Lesson 4: ਲਿੰਗਕਤਾ ਦੇ ਮਸਲੇ

ਇਸ ਪਾਠ ਦੇ ਅੰਤ ਵਿੱਚ, ਵਿਦਿਆਰਥੀ ਹੇਠਾਂ ਦੱਸੇ ਕੰਮ ਕਰਨ ਦੇ ਯੋਗ ਹੋਣੇ ਚਾਹੀਦੇ ਹਨ:

(1) ਇਹ ਸਮਝਾਉਣਾ ਕਿ ਪਤਨ ਨੇ ਮਨੁੱਖੀ ਸੁਭਾਅ ਅਤੇ ਲਿੰਗਕ ਇੱਛਾਵਾਂ ਨੂੰ ਕਿਵੇਂ ਪ੍ਰਭਾਵਿਤ ਕੀਤਾ।

(2) ਨਿੱਜੀ ਪਹਿਚਾਣ ਦੀ ਵਿਆਖਿਆ ਕਰਨਾ ਅਤੇ ਇਹ ਦੱਸਣਾ ਕਿ ਇਹ ਨਿੱਜੀ ਨੈਤਕਿਤਾ ਦੇ ਨਾਲ ਕਿਵੇਂ ਸੰਬੰਧ ਰੱਖਦੀ ਹੈ।

(3) ਮਨੁੱਖੀ ਲਿੰਗਕਤਾ ਅਤੇ ਲਿੰਗਕ ਹਰਾਮਕਾਰੀ ਪ੍ਰਤੀ ਬਾਈਬਲ ਅਧਾਰਤ ਇੱਕ ਰਵੱਈਏ ਨੂੰ ਅਪਣਾਉਣਾ।

(4) ਪਾਪ ਤੋਂ ਆਜ਼ਾਦੀ ਪਾਉਣਾ ਅਤੇ ਹਰਾਮਕਾਰੀ ਲਈ ਪਰਤਾਏ ਜਾਣ ਸਮੇਂ ਜਿੱਤ ਦਾ ਅਨੁਭਵ ਕਰਨਾ।

(5) ਜਿਨ੍ਹਾਂ ਨੂੰ ਮਦਦ ਅਤੇ ਜਿੱਤ ਦੀ ਲੋੜ ਹੈ ਉਨ੍ਹਾਂ ਦੀ ਸੇਵਾ ਕਰਨ ਲਈ ਤਿਆਰ ਰਹਿਣਾ।

ਕ੍ਰਿਸਟੋਫਰ ਅਮਰੀਕਾ ਵਿੱਚ ਇੱਕ ਏਸ਼ੀਆਈ-ਅਮਰੀਕੀ ਪਰਿਵਾਰ ਵਿੱਚ ਵੱਡਾ ਹੋਇਆ ਸੀ। ਉਹ ਆਪਣੀ ਕਿਸ਼ੋਰ ਅਵਸਥਾ ਤੋਂ ਹੀ ਔਰਤਾਂ ਦੀ ਬਜਾਏ ਮਰਦਾਂ ਵੱਲ ਆਕਰਸ਼ਣ ਮਹਿਸੂਸ ਕਰਦਾ ਸੀ। ਉਸ ਦੇ ਮਾਪਿਆਂ ਨੂੰ ਉਸ ਦੀ ਰੁਚੀ ਦੇ ਕਾਰਨ ਸਦਮਾ ਲੱਗਿਆ ਅਤੇ ਉਹ ਸ਼ਰਮਿੰਦਾ ਸਨ। ਇੱਕ ਜਵਾਨ ਬਾਲਗ ਦੇ ਰੂਪ ਵਿੱਚ ਉਹ ਲਗਾਤਾਰ ਮਰਦਾਂ ਦੇ ਨਾਲ ਰਿਸ਼ਤਿਆਂ ਵਿੱਚ ਰਿਹਾ ਸੀ। ਉਸ ਨੂੰ ਉਮੀਦ ਸੀ ਕਿ ਉਸ ਨੂੰ ਸੱਚਾ ਪਿਆਰ ਅਤੇ ਸਮਰਪਣ ਮਿਲੇਗਾ, ਪਰ ਅਖੀਰ ਹਰੇਕ ਰਿਸ਼ਤਾ ਅਸਫ਼ਲ ਹੋ ਜਾਂਦਾ। ਉਸ ਨੇ ਲਾਪਰਵਾਹੀ ਦੇ ਨਾਲ ਕਈ ਮਰਦਾਂ ਨਾਲ ਭ੍ਰਿਸ਼ਟ ਰਿਸ਼ਤੇ ਬਣਾਉਣੇ ਸ਼ੁਰੂ ਕਰ ਦਿੱਤੇ। ਕ੍ਰਿਸਟੋਫਰ ਲਈ ਉਦੋਂ ਸਭ ਕੁਝ ਬਦਲਣਾ ਸ਼ੁਰੂ ਹੋ ਗਿਆ ਜਦੋਂ ਉਸ ਦੀ ਮਾਂ ਇੱਕ ਵਿਸ਼ਵਾਸੀ ਬਣ ਗਈ ਅਤੇ ਉਸ ਲਈ ਉਹ ਪਿਆਰ ਅਤੇ ਪਰਵਾਨਗੀ ਵਿਖਾਈ ਜਿਸ ਦਾ ਉਸ ਨੇ ਪਹਿਲਾਂ ਕਦੇ ਵੀ ਅਨੁਭਵ ਨਹੀਂ ਕੀਤਾ ਸੀ। ਉਸ ਨੂੰ ਅਹਿਸਾਸ ਹੋਣਾ ਸ਼ੁਰੂ ਹੋਇਆ ਕਿ ਉਸ ਦੀ ਮੁੱਖ ਪਹਿਚਾਣ ਪਰਮੇਸ਼ੁਰ ਦੇ ਸਰੂਪ ’ਤੇ ਬਣਾਏ ਗਏ ਇੱਕ ਵਿਅਕਤੀ ਦੀ ਹੈ। ਉਸ ਨੇ ਤੋਬਾ ਕੀਤੀ ਅਤੇ ਆਪਣੇ ਜੀਵਨ ਦੇ ਸਾਰੇ ਪਹਿਲੂਆਂ ਨੂੰ ਪਰਮੇਸ਼ੁਰ ਨੂੰ ਸੌਂਪਿਆ। ਉਸ ਨੇ ਪਰਮੇਸ਼ੁਰ ਨਾਲ ਆਪਣੇ ਰਿਸ਼ਤੇ ਵਿੱਚ ਸੰਤੁਸ਼ਟੀ ਅਤੇ ਉਦੇਸ਼ ਪਾਇਆ।

ਜਦੋਂ ਪਰਮੇਸ਼ੁਰ ਨੇ ਆਦਮ ਅਤੇ ਹੱਵਾਹ ਨੂੰ ਬਣਾਇਆ ਸੀ, ਉਸ ਨੇ ਉਨ੍ਹਾਂ ਨੂੰ ਹਰ ਤਰ੍ਹਾਂ ਦੇ ਨਾਲ ਸੰਪੂਰਣ ਬਣਾਇਆ ਸੀ, ਜਿਨ੍ਹਾਂ ਵਿੱਚ ਕੋਈ ਨੁਕਸ ਜਾਂ ਕਮੀ ਨਹੀਂ ਸੀ (ਉਤਪਤ 1:31)। ਉਨ੍ਹਾਂ ਦੇ ਸੁਭਾਅ ਕੇਵਲ ਉਸ ਦੀ ਹੀ ਇੱਛਾ ਰੱਖਦੇ ਸਨ ਜੋ ਸਹੀ ਅਤੇ ਭਲਾ ਸੀ। ਉਨ੍ਹਾਂ ਦੇ ਮਨ ਅਤੇ ਸਰੀਰ ਸਹੀ ਤਰ੍ਹਾਂ ਨਾਲ ਕੰਮ ਕਰਦੇ ਸਨ। ਫਿਰ ਆਦਮ ਨੇ ਪਰਮੇਸ਼ੁਰ ਦੇ ਹੁਕਮ ਦੀ ਉਲੰਘਣਾ ਕਰਨ ਦਾ ਫੈਸਲਾ ਲਿਆ। ਜਦੋਂ ਉਸ ਨੇ ਅਜਿਹਾ ਕੀਤਾ, ਤਾਂ ਮਨੁੱਖੀ ਸੁਭਾਅ ਭ੍ਰਿਸ਼ਟ ਹੋ ਗਿਆ (ਰੋਮੀਆਂ 8:20-23)। ਇਸ ਨੇ ਮਨੁੱਖੀ ਸਰੀਰਾਂ ਅਤੇ ਮਨਾਂ ਨੂੰ ਪ੍ਰਭਾਵਿਤ ਕੀਤਾ। ਇੱਥੋਂ ਤਕ ਕਿ ਸਭ ਤੋਂ ਤੰਦਰੁਸਤ, ਸਭ ਤੋਂ ਬੁੱਧੀਮਾਨ ਵਿਅਕਤੀ ਵੀ ਪਾਪ ਦੇ ਨਤੀਜਿਆਂ ਤੋਂ ਪ੍ਰਭਾਵਿਤ ਹੁੰਦਾ ਹੈ। ਪਾਪ ਨੇ ਉਸ ਨੂੰ ਸਥਾਈ ਤੌਰ ’ਤਬਾਹ ਕਰ ਦਿੱਤਾ ਜੋ ਸੰਪੂਰਣ ਸੀ। ਮਸੀਹ ਦੇ ਵਾਪਸ ਆਉਣ ਤਕ ਸ੍ਰਿਸ਼ਟੀ ਦੀ ਕੋਈ ਵੀ ਚੀਜ਼ ਪੂਰੀ ਤਰ੍ਹਾਂ ਚੰਗਾਈ ਪ੍ਰਾਪਤ ਨਹੀਂ ਕਰੇਗੀ (1 ਕੁਰਿੰਥੀਆਂ 15)।

ਜੋ ਨੁਕਸਾਨ ਮਨੁੱਖੀ ਸੁਭਾਅ ਅਤੇ ਸਰੀਰਾਂ ਨੂੰ ਹੋਇਆ ਹੈ, ਉਸ ਦੇ ਕਾਰਨ ਸਾਨੂੰ ਇਹ ਉਮੀਦ ਨਹੀਂ ਰੱਖਣੀ ਚਾਹੀਦੀ ਕਿ ਸਾਡੇ ਸਰੀਰਾਂ ਦੀਆਂ ਸੁਭਾਵਕ ਇੱਛਾਵਾਂ ਹਮੇਸ਼ਾ ਸਹੀ ਅਤੇ ਸੰਤੁਲਨ ਵਿੱਚ ਹੋਣਗੀਆਂ। ਸੱਚਾਈ ਇਹ ਹੈ ਕਿ ਸਾਡੀਆਂ ਬਹੁਤ ਸਾਰੀਆਂ ਇੱਛਾਵਾਂ ਸੰਤੁਲਨ ਤੋਂ ਬਾਹਰ ਹਨ। ਲੋਕ ਸੁਭਾਵਕ ਤੌਰ ’ਤੇ ਉਸ ਦੀ ਇੱਛਾ ਰੱਖਦੇ ਹਨ ਜੋ ਗਲਤ ਹੈ। ਜਦੋਂ ਯਿਸੂ ਨੇ ਉਨ੍ਹਾਂ ਸਾਰੇ ਪਾਪਾਂ ਦੀ ਸੂਚੀ ਬਣਾਈ ਜੋ ਦਿਲ ਤੋਂ ਨਿੱਕਲਦੇ ਹਨ ਤਾਂ ਉਸ ਨੇ ਮਨੁੱਖਤਾ ਦੇ ਸੁਭਾਵਕ ਤੌਰ ’ਤੇ ਪਾਪੀ ਹੋਣ ਨੂੰ ਵੇਖਿਆ (ਮਰਕੁਸ 7:21-22)।

ਇਸ ਪਾਠ ਵਿੱਚ, ਅਸੀਂ ਲਿੰਗਕਤਾ ਦੇ ਮਸਲਿਆਂ ਬਾਰੇ ਗੱਲ ਕਰ ਰਹੇ ਹਾਂ। ਸਾਰੀਆਂ ਮਨੁੱਖੀ ਇੱਛਾਵਾਂ ਵਿੱਚੋਂ, ਲਿੰਗਕ ਇੱਛਾਵਾਂ ਸਭ ਤੋਂ ਸ਼ਕਤੀਸ਼ਾਲੀ ਹੋ ਸਕਦੀਆਂ ਹਨ।

ਗਲਤ ਲਿੰਗਕ ਇੱਛਾਵਾਂ ਉਸ ਵਿਅਕਤੀ ਲਈ ਸੁਭਾਵਕ ਜਾਪਦੀਆਂ ਹਨ ਜੋ ਉਨ੍ਹਾਂ ਨੂੰ ਮਹਿਸੂਸ ਕਰਦਾ ਹੈ। ਉਹ ਸੋਚਦਾ ਹੈ ਕਿ ਉਸ ਨੂੰ ਆਪਣੀਆਂ ਇੱਛਾਵਾਂ ਦੇ ਅਨੁਸਾਰ ਕੰਮ ਕਰਨ ਦੇ ਲਈ ਦੋਸ਼ੀ ਨਹੀਂ ਠਹਿਰਾਇਆ ਜਾਣਾ ਚਾਹੀਦਾ। ਪਰ, ਹਰੇਕ ਵਿਅਕਤੀ ਨੂੰ ਸਹੀ ਕਰਨ ਲਈ ਆਪਣੇ ਸੁਭਾਵਕ ਝੁਕਾਅ ਦਾ ਵਿਰੋਧ ਕਰਨਾ ਚਾਹੀਦਾ ਹੈ। ਇੱਕ ਵਿਅਕਤੀ ਦਾ ਸੁਭਾਵਕ ਝੁਕਾਅ ਝੂਠ ਬੋਲਣ ਜਾਂ ਚੋਰੀ ਕਰਨ, ਜਾਂ ਹਿੰਸਕ ਬਣਨ, ਜਾਂ ਆਲਸ, ਜਾਂ ਬੇਸਬਰੀ ਵੱਲ ਹੋ ਸਕਦਾ ਹੈ। ਲੋਕ ਇਸ ਬੁਰੀ ਹਾਲਤ ਵਿੱਚ ਪੈਦਾ ਹੋਣ ਲਈ ਜ਼ਿੰਮੇਵਾਰ ਨਹੀਂ ਹਨ, ਪਰ ਲੋਕ ਜਦੋਂ ਸੁਭਾਵਕ ਇੱਛਾਵਾਂ ਦੇ ਅਨੁਸਾਰ ਚੱਲਦੇ ਹਨ ਅਤੇ ਪਾਪ ਕਰਦੇ ਹਨ, ਤਾਂ ਉਹ ਦੋਸ਼ੀ ਹੁੰਦੇ ਹਨ।

ਕਈ ਵਾਰ ਬਚਪਨ ਦਾ ਸ਼ੋਸ਼ਣ ਜਾਂ ਆਲੇ-ਦੁਆਲੇ ਦੇ ਹੋਰ ਹਾਲਾਤ, ਇੱਕ ਵਿਅਕਤੀ ਦੇ ਸਮਲਿੰਗੀ ਖਿਆਲਾਂ ਜਾਂ ਹੋਰ ਗਲਤ ਲਿੰਗਕ ਇੱਛਾਵਾਂ ਦੇ ਨਾਲ ਸੰਘਰਸ਼ ਦਾ ਕਾਰਣ ਬਣਦੇ ਹਨ। ਹਾਲਾਂਕਿ, ਗਲਤ ਲਿੰਗਕ ਇੱਛਾਵਾਂ ਨੂੰ ਹੋਰ ਪਾਪਮਈ ਇੱਛਾਵਾਂ ਤੋਂ ਵੱਖਰਾ ਨਹੀਂ ਸਮਝਿਆ ਜਾਣਾ ਚਾਹੀਦਾ। ਭਾਵੇਂ ਕੋਈ ਵੀ ਕਾਰਨ ਹੋਵੇ, ਵਿਅਕਤੀ ਨੂੰ ਪਰਮੇਸ਼ੁਰ ਵੱਲੋਂ ਛੁਟਕਾਰੇ ਅਤੇ ਸ਼ੁੱਧਤਾ ਲਈ ਉਸੇ ਕਿਰਪਾ ਦੀ ਲੋੜ ਹੁੰਦੀ ਹੈ।

ਇਹ ਸੱਚਾਈ ਤੁਹਾਨੂੰ ਹੈਰਾਨ ਨਾ ਕਰੇ ਕੁਝ ਲੋਕਾਂ ਨੂੰ ਗਲਤ ਇੱਛਾਵਾਂ ਸੁਭਾਵਕ ਜਾਪਦੀਆਂ ਹਨ। ਜਿਹੜਾ ਵਿਅਕਤੀ ਪਾਪ ਲਈ ਇੱਛਾ ਦਾ ਅਨੁਭਵ ਕਰਦਾ ਹੈ ਉਸ ਨੂੰ ਪਾਪ ਆਮਤੌਰ ’ਤੇ ਠੀਕ ਅਤੇ ਸੁਭਾਵਕ ਲੱਗਦਾ ਹੈ।

ਅਸੀਂ ਆਪਣੇ ਸੁਭਾਅ ਦੇ ਕਾਰਨ ਕ੍ਰੋਧ ਦੇ ਬੱਚੇ ਹਾਂ (ਅਫ਼ਸੀਆਂ 2:3)। ਇਸ ਦਾ ਮਤਲਬ ਹੈ ਕਿ ਸਾਡਾ ਸੁਭਾਵਕ ਝੁਕਾਅ ਪਾਪ ਦੇ ਵੱਲ ਹੈ, ਅਸੀਂ ਉਹ ਪਾਪ ਕਰਨ ਦੁਆਰਾ ਆਪਣੇ ਆਪ ਨੂੰ ਸਜ਼ਾ ਦੇ ਵਿੱਚ ਲਿਆਉਂਦੇ ਹਾਂ ਜੋ ਸਾਡੇ ਲਈ ਸੁਭਾਵਕ ਹੈ। ਇਹ ਸੱਚਾਈ ਕਿ ਇੱਕ ਵਿਅਕਤੀ ਪਾਪ ਵੱਲ ਇੱਕ ਵਿਸ਼ੇਸ਼ ਪ੍ਰਕਾਰ ਦੇ ਝੁਕਾਅ ਦੇ ਨਾਲ ਪੈਦਾ ਹੋਇਆ, ਇਸ ਦਾ ਮਤਲਬ ਇਹ ਨਹੀਂ ਹੈ ਕਿ ਉਸ ਨੂੰ ਉਸੇ ਦੇ ਅਨੁਸਾਰ ਚੱਲਣਾ ਚਾਹੀਦਾ ਹੈ, ਭਾਵੇਂ ਕਿ ਇਹ ਉਸ ਲਈ ਠੀਕ ਜਾਪਦਾ ਹੋਵੇ।

► ਸਾਨੂੰ ਸਾਡੀਆਂ ਸਾਰੀਆਂ ਸੁਭਾਵਕ ਇੱਛਾਵਾਂ ਦਾ ਪਾਲਣ ਕਿਉਂ ਨਹੀਂ ਕਰਨਾ ਚਾਹੀਦਾ?

ਬਾਈਬਲ ਸਾਨੂੰ ਦੱਸਦੀ ਹੈ ਕਿ ਸਾਨੂੰ ਮਸੀਹ ਵਰਗੇ ਬਣਨ ਲਈ ਸੱਦਿਆ ਗਿਆ ਹੈ (ਰੋਮੀਆਂ 8:29)। ਅਸੀਂ ਪ੍ਰਭੂ ਯਿਸੂ ਮਸੀਹ ਨੂੰ ਪਹਿਨਣਾ ਹੈ। ਸਾਡੀਆਂ ਸਰੀਰਕ ਇੱਛਾਵਾਂ ਸਾਡੇ ਜੀਵਨ ਦਾ ਅਧਾਰ ਨਹੀਂ ਹੋਣੀਆਂ ਚਾਹੀਦੀਆਂ। ਇਸ ਦੇ ਬਜਾਏ, ਸਾਨੂੰ ਗਲਤ ਖਿਆਲਾਂ ਨੂੰ ਪਰਮੇਸ਼ੁਰ ਦੇ ਅਧਿਕਾਰ ਦੇ ਅਧੀਨ ਕਰਨਾ ਚਾਹੀਦਾ ਹੈ (ਰੋਮੀਆਂ 13:14)।

► ਸਾਡੇ ਗਲਤ ਖਿਆਲਾਂ ਨੂੰ ਪਰਮੇਸ਼ੁਰ ਦੇ ਅਧਿਕਾਰ ਦੇ ਅਧੀਨ ਕਰਨਾ ਕਿਸ ਤਰ੍ਹਾਂ ਦਾ ਜਾਪਦਾ ਹੈ?

ਤੁਹਾਡੀਆਂ ਲਿੰਗਕ ਇੱਛਾਵਾਂ ਤੁਹਾਡੇ ਅੰਤਿਮ ਉਦੇਸ਼ ਦੇ ਅਧੀਨ ਕੀਤੀਆਂ ਜਾਣੀਆਂ ਚਾਹੀਦੀਆਂ ਹਨ, ਜੋ ਕਿ ਪਰਮੇਸ਼ੁਰ ਦੇ ਸਰੂਪ ਨੂੰ ਵਿਖਾਉਣ ਦੁਆਰਾ ਪਰਮੇਸ਼ੁਰ ਨੂੰ ਮਹਿਮਾ ਦੇਣਾ ਹੈ। ਮਸੀਹ ਦਾ ਅਨੁਸਰਣ ਕਰਨ ਵਾਲਾ ਇੱਕ ਜੀਵਨ ਅਜਿਹਾ ਜੀਵਨ ਹੈ ਜੋ ਤੁਹਾਡੇ ਵਿਚਲੇ ਪਰਮੇਸ਼ੁਰ ਦੇ ਸਰੂਪ ਨਾਲ ਮੇਲ ਖਾਂਦਾ ਹੈ।

ਮਨੁੱਖੀ ਪਹਿਚਾਣ ਬਾਰੇ ਇੱਕ ਸਹੀ ਸਮਝ

ਬਹੁਤ ਸਾਰੇ ਲੋਕ ਇਹ ਗਲਤ ਧਾਰਨਾ ਰੱਖਦੇ ਹਨ ਕਿ ਉਨ੍ਹਾਂ ਦੀ ਸਹੀ ਰਾਹ ਵਿੱਚ ਅਗਵਾਈ ਕਰਨ ਲਈ ਉਨ੍ਹਾਂ ਦੇ ਮਨੁੱਖੀ ਸੁਭਾਅ ਉੱਤੇ ਭਰੋਸਾ ਕੀਤਾ ਜਾ ਸਕਦਾ ਹੈ। ਉਨ੍ਹਾਂ ਨੂੰ ਇਹ ਉਚਿੱਤ ਜਾਪਦਾ ਹੈ ਕਿ ਜੋ ਇੱਛਾਵਾਂ ਉਨ੍ਹਾਂ ਦੇ ਆਪਣੇ ਸੁਭਾਅ ਤੋਂ ਆਉਂਦੀਆਂ ਹਨ ਉਹ ਉਨ੍ਹਾਂ ਦੀ ਸੰਤੁਸ਼ਟੀ ਵੱਲ ਅਗਵਾਈ ਕਰਨਗੀਆਂ। ਉਹ ਇਹ ਨਹੀਂ ਜਾਣਦੇ ਹਨ ਕਿ ਉਨ੍ਹਾਂ ਦੇ ਸੁਭਾਅ ਉੱਤੇ ਭਰੋਸਾ ਨਹੀਂ ਕੀਤਾ ਜਾ ਸਕਦਾ ਕਿਉਂਕਿ ਇਸ ਨੂੰ ਪਾਪ ਦੁਆਰਾ ਬਰਬਾਦ ਕੀਤਾ ਗਿਆ ਹੈ। ਇੱਕ ਵਿਅਕਤੀ ਦੀਆਂ ਸੁਭਾਵਕ ਇੱਛਾਵਾਂ ਉਸ ਦੀ ਸੰਤੁਸ਼ਟੀ ਦੇ ਵੱਲ ਅਗਵਾਈ ਨਹੀਂ ਕਰਨਗੀਆਂ ਕਿਉਂਕਿ ਉਸ ਦੀਆਂ ਇੱਛਾਵਾਂ ਵਿਗੜੀਆਂ ਹੋਈਆਂ ਹਨ। ਨਾ ਹੀ ਵਿਅਕਤੀ ਦੀਆਂ ਸੁਭਾਵਕ ਇੱਛਾਵਾਂ ਉਸ ਦੀ ਉਸ ਵੱਲ ਅਗਵਾਈ ਕਰ ਸਕਦੀਆਂ ਹਨ ਜੋ ਨੈਤਿਕ ਤੌਰ ’ਤੇ ਸਹੀ ਹੈ, ਕੇਵਲ ਪਰਮੇਸ਼ੁਰ ਅਗਵਾਈ ਕਰ ਸਕਦਾ ਹੈ।

ਲੋਕ ਮੰਨਦੇ ਹਨ ਕਿ ਉਨ੍ਹਾਂ ਨੂੰ ਜੀਵਨ ਲਈ ਆਪਣਾ ਖੁਦ ਦਾ ਉਦੇਸ਼ ਬਣਾਉਣ ਲਈ ਆਪਣੀਆਂ ਖੁਦ ਦੀਆਂ ਇੱਛਾਵਾਂ ਅਤੇ ਭਾਵਨਾਵਾਂ ਦੇ ਅਨੁਸਾਰ ਚੱਲਣਾ ਚਾਹੀਦਾ ਹੈ। ਉਹ ਮੰਨਦੇ ਹਨ ਕਿ ਇੱਕ ਨਿੱਜੀ ਪਹਿਚਾਣ ਬਣਾਉਣਾ ਮਹੱਤਵਪੂਰਣ ਹੈ ਜਿਸ ਨੂੰ ਕਿਸੇ ਅਧਿਕਾਰ ਜਾਂ ਨੈਤਿਕ ਸ਼ਰਤਾਂ ਦੁਆਰਾ ਪ੍ਰੀਭਾਸ਼ਿਤ ਨਹੀਂ ਕੀਤਾ ਜਾਂਦਾ ਜਾਂ ਇਹ ਇਨ੍ਹਾਂ ਦੁਆਰਾ ਸੀਮਿਤ ਨਹੀਂ ਹੁੰਦੀ। ਉਹ ਸੋਚਦੇ ਹਨ ਕਿ ਲੋਕਾਂ ਨੂੰ ਆਪਣੇ ਲਈ ਫੈਸਲਾ ਲੈਣਾ ਚਾਹੀਦਾ ਹੈ ਕਿ ਉਨ੍ਹਾਂ ਲਈ ਕੀ ਸਹੀ ਅਤੇ ਮਹੱਤਵਪੂਰਣ ਹੈ। ਉਹ ਆਪਣੇ ਖੁਦ ਦੇ ਸੁਭਾਵਾਂ ’ਤੇ ਭਰੋਸਾ ਕਰਦੇ ਹਨ ਕਿ ਇਹ ਉਨ੍ਹਾਂ ਦੀ ਸਹੀ ਰਾਹ ਵਿੱਚ ਅਗਵਾਈ ਕਰਨਗੇ। ਉਹ ਅਜਿਹੇ ਸੰਸਥਾਨਾਂ ਜਾਂ ਨਿਯਮਾਂ ਨੂੰ ਪਸੰਦ ਨਹੀਂ ਕਰਦੇ ਜੋ ਉਨ੍ਹਾਂ ਦੇ ਵਿਹਾਰ ਨੂੰ ਸੀਮਿਤ ਕਰਦੇ ਹਨ। ਪਰਮੇਸ਼ੁਰ ਦੇ ਵਚਨ ਦੇ ਸਥਾਨ ’ਤੇ ਭ੍ਰਿਸ਼ਟ ਮਨੁੱਖੀ ਸੁਭਾਅ ਨੈਤਿਕਤਾ ਦਾ ਮਿਆਰ ਬਣ ਜਾਂਦਾ ਹੈ।

ਕਿਉਂਕਿ ਲਿੰਗਕਤਾ ਮਨੁੱਖੀ ਸੁਭਾਅ ਦਾ ਇੱਕ ਸ਼ਕਤੀਸ਼ਾਲੀ ਹਿੱਸਾ ਹੈ, ਬਹੁਤ ਸਾਰੇ ਲੋਕ ਲਿੰਗਕ ਇੱਛਾਵਾਂ ਨੂੰ ਆਪਣੀ ਪਹਿਚਾਣ ਦਾ ਕੇਂਦਰ ਮੰਨਦੇ ਹਨ। ਉਹ ਸੋਚਦੇ ਹਨ ਕਿ ਜੋ ਉਹ ਹਨ, ਸੱਚਮੁੱਚ ਉਹ ਬਣਨ ਲਈ ਉਨ੍ਹਾਂ ਨੂੰ ਆਪਣੀਆਂ ਲਿੰਗਕ ਇੱਛਾਵਾਂ ਦੇ ਅਨੁਸਾਰ ਚੱਲਣਾ ਚਾਹੀਦਾ ਹੈ। ਲੋਕ ਸੋਚਦੇ ਹਨ ਕਿ ਲਿੰਗਕਤਾ ਸਿਰਫ ਉਹ ਨਹੀਂ ਹੈ ਜੋ ਉਹ ਚਾਹੁੰਦੇ ਹਨ ਜਾਂ ਕਰਦੇ ਹਨ, ਇਹ ਉਹ ਹੈ ਜੋ ਉਹ ਹਨ। ਉਹ ਇਸ ਨੂੰ ਆਪਣੀ ਪਹਿਚਾਣ ਬਣਾ ਲੈਂਦੇ ਹਨ।

ਸੰਸਾਰ ਦੀ ਸੋਚ ਦੇ ਉਲਟ, ਬਾਈਬਲ ਸਾਨੂੰ ਦੱਸਦੀ ਹੈ ਕਿ ਅਸੀਂ ਪਰਮੇਸ਼ੁਰ ਦੇ ਸਰੂਪ ਉੱਤੇ ਬਣਾਏ ਗਏ ਹਾਂ, ਪਰਮੇਸ਼ੁਰ ਨਾਲ ਰਿਸ਼ਤਾ ਰੱਖਣ ਦੇ ਉਦੇਸ਼ ਨਾਲ ਸਾਨੂੰ ਰਚਿਆ ਗਿਆ ਹੈ। ਮਨੁੱਖਾਂ ਦੇ ਰੂਪ ਵਿੱਚ ਇਹੋ ਸਾਡੀ ਸੱਚੀ ਪਹਿਚਾਣ ਹੈ।

ਸਾਡੀ ਦੁਨਿਆਵੀ ਹੋਂਦ ਵਿੱਚ ਕੁਝ ਵੀ ਸਾਨੂੰ ਸਾਡੀ ਅੰਤਿਮ, ਸੱਚੀ ਪਹਿਚਾਣ ਨਹੀਂ ਦੇ ਸਕਦਾ। ਸਾਡੀ ਦੁਨਿਆਵੀ ਹੋਂਦ ਦੇ ਗੁਣ, ਬੱਸ ਉਹ ਹਾਲਾਤ ਹਨ ਜਿਨ੍ਹਾਂ ਦੇ ਵਿੱਚ ਅਸੀਂ ਹੁਣ ਹਾਂ। ਉਹ ਸਾਨੂੰ ਉਹ ਨਹੀਂ ਬਣਾਉਂਦੇ ਜੋ ਅਸੀਂ ਹਾਂ। ਸਾਡੀ ਜਾਤੀ, ਸਾਡਾ ਸਮਾਜਿਕ ਰੁਤਬਾ, ਜਾਂ ਸਾਡੀ ਆਰਥਿਕ ਸਥਿੱਤੀ ਸਾਡੀ ਪਹਿਚਾਣ ਨਹੀਂ ਹੈ, ਉਹ ਸਾਡੇ ਹਾਲਾਤ ਹਨ। ਇੱਕ ਵਿਅਕਤੀ ਇੱਕ ਡਾਕਟਰ, ਇੱਕ ਮਨੋਰੰਜਨ ਕਰਨ ਵਾਲਾ ਸਿਤਾਰਾ, ਜਾਂ ਇੱਕ ਰਾਸ਼ਟਰੀ ਨੇਤਾ ਹੋ ਸਕਦਾ ਹੈ, ਪਰ ਉਹ ਵਿਅਕਤੀ ਪਰਮੇਸ਼ੁਰ ਦੇ ਸਾਹਮਣੇ ਪਰਮੇਸ਼ੁਰ ਦੇ ਉਸ ਪ੍ਰਾਣੀ ਦੇ ਰੂਪ ਵਿੱਚ ਖੜ੍ਹਾ ਹੁੰਦਾ ਹੈ ਜੋ ਉਸ ਦੇ ਸਰੂਪ ’ਤੇ ਬਣਾਇਆ ਗਿਆ ਹੈ, ਅਤੇ ਇਹ ਪਹਿਚਾਣ ਸਭ ਤੋਂ ਮਹੱਤਵਪੂਰਣ ਹੈ।

ਸਾਡੀ ਲਿੰਗਕਤਾ ਸਾਡੀ ਹਾਲਤ ਦਾ ਇੱਕ ਸ਼ਕਤੀਸ਼ਾਲੀ ਹਿੱਸਾ ਹੈ। ਸਾਡੇ ਲਿੰਗਕ ਝੁਕਾਅ, ਇੱਛਾਵਾਂ, ਅਤੇ ਨਿਰਾਸ਼ਾਵਾਂ ਹਨ। ਪਰ ਇਹ ਸਾਰੀਆਂ ਚੀਜ਼ਾਂ ਸਾਡੀ ਪਹਿਚਾਣ ਨਹੀਂ ਹਨ; ਇਹ ਸਾਡੀ ਹਾਲਤ ਦਾ ਹਿੱਸਾ ਹਨ।

ਅਸੀਂ ਇੱਕ ਪਾਪੀ ਸੁਭਾਅ ਦੇ ਨਾਲ ਪੈਦਾ ਹੋਏ ਹਾਂ ਕਿਉਂਕਿ ਆਦਮ ਦੇ ਪਾਪ ਨੇ ਮਨੁੱਖਤਾ ਨੂੰ ਪਰਮੇਸ਼ੁਰ ਤੋਂ ਵੱਖ ਕਰ ਦਿੱਤਾ ਸੀ (ਰੋਮੀਆਂ 5:18)। ਪਰ ਸਾਡਾ ਪਾਪੀ ਹੋਣਾ ਵੀ ਸਾਡੀ ਪਹਿਚਾਣ ਨਹੀਂ ਹੈ; ਇਹ ਸਾਡੀ ਹਾਲਤ ਹੈ, ਅਤੇ ਇਸ ਨੂੰ ਪਰਮੇਸ਼ੁਰ ਦੀ ਕਿਰਪਾ ਅਤੇ ਸਮਰੱਥਾ ਦੇ ਦੁਆਰਾ ਬਦਲਿਆ ਜਾ ਸਕਦਾ ਹੈ (ਰੋਮੀਆਂ 5;19)।

► ਇੱਕ ਵਿਅਕਤੀ ਦੀ ਪਹਿਚਾਣ ਅਤੇ ਹਾਲਤ ਵਿੱਚ ਕੀ ਫਰਕ ਹੈ?

ਮਨੁੱਖੀ ਪਹਿਚਾਣ ਅਤੇ ਨਿੱਜੀ ਨੈਤਿਕਤਾ

ਪਹਿਚਾਣ ਮਹੱਤਵਪੂਰਣ ਹੈ ਕਿਉਂਕਿ ਇੱਕ ਵਿਅਕਤੀ ਆਪਣੀ ਨੈਤਿਕਤਾ ਦੇ ਲਈ ਆਪਣੀ ਪਹਿਚਾਣ ਨੂੰ ਅਧਾਰ ਬਣਾਉਂਦਾ ਹੈ। ਨੈਤਿਕਤਾ ਉਹ ਸਿਧਾਂਤ ਹਨ ਜੋ ਵਿਹਾਰ ਦੇ ਸਹੀ ਜਾਂ ਗਲਤ ਹੋਣ ਬਾਰੇ ਦੱਸਦੇ ਹਨ। ਜੇ ਇੱਕ ਵਿਅਕਤੀ ਸੋਚਦਾ ਹੈ ਕਿ ਉਸ ਦੀ ਲਿੰਗਕਤਾ ਉਸ ਦੀ ਪਹਿਚਾਣ ਹੈ, ਤਾਂ ਉਹ ਇਹ ਮੰਨੇਗਾ ਕਿ ਉਸ ਦੇ ਲਿੰਗਕ ਝੁਕਾਵਾਂ ਦੇ ਅਨੁਸਾਰ ਚੱਲਣਾ ਸਹੀ ਹੈ।

ਕਈ ਵਾਰ ਇੱਕ ਵਿਅਕਤੀ ਆਖਦਾ ਹੈ, “ਮੈਂ ਇਸ ਤਰ੍ਹਾਂ ਹੀ ਪੈਦਾ ਹੋਇਆ ਸੀ; ਇਹ ਕਰਨਾ ਮੇਰੇ ਲਈ ਸੁਭਾਵਕ ਹੈ; ਇਸ ਲਈ ਇਹ ਮੇਰੇ ਲਈ ਗਲਤ ਨਹੀਂ ਹੈ।” ਪਰ ਬਾਈਬਲ ਸਾਨੂੰ ਦੱਸਦੀ ਹੈ ਕਿ ਅਸੀਂ ਸਾਰੇ ਪਾਪੀ ਸੁਭਾਅ ਦੇ ਨਾਲ ਪੈਦਾ ਹੋਏ ਸੀ (ਰੋਮੀਆਂ 5:12, ਅਫ਼ਸੀਆਂ 2:3)। ਸਾਡੇ ਲਈ ਸਿਰਫ਼ ਇਸ ਲਈ ਆਪਣੇ ਪਾਪੀ ਸੁਭਾਅ ਦੇ ਅਨੁਸਾਰ ਚੱਲਣਾ ਸਹੀ ਨਹੀਂ ਹੈ ਕਿਉਂਕਿ ਇਹ ਸਾਨੂੰ ਠੀਕ ਜਾਪਦਾ ਹੈ।

ਸਾਡਾ ਪਾਪੀ ਸੁਭਾਅ ਉਹ ਨਹੀਂ ਹੈ ਜੋ ਅਸੀਂ ਹਾਂ। ਸਾਡਾ ਪਾਪੀ ਸੁਭਾਅ ਸਾਡੀ ਹਾਲਤ ਹੈ। ਸਾਡੀ ਲਿੰਗਕਤਾ ਸਾਡੀ ਪਹਿਚਾਣ ਨਹੀਂ ਹੈ। ਇਸ ਦੇ ਬਜਾਏ, ਪਰਮੇਸ਼ੁਰ ਦੇ ਸਰੂਪ ਉੱਤੇ ਬਣਾਏ ਗਏ ਪ੍ਰਾਣੀ ਸਾਡੀ ਪਹਿਚਾਣ ਹੈ। ਜੇ ਅਸੀਂ ਇਸ ਸੱਚਾਈ ਨੂੰ ਮੰਨ ਲੈਂਦੇ ਹਾਂ, ਤਾਂ ਅਸੀਂ ਜਾਣ ਲੈਂਦੇ ਹਾਂ ਕਿ ਇਹ ਪਰਮੇਸ਼ੁਰ ਹੈ ਜੋ ਫੈਸਲਾ ਕਰਦਾ ਹੈ ਕਿ ਕੀ ਸਹੀ ਹੈ ਅਤੇ ਕੀ ਗਲਤ ਹੈ, ਅਤੇ ਇਹ ਕਿ ਅਸੀਂ ਉਸ ਦੇ ਪ੍ਰਤੀ ਜਵਾਬਦੇਹ ਹਾਂ। ਸਾਡੀ ਪਹਿਚਾਣ ਪਵਿੱਤਰ ਵਿਹਾਰ ਦੇ ਸਹੀ ਮਿਆਰ ਨੂੰ ਸਮਝਣ ਵਿੱਚ ਸਾਡੀ ਮਦਦ ਕਰਦੀ ਹੈ।

► ਇੱਕ ਵਿਅਕਤੀ ਦੀ ਆਪਣੀ ਪਹਿਚਾਣ ਬਾਰੇ ਉਸ ਦੀ ਸਮਝ ਉਸ ਦੀ ਨੈਤਿਕਤਾ ਨੂੰ ਕਿਵੇਂ ਪ੍ਰਭਾਵਿਤ ਕਰਦੀ ਹੈ?

ਲਿੰਗ ਬਾਰੇ ਇੱਕ ਸਹੀ ਸਮਝ

ਅਸੀਂ ਇਸ ਸੱਚਾਈ ਤੋਂ ਜਾਣੂ ਹਾਂ ਕਿ ਮਨੁੱਖ ਅਤੇ ਬਹੁਤ ਸਾਰੇ ਜਨਵਰ ਪੁਰਸ਼ ਲਿੰਗ ਅਤੇ ਇਸਤਰੀ ਲਿੰਗ ਵਿੱਚ ਵੰਡੇ ਹੋਏ ਹਨ। ਅਸੀਂ ਇਹ ਕਲਪਨਾ ਕਰ ਸਕਦੇ ਹਾਂ ਕਿ ਪਰਮੇਸ਼ੁਰ ਵੀ ਪੁਰਸ਼ ਜਾਂ ਇਸਤਰੀ ਹੈ, ਪਰ ਇਹ ਗਲਤ ਹੋਵੇਗਾ। ਪਰਮੇਸ਼ੁਰ ਸੁਭਾਵਕ ਤੌਰ ’ਤੇ ਲਿੰਗ ਦੇ ਨਾਲੋਂ ਵੱਡਾ ਹੈ, ਉਸ ਦੀ ਹੋਂਦ ਲਿੰਗ ਦੇ ਹੋਂਦ ਵਿੱਚ ਆਉਣ ਤੋਂ ਪਹਿਲਾਂ ਹੀ ਸੀ। ਦੋਵੇਂ ਮਨੁੱਖੀ ਲਿੰਗ ਪਰਮੇਸ਼ੁਰ ਦੇ ਸਰੂਪ ਤੋਂ ਨਿੱਕਲੇ ਹਨ (ਉਤਪਤ 1:27)। ਦੋਵੇਂ ਮਨੁੱਖੀ ਲਿੰਗ ਪਰਮੇਸ਼ੁਰ ਦੇ ਸਰੂਪ ਦਾ ਪਰਗਟਾਵਾ ਹਨ।

ਪਰਮੇਸ਼ੁਰ ਦਾ ਸਰੂਪ ਕੁਝ ਅਜਿਹਾ ਨਹੀਂ ਹੈ ਜਿਸ ਨੂੰ ਮਨੁੱਖੀ ਸੁਭਾਅ ਦੇ ਇੱਕ ਹਿੱਸੇ ਵਜੋਂ ਸ਼ਾਮਲ ਕੀਤਾ ਗਿਆ ਹੈ। ਪਰਮੇਸ਼ੁਰ ਦੇ ਸਰੂਪ ਦਾ ਮਤਲਬ ਕੇਵਲ ਉਨ੍ਹਾਂ ਕੁਝ ਵਿਸ਼ੇਸ਼ ਗੁਣਾਂ ਤੋਂ ਨਹੀਂ ਹੈ ਜੋ ਸਾਨੂੰ ਦਿੱਤੇ ਗਏ ਹਨ ਜਿਵੇਂ ਕਿ ਪਿਆਰ ਕਰਨ ਦੀ ਯੋਗਤਾ, ਸੁੰਦਰਤਾ ਦੀ ਕਦਰ ਕਰਨਾ, ਅਤੇ ਸਹੀ ਅਤੇ ਗਲਤ ਬਾਰੇ ਇੱਕ ਸਮਝ। ਪੂਰਾ ਮਨੁੱਖੀ ਸੁਭਾਅ ਪਰਮੇਸ਼ੁਰ ਦੇ ਸਰੂਪ ਦਾ ਪ੍ਰਤੀਬਿੰਬ ਹੈ। ਹੋਰ ਕੁਝ ਨਹੀਂ, ਪਰ ਪਰਮੇਸ਼ੁਰ ਦੇ ਸਰੂਪ ਨੂੰ ਸਾਡੀ ਹੋਂਦ ਦਾ ਸਾਰ ਮੰਨਿਆ ਜਾ ਸਕਦਾ ਹੈ। ਅਸੀਂ ਮੁੱਖ ਤੌਰ ’ਤੇ ਪਰਮੇਸ਼ੁਰ ਦੇ ਸਰੂਪ ਉੱਤੇ ਬਣਾਏ ਗਏ ਪ੍ਰਾਣੀ ਹਾਂ। ਸਾਡੀ ਮਨੁੱਖੀ ਹਾਲਤ ਦੀ ਕਿਸੇ ਵੀ ਤੰਦ ਨੂੰ ਸਾਡੀ ਮੁੱਖ ਪਹਿਚਾਣ ਜਾਂ ਸਾਡੀ ਨੈਤਿਕਤਾ ਦਾ ਅਧਾਰ ਬਣਨ ਦੀ ਅਨੁਮਤੀ ਨਹੀਂ ਦਿੱਤੀ ਜਾਣੀ ਚਾਹੀਦੀ।

ਹਰੇਕ ਵਿਅਕਤੀ ਲਈ ਪਰਮੇਸ਼ੁਰ ਵੱਲੋਂ ਲਿੰਗ ਦੀ ਚੋਣ ਕੀਤਾ ਜਾਣਾ ਉਸ ਦੀ ਇਸ ਯੋਜਨਾ ਦਾ ਹਿੱਸਾ ਹੈ ਕਿ ਉਹ ਵਿਅਕਤੀ ਉਸ ਦੇ ਸਰੂਪ ਨੂੰ ਕਿਵੇਂ ਪਰਗਟ ਕਰੇਗਾ। ਕਈ ਲੋਕ ਉਸ ਲਿੰਗ ਨੂੰ ਸਵੀਕਾਰ ਕਰਨ ਤੋਂ ਇਨਕਾਰ ਕਰਦੇ ਹਨ ਜੋ ਪਰਮੇਸ਼ੁਰ ਨੇ ਉਨ੍ਹਾਂ ਨੂੰ ਦਿੱਤਾ ਹੈ। ਉਹ ਵਿਪਰੀਤ ਲਿੰਗ ਦੇ ਵਿਅਕਤੀ ਵਾਂਗ ਜੀਣ ਦੀ ਕੋਸ਼ਿਸ਼ ਕਰ ਸਕਦੇ ਹਨ। ਕਈ ਲੋਕ ਅਪਰੇਸ਼ਨਾਂ ਦੇ ਨਾਲ ਆਪਣੇ ਭੌਤਿਕ ਸਰੀਰ ਨੂੰ ਵੀ ਬਦਲਣ ਦੀ ਕੋਸ਼ਿਸ਼ ਕਰਦੇ ਹਨ। ਇਹ ਪਰਮੇਸ਼ੁਰ ਦੀ ਸ੍ਰਿਸ਼ਟੀ ਵਿੱਚ ਇੱਕ ਦੁਖਦਾਇਕ ਵਿਗੜ ਹੈ, ਕਿਉਂਕਿ ਇੱਕ ਵਿਅਕਤੀ ਆਪਣੇ ਭੌਤਿਕ ਸਰੀਰ ਨੂੰ ਬਦਲਣ ਦੁਆਰਾ ਸੱਚਮੁੱਚ ਲਿੰਗ ਨਹੀਂ ਬਦਲ ਸਕਦਾ। ਹਰੇਕ ਵਿਅਕਤੀ ਆਪਣੇ ਪੂਰੇ ਸੁਭਾਅ ਵਿੱਚ ਪੁਰਸ਼ ਜਾਂ ਇਸਤਰੀ ਹੈ – ਕੇਵਲ ਸਰੀਰਕ ਤੌਰ ’ਤੇ ਨਹੀਂ। ਪਰਮੇਸ਼ੁਰ ਚਾਹੁੰਦਾ ਹੈ ਕਿ ਅਸੀਂ ਉਸ ਲਿੰਗ ਦੇ ਵਿੱਚ ਹੀ ਉਸ ਦੀ ਮਹਿਮਾ ਕਰੀਏ ਅਤੇ ਉਸ ਦੇ ਸਰੂਪ ਨੂੰ ਪਰਗਟ ਕਰੀਏ ਜੋ ਲਿੰਗ ਉਸ ਨੇ ਸਾਡੇ ਵਿੱਚੋਂ ਹਰੇਕ ਨੂੰ ਦਿੱਤਾ ਹੈ।

► ਇੱਕ ਵਿਦਿਆਰਥੀ ਨੂੰ ਸਮੂਹ ਲਈ ਇਬਰਾਨੀਆਂ 13:4 ਨੂੰ ਪੜ੍ਹਨਾ ਚਾਹੀਦਾ ਹੈ।

ਇਹ ਆਇਤ ਸਾਨੂੰ ਦੱਸਦੀ ਹੈ ਕਿ ਵਿਆਹ ਨੂੰ ਵੱਡਾ ਆਦਰ ਦਿੱਤਾ ਜਾਣਾ ਚਾਹੀਦਾ ਹੈ। ਲਿੰਗਕ ਪਾਪ ਵਿਆਹ ਦਾ ਨਿਰਾਦਰ ਹੈ। ਪਰਮੇਸ਼ੁਰ ਲਿੰਗਕ ਹਰਾਮਕਾਰੀ ਦੇ ਲਈ ਸਜ਼ਾ ਦੇਵੇਗਾ।

► ਇੱਕ ਵਿਦਿਆਰਥੀ ਨੂੰ ਸਮੂਹ ਲਈ 1 ਕੁਰਿੰਥੀਆਂ ਨੂੰ 6:18 ਨੂੰ ਪੜ੍ਹਨਾ ਚਾਹੀਦਾ ਹੈ।

ਲਿੰਗਕ ਪਾਪਾਂ ਵਿੱਚ ਕਾਮੁਕ ਕਲਪਨਾਵਾਂ, ਹਰਾਮਕਾਰੀ, ਵਿਭਚਾਰ, ਕਰੀਬੀ ਰਿਸ਼ਤਿਆਂ ਵਿੱਚ ਲਿੰਗਕ ਸੰਬੰਧ, ਬਲਾਤਕਾਰ, ਬੱਚਿਆਂ ਦਾ ਸ਼ੋਸ਼ਣ, ਸਮਲਿੰਗੀ ਗਤੀਵਿਧੀ, ਅਤੇ ਅਸ਼ਲੀਲ ਚਿਤਰਣ ਵੇਖਣਾ ਸ਼ਾਮਲ ਹੈ।

• ਕਾਮੁਕ ਕਲਪਨਾਵਾਂ: ਜਾਣਬੁੱਝ ਕੇ ਕਿਸੇ ਅਜਿਹੇ ਨਾਲ ਲਿੰਗਕ ਸੰਬੰਧ ਬਣਾਉਣਾ ਦੀ ਕਲਪਨਾ ਕਰਨਾ ਜੋ ਤੁਹਾਡਾ ਜੀਵਨ ਸਾਥੀ ਨਹੀਂ ਹੈ।

• ਹਰਾਮਕਾਰੀ: ਉਨ੍ਹਾਂ ਲੋਕਾਂ ਦੇ ਵਿਚਕਾਰ ਲਿੰਗਕ ਸੰਬੰਧ ਜੋ ਵਿਆਹੇ ਹੋਏ ਨਹੀਂ ਹਨ।

• ਵਿਭਚਾਰ: ਉਹ ਲਿੰਗਕ ਸੰਬੰਧ ਜਿਨ੍ਹਾਂ ਵਿੱਚ ਉਹ ਵਿਅਕਤੀ ਸ਼ਾਮਲ ਹੈ ਜੋ ਕਿਸੇ ਹੋਰ ਨਾਲ ਵਿਆਹਿਆ ਹੋਇਆ ਹੈ।

• ਕਰੀਬੀ ਰਿਸ਼ਤਿਆਂ ਵਿੱਚ ਲਿੰਗਕ ਸੰਬੰਧ: ਕਿਸੇ ਕਰੀਬੀ ਰਿਸ਼ਤੇਦਾਰ ਦੇ ਨਾਲ ਲਿੰਗਕ ਸੰਬੰਧ ਬਣਾਉਣਾ ਜੋ ਤੁਹਾਡਾ ਜੀਵਨ ਸਾਥੀ ਨਹੀਂ ਹੈ।

• ਬਲਾਤਕਾਰ: ਲਿੰਗਕ ਸ਼ੋਸ਼ਣ, ਕਿਸੇ ਦੀ ਇੱਛਾ ਦੇ ਉਲਟ ਧੱਕੇ ਨਾਲ ਉਸ ਨੂੰ ਲਿੰਗਕ ਸੰਬੰਧ ਬਣਾਉਣ ਦੇ ਲਈ ਮਜ਼ਬੂਰ ਕਰਨਾ।

• ਬੱਚਿਆਂ ਦਾ ਸ਼ੋਸ਼ਣ: ਕਿਸੇ ਅਜਿਹੇ ਵਿਅਕਤੀ ਦੇ ਨਾਲ ਲਿੰਗਕ ਸੰਬੰਧ ਬਣਾਉਣਾ ਜੋ ਐਨਾ ਪਰਿਪੱਕ ਨਹੀਂ ਹੈ ਕਿ ਉਹ ਅਜਿਹੇ ਫੈਸਲੇ ਲੈ ਸਕੇ ਜਾਂ ਲਿੰਗਕ ਇੱਛਾਵਾਂ ਨੂੰ ਸੰਭਾਲ ਸਕੇ।

• ਸਮਲਿੰਗੀ ਗਤੀਵਿਧੀ: ਇੱਕੋ ਲਿੰਗ ਦੇ ਵਿਅਕਤੀਆਂ ਵਿੱਚ ਲਿੰਗਕ ਸੰਬੰਧਾਂ ਦਾ ਹੋਣਾ।

• ਅਸ਼ਲੀਲ ਚਿਤਰਣ: ਨੰਗੇਜ਼ ਜਾਂ ਲਿੰਗਕ ਸੰਬੰਧਾਂ ਦੀ ਕਿਰਿਆ ਨੂੰ ਵਿਖਾਉਣ ਦੁਆਰਾ ਲਿੰਗਕ ਪ੍ਰਤੀਕਿਰਿਆਵਾਂ ਨੂੰ ਉਭਾਰਨ ਲਈ ਤਿਆਰ ਕੀਤੀਆਂ ਲਿਖਤਾਂ, ਤਸਵੀਰਾਂ, ਅਤੇ ਵੀਡੀਓਜ਼।

ਇਹ ਸਾਰੀਆਂ ਚੀਜ਼ਾਂ ਵਿਆਹੁਤਾ ਰਿਸ਼ਤੇ ਦੀ ਉਲੰਘਣਾ ਕਰਨਾ ਹੈ।

ਯਾਦ ਰੱਖ – ਹਰੇਕ ਭੁੱਖ ਜੋ ਸਾਨੂੰ ਸਰੀਰ ਵਿੱਚ ਭਰਮਾਉਂਦੀ ਹੈ ਉਹ ਉਸ ਲੋੜ ਦਾ ਸ਼ੋਸ਼ਣ ਹੈ ਜਿਸ ਲੋੜ ਨੂੰ ਪਰਮੇਸ਼ੁਰ ਦੁਆਰਾ ਬਿਹਤਰ ਢੰਗ ਨਾਲ ਪੂਰਾ ਕੀਤਾ ਜਾ ਸਕਦਾ ਹੈ। ਧਰਮੀ ਲਿੰਗਕ ਸੰਬੰਧਾਂ ਦੇ ਲਈ ਇੱਕੋ ਸੰਦਰਭ ਵਿਆਹੁਤਾ ਲਿੰਗਕ ਸੰਬੰਧ ਹਨ। ਨਾਜਾਇਜ਼ ਲਿੰਗਕ ਸੰਬੰਧ... ਤੁਰੰਤ ਮਿੱਠੇ ਲੱਗਦੇ ਹਨ, ਪਰ ਇਹ ਕੁਝ ਅਜਿਹਾ ਹੈ ਜੋ ਸਾਡੀ ਆਤਮਿਕ ਭੁੱਖ ਨੂੰ ਜ਼ਹਿਰੀਲਾ ਬਣਾ ਦਿੰਦਾ ਹੈ ਜਦੋਂ ਤਕ ਅਸੀਂ ਉਸ ਲਈ ਵਿਲਕਦੇ ਹਾਂ ਜੋ ਅਖੀਰ ਸਾਨੂੰ ਨਾਸ ਕਰ ਦੇਵੇਗਾ। ਨਾਜਾਇਜ਼ ਲਿੰਗਕ ਸੰਬੰਧ ਕੁਝ ਨਹੀਂ ਕਰਨਗੇ ਪਰ ਪਵਿੱਤਰਤਾ, ਧਾਰਮਿਕਤਾ, ਅਤੇ ਸਾਡੇ ਜੀਵਨਾਂ ਵਿੱਚ ਪਰਮੇਸ਼ੁਰ ਦੀ ਹਜ਼ੂਰੀ ਪ੍ਰਤੀ ਸਾਡੇ ਸੰਵੇਦਨਾ ਨੂੰ ਖਤਮ ਕਰ ਦੇਣਗੇ।[1]

ਕਹਾਉਤਾਂ ਦੀ ਪੁਸਤਕ ਦੇ ਬਹੁਤ ਸਾਰੇ ਭਾਗਾਂ ਵਿੱਚ ਸਾਨੂੰ ਚੇਤਾਵਨੀ ਦਿੱਤੀ ਗਈ ਹੈ ਕਿ ਲਿੰਗਕ ਹਰਾਮਕਾਰੀ ਇੱਕ ਵਿਅਕਤੀ ਦੇ ਜੀਵਨ ਨੂੰ ਤਬਾਹ ਕਰ ਦਿੰਦੀ ਹੈ ਅਤੇ ਮੌਤ ਵੱਲ ਲੈ ਜੇ ਜਾਂਦੀ ਹੈ (ਉਦਾਹਰਣ ਦੇ ਲਈ, ਕਹਾਉਤਾਂ 2:16-19 ਅਤੇ ਕਹਾਉਤਾਂ 6:24-29, 32-33)।

ਰੋਬਰਟਸਨ ਮੈਕਕਿਉਲਕਿਨ ਲਿਖਦੇ ਹਨ ਕਿ

[ਮਨੁੱਖੀ ਲਿੰਗਕਤਾ ਦੇ ਲਈ ਪਰਮੇਸ਼ੁਰ ਦੇ ਉਦੇਸ਼ਾਂ ਦੀ] ਮਾਨਸਿਕ ਤੌਰ ’ਤੇ ਓਨੀ ਹੀ ਬੁਰੀ ਤਰ੍ਹਾਂ ਉਲੰਘਣਾ ਕੀਤੀ ਜਾ ਰਹੀ ਹੈ ਜਿੰਨੀ ਕਿ ਅਸਲ ਵਿੱਚ ਲਿੰਗਕ ਸੰਬੰਧ ਬਣਾਉਣ ਦੁਆਰਾ ਕੀਤੀ ਜਾਵੇਗੀ। ਉਸ ਨੇ ਕੇਵਲ ਪੁਰਸ਼ ਅਤੇ ਇਸਤਰੀ ਨੂੰ ਹੀ ਨਹੀਂ ਬਣਾਇਆ; ਉਸ ਨੇ ਉਨ੍ਹਾਂ ਨੂੰ ਇੱਕ ਕਰੀਬੀ, ਵਿਆਹ ਦੇ ਸਥਾਈ ਬੰਧਨ ਵਿੱਚ ਇੱਕ ਦੂਸਰੇ ਦੇ ਲਈ ਬਣਾਇਆ ਹੈ, ਪਰਮੇਸ਼ੁਰ ਦੇ ਸੁਭਾਅ ਦੇ ਨਮੂਨੇ ਅਨੁਸਾਰ ਇੱਕ ਹੋਣ ਲਈ। ਇਸ ਉੱਚ ਉਦੇਸ਼ ਨੂੰ ਪੂਰਾ ਕਰਨ ਲਈ, ਨੇੜਤਾ ਵਿਸ਼ੇਸ਼ ਹੋਣੀ ਚਾਹੀਦੀ ਹੈ ਅਤੇ ਸਮਰਪਣ ਸਥਾਈ ਹੋਣਾ ਚਾਹੀਦਾ ਹੈ, ਨਹੀਂ ਤਾਂ ਇਹ ਕੋਈ ਇੱਕ ਹੋਣਾ ਨਹੀਂ ਹੈ। ਮਨ ਦੀ ਵਫ਼ਾਦਾਰੀ ਸਭ ਤੋਂ ਜ਼ਿਆਦਾ ਮਹੱਤਵਪੂਰਣ ਹੈ। ਵਿਸ਼ੇਸ਼ ਨੇੜਤਾ, ਸਥਾਈ ਸਮਰਪਣ, ਅਤੇ ਆਪਸੀ ਭਰੋਸੇ ਨੂੰ ਸਭ ਤੋਂ ਪਹਿਲਾਂ ਮਨ ਦੇ ਵਿੱਚ ਹਿਹ ਤੋੜਿਆ ਜਾਂਦਾ ਹੈ।[2]

► ਵਿਦਿਆਰਥੀਆਂ ਨੂੰ ਸਮੂਹ ਲਈ 1 ਕੁਰਿੰਥੀਆਂ 6:9-11, 15-20 ਅਤੇ ਮੱਤੀ 5:27-30 ਨੂੰ ਪੜ੍ਹਨਾ ਚਾਹੀਦਾ ਹੈ।

ਪੁਰਸ਼ਾਂ ਅਤੇ ਇਸਤਰੀਆਂ ਦੇ ਵਿਚਕਾਰ ਰਿਸ਼ਤਿਆਂ ਬਾਰੇ ਹਰੇਕ ਸਮਾਜ ਦੇ ਸੱਭਿਆਚਾਰਕ ਨਜ਼ਰੀਏ ਹਨ। ਇਹ ਸੱਭਿਆਚਾਰਕ ਨਜ਼ਰੀਏ ਬਾਈਬਲ ਅਧਾਰਤ ਨੈਤਿਕਤਾ ਦੇ ਮਿਆਰਾਂ ਨਾਲੋਂ ਹੇਠਲੇ ਦਰਜੇ ਦੇ ਨੈਤਿਕ ਮਿਆਰ ਰੱਖਦੇ ਹਨ। ਬਹੁਤ ਸਾਰੇ ਸੱਭਿਆਚਾਰਾਂ ਵਿੱਚ ਕ੍ਰਮਬੱਧ ਸਮਾਜ ਨੂੰ ਬਣਾਈ ਰੱਖਣ ਦੇ ਲਈ ਲੋੜੀਂਦੇ ਨਿਯਮ ਹੀ ਹਨ। ਜੇ ਲਿੰਗਕ ਪਾਪ ਨੂੰ ਐਨੇ ਧਿਆਨ ਨਾਲ ਸੰਭਾਲਿਆ ਜਾਂਦਾ ਹੈ ਕਿ ਬੁਰੇ ਨਤੀਜਿਆਂ ਜਾਂ ਕਿਸੇ ਕਾਂਡ ਤੋਂ ਬਚਿਆ ਜਾ ਸਕੇ, ਤਾਂ ਉਹ ਲਿੰਗਕ ਪਾਪ ਨੂੰ ਬਰਦਾਸ਼ਤ ਕਰਦੇ ਹਨ। ਨੈਤਿਕਤਾ ਦੇ ਬਾਰੇ ਬਾਈਬਲ ਅਧਾਰਤ ਮਿਆਰ ਵੱਖਰਾ ਹੈ।

ਦੁੱਖ ਦੀ ਗੱਲ ਹੈ ਕਿ ਕੁਝ ਕਲੀਸਿਯਾਵਾਂ ਬਾਈਬਲ ਦੀ ਨੈਤਿਕਤਾ ਦੇ ਬਜਾਏ ਸੱਭਿਆਚਾਰਕ ਨੈਤਿਕਤਾ ਦਾ ਪਾਲਣ ਕਰਦੀਆਂ ਹਨ। ਉਹ ਉਨ੍ਹਾਂ ਲੋਕਾਂ ਨੂੰ ਸਜ਼ਾ ਦਿੰਦੇ ਹਨ ਜਿਨ੍ਹਾਂ ਦਾ ਪਾਪ ਸਪਸ਼ਟ ਅਤੇ ਲਾਪਰਵਾਹ ਹੁੰਦਾ ਹੈ, ਪਰ ਉਹ ਉਨ੍ਹਾਂ ਲੋਕਾਂ ਵੱਲੋਂ ਕੀਤੇ ਉਹੋ ਪਾਪ ਨੂੰ ਬਰਦਾਸ਼ਤ ਕਰ ਲੈਂਦੇ ਹਨ ਜੋ ਪਾਪ ਨੂੰ ਲੁਕਾਉਣ ਦਾ ਧਿਆਨ ਰੱਖਦੇ ਹਨ ਜਾਂ ਇਸ ਦੇ ਨਤੀਜਿਆਂ ਨੂੰ ਸੰਭਾਲ ਲੈਂਦੇ ਹਨ।

ਇਹ ਆਇਤਾਂ ਸਾਨੂੰ ਦੱਸਦੀਆਂ ਹਨ ਕਿ ਜਿਹੜੇ ਲੋਕ ਇਹ ਪਾਪ ਕਰਦੇ ਹਨ ਉਹ ਵਿਸ਼ਵਾਸੀ ਨਹੀਂ ਅਤੇ ਉਹ ਸਵਰਗ ਨਹੀਂ ਜਾਣਗੇ। ਕੁਰਿੰਥੀਆਂ ਦੇ ਕੁਝ ਵਿਸ਼ਵਾਸੀਆਂ ਨੇ ਅਤੀਤ ਵਿੱਚ ਇਹ ਪਾਪ ਕੀਤੇ ਸਨ ਪਰ ਉਹ ਉਨ੍ਹਾਂ ਤੋਂ ਬਚਾਏ ਗਏ ਸਨ।

ਕੋਈ ਵੀ ਸਿਧਾਂਤ ਜੋ ਇਨ੍ਹਾਂ ਪਾਪਾਂ ਵਿੱਚੋਂ ਕਿਸੇ ਪਾਪ ਲਈ ਉਸ ਵਿਅਕਤੀ ਨੂੰ ਅਣਦੇਖਿਆ ਕਰ ਦਿੰਦਾ ਹੈ ਜੋ ਵਿਸ਼ਵਾਸੀ ਹੋਣ ਦਾ ਦਾਅਵਾ ਕਰਦਾ ਹੈ, ਉਹ ਸਿਧਾਂਤ ਗਲਤ ਹੈ। ਜੇ ਇੱਕ ਵਿਅਕਤੀ ਮਸੀਹ ਦਾ ਚੇਲਾ ਹੋਣ ਦਾ ਦਾਅਵਾ ਕਰਦਾ ਹੈ ਪਰ ਫਿਰ ਵੀ ਲਿੰਗਕ ਪਾਪ ਕਰਦਾ ਹੈ, ਤਾਂ ਵਚਨ ਕਲੀਸਿਯਾ ਨੂੰ ਆਖਦਾ ਹੈ ਕਿ ਉਸ ਨੂੰ ਕਲੀਸਿਯਾ ਵਿੱਚ ਕੱਢਿਆ ਜਾਵੇ ਅਤੇ ਉਸ ਨੂੰ ਵਿਸ਼ਵਾਸੀ ਨਾ ਮੰਨਿਆ ਜਾਵੇ (1 ਕੁਰਿੰਥੀਆਂ 5:11-13)।

ਕਲੀਸਿਯਾ ਦੇ ਆਗੂਆਂ ਨੂੰ ਵਿਹਾਰ ਦੀ ਇੱਕ ਚੰਗੀ ਮਿਸਾਲ ਕਾਇਮ ਕਰਨੀ ਚਾਹੀਦੀ ਹੈ। ਜਦੋਂ ਇੱਕ ਕਲੀਸਿਯਾ ਅਰਾਧਨਾ ਦੇ ਆਗੂਆਂ ਨੂੰ ਬੇਢੰਗੇ ਕੱਪੜੇ ਪਹਿਨਣ ਦੀ ਅਨੁਮਤੀ ਦਿੰਦੀ ਹੈ ਜਾਂ ਕਲੀਸਿਯਾ ਵਿੱਚ ਨਾਚ ਦੀਆਂ ਕਾਮੁਕ ਕਿਸਮਾਂ ਲਈ ਅਨੁਮਤੀ ਦਿੰਦੀ ਹੈ, ਉਹ ਇਹ ਵਿਖਾਉਂਦੇ ਹਨ ਕਿ ਗਲਤ ਲਿੰਗਕ ਇੱਛਾਵਾਂ ਠੀਕ ਹਨ। ਉਹ ਇਹ ਵਿਖਾਉਂਦੇ ਹਨ ਕਿ ਲਿੰਗਕ ਪਾਪ ਗੰਭੀਰ ਪਾਪ ਨਹੀਂ ਹੈ।

ਇੱਕ ਸਮਾਜ ਦੀ ਕੱਪੜੇ ਪਹਿਨਣ ਦੀ ਸ਼ੈਲੀ ਇਹ ਵਿਖਾ ਸਕਦੀ ਹੈ ਕਿ ਜੇ ਇੱਕ ਵਿਅਕਤੀ ਨੂੰ ਸਰੀਰਕ ਅੰਗਾਂ ਨੂੰ ਵਿਖਾਉਣ ਦੁਆਰਾ ਲਿੰਗਕ ਆਕਰਸ਼ਣ ਪੈਦਾ ਕਰਨ ਵਾਲੇ ਕੱਪੜੇ ਨਹੀਂ ਪਹਿਨੇ ਹਨ, ਤਾਂ ਉਹ ਚੰਗੀ ਤਰ੍ਹਾਂ ਕੱਪੜੇ ਪਾ ਕੇ ਤਿਆਰ ਨਹੀਂ ਹੋਇਆ ਹੈ। ਕਈ ਵਾਰ ਕਲੀਸਿਯਾ ਦੇ ਮੈਂਬਰ ਵੀ ਇਸ ਗਲਤੀ ਵਿੱਚ ਫਸ ਜਾਂਦੇ ਹਨ, ਖਾਸ ਕਰਕੇ ਵਿਸੇਸ਼ ਮੌਕਿਆਂ ’ਤੇ। ਉਹ ਸੋਚਦੇ ਹਨ ਕਿ ਜੇ ਉਹ ਉਨ੍ਹਾਂ ਦੇ ਸਮਾਜ ਦੇ ਫੈਸ਼ਨ ਅਨੁਸਾਰ ਕੱਪੜੇ ਨਹੀਂ ਪਹਿਨਦੇ ਹਨ ਤਾਂ ਉਹ ਚੰਗੀ ਤਰ੍ਹਾਂ ਤਿਆਰ ਨਹੀਂ ਹੋਏ ਹਨ। ਕਲੀਸਿਯਾ ਨੂੰ ਇਹ ਸਿਖਾਉਣਾ ਚਾਹੀਦਾ ਹੈ ਕਿ ਇਹ ਗਲਤ ਹੈ। ਇੱਕ ਵਿਸ਼ਵਾਸੀ ਨੂੰ ਦੂਸਰਿਆਂ ਦੇ ਅੰਦਰ ਗਲਤ ਇੱਛਾਵਾਂ ਪੈਦਾ ਕਰਨ ਦੀ ਇੱਛਾ ਨਹੀਂ ਰੱਖਣੀ ਚਾਹੀਦੀ। 1 ਤਿਮੋਥਿਉਸ 2:9-10 ਸਾਨੂੰ ਦੱਸਦੀ ਹੈ ਕਿ ਵਿਸ਼ਵਾਸੀ ਨੂੰ ਅਜਿਹੇ ਕੱਪੜੇ ਪਹਿਨਣੇ ਚਾਹੀਦੇ ਹਨ ਅਤੇ ਅਜਿਹਾ ਵਿਹਾਰ ਕਰਨਾ ਚਾਹੀਦਾ ਹੈ ਕਿ ਉਨ੍ਹਾਂ ਨੂੰ ਵੇਖਣ ਵਾਲਾ ਹਰੇਕ ਇਹ ਜਾਣੇ ਕਿ ਉਹ ਚੌਕਸੀ ਦੇ ਨਾਲ ਸ਼ੁੱਧ ਜੀਵਨ ਜੀ ਰਹੇ ਹਨ ਅਤੇ ਉਹ ਪਾਪ ਕਰਨਾ ਨਹੀਂ ਚਾਹੁੰਦੇ ਜਾਂ ਦੂਸਰਿਆਂ ਨੂੰ ਪਾਪ ਕਰਨ ਲਈ ਪਰਤਾਵੇ ਵਿੱਚ ਨਹੀਂ ਪਾਉਣਾ ਚਾਹੁੰਦੇ।

ਨੰਗੇਜ਼ ਜਾਂ ਲਿੰਗਕ ਸੰਬੰਧਾਂ ਦੀ ਕਿਰਿਆ ਵਿਖਾਉਣ ਦੁਆਰਾ ਲਿੰਗਕ ਪ੍ਰਤੀਕਿਰਿਆਵਾਂ ਨੂੰ ਪੈਦਾ ਕਰਨ ਲਈ ਤਿਆਰ ਕੀਤੀਆਂ ਗਈਆਂ ਲਿਖਤਾਂ, ਤਸਵੀਰਾਂ, ਜਾਂ ਵੀਡੀਓਜ਼ ਅਸ਼ਲੀਲ ਚਿਤਰਣ ਹੈ।

ਇੰਟਰਨੈਟ ਸੰਸਾਰ ਭਰ ਵਿੱਚ ਅਸ਼ਲੀਲ ਚਿਤਰਣ ਨੂੰ ਆਸਾਨੀ ਨਾਲ ਉਪਲੱਬਧ ਕਰਾ ਰਿਹਾ ਹੈ। ਬਹੁਤ ਸਾਰੇ ਪੁਰਾਣੇ ਪਾਸਟਰਾਂ ਅਤੇ ਆਗੂਆਂ ਨੇ ਇਨ੍ਹਾਂ ਪਰਤਾਵਿਆਂ ਦਾ ਸਾਹਮਣਾ ਨਹੀਂ ਕੀਤਾ ਕਿਉਂਕਿ ਜਦੋਂ ਉਹ ਜਵਾਨ ਸਨ ਤਦ ਇੰਟਰਨੈਟ ਹੈ ਹੀ ਨਹੀਂ ਸੀ। ਉਹ ਉਸ ਨੂੰ ਘੱਟ ਹੀ ਸਮਝ ਸਕਦੇ ਹਨ ਜਿਸ ਦਾ ਜਵਾਨ ਪੀੜ੍ਹੀ ਸਾਹਮਣਾ ਕਰ ਰਹੀ ਹੈ। ਪਰ ਲੋਕਾਂ ਨੂੰ ਸਿਖਾਇਆ ਜਾਣਾ ਚਾਹੀਦਾ ਹੈ ਕਿ ਉਹ ਮਨੋਰੰਜਨ ਸੰਬੰਧੀ ਆਪਣੀਆਂ ਚੋਣਾਂ ’ਤੇ ਬਾਈਬਲ ਦੇ ਸਿਧਾਂਤਾਂ ਨੂੰ ਕਿਵੇਂ ਲਾਗੂ ਕਰ ਸਕਦੇ ਹਨ।

ਅਸ਼ਲੀਲ ਚਿਤਰਣ ਗਲਤ ਹੈ ਕਿਉਂਕਿ ਇਸ ਨੂੰ ਇਸ ਤਰ੍ਹਾਂ ਤਿਆਰ ਕੀਤਾ ਗਿਆ ਹੈ ਕਿ ਇਸ ਨੂੰ ਵੇਖਣ ਵਾਲਾ ਵਿਅਕਤੀ ਹਰਾਮਕਾਰੀ, ਵਿਭਚਾਰ, ਅਤੇ ਹੋਰ ਬਹੁਤ ਪ੍ਰਕਾਰ ਦੀ ਲਿੰਗਕ ਭ੍ਰਿਸ਼ਟਤਾ ਦੀਆਂ ਕਿਰਿਆਵਾਂ ਦੀ ਕਲਪਨਾ ਕਰੇ। ਇਹ ਉਸ ਵਿਅਕਤੀ ਦੇ ਲਈ ਆਕਰਸ਼ਕ ਹੈ ਜੋ ਪਾਪੀ ਇੱਛਾਵਾਂ ਰੱਖਦਾ ਹੈ। ਅਸ਼ਲੀਲ ਚਿਤਰਣ ਇੱਕ ਵਿਅਕਤੀ ਨੂੰ ਹਰਾਮਕਾਰੀ ਦੇ ਕੰਮਾਂ ਵਿੱਚ ਹਿੱਸਾ ਲੈਣ ਲਈ ਸੱਦਾ ਦਿੰਦਾ ਅਤੇ ਉਸ ਨੂੰ ਇਸ ਦੇ ਯੋਗ ਬਣਾਉਂਦਾ ਹੈ, ਪਰਮੇਸ਼ੁਰ ਹਰਾਮਕਾਰੀ ਦੇ ਲਈ ਸਜ਼ਾ ਦਿੰਦਾ ਹੈ। ਯਿਸੂ ਨੇ ਆਖਿਆ ਕਿ ਇਨ੍ਹਾਂ ਕਿਰਿਆਵਾਂ ਦੀ ਕਲਪਨਾ ਕਰਨ ਦੀ ਚੋਣ ਕਰਨਾ ਪਾਪ ਹੈ (ਮੱਤੀ 5:28)।

ਅਸ਼ਲੀਲ ਚਿਤਰਣ ਇਸ ਲਈ ਵੀ ਗਲਤ ਹੈ ਕਿਉਂਕਿ ਇਹ ਲੋਕਾਂ ਅਤੇ ਰਿਸ਼ਤਿਆਂ ਦੀ ਕਦਰ ਨੂੰ ਘਟਾਉਂਦਾ ਹੈ। ਇਹ ਲਿੰਗਕ ਸੰਬੰਧਾਂ ਨੂੰ ਸਿਰਫ ਇੱਕ ਸਵਾਰਥੀ ਕਿਰਿਆ ਦੇ ਰੂਪ ਵਿੱਚ ਵੇਖਦਾ ਹੈ। ਇਹ ਲੋਕਾਂ ਦੀ ਪਰਮੇਸ਼ੁਰ ਦੇ ਸਰੂਪ ਉੱਤੇ ਬਣਾਏ ਹੋਣ ਦੇ ਲਈ ਅਤੇ ਚੰਗੇ ਰਿਸ਼ਤਿਆਂ ਲਈ ਰਚੇ ਹੋਣ ਦੇ ਲਈ ਕਦਰ ਕਰਨ ਦੇ ਬਜਾਏ, ਉਨ੍ਹਾਂ ਦੇ ਨਾਲ ਅਜਿਹਾ ਵਿਹਾਰ ਕਰਦਾ ਹੈ ਜਿਵੇਂ ਉਹ ਨਿੱਜੀ ਅਨੰਦ ਦੇ ਲਈ ਇੱਕ ਵਸਤੂ ਹੋਣ।

ਅਸ਼ਲੀਲ ਚਿਤਰਣ ਇੱਕ ਨਸ਼ਾ ਹੈ। ਅਸ਼ਲੀਲ ਚਿਤਰਣ, ਗੁਲਾਮ ਬਣਾਉਣ ਵਾਲਾ ਹੈ, ਜਿਵੇਂ ਕਿ ਪਾਪ ਗੁਲਾਮ ਬਣਾਉਂਦਾ ਹੈ (ਯੂਹੰਨਾ 8:24, 2 ਪਤਰਸ 2:19)। ਜਿਹੜਾ ਵਿਅਕਤੀ ਅਸ਼ਲੀਲ ਚਿਤਰਣ ਵੇਖਦਾ ਹੈ ਉਸ ਨੂੰ ਇਸ ਦੀ ਵੱਡੀ ਲੋੜ ਮਹਿਸੂਸ ਹੁੰਦੀ ਹੈ। ਉਹ ਇਸ ਬਿਨਾਂ ਜੀਣ ਦੀ ਕਲਪਨਾ ਵੀ ਨਹੀਂ ਕਰ ਸਕਦਾ। ਉਸ ਨੂੰ ਇਸ ਤਰ੍ਹਾਂ ਜਾਪਦਾ ਹੈ ਕਿ ਉਨ੍ਹਾਂ ਕਲਪਨਾਵਾਂ ਤੋਂ ਬਿਨਾਂ ਜੀਵਨ ਖਾਲੀ ਅਤੇ ਦਿਲਚਸਪ ਨਹੀਂ ਹੋਵੇਗਾ, ਜੋ ਕਲਪਨਾਵਾਂ ਉਸ ਨੂੰ ਅਸ਼ਲੀਲ ਚਿਤਰਣ ਤੋਂ ਪ੍ਰਾਪਤ ਹੁੰਦੀਆਂ ਹਨ। ਕਿਸੇ ਵੀ ਹੋਰ ਨਸ਼ੇ ਦੇ ਵਾਂਗ, ਇਸ ਦੀ ਵੀ ਤੋੜ ਲੱਗਣ ਲੱਗਦੀ ਹੈ, ਅਤੇ ਇਸ ਨੂੰ ਵੇਖਣ ਵਾਲਾ ਇਸ ਲਈ ਆਪਣੇ ਜੀਵਨ ਵਿਚਲੀਆਂ ਚੰਗੀਆਂ ਚੀਜ਼ਾਂ ਨੂੰ ਕੁਰਬਾਨ ਕਰਨਾ ਸ਼ੁਰੂ ਕਰ ਦਿੰਦਾ ਹੈ।

[1]ਅਸ਼ਲੀਲ ਚਿਤਰਣ ਵੇਖਣ ਦੀ ਕਾਮਨਾ ਵਧਦੀ ਜਾਂਦੀ ਹੈ। ਵੇਖਣ ਵਾਲੇ ਨੂੰ ਹੋਰ ਸਪਸ਼ਟ ਅਤੇ ਭ੍ਰਿਸ਼ਟ ਸਮੱਗਰੀ ਦੀ ਲੋੜ ਹੁੰਦੀ ਹੈ। ਉਹ ਉਨ੍ਹਾਂ ਕਲਪਨਾਵਾਂ ਦਾ ਅਨੰਦ ਲੈਣਾ ਸ਼ੁਰੂ ਕਰ ਦੇਵੇਗਾ ਜੋ ਪਹਿਲਾਂ ਉਸ ਨੂੰ ਬੇਚੈਨ ਕਰ ਦਿੰਦੀਆਂ ਸਨ ਅਤੇ ਡਰਾ ਦਿੰਦੀਆਂ ਸਨ।

ਅਸ਼ਲੀਲ ਚਿਤਰਣ ਨੁਕਸਾਨਦਾਇਕ ਹੈ। ਵੇਖਣ ਵਾਲੇ ਦੀ ਆਮ ਰਿਸ਼ਤੇ ਦਾ ਅਨੰਦ ਉਠਾਉਣ ਦੀ ਯੋਗਤਾ ਘੱਟਦੀ ਜਾਂਦੀ ਹੈ। ਉਸ ਦੀਆਂ ਇੱਛਾਵਾਂ ਐਨੀਆਂ ਅਸੁਭਾਵਕ ਹੋ ਜਾਂਦੀਆਂ ਹਨ ਕਿ ਉਨ੍ਹਾਂ ਨੂੰ ਕਦੇ ਵੀ ਸੰਤੁਸ਼ਟ ਨਹੀਂ ਕੀਤਾ ਜਾ ਸਕਦਾ। ਉਹ ਦੂਸਰਿਆਂ ਦੇ ਸ਼ੋਸ਼ਣ ਪ੍ਰਤੀ ਅਸੰਵੇਦਨਸ਼ੀਲ ਬਣ ਜਾਂਦਾ ਹੈ ਅਤੇ ਚਾਹੁੰਦਾ ਹੈ ਕਿ ਦੂਸਰੇ ਉਸ ਦੇ ਅਨੰਦ ਲਈ ਦੁੱਖ ਭੋਗਣ।

ਅਸ਼ਲੀਲ ਚਿਤਰਣ ਦੇ ਕੁਝ ਪ੍ਰਭਾਵ

ਅਸ਼ਲੀਲ ਚਿਤਰਣ ਵਿੱਚ ਵਿਖਾਈਆਂ ਗਈਆਂ ਕਿਰਿਆਵਾਂ ਵੇਖਣ ਵਾਲਿਆਂ ਦੇ ਮਨਾਂ ਅਤੇ ਸਰੀਰਾਂ ਨੂੰ ਇਵੇਂ ਪ੍ਰਭਾਵਿਤ ਕਰਦੀਆਂ ਹਨ ਜਿਵੇਂ ਉਹ ਆਪ ਸਰੀਰਕ ਤੌਰ ’ਤੇ ਉਹ ਕਿਰਿਆਵਾਂ ਕਰ ਰਹੇ ਹੋਣ।

ਅਸ਼ਲੀਲ ਚਿਤਰਣ ਉਨ੍ਹਾਂ ਸਥਿੱਤੀਆਂ ਨੂੰ ਵਿਖਾਉਂਦਾ ਹੈ ਜੋ ਹਕੀਕੀ ਨਹੀਂ ਹਨ, ਇਸ ਕਾਰਨ ਦਿਮਾਗ ਵਿੱਚ ਬਹੁਤ ਜ਼ਿਆਦਾ ਅਨੰਦ ਭਰੀ ਜਵਾਬੀ ਪ੍ਰਤੀਕਿਰਿਆ ਹੁੰਦੀ ਹੈ, ਜੋ ਕਿ ਸੁਭਾਵਕ ਲਿੰਗਕ ਸੰਬੰਧਾਂ ਨਾਲੋਂ ਕੀਤੇ ਜ਼ਿਆਦਾ ਹੁੰਦੀ ਹੈ।[2] ਦਿਮਾਗ ਅਨੰਦ ਦੇ ਇਨ੍ਹਾਂ ਰਸਾਇਣਾਂ ਦੇ ਗੈਰ-ਕੁਦਰਤੀ ਉੱਚੇ ਸਤਰ ਦਾ ਆਦਿ ਹੋ ਜਾਂਦਾ ਹੈ। ਇਸ ਦੇ ਕਾਰਨ ਹੀ ਦਿਮਾਗ ਲਗਾਤਾਰ ਹੋਰ ਜ਼ਿਆਦਾ ਅਸ਼ਲੀਲ ਚਿਤਰਣ ਦੀ ਮੰਗ ਕਰਦਾ ਹੈ, ਅਤੇ ਹੋਰ ਜ਼ਿਆਦਾ ਭ੍ਰਿਸ਼ਟ ਅਸ਼ਲੀਲ ਚਿਤਰਣ ਦੀ ਮੰਗ ਕਰਦਾ ਹੈ ਤਾਂ ਕਿ ਵੇਖਣ ਵਾਲੇ ਅਨੰਦ ਨੂੰ ਮਹਿਸੂਸ ਕਰਦੇ ਰਹਿਣ। ਦਿਮਾਗ ਦੇ ਰਸਾਇਣਾਂ ਵਿੱਚ ਹੋਣ ਵਾਲਾ ਇਹ ਬਦਲਾਵ, ਵਿਅਕਤੀ ਨੂੰ ਸਰੀਰਕ ਤੌਰ ’ਤੇ ਅਸਲ ਜੀਵਨ ਵਿੱਚ ਲਿੰਗਕ ਸੰਬੰਧ ਬਣਾਉਣ ਦੇ ਅਯੋਗ ਬਣਾ ਦਿੰਦਾ ਹੈ ਜਾਂ ਇਨ੍ਹਾਂ ਦਾ ਅਨੰਦ ਉਠਾਉਣ ਦੇ ਯੋਗ ਬਣਾ ਦਿੰਦਾ ਹੈ। ਅਨੰਦ ਦੇ ਰਸਾਇਣ ਦੀ ਬਹੁਤ ਜ਼ਿਆਦਾ ਮੌਜੂਦਗੀ ਦੇ ਕਰਨ, ਦਿਮਾਗ ਦਾ ਜੋ ਭਾਗ ਸਾਨੂੰ ਫੈਸਲੇ ਲੈਣ ਦੇ ਯੋਗ ਬਣਾਉਂਦਾ ਹੈ ਉਹ ਵੀ ਨੁਕਸਾਨਿਆ ਜਾਂਦਾ ਹੈ।

ਪਰਮੇਸ਼ੁਰ ਨੇ ਲਿੰਗਕ ਅਨੁਭਵਾਂ ਨੂੰ ਇਸ ਤਰ੍ਹਾਂ ਰਚਿਆ ਹੈ ਕਿ ਇਹ ਰਿਸ਼ਤਿਆਂ ਨੂੰ ਜੋੜੀ ਰੱਖਣ। ਲਿੰਗਕ ਸੰਬੰਧ ਬਣਾਉਣ ਦੇ ਦੌਰਾਨ, ਦਿਮਾਗ ਵਿੱਚ ਜੋ ਹਾਰਮੋਨ ਨਿੱਕਲਦਾ ਹੈ ਉਹ ਦੋਵਾਂ ਜੀਵਨ ਸਾਥੀਆਂ ਨੂੰ ਭਾਵਨਾਤਮਕ ਤੌਰ ’ਤੇ ਇੱਕ ਦੂਸਰੇ ਨਾਲ ਜੋੜਦਾ ਹੈ, ਉਨ੍ਹਾਂ ਦੇ ਰਿਸ਼ਤੇ ਨੂੰ ਮਜ਼ਬੂਤ ਬਣਾਉਂਦਾ ਹੈ। ਵਿਆਹ ਦੇ ਰਿਸ਼ਤੇ ਵਿੱਚ ਇਹ ਇੱਕ ਸ਼ਾਨਦਾਰ ਤੋਹਫ਼ਾ ਹੈ। ਪਰ, ਅਸ਼ਲੀਲ ਚਿਤਰਣ ਵੇਖਣਾ, ਵੇਖਣਾ ਵਾਲੇ ਨੂੰ ਭਾਵਨਾਤਮਕ ਤੌਰ ’ਤੇ ਅਸ਼ਲੀਲ ਚਿਤਰਣ ਦੇ ਨਾਲ ਜੋੜ ਦਿੰਦਾ ਹੈ।

ਅਸ਼ਲੀਲ ਚਿਤਰਣ ਨੂੰ ਵੇਖਣ ਤੋਂ ਆਉਣ ਵਾਲੀ ਦੋਸ਼ ਭਾਵਨਾ ਅਤੇ ਸ਼ਰਮ ਲੋਕਾਂ ਨੂੰ ਦੂਸਰਿਆਂ ਨਾਲੋਂ ਵੱਖ ਕਰ ਦਿੰਦੀ ਹੈ, ਉਨ੍ਹਾਂ ਨੂੰ ਲੋਕਾਂ ਨਾਲ ਚੰਗੇ ਰਿਸ਼ਤਿਆਂ ਵਿੱਚ ਜੁੜਨ ਤੋਂ ਰੋਕਦੀ ਹੈ। ਇਹ ਵਿਆਹ ਦੇ ਰਿਸ਼ਤੇ ਵਿੱਚ ਭਰੋਸੇ ਨੂੰ ਵੀ ਖਤਮ ਕਰ ਦਿੰਦਾ ਹੈ।

ਕਿਉਂਕਿ ਅਸ਼ਲੀਲ ਚਿਤਰਣ ਦਿਮਾਗ ਵਿੱਚ ਰਸਾਇਣਕ ਸੰਤੁਲਨ ਨੂੰ ਵਿਗਾੜ ਦਿੰਦਾ ਹੈ, ਇਸ ਲਈ ਅਸ਼ਲੀਲ ਚਿਤਰਣ ਵੇਖਣਾ ਵੇਖਣ ਵਾਲੇ ਨੂੰ ਮਾਯੂਸੀ ਦੇ ਵਿੱਚ ਲੈ ਕੇ ਜਾ ਸਕਦਾ ਹੈ।

ਅਸ਼ਲੀਲ ਚਿਤਰਣ ਵਿੱਚ ਵਿਖਾਏ ਗਏ ਦ੍ਰਿਸ਼ ਕਈ ਵਾਰ ਅਸਲ ਜੀਵਨ ਦੇ ਲਿੰਗਕ ਸੰਬੰਧਾਂ ਵਿੱਚ ਹਿੰਸਾ ਜਾਂ ਸ਼ੋਸ਼ਣ ਦੇ ਵੱਲ ਅਗਵਾਈ ਕਰਦੇ ਹਨ।

ਪਾਸਟਰਾਂ ਅਤੇ ਮਾਪਿਆਂ ਨੂੰ ਚਾਹੀਦਾ ਹੈ ਕਿ ਉਹ ਜਵਾਨ ਲੋਕਾਂ ਨੂੰ ਅਸ਼ਲੀਲ ਚਿਤਰਣ ਦੇ ਖਤਰਿਆਂ ਬਾਰੇ ਚੇਤਾਵਨੀ ਦੇਣ। ਜਦੋਂ ਬੱਚੇ ਐਨੇ ਪਰਿਪੱਕ ਨਹੀਂ ਹੁੰਦੇ ਹਨ ਕਿ ਉਹ ਪਰਤਾਵੇ ਦਾ ਵਿਰੋਧ ਕਰ ਸਕਣ, ਤਦ ਮਾਪਿਆਂ ਨੂੰ ਉਨ੍ਹਾਂ ਦੇ ਇੰਟਰਨੈਟ ਦੀ ਵਰਤੋਂ ਕਰਨ ਦੀ ਚੌਕਸੀ ਰੱਖਣੀ ਚਾਹੀਦੀ ਹੈ। ਕੋਈ ਵੀ ਵਿਅਕਤੀ ਜੋ ਅਸ਼ਲੀਲ ਚਿਤਰਣ ਨੂੰ ਵੇਖਣ ਦੇ ਪਰਤਾਵੇ ਨਾਲ ਸੰਘਰਸ਼ ਕਰ ਰਿਹਾ ਹੈ, ਉਸ ਨੂੰ ਕਿਸੇ ਭਰੋਸੇਯੋਗ, ਧਰਮੀ ਵਿਅਕਤੀ ਨੂੰ ਆਪਣੀਆਂ ਜਿੱਤਾਂ ਜਾਂ ਅਸਫਲਤਾਵਾਂ ਬਾਰੇ ਦੱਸਦੇ ਰਹਿਣਾ ਚਾਹੀਦਾ ਹੈ। ਇੱਕ ਪਰਿਪੱਕ ਵਿਸ਼ਵਾਸੀ ਦੇ ਨਾਲ ਮਿਲਕੇ ਜਾਂਚ ਕਰਦੇ ਰਹਿਣ ਨਾਲ ਇੱਕ ਸੰਘਰਸ਼ ਕਰ ਰਹੇ ਵਿਅਕਤੀ ਨੂੰ ਸ਼ੁੱਧਤਾ ਸੰਬੰਧੀ ਆਪਣੇ ਸਮਰਪਣ ਨੂੰ ਬਣਾਈ ਰੱਖਣ ਵਿੱਚ ਮਦਦ ਮਿਲ ਸਕਦੀ ਹੈ ਅਤੇ ਲਗਾਤਾਰ ਜਿੱਤਾਂ ਪ੍ਰਾਪਤ ਕਰਨ ਵਿੱਚ ਮਦਦ ਮਿਲ ਸਕਦੀ ਹੈ।

► ਲੋਕਾਂ ਨੂੰ ਅਸ਼ਲੀਲ ਚਿਤਰਣ ਦੇ ਨਸ਼ੇ ਦੀ ਲਤ ਤੋਂ ਬਚਾਉਣ ਲਈ, ਤੁਸੀਂ ਉਨ੍ਹਾਂ ਨੂੰ ਕਿਹੜੇ ਅਭਿਆਸ ਕਰਨ ਦੀ ਸਲਾਹ ਦੇਵੋਗੇ? ਕਲੀਸਿਯਾ ਕਿਵੇਂ ਮਦਦ ਕਰ ਸਕਦੀ ਹੈ?

ਬੱਚਿਆਂ ਦਾ ਸ਼ੋਸ਼ਣ, ਇੱਕ ਬੱਚੇ ਦੇ ਨਾਲ ਲਿੰਗਕ ਕਿਰਿਆ ਕਰਨਾ ਹੈ। ਇਹ ਲਿੰਗਕ ਸੰਬੰਧਾਂ ਦਾ ਦੁਰਾਚਾਰ ਹੈ। ਕਈ ਕਾਰਣਾਂ ਦੇ ਕਰਕੇ ਇਹ ਇੱਕ ਬੁਰਾਈ ਹੈ, ਕੁਝ ਕਾਰਣ ਇਹ ਹਨ:

• ਇਹ ਵਿਆਹ ਦੇ ਨੇਮ ਵਿੱਚ ਲਿੰਗਕ ਸੰਬੰਧਾਂ ਬਾਰੇ ਪਰਮੇਸ਼ੁਰ ਦੇ ਇਰਾਦਿਆਂ ਦੀ ਉਲੰਘਣਾ ਹੈ (ਇਬਰਾਨੀਆਂ 13:4)।

• ਇਹ ਬੱਚੇ ਦੀ ਮਸੂਮੀਅਤ ਨੂੰ ਚੁਰਾ ਲੈਂਦਾ ਹੈ – ਬੱਚੇ ਨੂੰ ਹੁਣ ਉਨ੍ਹਾਂ ਗੱਲਾਂ ਦਾ ਅਨੁਭਵ ਹੈ ਜਿਨ੍ਹਾਂ ਬਾਰੇ ਉਸ ਨੂੰ ਅਜੇ ਜਾਣਨਾ ਵੀ ਨਹੀਂ ਚਾਹੀਦਾ ਸੀ।

• ਇਹ ਬੱਚੇ ਦੇ ਕੁਆਰੇਪਣ ਨੂੰ ਖੋਹ ਲੈਂਦਾ ਹੈ (1 ਥੱਸਲੁਨੀਕੀਆਂ 4:3-7)।

• ਇਹ ਬੱਚੇ ਨੂੰ ਇੱਕ ਝੂਠੀ ਦੋਸ਼ ਭਾਵਨਾ ਦਿੰਦਾ ਹੈ; ਬੱਚਾ ਇੱਕ ਗਲਤ ਕੰਮ ਦੇ ਵਿੱਚ ਹੈ ਪਰ ਉਹ ਅਸਲ ਫੈਸਲਾ ਲੈਣ ਦੇ ਯੋਗ ਨਹੀਂ ਜਾਂ ਉਸ ਨੂੰ ਫੈਸਲਾ ਲੈਣ ਦੀ ਅਨੁਮਤੀ ਨਹੀਂ ਦਿੱਤੀ ਗਈ।

• ਇਹ ਬੱਚਿਆਂ ਨੂੰ ਲਿੰਗਕ ਫੈਸਲੇ ਲੈਣ ਲਈ ਮਜ਼ਬੂਰ ਕਰਦਾ ਹੈ ਜੋ ਫੈਸਲੇ ਲੈਣ ਲਈ ਉਹ ਅਜੇ ਪਰਿਪੱਕ ਵੀ ਨਹੀਂ ਹਨ।

• ਇਹ ਬੱਚਿਆਂ ਨੂੰ ਭਵਿੱਖ ਵਿੱਚ ਅਨੈਤਿਕ ਵਿਹਾਰ ਦੀ ਚੋਣ ਕਰਨ ਵੱਲ ਲੈ ਜਾਂਦਾ ਹੈ ਕਿਉਂਕਿ ਉਹ ਗੰਦਾ ਜਾਂ ਵਿਅਰਥ ਮਹਿਸੂਸ ਕਰਦੇ ਹਨ (ਮੱਤੀ 18:6)।

• ਇਹ ਬੱਚੇ ਲਈ ਭਵਿੱਖ ਵਿੱਚ ਭ੍ਰਿਸ਼ਟ ਜਾਂ ਸ਼ੋਸ਼ਣ ਦੀ ਕਿਰਿਆ ਵਿੱਚ ਸ਼ਾਮਲ ਹੋਣ ਦੇ ਪਰਤਾਵੇ ਨੂੰ ਵਧਾਉਂਦਾ ਹੈ।

• ਇਹ ਉਨ੍ਹਾਂ ਦਾ ਸ਼ੋਸ਼ਣ ਕਰਦਾ ਹੈ ਜੋ ਕਮਜ਼ੋਰ ਹਨ ਅਤੇ ਆਪਣਾ ਬਚਾਅ ਨਹੀਂ ਕਰ ਸਕਦੇ ਹਨ।

• ਇਹ ਉਸ ਨੂੰ ਜਖਮੀ ਕਰਦਾ ਹੈ ਜੋ ਪਰਮੇਸ਼ੁਰ ਦੇ ਸਰੂਪ ’ਤੇ ਬਣਾਇਆ ਗਿਆ ਹੈ, ਜਿਸ ਦਾ ਅਸੀਮ ਮਹੱਤਵ ਹੈ (ਉਤਪਤ 1:27)।

ਕਈ ਵਾਰ ਬੱਚਿਆਂ ਦਾ ਸ਼ੋਸ਼ਣ ਪਰਿਵਾਰਾਂ ਵਿੱਚ ਜਾਂ ਦੋਸਤਾਂ ਦੇ ਵਿਚਕਾਰ ਕੀਤਾ ਜਾਂਦਾ ਹੈ। ਸ਼ਾਇਦ ਇਸ ’ਤੇ ਸੰਦੇਹ ਨਾ ਕੀਤਾ ਜਾਵੇ ਕਿਉਂਕਿ ਪਰਿਵਾਰ ਦੇ ਮੈਂਬਰਾਂ ਅਤੇ ਦੋਸਤਾਂ ਉੱਤੇ ਭਰੋਸਾ ਕੀਤਾ ਜਾਂਦਾ ਹੈ, ਅਤੇ ਬੱਚਾ ਉਸ ਬਾਰੇ ਕਿਸੇ ਨੂੰ ਵੀ ਦੱਸਣ ਤੋਂ ਡਰਦਾ ਹੈ ਜੋ ਹੋਇਆ ਹੈ।

ਬਲਾਤਕਾਰ, ਇੱਕ ਵਿਅਕਤੀ (ਭਾਵੇਂ ਬੱਚਾ ਜਾਂ ਬਾਲਗ ਹੋਵੇ) ਨਾਲ ਉਸ ਦੀ ਇੱਛਾ ਦੇ ਵਿਰੁੱਧ ਲਿੰਗਕ ਕਿਰਿਆ ਕਰਨ ਦੇ ਲਈ ਸਰੀਰਕ ਤੌਰ ’ਤੇ ਧੱਕਾ ਕਰਨਾ ਹੈ। ਬਲਾਤਕਾਰ ਵੀ ਬਹੁਤ ਸਾਰੇ ਉਨ੍ਹਾਂ ਕਾਰਣਾਂ ਦੇ ਕਰਕੇ ਹੀ ਇੱਕ ਬੁਰਾਈ ਹੈ ਜਿਨ੍ਹਾਂ ਦੇ ਕਰਕੇ ਬੱਚਿਆਂ ਦਾ ਸ਼ੋਸ਼ਣ ਇੱਕ ਬੁਰਾਈ ਹੈ (ਬਿਵਸਥਾ ਸਾਰ 22:25-27)।

ਲਿੰਗਕ ਸ਼ੋਸ਼ਣ ਦਾ ਇੱਕ ਹੋਰ ਰੂਪ ਲਿੰਗਕ ਤਸਕਰੀ ਹੈ। ਪੂਰੇ ਸੰਸਾਰ ਦੇ ਵਿੱਚ, ਬੱਚਿਆਂ ਅਤੇ ਜਵਾਨ ਲੋਕਾਂ ਨੂੰ ਅਜਨਬੀਆਂ ਦੁਆਰਾ ਅਗਵਾਹ ਕੀਤਾ ਜਾਂਦਾ ਹੈ ਜਾਂ ਪਰਿਵਾਰਕ ਮੈਂਬਰਾਂ ਦੁਆਰਾ ਵੇਚਿਆ ਜਾਂਦਾ ਹੈ ਅਤੇ ਉਨ੍ਹਾਂ ਨੂੰ ਵੇਸਵਾਗਮਨੀ ਲਈ ਜਾਂ ਅਸ਼ਲੀਲ ਚਿਤਰਣ ਬਣਾਉਣ ਲਈ ਵਰਤਿਆ ਜਾਂਦਾ ਹੈ। ਕਈ ਵਾਰ ਗਰੀਬ ਪਰਿਵਾਰ ਆਪਣੇ ਬੱਚਿਆਂ ਨੂੰ ਇਸ ਬੁਰੇ ਕਾਰੋਬਾਰ ਤੋਂ ਬਚਾਉਣ ਵਿੱਚ ਅਸਫ਼ਲ ਹੋ ਜਾਂਦੇ ਹਨ ਕਿਉਂਕਿ ਉਹ ਪੈਸੇ ਲਈ ਲਾਚਾਰ ਮਹਿਸੂਸ ਕਰਦੇ ਹਨ। ਕੋਈ ਲਾਭ ਕਮਾਉਂਦਾ ਹੈ, ਪਰ ਬੱਚਿਆਂ ਨੂੰ ਕੇਵਲ ਸਰੀਰਕ ਤੌਰ ’ਤੇ ਨੁਕਸਾਨ ਨਹੀਂ ਪਹੁੰਚਾਇਆ ਜਾਂਦਾ ਸਗੋਂ ਉਨ੍ਹਾਂ ਨੂੰ ਮਾਨਸਿਕ ਅਤੇ ਭਾਵਨਾਤਮਕ ਤੌਰ ’ਤੇ ਵੀ ਵੱਡਾ ਨੁਕਸਾਨ ਪਹੁੰਚਾਇਆ ਜਾਂਦਾ ਹੈ। ਗਰੀਬਾਂ ਅਤੇ ਕਮਜ਼ੋਰਾਂ ਉੱਤੇ ਇਸ ਪਾਪੀ ਜ਼ੁਲਮ ਦੇ ਲਈ ਪਰਮੇਸ਼ੁਰ ਸਜ਼ਾ ਦੇਵੇਗਾ (ਕਹਾਉਤਾਂ 14:31)।

ਬੱਚਿਆਂ ਦੇ ਵਿਰੁੱਧ ਇਹ ਪਾਪ, ਪਰਮੇਸ਼ੁਰ ਦੇ ਦਿਲ ਨੂੰ ਤੋੜ ਕੇ ਰੱਖ ਦਿੰਦੇ ਹਨ (ਮੱਤੀ 18:10-14, ਜ਼ਬੂਰ 146:7-9)। ਜਿਹੜੇ ਲੋਕ ਅਜਿਹੇ ਪਾਪ ਕਰਦੇ ਹਨ ਉਹ ਸਜ਼ਾ ਤੋਂ ਬਚਣਗੇ ਨਹੀਂ (1 ਥੱਸਲੁਨੀਕੀਆਂ 4:6, ਹਿਜ਼ਕੀਏਲ 7:8-9)। ਵਿਸ਼ਵਾਸੀਆਂ ਨੂੰ ਚਾਹੀਦਾ ਹੈ ਕਿ ਉਹ ਉਨ੍ਹਾਂ ਲੋਕਾਂ ਨੂੰ ਬਚਾਉਣ, ਛੁਡਾਉਣ, ਅਤੇ ਠੀਕ ਕਰਨ ਲਈ ਪਰਮੇਸ਼ੁਰ ਦਾ ਪਿਆਰ ਅਤੇ ਤਰਸ ਵਿਖਾਉਣ, ਜੋ ਲੋਕ ਗੁਲਾਮ ਬਣਾਏ ਗਏ ਹਨ (ਕਹਾਉਤਾਂ 24:11-12, ਅੱਯੂਬ 29:12-16, ਜ਼ਬੂਰ 72:12-14)।

ਹੱਥਰਸੀ ਦਾ ਮਤਲਬ ਹੈ ਕਿ ਆਪਣੇ ਅੰਗਾਂ ਨੂੰ ਲਿੰਗਕ ਅਨੰਦ ਦੇ ਲਈ ਖੁਦ ਉਤੇਜਿਤ ਕਰਨਾ ਜਾਂ ਲਿੰਗਕ ਤਣਾਅ ਤੋਂ ਰਾਹਤ ਪਾਉਣਾ।

ਭਾਵੇਂ ਕਿ ਬਾਈਬਲ ਸਿੱਧੇ ਤੌਰ ’ਤੇ, ਹੱਥਰਸੀ ਨੂੰ ਅਨੈਤਿਕ ਨਹੀਂ ਠਹਿਰਾਉਂਦੀ ਹੈ। ਪਰ, ਹੱਥਰਸੀ ਕਾਮੁਕ ਸੋਚ, ਅਸ਼ਲੀਲ ਚਿਤਰਣ ਵੇਖਣ, ਅਤੇ ਹਰਾਮਕਾਰੀ ਦੇ ਵੱਲ ਅਗਵਾਈ ਕਰ ਸਕਦੀ ਹੈ, ਅਤੇ ਇਹ ਸਭ ਪਾਪ ਹੈ (ਮੱਤੀ 5:27-28, ਮੱਤੀ 15:19-20)।

ਹੱਥਰਸੀ ਇੱਕ ਮੂਰਖਤਾ ਵੀ ਹੈ ਕਿਉਂਕਿ ਇਹ ਇੱਕ ਨਸ਼ਾ ਹੈ: ਜਿੰਨਾ ਜ਼ਿਆਦਾ ਤੁਸੀਂ ਇਹ ਕਰਦੇ ਹੋ, ਓਨਾਂ ਜ਼ਿਆਦਾ ਤੁਸੀਂ ਮਹਿਸੂਸ ਕਰਦੇ ਹੋ ਕਿ ਤੁਸੀਂ ਇਹ ਹੋਰ ਕਰਨਾ ਹੈ।

ਹੱਥਰਸੀ ਦੀ ਮਜ਼ਬੂਰ ਕਰ ਦੇਣ ਵਾਲੀ ਲਤ ਕਿਸੇ ਡੂੰਘੇ ਮਸਲੇ ਵੱਲ ਇਸ਼ਾਰਾ ਕਰਦੀ ਹੈ, ਜਿਵੇਂ ਕਿ ਭਾਵਨਾਤਮਕ ਜਾਂ ਰਿਸ਼ਤਿਆਂ ਵਿਚਲੀਆਂ ਸਮੱਸਿਆਵਾਂ, ਜਾਂ ਅਤੀਤ ਵਿੱਚ ਹੋਇਆ ਲਿੰਗਕ ਸ਼ੋਸ਼ਣ।

► ਵਿਦਿਆਰਥੀਆਂ ਨੂੰ ਸਮੂਹ ਲਈ 1 ਕੁਰਿੰਥੀਆਂ 6:12-13, 18-20 ਅਤੇ 1 ਥੱਸਲੁਨੀਕੀਆਂ 4:1-8 ਨੂੰ ਪੜ੍ਹਨਾ ਚਾਹੀਦਾ ਹੈ।

ਪਰਮੇਸ਼ੁਰ ਨੇ ਵਿਆਹ ਵਿੱਚ ਸਰੀਰਕ ਤੌਰ ’ਤੇ ਇੱਕ ਹੋਣ ਦੀ ਰਚਨਾ ਇਸ ਲਈ ਕੀਤੀ ਤਾਂ ਕਿ ਪਤੀ ਅਤੇ ਪਤਨੀ ਨੂੰ ਭਾਵਨਾਤਮਕ ਅਤੇ ਆਤਮਿਕ ਤੌਰ ’ਤੇ ਇੱਕ ਹੋਣ ਵਿੱਚ ਮਦਦ ਮਿਲੇ (1 ਕੁਰਿੰਥੀਆਂ 6:16-20, ਮਲਾਕੀ 2:15)।

ਬਹੁਤੇ... ਮੰਨਦੇ ਹਨ ਕਿ ਹੱਥਰਸੀ ਉਨ੍ਹਾਂ ਦੀ ਤਦ ਤਕ ਕੁਆਰੇ ਰਹਿਣ ਵਿੱਚ ਮਦਦ ਕਰ ਸਕਦੀ ਹੈ ਜਦੋਂ ਤਕ ਉਹ ਵਿਆਹੇ ਨਹੀਂ ਜਾਂਦੇ। ਪਰ ਇਹ ਨਹੀਂ ਸਮਝ ਪਾਉਂਦੇ ਕਿ ਜਦੋਂ ਇਸ ਦੀ ਆਦਤ ਪੈ ਜਾਂਦੀ ਹੈ, ਤਾਂ ਇਹ ਭਵਿੱਖ ਵਿੱਚ ਵਿਆਹੁਤਾ ਰਿਸ਼ਤੇ ਵਿੱਚ ਲਿੰਗਕ ਸੰਬੰਧਾਂ ਦੀ ਸੁੰਦਰਤਾ ਅਤੇ ਨੇੜਤਾ ਲਈ ਇੱਕ ਖਤਰਾ ਹੋ ਸਕਦੀ ਹੈ।

ਹੱਥਰਸੀ ਉਹ ਲਿੰਗਕ ਅਨੁਭਵ ਪ੍ਰਦਾਨ ਕਰਦੀ ਹੈ ਜਿਸ ਵਿੱਚ ਲਿੰਗਕ ਸੰਬੰਧਾਂ ਦੇ ਜ਼ਰੂਰੀ ਉਦੇਸ਼ ਨੂੰ ਪੂਰਾ ਨਹੀਂ ਕੀਤਾ ਜਾਂਦਾ: ਦੋ ਜਣਿਆਂ ਦੇ ਇਕੱਠੇ ਹੋਣ ਦਾ ਉਦੇਸ਼ ਸਰੀਰਕ ਅਤੇ ਭਾਵਨਾਤਮਕ ਤੌਰ ’ਤੇ ਇੱਕ ਹੋਣਾ ਹੈ... ਹੱਥਰਸੀ ਨੂੰ ਵਿਆਹੁਤਾ ਰਿਸ਼ਤੇ ਵਿੱਚ ਚੰਗੀ ਅਤੇ ਸਧਾਰਣ ਲਿੰਗਕ ਕਿਰਿਆ ਦੇ ਸਥਾਨ ’ਤੇ ਨਹੀਂ ਵਰਤਣਾ ਚਾਹੀਦਾ।[1]

ਜੇ ਹੱਥਰਸੀ ਲੋਕਾਂ ਦੇ ਜੀਵਨ ਵਿੱਚ ਇੱਕ ਸਮੱਸਿਆ ਹੈ ਤਾਂ ਅਣਵਿਆਹੇ ਵਿਅਕਤੀ ਨੂੰ ਕੀ ਕਰਨਾ ਚਾਹੀਦਾ ਹੈ? ਭਾਵੇਂ ਕੋਈ ਲਿੰਗਕ ਤਣਾਅ ਤੋਂ ਰਾਹਤ ਪਾਉਣ ਦੇ ਉਦੇਸ਼ ਨਾਲ ਹੀ ਹੱਥਰਸੀ ਕਿਉਂ ਨਾ ਕਰ ਰਿਹਾ ਹੋਵੇ, ਪਰ ਫਿਰ ਵੀ ਇਸ ਤੋਂ ਬਚਣਾ ਹੀ ਉੱਤਮ ਹੈ, ਉਨ੍ਹਾਂ ਪਰਤਾਵਿਆਂ ਦੇ ਕਾਰਣ ਜੋ ਮੌਜੂਦ ਹਨ ਅਤੇ ਕਿਉਂਕਿ ਹੱਥਰਸੀ ਲਿੰਗਕਤਾ ਦੇ ਲਈ ਪਰਮੇਸ਼ੁਰ ਦੇ ਉਦੇਸ਼ਾਂ ਨੂੰ ਪੂਰਾ ਨਹੀਂ ਕਰਦੀ ਹੈ।

ਜੇ ਉਨ੍ਹਾਂ ਦੇ ਜੀਵਨ ਵਿੱਚ ਕਿਸੇ ਪ੍ਰਕਾਰ ਦੀ ਅਨੈਤਿਕਤਾ ਹੈ, ਤਾਂ ਜ਼ਰੂਰੀ ਹੈ ਕਿ ਉਹ ਅੰਗੀਕਾਰ ਕਰਨ ਅਤੇ ਉਸ ਪਾਪ ਨੂੰ ਛੱਡ ਦੇਣ। ਉਨ੍ਹਾਂ ਨੂੰ ਨਿਯਮਤ ਤੌਰ ’ਤੇ ਅਤੇ ਅਕਸਰ ਆਪਣੀਆਂ ਜਿੱਤਾਂ ਅਤੇ ਅਸਫਲਤਾਵਾਂ ਬਾਰੇ ਉਸ ਧਰਮੀ ਬਜ਼ੁਰਗ ਗੁਰੂ ਨੂੰ ਦੱਸਣਾ ਚਾਹੀਦਾ ਹੈ ਜੋ ਉਨ੍ਹਾਂ ਲਈ ਪ੍ਰਾਰਥਨਾ ਕਰੇਗਾ ਅਤੇ ਉਨ੍ਹਾਂ ਨੂੰ ਸਲਾਹ ਦੇਵੇਗਾ।

ਜੇ ਹੱਥਰਸੀ ਭਾਵਨਾਤਮਕ ਜਾਂ ਰਿਸ਼ਤਿਆਂ ਵਿਚਲੀਆਂ ਸਮੱਸਿਆਵਾਂ ਜਾਂ ਅਤੀਤ ਵਿੱਚ ਹੋਏ ਲਿੰਗਕ ਸ਼ੋਸ਼ਣ ਦਾ ਨਤੀਜਾ ਹੈ, ਤਾਂ ਇੱਕ ਮਾਹਰ ਮਸੀਹੀ ਸਲਾਹਕਾਰ ਤੋਂ ਸਲਾਹ ਲੈਣਾ ਹੀ ਠੀਕ ਹੋਵੇਗਾ।

ਪਰਮੇਸ਼ੁਰ ਨੇ ਵਿਆਹ ਨੂੰ ਇੱਕ ਪੁਰਸ਼ ਅਤੇ ਇੱਕ ਇਸਤਰੀ ਵਿਚਕਾਰ ਜੀਵਨ ਭਰ ਦਾ ਇੱਕ ਸਮਰਪਣ ਹੋਣ ਦੇ ਲਈ ਰਚਿਆ ਹੈ। ਪਰਮੇਸ਼ੁਰ ਨੇ ਵੇਖਿਆ ਕਿ ਆਦਮ ਨੂੰ ਇੱਕ ਸਹਾਇਕ ਦੀ ਲੋੜ ਹੈ (ਉਤਪਤ 2:18)। ਸਹਾਇਕ ਲਈ ਵਰਤੇ ਗਏ ਸ਼ਬਦ ਦਾ ਮਤਲਬ ਹੈ ਕਿ ਕੋਈ ਅਜਿਹਾ ਜੋ ਦੂਸਰੇ ਨਾਲ ਸੰਬੰਧ ਰੱਖਦਾ ਹੈ, ਮਦਦਗਾਰ ਤਰੀਕਿਆਂ ਨਾਲ ਵੱਖਰਾ ਹੁੰਦੇ ਹੋਏ ਸਹਾਇਕ ਬਣਨਾ। ਪਰਮੇਸ਼ੁਰ ਨੇ ਆਦਮ ਦੀ ਸਹਾਇਕ ਬਣਨ ਦੇ ਲਈ ਇੱਕ ਔਰਤ ਨੂੰ ਬਣਾਇਆ, ਉਸ ਨੇ ਇੱਕ ਹੋਰ ਆਦਮੀ ਨੂੰ ਨਹੀਂ ਬਣਾਇਆ (ਉਤਪਤ 2:22)। ਸ੍ਰਿਸ਼ਟੀ ਦਾ ਸਾਰ ਸਾਰੀ ਮਨੁੱਖਜਾਤੀ ਲਈ ਵਿਆਹ ਨਾਲ ਸੰਬੰਧਤ ਇੱਕ ਆਮ ਸਿਧਾਂਤ ਦਿੰਦਾ ਹੈ – ਵਿਆਹੁਤਾ ਰਿਸ਼ਤੇ ਵਿੱਚ, ਇੱਕ ਪੁਰਸ਼ ਅਤੇ ਇੱਕ ਇਸਤਰੀ ਅਨੋਖੇ ਢੰਗ ਨਾਲ ਇੱਕ ਹੁੰਦੇ ਹਨ (ਉਤਪਤ 2:24)।

ਯਿਸੂ ਨੇ ਵਿਆਹ ਲਈ ਪਰਮੇਸ਼ੁਰ ਦੇ ਨਮੂਨੇ ਬਾਰੇ ਗੱਲ ਕੀਤੀ (ਮੱਤੀ 19:4-6)। ਉਸ ਨੇ ਉਤਪਤ ਵਿੱਚੋਂ ਵਚਨ ਦੇ ਇੱਕ ਭਾਗ ਦਾ ਹਵਾਲਾ ਦਿੱਤਾ ਅਤੇ ਆਖਿਆ ਕਿ ਇੱਕ ਪੁਰਸ਼ ਅਤੇ ਇੱਕ ਇਸਤਰੀ ਅਨੋਖੇ ਸਥਾਈ ਰਿਸ਼ਤੇ ਵਿੱਚ ਇੱਕ ਹੋਣ ਲਈ ਇਕੱਠੇ ਹੁੰਦੇ ਹਨ।

ਰਸੂਲ ਪੌਲੁਸ ਨੇ ਵਿਆਹ ਦੇ ਬਾਰੇ ਬਹੁਤ ਸਾਰੇ ਕਥਨ ਆਖੇ। ਉਸ ਨੇ ਆਖਿਆ ਕਿ ਵਿਆਹ ਇੱਕ ਉਦਾਹਰਣ ਹੈ ਜੋ ਸਾਨੂੰ ਮਸੀਹ ਅਤੇ ਕਲੀਸਿਯਾ ਵਿਚਲੇ ਰਿਸ਼ਤੇ ਬਾਰੇ ਸਿਖਾਉਂਦੀ ਹੈ (ਅਫ਼ਸੀਆਂ 5:22-33)। ਅਫ਼ਸੀਆਂ ਦੇ ਇਸ ਭਾਗ ਵਿੱਚ, ਉਸ ਨੇ ਪੁਰਸ਼ਾਂ ਅਤੇ ਉਨ੍ਹਾਂ ਦੀਆਂ ਪਤਨੀਆਂ ਵਿਚਲੇ ਰਿਸ਼ਤੇ ਬਾਰੇ ਕਥਨ ਆਖੇ। ਉਸ ਨੇ ਇੱਕ ਪੁਰਸ਼ ਅਤੇ ਇੱਕ ਇਸਤਰੀ ਵਿੱਚ ਵਿਸ਼ੇਸ਼ ਰਿਸ਼ਤੇ ਬਾਰੇ ਉਤਪਤ ਦੀ ਪੁਸਤਕ ਅਤੇ ਮੱਤੀ ਦੀ ਇੰਜੀਲ ਵਿੱਚ ਕਥਨ ਦਾ ਹਵਾਲਾ ਦਿੱਤਾ (ਅਫ਼ਸੀਆਂ 5:31)। ਵਚਨ ਦੇ ਇਸ ਭਾਗ ਤੋਂ ਇਹ ਸਪਸ਼ਟ ਹੈ ਕਿ ਵਿਆਹ ਇੱਕ ਪੁਰਸ਼ ਅਤੇ ਇੱਕ ਇਸਤਰੀ ਦੇ ਵਿਚਕਾਰ ਇੱਕ ਰਿਸ਼ਤਾ ਹੈ।

ਲੇਵੀਆਂ ਦੀ ਪੋਥੀ ਇਸਰਾਏਲ ਲਈ ਪਰਮੇਸ਼ੁਰ ਦੀ ਸ਼ਰਾ ਨੂੰ ਲਾਗੂ ਕਰਨ ਬਾਰੇ ਵਿਸਥਾਰ ਨਾਲ ਦੱਸਦੀ ਹੈ। ਇਹ ਆਖਦੀ ਹੈ ਕਿ ਇੱਕ ਪੁਰਸ਼ ਦਾ ਦੂਸਰੇ ਪੁਰਸ਼ ਦੇ ਨਾਲ ਇੱਕ ਔਰਤ ਨਾਲ ਸੌਣ ਵਾਂਗ ਹੀ ਸੌਣਾ ਘਿਣਾਉਣਾ ਹੈ (ਲੇਵੀਆਂ ਦੀ ਪੋਥੀ 18:22)। ਸਮਲਿੰਗੀ ਸੰਬੰਧਾਂ ਦੇ ਲਈ ਦੋਵਾਂ ਸਾਥੀਆਂ ਲਈ ਮੌਤ ਦੀ ਸਜ਼ਾ ਸੀ, ਕਿਉਂਕਿ ਦੋਵਾਂ ਨੇ ਇੱਕ ਘਿਣਾਉਣਾ ਕੰਮ ਕੀਤਾ ਹੈ (ਲੇਵੀਆਂ ਦੀ ਪੋਥੀ 20:13)।

ਕਈ ਵਾਰ ਲੋਕ ਆਖਦੇ ਹਨ ਕਿ ਲੇਵੀਆਂ ਦੀ ਪੋਥੀ ਆਧੁਨਿਕ ਲੋਕਾਂ ਉੱਤੇ ਲਾਗੂ ਨਹੀਂ ਹੁੰਦੀ। ਇਹ ਸੱਚ ਹੈ ਕਿ ਲੇਵੀਆਂ ਦੀ ਪੋਥੀ ਵਿੱਚ ਦਿੱਤੇ ਗਏ ਕੁਝ ਹੁਕਮਾਂ ਦਾ ਰਸਮੀ ਮਹੱਤਵ ਹੈ। ਪਰ, ਲੇਵੀਆਂ 18-20 ਵਿਚਲੇ ਹੁਕਮ ਹੋਰ ਲਿੰਗਕ ਭ੍ਰਿਸ਼ਟਤਾ ਤੋਂ ਮਨ੍ਹਾ ਕਰਦੇ ਹਨ ਜਿਵੇਂ ਕਿ ਕਰੀਬੀ ਰਿਸ਼ਤੇਦਾਰਾਂ ਦੇ ਨਾਲ ਲਿੰਗਕ ਸੰਬੰਧ, ਜਾਨਵਰਾਂ ਦੇ ਨਾਲ ਲਿੰਗਕ ਸੰਬੰਧ, ਅਤੇ ਇੱਕ ਧੀ ਦੀ ਵੇਸਵਾਗਮਨੀ। ਇਨ੍ਹਾਂ ਅਧਿਆਇਆਂ ਵਿੱਚ ਹੋਰ ਹੁਕਮ ਬੱਚਿਆਂ ਦੇ ਬਲੀਦਾਨ, ਚੋਰੀ, ਮੂਰਤੀਪੂਜਾ, ਬੋਲਿਆਂ ਜਾਂ ਅੰਨ੍ਹਿਆਂ ਦੇ ਨਾਲ ਬੁਰੇ ਵਿਹਾਰ, ਗਰੀਬ ਉੱਤੇ ਜ਼ੁਲਮ ਕਰਨ, ਪਰਦੇਸੀਆਂ ਨਾਲ ਬੁਰਾ ਵਿਹਾਰ ਕਰਨ, ਅਤੇ ਘੱਟ ਤੋਲਣ ਤੋਂ ਮਨ੍ਹਾ ਕਰਦੇ ਹਨ। ਇਹ ਸਪਸ਼ਟ ਹੈ ਕਿ ਇਹ ਹੁਕਮ ਨੈਤਿਕਤਾ ਅਤੇ ਨਿਆਂ ਸੰਬੰਧੀ ਪਰਮੇਸ਼ੁਰ ਦੇ ਮਿਆਰਾਂ ਦੇ ਉਪਯੋਗ ਹਨ ਜੋ ਹਰ ਸਮੇਂ ਸਾਰੇ ਸਥਾਨਾਂ ਦੇ ਲੋਕਾਂ ਉੱਤੇ ਲਾਗੂ ਹੁੰਦੇ ਹਨ।

► ਇੱਕ ਵਿਦਿਆਰਥੀ ਨੂੰ ਸਮੂਹ ਲਈ ਰੋਮੀਆਂ 1:18-32 ਨੂੰ ਪੜ੍ਹਨਾ ਚਾਹੀਦਾ ਹੈ।

ਵਚਨ ਦਾ ਭਾਗ ਇਸ ਕਥਨ ਦੇ ਨਾਲ ਸ਼ੁਰੂ ਹੁੰਦਾ ਹੈ ਕਿ ਪਰਮੇਸ਼ੁਰ ਦੀ ਸਜ਼ਾ ਉਨ੍ਹਾਂ ਸਾਰੇ ਲੋਕਾਂ ਉੱਤੇ ਆ ਰਹੀ ਹੈ ਜੋ ਜਾਣਬੁੱਝ ਕੇ ਪਰਮੇਸ਼ੁਰ ਦੇ ਵਿਰੁੱਧ ਵਿਦਰੋਹ ਕਰਦੇ ਹਨ। ਇਹ ਭਾਗ ਆਖਦਾ ਹੈ ਕਿ ਲੋਕਾਂ ਨੇ ਸਿਰਜਣਹਾਰ ਸੱਚੇ ਪਰਮੇਸ਼ੁਰ ਬਾਰੇ ਗਿਆਨ ਨੂੰ ਰੱਦ ਕਰ ਦਿੱਤਾ ਹੈ, ਅਤੇ ਉਸ ਤੋਂ ਬਾਅਦ ਉਹ ਉਹ ਮੂਰਤੀਪੂਜਕ ਬਣ ਗਏ ਹਨ, ਸ੍ਰਿਸ਼ਟੀ ਕੀਤੀਆਂ ਹੋਈਆਂ ਚੀਜ਼ਾਂ ਦੀ ਅਰਾਧਨਾ ਕਰਦੇ ਹਨ। ਉਨ੍ਹਾਂ ਨੇ ਸੱਚਾਈ ਨੂੰ ਰੱਦ ਕੀਤਾ ਅਤੇ ਇਹ ਉਨ੍ਹਾਂ ਨੂੰ ਲਿੰਗਕ ਪਾਪ ਦੇ ਵੱਲ ਲੈ ਗਿਆ, ਇੱਥੋਂ ਤਕ ਕਿ ਉਨ੍ਹਾਂ ਨੂੰ ਸਮਲਿੰਗੀ ਸੰਬੰਧਾਂ ਦੇ ਵੱਲ ਲੈ ਗਿਆ। ਇਹ ਭਾਗ ਦੱਸਦਾ ਹੈ ਕਿ ਇੱਕੋ ਲਿੰਗ ਦੇ ਲੋਕਾਂ ਵਿਚਕਾਰ ਲਿੰਗਕ ਸੰਬੰਧ ਉਸ ਦੇ ਵਿਰੋਧ ਵਿੱਚ ਹਨ ਜੋ ਕੁਦਰਤੀ ਹੈ। ਕਈ ਲੋਕਾਂ ਨੇ ਆਖਿਆ ਹੈ ਕਿ ਇਹ ਭਾਗ ਸਮਲਿੰਗੀ ਬਲਾਤਕਾਰ ਦੇ ਬਾਰੇ ਗੱਲ ਕਰਦਾ ਹੈ, ਪਰ ਇਹ ਭਾਗ ਆਖਦਾ ਹੈ ਕਿ ਲੋਕਾਂ ਨੇ ਮਿਲਕੇ ਉਹ ਕੀਤਾ ਜੋ ਗਲਤ ਹੈ ਅਤੇ ਇਸ ਲਈ ਸਜ਼ਾ ਪਾਈ, ਸੋ ਇਹ ਸਵੈ-ਇੱਛਾ ਦੇ ਨਾਲ ਮਿਲਕੇ ਕੀਤੀ ਗਈ ਕਿਰਿਆ ਬਾਰੇ ਗੱਲ ਕਰਦਾ ਹੈ। ਇਹ ਭਾਗ ਬਹੁਤ ਪ੍ਰਕਾਰ ਦੇ ਪਾਪਾਂ ਦੀ ਸੂਚੀ ਦੱਸਦਾ ਹੈ ਅਤੇ ਪਰਮੇਸ਼ੁਰ ਦੇ ਵਿਰੁੱਧ ਵਿਦਰੋਹ ਦੇ ਇੱਕ ਰਵੱਈਏ ਦਾ ਵਰਣਨ ਕਰਦਾ ਹੈ।

ਰਸੂਲ ਪੌਲੁਸ ਸਮਲਿੰਗੀ ਸੰਬੰਧਾਂ ਨੂੰ ਉਨ੍ਹਾਂ ਹੋਰ ਪਾਪਾਂ ਦੀ ਸੂਚੀ ਦੇ ਵਿੱਚ ਹੀ ਰੱਖਦਾ ਹੈ ਜਿਨ੍ਹਾਂ ਲਈ ਪਰਮੇਸ਼ੁਰ ਸਜ਼ਾ ਦਿੰਦਾ ਹੈ (1 ਕੁਰਿੰਥੀਆਂ 6:9-10, 1 ਤਿਮੋਥਿਉਸ 1:9-10)।

ਕਈ ਕਲੀਸਿਯਾਵਾਂ ਨੇ ਉਨ੍ਹਾਂ ਲੋਕਾਂ ਲਈ ਪਿਆਰ ਵਿਖਾਉਣ ਦਾ ਢੰਗ ਲੱਭਣ ਵਿੱਚ ਸੰਘਰਸ਼ ਕੀਤਾ ਹੈ ਜੋ ਲਿੰਗਕ ਪਾਪ ਦੇ ਵਿੱਚ ਫਸੇ ਹੋਏ ਹਨ। ਕਈ ਕਲੀਸਿਯਾਵਾਂ ਨੇ ਲਿੰਗਕ ਪਾਪ ਦੀਆਂ ਬਹੁਤ ਸਾਰੀਆਂ ਕਿਸਮਾਂ ਨੂੰ ਸਧਾਰਣ ਅਤੇ ਸੁਭਾਵਕ ਅਤੇ ਇਹ ਆਖ ਕੇ ਮਾਫ਼ ਕਰ ਦਿੱਤਾ ਹੈ ਕਿ ਇਨ੍ਹਾਂ ਤੋਂ ਬਚਿਆ ਨਹੀਂ ਜਾ ਸਕਦਾ।

► ਲਿੰਗਕ ਨੈਤਿਕਤਾ ਦੇ ਮਸਲਿਆਂ ਬਾਰੇ ਕਲੀਸਿਯਾ ਦੀਆਂ ਕਿਹੜੀਆਂ ਕੁਝ ਜ਼ਿੰਮੇਵਾਰੀਆਂ ਹਨ?

ਧਾਰਮਿਕਤਾ ਬਾਰੇ ਸਿਖਾਉਣਾ ਅਤੇ ਇਸ ਨੂੰ ਪਿਆਰ ਕਰਨਾ

ਕਈ ਵਾਰ ਕਲੀਸਿਯਾਵਾਂ ਲਿੰਗਕ ਅਨੈਤਿਕਤਾ ਦੀਆਂ ਉਨ੍ਹਾਂ ਕਿਸਮਾਂ ਬਾਰੇ ਬੇਪਰਵਾਹ ਜਾਪਦੀਆਂ ਹਨ ਜਿਨ੍ਹਾਂ ਬਾਰੇ ਉਹ ਸੋਚਦੇ ਹਨ ਕਿ ਉਹ ਘੱਟ ਨੁਕਸਾਨਦਾਇਕ ਅਤੇ ਘੱਟ ਭ੍ਰਿਸ਼ਟ ਹਨ। ਉਦਾਹਰਣ ਲਈ, ਕੁਆਰੇ ਜਵਾਨ ਲੋਕਾਂ ਨੂੰ ਪਰਤਾਵੇ ਉੱਤੇ ਜਿੱਤ ਪਾਉਣ ਬਾਰੇ ਸਿਖਾਉਣ ਦੇ ਬਜਾਏ, ਉਹ ਇਹ ਮੰਨ ਸਕਦੇ ਹਨ ਕਿ ਬਹੁਤ ਸਾਰੇ ਕੁਆਰੇ ਜਵਾਨ ਲੋਕ ਲਿੰਗਕ ਸੰਬੰਧ ਬਣਾਉਣਗੇ। ਵਿਸ਼ਵਾਸੀਆਂ ਨੂੰ ਪਵਿੱਤਰ ਜੀਵਨ ਜੀਣ ਬਾਰੇ ਪਰਮੇਸ਼ੁਰ ਦੇ ਮਿਆਰ ਨੂੰ ਬਣਾਈ ਰੱਖਣਾ ਚਾਹੀਦਾ ਹੈ ਅਤੇ ਲਿੰਗਕ ਸੰਬੰਧਾਂ ਨੂੰ ਵਿਆਹੁਤਾ ਰਿਸ਼ਤੇ ਦੇ ਲਈ ਹੀ ਰੱਖਣਾ ਚਾਹੀਦਾ ਹੈ।

ਕਲੀਸਿਯਾ ਦਾ ਸੰਦੇਸ਼ ਬਾਈਬਲ ਦੇ ਕਥਨਾਂ ਵਾਂਗ ਹੀ ਸਪਸ਼ਟ ਹੋਣਾ ਚਾਹੀਦਾ ਹੈ। ਪਰਮੇਸ਼ੁਰ ਉਨ੍ਹਾਂ ਦਾ ਨਿਆਂ ਕਰੇਗਾ ਜੋ ਵਿਆਹੁਤਾ ਰਿਸ਼ਤੇ ਤੋਂ ਬਾਹਰ ਲਿੰਗਕ ਸੰਬੰਧ ਬਣਾਉਂਦੇ ਹਨ (ਇਬਰਾਨੀਆਂ 13:4)। ਵਿਸ਼ਵਾਸੀਆਂ ਨੂੰ ਇੱਕ ਵਿਅਕਤੀ ਦੀ ਅਨੈਤਿਕ ਲਿੰਗਕ ਸੰਬੰਧ ਲਈ ਪ੍ਰਸ਼ੰਸ਼ਾ ਨਹੀਂ ਕਰਨੀ ਚਾਹੀਦੀ। ਮਸੀਹ ਦੇ ਚੇਲਿਆਂ ਨੂੰ ਲਿੰਗਕ ਅਨੈਤਿਕਤਾ ਦੇ ਬਾਰੇ ਚੁਟਕਲੇ ਨਹੀਂ ਬਣਾਉਣੇ ਚਾਹੀਦੇ। ਸੰਸਾਰ ਸਿਖਾਉਂਦਾ ਹੈ ਕਿ ਲਿੰਗਕ ਪਾਪ ਵਿੱਚ ਗਰਭਧਾਰਣ ਅਤੇ ਬਿਮਾਰੀ ਤੋਂ ਬਚਣ ਲਈ ਸਾਵਧਾਨੀ ਵਰਤਣੀ ਚਾਹੀਦੀ ਹੈ, ਪਰ ਕਲੀਸਿਯਾ ਦਾ ਸੰਦੇਸ਼ ਬਹੁਤ ਮਹੱਤਵਪੂਰਣ ਹੈ। ਕਲੀਸਿਯਾ ਨੂੰ ਸਿਖਾਉਣਾ ਚਾਹੀਦਾ ਹੈ ਕਿ ਲਿੰਗਕ ਪਾਪ ਦੁੱਖ, ਪਰਿਵਾਰਾਂ ਦੇ ਟੁੱਟਣ, ਵਧੇਰੇ ਪਰਤਾਵੇ ਅਤੇ ਅਸੰਤੋਸ਼, ਅਤੇ ਦੋਸ਼ ਭਾਵਨਾ ਦੇ ਵੱਲ ਲੈ ਕੇ ਜਾਂਦਾ ਹੈ।

ਖੁਸ਼ ਖਬਰੀ ਨੂੰ ਸਾਂਝਾ ਕਰਨਾ

ਕਲੀਸਿਯਾ ਨੂੰ ਸਾਰੇ ਪਾਪੀਆਂ ਨੂੰ ਪਿਆਰ ਕਰਨਾ ਚਾਹੀਦਾ ਹੈ ਅਤੇ ਉਨ੍ਹਾਂ ਲਈ ਮਸੀਹ ਦੀ ਕਿਰਪਾ ਅਤੇ ਮਾਫ਼ੀ ਵਿਖਾਉਣੀ ਚਾਹੀਦੀ ਹੈ।

ਪਰਤਾਵੇ ਦਾ ਅਨੁਭਵ ਕਰਨਾ ਪਾਪ ਨਹੀਂ ਹੈ; ਮਸੀਹ ਨੂੰ ਵੀ ਪਰਤਾਇਆ ਗਿਆ ਸੀ, ਪਰ ਉਹ ਪਾਪ ਤੋਂ ਰਹਿਤ ਰਿਹਾ (ਇਬਰਾਨੀਆਂ 4:15)। ਕਲੀਸਿਯਾ ਨੂੰ ਇਹ ਧਿਆਨ ਰੱਖਣਾ ਚਾਹੀਦਾ ਹੈ ਕਿ ਉਹ ਇੱਕ ਵਿਅਕਤੀ ਨੂੰ ਪਰਤਾਵੇ ਦੇ ਕਾਰਣ ਦੋਸ਼ੀ ਅਤੇ ਨਿਰਾਸ਼ ਮਹਿਸੂਸ ਨਾ ਕਰਾਵੇ, ਇੱਥੇ ਤਕ ਕਿ ਭ੍ਰਿਸ਼ਟ ਲਿੰਗਕ ਕਿਰਿਆਵਾਂ ਦੇ ਪਰਤਾਵੇ ਦੇ ਕਾਰਣ ਵੀ ਨਹੀਂ। ਗਲਤ ਇੱਛਾਵਾਂ ਹਰੇਕ ਦੇ ਲਈ ਇੱਕੋ ਜਿਹੀਆਂ ਨਹੀਂ ਹਨ, ਪਰ ਹਰੇਕ ਪਾਪੀ ਸੁਭਾਅ ਅਤੇ ਆਤਮਿਕ ਨੁਕਸਾਂ ਦੇ ਨਾਲ ਪੈਦਾ ਹੋਇਆ ਜਿਸ ਕਾਰਨ ਗਲਤ ਇੱਛਾਵਾਂ ਪੈਦਾ ਹੁੰਦੀਆਂ ਹਨ।

ਇੱਕ ਪਾਸਟਰ ਮਹਿਸੂਸ ਕਰ ਸਕਦਾ ਹੈ ਕਿ ਉਸ ਨੇ ਉਸ ਵਿਅਕਤੀ ਦੀ ਮਦਦ ਕਰਨ ਲਈ ਵਿਸ਼ੇਸ਼ ਸਿਖਲਾਈ ਪ੍ਰਾਪਤ ਨਹੀਂ ਕੀਤੀ ਹੈ ਜੋ ਗਲਤ ਇੱਛਾਵਾਂ ਦੇ ਵਿੱਚ ਫਸਿਆ ਹੋਇਆ ਹੈ, ਪਰ ਉਹ ਇਸ ਸਮੱਸਿਆ ਦੇ ਨਾਲ ਸੰਘਰਸ਼ ਕਰ ਰਹੇ ਵਿਅਕਤੀ ਦੀ ਨੂੰ ਓਵੇਂ ਹੀ ਸਲਾਹ ਦੇ ਸਕਦਾ ਹੈ ਅਤੇ ਉਸ ਦੀ ਮਦਦ ਕਰ ਸਕਦਾ ਹੈ ਜਿਵੇਂ ਉਹ ਕਿਸੇ ਹੋਰ ਪਾਪ ਦੇ ਨਾਲ ਸੰਘਰਸ਼ ਕਰ ਰਹੇ ਵਿਅਕਤੀ ਲਈ ਕਰਦਾ ਹੈ। (ਇਸ ਪਾਠ ਦੇ ਦੋ ਅਗਲੇ ਭਾਗ ਅੱਗੇ ਵਿਸ਼ੇਸ਼ ਸਲਾਹ ਪੇਸ਼ ਕਰਦੇ ਹਨ ਤਾਂ ਕਿ ਵਿਸ਼ਵਾਸੀਆਂ ਦੀ ਲਿੰਗਕ ਅਨੈਤਿਕਤਾ ਦੇ ਪਰਤਾਵੇ ਉੱਤੇ ਜਿੱਤ ਪਾਉਣ ਵਿੱਚ ਮਦਦ ਕੀਤੀ ਜਾ ਸਕੇ।)

► ਜਦੋਂ ਕਲੀਸਿਯਾ ਦੇ ਇੱਕ ਮੈਂਬਰ ਨੇ ਲਿੰਗਕ ਅਨੈਤਿਕਤਾ ਦਾ ਪਾਪ ਕੀਤਾ ਹੈ ਤਾਂ ਕਲੀਸਿਯਾ ਨੂੰ ਕਿਵੇਂ ਪ੍ਰਤੀਉੱਤਰ ਦੇਣਾ ਚਾਹੀਦਾ ਹੈ?

ਪਾਪੀ ਨੂੰ ਪਹਿਲੀ ਅਵਸਥਾ ਵਿੱਚ ਵਾਪਸ ਲਿਆਉਣਾ

ਗਲਾਤੀਆਂ 6:1 ਆਖਦੀ ਹੈ ਕਿ ਕਲੀਸਿਯਾ ਨੂੰ ਉਸ ਮੈਂਬਰ ਨੂੰ ਪਹਿਲੀ ਅਵਸਥਾ ਵਿੱਚ ਵਾਪਸ ਲਿਆਉਣ ਦੀ ਕੋਸ਼ਿਸ਼ ਕਰਨੀ ਚਾਹੀਦੀ ਹੈ ਜਿਸ ਨੇ ਪਾਪ ਕੀਤਾ ਹੈ। ਇਸ ਦਾ ਮਤਲਬ ਇਹ ਨਹੀਂ ਹੈ ਕਿ ਵਿਅਕਤੀ ਨੂੰ ਸੇਵਕਾਈ ਦੇ ਅਹੁਦੇ ਉੱਤੇ ਬਣੇ ਰਹਿਣਾ ਚਾਹੀਦਾ ਹੈ ਜਾਂ ਉਸ ਦੇ ਪਾਪ ਕਰਨ ਤੋਂ ਬਾਅਦ ਉਸ ਨੂੰ ਤੁਰੰਤ ਸੇਵਕਾਈ ਦੇ ਅਹੁਦੇ ਉੱਤੇ ਵਾਪਸ ਲਿਆਉਣਾ ਚਾਹੀਦਾ ਹੈ। ਪਹਿਲੀ ਅਵਸਥਾ ਵਿੱਚ ਵਾਪਸ ਲਿਆਉਣ ਦਾ ਮਤਲਬ ਹੈ ਕਿ ਉਸ ਨੂੰ ਸੰਗਤੀ ਅਤੇ ਕਲੀਸਿਯਾ ਦੀ ਦੇਖਭਾਲ ਵਿੱਚ ਮੁੜ ਸਵੀਕਾਰ ਕਰਨਾ ਚਾਹੀਦਾ ਹੈ। ਜੇ ਉਹ ਮੈਂਬਰ ਸੱਚਮੁੱਚ ਤੋਬਾ ਕਰਦਾ ਹੈ, ਤਾਂ ਉਹ ਪਰਮੇਸ਼ੁਰ ਦੁਆਰਾ ਅਤੇ ਕਲੀਸਿਯਾ ਦੁਆਰਾ ਮਾਫ਼ ਕੀਤਾ ਗਿਆ ਹੈ। ਕਲੀਸਿਯਾ ਨੂੰ ਉਸ ਦੀ ਜਿੱਤ ਨੂੰ ਬਣਾਈ ਰੱਖਣ ਅਤੇ ਆਤਮਿਕ ਤੌਰ ’ਤੇ ਮਜ਼ਬੂਤ ਬਣਨ ਵਿੱਚ ਮਦਦ ਕਰਨ ਲਈ ਉਸ ਨੂੰ ਆਤਮਿਕ ਜਵਾਬਦੇਹੀ ਪ੍ਰਦਾਨ ਕਰਨੀ ਚਾਹੀਦੀ ਹੈ। ਇੱਕ ਪਹਿਲੀ ਅਵਸਥਾ ਦੇ ਵਿੱਚ ਵਾਪਸ ਲਿਆਂਦਾ ਗਿਆ ਵਿਸ਼ਵਾਸੀ ਜਵਾਬਦੇਹੀ ਦੇ ਵਿੱਚ ਜੀਵਨ ਬਿਤਾਉਂਦਾ ਹੈ, ਉਹ ਹੌਲੀ-ਹੌਲੀ ਆਪਣੇ ਕਲੀਸਿਯਾ ਪਰਿਵਾਰ ਦਾ ਭਰੋਸਾ ਮੁੜ ਪ੍ਰਾਪਤ ਕਰ ਸਕਦਾ ਹੈ।

ਜੇ ਇੱਕ ਕੁਆਰੀ ਕੁੜੀ ਗਰਭਵਤੀ ਹੋ ਜਾਂਦੀ ਹੈ, ਤਾਂ ਕਲੀਸਿਯਾ ਨੂੰ ਉਸ ਨੂੰ ਆਤਮਿਕ ਤੌਰ ’ਤੇ ਪਹਿਲਾਂ ਵਾਲੀ ਅਵਸਥਾ ਵਿੱਚ ਵਾਪਸ ਲਿਆਉਣ ਦੀ ਕੋਸ਼ਿਸ਼ ਕੀਤੇ ਬਿਨਾਂ ਸੰਗਤੀ ਅਤੇ ਕਲੀਸਿਯਾ ਦੀ ਦੇਖਭਾਲ ਵਿੱਚੋਂ ਬਾਹਰ ਨਹੀਂ ਕੱਢਣਾ ਚਾਹੀਦਾ। ਜੇ ਉਹ ਤੋਬਾ ਕਰਦੀ ਹੈ ਅਤੇ ਆਤਮਿਕ ਜਵਾਬਦੇਹੀ ਦੇ ਲਈ ਅਧੀਨ ਹੁੰਦੀ ਹੈ, ਤਾਂ ਉਹ ਮਾਫ਼ ਕੀਤੀ ਗਈ ਹੈ। ਉਸ ਦਾ ਪਾਪ ਉਸ ਆਦਮੀ ਦੇ ਪਾਪ ਨਾਲੋਂ ਬੁਰਾ ਨਹੀਂ ਹੈ ਜੋ ਇਸ ਵਿੱਚ ਸ਼ਾਮਲ ਸੀ। ਕਈ ਵਾਰ ਕੁੜੀ ਦੇ ਨਾਲ ਜ਼ਿਆਦਾ ਬੁਰਾ ਵਿਹਾਰ ਕੀਤਾ ਜਾਂਦਾ ਹੈ ਕਿ ਕਿਉਂਕਿ ਉਸ ਦੇ ਪਾਪ ਦੇ ਨਤੀਜੇ ਬਹੁਤ ਪ੍ਰਤੱਖ ਹੁੰਦੇ ਹਨ।

ਕਈ ਥਾਵਾਂ ’ਤੇ, ਕਲੀਸਿਯਾ ਉਨ੍ਹਾਂ ਬੱਚਿਆਂ ਦੇ ਨਾਲ ਵੱਖਰਾ ਵਿਹਾਰ ਕਰਦੀ ਹੈ ਜੋ ਇੱਕ ਵਿਆਹੁਤਾ ਰਿਸ਼ਤੇ ਤੋਂ ਬਿਨਾਂ ਪੈਦਾ ਹੋਏ ਹੁੰਦੇ ਹਨ, ਪਰ ਇਹ ਗਲਤ ਹੈ ਕਿਉਂਕਿ ਇਹ ਬੱਚੇ ਦੀ ਗਲਤੀ ਨਹੀਂ ਹੈ। ਕਲੀਸਿਯਾ ਲਈ ਬੱਚੇ ਨੂੰ ਪਿਆਰ ਕਰਨ ਅਤੇ ਸਵੀਕਾਰ ਕਰਨ ਦਾ ਅਰਥ ਇਹ ਨਹੀਂ ਹੈ ਕਿ ਉਹ ਕਲੀਸਿਯਾ ਪਾਪ ਨੂੰ ਅਣਵੇਖਿਆ ਕਰੇ।

ਕਮਜ਼ੋਰ ਦੀ ਰੱਖਿਆ ਕਰਨਾ

ਕਈ ਸਮਾਜਾਂ ਵਿੱਚ, ਜਿਹੜੇ ਮਾਪੇ ਆਪਣੀ ਕੁੜੀ ਦੇ ਅਣਚਾਹੇ ਗਰਭਧਾਰਣ ਦੇ ਕਾਰਨ ਸ਼ਰਮ ਮਹਿਸੂਸ ਕਰਦੇ ਹਨ, ਉਹ ਪਰਿਵਾਰ ਦੀ ਸ਼ਾਖ ਨੂੰ ਬਚਾਉਣ ਲਈ ਅਣਜੰਮੇ ਬੱਚੇ ਨੂੰ ਮਾਰਨ ਲਈ ਪਰਤਾਏ ਜਾਂਦੇ ਹਨ। ਪਰ ਕਤਲ ਕਰਨ ਦੇ ਲਈ ਕਦੇ ਵੀ ਕੋਈ ਚੰਗਾ ਕਾਰਣ ਨਹੀਂ ਹੁੰਦਾ ਹੈ (ਕੂਚ 20:13)। ਹਰੇਕ ਅਣਜੰਮਿਆ ਬੱਚਾ ਪਰਮੇਸ਼ੁਰ ਦੇ ਸਰੂਪ ਉੱਤੇ ਬਣਾਇਆ ਗਿਆ ਹੈ (ਉਤਪਤ 9:6, ਜ਼ਬੂਰ 139:13-14)। ਕੁੜੀ ਦੇ ਬੱਚੇ ਦੀ ਰੱਖਿਆ ਕੀਤੀ ਜਾਣੀ ਚਾਹੀਦੀ ਹੈ, ਉਸ ਨੂੰ ਪਿਆਰ ਕਰਨਾ ਚਾਹੀਦਾ ਹੈ, ਅਤੇ ਉਸ ਦਾ ਪਾਲਣ-ਪੋਸ਼ਣ ਕਰਨਾ ਚਾਹੀਦਾ ਹੈ।

ਗਰੀਬੀ ਦੇ ਲਈ ਸਮਾਂਤਰ ਹੱਲ ਪ੍ਰਦਾਨ ਕਰਨਾ

ਕਲੀਸਿਯਾ ਵਿਸ਼ਵਾਸ ਦਾ ਇੱਕ ਪਰਿਵਾਰ ਹੈ। ਐਨਾ ਹੀ ਕਾਫ਼ੀ ਨਹੀ ਹੈ ਕਿ ਕਲੀਸਿਯਾ ਸਿਰਫ ਲੋਕਾਂ ਨੂੰ ਪਾਪਾਂ ਲਈ ਹੀ ਦੋਸ਼ੀ ਠਹਿਰਾਵੇ। ਕਲੀਸਿਯਾ ਨੂੰ ਆਪਣੇ ਮੈਂਬਰਾਂ ਦੀ ਦੇਖਭਾਲ ਵੀ ਕਰਨੀ ਚਾਹੀਦੀ ਹੈ। ਉਦਾਹਰਣ ਲਈ, ਇੱਕ ਵਿਅਕਤੀ ਜਿਹੜਾ ਆਪਣੀਆਂ ਵਿੱਤੀ ਜ਼ਰੂਰਤਾਂ ਨੂੰ ਇੱਕ ਪਾਪਮਈ ਕੰਮ ਕਰਨ ਦੇ ਦੁਆਰਾ ਪੂਰਾ ਕਰਦਾ ਹੈ, ਉਸ ਨੂੰ ਸਮਾਂਤਰ ਵਿੱਤੀ ਸਹਿਯੋਗ ਦੀ ਲੋੜ ਹੋ ਸਕਦੀ ਹੈ।

ਉਦਾਹਰਣ ਦੇ ਲਈ, ਬਹੁਤ ਸਾਰੀਆਂ ਕੁੜੀਆਂ ਜੋ ਵੱਡੀ ਕਲੀਸਿਯਾ ਵਿੱਚ ਜਾਂਦੀਆਂ ਸਨ ਅਤੇ ਅਰਾਧਨਾ ਟੀਮ ਵਿੱਚ ਗਾਉਂਦੀਆਂ ਸਨ। ਉਨ੍ਹਾਂ ਦੇ ਪਰਿਵਾਰ ਗਰੀਬ ਸਨ। ਉਹ ਕੁੜੀਆਂ ਆਪਣੇ ਪਰਿਵਾਰਾਂ ਦੀ ਮਦਦ ਕਰਨ ਵਾਸਤੇ ਪੈਸਾ ਕਮਾਉਣ ਲਈ ਪੁਰਸ਼ਾਂ ਦੇ ਨਾਲ ਅਨੈਤਿਕ ਸੰਬੰਧਾਂ ਵਿੱਚ ਸਨ। ਅਜਿਹੀ ਸਥਿੱਤੀ ਵਿੱਚ ਕਲੀਸਿਯਾ ਨੂੰ ਕੀ ਕਰਨਾ ਚਾਹੀਦਾ ਹੈ?

► ਤੁਹਾਡੀ ਕਲੀਸਿਯਾ ਲੋਕਾਂ ਦੀ ਪਾਪ ਭਰੀ ਜੀਵਨ ਸ਼ੈਲੀ ਨੂੰ ਛੱਡਣ ਵਿੱਚ ਮਦਦ ਕਰਨ ਲਈ ਕੀ ਕਰਦੀ ਹੈ?

ਅਸੀਂ ਇਸ ਪਾਠ ਵਿੱਚ ਬਹੁਤ ਸਾਰੇ ਮੁਸ਼ਕਲ ਵਿਸ਼ਿਆਂ ਬਾਰੇ ਗੱਲ ਕੀਤੀ ਹੈ। ਇਹ ਸੰਭਾਵਨਾਂ ਹੈ ਕਿ ਪਾਠ ਨੂੰ ਪੜ੍ਹਨ ਵਾਲੇ ਬਹੁਤ ਸਾਰੇ ਲੋਕਾਂ ਨੇ ਉਨ੍ਹਾਂ ਮਸਲਿਆਂ ਦੇ ਨਾਲ ਸੰਘਰਸ਼ ਕੀਤਾ ਹੈ। ਕਈ ਪਾਠਕ ਕਲੀਸਿਯਾ ਦੇ ਆਗੂ ਹਨ ਜਿਨ੍ਹਾਂ ਨੂੰ ਇਹ ਜਾਣਨ ਦੀ ਲੋੜ ਹੈ ਕਿ ਪਰਤਾਵਿਆਂ ਦਾ ਸਾਹਮਣਾ ਕਰ ਰਹੇ ਵਿਸ਼ਵਾਸੀਆਂ ਦੀ ਮਦਦ ਕਿਵੇਂ ਕਰਨੀ ਹੈ।

ਭਾਵੇਂ ਪਰਤਾਵਾ ਕਿਸੇ ਵੀ ਪ੍ਰਕਾਰ ਦਾ ਹੋਵੇ, ਪਰ ਕੁਝ ਵਿਹਾਰ ਅਤੇ ਸੋਚ ਦੇ ਨਮੂਨੇ ਹਨ ਜੋ ਇੱਕ ਵਿਸ਼ਵਾਸੀ ਦੀ ਜਿੱਤ ਪਾਉਣ ਵਿੱਚ ਮਦਦ ਕਰ ਸਕਦੇ ਹਨ।

ਮਸੀਹ ਦਾ ਅਨੁਸਰਣ ਕਰਨ ਵਾਲੇ ਇੱਕ ਵਿਅਕਤੀ ਨੂੰ ਇਸ ਤੋਂ ਮਦਦ ਮਿਲੇਗੀ:

1. ਮਸੀਹ ਨਾਲ ਤੁਹਾਡੇ ਰਿਸ਼ਤੇ ਪ੍ਰਤੀ ਪੂਰੀ ਤਰ੍ਹਾਂ ਸਮਰਪਿਤ ਹੋਣ ਤੋਂ (ਮੱਤੀ 16:24-27)। ਬਾਕੀ ਸਾਰੇ ਪਰਤਾਵੇ ਵਾਂਗ ਹੀ, ਲਿੰਗਕ ਅਨੈਤਿਕਤਾ ਦਾ ਪਰਤਾਵਾ ਵੀ ਤੁਹਾਡੇ ਆਤਮਾ ਉੱਤੇ ਸ਼ਤਾਨ ਦਾ ਹਮਲਾ ਹੈ (1 ਪਤਰਸ 2:11)। ਜੋ ਕੇਵਲ ਚੁਰਾਉਣਾ, ਮਾਰਨਾ, ਅਤੇ ਨਾਸ ਕਰਨਾ ਚਾਹੁੰਦਾ ਹੈ (ਯੂਹੰਨਾ 10:10)। ਤੁਹਾਨੂੰ ਆਪਣੇ ਜੀਵਨ ਨੂੰ ਬਚਾਉਣ ਲਈ ਇਸ ਤੋਂ ਭੱਜਣਾ ਚਾਹੀਦਾ ਹੈ (2 ਤਿਮੋਥਿਉਸ 2:22)।

2. ਇਹ ਭਰੋਸਾ ਕਰਨ ਤੋਂ ਕਿ ਯਿਸੂ ਪਰਵਾਹ ਕਰਦਾ ਹੈ (ਜ਼ਬੂਰ 139:1-3, 1 ਪਤਰਸ 5:6-10)। ਉਹ ਤੁਹਾਡੇ ਵਿਸ਼ਵਾਸ, ਤੁਹਾਡੀਆਂ ਸਰੀਰਕ ਲੋੜਾਂ, ਅਤੇ ਤੁਹਡੀ ਸ਼ੁੱਧਤਾ ਬਾਰੇ ਪਰਵਾਹ ਕਰਦਾ ਹੈ। ਉਸ ਨੇ ਵੀ ਆਪਣੀ ਮਨੁੱਖਤਾ ਵਿੱਚ ਉਨ੍ਹਾਂ ਸਰੀਰਕ ਅਤੇ ਮਾਨਸਿਕ ਪਰਤਾਵਿਆਂ ਨੂੰ ਜੇਤੂ ਢੰਗ ਨਾਲ ਝੱਲਿਆ ਹੈ ਜਿਨ੍ਹਾਂ ਦਾ ਅਸੀਂ ਸਾਹਮਣਾ ਕਰਦੇ ਹਨ, ਅਤੇ ਉਸ ਕੋਲ ਉਹ ਕਿਰਪਾ ਹੈ ਜਿਸ ਦੀ ਸਾਨੂੰ ਜਿੱਤ ਪਾਉਣ ਲਈ ਲੋੜ ਹੈ (ਇਬਰਾਨੀਆਂ 4:14-16)।

3. ਸ਼ਤਾਨ ਦੇ ਝੂਠਾਂ ਉੱਤੇ ਵਿਸ਼ਵਾਸ ਨਾ ਕਰਨ ਤੋਂ (ਯੂਹੰਨਾ 8:44)। ਸ਼ਤਾਨ ਤੁਹਾਨੂੰ ਆਖ ਸਕਦਾ ਹੈ, “ਯਿਸੂ ਨੂੰ ਕੋਈ ਪਰਵਾਹ ਨਹੀਂ ਹੈ, ਜਾਂ ਉਹ ਉਸ ਲਿੰਗਕ ਇੱਛਾ ਨੂੰ ਹਟਾ ਦੇਵੇਗਾ ਜੋ ਬਹੁਤ ਨਿਰਾਸ਼ਾਜਨਕ ਹੈ।” 1 ਪਤਰਸ 5:7-8 ਵਿੱਚ ਸਾਨੂੰ ਦੱਸਿਆ ਗਿਆ ਹੈ ਕਿ ਯਿਸੂ ਪਰਵਾਹ ਕਰਦਾ ਹੈ, ਅਤੇ ਸ਼ਤਾਨ ਹੈ ਜੋ ਸਾਨੂੰ ਨਾਸ ਕਰਨਾ ਚਾਹੁੰਦਾ ਹੈ । ਸ਼ਤਾਨ ਤੁਹਾਡੀਆਂ ਲਿੰਗਕ ਇੱਛਾਵਾਂ ਦੇ ਕਾਰਣ ਤੁਹਾਡੇ ਉੱਤੇ ਪਾਪੀ ਹੋਣ ਦਾ ਝੂਠਾ ਦੋਸ਼ ਲਗਾ ਸਕਦਾ ਹੈ (ਪਰਕਾਸ਼ ਦੀ ਪੋਥੀ 12:10)।

4. ਯਿਸੂ ਉੱਤੇ ਧਿਆਨ ਕੇਂਦਰਿਤ ਕਰਨ ਅਤੇ ਜੋ ਉਹ ਹੈ ਉਸ ਲਈ ਉਸ ਦੀ ਪ੍ਰਸ਼ੰਸ਼ਾ ਕਰਨ ਤੋਂ (ਜ਼ਬੂਰ 105:3-4)। ਸ਼ਤਾਨ ਇਸ ਪਰਤਾਵੇ ਦੇ ਦੁਆਰਾ ਤੁਹਾਡੇ ਵਿਸ਼ਵਾਸ ਅਤੇ ਪਰਮੇਸ਼ੁਰ ਨਾਲ ਤੁਹਾਡੇ ਰਿਸ਼ਤੇ ਨੂੰ ਨਾਸ ਕਰਨਾ ਚਾਹੇਗਾ (ਯੂਹੰਨਾ 10:10)। ਪਰ ਇਸ ਪਰਤਾਵੇ ਲਈ ਯਿਸੂ ਦਾ ਉਦੇਸ਼ ਇਹ ਹੈ ਕਿ ਤੁਹਾਡਾ ਵਿਸ਼ਵਾਸ ਮਜ਼ਬੂਤ ਹੋਵੇ, ਅਤੇ ਇਹ ਕਿ ਤੁਸੀਂ ਬਿਹਤਰ ਢੰਗ ਨਾਲ ਉਸ ਦੀ ਮਹਿਮਾ ਕਰ ਸਕੋ (1 ਪਤਰਸ 1:5-9)। ਜਦੋਂ ਤੁਸੀਂ ਯਿਸੂ ਦੀ ਅਰਾਧਨਾ ਕਰਨ ਉੱਤੇ ਧਿਆਨ ਕੇਂਦਰਿਤ ਕਰਦੇ ਹੋ, ਉਹ ਤੁਹਾਡੀ ਮਦਦ ਕਰਨ ਲਈ ਮੌਜੂਦ ਹੋਵੇਗਾ (ਜ਼ਬੂਰ 46:1)।

5. ਪਰਮੇਸ਼ੁਰ ਦੇ ਵਚਨ ਉੱਤੇ ਮਨਨ ਕਰਨ ਤੋਂ (ਜ਼ਬੂਰ 119:9)। ਪਰਮੇਸ਼ੁਰ ਦੇ ਵਚਨ ਨੂੰ ਪੜ੍ਹਨਾ, ਸੁਣਨਾ, ਅਤੇ ਉਸ ਉੱਤੇ ਮਨਨ ਕਰਨਾ, ਪਰਤਾਵੇ ਵਿੱਚ ਜਿੱਤ ਪਾ ਕੇ ਖੜ੍ਹੇ ਹੋਣ ਵਿੱਚ ਤੁਹਾਡੀ ਮਦਦ ਕਰੇਗਾ। ਜਦੋਂ ਯਿਸੂ ਨੂੰ ਪਰਤਾਇਆ ਗਿਆ ਸੀ, ਉਸ ਨੇ ਜਿੱਤ ਪਾਉਣ ਲਈ ਵਚਨ ਦੀ ਵਰਤੋਂ ਕੀਤੀ (ਮੱਤੀ 4)। ਸਾਨੂੰ ਵੀ ਇਹੋ ਹੀ ਕਰਨਾ ਚਾਹੀਦਾ ਹੈ।

6. ਆਪਣੀਆਂ ਲਿੰਗਕ ਇੱਛਾਵਾਂ ਲਈ ਯਿਸੂ ਦਾ ਧੰਨਵਾਦ ਕਰਨ ਤੋਂ, ਤਦ ਵੀ ਜਦੋਂ ਤੁਸੀਂ ਪਰਤਾਵੇ ਉੱਤੇ ਜਿੱਤ ਪਾਉਣ ਲਈ ਪ੍ਰਾਰਥਨਾ ਕਰ ਰਹੇ ਹੋ (2 ਕੁਰਿੰਥੀਆਂ 12:7-9)। ਤੁਸੀਂ ਆਪਣੀਆਂ ਸੁਭਾਵਕ ਇੱਛਾਵਾਂ ਦੇ ਲਈ ਧੰਨਵਾਦੀ ਹੋ ਸਕਦੇ ਹੋ, ਕਿਉਂਕਿ ਉਹ ਤੁਹਾਡੀ ਮਨੁੱਖਤਾ ਦੀ ਪਰਮੇਸ਼ੁਰ ਦੀ ਬਣਤਰ ਦਾ ਹਿੱਸਾ ਹਨ ਅਤੇ ਉਹ ਤੁਹਾਨੂੰ ਯਿਸੂ ਉੱਤੇ ਨਿਰਭਰ ਰਹਿਣ ਅਤੇ ਉਸ ਦੀ ਸ਼ਕਤੀ ਨੂੰ ਭਾਲਣ ਲਈ ਮਜ਼ਬੂਰ ਕਰਦੀਆਂ ਹਨ। ਤੁਹਾਡੀ ਕਮਜ਼ੋਰੀ ਉਸ ਨਾਲ ਚੱਲਣ ਵਿੱਚ ਪਰਿਪੱਕ ਹੋਣ ਦੇ ਲਈ ਇੱਕ ਮੌਕਾ ਦਿੰਦੀ ਹੈ।

7. ਘੱਟੋ-ਘੱਟ ਇੱਕ ਪਰਿਪੱਕ ਅਤੇ ਧਰਮੀ ਵਿਅਕਤੀ ਦੇ ਪ੍ਰਤੀ ਜਵਾਬਦੇਹ ਰਹਿਣ ਤੋਂ (ਗਲਾਤੀਆਂ 6:2)। ਕਿਸੇ ਅਜਿਹੇ ਵਿਅਕਤੀ (ਤੁਹਾਡੇ ਲਿੰਗ ਦੇ) ਦੇ ਨਾਲ ਖੁੱਲ੍ਹੇ ਅਤੇ ਇਮਾਨਦਾਰ ਹੋਣਾ ਮਦਦਗਾਰ ਹੋਵੇਗਾ, ਜੋ ਵਿਸ਼ਵਾਸ ਦੀ ਯਾਤਰਾ ਵਿੱਚ ਤੁਹਾਡੇ ਨਾਲੋਂ ਬਹੁਤ ਅੱਗੇ ਹੈ। ਉਹ ਤੁਹਾਡੇ ਲਈ ਪ੍ਰਾਰਥਨਾ ਕਰ ਸਕਣਗੇ ਅਤੇ ਤੁਹਾਨੂੰ ਸਲਾਹ ਦੇ ਸਕਣਗੇ। ਆਪਣੇ ਸੰਘਰਸ਼ਾਂ ਦੇ ਬਾਰੇ ਉਨ੍ਹਾਂ ਨਾਲ ਗੱਲ ਕਰਨਾ, ਸ਼ੁੱਧਤਾ ਨੂੰ ਬਣਾਈ ਰੱਖਣ ਅਤੇ ਆਪਣੇ ਵਿਸ਼ਵਾਸ ਵਿੱਚ ਉਤਸ਼ਾਹਿਤ ਰਹਿਣ ਵਿੱਚ ਤੁਹਾਡੀ ਮਦਦ ਕਰੇਗਾ।

8. ਦੂਸਰਿਆਂ ਦੀ ਸੇਵਾ ਕਰਨਾ ਅਤੇ ਉਨ੍ਹਾਂ ਦੀਆਂ ਲੋੜਾਂ ਉੱਤੇ ਧਿਆਨ ਦੇਣ ਤੋਂ (ਫਿਲਿੱਪੀਆਂ 2:3-5)। ਹੋਰ ਲੋਕਾਂ ਦੀ ਸੇਵਾ ਕਰਕੇ ਆਪਣੀਆਂ ਖੁਦ ਦੀਆਂ ਲੋੜਾਂ ਦੀ ਵਧੇਰੇ ਚਿੰਤਾ ਕਰਨ ਅਤੇ ਦੂਸਰੇ ਲੋਕਾਂ ਤੋਂ ਸੇਵਾ ਕਰਾਉਣ ਦੀਆਂ ਆਪਣੀਆਂ ਇੱਛਾਵਾਂ ਦੇ ਵਿਰੁੱਧ ਲੜੋ।

9. ਪਰਮੇਸ਼ੁਰ ਦੇ ਸਮੇਂ ’ਤੇ ਸਹੀ ਵਿਅਕਤੀ ਨਾਲ ਵਿਆਹ ਕਰਨ ਤੋਂ (ਕਹਾਉਤਾਂ 5:15, 18-19)। (ਅਗਲੇ ਪਾਠ ਇਹ ਚਰਚਾ ਕਰਨਗੇ ਕਿ ਵਿਆਹ ਲਈ ਬੁੱਧੀਮਾਨੀ ਦੇ ਨਾਲ ਚੋਣ ਕਿਵੇਂ ਕਰਨੀ ਹੈ।)

► ਇਨ੍ਹਾਂ ਵਿੱਚੋਂ ਕਿਹੜੇ ਵਿਚਾਰ ਤੁਹਾਡੇ ਲਈ ਨਵੇਂ ਹਨ? ਕਿਹੜੇ ਤੁਹਾਡੇ ਖੁਦ ਦੇ ਜੀਵਨ ਵਿੱਚ ਮਦਦਗਾਰ ਸਾਬਤ ਹੋਏ ਹਨ?

► ਹੋਰ ਕਿਹੜੇ ਵਿਹਾਰ ਜਾਂ ਸੋਚ ਦੇ ਨਮੂਨੇ ਤੁਹਾਡੇ ਲਈ ਮਦਦਗਾਰ ਸਾਬਤ ਹੋਏ ਹਨ?

ਜਵਾਨ ਲੋਕ ਵਿਆਹ ਤੋਂ ਪਹਿਲਾਂ ਬਹੁਤ ਪਰਤਾਵਿਆਂ ਦਾ ਸਾਹਮਣਾ ਕਰਦੇ ਹਨ। ਉਨ੍ਹਾਂ ਲਈ ਇਹ ਯਾਦ ਰੱਖਣਾ ਮਹੱਤਵਪੂਰਣ ਹੈ ਕਿ ਉਨ੍ਹਾਂ ਨੂੰ ਇੱਕ ਜੀਵਨ ਸਾਥੀ ਦੀ ਲੋੜ ਹੈ ਜੋ ਵਫ਼ਾਦਾਰ ਰਹਿ ਸਕਦਾ ਹੈ।[1] ਉਨ੍ਹਾਂ ਨੂੰ ਕਿਸੇ ਅਜਿਹੇ ਵਿਅਕਤੀ ਦੇ ਨਾਲ ਇੱਕ ਰਿਸ਼ਤਾ ਬਣਾਉਣ ਬਾਰੇ ਨਹੀਂ ਸੋਚਣਾ ਚਾਹੀਦਾ ਜੋ ਵਿਆਹ ਕੀਤੇ ਬਿਨਾਂ ਥੋੜ੍ਹੇ ਸਮੇਂ ਦਾ ਅਨੰਦ ਪ੍ਰਾਪਤ ਕਰਨਾ ਚਾਹੁੰਦਾ ਹੈ। ਉਨ੍ਹਾਂ ਨੂੰ ਕਿਸੇ ਅਜਿਹੇ ਵਿਅਕਤੀ ਦੇ ਨਾਲ ਇੱਕ ਰਿਸ਼ਤਾ ਬਣਾਉਣ ਬਾਰੇ ਨਹੀਂ ਸੋਚਣਾ ਚਾਹੀਦਾ ਜੋ ਇੱਕ ਸਮਰਪਿਤ ਵਿਸ਼ਵਾਸੀ ਨਹੀਂ ਹੈ (1 ਕੁਰਿੰਥੀਆਂ 7:39)। ਉਨ੍ਹਾਂ ਨੂੰ ਕੇਵਲ ਕਿਸੇ ਅਜਿਹੇ ਵਿਅਕਤੀ ਬਾਰੇ ਹੀ ਵਿਚਾਰ ਕਰਨਾ ਚਾਹੀਦਾ ਹੈ ਜੋ ਵਫ਼ਾਦਾਰ ਵਿਆਹੁਤਾ ਸਾਥੀ ਹੋਵੇਗਾ ਅਤੇ ਇੱਕ ਚੰਗੀ ਹੋਵੇਗੀ/ਇੱਕ ਚੰਗਾ ਪਿਓ ਹੋਵੇਗਾ।

ਇੱਕ ਜਵਾਨ ਵਿਅਕਤੀ ਜੋ ਇੱਕ ਚੰਗਾ ਵਿਆਹੁਤਾ ਰਿਸ਼ਤਾ ਬਣਾਉਣਾ ਚਾਹੁੰਦਾ ਹੈ ਉਸ ਨੂੰ ਮਸੀਹ ਦਾ ਵਫ਼ਾਦਾਰ, ਸਮਰਪਿਤ ਚੇਲਾ ਬਣਨਾ ਚਾਹੀਦਾ ਹੈ ਤਾਂ ਕਿ ਇੱਕ ਸਹੀ ਕਿਸਮ ਦਾ ਵਿਅਕਤੀ ਉਸ ਵੱਲ ਆਕਰਸ਼ਿਤ ਹੋ ਸਕੇ (ਕਹਾਉਤਾਂ 3:4-8)। ਇੱਕ ਵਿਅਕਤੀ ਉਚਿੱਤ ਵਿਹਾਰ ਅਤੇ ਸਾਡੇ ਕੱਪੜੇ ਪਹਿਨਣ ਦੁਆਰਾ ਚੰਗੇ ਚਰਿੱਤਰ ਨੂੰ ਵਿਖਾਉਂਦਾ ਹੈ (1 ਤਿਮੋਥਿਉਸ 2:9-10)। ਜਿਹੜੇ ਲੋਕ ਵਿਪਰੀਤ ਲਿੰਗ ਦੇ ਲੋਕਾਂ ਨਾਲ ਲਾਪਰਵਾਹੀ ਵਾਲਾ ਵਿਹਾਰ ਕਰਦੇ ਹਨ, ਉਹ ਵਿਖਾਉਂਦੇ ਹਨ ਕਿ ਉਹ ਗਲਤ ਇੱਛਾਵਾਂ ਦੇ ਅਧਾਰ ’ਤੇ ਇੱਕ ਰਿਸ਼ਤਾ ਬਣਾਉਣਾ ਚਾਹੁੰਦੇ ਹਨ (1 ਥੱਸਲੁਨੀਕੀਆਂ 4:1-7)। ਇੱਕ ਵਿਅਕਤੀ ਜਿਹੜਾ ਗਲਤ ਇੱਛਾਵਾਂ ਨੂੰ ਪੈਦਾ ਕਰਨ ਵਾਲੇ ਕੱਪੜੇ ਪਹਿਨਦਾ ਹੈ ਉਹ ਉਸ ਵਿਅਕਤੀ ਨੂੰ ਆਕਰਸ਼ਿਤ ਕਰਦਾ ਹੈ ਜੋ ਬਿਨਾਂ ਸਮਰਪਣ ਦੇ ਅਨੰਦ ਲੈਣਾ ਚਾਹੁੰਦਾ ਹੈ (ਕਹਾਉਤਾਂ 7)।

ਪਰਮੇਸ਼ੁਰ ਨੇ ਵਿਹਾਰ, ਕੱਪੜਿਆਂ, ਅਤੇ ਰਿਸ਼ਤਿਆਂ ਸੰਬੰਧੀ ਫੈਸਲਿਆਂ ਵਿੱਚ ਅਗਵਾਈ ਕਰਨ ਲਈ ਮਾਪੇ, ਪਾਸਟਰ, ਅਤੇ ਹੋਰ ਮਸੀਹੀ ਆਗੂ ਦਿੱਤੇ ਹਨ। ਜਦੋਂ ਜਵਾਨ ਲੋਕ ਪਰਮੇਸ਼ੁਰ ਪ੍ਰਤੀ ਆਗਿਆਕਾਰੀ ਦੇ ਵਿੱਚ ਇਨ੍ਹਾਂ ਆਗੂਆਂ ਦੇ ਅਧੀਨ ਹੁੰਦੇ ਹਨ, ਉਹ ਪਰਮੇਸ਼ੁਰ ਦੀ ਸਭ ਤੋਂ ਵੱਡੀ ਅਸੀਸ ਪ੍ਰਾਪਤ ਕਰਨਗੇ ਅਤੇ ਉਹ ਜ਼ਿਆਦਾ ਨੁਕਸਾਨ ਅਤੇ ਪਰਤਾਵੇ ਤੋਂ ਬਚਾਏ ਜਾਣਗੇ।

► ਵਿਦਿਆਰਥੀਆਂ ਨੂੰ ਸਮੂਹ ਲਈ 1 ਪਤਰਸ 5:5 ਅਤੇ ਇਬਰਾਨੀਆਂ 13:17 ਨੂੰ ਪੜ੍ਹਨਾ ਚਾਹੀਦਾ ਹੈ।

ਬੱਚਿਆਂ ਅਤੇ ਜਵਾਨ ਲੋਕਾਂ ਦੀ ਇਹ ਜ਼ਿੰਮੇਵਾਰੀ ਹੈ ਕਿ ਉਹ ਆਪਣੇ ਮਾਪਿਆਂ ਅਤੇ ਆਤਮਿਕ ਅਧਿਕਾਰੀਆਂ ਦੀ ਬੁੱਧੀ ਅਤੇ ਅਗਵਾਈ ਦੇ ਅਧੀਨ ਰਹਿਣ। ਇਹ ਇਨ੍ਹਾਂ ਆਗੂਆਂ ਦੀ ਜ਼ਿੰਮੇਵਾਰੀ ਹੈ ਕਿ ਉਹ ਜਵਾਨ ਲੋਕਾਂ ਦੀ ਪਰਤਾਵੇ ਉੱਤੇ ਜਿੱਤ ਪਾਉਣ ਵਾਲਾ ਜੀਵਨ ਜੀਣ ਵਿੱਚ ਮਦਦ ਕਰਨ।

► ਵਿਦਿਆਰਥੀਆਂ ਨੂੰ ਸਮੂਹ ਲਈ ਰੋਮੀਆਂ 13:14 ਅਤੇ 1 ਕੁਰਿੰਥੀਆਂ 10:13 ਨੂੰ ਪੜ੍ਹਨਾ ਚਾਹੀਦਾ ਹੈ।

ਪਰਮੇਸ਼ੁਰ ਵਿਸ਼ਵਾਸੀਆਂ ਨੂੰ ਪਰਤਾਵੇ ਦੇ ਅਜਿਹੇ ਹਾਲਾਤਾਂ ਵਿੱਚ ਨਹੀਂ ਜਾਣ ਦਿੰਦਾ ਜੋ ਉਸ ਤੋਂ ਪਰੇ ਹਨ ਜਿਨ੍ਹਾਂ ਦਾ ਵਿਰੋਧ ਕਰਨ ਅਤੇ ਜਿਨ੍ਹਾਂ ਵਿੱਚ ਨਿੱਕਲਣ ਦੇ ਉਹ ਯੋਗ ਹਨ, ਜੇ ਉਹ ਨਿੱਕਲਣਾ ਚਾਹੁੰਦੇ ਹੋਣ ਤਾਂ। ਜਵਾਨ ਲੋਕ ਪਰਤਾਵੇ ਤੋਂ ਭੱਜਣ ਲਈ ਜ਼ਿੰਮੇਵਾਰ ਹਨ (2 ਤਿਮੋਥਿਉਸ 2:22)। ਹਾਲਾਂਕਿ, ਜਿੰਨਾ ਸੰਭਵ ਹੋ ਸਕੇ ਮਾਪਿਆਂ ਨੂੰ ਆਪਣੇ ਜਵਾਨ ਬੱਚਿਆਂ ਨੂੰ ਬੇਲੋੜੇ ਪਰਤਾਵੇ ਦਾ ਸਾਹਮਣਾ ਕਰਨ ਤੋਂ ਰੋਕਣਾ ਚਾਹੀਦਾ ਹੈ। ਅਜਿਹਾ ਕਰਨ ਦੇ ਮਾਪਿਆਂ ਲਈ ਘੱਟੋ-ਘੱਟ ਤਿਨ ਢੰਗ ਦੱਸੇ ਗਏ ਹਨ:

1. ਇਸ ਬਾਰੇ ਸਪਸ਼ਟ ਨਿਰਦੇਸ਼ ਦੇਣ ਦੁਆਰਾ ਕਿ ਬੱਚਿਆਂ ਨੂੰ ਕੀ ਕਰਨਾ ਅਤੇ ਕੀ ਨਹੀਂ ਕਰਨਾ ਚਾਹੀਦਾ, ਉਨ੍ਹਾਂ ਨੂੰ ਕਿਸ ਨਾਲ ਹੋਣਾ ਚਾਹੀਦਾ ਹੈ, ਅਤੇ ਉਨ੍ਹਾਂ ਨੂੰ ਕਿੱਥੇ ਜਾਣਾ ਚਾਹੀਦਾ ਹੈ (ਅਫ਼ਸੀਆਂ 6:1-4)। ਮਾਪਿਆਂ ਨੂੰ ਬੱਚਿਆਂ ਨੂੰ ਅਜਿਹੇ ਹਾਲਾਤਾਂ ਵਿੱਚ ਜਾਣ ਨਹੀਂ ਦੇਣਾ ਚਾਹੀਦਾ ਜਿੱਥੇ ਉਨ੍ਹਾਂ ਨੂੰ ਪਰਤਾਵੇ ਤੋਂ ਬਚਾਉਣ ਲਈ ਪਰਿਪੱਕਤਾ ਕਾਫ਼ੀ ਨਹੀਂ ਹੋਵੇਗੀ। ਉਦਾਹਰਣ ਦੇ ਲਈ, ਜੇ ਇੱਕ ਜਵਾਨ ਆਦਮੀ ਅਤੇ ਇੱਕ ਜਵਾਨ ਔਰਤ ਇੱਕ ਨਿੱਜੀ ਸਥਾਨ ’ਤੇ ਇਕੱਠੇ ਹਨ, ਤਾਂ ਸੰਭਾਵਨਾ ਹੈ ਕਿ ਉਹ ਗਲਤ ਵਿਹਾਰ ਦੇ ਲਈ ਪਰਤਾਏ ਜਾਣਗੇ।

2. ਆਪਣੇ ਜਵਾਨ ਬੱਚਿਆਂ ਨੂੰ ਪਰਤਾਵੇ ਦੇ ਖੇਤਰਾਂ ਵਿੱਚ ਜਵਾਬਦੇਹ ਠਹਿਰਾਉਣ ਦੁਆਰਾ। ਮਾਂ ਜਾਂ ਪਿਓ ਨੂੰ ਆਪਣੇ ਜਵਾਨ ਬੱਚਿਆਂ ਦੇ ਨਾਲ ਪ੍ਰਾਰਥਨਾ ਕਰਨੀ ਚਾਹੀਦੀ ਹੈ ਅਤੇ ਉਨ੍ਹਾਂ ਦੇ ਜੀਵਨ ਬਾਰੇ ਸਵਾਲ ਪੁੱਛਣੇ ਚਾਹੀਦੇ ਹਨ। ਜਵਾਬਦੇਹੀ ਦਾ ਪ੍ਰਭਾਵਸ਼ਾਲੀ ਹੋਣਾ, ਬੱਚੇ ਦੇ ਮਾਂ ਜਾਂ ਪਿਓ ਦੇ ਨਾਲ ਰਿਸ਼ਤੇ ਦੀ ਮਜ਼ਬੂਤੀ ਉੱਤੇ ਨਿਰਭਰ ਹੋਵੇਗਾ। ਜੇ ਬੱਚੇ ਨੂੰ ਇਹ ਭਰੋਸਾ ਨਹੀਂ ਹੈ ਕਿ ਮਾਂ ਜਾਂ ਪਿਓ ਉਸ ਪ੍ਰਤੀ ਪਿਆਰ ਕਰਨ ਵਾਲੇ, ਸਵੀਕਾਰ ਕਰਨ ਵਾਲੇ, ਅਤੇ ਸਹਿਯੋਗ ਦੇਣ ਵਾਲੇ ਹੋਣਗੇ, ਤਾਂ ਬੱਚਾ ਕਿਸੇ ਵੀ ਗਲਤੀ ਨੂੰ ਮੰਨਣਾ ਨਹੀਂ ਚਾਹੇਗਾ।

3. ਜਵਾਨ ਬੱਚਿਆਂ ਨੂੰ ਬਾਈਬਲ ਅਧਾਰਤ ਸਲਾਹ ਦੇਣ ਦੁਆਰਾ। ਮਾਪਿਆਂ ਨੂੰ ਬੱਚਿਆਂ ਦੀ ਇਹ ਸਿੱਖਣ ਵਿੱਚ ਮਦਦ ਕਰਨੀ ਚਾਹੀਦੀ ਹੈ ਕਿ ਉਹ ਬਾਈਬਲ ਦੇ ਸਿਧਾਂਤਾਂ ਨੂੰ ਮਨ ਵਿੱਚ ਰੱਖਦੇ ਹੋਏ ਹਾਲਾਤਾਂ ਵਿਚਾਰ ਕਰਨ (ਕਹਾਉਤਾਂ 4:1-9, ਕਹਾਉਤਾਂ 7:1, 4-5)। ਉਨ੍ਹਾਂ ਨੂੰ ਆਪਣੇ ਜਵਾਨ ਬੱਚਿਆਂ ਨਾਲ ਉਨ੍ਹਾਂ ਖਤਰਿਆਂ ਬਾਰੇ ਗੱਲ ਕਰਨੀ ਚਾਹੀਦੀ ਹੈ ਜੋ ਉਹ ਵੇਖਦੇ ਹਨ। ਉਨ੍ਹਾਂ ਨੂੰ ਆਪਣੇ ਜਵਾਨ ਬੱਚਿਆਂ ਦੀ ਉਨ੍ਹਾਂ ਬਹੁਤ ਸਾਰੇ ਫੈਸਲਿਆਂ ਬਾਰੇ ਵਿਚਾਰ ਕਰਨ ਵਿੱਚ ਮਦਦ ਕਰਨੀ ਚਾਹੀਦੀ ਹੈ ਜੋ ਫੈਸਲੇ ਲੈਣ ਦੀ ਉਨ੍ਹਾਂ ਨੂੰ ਲੋੜ ਪਵੇਗੀ। ਉਹ ਆਪਣੇ ਜਵਾਨ ਬੱਚਿਆਂ ਦੀ ਇਸ ਬਾਰੇ ਸਮੇਂ ਤੋਂ ਪਹਿਲਾਂ ਹੀ ਸੋਚਣ ਵਿੱਚ ਮਦਦ ਕਰ ਸਕਦੇ ਹਨ ਕਿ ਪਰਤਾਵੇ ਤੋਂ ਕਿਵੇਂ ਬਚਣਾ ਹੈ ਅਤੇ ਤਦ ਕੀ ਕਰਨਾ ਹੈ ਜਦੋਂ ਉਹ ਪਰਤਾਵੇ ਦਾ ਸਾਹਮਣਾ ਕਰਦੇ ਹਨ।

ਕਲੀਸਿਯਾ ਨੂੰ ਬਾਈਬਲ ਅਧਾਰਤ ਨੈਤਿਕਤਾ ਦੀ ਰੱਖਿਆ ਕਰਦੇ ਹੋਏ ਆਪਣੇ ਸੱਭਿਆਚਾਰ ਤੋਂ ਵੱਖ ਅਤੇ ਸਪਸ਼ਟ ਹੋਣਾ ਚਾਹੀਦਾ ਹੈ। ਬਹੁਤ ਸੱਭਿਆਚਾਰ ਲਿੰਗਕ ਪਾਪ ਨੂੰ ਗੰਭੀਰ ਪਾਪ ਨਹੀਂ ਮੰਨਦੇ ਹਨ। ਉਹ ਉਮੀਦ ਰੱਖਦੇ ਹਨ ਕਿ ਅਣਵਿਆਹੇ ਜਵਾਨ ਲੋਕ ਵਿਆਹ ਤੋਂ ਪਹਿਲਾਂ ਲਿੰਗਕ ਸੰਬੰਧ ਬਣਾਉਣਗੇ। ਕਲੀਸਿਯਾ ਨੂੰ ਪਾਪ ਨਾਲ ਸਮਝੌਤਾ ਨਹੀਂ ਕਰਨਾ ਚਾਹੀਦਾ। ਕਲੀਸਿਯਾ ਨੂੰ ਇਹ ਨਹੀਂ ਮੰਨਣਾ ਚਾਹੀਦਾ ਕਿ ਜਵਾਨ ਲੋਕਾਂ ਦੀ ਵਿੱਚ ਲਿੰਗਕ ਪਾਪ ਠੀਕ ਹੈ। ਪਰਮੇਸ਼ੁਰ ਆਖਦਾ ਹੈ ਕਿ ਉਹ ਜਿਹੜੇ ਹਰਾਮਕਾਰ ਹਨ, ਮਸੀਹ ਦੇ ਰਾਜ ਵਿੱਚ ਉਨ੍ਹਾਂ ਦਾ ਹਿੱਸਾ ਨਹੀਂ ਹੋਵੇਗਾ (ਅਫ਼ਸੀਆਂ 5:5)।

► ਕਲੀਸਿਯਾ ਉਨ੍ਹਾਂ ਜਵਾਨ ਲੋਕਾਂ ਦੀ ਮਦਦ ਕਿਵੇਂ ਕਰ ਸਕਦੀ ਹੈ ਜੋ ਸੰਸਾਰ ਦੇ ਪਰਤਾਵਿਆਂ ਨਾਲ ਸੰਘਰਸ਼ ਕਰ ਰਹੇ ਹਨ?

► ਵਿਦਿਆਰਥੀਆਂ ਨੂੰ ਸਮੂਹ ਲਈ ਅਫ਼ਸੀਆਂ 5:3-7 ਅਤੇ ਇਬਰਾਨੀਆਂ 13:4 ਨੂੰ ਪੜ੍ਹਨਾ ਚਾਹੀਦਾ ਹੈ।

ਵਿਆਹ ਤੋਂ ਪਹਿਲਾਂ ਇੱਕ ਰਿਸ਼ਤੇ ਦੇ ਬਣਨ ਦਾ ਸਮਾਂ ਲਿੰਗਕ ਸੰਬੰਧਾਂ ਨੂੰ ਸ਼ੁਰੂ ਕਰਨ ਲਈ ਇੱਕ ਸਮਾਂ ਨਹੀਂ ਹੈ। ਇਸ ਦੇ ਬਜਾਏ ਇਹ ਉਹ ਸਮਾਂ ਹੈ ਜਦੋਂ ਇੱਕ ਆਦਮੀ ਅਤੇ ਔਰਤ ਇਹ ਯਕੀਨੀ ਬਣਾਉਂਦੇ ਹਨ ਕਿ ਉਨ੍ਹਾਂ ਦੀਆਂ ਆਤਮਿਕ ਅਤੇ ਬਾਈਬਲ ਸੰਬੰਧੀ ਤਰਜੀਹਾਂ ਇੱਕੋ ਜਿਹੀਆਂ ਹਨ। ਇਹ ਉਹ ਸਮਾਂ ਹੈ ਜਦੋਂ ਉਹ ਇੱਕ ਦੂਸਰੇ ਦੇ ਲਈ ਇੱਕ ਸਮਝ ਨੂੰ ਵਿਕਸਤ ਕਰਦੇ ਹਨ ਜੋ ਉਨ੍ਹਾਂ ਨੂੰ ਇੱਕ ਦੂਸਰੇ ਪ੍ਰਤੀ ਸਥਾਈ ਸਮਰਪਣ ਕਰਨ ਲਈ ਇੱਕ ਦੂਸਰੇ ਉੱਤੇ ਲੋੜੀਂਦਾ ਭਰੋਸਾ ਕਰਨ ਦੇ ਯੋਗ ਬਣਾਉਂਦੀ ਹੈ। ਜੇ ਉਹ ਇੱਕ ਦੂਸਰੇ ਦੇ ਚਰਿੱਤਰ ਬਾਰੇ ਇਹ ਭਰੋਸਾ ਨਹੀਂ ਕਰ ਸਕਦੇ ਹਨ, ਉਨ੍ਹਾਂ ਨੂੰ ਰਿਸ਼ਤੇ ਨੂੰ ਸਮਾਪਤ ਕਰ ਦੇਣਾ ਚਾਹੀਦਾ ਹੈ ਅਤੇ ਵਿਆਹ ਨਹੀਂ ਕਰਨਾ ਚਾਹੀਦਾ।

ਕੁਝ ਸਮਾਜਾਂ ਵਿੱਚ ਲੋਕ ਵਿਆਹ ਕਰਾਉਣ ਵਿੱਚ ਦੇਰੀ ਕਰਦੇ ਹਨ ਕਿਉਂਕਿ ਉਨ੍ਹਾਂ ਦਾ ਸੱਭਿਆਚਾਰ ਉਮੀਦ ਕਰਦਾ ਹੈ ਕਿ ਵਿਆਹ ਇੱਕ ਵੱਡਾ ਅਤੇ ਮਹਿੰਗਾ ਸਮਾਰੋਹ ਹੋਵੇ। ਬਹੁਤ ਵਾਰ, ਜੋੜੇ ਵਿਆਹ ਵਿੱਚ ਦੇਰੀ ਕਰਦੇ ਹੋਏ ਕਈ ਸਾਲਾਂ ਤਕ ਇਕੱਠੇ ਰਹਿੰਦੇ ਹਨ ਅਤੇ ਬੱਚੇ ਪੈਦਾ ਕਰ ਲੈਂਦੇ ਹਨ। ਕੁਝ ਜੋੜਿਆਂ ਨੂੰ ਉਨ੍ਹਾਂ ਦੇ ਵਿਆਹ ਦਾ ਖਰਚਾ ਵਿਆਹ ਤੋਂ ਲੰਬਾ ਸਮਾਂ ਬਾਅਦ ਤਕ ਵਿੱਤੀ ਤੌਰ ’ਤੇ ਪ੍ਰਭਾਵਿਤ ਕਰਦਾ ਹੈ ਕਿਉਂਕਿ ਉਹ ਵਿਆਹ ਸਮਾਰੋਹ ਲਈ ਆਪਣਾ ਸਭ ਕੁਝ ਖਰਚ ਕਰ ਦਿੰਦੇ ਹਨ ਅਤੇ ਇੱਥੋਂ ਤਕ ਕਿ ਕਰਜ਼ਾ ਵੀ ਲੈ ਲੈਂਦੇ ਹਨ। ਕਲੀਸਿਯਾ ਨੂੰ ਵਿਸ਼ਵਾਸ ਦਾ ਇੱਕ ਉਹ ਸੁਮਦਾਏ ਹੋਣਾ ਚਾਹੀਦਾ ਹੈ ਜੋ ਵਿਆਹ ਦੇ ਲਈ ਇੱਕ ਵੱਖਰਾ ਨਮੂਨਾ ਪ੍ਰਦਾਨ ਕਰਦਾ ਹੈ। ਮਸੀਹੀ ਵਿਆਹ ਇੱਕ ਆਦਮੀ ਅਤੇ ਔਰਤ ਦੇ ਲਈ ਹੈ ਜੋ ਇੱਕ ਦੂਸਰੇ ਪ੍ਰਤੀ ਅਤੇ ਪਰਮੇਸ਼ੁਰ ਪ੍ਰਤੀ ਸਮਰਪਿਤ ਹਨ ਅਤੇ ਇਸ ਲਈ ਵੱਡਾ ਖਰਚਾ ਕਰਨ ਦੀ ਸ਼ਰਤ ਨਹੀਂ ਹੋਣੀ ਚਾਹੀਦੀ ਜੋ ਵਿਆਹ ਵਿੱਚ ਦੇਰੀ ਦਾ ਕਾਰਨ ਬਣਦੀ ਹੈ ਜਾਂ ਜੋੜੇ ਦੇ ਭਵਿੱਖ ਨੂੰ ਪ੍ਰਭਾਵਿਤ ਕਰਦੀ ਹੈ।

► ਕਿਹੜੇ ਤਰੀਕਿਆਂ ਨਾਲ ਮਸੀਹੀ ਵਿਆਹ, ਸਮਾਜ ਦੇ ਵਿਆਹ ਸੰਬੰਧੀ ਰਿਵਾਜ਼ਾਂ ਤੋਂ ਵੱਖਰਾ ਹੋਣਾ ਚਾਹੀਦਾ ਹੈ?

ਬੱਚੇ ਲਿੰਗਕ ਸੰਬੰਧਾਂ ਬਾਰੇ ਚੀਜ਼ਾਂ ਨੂੰ ਵੇਖਦੇ ਅਤੇ ਸੁਣਦੇ ਹਨ। ਉਹ ਇਸ ਬਾਰੇ ਲੋਕਾਂ ਦੇ ਖਿਆਲਾਂ ਨੂੰ ਸੁਣਦੇ ਹਨ ਕਿ ਕੀ ਸਹੀ ਅਤੇ ਕੀ ਗਲਤ ਹੈ। ਬੱਚੇ ਵੀ ਲਿੰਗਕ ਭਾਵਨਾਵਾਂ ਅਤੇ ਇੱਛਾਵਾਂ ਨੂੰ ਮਹਿਸੂਸ ਕਰਨਗੇ ਅਤੇ ਪਰਤਾਵਿਆਂ ਦਾ ਸਾਹਮਣਾ ਕਰਨਗੇ, ਇਸ ਲਈ ਮਸੀਹੀ ਮਾਪਿਆਂ ਲਈ ਇਹ ਬਹੁਤ ਮਹੱਤਵਪੂਰਣ ਹੈ ਕਿ ਉਹ ਇਹ ਸਮਝਾਉਣ ਕਿ ਪਰਮੇਸ਼ੁਰ ਲਿੰਗਕ ਸੰਬੰਧਾਂ ਬਾਰੇ ਕੀ ਆਖਦਾ ਹੈ। ਬੱਚਿਆਂ ਨੂੰ ਲਿੰਗਕ ਸੰਬੰਧਾਂ ਦੀ ਕਿਰਿਆ ਬਾਰੇ ਵਿਸਥਾਰ ਨਾਲ ਜਾਣਨ ਦੀ ਲੋੜ ਨਹੀਂ ਹੈ, ਕਿਉਂਕਿ ਉਹ ਐਨੇ ਵੱਡੇ ਨਹੀਂ ਹੋਏ ਕਿ ਉਨ੍ਹਾਂ ਦਾ ਵਿਆਹ ਕੀਤਾ ਜਾਵੇ, ਅਤੇ ਉਹ ਜਾਣਕਾਰੀ ਉਨ੍ਹਾਂ ਨੂੰ ਬੇਲੋੜੇ ਪਰਤਾਵੇ ਵਿੱਚ ਪਵੇਗੀ।

ਬੱਚਿਆਂ ਨੂੰ ਪਰਮੇਸ਼ੁਰ ਦੀ ਯੋਜਨਾ ਨੂੰ ਅਤੇ ਇਸ ਦੀ ਪਾਲਣਾ ਕਰਨ ਪ੍ਰਤੀ ਉਨ੍ਹਾਂ ਦੀ ਜ਼ਿੰਮੇਵਾਰੀ ਬਾਰੇ ਜਾਣਨ ਦੀ ਲੋੜ ਹੈ। ਉਨ੍ਹਾਂ ਨੂੰ ਇਹ ਜਾਣਨ ਦੀ ਲੋੜ ਹੈ ਕਿ ਉਹ ਪਰਤਾਵੇ ਦਾ ਸਾਹਮਣਾ ਕਰਨਗੇ। ਉਨ੍ਹਾਂ ਪਰਮੇਸ਼ੁਰ ਦੀ ਆਗਿਆਕਾਰੀ ਕਰਨ ਲਈ ਤਿਆਰ ਰਹਿਣ ਬਾਰੇ ਜਾਣਨ ਦੀ ਲੋੜ ਹੈ ਅਤੇ ਜਦੋਂ ਤਕ ਉਹ ਵਿਆਹੇ ਨਹੀਂ ਜਾਂਦੇ ਤਦ ਉਨ੍ਹਾਂ ਦੀਆਂ ਲਿੰਗਕ ਇੱਛਾਵਾਂ ਨੂੰ ਕਾਬੂ ਵਿੱਚ ਰੱਖਣ ਬਾਰੇ ਜਾਣਨ ਦੀ ਲੋੜ ਹੈ।

ਹੇਠਾਂ ਦਿੱਤੀ ਸਮੱਗਰੀ ਦੀ ਵਰਤੋਂ ਬੱਚਿਆਂ ਨੂੰ ਲਿੰਗਕ ਸੰਬੰਧਾਂ ਦੀ ਕਿਰਿਆ ਬਾਰੇ ਵਿਸਥਾਰ ਨਾਲ ਦੱਸਣ ਤੋਂ ਬਿਨਾਂ ਲਿੰਗਕਤਾ ਬਾਰੇ ਮਸੀਹੀ ਨਜ਼ਰੀਆ ਸਿਖਾਉਣ ਲਈ ਕੀਤੀ ਜਾਂਦੀ ਹੈ। ਇਸ ਨੂੰ ਸਰਲ ਤਰੀਕੇ ਨਾਲ ਲਿਖਿਆ ਗਿਆ ਹੈ, ਉਸ ਢੰਗ ਨਾਲ ਜਿਵੇਂ ਤੁਸੀਂ ਇੱਕ ਬੱਚੇ ਦੇ ਨਾਲ ਗੱਲ ਕਰੋਗੇ।

ਇੱਕ ਬੱਚੇ ਨਾਲ ਗੱਲ ਕਰਨਾ

► ਬੱਚੇ ਦੇ ਨਾਲ ਉਤਪਤ 2:7, 18-24 ਨੂੰ ਪੜ੍ਹੋ।

ਵਚਨ ਦਾ ਇਹ ਭਾਗ ਸਾਨੂੰ ਦੱਸਦਾ ਹੈ ਕਿ ਪਰਮੇਸ਼ੁਰ ਨੇ ਕਿਵੇਂ ਪਹਿਲੇ ਆਦਮੀ ਅਤੇ ਪਹਿਲੀ ਔਰਤ ਨੂੰ ਬਣਾਇਆ ਅਤੇ ਉਨ੍ਹਾਂ ਨੂੰ ਇੱਕ ਵਿਸ਼ੇਸ਼ ਰਿਸ਼ਤੇ ਦੇ ਵਿੱਚ ਰੱਖਿਆ।

ਪਰਮੇਸ਼ੁਰ ਨੇ ਵਿਆਹ ਨੂੰ ਇੱਕ ਆਦਮੀ ਅਤੇ ਇੱਕ ਔਰਤ ਵਿਚਕਾਰ ਵਿਸ਼ੇਸ਼ ਰਿਸ਼ਤੇ ਦੇ ਰੂਪ ਵਿੱਚ ਰਚਿਆ ਹੈ। ਇੱਕ ਵਿਆਹਿਆ ਹੋਇਆ ਜੋੜਾ ਇੱਕ ਦੂਸਰੇ ਲਈ ਵਿਸ਼ੇਸ਼ ਪਿਆਰ ਰੱਖਦਾ ਹੈ। ਉਨ੍ਹਾਂ ਦੇ ਰਿਸ਼ਤੇ ਦਾ ਇੱਕ ਹਿੱਸਾ ਵਿਸ਼ੇਸ਼ ਅਨੰਦ ਹੈ ਜੋ ਉਨ੍ਹਾਂ ਨੂੰ ਤਦ ਪ੍ਰਾਪਤ ਹੁੰਦਾ ਹੈ ਜਦੋਂ ਉਹ ਗੁਪਤ ਵਿੱਚ ਆਪਣੇ ਸਰੀਰਾਂ ਨੂੰ ਲਿੰਗਕ ਸੰਬੰਧ ਨਾਮਕ ਕਿਰਿਆ ਵਿੱਚ ਇੱਕ ਕਰਦੇ ਹਨ। ਪਰਮੇਸ਼ੁਰ ਨੇ ਇੱਕ ਪਤੀ ਅਤੇ ਪਤਨੀ ਨੂੰ ਅਨੰਦ ਦੇਣ ਲਈ ਲਿੰਗਕ ਸੰਬੰਧ ਦੀ ਰਚਨਾ ਕੀਤੀ ਹੈ ਅਤੇ ਕਈ ਵਾਰ ਪਤਨੀ ਇਸ ਦੁਆਰਾ ਬੱਚੇ ਨੂੰ ਜਨਮ ਦਿੰਦੀ ਹੈ।

ਕਿਉਂਕਿ ਲਿੰਗਕ ਸੰਬੰਧ ਇੱਕ ਵਿਸ਼ੇਸ਼ ਅਨੰਦ ਦਿੰਦੇ ਹਨ, ਇਸ ਲਈ ਇੱਕ ਆਦਮੀ ਅਤੇ ਇੱਕ ਔਰਤ ਵਿੱਚ ਇੱਕ ਦੂਸਰੇ ਨੂੰ ਵੇਖਣ ਅਤੇ ਇੱਕ ਦੂਸਰੇ ਦੇ ਸਰੀਰ ਨੂੰ ਛੋਹਣ ਅਤੇ ਇੱਕ ਦੂਸਰੇ ਪ੍ਰਤੀ ਆਕਰਸ਼ਣ ਦਾ ਅਨੰਦ ਉਠਾਉਣ ਦੀ ਸੁਭਾਵਕ ਇੱਛਾ ਹੁੰਦੀ ਹੈ।

ਬਾਈਬਲ ਵਿੱਚ, ਪਰਮੇਸ਼ੁਰ ਸਾਨੂੰ ਦੱਸਦਾ ਹੈ ਕਿ ਲਿੰਗਕ ਸੰਬੰਧ ਇੱਕ ਪਤੀ ਅਤੇ ਪਤਨੀ ਦੇ ਲਈ ਚੰਗੇ ਅਤੇ ਸਹੀ ਹਨ। ਪਰ ਪਰਮੇਸ਼ੁਰ ਇਹ ਵੀ ਦੱਸਦਾ ਹੈ ਕਿ ਲਿੰਗਕ ਸੰਬੰਧ ਉਨ੍ਹਾਂ ਲੋਕਾਂ ਦੇ ਲਈ ਬਹੁਤ ਗਲਤ ਹਨ ਜੋ ਇੱਕ ਦੂਸਰੇ ਦੇ ਨਾਲ ਵਿਆਹੇ ਨਹੀਂ ਹਨ। ਪਰਮੇਸ਼ੁਰ ਨੇ ਘੱਟੋ-ਘੱਟ ਚਾਰ ਕਾਰਣਾਂ ਦੇ ਕਰਕੇ ਸਾਨੂੰ ਲਿੰਗਕ ਸੰਬੰਧਾਂ ਦੀ ਕਿਰਿਆ ਬਾਰੇ ਨਿਯਮ ਦਿੱਤੇ ਹਨ:

(1) ਲਿੰਗਕ ਅਨੰਦ ਨੂੰ ਵਿਆਹ ਦੇ ਲਈ ਰਚਿਆ ਗਿਆ ਹੈ।

ਪਰਮੇਸ਼ੁਰ ਨੇ ਲਿੰਗਕ ਸੰਬੰਧਾਂ ਨੂੰ ਵਿਆਹੁਤਾ ਰਿਸ਼ਤੇ ਦਾ ਇੱਕ ਵਿਸ਼ੇਸ਼ ਹਿੱਸਾ ਹੋਣ ਲਈ ਰਚਿਆ ਹੈ। ਭਾਵੇਂ ਕਿ ਇਸ ਤਰ੍ਹਾਂ ਅਨੰਦ ਲੈਣਾ ਕਿਸੇ ਵੀ ਆਦਮੀ ਅਤੇ ਔਰਤ ਦੇ ਲਈ ਸੰਭਵ ਹੈ, ਪਰ ਵਿਆਹੁਤਾ ਰਿਸ਼ਤੇ ਦੇ ਵਿੱਚ ਅਨੰਦ ਸਭ ਤੋਂ ਵਿਸ਼ੇਸ਼ ਹੈ, ਕਿਉਂਕਿ ਹਰ ਇੱਕ ਵਿਅਕਤੀ ਪੂਰੀ ਤਰ੍ਹਾਂ ਦੂਸਰੇ ਵਿਅਕਤੀ ਦੇ ਲਈ ਹੀ ਸਮਰਪਿਤ ਹੁੰਦਾ ਹੈ। ਜਿਹੜੇ ਲੋਕ ਵਿਆਹੇ ਨਹੀਂ ਹਨ, ਉਨ੍ਹਾਂ ਲਈ ਲਿੰਗਕ ਸੰਬੰਧਾਂ ਦਾ ਉਹ ਅਰਥ ਨਹੀਂ ਹੋ ਸਕਦਾ, ਅਤੇ ਉਹ ਪੂਰਣ ਰਿਸ਼ਤਾ ਨਹੀਂ ਬਣਾ ਸਕਦੇ ਜੋ ਪਰਮੇਸ਼ੁਰ ਚਾਹੁੰਦਾ ਹੈ। ਇਸ ਲਈ, ਜਿਸ ਦੀ ਵਿਆਹ ਕਰਾਉਣ ਦੀ ਉਮਰ ਅਜੇ ਨਹੀਂ ਹੋਈ ਹੈ ਉਸ ਨੂੰ ਲਿੰਗਕ ਸੰਬੰਧ ਨਹੀਂ ਬਣਾਉਣੇ ਚਾਹੀਦੇ। ਲੋਕਾਂ ਨੂੰ ਉਦੋਂ ਤਕ ਲਿੰਗਕ ਸੰਬੰਧ ਨਹੀਂ ਬਣਾਉਣੇ ਚਾਹੀਦੇ ਜਦੋਂ ਤਕ ਉਹ ਵਿਆਹ ਦਾ ਸਮਰਪਣ ਨਹੀਂ ਕਰ ਲੈਂਦੇ ਅਤੇ ਵਿਆਹ ਦਾ ਇੱਕ ਜਨਤਕ ਸਮਾਰੋਹ ਨਹੀਂ ਕਰ ਲੈਂਦੇ। ਇੱਕ ਵਿਅਕਤੀ ਨੂੰ ਆਪਣੇ ਜੀਵਨ ਸਾਥੀ ਦੇ ਨਾਲ ਹੀ ਲਿੰਗਕ ਸੰਬੰਧ ਬਣਾਉਣੇ ਚਾਹੀਦੇ ਹਨ।

(2) ਲਿੰਗਕ ਇੱਛਾਵਾਂ ਬਹੁਤ ਸ਼ਕਤੀਸ਼ਾਲੀ ਹਨ।

ਲਿੰਗਕ ਇੱਛਾਵਾਂ ਦਾ ਹੋਣਾ ਗਲਤ ਨਹੀਂ ਹੈ, ਕਿਉਂਕਿ ਪਰਮੇਸ਼ੁਰ ਨੇ ਉਨ੍ਹਾਂ ਨੂੰ ਰਚਿਆ ਹੈ। ਪਰ ਕੁਝ ਅਜਿਹਾ ਕਰਨ ਲਈ ਇੱਛਾ ਨੂੰ ਜਾਣਬੁੱਝ ਕੇ ਵਧਾਉਣਾ ਗਲਤ ਹੈ, ਜੋ ਪਰਮੇਸ਼ੁਰ ਚਾਹੁੰਦਾ ਹੈ ਕਿ ਨਾ ਕੀਤਾ ਜਾਵੇ। ਇਸ ਕਾਰਣ:

• ਵਿਆਹੁਤਾ ਰਿਸ਼ਤੇ ਤੋਂ ਇਲਾਵਾ, ਵਿਅਕਤੀ ਨੂੰ ਹੋਰ ਕਿਤੇ ਅਜਿਹਾ ਕੁਝ ਨਹੀਂ ਕਰਨਾ ਚਾਹੀਦਾ ਜੋ ਲਿੰਗਕ ਇੱਛਾਵਾਂ ਨੂੰ ਹੋਰ ਦ੍ਰਿੜ੍ਹ ਬਣਾਉਂਦਾ ਹੈ, ਜਿਵੇਂ ਕਿ ਕਿਸੇ ਹੋਰ ਦੇ ਸਰੀਰ ਵੱਲ ਜਾਣਬੁੱਝ ਕੇ ਵੇਖਣਾ ਜਾਂ ਉਸ ਬਾਰੇ ਸੋਚਣਾ।

• ਵਿਆਹੁਤਾ ਰਿਸ਼ਤੇ ਤੋਂ ਇਲਾਵਾ, ਵਿਅਕਤੀ ਨੂੰ ਕਿਸੇ ਦੂਸਰੇ ਵਿਅਕਤੀ ਨੂੰ ਇਸ ਤਰ੍ਹਾਂ ਛੋਹਣਾ ਨਹੀਂ ਚਾਹੀਦਾ ਜਿਸ ਨਾਲ ਦੋਵਾਂ ਦੀਆਂ ਲਿੰਗਕ ਸੰਬੰਧ ਬਣਾਉਣ ਦੀਆਂ ਇੱਛਾਵਾਂ ਵਧਣ।

• ਇੱਕ ਵਿਅਕਤੀ ਨੂੰ ਗਲਤ ਕੰਮ ਕਰਨ ਬਾਰੇ ਕਲਪਨਾ ਕਰਨ ਦੀ ਚੋਣ ਨਹੀਂ ਕਰਨੀ ਚਾਹੀਦੀ।

• ਇੱਕ ਵਿਅਕਤੀ ਨੂੰ ਲੋਕਾਂ ਨੂੰ ਗਲਤ ਕੰਮ ਕਰਦੇ ਹੋਏ ਵੇਖ ਕੇ ਅਨੰਦ ਲੈਣ ਲਈ ਵੀਡੀਓਜ਼ ਜਾਂ ਤਸਵੀਰਾਂ ਨਹੀਂ ਵੇਖਣੀਆਂ ਚਾਹੀਦੀਆਂ।

• ਇੱਕ ਵਿਅਕਤੀ ਨੂੰ ਅਜਿਹੇ ਕੱਪੜੇ ਨਹੀਂ ਪਹਿਨਣੇ ਚਾਹੀਦੇ ਜੋ ਦੂਸਰਿਆਂ ਵਿੱਚ ਗਲਤ ਕੰਮ ਕਰਨ ਦੀ ਇੱਛਾ ਜਾਂ ਗਲਤ ਕੰਮ ਦੀ ਕਲਪਨਾ ਕਰਨ ਦੀ ਇੱਛਾ ਪੈਦਾ ਕਰਦੇ ਹਨ।

• ਇੱਕ ਵਿਅਕਤੀ ਨੂੰ ਇਸ ਤਰ੍ਹਾਂ ਵਿਹਾਰ ਨਹੀਂ ਕਰਨਾ ਚਾਹੀਦਾ ਜਾਂ ਗੱਲ ਨਹੀਂ ਕਰਨੀ ਚਾਹਦੀ ਜਿਸ ਤੋਂ ਜਾਪਦਾ ਹੈ ਕਿ ਉਹ ਗਲਤ ਕੰਮ ਕਰਨਾ ਚਾਹੁੰਦਾ ਹੈ।

(3) ਸਾਡੀਆਂ ਇੱਛਾਵਾਂ ਸਾਡੀ ਅਗਵਾਈ ਨਹੀਂ ਕਰ ਸਕਦੀਆਂ।

ਜਾਨਵਰਾਂ ਨੂੰ ਉਨ੍ਹਾਂ ਦੀਆਂ ਭਾਵਨਾਵਾਂ ਅਤੇ ਇੱਛਾਵਾਂ ਨਿਯੰਤਰਿਤ ਕਰਦੀਆਂ ਹਨ। ਅਸੀਂ ਜਾਨਵਰ ਨਹੀਂ ਹਾਂ; ਅਸੀਂ ਪਰਮੇਸ਼ੁਰ ਦੇ ਰੂਪ ਉੱਤੇ ਬਣਾਏ ਗਏ ਲੋਕ ਹਾਂ। ਇਸ ਦੇ ਕਾਰਨ, ਸਾਨੂੰ ਇਸ ਬਾਰੇ ਸੋਚਣਾ ਚਾਹੀਦਾ ਹੈ ਕਿ ਸਾਨੂੰ ਕੀ ਕਰਨਾ ਚਾਹੀਦਾ ਹੈ, ਅਤੇ ਫਿਰ ਸਹੀ ਫੈਸਲੇ ਲੈਣੇ ਚਾਹੀਦੇ ਹਨ। ਸਾਨੂੰ ਆਪਣੀਆਂ ਭਾਵਨਾਵਾਂ ਅਤੇ ਇੱਛਾਵਾਂ ਦੇ ਵੱਸ ਵਿੱਚ ਨਹੀਂ ਪੈਣਾ ਚਾਹੀਦਾ। ਕਈ ਵਾਰ ਉਹ ਕਰਨਾ ਸਹੀ ਹੁੰਦਾ ਹੈ ਜੋ ਅਸੀਂ ਚਾਹੁੰਦੇ ਹਾਂ; ਕਈ ਵਾਰ ਇਹ ਸਹੀ ਨਹੀਂ ਹੁੰਦਾ। ਸਾਡੀਆਂ ਇੱਛਾਵਾਂ ਸਾਨੂੰ ਇਹ ਨਹੀਂ ਦੱਸ ਸਕਦੀਆਂ ਕਿ ਕਦੋਂ ਲਿੰਗਕ ਸੰਬੰਧ ਬਣਾਉਣਾ ਸਹੀ ਹੈ। ਸਾਡੀਆਂ ਆਪਣੀਆਂ ਭਾਵਨਾਵਾਂ ਦੇ ਅਨੁਸਾਰ ਚੱਲਣ ਦੇ ਬਜਾਏ, ਸਾਨੂੰ ਪਰਮੇਸ਼ੁਰ ਦੇ ਆਤਮਾ ਦੀ ਮਦਦ ਨਾਲ ਬਾਈਬਲ ਤੋਂ ਪਰਮੇਸ਼ੁਰ ਦੇ ਨਿਰਦੇਸ਼ਾਂ ਦੀ ਪਾਲਣਾ ਕਰਨੀ ਚਾਹੀਦੀ ਹੈ।

(4) ਕਈ ਵਾਰ ਲਿੰਗਕ ਸੰਬੰਧ ਬਣਾਉਣ ਨਾਲ ਬੱਚੇ ਪੈਂਦਾ ਹੁੰਦੇ ਹਨ।

ਪਰਮੇਸ਼ੁਰ ਦੀ ਰਚਨਾ ਇਸ ਤਰ੍ਹਾਂ ਹੈ ਕਿ ਬੱਚੇ ਪਿਆਰ ਦੇ ਇੱਕ ਰਿਸ਼ਤੇ ਤੋਂ ਪੈਦਾ ਹੁੰਦੇ ਹਨ। ਉਸ ਨੇ ਇਹ ਇਸ ਤਰ੍ਹਾਂ ਬਣਾਇਆ ਹੈ ਕਿ ਬੱਚਿਆਂ ਨੂੰ ਪਰਿਵਾਰ ਵਿੱਚ ਵੱਡੇ ਹੋਣ ਲਈ ਕਈ ਸਾਲ ਲੱਗਦੇ ਹਨ, ਪਰਿਵਾਰ ਉਨ੍ਹਾਂ ਨੂੰ ਪਿਆਰ ਕਰਦਾ ਹੈ ਅਤੇ ਉਨ੍ਹਾਂ ਦੀ ਦੇਖਭਾਲ ਕਰਦਾ ਹੈ। ਇੱਕ ਬੱਚਾ ਜਿਸ ਦੇ ਮਾਤਾ ਅਤੇ ਪਿਤਾ ਇੱਕ ਦੂਸਰੇ ਨਾਲ ਵਿਆਹੇ ਹੋਏ ਨਹੀਂ ਹਨ, ਉਸ ਕੋਲ ਆਮਤੌਰ ’ਤੇ ਬਾਲਗ ਹੋਣ ਤਕ ਉਸ ਦੀ ਦੇਖਭਾਲ ਕਰਨ ਲਈ ਨਾ ਮਾਤਾ ਅਤੇ ਨਾ ਹੀ ਪਿਤਾ ਹੁੰਦੇ ਹਨ।

ਉੱਪਰ ਦਿੱਤੇ ਚਾਰ ਤੱਥਾਂ ਨੂੰ ਧਿਆਨ ਵਿੱਚ ਰੱਖਦੇ ਹੋਏ, ਜਿਹੜੇ ਲੋਕ ਪਰਮੇਸ਼ੁਰ ਨੂੰ ਪ੍ਰਸੰਨ ਕਰਨਾ ਚਾਹੁੰਦੇ ਹਨ ਅਤੇ ਇੱਕ ਉੱਤਮ ਜੀਵਨ ਚਾਹੁੰਦੇ ਹਨ ਉਹ ਪਰਮੇਸ਼ੁਰ ਦੇ ਨਿਰਦੇਸ਼ਾਂ ਦੀ ਪਾਲਣਾ ਕਰਨਗੇ। ਉਹ ਪਰਮੇਸ਼ੁਰ ਦੀ ਅਵੱਗਿਆ ਕਰਨ ਦੇ ਪਰਤਾਵੇ ਤੋਂ ਬਚਣ ਲਈ ਚੌਕਸੀ ਵਰਤਣ ਦੀਆਂ ਆਦਤਾਂ ਵਿਕਸਤ ਕਰਨਗੇ।

ਇੱਕ ਬੱਚੇ ਦੀ ਪ੍ਰਾਰਥਨਾ

ਪਿਆਰੇ ਪਰਮੇਸ਼ੁਰ,

ਮੈਨੂੰ ਇੱਕ (ਲੜਕਾ ਜਾਂ ਲੜਕੀ) ਬਣਾਉਣ ਲਈ ਤੇਰਾ ਧੰਨਵਾਦ। ਵਿਆਹ ਲਈ ਤੇਰੀ ਵਿਸ਼ੇਸ਼ ਅਤੇ ਚੰਗੀ ਯੋਜਨਾ ਲਈ ਤੇਰਾ ਧੰਨਵਾਦ। ਕਿਰਪਾ ਕਰਕੇ ਮੇਰੀ ਮਦਦ ਕਰ ਕਿ ਮੈਂ ਆਪਣੇ ਪੂਰੇ ਜੀਵਨ ਵਿੱਚ ਤੈਨੂੰ ਪਿਆਰ ਕਰਾਂ ਅਤੇ ਤੇਰੀ ਆਗਿਆਕਾਰੀ ਕਰਾਂ। ਤੂੰ ਉਹ ਸਭ ਵੇਖਦਾ ਹੈਂ ਜੋ ਮੈਂ ਕਰਦਾ ਹਾਂ, ਅਤੇ ਤੂੰ ਉਹ ਸਭ ਜਾਣਦਾ ਹੈਂ ਜੋ ਮੈਂ ਸੋਚਦਾ ਹਾਂ। ਕਿਰਪਾ ਕਰਕੇ ਮੇਰੀ ਮਦਦ ਕਰ ਕਿ ਮੈਂ ਹਮੇਸ਼ਾ ਜੀਵਨ ਲਈ ਤੇਰੇ ਨਿਰਦੇਸ਼ਾਂ ਦੀ ਪਾਲਣਾ ਕਰ ਸਕਾਂ। ਮੈਂ ਚਾਹੁੰਦਾ ਹਾਂ ਕਿ ਮੇਰੇ ਵਿਚਾਰ ਅਤੇ ਕੰਮ ਤੈਨੂੰ ਪ੍ਰਸੰਨ ਕਰਨ। ਮੇਰੀ ਮਦਦ ਕਰ ਕਿ ਮੈਂ ਆਪਣੇ ਦੋਸਤਾਂ ਦੇ ਲਈ ਇੱਕ ਚੰਗੀ ਉਦਾਹਰਣ ਬਣਨ ਦੇ ਦੁਆਰਾ ਉਨ੍ਹਾਂ ਦੀ ਤੇਰੀ ਆਗਿਆਕਾਰੀ ਕਰਨ ਵਿੱਚ ਮਦਦ ਕਰਾਂ। ਸਹੀ ਸਮੇਂ ’ਤੇ, ਜਦੋਂ ਮੈਂ ਵੱਡਾ ਹੋ ਜਾਂਦਾ ਹਾਂ, ਮੇਰੀ ਉਹ (ਪਤੀ ਜਾਂ ਪਤਨੀ) ਬਣਨ ਵਿੱਚ ਮਦਦ ਕਰ ਜੋ ਤੂੰ ਚਾਹੁੰਦਾ ਹੈਂ ਕਿ ਮੈਂ ਬਣਾਂ। ਮੈਂ ਤੈਨੂੰ ਪਿਆਰ ਕਰਦਾ ਹਾਂ, ਪਰਮੇਸ਼ੁਰ!

ਆਮੀਨ

ਸਵਰਗੀ ਪਿਤਾ,

ਸਾਨੂੰ ਆਪਣੇ ਸਰੂਪ ਉੱਤੇ ਬਣਾਉਣ ਲਈ, ਸਾਡੇ ਜੀਵਨਾਂ ਨੂੰ ਉਦੇਸ਼ ਅਤੇ ਅਰਥ ਦੇਣ ਲਈ ਤੇਰਾ ਧੰਨਵਾਦ। ਤੇਰਾ ਧੰਨਵਾਦ ਕਿ ਤੂੰ ਸਾਡੀ ਤੇਰੇ ਸਰੂਪ ਨੂੰ ਪ੍ਰਤੀਬਿੰਬਤ ਕਰਨ ਵਿੱਚ ਮਦਦ ਕਰਨ ਲਈ ਲਿੰਗ ਬਣਾਏ।

ਵਿਆਹੁਤਾ ਰਿਸ਼ਤੇ ਵਿੱਚ ਮਨੁੱਖੀ ਲਿੰਗਕਤਾ ਦੇ ਲਈ ਤੇਰੀ ਚੰਗੀ ਬਣਤਰ ਅਤੇ ਉਦੇਸ਼ਾਂ ਲਈ ਤੇਰਾ ਧੰਨਵਾਦ।

ਅਸੀਂ ਉਨ੍ਹਾਂ ਰਾਹਾਂ ਤੋਂ ਤੋਬਾ ਕਰਦੇ ਹਾਂ ਜਿਨ੍ਹਾਂ ਦੁਆਰਾ ਅਸੀਂ ਤੇਰੇ ਵਚਨ ਦੀ ਅਵੱਗਿਆ ਕੀਤੀ ਹੈ। ਕਿਰਪਾ ਕਰਕੇ, ਯਿਸੂ ਦੇ ਨਾਮ ਵਿੱਚ ਸਾਨੂੰ ਧੋ, ਮਾਫ਼ ਕਰ, ਅਤੇ ਪਵਿੱਤਰ ਕਰ (1 ਕੁਰਿੰਥੀਆਂ 6:11)। ਸਾਨੂੰ ਪਾਪ ਦੀ ਗੁਲਾਮੀ ਤੋਂ ਆਜ਼ਾਦ ਕਰ (ਰੋਮੀਆਂ 6:6-7)। ਹੁਣ ਅਸੀਂ ਆਪਣੇ ਸਰੀਰਾਂ ਨੂੰ ਤੈਨੂੰ ਭੇਂਟ ਚੜ੍ਹਾਉਂਦੇ ਹਾਂ, ਉਹ ਕਰਨ ਦਾ ਸਮਰਪਣ ਕਰਦੇ ਹੋਏ ਜੋ ਤੇਰੀ ਨਜ਼ਰ ਵਿੱਚ ਸਹੀ ਹੈ (ਰੋਮੀਆਂ 6:13-14)।

ਸਾਨੂੰ ਧਰਮੀ ਸੋਚ ਅਤੇ ਵਿਹਾਰ ਦੀਆਂ ਆਦਤਾਂ ਸਿੱਖਣ ਦੇ ਯੋਗ ਬਣਾ (1 ਤਿਮੋਥਿਉਸ 4:7, ਜ਼ਬੂਰ 23:3)। ਸਾਡੇ ਵਿਚਾਰ ਅਤੇ ਸਾਡੇ ਕੰਮ ਹਮੇਸ਼ਾ ਤੇਰੀ ਨਜ਼ਰ ਵਿੱਚ ਪ੍ਰਸੰਨ ਕਰਨ ਵਾਲੇ ਹੋਣ (ਜ਼ਬੂਰ 19:14)। ਪਰਤਾਵੇ ਦੇ ਹਰੇਕ ਸਮੇਂ ਵਿੱਚ ਸਾਨੂੰ ਜਿੱਤ ਦੇਣ ਦਾ ਵਾਇਦਾ ਕਰਨ ਲਈ ਤੇਰਾ ਧੰਨਵਾਦ (1 ਕੁਰਿੰਥੀਆਂ 10:13)।

ਆਮੀਨ

(1) ਇਸ ਪਾਠ ਵਿੱਚ ਜਿਹੜੇ ਵਿਸ਼ਿਆਂ ਦੀ ਚਰਚਾ ਕੀਤੀ ਗਈ ਹੈ, ਉਨ੍ਹਾਂ ਨੂੰ ਧਿਆਨ ਵਿੱਚ ਰੱਖਦੇ ਹੋਏ ਗਲਾਤੀਆਂ 5:16-6:9 ਨੂੰ ਪੜ੍ਹੋ। ਹੇਠ ਦਿੱਤੇ ਸਵਾਲਾਂ ਦੇ ਜਵਾਬ ਲਿਖਤੀ ਰੂਪ ਵਿੱਚ ਦਿਓ:

• ਸਰੀਰ ਦੀਆਂ ਇੱਛਾਵਾਂ (5:16) ਅਤੇ ਸਰੀਰ ਦੇ ਕੰਮਾਂ (5:19) ਵਿੱਚ ਕੀ ਅੰਤਰ ਹੈ?

• ਜਿਹੜੇ ਸਰੀਰ ਦੇ ਕੰਮ ਕਰਦੇ ਹਨ ਉਨ੍ਹਾਂ ਲਈ ਕਿਹੜੀਆਂ ਦੋ ਚੀਜ਼ਾਂ ਦਾ ਵਾਇਦਾ ਕੀਤਾ ਗਿਆ ਹੈ (5:19-21, 6:7-8)?

• ਇੱਕ ਵਿਅਕਤੀ ਸਰੀਰ ਦੀਆਂ ਇੱਛਾਵਾਂ ਦੇ ਅਨੁਸਾਰ ਨਾ ਚੱਲਣ ਦੀ ਸ਼ਕਤੀ ਕਿਵੇਂ ਪ੍ਰਾਪਤ ਕਰ ਸਕਦਾ ਹੈਂ (5:16, 22-23, 25)?

• ਕਿਹੜੀਆਂ ਕੁਝ ਸੱਚਾਈਆਂ ਹਨ ਜਿਨ੍ਹਾਂ ਨੂੰ ਵਿਸ਼ਵਾਸੀਆਂ ਨੂੰ ਪਰਤਾਵੇ ਦੇ ਸਮੇਂ ਯਾਦ ਰੱਖਣਾ ਚਾਹੀਦਾ ਹੈ ਜੋ ਜਿੱਤ ਪਾਉਣ ਵਿੱਚ ਉਨ੍ਹਾਂ ਦੀ ਮਦਦ ਕਰਨਗੀਆਂ? (ਵਚਨ ਦੇ ਇਸ ਭਾਗ ਤੋਂ ਘੱਟੋ-ਘੱਟ ਚਾਰ ਸੱਚਾਈਆਂ ਦੱਸੋ।)

• ਇਸ ਭਾਗ ਵਿੱਚ ਵਿਸ਼ਵਾਸੀਆਂ ਨੂੰ ਕਿਹੜੇ ਕੰਮ ਕਰਨ ਦੀ ਹਿਦਾਇਤ ਦਿੱਤੀ ਗਈ ਹੈ? (ਵਚਨ ਦੇ ਇਸ ਭਾਗ ਤੋਂ ਘੱਟੋ-ਘੱਟ ਚਾਰ ਕੰਮ ਦੱਸੋ।)

• ਇੱਕ ਦੂਸਰੇ ਪ੍ਰਤੀ ਵਿਸ਼ਵਾਸੀਆਂ ਦੀਆਂ ਕੀ ਜ਼ਿੰਮੇਵਾਰੀਆਂ ਹਨ (ਗਲਾਤੀਆਂ 6:1-2, 6)?

(2) ਰੋਮੀਆਂ 6:1-23 ਨੂੰ ਪੜ੍ਹੋ। ਹੇਠ ਦੇ ਸਵਾਲਾਂ ਦੇ ਜਵਾਬ ਦਿਓ:

• ਇਸ ਭਾਗ ਵਿੱਚ ਕਿਹੜੀਆਂ ਗੱਲਾਂ ਹਨ ਜੋ ਹਰੇਕ ਵਿਸ਼ਵਾਸੀ ਬਾਰੇ ਸੱਚ ਹਨ? (6-8 ਦੀ ਸੂਚੀ ਬਣਾਓ।)

• ਵਿਸ਼ਵਾਸੀਆਂ ਨੂੰ ਉਸ ਦੇ ਕਾਰਨ ਕਿਹੜੇ ਫੈਸਲੇ ਲੈਣੇ ਚਾਹੀਦੇ ਹਨ ਜੋ ਉਨ੍ਹਾਂ ਦੇ ਬਾਰੇ ਸੱਚ ਹੈ (6-8 ਗੱਲਾਂ ਦੀ ਸੂਚੀ ਬਣਾਓ।)

• ਪਾਪ ਲਈ ਪਰਤਾਵੇ ਦੇ ਸਮੇਂ ਇੱਕ ਵਿਸ਼ਵਾਸੀ ਜਿੱਤ ਪਾਉਣ ਦੀ ਉਮੀਦ ਕਿਉਂ ਰੱਖ ਸਕਦਾ ਹੈ? (ਇੱਕ ਪੈਰਾ ਲਿਖੋ।)

(3) ਰੋਮੀਆਂ 8:1-14 ਨੂੰ ਪੜ੍ਹੋ। ਇਸ ਭਾਗ ਵਿੱਚ ਦਿੱਤੀਆਂ ਸੱਚਾਈਆਂ ਦੇ ਅਧਾਰ ’ਤੇ ਇੱਕ ਪ੍ਰਾਰਥਨਾ ਲਿਖੋ।

(4) ਰੋਮੀਆਂ 6:11-14 ਅਤੇ ਕੁਲੁੱਸੀਆਂ 3:5-7 ਨੂੰ ਯਾਦ ਕਰੋ। ਅਗਲੀ ਕਲਾਸ ਦੇ ਸ਼ੁਰੂ ਵਿੱਚ, ਇਸ ਭਾਗ ਨੂੰ ਜ਼ੁਬਾਨੀ ਲਿਖੋ ਜਾਂ ਸੁਣਾਓ।