ਦੂਸਰਿਆਂ ਨਾਲ ਉਚਿਤ ਵਿਹਾਰ ਕਰਨ ਅਤੇ ਉਨ੍ਹਾਂ ਪ੍ਰਤੀ ਪਿਆਰ ਅਤੇ ਕਿਰਪਾ ਵਿੱਚ ਕੰਮ ਕਰਨ ਲਈ ਬੁਲਾਉਂਦਾ ਹੈ (ਮੀਕਾਹ 6:8)। ਸਮੱਸਿਆ ਇਹ ਹੈ ਕਿ ਆਦਮ ਦੇ ਪਾਪ ਕਾਰਨ, ਉਸ ਦੇ ਸਾਰੇ ਵੰਸ਼ਜ ਪਾਪੀ ਸੁਭਾਅ ਦੇ ਨਾਲ ਪੈਦਾ ਹੋਏ ਹਨ (ਰੋਮੀਆਂ 5:12, 19)। ਇਸ ਕਾਰਨ, ਅਸੀਂ ਲਗਾਤਾਰ ਪਿਆਰ, ਕਿਰਪਾ, ਅਤੇ ਉਚਿਤ ਤਰੀਕਿਆਂ ਨਾਲ ਵਿਹਾਰ ਨਹੀਂ ਕਰ ਸਕਦੇ (ਰੋਮੀਆਂ 7:15-24)। ਪਰ ਜਦੋਂ ਅਸੀਂ ਨਵੇਂ ਸਿਰਿਓਂ ਜਨਮ ਲੈਂਦੇ ਹਾਂ ਤਾਂ ਪਰਮੇਸ਼ੁਰ ਦੀ ਕਿਰਪਾ ਸਾਨੂੰ ਬਦਲਦੀ ਹੈ। ਪਵਿੱਤਰ ਆਤਮਾ ਸਾਨੂੰ ਪਰਮੇਸ਼ੁਰ ਦੀਆਂ ਸ਼ਰਤਾਂ ਨੂੰ ਪੂਰਾ ਕਰਨ ਦੇ ਯੋਗ ਬਣਾਉਂਦਾ ਹੈ (ਰੋਮੀਆਂ 8:3-4)।

ਹਰੇਕ ਵਿਅਕਤੀ ਦਾ ਮਹੱਤਵ

► ਵਿਦਿਆਰਥੀਆਂ ਨੂੰ ਸਮੂਹ ਲਈ ਯਸਾਯਾਹ 44:24, ਜ਼ਬੂਰ 139:13-16, ਉਤਪਤ 9:6, ਅਤੇ ਯਾਕੂਬ 3:9 ਨੂੰ ਪੜ੍ਹਨਾ ਚਾਹੀਦਾ ਹੈ। ਇਹ ਵਚਨ ਹਰੇਕ ਜੀਵਨ ਦੇ ਮਹੱਤਵ ਬਾਰੇ ਸਾਨੂੰ ਕੀ ਦੱਸਦੇ ਹਨ? ਕੀ ਹੈ ਜੋ ਇੱਕ ਵਿਅਕਤੀ ਨੂੰ ਮਹੱਤਵ ਦਿੰਦਾ ਹੈ?

ਦੂਸਰਿਆਂ ਨਾਲ ਚੰਗੇ ਰਿਸ਼ਤੇ ਰੱਖਣ ਲਈ, ਸਾਨੂੰ ਹਰੇਕ ਵਿਅਕਤੀ ਨੂੰ ਓਹੀ ਮਹੱਤਵ ਦੇਣਾ ਚਾਹੀਦਾ ਹੈ ਜੋ ਪਰਮੇਸ਼ੁਰ ਉਨ੍ਹਾਂ ਨੂੰ ਦਿੰਦਾ ਹੈ। ਹਰੇਕ ਵਿਅਕਤੀ ਨੂੰ ਪਰਮੇਸ਼ੁਰ ਦੇ ਸਰੂਪ ’ਤੇ ਬਣਾਇਆ ਗਿਆ ਹੈ ਅਤੇ ਇਸ ਦੇ ਕਾਰਨ ਹੀ ਉਹ ਮਹੱਤਵਪੂਰਣ ਹੈ। ਹਰੇਕ ਵਿਅਕਤੀ ਪਰਮੇਸ਼ੁਰ ਦੀ ਅਨੋਖੀ ਰਚਨਾ ਹੈ, ਭਾਵੇਂ ਉਹ ਆਦਮੀ ਜਾਂ ਔਰਤ ਹੋਵੇ, ਤੰਦਰੁਸਤ ਜਾਂ ਬੀਮਾਰ ਹੋਵੇ, ਪੂਰਣ ਜਾਂ ਅਪੰਗ ਜਾਂ ਅਪਾਹਜ ਹੋਵੇ, ਜਵਾਨ ਜਾਂ ਬੁੱਢਾ ਹੋਵੇ, ਅਮੀਰ ਜਾਂ ਗਰੀਬ ਹੋਵੇ (ਕਹਾਉਤਾਂ 14:31), ਪਹਿਲਾਂ ਹੀ ਪੈਦਾ ਹੋਇਆ ਹੋਵੇ ਜਾਂ ਅਜੇ ਵੀ ਮਾਂ ਦੀ ਕੁੱਖ ਵਿੱਚ ਹੋਵੇ; ਭਾਵੇਂ ਉਨ੍ਹਾਂ ਦੀ ਚਮੜੀ ਦਾ ਰੰਗ ਕੋਈ ਵੀ ਹੋਵੇ; ਅਤੇ ਉਨ੍ਹਾਂ ਦੀਆਂ ਮਾਨਸਿਕ ਜਾਂ ਸਰੀਰਕ ਯੋਗਤਾਵਾਂ ਜਾਂ ਸੀਮਾਵਾਂ ਨਾਲ ਕੋਈ ਫਕਰ ਨਹੀਂ ਪੈਂਦਾ (ਕੂਚ 4:11)।

ਅਜਿਹੇ ਸੱਭਿਆਚਾਰ ਵੀ ਹਨ ਜਿੱਥੇ ਬਜ਼ੁਰਗਾਂ ਨੂੰ ਭੁਲਾ ਦਿੱਤਾ ਜਾਂਦਾ ਹੈ, ਔਰਤਾਂ ਨਾਲ ਅਜਿਹਾ ਵਿਹਾਰ ਕੀਤਾ ਜਾਂਦਾ ਹੈ ਜਿਵੇਂ ਉਹ ਆਦਮੀਆਂ ਨਾਲੋਂ ਘੱਟ ਮਹੱਤਵਪੂਰਣ ਹੋਣ, ਜਾਂ ਬੱਚਿਆਂ ਨੂੰ ਇੱਕ ਪਰੇਸ਼ਾਨੀ ਸਮਝਿਆ ਜਾਂਦਾ ਹੈ। ਕੁਝ ਸੱਭਿਆਚਾਰਾਂ ਵਿੱਚ, ਅਪੰਗਾਂ ਨੂੰ ਸਰਾਪੀ ਮੰਨਿਆ ਜਾਂਦਾ ਹੈ ਅਤੇ ਉਨ੍ਹਾਂ ਨੂੰ ਲੁਕਾਇਆ ਜਾਂਦਾ ਹੈ ਜਾਂ ਸਮਾਜ ਤੋਂ ਬਾਹਰ ਕੱਢ ਦਿੱਤਾ ਜਾਂਦਾ ਹੈ। ਸੰਸਾਰ ਭਰ ਵਿੱਚ ਜਾਤੀਵਾਦ ਆਮ ਹੈ: ਇੱਕ ਕਬੀਲਾ ਜਾਂ ਇੱਕ ਜਾਤੀ ਸਮੂਹ ਆਪਣੇ ਆਪ ਨੂੰ ਦੂਸਰੇ ਨਾਲੋਂ ਸਰੇਸ਼ਟ ਸਮਝਦਾ ਹੈ ਅਤੇ ਦੂਸਰੇ ਨਾਲ ਸ਼ਰਮਨਾਕ ਵਿਹਾਰ ਕਰਦਾ ਹੈ। ਇਨ੍ਹਾਂ ਵਿੱਚੋਂ ਹਰੇਕ ਕੰਮ ਲੋਕਾਂ ਦੇ ਮਹੱਤਵ ਨੂੰ ਘੱਟ ਕਰਦਾ ਹੈ, ਜੋ ਪਰਮੇਸ਼ੁਰ ਦੀ ਸਾਰੀ ਸ੍ਰਿਸ਼ਟੀ ਵਿੱਚੋਂ ਸਭ ਤੋਂ ਕੀਮਤੀ ਹਨ। ਚੰਗੇ ਅਤੇ ਪਰਮੇਸ਼ੁਰ ਨੂੰ ਆਦਰ ਦੇਣ ਵਾਲੇ ਰਿਸ਼ਤੇ ਰੱਖਣ ਲਈ, ਸਭ ਤੋਂ ਪਹਿਲਾਂ ਸਾਨੂੰ ਲੋਕਾਂ ਨੂੰ ਉਸ ਤਰ੍ਹਾਂ ਹੀ ਵੇਖਣਾ ਚਾਹੀਦਾ ਹੈ ਜਿਸ ਤਰ੍ਹਾਂ ਦੇ ਉਹ ਹਨ – ਪਰਮੇਸ਼ੁਰ ਦੇ ਸਰੂਪ ’ਤੇ ਬਣਾਏ ਗਏ।

ਪਰਕਾਸ਼ ਦੀ ਪੋਥੀ 4:11 ਸਾਨੂੰ ਦੱਸਦੀ ਹੈ ਕਿ ਪਰਮੇਸ਼ੁਰ ਨੇ ਸਾਰੀਆਂ ਚੀਜ਼ਾਂ ਨੂੰ ਆਪਣੇ ਲਈ ਬਣਾਇਆ ਹੈ। ਨਿਸ਼ਚਤ ਤੌਰ ’ਤੇ, ਇਸ ਵਿੱਚ ਮਨੁੱਖਤਾ ਵੀ ਸ਼ਾਮਲ ਹੈ। ਅਸੀਂ ਪਰਮੇਸ਼ੁਰ ਦੁਆਰਾ ਪਰਮੇਸ਼ੁਰ ਲਈ ਬਣਾਏ ਗਏ ਹਾਂ। ਅਤੇ ਜੋ ਸਭ ਅਸੀਂ ਕਰਦੇ ਹਾਂ, ਅਸੀਂ ਉਹ ਪਰਮੇਸ਼ੁਰ ਦੀ ਮਹਿਮਾ ਲਈ ਕਰਨਾ ਹੈ (1 ਕੁਰਿੰਥੀਆਂ 10:31, 1 ਪਤਰਸ 2:12)। ਸਾਨੂੰ ਦੂਸਰੇ ਲੋਕਾਂ ਦੇ ਲਾਭ ਲਈ ਵੀ ਬਣਾਇਆ ਗਿਆ ਸੀ।

ਸਾਨੂੰ ਪਰਮੇਸ਼ੁਰ ਦੇ ਉਦੇਸ਼ਾਂ ਨੂੰ ਪੂਰਾ ਕਰਨ ਲਈ ਦੂਸਰਿਆਂ ਨਾਲ ਮਿਲਕੇ ਕੰਮ ਕਰਨ ਲਈ ਬਣਾਇਆ ਗਿਆ ਸੀ। ਵਿਆਹੁਤਾ ਰਿਸ਼ਤਾ, ਲੋਕਾਂ ਦੇ ਮਿਲਕੇ ਕੰਮ ਕਰਨ ਲਈ ਪਰਮੇਸ਼ੁਰ ਦੇ ਨਮੂਨੇ ਦੀ ਇੱਕ ਉਦਾਹਰਣ ਹੈ। ਪਹਿਲੇ ਆਦਮੀ ਨੂੰ ਬਣਾਉਣ ਦੇ ਤੁਰੰਤ ਬਾਅਦ, ਪਰਮੇਸ਼ੁਰ ਨੇ ਆਖਿਆ, “ਭਈ ਚੰਗਾ ਨਹੀਂ ਕਿ ਆਦਮੀ ਇਕੱਲਾ ਰਹੇ ਸੋ ਮੈਂ ਉਹ ਦੇ ਲਈ ਉਹ ਦੇ ਵਾਂਙੁ ਇੱਕ ਸਹਾਇਕਣ ਬਣਾਵਾਂਗਾ” (ਉਤਪਤ 2:18)। ਔਰਤ ਮਹੱਤਵਪੂਰਣ ਤਰੀਕਿਆਂ ਨਾਲ ਆਦਮੀ ਵਰਗੀ ਹੀ ਹੈ, ਪਰ ਹੋਰ ਮਹੱਤਵਪੂਰਣ ਤਰੀਕਿਆਂ ਨਾਲ ਵੱਖਰੀ ਹੈ। ਉਹ ਮਿਲਕੇ ਆਪਣੇ ਵਜੂਦ ਲਈ ਪਰਮੇਸ਼ੁਰ ਦੇ ਉਦੇਸ਼ਾਂ ਨੂੰ ਪੂਰਾ ਕਰ ਸਕਦੇ ਹਨ। ਪਰਮੇਸ਼ੁਰ ਨੇ ਉਨ੍ਹਾਂ ਦੋਵਾਂ ਨੂੰ ਕੰਮ ਦਿੱਤਾ ਸੀ ਜੋ ਉਨ੍ਹਾਂ ਨੇ ਮਿਲਕੇ ਕਰਨਾ ਸੀ (ਉਤਪਤ 1:26-28)।

ਕਲੀਸਿਯਾ, ਲੋਕਾਂ ਦੇ ਮਿਲਕੇ ਕੰਮ ਕਰਨ ਲਈ ਪਰਮੇਸ਼ੁਰ ਦੇ ਨਮੂਨੇ ਦੀ ਇੱਕ ਹੋਰ ਉਦਾਹਰਣ ਹੈ। ਰਸੂਲ ਪੌਲੁਸ ਨੇ ਸਰੀਰ ਦੇ ਅੰਗਾਂ ਦੀ ਮਿਸਾਲ ਦਾ ਇਸਤੇਮਾਲ ਕੀਤਾ ਹੈ (1 ਕੁਰਿੰਥੀਆਂ 12:12-26)। ਇੱਕ ਵਿਅਕਤੀ ਨੂੰ ਇਹ ਨਹੀਂ ਸੋਚਣਾ ਚਾਹੀਦਾ ਕਿ ਉਹ ਇਕੱਲੇ ਕੰਮ ਕਰਦੇ ਹੋਏ ਪਰਮੇਸ਼ੁਰ ਦੇ ਉਦੇਸ਼ ਨੂੰ ਪੂਰਾ ਕਰ ਸਕਦਾ ਹੈ ਜਾਂ ਇਹ ਕਿ ਉਸ ਨੂੰ ਦੂਸਰੇ ਲੋਕਾਂ ਦੀ ਲੋੜ ਨਹੀਂ ਹੈ। ਵਿਆਹੁਤਾ ਰਿਸ਼ਤਾ ਅਤੇ ਕਲੀਸਿਯਾ, ਲੋਕਾਂ ਦੇ ਮਿਲਕੇ ਕੰਮ ਕਰਨ ਲਈ ਪਰਮੇਸ਼ੁਰ ਦੇ ਨਮੂਨੇ ਦੀਆਂ ਬਹੁਤ ਸਾਰੀਆਂ ਉਦਾਹਰਣਾਂ ਵਿੱਚੋਂ ਕੇਵਲ ਦੋ ਉਦਾਹਰਣ ਹਨ।

ਸਾਨੂੰ ਦੂਸਰੇ ਲੋਕਾਂ ਦੀ ਸੇਵਾ ਕਰਨ ਲਈ ਬਣਾਇਆ ਗਿਆ ਹੈ (ਗਲਾਤੀਆਂ 5:13-14)। ਸਾਨੂੰ ਦੂਸਰਿਆਂ ਨਾਲ ਪਿਆਰ ਭਰੇ ਰਿਸ਼ਤੇ ਰੱਖਣ ਲਈ ਬਣਾਇਆ ਗਿਆ ਹੈ, ਜਿਨ੍ਹਾਂ ਵਿੱਚ ਅਸੀਂ ਆਪਣੇ ਆਪ ਨੂੰ ਦੂਸਰਿਆਂ ਦੇ ਲਾਭ ਲਈ ਦੇ ਦਿੰਦੇ ਹਾਂ।

► ਵਿਦਿਆਰਥੀਆਂ ਨੂੰ ਸਮੂਹ ਲਈ ਕਹਾਉਤਾਂ 17:17, ਗਲਾਤੀਆਂ 6:2, ਅਤੇ ਫਿਲਿੱਪੀਆਂ 2:4 ਨੂੰ ਪੜ੍ਹਨਾ ਚਾਹੀਦਾ ਹੈ।

ਸਾਨੂੰ ਪਰਮੇਸ਼ੁਰ ਲਈ ਅਤੇ ਦੂਸਰੇ ਲੋਕਾਂ ਲਈ ਬਣਾਇਆ ਗਿਆ ਸੀ। ਹਰੇਕ ਸ਼ਰਤ ਜੋ ਪਰਮੇਸ਼ੁਰ ਆਪਣੇ ਵਚਨ ਵਿੱਚ ਸਾਡੇ ਲਈ ਰੱਖਦਾ ਹੈ ਉਹ ਜਾਂ ਤਾਂ ਉਸ ਨਾਲ ਸਾਡੇ ਰਿਸ਼ਤੇ ਬਾਰੇ ਹੈ, ਜਾਂ ਦੂਸਰਿਆਂ ਨਾਲ ਸਾਡੇ ਰਿਸ਼ਤੇ ਬਾਰੇ ਹੈ, ਜਾਂ ਦੋਵਾਂ ਰਿਸ਼ਤਿਆਂ ਦੇ ਬਾਰੇ ਹੈ। ਅਸਲ ਵਿੱਚ, ਯਿਸੂ ਨੇ ਆਖਿਆ ਕਿ ਹਰੇਕ ਮੰਗ ਜੋ ਪਰਮੇਸ਼ੁਰ ਸਾਡੇ ਲਈ ਰੱਖਦਾ ਹੈ, ਇਨ੍ਹਾਂ ਹੁਕਮਾਂ ਵਿੱਚ ਉਸ ਦਾ ਸਾਰ ਦਿੱਤਾ ਜਾ ਸਕਦਾ ਹੈ ਕਿ ਅਸੀਂ ਜੋ ਕੁਝ ਵੀ ਹਾਂ ਉਸ ਸਭ ਨਾਲ ਪਰਮੇਸ਼ੁਰ ਨੂੰ ਪਿਆਰ ਕਰੀਏ ਅਤੇ ਆਪਣੇ ਗੁਆਂਢੀ ਨੂੰ ਆਪਣੇ ਜਿਹਾ ਪਿਆਰ ਕਰੀਏ।

► ਇੱਕ ਵਿਦਿਆਰਥੀ ਨੂੰ ਸਮੂਹ ਲਈ ਮੱਤੀ 22:36-39 ਨੂੰ ਪੜ੍ਹਨਾ ਚਾਹੀਦਾ ਹੈ।

ਅਸੀਂ ਪਰਮੇਸ਼ੁਰ ਲਈ ਬਣਾਏ ਗਏ ਹਾਂ, ਅਤੇ ਅਸੀਂ ਦੂਸਰਿਆਂ ਲਈ ਬਣਾਏ ਗਏ ਹਾਂ; ਇਹ ਦੋਵੇਂ ਸੱਚਾਈਆਂ ਬਹੁਤ ਨੇੜਤਾ ਰੱਖਦੀਆਂ ਹਨ। ਦੂਸਰਿਆਂ ਦੇ ਨਾਲ ਸਾਡਾ ਮੇਲ-ਮਿਲਾਪ ਉਨ੍ਹਾਂ ਮੁੱਖ ਤਰੀਕਿਆਂ ਵਿੱਚੋਂ ਇੱਕ ਹੈ ਜਿਨ੍ਹਾਂ ਨਾਲ ਅਸੀਂ ਪਰਮੇਸ਼ੁਰ ਨੂੰ ਮਹਿਮਾ ਦਿੰਦੇ ਹਾਂ ਅਤੇ ਉਸ ਦੇ ਸਰੂਪ ਨੂੰ ਵਿਖਾਉਂਦੇ ਹਾਂ। ਪਰਮੇਸ਼ੁਰ ਦਾ ਚਰਿੱਤਰ ਅਤੇ ਉਸ ਦੇ ਕੰਮ ਸਾਨੂੰ ਉਸ ਵਰਗਾ ਬਣਨ ਦੀ ਜ਼ਿੰਮੇਵਾਰੀ ਦਿੰਦੇ ਹਨ (1 ਪਤਰਸ 1:16; ਮੱਤੀ 5:48)। ਸਾਰੇ ਲੋਕ ਪਰਮੇਸ਼ੁਰ ਦੇ ਸਰੂਪ ’ਤੇ ਬਣਾਏ ਗਏ ਹਨ, ਪਰ ਜਦੋਂ ਅਸੀਂ ਉਸ ਵਾਂਗ ਹੀ ਵਿਹਾਰ ਕਰਦੇ ਹਾਂ ਜਿਵੇਂ ਉਹ ਵਿਹਾਰ ਕਰਦਾ ਹੈ ਤਦ ਅਸੀਂ ਪਰਮੇਸ਼ੁਰ ਦੇ ਸੁਭਾਅ ਅਤੇ ਚਰਿੱਤਰ ਨੂੰ ਵਿਖਾਉਂਦੇ ਹਾਂ।

ਜਦੋਂ ਕੋਈ ਲੋੜਵੰਦਾਂ ਦੇ ਲਈ ਦਯਾ ਵਿਖਾਉਂਦਾ ਹੈ, ਤਦ ਉਸ ਦੀ ਦਯਾ ਪਰਮੇਸ਼ੁਰ ਦੀ ਦਯਾ ਦੀ ਨਕਲ ਹੁੰਦੀ ਹੈ, ਅਤੇ ਉਸ ਦਾ ਦਯਾ ਦਾ ਕੰਮ ਪਰਮੇਸ਼ੁਰ ਦੇ ਕੰਮ ਦੀ ਰੀਸ ਹੁੰਦਾ ਹੈ। ਭਾਵੇਂ ਦਯਾ ਵਿਖਾਉਣ ਵਾਲਾ ਵਿਸ਼ਵਾਸੀ ਜਾਂ ਅਵਿਸ਼ਵਾਸੀ ਹੋਵੇ, ਪਰ ਇਹ ਸੱਚ ਹੈ। ਪਰ ਜਦੋਂ ਪਰਮੇਸ਼ੁਰ ਦੇ ਨਾਲ ਸਾਡਾ ਮੁੜ ਮੇਲ-ਮਿਲਾਪ ਹੋ ਜਾਂਦਾ ਹੈ ਅਤੇ ਉਸ ਦਾ ਆਤਮਾ ਸਾਡੇ ਵਿੱਚ ਕੰਮ ਕਰਦਾ ਹੈ, ਤਦ ਅਸੀਂ ਉੱਤਮ ਢੰਗ ਨਾਲ ਪਰਮੇਸ਼ੁਰ ਦੀ ਰੀਸ ਕਰ ਸਕਦੇ ਹਾਂ।

► ਇੱਕ ਵਿਦਿਆਰਥੀ ਨੂੰ ਸਮੂਹ ਲਈ 2 ਪਤਰਸ 1:2-11 ਨੂੰ ਪੜ੍ਹਨਾ ਚਾਹੀਦਾ ਹੈ।

ਵਚਨ ਦਾ ਇਹ ਭਾਗ ਮਸੀਹ ਦਾ ਅਨੁਸਰਣ ਕਰਨ ਵਾਲੇ ਹਰੇਕ ਵਿਅਕਤੀ ਲਈ ਉਸ ਦੀ ਯੋਜਨਾ ਅਦਭੁਤ ਯੋਜਨਾ ਦੀ ਵਿਆਖਿਆ ਕਰਦਾ ਹੈ। ਇਸ ਭਾਗ ਤੋਂ ਅਸੀਂ ਇਹ ਸਿੱਖ ਸਕਦੇ ਹਾਂ:

1. ਉਸ ਦੀ ਮਹਿਮਾ ਅਤੇ ਭਲਾਈ ਦੇ ਦੁਆਰਾ, ਯਿਸੂ ਨੇ ਸਾਨੂੰ ਬੁਲਾਇਆ ਹੈ ਅਤੇ ਸਾਨੂੰ ਅਦਭੁਤ ਵਾਇਦੇ ਦਿੱਤੇ ਹਨ (ਆਇਤਾਂ 3-4)।

2. ਇਨ੍ਹਾਂ ਵਾਇਦਿਆਂ ਦੇ ਦੁਆਰਾ, ਸਾਡੇ ਵਿੱਚੋਂ ਜਿਹੜੇ ਮਸੀਹ ਨੂੰ ਜਾਣਦੇ ਹਨ ਉਨ੍ਹਾਂ ਵਿੱਚ ਪਰਮੇਸ਼ੁਰ ਦਾ ਈਸ਼ੁਰੀ ਸੁਭਾਅ ਹੋ ਸਕਦਾ ਹੈ (ਆਇਤ 4)।

3. ਪਰਮੇਸ਼ੁਰ ਪਿਤਾ ਅਤੇ ਯਿਸੂ ਨਾਲ ਰਿਸ਼ਤੇ ਦੁਆਰਾ, ਸਾਡੇ ਕੋਲ ਉਹ ਸਭ ਹੈ ਜਿਸ ਦੀ ਸਾਨੂੰ ਜੀਵਨ ਅਤੇ ਭਗਤੀ ਲਈ ਲੋੜ ਹੈ (ਆਇਤ 3)।

4. ਇਨ੍ਹਾਂ ਗੱਲਾਂ ਦੇ ਕਾਰਨ, ਅਸੀਂ ਉਸ ਤਰ੍ਹਾਂ ਜੀ ਸਕਦੇ ਹਾਂ ਜਿਵੇਂ ਯਿਸੂ ਜੀਵਿਆ ਸੀ ਅਤੇ ਜਿਵੇਂ ਜੀਣ ਲਈ ਸਾਨੂੰ ਪਰਮੇਸ਼ੁਰ ਨੇ ਬੁਲਾਇਆ ਹੈ (ਆਇਤਾਂ 5-8)।

► ਇਹ ਕਿਵੇਂ ਸੰਭਵ ਹੈ ਕਿ ਅਸੀਂ ਆਪਣੇ ਰਿਸ਼ਤਿਆਂ ਵਿੱਚ ਪਰਮੇਸ਼ੁਰ ਦੇ ਚਰਿੱਤਰ ਅਤੇ ਸੁਭਾਅ ਨੂੰ ਵਿਖਾ ਸਕਦੇ ਹਾਂ?

► ਇੱਕ ਵਿਦਿਆਰਥੀ ਨੂੰ ਸਮੂਹ ਲਈ 2 ਕੁਰਿੰਥੀਆਂ 4:4 ਨੂੰ ਪੜ੍ਹਨਾ ਚਾਹੀਦਾ ਹੈ। ਪਰਮੇਸ਼ੁਰ ਦੀ ਸੰਪੂਰਣ ਤਸਵੀਰ ਕੌਣ ਹੈ?

► ਇੱਕ ਵਿਦਿਆਰਥੀ ਨੂੰ ਸਮੂਹ ਲਈ 2 ਕੁਰਿੰਥੀਆਂ 3:18 ਨੂੰ ਪੜ੍ਹਨਾ ਚਾਹੀਦਾ ਹੈ।

ਪਵਿੱਤਰ ਆਤਮਾ ਵਿਸ਼ਵਾਸੀਆਂ ਨੂੰ ਪਰਮੇਸ਼ੁਰ ਦੀ ਮਹਿਮਾ ਨੂੰ ਵੱਧ ਤੋਂ ਵੱਧ ਵਿਖਾਉਣ ਲਈ ਬਦਲਦਾ ਹੈ। ਯਿਸੂ ਵੱਲ ਵੇਖਣ ਦੁਆਰਾ, ਅਸੀਂ ਸਾਡੇ ਵਿਹਾਰ ਅਤੇ ਰਵੱਈਏ ਵਿੱਚ ਜ਼ਿਆਦਾ ਤੋਂ ਜ਼ਿਆਦਾ ਉਸ ਵਰਗੇ ਬਣਾਏ ਜਾਂਦੇ ਹਾਂ। ਇਹ ਖੁਸ਼ ਖਬਰੀ ਦੀ ਸੁੰਦਰਤਾ ਹੈ। ਪਿਤਾ ਪਰਮੇਸ਼ੁਰ, ਯਿਸੂ, ਅਤੇ ਪਵਿੱਤਰ ਆਤਮਾ ਦੀ ਸਮਰੱਥਾ ਦੁਆਰਾ ਅਸੀਂ ਪਰਮੇਸ਼ੁਰ ਦੇ ਚਰਿੱਤਰ ਨੂੰ ਵਿਖਾ ਸਕਦੇ ਹਾਂ ਅਤੇ ਉਸ ਦੀ ਰੀਸ ਕਰ ਸਕਦੇ ਹਾਂ।

ਦੂਸਰਿਆਂ ਨਾਲ ਸਾਡੇ ਰਿਸ਼ਤਿਆਂ ਵਿੱਚ, ਪਰਮੇਸ਼ੁਰ ਸਾਨੂੰ ਉਸ ਦੀ ਰੀਸ ਕਰਨ ਲਈ ਬੁਲਾਉਂਦਾ ਹੈ (ਅਫ਼ਸੀਆਂ 5:1)। ਜਿਵੇਂ ਇੱਕ ਬੱਚਾ ਆਪਣੇ ਮਾਪਿਆਂ ਜਾਂ ਆਪਣੇ ਵੱਡੇ ਭੈਣ-ਭਰਾਵਾਂ ਨੂੰ ਵੇਖਦਾ ਹੈ ਅਤੇ ਉਨ੍ਹਾਂ ਦੀ ਰੀਸ ਕਰਦਾ ਹੈ, ਉਸੇ ਤਰ੍ਹਾਂ ਅਸੀਂ ਯਿਸੂ ਵੱਲ ਵੇਖਣਾ ਹੈ ਅਤੇ ਦੂਸਰਿਆਂ ਨਾਲ ਸਾਡੇ ਰਿਸ਼ਤਿਆਂ ਵਿੱਚ ਉਸ ਦੇ ਰਵੱਈਏ, ਨਜ਼ਰੀਏ, ਅਤੇ ਉਸ ਦੇ ਵਿਹਾਰਾਂ ਦੀ ਰੀਸ ਕਰਨੀ ਹੈ (ਫਿਲਿੱਪੀਆਂ 2:5-7, ਅਫ਼ਸੀਆਂ 5:2)।

► ਵਿਦਿਆਰਥੀਆਂ ਨੂੰ ਸਮੂਹ ਲਈ ਹੇਠ ਦਿੱਤੇ ਵਚਨ ਦੇ ਹਰੇਕ ਭਾਗ ਨੂੰ ਪੜ੍ਹਨਾ ਚਾਹੀਦਾ ਹੈ। ਇਨ੍ਹਾਂ ਦੋ ਗੱਲਾਂ ਬਾਰੇ ਨੋਟਸ ਲਿਖੋ (1) ਪਰਮੇਸ਼ੁਰ ਦਾ ਚਰਿੱਤਰ ਜਾਂ ਕੰਮ ਅਤੇ (2) ਸਾਡੇ ਲਈ ਪਰਮੇਸ਼ੁਰ ਦੀ ਉਮੀਦ। (ਵਚਨ ਦੇ ਪਹਿਲੇ ਦੋ ਭਾਗਾਂ ਲਈ ਨੋਟਸ ਪਹਿਲਾਂ ਹੀ ਉਦਾਹਰਣ ਦੇ ਵਜੋਂ ਲਿਖੇ ਹੋਏ ਹਨ। ਅਤੇ ਇਸ ਪਾਠ ਦੇ ਅੰਤ ਵਿੱਚ, ਕਾਰਜ 2 ਇਸ ਅਧਿਐਨ ਨੂੰ ਅੱਗੇ ਵਧਾਉਂਦਾ ਹੈ।)

ਸਾਡੇ ਵਿੱਚੋਂ ਕੋਈ ਵੀ ਸੁਭਾਵਿਕ ਤੌਰ ’ਤੇ ਪਰਮੇਸ਼ੁਰ ਦੇ ਪਿਆਰ ਨੂੰ ਨਹੀਂ ਵਿਖਾਉਂਦਾ ਹੈ ਕਿਉਂਕਿ ਅਸੀਂ ਸਵਾਰਥੀ ਸੁਭਾਅ ਦੇ ਨਾਲ ਪੈਦਾ ਹੋਏ ਹਾਂ। ਪਰਮੇਸ਼ੁਰ ਸਾਨੂੰ ਆਪਣੇ ਨਮੂਨੇ ਦੇ ਅਨੁਸਾਰ ਬਹਾਲ ਕਰਨ ਲਈ ਆਪਣੀ ਕਿਰਪਾ ਪ੍ਰਦਾਨ ਕਰਦਾ ਹੈ। ਸਮਰਪਣ ਦੀ ਇੱਕ ਹਲੀਮ ਪ੍ਰਾਰਥਨਾ ਇੱਕ ਵਿਅਕਤੀ ਨੂੰ ਇਸ ਪਰਿਵਰਤਨ ਦੇ ਵਿੱਚੋਂ ਦੀ ਲੈ ਕੇ ਜਾ ਸਕਦੀ ਹੈ।

ਬਾਈਬਲ ਖੁਲਾਸਾ ਕਰਦੀ ਹੈ ਕਿ ਪਰਮੇਸ਼ੁਰ ਨੇ ਲੋਕਾਂ ਨੂੰ ਰਿਸ਼ਤੇ ਰੱਖਣ ਲਈ ਪਿਆਰ ਨਾਲ ਬਣਾਇਆ ਹੈ: ਉਸ ਦੇ ਨਾਲ ਰਿਸ਼ਤਾ ਅਤੇ ਦੂਸਰਿਆਂ ਨਾਲ ਰਿਸ਼ਤੇ।

ਕਿਉਂਕਿ ਪਰਮੇਸ਼ੁਰ ਲੋਕਾਂ ਦਾ ਸਿਰਜਣਹਾਰ ਹੈ ਅਤੇ ਰਿਸ਼ਤਿਆਂ ਨੂੰ ਬਣਾਉਣ ਵਾਲਾ ਹੈ, ਇਸ ਲਈ ਜ਼ਰੂਰੀ ਹੈ ਕਿ ਅਸੀਂ:

1. ਸਾਡੇ ਮਨੁੱਖੀ ਰਿਸ਼ਤਿਆਂ ਵਿੱਚ ਉਸ ਦੇ ਨਜ਼ਰੀਏ ਨੂੰ ਪ੍ਰਾਪਤ ਕਰੀਏ।

2. ਇਹ ਜਾਣ ਲਈਏ ਕਿ ਸਾਡੇ ਰਿਸ਼ਤਿਆਂ ਵਿੱਚ ਅਸੀਂ ਜੋ ਫੈਸਲੇ ਲੈਂਦੇ ਹਾਂ ਉਨ੍ਹਾਂ ਲਈ ਅਸੀਂ ਉਸ ਅੱਗੇ ਜਵਾਬਦੇਹ ਹਾਂ।

3. ਸਾਡੇ ਰਿਸ਼ਤਿਆਂ ਲਈ ਉਸ ਦੀ ਯੋਜਨਾ ਨੂੰ ਸਵੀਕਾਰ ਕਰੀਏ ਅਤੇ ਉਸ ਯੋਜਨਾ ਅਨੁਸਾਰੀ ਹੀ ਚੱਲੀਏ।

ਅਧਿਐਨ ਦਾ ਇਹ ਕੋਰਸ ਇਹ ਕੰਮ ਕਰਨ ਵਿੱਚ ਤੁਹਾਡੀ ਮਦਦ ਕਰੇਗਾ ਅਤੇ ਮਨੁੱਖੀ ਰਿਸ਼ਤਿਆਂ ਵਿੱਚ ਦੂਸਰਿਆਂ ਨੂੰ ਪਰਮੇਸ਼ੁਰ ਦੀ ਇੱਛਾ ਬਾਰੇ ਸਿਖਾਉਣ ਲਈ ਤੁਹਾਨੂੰ ਤਿਆਰ ਕਰੇਗਾ।

► ਸੱਭਿਆਚਾਰ ਮਨੁੱਖੀ ਰਿਸ਼ਤਿਆਂ ਦੇ ਮਾਰਗਦਰਸ਼ਕ ਵਜੋਂ ਕਾਫ਼ੀ ਕਿਉਂ ਨਹੀਂ ਹੈ?

► ਇਸ ਪਾਠ ਵਿੱਚ ਕਿਹੜਾ ਵਿਸ਼ਾ ਤੁਹਾਡੇ ਲਈ ਨਵਾਂ ਸੀ? ਇਹ ਮਹੱਤਵਪੂਰਣ ਕਿਉਂ ਹੈ? ਇਸ ਨੂੰ ਸਮਝਣਾ ਤੁਹਾਡੇ ਰਿਸ਼ਤਿਆਂ ਵਿੱਚ ਤੁਹਾਡੀ ਮਦਦ ਕਿਵੇਂ ਕਰੇਗਾ? ਇਸ ਨੂੰ ਸਮਝਣਾ ਤੁਹਾਡੀ ਸੇਵਕਾਈ ਨੂੰ ਕਿਵੇਂ ਪ੍ਰਭਾਵਿਤ ਕਰੇਗਾ?

► ਇਸ ਕੋਰਸ ਦਾ ਅਧਿਐਨ ਕਰਨ ਦੁਆਰਾ ਤੁਸੀਂ ਕਿਵੇਂ ਵਧਣ ਦੀ ਉਮੀਦ ਕਰਦੇ ਹੋ?

ਸਵਰਗੀ ਪਿਤਾ,

ਤੇਰਾ ਧੰਨਵਾਦ ਕਿ ਤੂੰ ਮੈਨੂੰ ਆਪਣੇ ਸਰੂਪ ’ਤੇ ਮੇਰੇ ਜੀਵਨ ਲਈ ਇੱਕ ਉਦੇਸ਼ ਦੇ ਨਾਲ ਬਣਾਇਆ ਹੈ।

ਤੇਰਾ ਧੰਨਵਾਦ ਕਿ ਤੂੰ ਮੈਨੂੰ ਆਪਣੇ ਨਾਲ ਰਿਸ਼ਤਾ ਰੱਖਣ ਲਈ ਬਣਾਇਆ ਹੈ ਅਤੇ ਮੇਰੇ ਪਾਪਾਂ ਲਈ ਯਿਸੂ ਦੀ ਮੌਤ ਦੁਆਰਾ ਇਹ ਰਿਸ਼ਤਾ ਸੰਭਵ ਬਣਾਇਆ ਹੈ।

ਤੇਰੇ ਵਚਨ ਦੇ ਖਜ਼ਾਨੇ ਲਈ ਤੇਰਾ ਧੰਨਵਾਦ, ਜੋ ਮੈਨੂੰ ਸਿਖਾਉਂਦਾ ਹੈ ਕਿ ਤੇਰੇ ਨਾਲ ਰਿਸ਼ਤਾ ਕਿਵੇਂ ਰੱਖਣਾ ਹੈ ਅਤੇ ਦੂਸਰਿਆਂ ਨਾਲ ਮੇਰੇ ਰਿਸ਼ਤਿਆਂ ਵਿੱਚ ਤੈਨੂੰ ਮਹਿਮਾ ਕਿਵੇਂ ਦੇਣੀ ਹੈ।

ਤੇਰੇ ਵਚਨ ਅਤੇ ਆਤਮਾ ਦੇ ਰਾਹੀਂ, ਮੈਨੂੰ ਉਸ ਜੀਵਨ ਨੂੰ ਅਪਣਾਉਣਾ ਸਿਖਾ ਜਿਸ ਦੀ ਤੂੰ ਮੇਰੇ ਲਈ ਯੋਜਨਾ ਬਣਾਈ ਹੈ।

ਮੇਰੀ ਮਦਦ ਕਰ ਕਿ ਮੈਂ ਆਪਣੇ ਆਲੇ-ਦੁਆਲੇ ਦੇ ਹਰੇਕ ਲਈ ਤੈਨੂੰ ਸਹੀ ਤਰ੍ਹਾਂ ਪਰਗਟ ਕਰ ਸਕਾਂ, ਤਾਂ ਕਿ ਦੂਸਰੇ ਤੈਨੂੰ ਜਾਣ ਲੈਣ।

ਆਮੀਨ

(1) ਵਿਆਖਿਆ ਕਰੋ ਕਿ ਪਰਮੇਸ਼ੁਰ ਦੇ ਸਰੂਪ ਉੱਤੇ ਬਣਾਏ ਜਾਣ ਦੀ ਸੱਚਾਈ ਕਿਵੇਂ ਹਰੇਕ ਵਿਅਕਤੀ ਨੂੰ ਮਹੱਤਵਪੂਰਣ ਬਣਾਉਂਦੀ ਹੈ ਅਤੇ ਇਸ ਦਾ ਇਨਕਾਰ ਕਰਨਾ ਕਿਵੇਂ ਮਨੁੱਖ ਦੇ ਮਹੱਤਵ ਨੂੰ ਘਟਾਉਂਦਾ ਹੈ।

(2) ਹੇਠ ਦਿੱਤੇ ਟੇਬਲ ਵਿੱਚ, ਵਚਨ ਦੇ ਹਰੇਕ ਭਾਗ ਨੂੰ ਪੜ੍ਹੋ ਜੋ ਅੱਗੇ ਦਿੱਤੇ ਗਏ ਹਨ। ਇਨ੍ਹਾਂ ਗੱਲਾਂ ਬਾਰੇ ਨੋਟਸ ਲਿਖੋ (1) ਪਰਮੇਸ਼ੁਰ ਦਾ ਚਰਿੱਤਰ ਜਾਂ ਕੰਮ ਅਤੇ (2) ਸਾਡੇ ਲਈ ਪਰਮੇਸ਼ੁਰ ਦੀ ਉਮੀਦ।

(3) ਕਾਰਜ 2 ਤੋਂ ਟੇਬਲ ਨੂੰ ਵੇਖਦੇ ਹੋਏ, ਅਤੇ ਉਸ ਟੇਬਲ ਨੂੰ ਵੇਖਦੇ ਹੋਏ ਜੋ ਪਾਠ ਦੇ ਅੰਤ ਵਿੱਚ ਦਿੱਤਾ ਗਿਆ ਹੈ, ਇੱਕ ਪਲ ਦਾ ਸਮਾਂ ਆਪਣੇ ਜੀਵਨ ਦੀ ਜਾਂਚ ਕਰਨ ਲਈ ਲਵੋ:

• ਕੀ ਤੁਸੀਂ ਹੁਣ ਪਰਮੇਸ਼ੁਰ ਦੇ ਸਰੂਪ ਨੂੰ ਉਸ ਢੰਗ ਨਾਲ ਪਰਗਟ ਕਰ ਰਹੇ ਹੋ ਜੋ ਉਸ ਨੂੰ ਆਦਰ ਅਤੇ ਮਹਿਮਾ ਦਿੰਦਾ ਹੈ?

• ਕੀ ਕੋਈ ਅਵੱਗਿਆ ਹੈ ਜਿਸ ਦਾ ਅੰਗੀਕਾਰ ਕਰਨ ਦੀ ਲੋੜ ਹੈ ਤਾਂ ਜੋ ਤੁਹਾਡਾ ਜੀਵਨ ਹੋਰ ਸਪਸ਼ਟਤਾ ਅਤੇ ਸ਼ਕਤੀਸ਼ਾਲੀ ਢੰਗ ਨਾਲ ਤੁਹਾਡੇ ਜੀਵਨ ਲਈ ਪਰਮੇਸ਼ੁਰ ਦੇ ਉਦੇਸ਼ ਅਨੁਸਾਰ ਹੋ ਸਕੇ।

• ਕਿਹੜਾ ਕਦਮ ਹੈ ਜੋ ਪਰਮੇਸ਼ੁਰ ਚਾਹੁੰਦਾ ਹੈ ਕਿ ਤੁਸੀਂ ਹੋਰ ਯਿਸੂ ਵਰਗੇ ਬਣਨ ਲਈ ਉਠਾਓ?

ਇਸ ਅਧਿਐਨ ਦੇ ਜਵਾਬ ਵਿੱਚ ਇੱਕ ਪੈਰੇ ਦੀ ਪ੍ਰਾਰਥਨਾ ਲਿਖੋ। (ਇਹ ਲਿਖਤ ਤੁਹਾਨੂੰ ਆਪਣੀ ਕਲਾਸ ਦੇ ਆਗੂ ਨਾਲ ਸਾਂਝੀ ਕਰਨ ਦੀ ਲੋੜ ਨਹੀਂ ਹੈ ਪਰ ਤੁਸੀਂ ਬੱਸ ਦੱਸ ਸਕਦੇ ਹੋ ਕਿ ਤੁਸੀਂ ਇਹ ਕਾਰਜ ਕੀਤਾ ਹੈ।)

ਇੱਥੇ ਪ੍ਰਿੰਟ ਕਰਨ ਯੋਗ PDF ਹੈ।