Lesson 6: ਯਿਸੂ ਅਤੇ ਪਰਮੇਸ਼ੁਰ ਦਾ ਰਾਜ

ਇਸ ਪਾਠ ਦੇ ਅੰਤ ਵਿੱਚ, ਵਿਦਿਆਰਥੀ ਹੇਠਾਂ ਦੱਸੇ ਕੰਮ ਕਰਨ ਦੇ ਯੋਗ ਹੋਣੇ ਚਾਹੀਦੇ ਹਨ:

(1) ਸ਼ੁਭਸਮਾਚਾਰਾਂ ਦੇ ਪਰਮੇਸ਼ੁਰ ਦੇ ਰਾਜ ਦੇ ਅਰਥ ਨੂੰ ਸਮਝਣਾ।

(2) ਪਰਮੇਸ਼ੁਰ ਦੇ ਰਾਜ ਦੇ ਦੋਵਾਂ ਵਰਤਮਾਨ ਅਤੇ ਭਵਿੱਖ ਦੇ ਤੱਥਾਂ ਦੀ ਪਹਿਚਾਣ ਕਰਨਾ।

(3) ਪਹਾੜੀ ਉਪਦੇਸ਼ ਤੋਂ ਰਾਜ ਦੇ ਜੀਵਨ ਬਾਰੇ ਦੱਸੇ ਯਿਸੂ ਦੇ ਸਿਧਾਂਤਾਂ ਦੀ ਪਾਲਣਾ ਕਰਨਾ।

(4) ਯਿਸੂ ਦੁਆਰਾ ਦੱਸੇ ਰਾਜ ਦੇ ਦ੍ਰਿਸ਼ਟਾਂਤਾਂ ਦੀ ਸਹੀ ਵਿਆਖਿਆ ਕਰਨਾ।

(5) ਚੇਲ੍ਹੇਪਨ ਦੇ ਲਈ ਯਿਸੂ ਦੁਆਰਾ ਦੱਸੀਆਂ ਸ਼ਰਤਾਂ ਦੇ ਅਧੀਨ ਹੋ ਜਾਣਾ।

ਅਸੀਂ ਅਜਿਹੇ ਰਾਜਦੂਤਾਂ ਦੀ ਸੇਵਕਾਈ ਕਰਦੇ ਹਾਂ ਜੋ ਸੰਸਾਰ ਦੇ ਵਿੱਚ ਪਰਮੇਸ਼ੁਰ ਦੇ ਰਾਜ ਦੀ ਪ੍ਰਤੀਨਿਧਤਾ ਕਰਦੇ ਹਨ।

ਪਰਮੇਸ਼ੁਰ ਦਾ ਰਾਜ ਨਵੇਂ ਨੇਮ ਦਾ ਮੁੱਢਲਾ ਵਿਸ਼ਾ ਹੈ।[1] ਰਾਜ ਸ਼ਬਦ ਮੱਤੀ ਦੇ ਵਿੱਚ 54 ਵਾਰ ਆਉਂਦਾ ਹੈ, ਮਰਕੁਸ ਵਿੱਚ 14 ਵਾਰ, ਲੂਕਾ ਦੇ ਵਿੱਚ 39 ਵਾਰ ਅਤੇ ਯੂਹੰਨਾ ਦੇ ਵਿੱਚ ਪੰਜ ਵਾਰ ਆਉਂਦਾ ਹੈ।[2]

ਯਿਸੂ ਦੇ ਲਗਭਗ ਅੱਧੇ ਦ੍ਰਿਸ਼ਟਾਂਤ ਪਰਮੇਸ਼ੁਰ ਦੇ ਰਾਜ ਬਾਰੇ ਸਿਖਾਉਂਦੇ ਹਨ। ਉਹ ਰਾਜ ਦੇ ਬਾਰੇ ਪ੍ਰਚਾਰ ਕਰਦਾ ਹੈ। ਉਹ ਰਾਜ ਦੀ ਸਮਰੱਥਾ ਵਿਖਾਉਣ ਦੇ ਲਈ ਚੰਗਾ ਕਰਦਾ ਹੈ ਅਤੇ ਦੁਸ਼ਟ ਆਤਮਾਵਾਂ ਨੂੰ ਬਾਹਰ ਕੱਢਦਾ ਹੈ। ਯਿਸੂ ਦੇ ਸਵਰਗ ਤੇ ਉਠਾਏ ਜਾਣ ਤੋਂ ਬਾਅਦ ਅਰੰਭਿਕ ਕਲੀਸਿਆ ਲਗਾਤਾਰ ਪਰਮੇਸ਼ੁਰ ਦੇ ਰਾਜ ਦਾ ਪ੍ਰਚਾਰ ਕਰਦੀ ਰਹੀ। (ਰਸੂਲਾਂ ਦੇ ਕਰਤੱਬ 8:12, ਰਸੂਲਾਂ ਦੇ ਕਰਤੱਬ 28:23)।

ਇਸ ਪਾਠ ਦੇ ਵਿੱਚ ਅਸੀਂ ਯਿਸੂ ਦੀ ਸੇਵਕਾਈ ਦੇ ਵਿੱਚ ਪਰਮੇਸ਼ੁਰ ਦੇ ਰਾਜ ਬਾਰੇ, ਅਤੇ ਅੱਜ ਦੀ ਸੇਵਕਾਈ ਦੇ ਵਿੱਚ ਪਰਮੇਸ਼ੁਰ ਦੇ ਰਾਜ ਦੇ ਪ੍ਰਭਾਵ ਬਾਰੇ ਅਧਿਐਨ ਕਰਾਂਗੇ। ਇਸ ਕੋਰਸ ਦੇ ਅੰਤ ਵਿੱਚ ਨਾਈਜੀਰੀਆ ਦੇ ਵਿੱਚ ਪਰਮੇਸ਼ੁਰ ਦੇ ਰਾਜ ਬਾਰੇ ਕੀਤਾ ਇੱਕ ਪ੍ਰਚਾਰ ਹੈ। ਇਹ ਪ੍ਰਚਾਰ ਦਰਸਾਉਂਦਾ ਹੈ ਕਿ ਕਿਵੇਂ ਰਾਜ ਦਾ ਸੰਦੇਸ਼ ਅੱਜ ਸਾਡੇ ਸੰਸਾਰ ਦੀ ਸੇਵਕਾਈ ਨੂੰ ਪ੍ਰਭਾਵਿਤ ਕਰਦਾ ਹੈ।

ਅਜਿਹੇ ਦੋ ਪ੍ਰਸ਼ਨ ਹਨ ਜੋ ਪਰਮੇਸ਼ੁਰ ਦੇ ਰਾਜ ਦੇ ਅਧਿਐਨ ਦੀ ਜਾਣ-ਪਹਿਚਾਣ ਕਰਾਉਂਦੇ ਹਨ।[1]

1. ਪਰਮੇਸ਼ੁਰ ਦਾ ਰਾਜ ਕੀ ਹੈ?

2. ਪਰਮੇਸ਼ੁਰ ਦਾ ਰਾਜ ਕਦੋਂ ਸਥਾਪਿਤ ਹੁੰਦਾ ਹੈ?

ਪਰਮੇਸ਼ੁਰ ਦਾ ਰਾਜ ਕੀ ਹੈ?

► ਪੜ੍ਹੋ ਰਸੂਲਾਂ ਦੇ ਕਰਤੱਬ 1:1-8.

ਮੁਰਦਿਆਂ ਵਿੱਚੋਂ ਜੀ ਉੱਠਣ ਦੇ 40 ਦਿਨਾਂ ਬਾਅਦ, ਯਿਸੂ ਆਪਣੇ ਚੇਲ੍ਹਿਆਂ ਦੇ ਨਾਲ ਸੀ ਅਤੇ ਉਹ ਪਰਮੇਸ਼ੁਰ ਦੇ ਰਾਜ ਬਾਰੇ ਗੱਲਾਂ ਕਰ ਰਿਹਾ ਸੀ। ਉਸਦੇ ਸਵਰਗ ਤੇ ਉਠਾਏ ਜਾਣ ਦੇ ਕੁਝ ਸਮਾਂ ਪਹਿਲਾਂ, ਚੇਲ੍ਹਿਆਂ ਦੇ ਪੁੱਛਿਆ, “ਪ੍ਰਭੂ, ਕੀ ਤੁਸੀਂ ਇਸ ਸਮੇਂ ਇਸਰਾਏਲ ਦੇ ਰਾਜ ਨੂੰ ਬਹਾਲ ਕਰਦੇ ਹੋ? ਚੇਲ੍ਹਿਆਂ ਦੀ ਉਮੀਦ ਸੀ:

1. ਜਲਦੀ ਨਾਲ ਆਉਣ ਵਾਲਾ ਰਾਜ: “ਇਸ ਸਮੇਂ।” ਉਨ੍ਹਾਂ ਦੀ ਉਮੀਦ ਸੀ ਕਿ ਯਿਸੂ ਰਾਜ ਨੂੰ ਜਲਦੀ ਦੇ ਨਾਲ ਸਥਾਪਿਤ ਕਰ ਦੇਵੇਗਾ।

2. ਇੱਕ ਰਾਜਨੀਤਿਕ ਅਤੇ ਭੂਗੋਲਿਕ ਰਾਜ: “ਬਹਾਲ” ਉਨ੍ਹਾਂ ਦੇ ਉਮੀਦ ਕੀਤੀ ਕਿ ਯਿਸੂ ਰੋਮ ਨੂੰ ਹਰਾ ਕੇ ਇਸਰਾਏਲ ਦੇ ਰਾਜਨੀਤਿਕ ਅਧਿਕਾਰ ਨੂੰ ਬਹਾਲ ਕਰ ਦੇਵੇਗਾ।

3. ਇੱਕ ਰਾਸ਼ਟਰੀ ਰਾਜ: “ਇਸਰਾਏਲ ਦੇ ਰਾਜ।” ਉਨ੍ਹਾਂ ਨੇ ਉਮੀਦ ਕੀਤੀ ਯਿਸੂ ਪੁਰਾਣੇ ਨੇਮ ਦੇ ਦਾਊਦ ਦੇ ਰਾਜਿਆਂ ਦੀ ਤਰ੍ਹਾਂ ਦੇਸ਼ ਤੇ ਰਾਜ ਕਰੇਗਾ।[2]

ਯਿਸੂ ਨੇ ਉੱਤਰ ਦਿੱਤਾ, “ਤੁਹਾਡਾ ਕੰਮ ਨਹੀਂ ਭਈ ਉਨ੍ਹਾਂ ਸਮਿਆਂ ਅਤੇ ਵੇਲਿਆਂ ਨੂੰ ਜਾਣੋ ਜੋ ਪਿਤਾ ਨੇ ਆਪਣੇ ਵੱਸ ਵਿੱਚ ਰੱਖੇ ਹਨ। ਪਰ ਜਾਂ ਪਵਿੱਤ੍ਰ ਆਤਮਾ ਤੁਹਾਡੇ ਉੱਤੇ ਆਵੇਗਾ ਤਾਂ ਤੁਸੀਂ ਸ਼ਕਤੀ ਪਾਓਗੇ ਅਤੇ ਯਰੂਸ਼ਲਮ ਅਰ ਸਾਰੇ ਯਹੂਦਿਯਾ ਅਤੇ ਸਾਮਰਿਯਾ ਵਿੱਚ ਸਗੋਂ ਧਰਤੀ ਦੇ ਬੰਨੇ ਤੀਕੁਰ ਮੇਰੇ ਗਵਾਹ ਹੋਵੋਗੇ।”

ਯਿਸੂ ਦਾ ਉੱਤਰ ਦੱਸਦਾ ਹੈ ਕਿ ਉਸਦਾ ਰਾਜ ਹੇਠਾਂ ਦੱਸੇ ਅਨੁਸਾਰ ਹੈ:

1. ਇੱਕ ਸਮਾਂ-ਰਹਿਤ ਰਾਜ: “ਸਮਿਆਂ ਅਤੇ ਵੇਲਿਆਂ ਨੂੰ ਜਾਣੋ ਜੋ ਪਿਤਾ ਨੇ ਆਪਣੇ ਵੱਸ ਵਿੱਚ ਰੱਖੇ ਹਨ।” ਯਿਸੂ ਦਾ ਰਾਜ ਮਨੁੱਖੀ ਸਮੇਂ ਤੇ ਨਹੀਂ ਬਲਕਿ ਪਿਤਾ ਦੇ ਸਮੇਂ ਤੇ ਨਿਰਭਰ ਨਹੀਂ ਸੀ।

2. ਇੱਕ ਅਲੌਕਿਕ ਰਾਜ: “ਪਵਿੱਤ੍ਰ ਆਤਮਾ ਤੁਹਾਡੇ ਉੱਤੇ ਆਵੇਗਾ ਤਾਂ ਤੁਸੀਂ ਸ਼ਕਤੀ ਪਾਓਗੇ।” ਯਿਸੂ ਦਾ ਰਾਜ ਪਵਿੱਤਰ ਆਤਮਾ ਦੀ ਸ਼ਕਤੀ ਤੇ ਆਧਾਰਿਤ ਸੀ, ਨਾ ਕਿ ਕਿਸੇ ਰਾਜਨੀਤਿਕ ਅਧਿਕਾਰ ਤੇ।

3. ਇੱਕ ਵਿਸ਼ਵ-ਵਿਆਪੀ ਰਾਜ: “ਧਰਤੀ ਦੇ ਬੰਨੇ ਤੀਕੁਰ” ਯਿਸੂ ਦਾ ਰਾਜ ਸਾਰੇ ਰਾਸ਼ਟਰਾਂ ਤੱਕ ਪਹੁੰਚਿਆ। ਇਹ ਇਸਰਾਏਲ ਤੱਕ ਸੀਮਿਤ ਨਹੀਂ ਸੀ।

ਯਿਸੂ ਨੇ ਆਪਣੇ ਚੇਲ੍ਹਿਆਂ ਨੂੰ ਕਿਹਾ ਕਿ ਉਨ੍ਹਾਂ ਨੂੰ ਸਮੇਂ ਦੇ ਬਾਰੇ ਜਾਣਨ ਦੀ ਜਰੂਰਤ ਨਹੀਂ ਹੈ। ਇਸਦੀ ਬਜਾਏ ਉਨ੍ਹਾਂ ਨੂੰ ਦੋ ਗੱਲਾਂ ਦੇ ਬਾਰੇ ਸੋਚਣਾ ਚਾਹੀਦਾ ਹੈ: ਪਵਿੱਤਰ ਆਤਮਾ ਨੂੰ ਪ੍ਰਾਪਤ ਕਰਨਾ ਅਤੇ ਧਰਤੀ ਦੇ ਬੰਨ੍ਹਿਆਂ ਤੱਕ ਉਸਦੇ ਗਵਾਹ ਬਣਨਾ।

ਪਰਮੇਸ਼ੁਰ ਦਾ ਰਾਜ ਕਦੋਂ ਸਥਾਪਿਤ ਹੁੰਦਾ ਹੈ?[3]

ਮਸੀਹੀ ਵਿਦਵਾਨ ਪਰਮੇਸ਼ੁਰ ਦੇ ਰਾਜ ਬਾਰੇ ਤਿੰਨ ਮੁੱਢਲੀਆਂ ਧਾਰਨਵਾਂ ਦੱਸਦੇ ਹਨ।

ਰਾਜ ਆਵੇਗਾ।

ਕੁਝ ਮਸੀਹੀ ਵਿਦਵਾਨ ਅੰਤ ਦੇ ਸਮੇਂ ਵਿੱਚ ਰਾਜ ਨੂੰ ਸਥਾਪਿਤ ਹੁੰਦੇ ਹੋਏ ਵੇਖਦੇ ਹਨ ਜਦੋਂ ਯਿਸੂ ਹਜ਼ਾਰ ਸਾਲਾਂ ਦੇ ਧਰਤੀ ਤੇ ਰਾਜ ਕਰੇਗਾ। ਇਹ ਲੇਖਕ ਮੱਤੀ 24-25 ਦੇ ਵਚਨਾਂ ਨੂੰ ਵੇਖਦੇ ਹਨ ਜੋ ਰਾਜ ਦੇ ਰਾਜਨੀਤਿਕ ਅਤੇ ਖੇਤਰੀ ਤੱਥਾਂ ਤੇ ਜ਼ੋਰ ਦਿੰਦੇ ਹਨ।

ਰਾਜ ਆ ਚੁੱਕਾ ਹੈ

ਦੂਸਰੇ ਮਸੀਹੀ ਵਿਦਵਾਨ ਸਿਖਾਉਂਦੇ ਹਨ ਕਿ ਜਦੋਂ ਯਿਸੂ ਧਰਤੀ ਤੇ ਸੀ ਉਸ ਸਮੇਂ ਰਾਜ ਨੂੰ ਸਥਾਪਿਤ ਕਰ ਦਿੱਤਾ ਗਿਆ ਸੀ। ਉਹ ਅਜਿਹੇ ਵਚਨਾਂ ਤੇ ਜ਼ੋਰ ਦਿੰਦੇ ਹਨ ਜਿੱਥੇ ਯਿਸੂ ਦੇ ਅਜਿਹੇ ਬਿਆਨ ਹਨ ਕਿ “ਸਵਰਗ ਦਾ ਰਾਜ ਨੇੜੇ ਹੈ” ਅਤੇ “ਪਰਮੇਸ਼ੁਰ ਦਾ ਰਾਜ ਤੁਸਾਂ ਉੱਤੇ ਆ ਪਹੁੰਚਿਆਂ ਹੈ” (ਮੱਤੀ 4:17 ਅਤੇ ਲੂਕਾ 11:20)। ਰਾਜ ਦੀ ਇਹ ਧਾਰਨਾ ਰਾਜ ਦੇ ਆਤਮਿਕ ਪੱਖ ਅਤੇ ਵਿਸ਼ਵਾਸੀਆਂ ਦੇ ਦਿਲਾਂ ਵਿੱਚ ਪਰਮੇਸ਼ੁਰ ਦੇ ਰਾਜ ਤੇ ਜਿਆਦਾ ਧਿਆਨ ਕੇਂਦਰਿਤ ਕਰਦੀ ਹੈ।

ਰਾਜ ਪਹਿਲਾਂ ਤੋਂ ਹੀ ਆ ਚੁੱਕਾ ਹੈ ਪਰ ਇਹ ਪੂਰੀ ਤਰ੍ਹਾਂ ਨਾਲ ਜਾਹਿਰ ਨਹੀਂ ਹੋਇਆ।

ਬਹੁਤ ਸਾਰੇ ਮਸੀਹੀ ਵਿਦਵਾਨ ਸਿਖਾਉਂਦੇ ਹਨ ਕਿ ਰਾਜ ਦੇ ਵਿੱਚ ਵਰਤਮਾਨ ਅਤੇ ਭਵਿੱਖ ਦੋਵੇਂ ਸ਼ਾਮਿਲ ਹਨ। ਇਹ ਧਾਰਨਾ ਸਿਖਾਉਂਦੀ ਹੈ ਕਿ ਪਰਮੇਸ਼ੁਰ ਦਾ ਰਾਜ ਯਿਸੂ ਦੀ ਧਰਤੀ ਤੇ ਸੇਵਕਾਈ ਦੇ ਦੌਰਾਨ ਸ਼ੁਰੂ ਹੋ ਗਿਆ ਸੀ; ਇਹ ਕਲੀਸਿਆ ਦੀ ਸੇਵਕਾਈ ਦੇ ਦੁਆਰਾ ਲਗਾਤਾਰ ਫੈਲ ਰਿਹਾ ਹੈ; ਅਤੇ ਜਦੋਂ ਮਸੀਹ ਰਾਜ ਕਰਨ ਦੇ ਲਈ ਦੁਬਾਰਾ ਵਾਪਿਸ ਆਵੇਗਾ ਤਾਂ ਇਹ ਪੂਰੀ ਤਰ੍ਹਾਂ ਨਾਲ ਵਿਕਸਿਤ ਹੋ ਜਾਵੇਗਾ।[4] ਮਸੀਹ ਦੀ ਵਾਪਸੀ ਤੇ ਉਹ ਹਰੇਕ ਰਾਜ ਅਤੇ ਅਧਿਕਾਰ ਅਤੇ ਸ਼ਕਤੀ ਦਾ ਨਾਸ਼ ਕਰਕੇ ਉਹ ਪਰਮੇਸ਼ੁਰ ਦੇ ਰਾਜ ਨੂੰ ਛੁਡਾ ਲਵੇਗਾ (1 ਕੁਰਿੰਥੀਆਂ 15:24)। ਇਹ ਪਰਮੇਸ਼ੁਰ ਦੇ ਰਾਜ ਦੀ ਸੰਪੂਰਨ ਸਥਾਪਨਾ ਹੋਵੇਗੀ।

► ਤੁਸੀਂ ਇੰਨਾਂ ਦੇ ਵਿੱਚੋਂ ਰਾਜ ਦੀ ਕਿਹੜੀ ਧਾਰਨਾ ਦੇ ਨਾਲ ਸਹਿਮਤ ਹੋ? ਹਰੇਕ ਧਾਰਨਾ ਦਾ ਸੇਵਕਾਈ ਦੇ ਉੱਤੇ ਕੀ ਅਭਿਆਸਿਕ ਪ੍ਰਭਾਵ ਹੈ?

ਇਸ ਪਾਠ ਦੇ ਵਿੱਚ, ਅਸੀਂ ਰਾਜ ਦੇ ਅਜਿਹੇ ਤੱਥਾਂ ਬਾਰੇ ਵੇਖਾਂਗੇ ਜੋ ਪਹਿਲਾਂ ਤੋਂ ਹੀ ਕੰਮ ਕਰ ਰਹੇ ਹਨ ਅਤੇ ਰਾਜ ਦੇ ਅਜਿਹੇ ਤੱਥ ਜੋ ਹਾਲੇ ਪੂਰੇ ਹੋਣੇ ਬਾਕੀ ਹਨ। ਇੱਕ ਰਾਜ ਦੇ ਸ਼ਾਮਿਲ ਹੁੰਦਾ ਹੈ:

• ਇੱਕ ਰਾਜਾ: ਉਸਦੇ ਜਨਮ ਦੇ ਸਮੇਂ ਜੋਤਸ਼ੀਆਂ ਤੋਂ ਲੈ ਕੇ ਉਸਦੀ ਸਲੀਬ ਤੇ ਲਗਾਈ ਤਖ਼ਤੀ ਤੱਕ, ਯਿਸੂ ਨੂੰ ਇੱਕ ਰਾਜੇ ਵੱਜੋਂ ਵੇਖਿਆ ਜਾ ਸਕਦਾ ਹੈ।

• ਅਧਿਕਾਰ: ਯਿਸੂ ਨੇ ਆਪਣੇ ਚਮਤਕਾਰਾਂ ਅਤੇ ਕਬਰ ਦੇ ਉੱਤੇ ਉਸਦੀ ਜਿੱਤ ਦੇ ਨਾਲ ਆਪਣੇ ਅਧਿਕਾਰ ਨੂੰ ਵਿਖਾਇਆ।

• ਕਾਨੂੰਨ: ਯਿਸੂ ਨੇ ਪਹਾੜੀ ਉਪਦੇਸ਼ ਦੇ ਵਿੱਚ ਰਾਜ ਦੇ ਕਾਨੂੰਨ ਦਾ ਸਾਰ ਪੇਸ਼ ਕੀਤਾ।

• ਖੇਤਰ: ਯਿਸੂ ਨੇ ਸਿਖਾਇਆ ਕਿ ਰਾਜ ਧਰਤੀ ਦੇ ਬੰਨ੍ਹਿਆਂ ਤੱਕ ਫੈਲ ਜਾਂਦਾ ਹੈ ਅਤੇ ਇਸ ਵਿੱਚ ਹਰੇਕ ਭਾਸ਼ਾ ਅਤੇ ਉੱਮਤ ਦੇ ਲੋਕ ਸ਼ਾਮਿਲ ਹੁੰਦੇ ਹਨ।

• ਲੋਕ: ਉਹ ਸਭ ਲੋਕ ਜੋ ਰਾਜੇ ਦੁਆਰਾ ਛੁਡਾਏ ਗਏ ਹਨ ਉਨ੍ਹਾਂ ਤੇ ਉਸਦਾ ਰਾਜ ਹੈ ਅਤੇ ਉਹ ਯਿਸੂ ਦੇ ਰਾਜ ਦੇ ਨਾਗਰਿਕ ਹਨ।

► ਪੜ੍ਹੋ ਮੱਤੀ 3:1-12.

ਨਵੇਂ ਨੇਮ ਦੇ ਵਿੱਚ ਪਰਮੇਸ਼ੁਰ ਦੇ ਰਾਜ ਦਾ ਪਹਿਲਾ ਹਵਾਲਾ ਯੂਹੰਨਾ ਬਪਤਿਸਮਾ ਦੇਣ ਵਾਲੇ ਦੇ ਪ੍ਰਚਾਰ ਵਿੱਚ ਮਿਲਦਾ ਹੈ। ਪੁਰਾਣੇ ਨੇਮ ਦੇ ਆਖਰੀ ਨਬੀ ਵੱਜੋਂ ਯੂਹੰਨਾ ਨੇ ਇਸਰਾਏਲ ਦੇ ਧਾਰਮਿਕ ਆਗੂਆਂ ਦੇ ਕਪਟ ਦੀ ਨਿੰਦਿਆ ਕੀਤੀ। ਨਵੇਂ ਨੇਮ ਦੇ ਪਹਿਲੇ ਸੰਦੇਸ਼ਵਾਹਕ ਦੇ ਰੂਪ ਵਿੱਚ, ਉਸਨੇ ਨਵੇਂ ਰਾਜੇ ਦੇ ਲਈ ਰਾਹ ਤਿਆਰ ਕੀਤਾ।“ਤੋਬਾ ਕਰੋ ਕਿਉਂ ਜੋ ਸੁਰਗ ਦਾ ਰਾਜ ਨੇੜੇ ਆਇਆ ਹੈ” (ਮੱਤੀ 3:2)। “ਨੇੜੇ” ਸ਼ਬਦ ਤੋਂ ਭਾਵ ਹੈ ਕਿ ਰਾਜ ਜਲਦ ਹੀ ਆ ਰਿਹਾ ਸੀ। ਇਹ ਅਜੇ ਤੱਕ ਆਇਆ ਨਹੀਂ ਸੀ, ਪਰ ਇਹ ਬਹੁਤ ਨੇੜੇ ਸੀ। ਯੂਹੰਨਾ ਇਸਰਾਏਲ ਨੂੰ ਆਉਣ ਵਾਲੇ ਮਸੀਹ ਦੇ ਲਈ ਤਿਆਰ ਕਰਨ ਦੇ ਲਈ ਪ੍ਰਚਾਰ ਕੀਤਾ ਜੋ ਨਵੇਂ ਰਾਜ ਦਾ ਅਰੰਭ ਕਰਨ ਜਾ ਰਿਹਾ ਸੀ।

ਯੂਹੰਨਾ ਦੇ ਕੈਦ ਹੋਣ ਤੋਂ ਤੁਰੰਤ ਬਾਅਦ, ਯਿਸੂ ਨੇ ਆਪਣੀ ਜਨਕਤ ਸੇਵਕਾਈ ਅਰੰਭ ਕਰ ਦਿੱਤੀ। ਉਸਨੇ ਗ਼ਲੀਲ ਦੇ ਵਿੱਚ ਯਾਤਰਾ ਕਰਦੇ ਹੋਏ ਪਰਮੇਸ਼ੁਰ ਦੇ ਰਾਜ ਦੀ ਘੋਸ਼ਣਾ ਕੀਤੀ (ਮੱਤੀ 4:23)। ਯੂਹੰਨਾ ਬਪਤਿਸਮਾ ਦੇਣ ਵਾਲੇ ਦੀ ਤਰ੍ਹਾਂ, ਯਿਸੂ ਨੇ ਘੋਸ਼ਣਾ ਕੀਤੀ, “ਤੌਬਾ ਕਰੋ ਕਿਉਂਜੋ ਸਵਰਗ ਦਾ ਰਾਜ ਨੇੜੇ ਆਇਆ ਹੈ” (ਮੱਤੀ 4:17)।

► ਪੜ੍ਹੋ ਮੱਤੀ 10:5-42.

ਯਿਸੂ ਨੇ ਬਾਰ੍ਹਾਂ ਚੇਲ੍ਹਿਆਂ ਨੂੰ ਇਸਰਾਏਲ ਦੀਆਂ ਗੁਆਚੀਆਂ ਹੋਈਆਂ ਭੇਡਾਂ ਦੇ ਕੋਲ ਰਾਜ ਦੇ ਸੰਦੇਸ਼ ਦਾ ਪ੍ਰਚਾਰ ਕਰਨ ਦੇ ਲਈ ਘੱਲਿਆ। ਉਨ੍ਹਾਂ ਨੇ ਵੀ ਯੂਹੰਨਾ ਬਪਤਿਸਮਾ ਦੇਣ ਵਾਲੇ ਅਤੇ ਯਿਸੂ ਦੀ ਤਰ੍ਹਾਂ ਪ੍ਰਚਾਰ ਕੀਤਾ, “ਸਵਰਗ ਦਾ ਰਾਜ ਨੇੜੇ ਆਇਆ ਹੈ” (ਮੱਤੀ 10:5-7)।

ਚੇਲ੍ਹਿਆਂ ਦੀ ਸੇਵਕਾਈ ਉਨ੍ਹਾਂ ਦੇ ਸੁਆਮੀ ਦੀ ਸੇਵਕਾਈ ਦੇ ਆਧਾਰ ਤੇ ਹੀ ਸੀ। ਯਿਸੂ ਦੀ ਹੀ ਤਰ੍ਹਾਂ ਉਨ੍ਹਾਂ ਨੇ ਰਾਜ ਦੀ ਘੋਸ਼ਣਾ ਕਰਨੀ ਸੀ ਅਤੇ ਲੋਕਾਂ ਦੀਆਂ ਸਰੀਰਕ ਲੋੜਾਂ ਪੂਰੀਆਂ ਕਰਨੀਆਂ ਸਨ। ਯਿਸੂ ਦੀ ਹੀ ਤਰ੍ਹਾਂ ਉਨ੍ਹਾਂ ਨੇ ਬਿਮਾਰਾਂ ਨੂੰ ਚੰਗਿਆਂ ਕੀਤਾ ਅਤੇ ਭੂਤਾਂ ਨੂੰ ਬਾਹਰ ਕੱਢਿਆ ਚਿੰਨ੍ਹ ਸਨ ਕਿ ਪਰਮੇਸ਼ੁਰ ਦਾ ਰਾਜ ਸ਼ੈਤਾਨ ਦੀ ਹਕੂਮਤ ਨੂੰ ਤੋੜ ਰਿਹਾ ਸੀ। ਯਿਸੂ ਨੇ ਆਪਣੇ ਪ੍ਰਤੀਨਿਧੀਆਂ ਨੂੰ ਭੇਜਿਆ ਕਿ ਉਹ ਬਿਮਾਰਾਂ ਨੂੰ ਚੰਗੇ ਕਰਨ, ਮੁਰਦੇ ਜਿੰਦਾ ਕਰਨ, ਕੋੜ੍ਹੀਆਂ ਨੂੰ ਸ਼ੁੱਧ ਕਰਨ ਅਤੇ ਭੂਤਾਂ ਨੂੰ ਬਾਹਰ ਕੱਢਣ (ਮੱਤੀ 10:8)।

► ਪੜ੍ਹੋ ਮੱਤੀ 12:22-23.

ਰਾਜ ਦਾ ਵਾਇਦਾ ਨਵਾਂ ਨਹੀਂ ਸੀ। ਪੁਰਾਣੇ ਨੇਮ ਦੇ ਨਬੀਆਂ ਨੇ ਭਵਿੱਖ ਦੇ ਰਾਜ ਦਾ ਵਾਇਦਾ ਕੀਤਾ ਸੀ। ਪਰ, ਯਿਸੂ ਨੇ ਘੋਸ਼ਣਾ ਕੀਤੀ ਕਿ ਰਾਜ ਸਿਰਫ਼ ਇੱਕ ਭਵਿੱਖ ਦੀ ਹੀ ਉਮੀਦ ਨਹੀਂ ਹੈ, ਪਰ ਇਹ ਵਰਤਮਾਨ ਅਸਲੀਅਤ ਹੈ। ਯਿਸੂ ਨੇ ਪਰਮੇਸ਼ੁਰ ਦੇ ਰਾਜ ਦੇ ਉਦਘਾਟਨ ਦੀ ਘੋਸ਼ਣਾ ਕੀਤੀ। ਜਿੱਥੇ ਵੀ ਯਿਸੂ ਸੀ ਉੱਥੇ ਹੀ ਪਰਮੇਸ਼ੁਰ ਦਾ ਰਾਜ ਵੀ ਮੌਜੂਦ ਸੀ।

ਭੂਤਾਂ ਦੇ ਉੱਤੇ ਉਸਦੀ ਸ਼ਕਤੀ ਦੇ ਨਾਲ, ਯਿਸੂ ਨੇ ਅਜਿਹੇ ਰਾਜੇ ਦੀ ਸ਼ਕਤੀ ਵਿਖਾਈ ਜਿਸਨੇ ਸ਼ੈਤਾਨ ਦੇ ਰਾਜ ਨੂੰ ਜਿੱਤ ਲਿਆ ਸੀ। ਯਿਸੂ ਦੁਆਰਾ ਦੁਸ਼ਟ-ਆਤਮਾਵਾਂ ਦੇ ਜਕੜੇ ਵਿਅਕਤੀ ਨੂੰ ਆਜਾਦ ਕਰਨ ਤੋਂ ਬਾਅਦ, ਫ਼ਰੀਸੀਆਂ ਨੇ ਦਾਅਵਾ ਕੀਤਾ ਕਿ ਯਿਸੂ ਭੂਤਾਂ ਦੇ ਸਰਦਾਰ ਬਆਲ-ਜ਼ਬੂਲ ਦੀ ਸਹਾਇਤਾ ਦੇ ਨਾਲ ਭੂਤਾਂ ਨੂੰ ਕੱਢਦਾ ਹੈ। ਯਿਸੂ ਨੇ ਉੱਤਰ ਦਿੱਤਾ ਕਿ ਉਹ ਪਰਮੇਸ਼ੁਰ ਦੀ ਸ਼ਕਤੀ ਦੇ ਨਾਲ ਸ਼ੈਤਾਨ ਦੇ ਰਾਜ ਨੂੰ ਜਿੱਤ ਰਿਹਾ ਹੈ: “ਪਰ ਜੇ ਮੈਂ ਪਰਮੇਸ਼ੁਰ ਦੇ ਆਤਮਾ ਦੀ ਸਹਾਇਤਾ ਨਾਲ ਭੂਤਾਂ ਨੂੰ ਕੱਢਦਾ ਹਾਂ ਤਾਂ ਪਰਮੇਸ਼ੁਰ ਦਾ ਰਾਜ ਤੁਹਾਡੇ ਉੱਤੇ ਆ ਪਹੁੰਚਿਆ ਹੈ” (ਮੱਤੀ 12:28)। ਯਿਸੂ ਨੇ ਸ਼ੈਤਾਨ ਦੇ ਰਾਜ ਉੱਤੇ ਹਮਲਾ ਕਰ ਦਿੱਤਾ ਸੀ।

► ਪੜ੍ਹੋ ਮੱਤੀ 11:1-24.

ਯਿਸੂ ਦੇ ਚਮਤਕਾਰ ਉਸਦੇ ਰਾਜ ਦੀ ਸ਼ੁਰੂਆਤ ਦੇ ਚਿੰਨ੍ਹ ਸਨ। ਯੂਹੰਨਾ ਦਾ ਸ਼ੁਭਸਮਾਚਾਰ ਯਿਸੂ ਦੇ ਚਮਤਕਾਰਾਂ ਲਈ ਚਿੰਨ੍ਹ ਸ਼ਬਦ ਦੀ ਵਰਤੋਂ ਕਰਦਾ ਹੈ। ਚਮਤਕਾਰ ਯਿਸੂ ਦੀ ਈਸ਼ਵਰਤਾਈ ਦੇ ਚਿੰਨ੍ਹ ਅਤੇ ਨਵੇਂ ਰਾਜ ਦੇ ਸਬੂਤ ਸਨ।

ਯੂਹੰਨਾ ਬਪਤਿਸਮਾ ਦੇਣ ਵਾਲੇ ਨੇ ਘੋਸ਼ਣਾ ਕੀਤੀ ਕਿ “ਸਵਰਗ ਦਾ ਰਾਜ ਨੇੜੇ ਹੈ।” ਉਸਨੇ ਇੱਕ ਰਾਜਨੀਤਿਕ ਰਾਜ ਦੀ ਉਮੀਦ ਕੀਤੀ ਜਿਸ ਨਾਲ ਇਸਰਾਏਲ ਦਾ ਛੁਟਕਾਰਾ ਹੁੰਦਾ। ਇਸਦੀ ਬਜਾਏ, ਯੂਹੰਨਾ ਨੇ ਆਪਣੇ ਆਪ ਨੂੰ ਕੈਦ ਦੇ ਵਿੱਚ ਮੌਤ ਦੀ ਸਜਾ ਦਾ ਸਾਹਮਣਾ ਕਰਦੇ ਹੋਏ ਪਾਇਆ! ਉਸਨੇ ਆਪਣੇ ਚੇਲ੍ਹਿਆਂ ਨੂੰ ਪੁੱਛਣ ਲਈ ਘੱਲਿਆ, “ਭਈ ਜਿਹੜਾ ਆਉਣ ਵਾਲਾ ਸੀ ਉਹ ਤੂੰ ਹੀ ਹੈਂ ਯਾ ਅਸੀਂ ਕਿਸੇ ਹੋਰ ਨੂੰ ਉਡੀਕੀਏ? (ਮੱਤੀ 11:3) ਯਿਸੂ ਦੀ ਸੇਵਕਾਈ ਯੂਹੰਨਾ ਦੀ ਇੱਕ ਅਜਿਹੇ ਰਾਜਨੀਤਿਕ ਮਸੀਹਾ ਦੀ ਉਮੀਦ ਦੇ ਨਾਲ ਮੇਲ ਨਹੀਂ ਖਾ ਰਹੀ ਸੀ ਜੋ ਧਰਤੀ ਤੇ ਆਪਣੇ ਰਾਜ ਨੂੰ ਸਥਾਪਿਤ ਕਰਦਾ।

ਯਿਸੂ ਨੇ ਮਸੀਹ ਦੇ ਕੰਮਾਂ ਵੱਲ ਸੰਕੇਤ ਕਰਦੇ ਹੋਏ ਉੱਤਰ ਦਿੱਤਾ।

ਯਿਸੂ ਨੇ ਉਨ੍ਹਾਂ ਨੂੰ ਉੱਤਰ ਦਿੱਤਾ, ਜੋ ਕੁੱਝ ਤੁਸੀਂ ਸੁਣਦੇ ਅਤੇ ਵੇਖਦੇ ਹੋ ਸੋ ਯੂਹੰਨਾ ਨੂੰ ਜਾ ਦੱਸਿਓ ਕਿ ਅੰਨੇ ਸੁਜਾਖੇ ਹੁੰਦੇ ਹਨ ਅਤੇ ਲੰਙੇ ਤੁਰਦੇ ਹਨ, ਕੋੜ੍ਹੀ ਸ਼ੁੱਧ ਕੀਤੇ ਜਾਂਦੇ ਹਨ ਅਤੇ ਬੋਲੇ ਸੁਣਦੇ ਹਨ ਅਤੇ ਮੁਰਦੇ ਜਿਵਾਏ ਜਾਂਦੇ ਹਨ ਅਤੇ ਗ਼ਰੀਬਾਂ ਨੂੰ ਖ਼ੁਸ਼ ਖ਼ਬਰੀ ਸੁਣਾਈ ਜਾਂਦੀ ਹੈ। ਅਤੇ ਧੰਨ ਉਹ ਹੈ ਜੋ ਮੇਰੇ ਕਾਰਨ ਠੋਕਰ ਨਾ ਖਾਵੇ (ਮੱਤੀ 11:4-6)।

ਯਿਸੂ ਨੇ ਯੂਹੰਨਾ ਨੂੰ ਅਜਿਹੇ ਚਿੰਨ੍ਹਾਂ ਦੇ ਬਾਰੇ ਯਾਦ ਦਿਵਾਇਆ ਜੋ ਮਸੀਹ ਦੇ ਬਾਰੇ ਭਵਿੱਖਬਾਣੀ ਕੀਤੇ ਗਏ ਸਨ ਅਤੇ ਹੁਣ ਪੂਰੇ ਹੋ ਰਹੇ ਸਨ। ਭਾਵੇਂਕਿ ਯਿਸੂ ਨੇ ਯੂਹੰਨਾ ਦੀ ਤਾਕਤ ਅਤੇ ਹੌਂਸਲੇ ਦੀ ਸ਼ਲਾਘਾ ਕੀਤੀ, ਪਰ ਉਸਨੇ ਘੋਸ਼ਣਾ ਕੀਤੀ ਕਿ ਸਵਰਗ ਦੇ ਰਾਜ ਵਿੱਚ ਸਭ ਤੋਂ ਛੋਟਾ ਵੀ ਯੂਹੰਨਾ ਨਾਲੋਂ ਵੱਡਾ ਹੈ। ਕਿਉਂ? ਯਿਸੂ ਸਾਰੇ ਸੁਭਾਗਾਂ ਵਾਲੇ ਇੱਕ ਨਵੇਂ ਰਾਜ ਨੂੰ ਸਥਾਪਿਤ ਕਰਨ ਦੇ ਲਈ ਆਇਆ ਸੀ। ਨਵੇਂ ਨੇਮ ਦੇ ਸਭ ਤੋਂ ਛੋਟੇ ਵਿਅਕਤੀ ਦੇ ਕੋਲ ਅਜਿਹੇ ਸੁਭਾਗ ਹਨ ਜੋ ਪੁਰਾਣੇ ਨੇਮ ਦੇ ਮਹਾਨ ਸੰਤਾਂ ਨੇ ਕਦੇ ਨਹੀਂ ਵੇਖੇ। ਨਵੇਂ ਨੇਮ ਦੇ ਵਿਸ਼ਵਾਸੀਆਂ ਨੇ ਪੁਰਾਣੇ ਨੇਮ ਦੇ ਵਾਇਦਿਆਂ ਨੂੰ ਪੂਰੇ ਹੁੰਦੇ ਵੇਖਿਆ। ਵਾਇਦਾ ਕੀਤਾ ਹੋਇਆ ਰਾਜ ਅਰੰਭ ਹੋ ਚੁੱਕਾ ਸੀ।

ਸ਼ੁਭਸਮਾਚਾਰਾਂ ਦੇ ਵਿੱਚ ਦਰਜ ਕੀਤਾ ਯਿਸੂ ਦਾ ਸਭ ਤੋਂ ਲੰਬਾ ਪ੍ਰਚਾਰ ਪਹਾੜੀ ਉਪਦੇਸ਼ ਹੈ। ਇਸ ਪ੍ਰਚਾਰ ਦਾ ਸਾਂਝਾ ਵਿਸ਼ਾ ਪਰਮੇਸ਼ੁਰ ਦਾ ਰਾਜ ਹੈ। ਇਹ ਅਲੱਗ-ਅਲੱਗ ਤਰੀਕਿਆਂ ਨਾਲ ਵੇਖਿਆ ਜਾਂਦਾ ਹੈ:

• ਪਹਿਲੇ ਧੰਨ ਹੋਣ ਦੇ ਸਿਧਾਂਤ ਸਿਖਾਉਂਦੇ ਹਨ ਕਿ ਸਵਰਗ ਦਾ ਰਾਜ ਆਤਮਾ ਦੇ ਵਿੱਚ ਗ਼ਰੀਬ ਲੋਕਾਂ ਦੇ ਲਈ ਸੀ (ਮੱਤੀ 5:3)। ਧੰਨ ਹੋਣ ਦਾ ਆਖਰੀ ਸਿਧਾਂਤ ਸਿਖਾਉਂਦਾ ਹੈ ਕਿ ਸਵਰਗ ਦਾ ਰਾਜ ਉਨ੍ਹਾਂ ਦਾ ਹੈ ਜੋ ਧਰਮ ਦੇ ਕਾਰਨ ਸਤਾਏ ਜਾਂਦੇ ਹਨ (ਮੱਤੀ 5:10)। ਇਹ ਦੋਵੇਂ ਬਾਕੀ ਦੇ ਧੰਨ ਹੋਣ ਦੇ ਸਿਧਾਂਤਾਂ ਦੇ ਦੁਆਲੇ ਇੱਕ ਕਵਰ ਬਣਾਉਂਦੇ ਹਨ ਜੋ ਇਹ ਦਰਸਾਉਂਦੇ ਹਨ ਕਿ ਧੰਨ ਹੋਣ ਦਾ ਮੁੱਢਲਾ ਵਿਸ਼ਾ ਸਵਰਗ ਦਾ ਰਾਜ ਹੈ।

• ਯਿਸੂ ਦੇ ਅਧਿਕਾਰ ਦੇ ਦਾਅਵੇ ਸ਼ਰਾ ਦੀ ਮੁੜ-ਵਿਆਖਿਆ ਕਰਦੇ ਹਨ (ਮੱਤੀ 5:21-48)। ਇਹ ਇੱਕ ਅਜਿਹੇ ਰਾਜੇ ਦਾ ਕੰਮ ਹੈ ਜਿਸਦੇ ਕੋਲ ਵਿਆਖਿਆ ਕਰਨ ਅਤੇ ਆਪਣੇ ਰਾਜ ਦੇ ਕਾਨੂੰਨਾਂ ਨੂੰ ਲਾਗੂ ਕਰਨ ਦਾ ਅਧਿਕਾਰ ਹੈ।

• ਯਿਸੂ ਨੇ ਚੇਲ੍ਹਿਆਂ ਨੂੰ ਪ੍ਰਾਥਨਾ ਕਰਨਾ ਸਿਖਾਇਆ, “ਤੁਹਾਡਾ ਰਾਜ ਆਵੇ, ਜਿਵੇਂ ਸਵਰਗ ਦੇ ਵਿੱਚ ਪੂਰੀ ਹੁੰਦੀ ਹੈ ਧਰਤੀ ਤੇ ਵੀ ਹੋਵੇ” (ਮੱਤੀ 6:9-13)। ਸਾਨੂੰ ਧਰਤੀ ਤੇ ਪਰਮੇਸ਼ੁਰ ਦੇ ਰਾਜ ਦੇ ਵਿਕਾਸ ਲਈ ਪ੍ਰਾਥਨਾ ਕਰਨ ਲਈ ਬੁਲਾਇਆ ਗਿਆ ਹੈ। ਜਦੋਂ ਪਰਮੇਸ਼ੁਰ ਦੇ ਲੋਕ ਪਹਾੜੀ ਉਪਦੇਸ਼ ਦੇ ਅਨੁਸਾਰ ਜਿਉਂਦੇ ਹਨ, ਤਾਂ ਰਾਜ ਦਾ ਵਿਕਾਸ ਹੁੰਦਾ ਹੈ ਅਤੇ ਪਰਮੇਸ਼ੁਰ ਦਾ ਅਧਿਕਾਰ ਰਾਜ ਦੇ ਨਵੇਂ ਨਾਗਰਿਕਾਂ ਦੇ ਵਿੱਚ ਵਿਕਸਿਤ ਹੁੰਦਾ ਹੈ।

• ਪ੍ਰਚਾਰ ਦੇ ਅੰਤ ਵਿੱਚ, ਯਿਸੂ ਨੇ ਸਿਖਾਇਆ ਕਿ ਸਵਰਗ ਦੇ ਰਾਜ ਵਿੱਚ ਦਾਖਿਲ ਹੋਣ ਦੇ ਲਈ ਸਮਰੱਥੀ ਕੰਮ ਹੀ ਕਾਫੀ ਨਹੀਂ ਹਨ। ਸਿਰਫ਼ ਉਹੀ ਦਾਖਿਲ ਹੋਵੇਗਾ ਜੋ ਸਵਰਗੀ ਪਿਤਾ ਦੀ ਇੱਛਾ ਤੇ ਚੱਲਦਾ ਹੈ (ਮੱਤੀ 7:21)

ਪਹਾੜੀ ਉਪਦੇਸ਼ ਨੂੰ ਪੜਣ ਦੇ ਲਈ ਸਿਧਾਂਤ

ਜਦੋਂ ਅਸੀਂ ਪਹਾੜੀ ਉਪਦੇਸ਼ ਨੂੰ ਪੜਦੇ ਹਾਂ ਤਾਂ ਸਾਨੂੰ ਤਿੰਨ ਸਿਧਾਂਤ ਯਾਦ ਰੱਖਣੇ ਚਾਹੀਦੇ ਹਨ।

(1) ਪਹਾੜੀ ਉਪਦੇਸ਼ ਦੇ ਵਿੱਚ ਦਿੱਤੇ ਹੁਕਮਾਂ ਦੀ ਪਾਲਣਾ ਕਰਨ ਦੇ ਨਾਲ ਅਸੀਂ ਸਵਰਗ ਦੇ ਰਾਜ ਦੀ ਨਾਗਰਿਕਤਾ ਕਮਾ ਨਹੀਂ ਸਕਦੇ।

ਸਾਨੂੰ ਅਜਿਹਾ ਨਹੀਂ ਸੋਚਣਾ ਚਾਹੀਦਾ, “ਇਸ ਪ੍ਰਚਾਰ ਜੀਵਨ ਬਿਤਾਓ ਅਤੇ ਤੁਸੀਂ ਇੱਕ ਮਸੀਹੀ ਬਣ ਜਾਓਗੇ।” ਇਸਦੀ ਬਜਾਏ ਸਾਨੂੰ ਇਸ ਪ੍ਰਚਾਰ ਨੂੰ ਰਾਜ ਦੇ ਇੱਕ ਨਾਗਰਿਕ ਦੇ ਜੀਵਨ ਲਈ ਦਿਸ਼ਾ-ਨਿਰਦੇਸ਼ ਵੱਜੋਂ ਪੜਣਾ ਚਾਹੀਦਾ ਹੈ: “ਇਸ ਪ੍ਰਕਾਰ ਜੀਵਨ ਬਿਤਾਓ ਕਿਉਂਕਿ ਤੁਸੀਂ ਇੱਕ ਮਸੀਹੀ ਹੋ।” ਅਸੀਂ ਸਿਰਫ਼ ਕ੍ਰਿਪਾ ਦੇ ਦੁਆਰਾ ਬਚਾਏ ਗਏ ਹਾਂ; ਇਸ ਲਈ ਪਰਮੇਸ਼ੁਰ ਦੇ ਰਾਜ ਮੈਂਬਰਾਂ ਵੱਜੋਂ ਸਾਨੂੰ ਉਸਦੇ ਹੁਕਮਾਂ ਦੀ ਪਾਲਣਾ ਕਰਨੀ ਚਾਹੀਦੀ ਹੈ।

(2) ਪਹਾੜੀ ਉਪਦੇਸ਼ ਚੇਲ੍ਹਿਆਂ ਦੇ ਲਈ ਹੈ, ਅਵਿਸ਼ਵਾਸੀਆਂ ਦੇ ਲਈ ਨਹੀਂ।

ਇਹ ਕਿਸੇ ਧਰਮ-ਨਿਰਪੱਖ ਦੇਸ਼ ਦਾ ਸੰਵਿਧਾਨ ਨਹੀਂ ਹੈ। ਜਦੋਂ ਤੁਹਾਡੇ ਅਵਿਸ਼ਵਾਸੀ ਗੁਆਂਢੀ ਇੰਨਾਂ ਸਿਧਾਂਤਾਂ ਤੇ ਚੱਲਣ ਦਾ ਇਨਕਾਰ ਕਰ ਦਿੰਦੇ ਹਨ ਤਾਂ ਹੈਰਾਨ ਨਾ ਹੋਵੋ! ਇਹ ਪਰਮੇਸ਼ੁਰ ਦੇ ਰਾਜ ਦੇ ਜੀਵਨ ਦਾ ਵਰਣਨ ਹੈ, ਮਨੁੱਖੀ ਰਾਜਾਂ ਦੇ ਜੀਵਨ ਦਾ ਨਹੀਂ।

(3) ਪਹਾੜੀ ਉਪਦੇਸ਼ ਹਰੇਕ ਵਿਸ਼ਵਾਸੀ ਦੇ ਲਈ ਹੈ

ਬਹੁਤ ਸਾਰੇ ਲੋਕਾਂ ਨੇ ਇਸ ਪ੍ਰਚਾਰ ਦੀਆਂ ਮੰਗਾਂ ਨੂੰ ਇਸ ਤਰਕ ਦੇ ਨਾਲ ਨਜ਼ਰ-ਅੰਦਾਜ ਕਰ ਦਿੰਦੇ ਹਨ ਕਿ ਇਹ ਸਿਧਾਂਤ ਆਮ ਵਿਸ਼ਵਾਸੀਆਂ ਦੇ ਲਈ ਲਾਗੂ ਨਹੀਂ ਹੁੰਦੇ। ਕਈ ਕਹਿੰਦੇ ਹਨ, “ਇਹ ਆਉਣ ਵਾਲੇ ਹਜ਼ਾਰ ਸਾਲਾਂ ਦੇ ਰਾਜ ਦੇ ਕਾਨੂੰਨ ਹਨ।” ਕਈਆਂ ਨੇ ਕਿਹਾ ਹੈ, “ਇਹ ਸਿਰਫ਼ ਕੁਝ ਸੰਤਾਂ ਦੇ ਲਈ ਹੈ। ਜਿਆਦਾਤਰ ਮਸੀਹੀ ਇੰਨ੍ਹਾਂ ਹੁਕਮਾਂ ਤੇ ਨਹੀਂ ਚੱਲ ਸਕਦੇ।” ਕੁਝ ਹੋਰਾਂ ਨੇ ਕਿਹਾ ਹੈ, “ਇਹ ਪ੍ਰਚਾਰ ਵਿਖਾਉਂਦਾ ਹੈ ਕਿ ਅਸੀਂ ਕਦੇ ਵੀ ਪਰਮੇਸ਼ੁਰ ਦੇ ਹੁਕਮਾਂ ਨੂੰ ਸੰਤੁਸ਼ਟ ਨਹੀਂ ਕਰ ਸਕਦੇ। ਜਦੋਂ ਅਸੀਂ ਵੇਖਦੇ ਹਾਂ ਕਿ ਅਸੀਂ ਕਦੇ ਵੀ ਪਰਮੇਸ਼ੁਰ ਦੀਆਂ ਮੰਗਾਂ ਪੂਰੀਆਂ ਨਹੀਂ ਕਰ ਸਕਦੇ, ਤਾਂ ਅਸੀਂ ਸਿਰਫ਼ ਕ੍ਰਿਪਾ ਤੇ ਨਿਰਭਰ ਹੋ ਜਾਂਦੇ ਹਾਂ।”

ਪਰ ਅਰੰਭਿਕ ਕਲੀਸਿਆ ਦੇ ਵਿੱਚ ਇਸ ਪ੍ਰਚਾਰ ਨੂੰ ਹਰੇਕ ਵਿਸ਼ਵਾਸੀ ਦੀ ਦਿਸ਼ਾ-ਨਿਰਦੇਸ਼ ਦੇ ਲਈ ਪੜ੍ਹਿਆ ਜਾਂਦਾ ਸੀ। 1 ਪਤਰਸ ਅਤੇ ਯਾਕੂਬ ਦੀਆਂ ਪੱਤ੍ਰੀਆਂ ਵਿੱਚ ਇਸ ਪ੍ਰਚਾਰ ਦੇ ਬਹੁਤ ਸਾਰੇ ਹੁਕਮਾਂ ਨੂੰ ਦੁਹਰਾਇਆ ਗਿਆ ਹੈ। ਯਿਸੂ ਨੇ ਪਵਿੱਤਰਤਾਈ ਦੇ ਲਈ ਪਰਮੇਸ਼ੁਰ ਦੇ ਪੱਧਰ ਨੂੰ ਕਮਜ਼ੋਰ ਨਹੀਂ ਹੋਣ ਦਿੱਤਾ। ਫ਼ਰੀਸੀਆਂ ਨਾਲੋਂ ਨੀਵਾਂ ਪੱਧਰ ਰੱਖਣ ਦੀ ਬਜਾਏ, ਯਿਸੂ ਨੇ ਆਪਣੇ ਪੈਰੋਕਾਰਾਂ ਦੇ ਲਈ ਉਨ੍ਹਾਂ ਨਾਲੋਂ ਉੱਚਾ ਪੱਧਰ ਰੱਖਿਆ: “ਮੈਂ ਤੁਹਾਨੂੰ ਆਖਦਾ ਹਾਂ ਭਈ ਜੇ ਤੁਹਾਡਾ ਧਰਮ ਗ੍ਰੰਥੀਆਂ ਅਤੇ ਫਰੀਸੀਆਂ ਦੇ ਧਰਮ ਨਾਲੋਂ ਵੱਧ ਨਾ ਹੋਵੇ ਤਾਂ ਤੁਸੀਂ ਸੁਰਗ ਦੇ ਰਾਜ ਵਿੱਚ ਕਿਸੇ ਬਿਧ ਨਾ ਵੜੋਗੇ” (ਮੱਤੀ 5:20)।

ਪਰਮੇਸ਼ੁਰ ਦੇ ਰਾਜ ਵਿੱਚ ਜੀਵਨ

► ਪੜ੍ਹੋ ਮੱਤੀ 5-7.

ਜੇਕਰ ਯਿਸੂ ਨੇ ਧਰਤੀ ਤੇ ਆਪਣੀ ਸੇਵਕਾਈ ਦੇ ਦੌਰਾਨ ਰਾਜ ਨੂੰ ਅਰੰਭ ਕੀਤਾ ਸੀ, ਤਾਂ ਹੁਣ ਅਸੀਂ ਪਰਮੇਸ਼ੁਰ ਦੇ ਰਾਜ ਵਿੱਚ ਜਿਉਂਦੇ ਹਾਂ। ਪਹਾੜੀ ਉਪਦੇਸ਼ ਸਵਰਗ ਦੇ ਰਾਜ ਦੇ ਨਾਗਰਿਕ ਦੇ ਜੀਵਨ ਦੇ ਚਰਿੱਤਰ ਨੂੰ ਦਰਸਾਉਂਦਾ ਹੈ। ਇੱਥੇ ਪ੍ਰਚਾਰ ਦੇ ਵਿਸ਼ਿਆਂ ਤੇ ਇੱਕ ਸੰਖੇਪ ਜਾਣਕਾਰੀ ਦਿੱਤੀ ਗਈ ਹੈ।

(1) ਪਰਮੇਸ਼ੁਰ ਦੇ ਰਾਜ ਦੀਆਂ ਕਦਰਾਂ-ਕੀਮਤਾਂ ਸੰਸਾਰ ਦੀਆਂ ਕਦਰਾਂ ਕੀਮਤਾਂ ਨਾਲੋਂ ਅਲੱਗ ਹਨ।

ਕੋਈ ਵੀ ਧਰਤੀ ਦਾ ਹਾਕਮ ਨਹੀਂ ਕਹਿੰਦਾ ਕਿ ਗ਼ਰੀਬ ਹੋਣਾ, ਸੋਗ ਕਰਨਾ, ਆਪਣੇ ਹੱਕਾਂ ਦਾ ਤਿਆਗ ਕਰ ਦੇਣਾ, ਜਾਂ ਸਤਾਏ ਜਾਣਾ ਧੰਨ ਹੈ। ਧੰਨ ਹੋਣ ਦੇ ਸਿਧਾਂਤ ਯਿਸੂ ਦੇ ਸਮੇਂ ਦੇ ਰੋਮੀ ਰਾਜ ਅਤੇ ਸਾਡੇ ਅੱਜ ਦੇ ਸੰਸਾਰ ਦੀਆਂ ਕਦਰਾਂ ਕੀਮਤਾਂ ਨਾਲੋਂ ਬਿਲਕੁਲ ਅਲੱਗ ਸਨ। ਪਰਮੇਸ਼ੁਰ ਦਾ ਰਾਜ ਮਨੁੱਖੀ ਰਾਜ ਨਾਲੋਂ ਅਲੱਗ ਹੈ।

(2) ਪਰਮੇਸ਼ੁਰ ਰਾਜ ਦੇ ਨਾਗਰਿਕਾਂ ਨੂੰ ਆਪਣੇ ਸੰਸਾਰ ਨੂੰ ਪ੍ਰਭਾਵਿਤ ਕਰਨਾ ਚਾਹੀਦਾ ਹੈ।

ਯਿਸੂ ਦੇ ਦਿਨਾਂ ਵਿੱਚ ਅਸੈਂਸ ਨਾਮਕ ਇੱਕ ਧਾਰਮਿਕ ਸਮੂਹ ਦੀ ਧਾਰਨਾ ਸੀ ਕਿ ਲੋਕਾਂ ਨੂੰ ਸਮਾਜ ਤੋਂ ਬਾਹਰ ਜਾ ਕੇ ਇਕਾਂਤ ਦੇ ਵਿੱਚ ਪਰਮੇਸ਼ੁਰ ਦੇ ਰਾਜ ਨੂੰ ਸਥਾਪਿਤ ਕਰਨਾ ਚਾਹੀਦਾ ਹੈ। ਯਿਸੂ ਨੇ ਕਿਹਾ, “ਨਹੀ! ਤੁਹਾਨੂੰ ਅਜਿਹੇ ਨਮਕ ਬਣਨਾ ਚਾਹੀਦਾ ਹੈ ਜੋ ਆਪਣੇ ਸੰਸਾਰ ਨੂੰ ਸੁਆਦਲਾ ਬਣਾਉਂਦਾ ਅਤੇ ਸੰਭਾਲ ਕੇ ਰੱਖਦਾ ਹੈ। ਤੁਹਾਨੂੰ ਅਜਿਹਾ ਚਾਨਣ ਬਣਨਾ ਚਾਹੀਦਾ ਹੈ ਜੋ ਤੁਹਾਡੇ ਸਵਰਗੀ ਪਿਤਾ ਦੀ ਮਹਿਮਾ ਕਰ ਸਕੇ।” ਹਾਲਾਂਕਿ ਪਰਮੇਸ਼ੁਰ ਦਾ ਰਾਜ ਮੁੱਢਲੇ ਰੂਪ ਵਿੱਚ ਆਤਮਿਕ ਹੈ, ਸਾਡੇ ਸੰਸਾਰ ਨੂੰ ਰਾਜ ਦੇ ਨਾਗਰਿਕਾਂ ਦੀ ਮੌਜੂਦਗੀ ਤੋਂ ਰਾਜਨੀਤਿਕ, ਆਰਥਿਕ ਅਤੇ ਸਮਾਜਿਕ ਲਾਭ ਮਿਲਣਾ ਚਾਹੀਦਾ ਹੈ।

[1]ਅਸੀਂ ਅਜਿਹੇ ਬਹੁਤ ਸਾਰੇ ਮਸੀਹੀਆਂ ਦੀਆਂ ਉਦਾਹਰਨਾਂ ਦੀ ਸੂਚੀ ਬਣਾ ਸਕਦੇ ਹਾਂ ਜੋ ਸਮਾਜ ਦੇ ਲਈ ਨਮਕ ਅਤੇ ਚਾਨਣ ਹਨ। ਵਿਲਿਅਮ ਵਿਲਬਰਫੋਰਸ ਨੇ ਬ੍ਰਿਟੇਨ ਦੇ ਸੰਸਦ ਭਵਨ ਵਿੱਚ ਗ਼ੁਲਾਮਾਂ ਦੇ ਵਿਉਪਾਰ ਨੂੰ ਖ਼ਤਮ ਕਰਨ ਵਿੱਚ ਅਗਵਾਈ ਕੀਤੀ; ਮੈਥੋਡਿਸਟ ਜਾਗ੍ਰਿਤੀ ਨੇ ਅੰਗਰੇਜ਼ੀ ਸਮਾਜ ਦੇ ਸਾਰੇ ਪੱਧਰਾਂ ਦੇ ਵਿੱਚ ਸੁਧਾਰ ਲਿਆਂਦਾ; ਵਿਲਿਅਮ ਕੈਰੀ ਨੇ ਭਾਰਤ ਦੇ ਵਿੱਚ ਕਾਨੂੰਨੀ ਭਰੂਣ ਹੱਤਿਆ ਅਤੇ ਸਤੀ ਪ੍ਰਥਾ (ਵਿਧਵਾ ਨੂੰ ਸਾੜਨ) ਦੇ ਵਿਰੁੱਧ ਦੀ ਲੜਾਈ ਲੜੀ; ਮਸੀਹੀਆਂ ਨੇ ਸਿੱਖਿਆ ਫੈਲਾਈ ਹੈ, ਹਸਪਤਾਲ ਅਤੇ ਅਨਾਥ-ਆਸ਼ਰਮ ਸਥਾਪਿਤ ਕੀਤੇ ਹਨ ਅਤੇ ਬਹੁਤ ਸਾਰੇ ਦੇਸ਼ਾਂ ਵਿੱਚ ਗ਼ਰੀਬਾਂ ਅਤੇ ਲੋੜਵੰਦਾਂ ਦੀ ਸੇਵਾ ਕੀਤੀ ਹੈ।

(3) ਪਰਮੇਸ਼ੁਰ ਦੇ ਰਾਜ ਦੇ ਨਾਗਰਿਕ ਕਾਨੂੰਨ ਦੀਆਂ ਸੀਮਿਤ ਮੰਗਾਂ ਤੋਂ ਵੱਧ ਕੇ ਪਿਤਾ ਦੇ ਪਿਆਰ ਨੂੰ ਵਿਖਾਉਂਦੇ ਹਨ।

ਯਿਸੂ ਸ਼ਰਾ ਦੇ ਸਥਾਨ ਤੇ ਕੋਈ ਹੋਰ ਚੀਜ਼ ਲਿਆਉਣ ਨਹੀਂ ਆਇਆ, ਪਰ ਉਹ ਸ਼ਰਾ ਨੂੰ ਪੂਰਿਆਂ ਕਰਨ ਦੇ ਲਈ ਆਇਆ। “ਇਹ ਨਾ ਸਮਝੋ ਭਈ ਮੈਂ ਤੁਰੇਤ ਯਾ ਨਬੀਆਂ ਨੂੰ ਖੰਡਣ ਆਇਆ ਹਾਂ। ਮੈਂ ਖੰਡਣ ਨਹੀਂ ਸਗੋਂ ਪੂਰਿਆਂ ਕਰਨ ਨੂੰ ਆਇਆ ਹਾਂ” (ਮੱਤੀ 5:17) ਪੂਰਾ ਕਰਨ ਤੋਂ ਭਾਵ ਹੈ ਕਿਸੇ ਚੀਜ਼ ਨੂੰ ਪੂਰਿਆਂ ਕਰਨ ਜਾਂ ਉਸਦੀ ਪੂਰਨ ਪ੍ਰਾਪਤੀ ਕਰਨਾ। ਯਿਸੂ ਸ਼ਰਾ ਨੂੰ ਖੰਡਣ ਦੇ ਲਈ ਨਹੀਂ ਆਇਆ ਪਰ ਉਹ ਇਸਦੇ ਪਿੱਛੇ ਦੀ ਆਤਮਾ ਨੂੰ ਉਜਾਗਰ ਕਰਨ ਦੇ ਲਈ ਆਇਆ। ਆਪਣੀਆਂ ਛੇ ਉਦਾਹਰਨਾਂ ਦੀ ਲੜੀ ਦੇ ਵਿੱਚ ਯਿਸੂ ਦੱਸਦਾ ਹੈ ਕਿ ਰਾਜ ਦੇ ਨਾਗਰਿਕਾਂ ਦੀ ਧਾਰਮਿਕਤਾ ਫ਼ਰੀਸੀਆਂ ਅਤੇ ਗ੍ਰੰਥੀਆਂ ਤੇ ਨਾਲੋਂ ਵਧੀਕ ਹੋਣੀ ਚਾਹੀਦੀ ਹੈ।

(4) ਰਾਜ ਦੇ ਨਾਗਰਿਕ ਦੂਸਰਿਆਂ ਨੂੰ ਪ੍ਰਸੰਨ ਕਰਨ ਦੀ ਬਜਾਏ ਪਰਮੇਸ਼ੁਰ ਨੂੰ ਪ੍ਰਸੰਨ ਕਰਨ ਦੀ ਵਧੇਰੇ ਚਿੰਤਾ ਕਰਦੇ ਹਨ।

ਫ਼ਰੀਸੀ ਚਾਹੁੰਦੇ ਸਨ ਕਿ ਲੋਕ ਉਨ੍ਹਾਂ ਦੀ ਖੁੱਲ੍ਹਦਿਲੀ ਨੂੰ ਵੇਖਣ; ਰਾਜ ਦੇ ਨਾਗਰਿਕ ਗੁਪਤ ਦੇ ਵਿੱਚ ਦਿੰਦੇ ਹਨ। ਕਪਟੀ ਲੋਕ ਚਾਹੁੰਦੇ ਸਨ ਕਿ ਲੋਕ ਉਨ੍ਹਾਂ ਦੀਆਂ ਪ੍ਰਭਾਵਸ਼ਾਲੀ ਪ੍ਰਾਥਨਾਵਾਂ ਨੂੰ ਸੁਣਨ; ਰਾਜ ਦੇ ਨਾਗਰਿਕ ਸਾਧਾਰਨ ਢੰਗ ਅਤੇ ਬੋਝ ਨਾਲ ਪ੍ਰਾਥਨਾ ਕਰਦੇ ਹਨ। ਫ਼ਰੀਸੀ ਚਾਹੁੰਦੇ ਸਨ ਕਿ ਬਾਕੀ ਦੇ ਲੋਕ ਲੰਬੇ ਵਰਤਾਂ ਦੇ ਲਈ ਉਨ੍ਹਾਂ ਦਾ ਆਦਰ ਕਰਨ; ਰਾਜ ਦੇ ਨਾਗਰਿਕ ਸਿਰਫ਼ ਪਿਤਾ ਦੇ ਪ੍ਰਤੀਫ਼ਲ ਲਈ ਵਰਤ ਰੱਖਦੇ ਹਨ।

(5) ਰਾਜ ਦੇ ਨਾਗਰਿਕ ਆਪਣੇ ਧਨ ਤੇ ਭਰੋਸਾ ਨਹੀਂ ਰੱਖਦੇ ਜਾਂ ਆਪਣੀਆਂ ਲੋੜਾਂ ਦੇ ਪ੍ਰਤੀ ਚਿੰਤਾ ਨਹੀਂ ਕਰਦੇ।

ਇਸਦੀ ਬਜਾਏ ਉਹ ਆਪਣੇ ਸਵਰਗੀ ਪਿਤਾ ਦੁਆਰਾ ਪ੍ਰਦਾਨ ਕੀਤੇ ਜਾਣ ਤੇ ਭਰੋਸਾ ਰੱਖਦੇ ਹਨ।

(6) ਰਾਜ ਦੇ ਨਾਗਰਿਕ ਦੂਸਰਿਆਂ ਤੇ ਦੋਸ਼ ਨਹੀਂ ਲਗਾਉਂਦੇ।

ਪਰ, ਉਹ ਝੂਠੇ ਸਿੱਖਿਅਕਾਂ ਦੇ ਬੁਰੇ ਫ਼ਲਾਂ ਦੀ ਪਰਖ ਕਰਨ ਦੇ ਵਿੱਚ ਬਹੁਤ ਧਿਆਨਪੂਰਵਕ ਹੁੰਦੇ ਹਨ।

(7) ਰਾਜ ਦੇ ਨਾਗਰਿਕ ਆਪਣੀਆਂ ਪ੍ਰਾਥਨਾਵਾਂ ਦੇ ਵਿੱਚ ਵਿਸ਼ਵਾਸ ਰੱਖਦੇ ਹਨ।

ਰਾਜ ਦੇ ਨਾਗਰਿਕ ਆਪਣੀਆਂ ਪ੍ਰਾਥਨਾਵਾਂ ਦੇ ਵਿੱਚ ਵਿਸ਼ਵਾਸ ਰੱਖਦੇ ਹਨ ਕਿਉਂਕਿ ਉਹ ਜਾਣਦੇ ਹਨ ਉਨ੍ਹਾਂ ਦਾ ਸਵਰਗੀ ਪਿਤਾ ਆਪਣੇ ਮੰਗਣ ਵਾਲਿਆਂ ਨੂੰ ਚੰਗੀਆਂ ਵਸਤਾਂ ਦਿੰਦਾ ਹੈ! (ਮੱਤੀ 7:11)

(8) ਰਾਜ ਦੇ ਨਾਗਰਿਕ ਜਾਣਦੇ ਹਨ ਕਿ ਰਾਹ ਸਿਰਫ਼ ਦੋ ਹੀ ਹਨ।

ਇੱਕ ਖੁੱਲ੍ਹਾ ਫਾਟਕ ਹੈ ਅਤੇ ਇੱਕ ਭੀੜਾ। ਇੱਕ ਚੰਗਾ ਰੁੱਖ ਹੈ ਅਤੇ ਇੱਕ ਬੁਰਾ ਰੁੱਖ। ਇੱਕ ਬੁੱਧਵਾਨ ਮਿਸਤਰੀ ਹੈ ਅਤੇ ਇੱਕ ਮੂਰਖ ਮਿਸਤਰੀ। ਰਾਜ ਦੇ ਨਾਗਰਿਕ ਪਰਖ ਕਰਨ ਵਾਲੇ ਹੁੰਦੇ ਹਨ।

ਰਾਜ ਸਿਧਾਂਤਾਂ ਦੇ ਦੁਆਰਾ ਜਿਉਣਾ

[3]ਅਸੀਂ ਪਹਾੜੀ ਉਪਦੇਸ਼ ਦੇ ਸਿਧਾਂਤਾਂ ਦੁਆਰਾ ਕਿਵੇਂ ਜੀ ਸਕਦੇ ਹਾਂ? ਇਸਦੀ ਕੁੰਜੀ ਮੱਤੀ 5:48 ਵਿੱਚ ਹੈ। ਰਾਜ ਦੇ ਨਾਗਰਿਕਾਂ ਨੂੰ ਸਾਡੇ ਸਵਰਗੀ ਪਿਤਾ ਜਿਹੇ ਬਣਨ ਦੇ ਲਈ ਕਿਹਾ ਗਿਆ ਹੈ। ਯਿਸੂ ਦੀ ਸਿੱਖਿਆ ਇੰਨੀ ਆਸਾਨ ਅਤੇ ਇੰਨੀ ਕਠਿਨ ਹੈ। ਅਸੀਂ ਸਿਰਫ਼ ਪਰਮੇਸ਼ੁਰ ਦੀ ਕ੍ਰਿਪਾ ਦੇ ਨਾਲ ਹੀ ਯਿਸੂ ਦੀ ਸਿੱਖਿਆ ਦੇ ਅਨੁਸਾਰ ਜੀ ਸਕਦੇ ਹਾਂ। ਅਸੀਂ ਆਪਣੀ ਤਾਕਤ ਦੇ ਨਾਲ ਉਸ ਉਪਦੇਸ਼ ਦੀਆਂ ਮੰਗਾਂ ਨੂੰ ਕਦੇ ਪੂਰਿਆਂ ਨਹੀਂ ਕਰ ਸਕਦੇ। ਸਿਰਫ਼ ਆਤਮਾ ਹੀ ਰਾਜ ਦੇ ਜੀਵਨ ਨੂੰ ਸੰਭਵ ਬਣਾਉਂਦਾ ਹੈ।

ਜਦੋਂ ਅਸੀਂ ਪਹਾੜੀ ਉਪਦੇਸ਼ ਤੋਂ ਪ੍ਰਚਾਰ ਕਰਦੇ ਹਾਂ ਤਾਂ ਸਾਨੂੰ ਇਹ ਸਿਧਾਂਤ ਸਮਝਣਾ ਚਾਹੀਦਾ ਹੈ। ਜੇਕਰ ਅਸੀਂ ਇਸ ਉਪਦੇਸ਼ ਨੂੰ ਸ਼ਰਾ ਦੇ ਰੂਪ ਵਿੱਚ ਪ੍ਰਚਾਰ ਕਰਾਂਗੇ, ਤਾਂ ਅਸੀਂ ਲੋਕਾਂ ਨੂੰ ਨਿਰਾਸ਼ ਅਤੇ ਖਿਝੇ ਹੋਏ ਬਣਾ ਸਕਦੇ ਹਾਂ। ਜਦੋਂ ਅਸੀਂ ਇਸ ਉਪਦੇਸ਼ ਨੂੰ ਪਰਮੇਸ਼ੁਰ ਦੀ ਕ੍ਰਿਪਾ ਦੁਆਰਾ ਹੋਣ ਵਾਲੇ ਰਾਜ ਦੇ ਜੀਵਨ ਦੇ ਨਮੂਨੇ ਵੱਜੋਂ ਪੇਸ਼ ਕਰਦੇ ਹਾਂ, ਜਿਸਨੂੰ ਪੁੱਤਰ ਦੇ ਬਲੀਦਾਨ ਦੁਆਰਾ ਖਰੀਦਿਆ ਗਿਆ ਅਤੇ ਪਵਿੱਤਰ ਆਤਮਾ ਦੇ ਦੁਆਰਾ ਸ਼ਕਤੀ ਦਿੱਤੀ ਗਈ ਹੈ-ਤਦ ਹੀ ਪਹਾੜੀ ਉਪਦੇਸ਼ ਸ਼ੁਭਸਮਾਚਾਰ, ਖੁਸ਼ਖਬਰੀ ਬਣ ਜਾਂਦਾ ਹੈ।

► ਪਹਾੜੀ ਉਪਦੇਸ਼ ਨੂੰ ਪੜਣ ਅਤੇ ਇਸਦੇ ਸਾਰ ਤੇ ਝਾਤ ਮਾਰਨ ਤੋਂ ਬਾਅਦ, ਚਰਚਾ ਕਰੋ:

• ਤੁਹਾਡੇ ਸਮਾਜ ਦੇ ਮਸੀਹੀਆਂ ਲਈ ਪਹਾੜੀ ਉਪਦੇਸ਼ ਦੀ ਕਿਹੜੀ ਸਿੱਖਿਆ ਸਭ ਤੋਂ ਕਠਿਨ ਹੈ?

• ਇੱਕ ਮਸੀਹੀ ਆਗੂ ਦੇ ਰੂਪ ਵਿੱਚ ਪਹਾੜੀ ਉਪਦੇਸ਼ ਦੀ ਕਿਹੜੀ ਸਿੱਖਿਆ ਤੁਹਾਡੇ ਲਈ ਸਭ ਤੋਂ ਕਠਿਨ ਹੈ?

ਯਹੂਦੀ ਸਿੱਖਿਅਕ ਜਾਣਦੇ ਸਨ ਕਿ ਅਸੀਂ ਕਹਾਣੀਆਂ ਨੂੰ ਪ੍ਰਸਤਾਵਿਤ ਬਿਆਨਾਂ ਨਾਲੋਂ ਕਿਤੇ ਜ਼ਿਆਦਾ ਲੰਬੇ ਸਮੇਂ ਲਈ ਯਾਦ ਰੱਖਦੇ ਹਾਂ। ਇਸੇ ਕਾਰਨ ਦ੍ਰਿਸ਼ਟਾਂਤ ਯਹੂਦੀ ਧਰਮ ਗੁਰੂਆਂ ਦਾ ਸਿਖਾਉਣ ਦਾ ਇੱਕ ਪ੍ਰਸਿੱਧ ਤਰੀਕਾ ਸੀ। ਯਿਸੂ ਨੇ ਪਰਮੇਸ਼ੁਰ ਦੇ ਰਾਜ ਦੀਆਂ ਡੂੰਘੀਆਂ ਸਚਿਆਈਆਂ ਨੂੰ ਦੱਸਣ ਦੇ ਲਈ ਦ੍ਰਿਸ਼ਟਾਂਤਾਂ ਦਾ ਉਪਯੋਗ ਕੀਤਾ।

ਯਿਸੂ ਦੀ ਅਰੰਭਿਕ ਸੇਵਕਾਈ ਦੇ ਵਿੱਚ, ਦ੍ਰਿਸ਼ਟਾਂਤਾਂ ਦੇ ਉਪਯੋਗ ਕਾਰਨ ਉਹ ਦ੍ਰਿਸ਼ਟਾਂਤਾਂ ਦੇ ਦੁਆਰਾ ਦੁਸ਼ਮਣਾਂ ਦੇ ਵਿਰੋਧ ਤੋਂ ਦੂਰ ਰਹਿ ਕੇ ਆਪਣੇ ਚੇਲ੍ਹਿਆਂ ਨੂੰ ਸਿਖਾ ਪਾਉਂਦਾ ਸੀ। ਬਾਅਦ ਦੇ ਵਿੱਚ, ਯਿਸੂ ਯਰੂਸ਼ਲਮ ਦੇ ਧਾਰਮਿਕ ਆਗੂਆਂ ਨੂੰ ਸਿੱਧਾ ਸੰਬੋਧਿਤ ਕਰਦਾ ਸੀ; ਪਰ ਅਰੰਭਿਕ ਸਾਲਾਂ ਦੇ ਦੌਰਾਨ, ਉਸਦਾ ਧਿਆਨ ਚੇਲ੍ਹਿਆਂ ਨੂੰ ਸਿਖਾਉਣ ਵਿੱਚ ਲੱਗਾ ਹੋਇਆ ਸੀ।

ਬਹੁਤ ਸਾਰੇ ਲੋਕ ਦ੍ਰਿਸ਼ਟਾਂਤਾਂ ਨੂੰ ਸੁਣਦੇ ਸਨ ਪਰ ਸਮਝਦੇ ਨਹੀਂ ਸਨ। ਉਹ ਸੁਣਦੇ ਹਨ ਪਰ ਕਦੇ ਨਹੀਂ ਸਮਝਦੇ; ਉਹ ਵੇਖਦੇ ਹਨ ਪਰ ਕਦੇ ਬੁੱਝ ਨਹੀਂ ਪਾਉਂਦੇ (ਮੱਤੀ 13:14)। ਕਿਉਂ? ਕਿਉਂਕਿ ਕਿ ਉਨ੍ਹਾਂ ਨੇ ਆਪਣੇ ਦਿਲ ਕਠੋਰ ਕਰ ਲਏ ਹਨ। ਯਸਾਯਾਹ ਨੇ ਇਸ ਪ੍ਰਕਾਰ ਭਵਿੱਖਬਾਣੀ ਕੀਤੀ:

ਇਸ ਪਰਜਾ ਦਾ ਮਨ ਮੋਟਾ ਹੋ ਗਿਆ ਹੈ, ਉਹ ਕੰਨਾਂ ਨਾਲ ਉੱਚਾ ਸੁਣਦੇ ਹਨ, ਇੰਨ੍ਹਾਂ ਨੇ ਆਪਣੀਆਂ ਅੱਖਾਂ ਬੰਦ ਕਰ ਲਈਆਂ ਹਨ, ਮਤੇ ਉਹ ਅੱਖਾਂ ਨਾਲ ਵੇਖਣ ਅਤੇ ਕੰਨਾਂ ਨਾਲ ਸੁਣਨ, ਅਤੇ ਮਨ ਨਾਲ ਸਮਝਣ ਅਤੇ ਮੁੜ ਆਉਣ, ਅਤੇ ਮੈਂ ਇੰਨ੍ਹਾਂ ਨੂੰ ਚੰਗਾ ਕਰਾਂ (ਮੱਤੀ 13:15, ਯਸਾਯਾਹ 6:9 ਦਾ ਹਵਾਲਾ)।

ਦ੍ਰਿਸ਼ਟਾਂਤਾਂ ਦੇ ਦੁਆਰਾ ਯਿਸੂ ਉਨ੍ਹਾਂ ਨੂੰ ਸਿਖਾ ਸਕਦਾ ਸੀ ਜਿੰਨ੍ਹਾਂ ਦੇ ਕੰਨ ਖੁੱਲ੍ਹੇ ਸਨ।

ਮੱਤੀ 13 ਦੇ ਵਿੱਚ ਰਾਜ ਦੇ ਭੇਤਾਂ ਬਾਰੇ ਦ੍ਰਿਸ਼ਟਾਂਤਾਂ ਦੀ ਇੱਕ ਲੜੀ ਪੇਸ਼ ਕੀਤੀ ਗਈ ਹੈ (ਮੱਤੀ 13:11)। ਇਹ ਦ੍ਰਿਸ਼ਟਾਂਤ ਯਿਸੂ ਦੇ ਪੈਰੋਕਾਰਾਂ ਲਈ ਪਰਮੇਸ਼ੁਰ ਦੇ ਰਾਜ ਦੇ ਸੁਭਾਅ ਦਾ ਪ੍ਰਗਟੀਕਰਨ ਕਰਦੇ ਹਨ, ਜਦਕਿ ਇੰਨਾਂ ਦੁਆਰਾ ਅਵਿਸ਼ਵਾਸੀ ਆਗੂਆਂ ਤੋਂ ਬਹੁਤ ਸਾਰੀਆਂ ਗੱਲਾਂ ਲੁਕਾ ਲਈਆਂ ਜਾਂਦੀਆਂ ਹਨ।

► ਜਾਰੀ ਰੱਖਣ ਤੋਂ ਪਹਿਲਾਂ, ਰੁਕੋ ਅਤੇ ਮੱਤੀ 13:1-52 ਅਤੇ ਲੂਕਾ 19:11-27 ਪੜ੍ਹੋ। ਜਿਵੇਂ ਤੁਸੀਂ ਦ੍ਰਿਸ਼ਟਾਂਤਾਂ ਦਾ ਅਧਿਐਨ ਕਰਦੇ ਹੋ ਇੰਨ੍ਹਾਂ ਦੇ ਮੁੱਢਲੇ ਵਿਸ਼ਿਆਂ ਨੂੰ ਸੰਖੇਪ ਦੇ ਵਿੱਚ ਇੱਕ ਜਾਂ ਦੋ ਵਾਕਾਂ ਦੇ ਵਿੱਚ ਅੱਗੇ ਦਿੱਤੇ ਟੇਬਲ ਲਿਖੋ। ਹਰੇਕ ਦ੍ਰਿਸ਼ਟਾਂਤ ਦੇ ਵਿੱਚੋਂ ਅੱਜ ਦੀ ਸੇਵਕਾਈ ਦੇ ਲਈ ਇੱਕ ਲਾਗੂ ਕਰਨ ਵਾਲੀ ਗੱਲ ਦੀ ਭਾਲ ਕਰੋ। ਉਦਾਹਰਨ ਦੇ ਲਈ ਪਹਿਲੇ ਦ੍ਰਿਸ਼ਟਾਂਤ ਨੂੰ ਪੂਰਾ ਕੀਤਾ ਗਿਆ ਹੈ।

ਇੱਥੇ ਪ੍ਰਿੰਟ ਕਰਨ ਯੋਗ PDF ਹੈ।

ਬੀਜ਼ ਬੀਜ਼ਣ ਵਾਲੇ ਦਾ ਦ੍ਰਿਸ਼ਟਾਂਤ (ਮੱਤੀ 13:3-9, 18-23; ਲੂਕਾ 8:5-18)

ਰਾਜ ਦੇ ਬਾਰੇ ਇਸ ਲੜੀ ਪਹਿਲਾ ਦ੍ਰਿਸ਼ਟਾਂਤ ਸਿਖਾਉਂਦਾ ਹੈ ਕਿ ਬੀਜ਼ ਦੇ ਪ੍ਰਤੀ ਸਾਡੀ ਪ੍ਰਤੀਕਿਰਿਆ ਬੀਜ਼ ਦੇ ਫ਼ਲ ਪੈਦਾ ਕਰਨ ਨੂੰ ਨਿਰਧਾਰਿਤ ਕਰਦਾ ਹੈ। ਸਵਰਗ ਦੇ ਰਾਜ ਵਿੱਚ, ਕੁਝ ਵਿਸ਼ਵਾਸ ਕਰਨਗੇ ਅਤੇ ਫ਼ਲ ਲਿਆਉਣਗੇ ਜਦਕਿ ਦੂਸਰੇ ਵਿਸ਼ਵਾਸ ਕਰਨ ਤੋਂ ਇਨਕਾਰ ਕਰ ਦੇਣਗੇ ਜਾਂ ਪਹਿਲੀ ਪ੍ਰਤੀਕਿਰਿਆ ਤੋਂ ਬਾਅਦ ਡਿੱਗ ਪੈਣਗੇ।

ਇਸ ਦ੍ਰਿਸ਼ਟਾਂਤ ਨੂੰ ਮਿੱਟੀਆਂ ਦਾ ਦ੍ਰਿਸ਼ਟਾਂਤ ਕਿਹਾ ਜਾ ਸਕਦਾ ਹੈ ਕਿਉਂਕਿ ਇਹ ਵੱਖ-ਵੱਖ ਕਿਸਾਨਾਂ ਦਾ ਨਹੀਂ ਸਗੋਂ ਵੱਖ-ਵੱਖ ਤਰ੍ਹਾਂ ਦੀਆਂ ਜ਼ਮੀਨਾਂ ਦਾ ਦ੍ਰਿਸ਼ਟਾਂਤ ਹੈ। ਹਰੇਕ ਉਦਾਹਰਨ ਦੇ ਵਿੱਚ, ਬੀਜ਼ ਇੱਕ ਸਮਾਨ ਸਨ ਅਤੇ ਕਿਸਾਨ ਵੀ ਇੱਕ ਹੀ ਸੀ; ਅੰਤਰ ਜ਼ਮੀਨ ਦੇ ਵਿੱਚ ਹੀ ਸੀ। ਜਿਵੇਂ ਅਸੀਂ ਰਾਜ ਦੇ ਸੰਦੇਸ਼ ਦੀ ਘੋਸ਼ਣਾ ਕਰਦੇ ਹਾਂ, ਤਾਂ ਸਾਨੂੰ ਹੈਰਾਨ ਨਹੀਂ ਹੋਣਾ ਚਾਹੀਦਾ ਕਿ ਕੁਝ ਸੁਣਨ ਵਾਲੇ ਲੋਕ ਜਿਆਦਾ ਚੰਗੀ ਤਰ੍ਹਾਂ ਪ੍ਰਤੀਕਿਰਿਆ ਨਹੀਂ ਕਰਦੇ। ਇਸਦੇ ਨਾਲ ਸਾਨੂੰ ਨਿਰਾਸ਼ ਨਹੀਂ ਹੋਣਾ ਚਾਹੀਦਾ। ਯਿਸੂ ਨੇ ਸਿਖਾਇਆ ਕਿ ਕੁਝ ਸੁਣਨ ਵਾਲੇ ਫ਼ਲਦਾਇਕ ਜ਼ਮੀਨ ਹੋਣਗੇ ਜਦਕਿ ਦੂਸਰੇ ਲੋਕ ਵਚਨ ਦੇ ਸਾਹਮਣੇ ਆਪਣੇ ਆਪ ਨੂੰ ਕਠੋਰ ਕਰ ਲੈਣਗੇ।

ਬੀਜ਼ ਬੀਜ਼ਣ ਵਾਲੇ ਦੇ ਦ੍ਰਿਸ਼ਟਾਂਤ ਦੇ ਪ੍ਰਤੀ ਲੂਕਾ ਦੀ ਸਮਾਪਤੀ ਵਿਖਾਉਂਦੀ ਹੈ ਕਿ ਇਹ ਦ੍ਰਿਸ਼ਟਾਂਤ ਸਚਿਆਈ ਨੂੰ ਸੁਣਨ ਦੇ ਬਾਰੇ ਹੈ। “ਇਸ ਕਰਕੇ ਚੌਕਸ ਰਹੋ ਜੋ ਕਿਸ ਤਰਾਂ ਸੁਣਦੇ ਹੋ ਕਿਉਂਕਿ ਜਿਹ ਦੇ ਕੋਲ ਕੁਝ ਹੋਵੇ ਉਹ ਨੂੰ ਦਿੱਤਾ ਜਾਵੇਗਾ ਅਤੇ ਜਿਹ ਦੇ ਕੋਲ ਨਾ ਹੋਵੇ ਉਸ ਤੋਂ ਉਹ ਵੀ ਜੋ ਉਹ ਆਪਣੀ ਜਾਚ ਵਿੱਚ ਰੱਖਦਾ ਹੈ ਲੈ ਲਿਆ ਜਾਵੇਗਾ” (ਲੂਕਾ 8:18)। ਜਦੋਂ ਕੋਈ ਵਿਅਕਤੀ ਸਚਿਆਈ ਦੇ ਪ੍ਰਤੀ ਸਕਰਾਤਮਕਤਾ ਦੇ ਨਾਲ ਪ੍ਰਤੀਕਿਰਿਆ ਕਰਦੇ ਹਨ, ਤਾਂ ਉਨ੍ਹਾਂ ਨੂੰ ਹੋਰ ਜਿਆਦਾ ਸਚਿਆਈ ਪ੍ਰਾਪਤ ਹੁੰਦੀ ਹੈ। ਉਪਦੇਸ਼ ਦੇ ਵਿੱਚ ਹੋਰ ਦ੍ਰਿਸ਼ਟਾਂਤ ਦੇਣ ਤੋਂ ਪਹਿਲਾਂ ਯਿਸੂ ਨੇ ਆਪਣੇ ਸ੍ਰੋਤਿਆਂ ਨੂੰ ਸਿਖਾਇਆ ਕਿ ਫ਼ਲਦਾਇਕ ਜ਼ਮੀਨ ਦੇ ਤੌਰ ਤੇ ਕਿਵੇਂ ਸੁਣਨਾ ਚਾਹੀਦਾ ਹੈ।

ਜੰਗਲੀ ਬੂਟੀ ਦਾ ਦ੍ਰਿਸ਼ਟਾਂਤ (ਮੱਤੀ 13:24-30, 36-43)

ਯਹੂਦੀ ਲੋਕਾਂ ਦੀ ਉਮੀਦ ਸੀ ਕਿ ਪਰਮੇਸ਼ੁਰ ਦਾ ਰਾਜ ਦੁਸ਼ਟਾਂ ਦੇ ਉੱਤੇ ਜਲਦੀ ਦੇ ਨਾਲ ਸਜ਼ਾ ਲੈ ਕੇ ਆਵੇਗਾ। ਯਿਸੂ ਨੇ ਆਪਣੇ ਚੇਲ੍ਹਿਆਂ ਨੂੰ ਅਜਿਹੇ ਸਮੇਂ ਦੇ ਲਈ ਤਿਆਰ ਕੀਤਾ ਜਿੱਥੇ ਵਿਸ਼ਵਾਸੀ ਅਤੇ ਅਵਿਸ਼ਵਾਸੀ ਦੋਵੇਂ ਸੰਸਾਰ ਦੇ ਵਿੱਚ ਇਕੱਠੇ ਰਹਿਣਗੇ। ਇਸ ਕਹਾਣੀ ਦੇ ਵਿੱਚ ਖੇਤ ਸੰਸਾਰ ਹੈ (ਮੱਤੀ 13:38)। ਸਿਰਫ਼ ਸੰਸਾਰ ਦੇ ਅੰਤ ਵਿੱਚ ਹੀ ਸਵਰਗਦੂਤ ਜੰਗਲੀ ਬੂਟੀ ਨੂੰ ਇਕੱਠਿਆਂ ਕਰਨਗੇ ਅਤੇ ਉਨ੍ਹਾਂ ਨੂੰ ਅੱਗ ਦੇ ਨਾਲ ਸਾੜਣਗੇ (ਮੱਤੀ 13:40)। ਪਰਮੇਸ਼ੁਰ ਦਾ ਰਾਜ ਪਰਮੇਸ਼ੁਰ ਦੇ ਸਮੇਂ ਵਿੱਚ ਵਿਕਸਿਤ ਹੋਵੇਗਾ ਨਾ ਕਿ ਮਨੁੱਖ ਦੇ ਸਮੇਂ ਵਿੱਚ।

ਰਾਈ ਦੇ ਦਾਣੇ ਦਾ ਦ੍ਰਿਸ਼ਟਾਂਤ (ਮੱਤੀ 13:31-32)

ਕੋਈ ਵੀ ਯਿਸੂ ਦੀ ਧਰਤੀ ਤੇ ਕੀਤੀ ਸੇਵਕਾਈ ਨੂੰ ਵੇਖ ਕੇ ਭਵਿੱਖ ਦੇ ਵਿੱਚ ਸੰਸਾਰ ਭਰ ਦੇ ਵਿੱਚ ਕਲੀਸਿਆ ਦੇ ਫੈਲ ਜਾਣ ਦੇ ਬਾਰੇ ਨਹੀਂ ਕਹਿ ਸਕਦਾ ਸੀ। ਚੇਲ੍ਹੇ ਅਣਪੜ, ਗ਼ਰੀਬ ਅਤੇ ਡਰੇ ਹੋਏ ਸਨ। ਉਨ੍ਹਾਂ ਦੇ ਕੋਲ ਸ਼ਕਤੀ, ਸਮਾਜਿਕ ਰੁਤਬਾ ਜਾਂ ਰਾਜਨੀਤਿਕ ਤਾਕਤ ਨਹੀਂ ਸੀ। ਉਹ ਛੋਟੇ ਜਿਹੇ ਰਾਈ ਦੇ ਦਾਣੇ ਦੇ ਸਮਾਨ ਸਨ। ਪਰ ਜਿਵੇਂ ਰਾਈ ਦਾ ਛੋਟਾ ਦਾਣਾ ਇੱਕ ਵੱਡਾ ਬੂਟਾ ਜਾਂ ਝਾੜੀ ਬਣ ਜਾਂਦਾ ਹੈ, ਉਸੇ ਪ੍ਰਕਾਰ ਪਰਮੇਸ਼ੁਰ ਦਾ ਰਾਜ ਸਾਰੇ ਸੰਸਾਰ ਤੱਕ ਪਹੁੰਚ ਜਾਵੇਗਾ।

ਯਿਸੂ ਦੇ ਸ੍ਰੋਤੇ ਉਸਨੂੰ ਪਰਮੇਸ਼ੁਰ ਦੇ ਰਾਜ ਦੀ ਰਾਈ ਦੇ ਦਾਣੇ ਨਾਲ ਤੁਲਨਾ ਕਰਦੇ ਹੋਏ ਸੁਣ ਕੇ ਬਹੁਤ ਹੈਰਾਨ ਹੋਏ ਹੋਣਗੇ। ਯਹੂਦੀ ਧਰਮ ਗੁਰੂਆਂ ਦੀ ਉਮੀਦ ਸੀ ਕਿ ਪਰਮੇਸ਼ੁਰ ਦਾ ਰਾਜ ਮਹਿਮਾ ਅਤੇ ਸ਼ਕਤੀ ਦੇ ਵਿੱਚ ਆਵੇਗਾ। ਉਹ ਪਾਪੀਆਂ ਦੇ ਉੱਤੇ ਸਜ਼ਾ ਦੇ ਪ੍ਰਗਟਾਵੇ ਦੀ ਉਮੀਦ ਕਰ ਰਹੇ ਸਨ; ਉਨ੍ਹਾਂ ਨੇ ਰੋਮ ਦੇ ਵਿਰੁੱਧ ਇੱਕ ਸੈਨਿਕ ਬਗਾਵਤ ਦੀ ਉਮੀਦ ਕੀਤੀ; ਉਹ ਯਹੂਦੀ ਰਾਜ ਦੀ ਸਥਾਪਨਾ ਦੇ ਸਮੇਂ ਸਮਾਜਿਕ ਉਥਲ-ਪੁਥਲ ਦੀ ਉਮੀਦ ਕਰ ਰਹੇ ਸਨ। ਇਸਦੇ ਬਜਾਏ ਯਿਸੂ ਨੇ ਆਪਣੇ ਚੇਲ੍ਹਿਆਂ ਨੂੰ ਇੱਕ ਘੱਟ ਆਕਰਸ਼ਨ ਵਾਲੀ ਸ਼ੁਰੂਆਤ ਦੇ ਲਈ ਤਿਆਰ ਕੀਤਾ।

ਜਦੋਂ ਅਸੀਂ ਨਵੇਂ ਨੇਮ ਨੂੰ ਪੜਦੇ ਹਾਂ, ਤਾਂ ਅਸੀਂ ਪਹਿਲੀ ਸਦੀ ਦੇ ਵਿੱਚ ਯਹੂਦਿਆ ਦੇ ਗ਼ੈਰ-ਮਹੱਤਵ ਬਾਰੇ ਭੁੱਲ ਸਕਦੇ ਹਾਂ। ਯਹੂਦਿਆ ਨਵੇਂ ਨੇਮ ਦਾ ਕੇਂਦਰ ਹੈ, ਪਰ ਇਹ ਪਹਿਲੀ ਸਦੀ ਦੇ ਕੇਂਦਰ ਨਾਲੋਂ ਬਹੁਤ ਦੂਰ ਸੀ। ਆਪਣੇ ਦੇਸ਼ ਦੀ ਰਾਜਧਾਨੀ ਵਾਲੇ ਸ਼ਹਿਰ ਦੇ ਬਾਰੇ ਸੋਚੋ। ਪਹਿਲੀ ਸਦੀ ਦੇ ਵਿੱਚ ਯਹੂਦਿਆ ਦੀ ਅਜਿਹੀ ਭੂਮਿਕਾ ਨਹੀਂ ਸੀ; ਇਹ ਭੂਮਿਕਾ ਰੋਮ ਦੇ ਕੋਲ ਸੀ। ਕਿਸੇ ਅਜਿਹੇ ਸ਼ਹਿਰ ਦੇ ਬਾਰੇ ਸੋਚੋ ਜਿੱਥੇ ਬਹੁਤ ਵੱਡਾ ਵਿਸ਼ਵਵਿਦਿਆਲੇ ਅਤੇ ਸਿੱਖਿਆ ਪ੍ਰਣਾਲੀ ਹੋਵੇ। ਪਹਿਲੀ ਸਦੀ ਦੇ ਵਿੱਚ ਇਹ ਯਹੂਦਿਆ ਦੀ ਭੂਮਿਕਾ ਨਹੀਂ ਸੀ; ਇਹ ਭੂਮਿਕਾ ਅਥੈਨੇ ਅਤੇ ਸਿਕੰਦਰੀਆ ਦੇ ਕੋਲ ਸੀ।

ਸੰਸਾਰ ਦੇ ਬਾਕੀ ਦੇਸ਼ਾਂ ਦੇ ਸੰਬੰਧ ਵਿੱਚ, ਯਹੂਦਿਆ ਰਾਜਨੀਤਿਕ ਤੌਰ ਤੇ ਬਹੁਤ ਮਹੱਤਵਪੂਰਨ ਨਹੀਂ ਸੀ; ਇਹ ਆਰਥਿਕ ਤੌਰ ਤੇ ਮਹੱਤਵਪੂਰਨ ਨਹੀਂ ਸੀ; ਇਹ ਸਮਾਜਿਕ ਤੌਰ ਤੇ ਮਹੱਤਵਪੂਰਨ ਨਹੀਂ ਸੀ। ਆਪਣੇ ਦੇਸ਼ ਦੇ ਸਭ ਤੋਂ ਮਹੱਤਵਪੂਰਨ ਇਲਾਕੇ ਦੇ ਬਾਰੇ ਸੋਚੋ; ਰੋਮੀ ਸਾਮਰਾਜ ਦੇ ਵਿੱਚ ਇਹ ਸਥਾਨ ਯਹੂਦਿਆ ਨਹੀਂ ਸੀ।

ਰਾਈ ਦੇ ਦਾਣੇ ਦਾ ਦ੍ਰਿਸ਼ਟਾਂਤ ਨੇ ਵਿਖਾਇਆ ਇਕ ਕਿ ਪਰਮੇਸ਼ੁਰ ਦਾ ਰਾਜ ਮਨੁੱਖਾਂ ਦੇ ਛੋਟੇ ਜਿਹੇ ਝੁੰਡ ਜੋ ਰੋਮੀ ਸਾਮਰਾਜ ਦੇ ਪਿੱਛੜੇ ਹੋਏ ਕੋਨੇ ਵਿੱਚ ਉਸ ਤੋਂ ਇੱਕ ਅਜਿਹਾ ਰੁੱਖ ਬਣਿਆ ਜੋ ਸਾਰੇ ਦੇਸ਼ਾਂ ਤੱਕ ਪਹੁੰਚ ਗਿਆ।[1] ਯਹੂਦੀ ਧਰਮ ਗੁਰੂ ਸੋਚਦੇ ਸਨ ਕਿ ਪਰਮੇਸ਼ੁਰ ਦਾ ਰਾਜ ਸਿਰਫ਼ ਯਹੂਦੀਆਂ ਤੱਕ ਹੀ ਸੀਮਿਤ ਰਹੇਗਾ; ਯਿਸੂ ਨੇ ਸਿਖਾਇਆ ਕਿ ਪਰਮੇਸ਼ੁਰ ਦਾ ਰਾਜ ਧਰਤੀ ਦੇ ਬੰਨ੍ਹਿਆਂ ਤੱਕ ਪਹੁੰਚ ਜਾਵੇਗਾ।

ਖ਼ਮੀਰ ਦਾ ਦ੍ਰਿਸ਼ਟਾਂਤ (ਮੱਤੀ 13:33)

ਖ਼ਮੀਰ ਦਾ ਦ੍ਰਿਸ਼ਟਾਂਤ ਵੀ ਰਾਜ ਦੇ ਅਲੋਕਿਕ ਵਾਧੇ ਨੂੰ ਦਰਸਾਉਂਦਾ ਹੈ। ਯਿਸੂ ਨੇ ਰਾਜ ਦੇ ਵਾਧੇ ਨੂੰ ਦਰਸਾਉਣ ਦੇ ਲਈ ਖ਼ਮੀਰ ਦੇ ਚਿੰਨ੍ਹ ਦਾ ਉਪਯੋਗ ਕੀਤਾ। ਆਟੇ ਦੇ ਤਿੰਨ ਮਾਪ 100 ਲੋਕਾਂ ਲਈ ਰੋਟੀ ਪੈਦਾ ਕਰ ਦਿੰਦੇ ਸਨ। ਇਸਦੀ ਛੋਟੀ ਸ਼ੁਰੂਆਤ ਦੇ ਬਾਵਜੂਦ, ਰਾਜ ਇੱਕ ਸਮਰੱਥੀ ਸ਼ਕਤੀ ਦੇ ਬਦਲ ਜਾਵੇਗਾ।

ਖ਼ਮੀਰ ਦਾ ਦ੍ਰਿਸ਼ਟਾਂਤ ਰਾਜ ਦੇ ਸਥਿਰ ਵਾਧੇ ਨੂੰ ਵਿਖਾਉਂਦਾ ਹੈ। ਖ਼ਮੀਰ ਨਾਟਕੀ ਨਹੀਂ ਹੈ; ਇਹ ਬਰੂਦ ਵਾਂਗ ਫਟਦਾ ਨਹੀਂ ਹੈ; ਇਹ ਚੁੱਪਚਾਪ ਰੋਟੀ ਦੇ ਰਾਹੀਂ ਆਪਣਾ ਕੰਮ ਕਰਦਾ ਹੈ। ਯਹੂਦੀ ਧਰਮ ਗੁਰੂਆਂ ਨੇ ਸੋਚਿਆ ਕਿ ਪਰਮੇਸ਼ੁਰ ਦਾ ਰਾਜ ਸੰਸਾਰ ਭਰ ਦੇ ਵਿੱਚ ਚਿੰਨ੍ਹਾਂ ਦੇ ਦੁਆਰਾ ਅਰੰਭ ਹੋਵੇਗਾ; ਯਿਸੂ ਨੇ ਵਿਖਾਇਆ ਕਿ ਰਾਜ ਹੌਲੀ-ਹੌਲੀ ਪਰ ਸਥਿਰਤਾ ਦੇ ਨਾਲ ਵਧੇਗਾ, ਜਦੋਂ ਤੱਕ ਇਹ ਪੂਰੇ ਸੰਸਾਰ ਤੱਕ ਨਾ ਪਹੁੰਚ ਜਾਏ।

ਲੁਕੇ ਹੋਏ ਧਨ ਅਤੇ ਬਹੁ-ਕੀਮਤੀ ਮੋਤੀ ਦਾ ਦ੍ਰਿਸ਼ਟਾਂਤ (ਮੱਤੀ 13:44-46)

ਇਹ ਦ੍ਰਿਸ਼ਟਾਂਤ ਰਾਜ ਦੇ ਅਨੰਦ ਦੇ ਬਾਰੇ ਹਨ। ਦੋਵਾਂ ਦੇ ਵਿੱਚ ਇੱਕ ਮਨੁੱਖ ਨੇ ਕੁਝ ਅਜਿਹਾ ਬਹੁ-ਕੀਮਤੀ ਲੱਭਿਆ ਕਿ ਉਸਨੇ ਸਭ ਕੁਝ ਵੇਚ ਕੇ ਇਸਨੂੰ ਖ਼ਰੀਦ ਲਿਆ। ਇਸ ਦ੍ਰਿਸ਼ਟਾਂਤ ਦਾ ਧਿਆਨ ਮਨੁੱਖ ਦੇ ਬਲੀਦਾਨ ਦੇ ਬਾਰੇ ਨਹੀਂ ਹੈ, ਪਰ ਕੁਝ ਬਹੁ-ਕੀਮਤੀ ਮਿਲ ਜਾਣ ਦੇ ਕਾਰਨ ਉਸਦੇ ਅਨੰਦ ਦੇ ਬਾਰੇ ਹੈ। ਉਹ ਆਪਣੇ ਅਨੰਦ ਦੇ ਵਿੱਚ ਜਾਂਦਾ ਹੈ ਅਤੇ ਸਭ ਕੁਝ ਵੇਚ ਦਿੰਦਾ ਹੈ! ਸੱਚੇ ਚੇਲ੍ਹੇ ਸਭ ਕੁਝ ਛੱਡ ਕੇ ਯਿਸੂ ਦੇ ਪਿੱਛੇ ਚੱਲਣ ਦੇ ਵਿੱਚ ਅਨੰਦ ਮਨਾਉਂਦੇ ਹਨ।

ਇਹ ਦ੍ਰਿਸ਼ਟਾਂਤ ਰਾਜ ਦੇ ਵੱਡੇ ਮੁੱਲ ਨੂੰ ਵਿਖਾਉਂਦੇ ਹਨ। ਪਰਮੇਸ਼ੁਰ ਦਾ ਰਾਜ ਸਾਡੇ ਜੀਵਨ ਦੇ ਹਰੇਕ ਰਵੱਈਏ ਨੂੰ ਪ੍ਰਭਾਵਿਤ ਕਰਦਾ ਹੈ। ਇੱਕ ਹੋਰ ਸਥਾਨ ਤੇ ਯਿਸੂ ਨੇ ਕਿਹਾ, “ਅਤੇ ਜੇ ਤੇਰੀ ਅੱਖ ਤੈਨੂੰ ਠੋਕਰ ਖੁਆਵੇ ਤਾਂ ਉਹ ਨੂੰ ਕੱਢ ਸੁੱਟ। ਕਾਣਾ ਹੋਕੇ ਪਰਮੇਸ਼ੁਰ ਦੇ ਰਾਜ ਵਿੱਚ ਵੜਨਾ ਤੇਰੇ ਲਈ ਇਸ ਨਾਲੋਂ ਭਲਾ ਹੈ ਜੋ ਦੋ ਅੱਖਾਂ ਹੁੰਦਿਆਂ ਤੂੰ ਨਰਕ ਵਿੱਚ ਸੁੱਟਿਆ ਜਾਵੇਂ” (ਮਰਕੁਸ 9:47)। ਪਰਮੇਸ਼ੁਰ ਦੇ ਰਾਜ ਵਿੱਚ ਦਾਖਲਾ ਧਰਤੀ ਤੇ ਕੀਤੇ ਜਾਣ ਵਾਲੇ ਕਿਸੇ ਵੀ ਬਲੀਦਾਨ ਦੇ ਯੋਗ ਹੈ।

ਜਾਲ਼ ਦਾ ਦ੍ਰਿਸ਼ਟਾਂਤ (ਮੱਤੀ 13:47-50)

ਗਲੀਲ ਦੀ ਝੀਲ ਉੱਤੇ ਮੱਛੀਆਂ ਫੜਨ ਵਾਲੀਆਂ ਬੇੜੀਆਂ ਇੱਕ ਵੱਡੇ ਜਾਲ ਨੂੰ ਘਸੀਟਦੀਆਂ ਸਨ, ਜਿਸ ਵਿੱਚ ਖਾਣਯੋਗ ਮੱਛੀਆਂ ਅਤੇ ਨਾ ਖਾਣ ਯੋਗ ਦੋਵੇਂ ਫਸ ਜਾਂਦੇ ਸਨ। ਕਿਨਾਰੇ ਤੇ ਵਾਪਸ ਆਉਣ ਤੋਂ ਬਾਅਦ, ਮਛੇਰੇ ਚੰਗੀ ਮੱਛੀ ਨੂੰ ਮਾੜੀਆਂ ਤੋਂ ਵੱਖ ਕਰ ਦਿੰਦੇ ਸਨ।

ਜੰਗਲੀ ਬੂਟੀ ਦੇ ਦ੍ਰਿਸ਼ਟਾਂਤ ਦੀ ਤਰ੍ਹਾਂ, ਇਸ ਦ੍ਰਿਸ਼ਟਾਂਤ ਦੇ ਚੇਲ੍ਹਿਆਂ ਨੂੰ ਯਾਦ ਦਿਵਾਇਆ ਕਿ ਯੁੱਗ ਦੇ ਅੰਤ ਸਮੇਂ ਨਿਆਂ ਹੋਵੇਗਾ। ਇੱਕ ਜਲਦੀ ਆ ਜਾਣ ਵਾਲੇ ਨਿਆਂ ਦੀ ਉਮੀਦ ਕਰਨ ਦੀ ਬਜਾਏ, ਉਨ੍ਹਾਂ ਨੂੰ ਇਹ ਜਾਣਦੇ ਹੋਏ ਰਾਜ ਦਾ ਪ੍ਰਚਾਰ ਕਰਨਾ ਚਾਹੀਦਾ ਹੈ ਕਿ ਪਰਮੇਸ਼ੁਰ ਆਪਣੇ ਸਮੇਂ ਦੇ ਵਿੱਚ ਧਰਮੀਆਂ ਅਤੇ ਬੁਰਿਆਂ ਦਾ ਨਿਆਂ ਕਰੇਗਾ। ਇੱਕ ਅੰਤਿਮ ਨਿਆਂ ਹੋਵੇਗਾ ਜਿਸ ਵਿੱਚ ਚੰਗਿਆਂ ਨੂੰ ਬੁਰਿਆਂ ਤੋਂ ਅਲੱਗ ਕੀਤਾ ਜਾਵੇਗਾ, ਪਰ ਸਾਨੂੰ ਇਸਦਾ ਸਮਾਂ ਪਰਮੇਸ਼ੁਰ ਦੇ ਹੱਥਾਂ ਵਿੱਚ ਛੱਡ ਦੇਣਾ ਚਾਹੀਦਾ ਹੈ।

ਘਰ ਦੇ ਸੁਆਮੀ ਦਾ ਦ੍ਰਿਸ਼ਟਾਂਤ (ਮੱਤੀ 13:51-52)

ਯਿਸੂ ਨੇ ਦ੍ਰਿਸ਼ਟਾਂਤਾਂ ਦੀ ਇਹ ਲੜੀ ਚੇਲ੍ਹਿਆਂ ਨੂੰ ਇਹ ਸਿਖਾਉਂਦੇ ਹੋਏ ਅਰੰਭ ਕੀਤੀ ਸੀ ਕਿ ਉਹ ਫ਼ਲਦਾਇਕ ਜ਼ਮੀਨ ਹੋਣੇ ਚਾਹੀਦੇ ਹਨ। ਉਸਨੇ ਇਸ ਲੜੀ ਦੀ ਸਮਾਪਤੀ ਦੂਸਰਿਆਂ ਦੇ ਨਾਲ ਸਾਂਝਾ ਕਰਨ ਦੀ ਜਿੰਮੇਵਾਰੀ ਬਾਰੇ ਸਿਖਾਉਂਦੇ ਹੋਏ ਕੀਤੀ। ਸਿਖਲਾਈ ਪਾਏ ਹੋਏ ਹਰੇਕ ਗ੍ਰੰਥੀ ਦੇ ਲਈ ਇਹ ਜਰੂਰੀ ਸੀ ਕਿ ਉਹ ਆਪਣੇ ਗਿਆਨ ਦੇ ਖਜ਼ਾਨੇ ਵਿੱਚੋਂ ਦੂਸਰਿਆਂ ਨੂੰ ਕੁਝ ਸਿਖਾਵੇ। ਅਸੀਂ ਸਿਰਫ਼ ਆਪਣੇ ਫਾਇਦੇ ਦੇ ਲਈ ਹੀ ਨਹੀਂ ਸਿੱਖਦੇ। ਚੇਲ੍ਹਿਆਂ ਨੂੰ ਸਿਖਲਾਈ ਦਿੱਤੀ ਗਈ ਤਾਂ ਕਿ ਉਹ ਦੂਸਰਿਆਂ ਚੇਲ੍ਹਿਆਂ ਨੂੰ ਸਿਖਲਾਈ ਦੇ ਸਕਣ।

ਦਸ ਅਸ਼ਰਫ਼ੀਆਂ ਦਾ ਦ੍ਰਿਸ਼ਟਾਂਤ34F34F[2] (ਲੂਕਾ 19:11-27)

► ਪੜ੍ਹੋ ਲੂਕਾ 19:11-27

ਇਹ ਦ੍ਰਿਸ਼ਟਾਂਤ ਲੂਕਾ ਦੇ ਵਿੱਚ ਹੈ, ਪਰ ਮੱਤੀ ਅਜਿਹੇ ਹੀ ਇੱਕ ਦ੍ਰਿਸ਼ਟਾਂਤ ਨੂੰ ਯਿਸੂ ਦੇ ਜੈਤੂਨ ਪਹਾੜ ਵਾਲੇ ਉਪਦੇਸ਼ ਵਿੱਚ ਦੱਸਦਾ ਹੈ। ਯਿਸੂ ਨੇ ਦਸ ਅਸ਼ਰਫ਼ੀਆਂ ਦਾ ਦ੍ਰਿਸ਼ਟਾਂਤ ਉਸ ਸਮੇਂ ਦਿੱਤਾ ਜਦੋਂ ਉਹ ਯਰੂਸ਼ਲਮ ਦੇ ਨੇੜੇ ਸੀ, ਕਿਉਂਕਿ ਲੋਕ ਸੋਚ ਰਹੇ ਸਨ ਕਿ ਪਰਮੇਸ਼ੁਰ ਦਾ ਰਾਜ ਜਲਦੀ ਨਾਲ ਆ ਜਾਵੇਗਾ (ਲੂਕਾ 19:11)।

ਜਿਵੇਂ ਹੀ ਯਿਸੂ ਯਰੂਸ਼ਲਮ ਦੇ ਨੇੜੇ ਪਹੁੰਚਿਆ, ਤਾਂ ਲੋਕਾਂ ਦੀ ਇੱਕ ਰਾਜਨੀਤਿਕ ਮਸੀਹ ਦੀ ਉਮੀਦ ਦੀ ਉਤਸੁਕਤਾ ਬਹੁਤ ਜਿਆਦਾ ਵੱਧ ਗਈ। ਯਿਸੂ ਨੇ ਇਹ ਦ੍ਰਿਸ਼ਟਾਂਤ ਆਪਣੇ ਚੇਲ੍ਹਿਆਂ ਨੂੰ ਇਹ ਸਿਖਾਉਣ ਦੇ ਲਈ ਦਿੱਤਾ ਕਿ ਉਹ ਰਾਜ ਦੇ ਲਈ ਉਡੀਕ ਕਰਦੇ ਹੋਏ ਵਫ਼ਾਦਾਰੀ ਵਿੱਚ ਬਣੇ ਰਹਿਣ। ਉਨ੍ਹਾਂ ਨੂੰ ਸੁਆਮੀ ਦੁਆਰਾ ਦਿੱਤੀ ਚੀਜ਼ ਨੂੰ ਲੁਕਾਉਣ ਦੀ ਜਰੂਰਤ ਨਹੀਂ ਸੀ, ਇਸਦੀ ਬਜਾਏ ਉਨ੍ਹਾਂ ਨੂੰ ਆਪਣੇ ਸ੍ਰੋਤਾਂ ਦਾ ਉਪਯੋਗ ਰਾਜ ਦੇ ਵਾਧੇ ਲਈ ਕਰਨਾ ਚਾਹੀਦਾ ਹੈ।

► ਪੜ੍ਹੋ ਮੱਤੀ 24-25

ਯਿਸੂ ਦੀ ਅਰੰਭਿਕ ਸਿੱਖਿਆ ਦੇ ਵਿੱਚ ਜਿਆਦਾਤਰ ਰਾਜ ਦੀ ਸ਼ੁਰੂਆਤ ਦੇ ਧਿਆਨ ਦਿੱਤਾ ਗਿਆ। ਜਿਵੇਂ ਹੀ ਉਹ ਧਰਤੀ ਤੇ ਆਪਣੀ ਸੇਵਕਾਈ ਦੇ ਅੰਤ ਤੱਕ ਪਹੁੰਚਿਆ, ਤਾਂ ਯਿਸੂ ਨੇ ਜਿਆਦਾ ਭਵਿੱਖ ਸੰਬੰਧੀ ਰਾਜ ਦੀ ਸੰਪੂਰਨ ਸਥਾਪਨਾ ਸੰਬੰਧੀ ਗੱਲ ਕੀਤੀ। ਮੱਤੀ 24 ਅਤੇ 25 ਵਿੱਚ ਜੈਤੂਨ ਪਹਾੜ ਤੇ ਦਿੱਤਾ ਉਪਦੇਸ਼ ਰਾਜ ਦੇ ਵਾਇਦਿਆਂ ਦੀ ਭਵਿੱਖ ਦੇ ਵਿੱਚ ਪੂਰੇ ਹੋਣ ਬਾਰੇ ਯਿਸੂ ਦੀ ਬਹੁਤ ਹੀ ਵਿਖਿਆਤਮਕ ਸਿੱਖਿਆ ਹੈ।

19 ਈ.ਪੂ ਦੇ ਵਿੱਚ ਹੇਰੋਦੇਸ ਨੇ ਹੈਕਲ ਦੇ ਵੱਡੇ ਨਵੀਨੀਕਰਨ ਦੀ ਸ਼ੁਰੂਆਤ ਕੀਤੀ।[1] 516 ਈ.ਪੂ ਵਿੱਚ ਜ਼ਰੂੱਬਾਬਲ ਦੁਆਰਾ ਬਣਾਈ ਹੈਕਲ ਸੁਲੇਮਾਨ ਦੀ ਪਹਿਲੀ ਹੈਕਲ ਨਾਲੋਂ ਛੋਟੀ ਅਤੇ ਸਾਧਾਰਣ ਸੀ। ਹੇਰੋਦੇਸ ਦਾ ਇਰਾਦਾ ਸੀ ਕਿ ਉਹ ਇਸਨੂੰ ਇਸਦੀ ਅਰੰਭਿਕ ਸੁੰਦਰਤਾ ਵਿੱਚ ਲਿਆਵੇ। ਉਸਨੇ ਇੱਕ ਉਸਾਰੀ ਦਾ ਕੰਮ ਸ਼ੁਰੂ ਕੀਤਾ ਜੋ 80 ਸਾਲ ਚੱਲਿਆ। ਉਸਨੇ 10,000 ਗੁਣੀ ਕਾਮਿਆਂ ਨੂੰ ਉਸਾਰੀ ਦੇ ਕੰਮ ਤੇ ਲਗਾਇਆ ਅਤੇ ਹੈਕਲ ਦੇ ਉਨ੍ਹਾਂ ਹਿੱਸਿਆਂ ਵਿੱਚ ਕੰਮ ਕਰਨ ਲਈ 1,000 ਲੇਵੀਆਂ ਨੂੰ ਸਿਖਲਾਈ ਦਿੱਤੀ ਜਿੱਥੇ ਸਿਰਫ਼ ਜਾਜਕ ਹੀ ਜਾ ਸਕਦੇ ਸਨ।

ਹੇਰੋਦੇਸ ਨੂੰ ਉਮੀਦ ਸੀ ਕਿ ਉਹ ਸੰਸਾਰ ਦੇ ਵਿੱਚ ਸਭ ਤੋਂ ਵੱਡੀ ਹੈਕਲ ਦੀ ਉਸਾਰੀ ਕਰਨ ਵਾਲੇ ਵੱਜੋਂ ਜਾਣਿਆ ਜਾਵੇਗਾ। ਯਿਸੂ ਦੀ ਸੇਵਕਾਈ ਦੇ ਸਮੇਂ ਇਹ ਕੰਮ 46 ਸਾਲਾਂ ਤੋਂ ਚੱਲ ਰਿਹਾ ਸੀ (ਯੂਹੰਨਾ 2:20)। ਪੂਰੀ ਹੈਕਲ 63 ਏ.ਡੀ ਦੇ ਵਿੱਚ ਸੰਪੂਰਨ ਹੋਈ ਅਤੇ ਸੱਤ ਸਾਲਾਂ ਦੇ ਬਾਅਦ 70 ਏ.ਡੀ ਦੇ ਵਿੱਚ ਰੋਮੀ ਸੈਨਾਪਤੀ ਟਾਈਟਸ ਦੁਆਰਾ ਯਰੂਸ਼ਲਮ ਦੀ ਘੇਰਾਬੰਦੀ ਦੇ ਸਮੇਂ ਇਸਨੂੰ ਬਰਬਾਦ ਕਰ ਦਿੱਤਾ ਗਿਆ।

ਹੇਰੋਦੇਸ ਦੁਆਰਾ ਬਣਾਈ ਹੈਕਲ ਦਾ ਆਕਾਰ ਸੁਲੇਮਾਨ ਦੀ ਹੈਕਲ ਨਾਲੋਂ ਦੋ ਗੁਣਾ ਜਿਆਦਾ ਸੀ, ਜਿਸਦੇ ਵਿੱਚ ਪਰਬਾਂ ਦੇ ਸਮੇਂ ਯਰੂਸ਼ਲਮ ਵਿੱਚ ਆਉਣ ਵਾਲੇ ਹਜ਼ਾਰਾਂ ਯਹੂਦੀ ਸ਼ਰਧਾਲੂਆਂ ਦੇ ਲਈ ਬਹੁਤ ਸਾਰਾ ਸਥਾਨ ਸੀ। ਇਹ ਰੋਮੀ ਸਾਮਰਾਜ ਦਾ ਇੱਕ ਬਹੁਤ ਮਹਾਨ ਅਜੂਬਾ ਸੀ।

ਯਰੂਸ਼ਲਮ ਦੇ ਵਿੱਚ ਯਿਸੂ ਦੇ ਆਖਰੀ ਹਫ਼ਤੇ ਦੇ ਦੌਰਾਨ, ਚੇਲ੍ਹਿਆਂ ਨੇ ਉਸਦੇ ਵੱਲ ਹੈਕਲ ਦੀਆਂ ਇਮਾਰਤਾਂ ਬਾਰੇ ਸੰਕੇਤ ਕੀਤਾ। ਕਿਉਂਕਿ ਹੈਕਲ ਦਾ ਕੰਮ ਅਜੇ ਵੀ ਚੱਲ ਰਿਹਾ ਸੀ, ਉਹ ਸ਼ਾਇਦ ਕਿਸੇ ਅਜਿਹੀ ਵਿਸ਼ੇਸ਼ਤਾ ਦੀ ਗੱਲ ਕਰ ਰਹੇ ਸਨ ਜੋ ਹੈਕਲ ਦੇ ਵਿੱਚ ਉਨ੍ਹਾਂ ਦੀ ਪਿੱਛਲੀ ਫੇਰੀ ਤੋਂ ਬਾਅਦ ਬਦਲ ਚੁੱਕੀ ਸੀ।

ਯਿਸੂ ਨੇ ਹੈਕਲ ਦੀ ਤਬਾਹੀ ਦੇ ਬਾਰੇ ਭਵਿੱਖਬਾਣੀ ਕਰਦੇ ਹੋਏ ਉੱਤਰ ਦਿੱਤਾ। “ਕੀ ਤੁਸੀਂ ਇਨ੍ਹਾਂ ਸਭਨਾਂ ਚੀਜ਼ਾਂ ਨੂੰ ਨਹੀਂ ਵੇਖਦੇ ? ਮੈਂ ਤੁਹਾਨੂੰ ਸੱਤ ਆਖਦਾ ਹਾਂ ਜੋ ਐਥੇ ਪੱਥਰ ਉੱਤੇ ਪੱਥਰ ਛੱਡਿਆ ਨਾ ਜਾਏਗਾ ਜੋ ਡੇਗਿਆ ਨਾ ਜਾਵੇ। ਜਦ ਉਹ ਜੈਤੂਨ ਦੇ ਪਹਾੜ ਉੱਤੇ ਬੈਠਾ ਹੋਇਆ ਸੀ ਉਹ ਦੇ ਚੇਲੇ ਉਹ ਤੇ ਕੋਲ ਵੱਖਰੇ ਹੋ ਕੇ ਆਏ ਅਤੇ ਪੁੱਛਿਆ, ਸਾਨੂੰ ਦੱਸ ਜੋ ਏਹ ਗੱਲਾਂ ਕਦ ਹੋਣਗੀਆਂ ਅਤੇ ਤੇਰੇ ਆਉਣ ਅਰ ਜੁਗ ਦੇ ਅੰਤ ਦਾ ਕੀ ਲੱਛਣ ਹੋਊ?” (ਮੱਤੀ 24:2,3)

ਚੇਲ੍ਹਿਆਂ ਦਾ ਪ੍ਰਸ਼ਨ ਦੋ ਹਿੱਸਿਆਂ ਦੇ ਵਿੱਚ ਸੀ; ਯਿਸੂ ਦਾ ਉੱਤਰ ਵੀ ਦੋ ਹਿੱਸਿਆਂ ਦੇ ਵਿੱਚ ਸੀ। ਜਿਵੇਂ ਪੁਰਾਣੇ ਨੇਮ ਦੀਆਂ ਭਵਿੱਖਬਾਣੀਆਂ ਦੇ ਵਿੱਚ ਨੇੜਲੇ ਅਤੇ ਦੂਰ ਦੇ ਸਮੇਂ ਦੇ ਤੱਥ ਹੁੰਦੇ ਸਨ, ਯਿਸੂ ਦੀ ਭਵਿੱਖਬਾਣੀ ਦੇ ਵਿੱਚ ਕੁਝ ਅਜਿਹੀਆਂ ਘਟਨਾਵਾਂ ਸ਼ਾਮਿਲ ਸਨ ਜੋ ਜਲਦ ਹੋਣ ਵਾਲੀਆਂ ਅਤੇ ਸਨ ਅਤੇ ਕੁਝ ਅਜਿਹੀਆਂ ਸਨ ਜੋ ਯੁੱਗ ਦੇ ਅੰਤ ਦੇ ਸਮੇਂ ਹੋਣਗੀਆਂ।

• ਚੇਲ੍ਹਿਆਂ ਨੇ ਪੁੱਛਿਆ, “ਇਹ ਗੱਲਾਂ ਕਦੋਂ ਹੋਣਗੀਆਂ?” “ਇਹ ਗੱਲਾਂ” (ਹੈਕਲ ਦੀ ਤਬਾਹੀ ਜਿਸ ਵਿੱਚ ਇੱਕ ਵੀ ਪੱਥਰ ਦੂਸਰੇ ਤੇ ਨਹੀਂ ਛੱਡਿਆ ਜਾਵੇਗਾ) ਜੋ 70 ਏ.ਡੀ ਵਿੱਚ ਹੋਈਆਂ।

• ਚੇਲ੍ਹਿਆਂ ਨੇ ਪੁੱਛਿਆ, “ਤੇਰੇ ਆਉਣ ਅਰ ਜੁਗ ਦੇ ਅੰਤ ਦਾ ਕੀ ਲੱਛਣ ਹੋਊ?” ਯਿਸੂ ਨੇ ਭਵਿੱਖ ਦੀ ਵਾਪਸੀ ਦੀ ਗੱਲ ਕਰਦੇ ਹੋਏ ਕਿਹਾ, “ਮਨੁੱਖ ਦੇ ਪੁੱਤ੍ਰ ਨੂੰ ਸਮਰੱਥਾ ਵਿੱਚ ਆਉਂਦਿਆਂ ਵੇਖਣਗੀਆਂ” (ਮੱਤੀ 24:30)

ਯਿਸੂ ਨੇ ਵਿਖਾਇਆ ਕਿ ਇਸ ਰਾਜ ਦੇ ਵਿੱਚ ਸਾਰੇ ਦੇਸ਼ਾਂ ਦੇ ਲੋਕ ਸ਼ਾਮਿਲ ਹੋਣਗੇ, ਦੋਵੇਂ ਯਹੂਦੀ ਅਤੇ ਪਰਾਈਆਂ ਕੌਮਾਂ। ਉਸਨੇ ਵਿਖਾਇਆ ਕਿ ਪਰਾਈਆਂ ਕੌਮਾਂ ਨੂੰ ਸ਼ਾਮਿਲ ਕਰਨ ਦੀ ਯੋਜਨਾ “ਸੰਸਾਰ ਦੇ ਅਰੰਭ ਤੋਂ ਹੀ” (ਮੱਤੀ 25:34) ਪਰਮੇਸ਼ੁਰ ਦੀ ਯੋਜਨਾ ਸੀ। ਪਰਮੇਸ਼ੁਰ ਦੇ ਰਾਜ ਉਸਦੇ ਲੋਕਾਂ ਲਈ ਪਰਮੇਸ਼ੁਰ ਦੀ ਸਦੀਪਕ ਯੋਜਨਾ ਸੀ।

ਜੈਤੂਨ ਦੇ ਪਹਾੜ ਦੇ ਉਪਦੇਸ਼ ਦੇ ਦੋ ਦ੍ਰਿਸ਼ਟਾਂਤ ਸਾਨੂੰ ਸਿਖਾਉਂਦੇ ਹਨ ਕਿ ਸਾਨੂੰ ਰਾਜ ਦੀ ਉਡੀਕ ਕਰਦੇ ਹੋਏ ਫ਼ਲਦਾਇਕ ਬਣਨਾ ਚਾਹੀਦਾ ਹੈ। ਪੰਜ ਮੂਰਖ ਕੁਆਰੀਆਂ ਨੇ ਉਡੀਕ ਤਾਂ ਕੀਤੀ ਪਰ ਬਿਨਾਂ ਤਿਆਰੀ ਦੇ। ਇੱਕ ਤੋੜੇ ਵਾਲੇ ਨੌਕਰ ਨੇ ਉਡੀਕ ਤਾਂ ਕੀਤੀ ਪਰ ਉਸਨੇ ਇਮਾਨਦਾਰੀ ਨਾਲ ਪ੍ਰਬੰਧ ਨਹੀਂ ਕੀਤਾ। ਰਾਜ ਦੇ ਨਾਗਰਿਕਾਂ ਵੱਜੋਂ ਸਾਨੂੰ ਵਫ਼ਾਦਾਰੀ ਦੇ ਲਈ ਅਤੇ ਧੀਰਜ ਦੇ ਨਾਲ ਰਾਜੇ ਦੀ ਸੇਵਾ ਕਰਨ ਦੇ ਲਈ ਬੁਲਾਇਆ ਗਿਆ ਹੈ।

ਮੱਤੀ 13 ਦੇ ਵਿੱਚ ਵਾਇਦਾ ਕੀਤਾ ਹੋਇਆ ਹੈ ਕਿ ਅੰਤਿਮ ਨਿਆਂ ਦੇ ਸਮੇਂ ਭਲੇ ਅਤੇ ਬੁਰਿਆਂ ਨੂੰ ਅਲੱਗ ਕੀਤਾ ਜਾਵੇਗਾ। ਮੁੱਢਲਾ ਪਾਠ ਇਹ ਨਹੀਂ ਹੈ ਕਿ ਇਹ ਨਿਆਂ ਕਦੋਂ ਅਤੇ ਕਿਵੇਂ ਹੋਵੇਗਾ। ਇਸਦੀ ਬਜਾਏ, ਯਿਸੂ ਦੀ ਸਿੱਖਿਆ ਇਹ ਹੈ ਕਿ ਅੰਤਿਮ ਨਿਆਂ ਦੀ ਤਿਆਰੀ ਦੇ ਲਈ ਰਾਜ ਦੇ ਨਾਗਰਿਕਾਂ ਨੂੰ ਅੱਜ ਕਿਵੇਂ ਜਿਉਣਾ ਚਾਹੀਦਾ ਹੈ। ਉਸ ਦਿਨ ਰਾਜਾ ਕਹੇਗਾ, “ਮੈਂ ਤੁਹਾਨੂੰ ਸਤ ਆਖਦਾ ਹਾਂ ਭਈ ਜਦ ਤੁਸਾਂ ਮੇਰੇ ਇਨ੍ਹਾਂ ਸਭਨਾਂ ਤੋਂ ਛੋਟੇ ਭਰਾਵਾਂ ਵਿੱਚੋਂ ਇੱਕ ਨਾਲ ਇਹ ਕੀਤਾ ਤਾਂ ਮੇਰੇ ਨਾਲ ਕੀਤਾ” (ਮੱਤੀ 25:40)। ਸਾਨੂੰ ਲਗਾਤਾਰ ਰਾਜੇ ਦੇ ਵਾਪਿਸ ਆਉਣ ਤਿਆਰੀ ਵਿੱਚ ਰਹਿਣਾ ਚਾਹੀਦਾ ਹੈ। ਜਦੋਂ ਉਸਦੀ ਵਾਪਸੀ ਸਮੇਂ ਤਾਂ ਸਾਡਾ ਵਫ਼ਾਦਾਰ ਹੋਣਾ ਬਹੁਤ ਜਰੂਰੀ ਹੈ।

► ਪੜ੍ਹੋ ਲੂਕਾ 9:21-27

ਰਾਜ ਦੀ ਨਾਗਰਿਕਤਾ ਸਿਰਫ਼ ਪਰਮੇਸ਼ੁਰ ਦੀ ਕ੍ਰਿਪਾ ਨਾਲ ਹੀ ਮਿਲਦੀ ਹੈ। ਅਸੀਂ ਭਲੇ ਕੰਮਾਂ ਦੇ ਦੁਆਰਾ ਰਾਜ ਦੇ ਨਾਗਰਿਕ ਨਹੀਂ ਬਣਦੇ। ਪਰ ਇਸਦਾ ਇਹ ਅਰਥ ਨਹੀਂ ਹੈ ਕਿ ਚੇਲ੍ਹੇ ਹੋਣ ਦੇ ਜੀਵਨ ਦੀ ਕੋਈ ਕੀਮਤ ਨਹੀਂ ਹੈ। ਲੂਕਾ 9 ਦੇ ਵਿੱਚ ਯਿਸੂ ਨੇ ਆਪਣੇ ਪੈਰੋਕਾਰਾਂ ਨੂੰ ਚੇਲ੍ਹੇ ਹੋਣ ਦੀ ਕੀਮਤ ਦੇ ਬਾਰੇ ਸਿਖਾਇਆ।

ਡਾਲਸ ਵਿਲਾਰਡ ਨੇ ਲਿਖਿਆ, “ਕ੍ਰਿਪਾ ਯਤਨਾਂ ਦੇ ਵਿਰੁੱਧ ਨਹੀਂ ਹੈ; ਕ੍ਰਿਪਾ ਕਮਾਉਣ ਦੇ ਵਿਰੁੱਧ ਹੈ।”[1] ਚੇਲ੍ਹਿਆਂ ਦੇ ਰੂਪ ਵਿੱਚ ਸਾਡੇ ਦੁਆਰਾ ਕੀਤੇ ਜਾਣ ਵਾਲੇ ਯਤਨ ਕ੍ਰਿਪਾ ਦੇ ਵਿਰੁੱਧ ਨਹੀਂ ਹਨ। ਅਸਲ ਦੇ ਵਿੱਚ ਸਾਡੇ ਕੋਲ ਚੇਲ੍ਹੇ ਬਣਨ ਦੀ ਸਮਰੱਥਾ ਸਿਰਫ਼ ਪਰਮੇਸ਼ੁਰ ਦੀ ਕ੍ਰਿਪਾ ਤੋਂ ਹੀ ਮਿਲਦੀ ਹੈ।

ਕ੍ਰਿਪਾ ਕਰਕੇ ਯਿਸੂ ਦੀ ਸਿੱਖਿਆ ਦੇ ਢੰਗ ਤੇ ਧਿਆਨ ਦਵੋ: ਪਹਿਲਾਂ ਸਲੀਬ ਅਤੇ ਫਿਰ ਮਹਿਮਾ।

• ਯਿਸੂ ਨੇ ਆਪਣੀ ਮੌਤ ਅਤੇ ਜੀ ਉੱਠਣ ਦੇ ਬਾਰੇ ਭਵਿੱਖਬਾਣੀ ਕੀਤੀ (ਲੂਕਾ 9:21-22)। ਇਹ ਉਹ ਕੀਮਤ ਸੀ ਜੋ ਯਿਸੂ ਨੇ ਸਾਨੂੰ ਰਾਜ ਦੀ ਨਾਗਰਿਕਤਾ ਪ੍ਰਦਾਨ ਕਰਨ ਦੇ ਲਈ ਅਦਾ ਕੀਤੀ।

• ਯਿਸੂ ਨੇ ਆਪਣੇ ਪੈਰੋਕਾਰਾਂ ਨੂੰ ਦੱਸਿਆਂ ਕਿ ਚੇਲ੍ਹੇ ਹੋਣ ਦੀ ਕੀ ਕੀਮਤ ਹੋਵੇਗੀ (ਲੂਕਾ 9:23-25)। “ਉਸ ਨੇ ਸਭਨਾਂ ਨੂੰ ਆਖਿਆ, ਜੇ ਕੋਈ ਮੇਰੇ ਪਿੱਛੇ ਆਉਣਾ ਚਾਹੇ ਤਾਂ ਆਪਣੇ ਆਪ ਦਾ ਇਨਕਾਰ ਕਰੇ ਅਤੇ ਰੋਜ਼ ਆਪਣੀ ਸਲੀਬ ਚੁੱਕ ਕੇ ਮੇਰੇ ਪਿੱਛੇ ਚੱਲੇ।” ਯਿਸੂ ਨੇ ਰਾਜ ਦੀ ਸਥਾਪਨਾ ਕਰਨ ਦੇ ਲਈ ਸਲੀਬ ਤੇ ਦੁੱਖ ਝੱਲਿਆ; ਜੇਕਰ ਅਸੀਂ ਰਾਜ ਦੇ ਵਿੱਚ ਰਹਿਣਾ ਚਾਹੁੰਦੇ ਹਾਂ ਤਾਂ ਸਾਨੂੰ ਵੀ ਆਪਣੀ ਸਲੀਬ ਚੁੱਕਣੀ ਚਾਹੀਦੀ ਹੈ।

• ਯਿਸੂ ਨੇ ਪਰਮੇਸ਼ੁਰ ਦੇ ਰਾਜ ਬਾਰੇ ਗੱਲ ਕੀਤੀ (ਲੂਕਾ 9:26-27)। “ਜੋ ਕੋਈ ਮੈਥੋਂ ਅਤੇ ਮੇਰਿਆਂ ਬਚਨਾਂ ਤੋਂ ਸ਼ਰਮਾਏਗਾ ਮਨੁੱਖ ਦਾ ਪੁੱਤ੍ਰ ਵੀ ਉਸ ਤੋਂ ਸ਼ਰਮਾਏਗਾ ਜਿਸ ਵੇਲੇ ਆਪਣੇ ਅਤੇ ਪਿਤਾ ਦੇ ਅਤੇ ਪਵਿੱਤ੍ਰ ਦੂਤਾਂ ਦੇ ਤੇਜ ਨਾਲ ਆਵੇਗਾ।”

ਅਸੀਂ ਸਲੀਬ ਵਿੱਚ ਸਾਂਝੇ ਹੋਣ ਤੋਂ ਬਿਨਾਂ ਰਾਜ ਦੀ ਮਹਿਮਾ ਵਿੱਚ ਸਾਂਝੀ ਨਹੀਂ ਹੋ ਸਕਦੇ। ਯਿਸੂ “ਨੇ ਆਪਣੇ ਆਪ ਨੂੰ ਮੌਤ ਤੱਕ, ਸਗੋਂ ਸਲੀਬ ਦੀ ਮੌਤ ਤੱਕ ਨੀਵਿਆਂ ਕੀਤਾ। ਇਸ ਲਈ, ਪਰਮੇਸ਼ੁਰ ਨੇ ਉਸਨੂੰ ਅੱਤ ਉੱਚਿਆਂ ਕੀਤਾ” (ਫਿਲਿੱਪੀਆਂ 2:8-9)।

ਪਰਮੇਸ਼ੁਰ ਦੀ ਸੰਤਾਨ ਦੇ ਰੂਪ ਵਿੱਚ, ਅਸੀਂ ਇਸੇ ਨਮੂਨੇ ਤੇ ਚੱਲਦੇ ਹਾਂ। “ਅਤੇ ਪਰਮ ਕਿਰਪਾਲੂ ਪਰਮੇਸ਼ੁਰ ਜਿਹ ਨੇ ਤੁਹਾਨੂੰ ਆਪਣੇ ਸਦੀਪਕ ਤੇਜ ਦੇ ਲਈ ਮਸੀਹ ਵਿੱਚ ਸੱਦਿਆ ਜਦ ਤੁਸਾਂ ਥੋੜਾ ਚਿਰ ਦੁਖ ਭੋਗ ਲਿਆ ਤਾਂ ਆਪੇ ਤੁਹਾਨੂੰ ਕਾਮਿਲ, ਕਾਇਮ ਅਤੇ ਤਕੜਿਆ ਕਰੇਗਾ” (ਪਤਰਸ ਦੀ ਪਹਿਲੀ ਪੱਤ੍ਰੀ 5:10)। ਰਾਜ ਦਾ ਜੀਵਨ ਇਸੇ ਪ੍ਰਕਾਰ ਦਾ ਹੈ। ਮਹਿਮਾ ਵਿੱਚ ਉੱਚਾ ਉਠਾਏ ਜਾਣ ਤੋਂ ਪਹਿਲਾਂ ਮਸੀਹ ਨੇ ਸਲੀਬ ਦਾ ਦੁੱਖ ਝੱਲਿਆ। ਉਸਦੇ ਪੈਰੋਕਾਰਾਂ ਨੂੰ ਵੀ ਸਦੀਪਕ ਮਹਿਮਾ ਦਾ ਅਨੰਦ ਲੈਣ ਤੋਂ ਪਹਿਲਾਂ ਸਲੀਬ ਉਠਾਉਣੀ ਪਵੇਗੀ।

ਯਿਸੂ ਸਮਰਪਿਤ ਚੇਲ੍ਹਿਆਂ ਦੀ ਭਾਲ ਵਿੱਚ ਸੀ। ਉਸਨੇ ਆਪਣੇ ਚੇਲ੍ਹਿਆਂ ਲਈ ਤਿੱਖੇ ਦਿਮਾਗ਼ ਦੀ ਲੋੜ ਨਹੀਂ ਸੀ; ਉਸਨੇ ਉਨ੍ਹਾਂ ਤੋਂ ਵਫ਼ਾਦਾਰ ਦਿਲ ਰੱਖਣ ਦੀ ਲੋੜ ਸੀ। ਚੇਲ੍ਹੇ ਹੋਣ ਦੀ ਕੀ ਕੀਮਤ ਹੈ? “ਜੇ ਕੋਈ ਮੇਰੇ ਪਿੱਛੇ ਆਉਣਾ ਚਾਹੇ ਤਾਂ ਆਪਣੇ ਆਪ ਦਾ ਇਨਕਾਰ ਕਰੇ ਅਤੇ ਆਪਣੀ ਸਲੀਬ ਚੁੱਕ ਕੇ ਮੇਰੇ ਪਿੱਛੇ ਚੱਲੇ” (ਮੱਤੀ 16:24)।

1. ਚੇਲ੍ਹੇ ਦੇ ਲਈ ਆਪਣੇ ਆਪ ਦਾ ਇਨਕਾਰ ਕਰਨਾ ਜਰੂਰੀ ਹੈ। ਆਪਣੇ ਆਪ ਨੂੰ “ਨਾਂਹ” ਬਹੁਤ ਕਠਿਨ ਕੰਮ ਹੈ।

2. ਚੇਲ੍ਹੇ ਦੇ ਲਈ ਆਪਣੀ ਸਲੀਬ ਨੂੰ ਚੁੱਕਣਾ ਜਰੂਰੀ ਹੈ। ਯਿਸੂ ਦੇ ਪੈਰੋਕਾਰ ਸਮਝ ਗਏ ਕਿ ਸਲੀਬ ਦਾ ਅਰਥ ਮੌਤ ਹੈ। ਸਲੀਬ ਦੁੱਖਾਂ ਅਤੇ ਸ਼ਰਮਿੰਦਗੀ ਨੂੰ ਦਰਸਾਉਂਦੀ ਹੈ। ਪਰ ਅਰੰਭਿਕ ਮਸੀਹੀ ਜਾਣਦੇ ਸਨ ਕਿ ਚੇਲ੍ਹੇ ਹੋਣ ਦੇ ਲਈ ਸਲੀਬ ਜਰੂਰੀ ਹੈ। ਜਦੋਂ ਇਗਨੇਸ਼ੀਅਸ਼ ਸ਼ਹੀਦ ਹੋਣ ਦੇ ਲਈ ਰੋਮ ਜਾ ਰਿਹਾ ਸੀ, ਉਸਨੇ ਕਿਹਾ, “ਮੈਂ ਇੱਕ ਚੇਲ੍ਹਾ ਹੋਣ ਦੀ ਸ਼ੁਰੂਆਤ ਕਰ ਰਿਹਾ ਹਾਂ।” ਚੇਲ੍ਹੇ ਬਣਨ ਦੇ ਲਈ ਸਲੀਬ ਜਰੂਰੀ ਹੈ।

3. ਇੱਕ ਚੇਲ੍ਹੇ ਨੂੰ ਆਪਣੇ ਚਰਿੱਤਰ ਅਤੇ ਵਿਵਹਾਰ ਦੇ ਵਿੱਚ ਲਗਾਤਾਰ ਯਿਸੂ ਦੇ ਪਿੱਛੇ ਚੱਲਦੇ ਰਹਿਣਾ ਚਾਹੀਦਾ ਹੈ। ਪਿੱਛੇ ਚੱਲਣਾ ਵਰਤਮਾਨ ਕਾਲ ਹੈ।

ਕੀ ਚੇਲ੍ਹੇ ਹੋਣ ਦੀ ਕੀਮਤ ਅਰਥ ਪੂਰਨ ਹੈ? ਯਿਸੂ ਨੇ ਚੇਲ੍ਹਾ ਬਣਨ ਦੇ ਤਿੰਨ ਕਾਰਨ ਦਿੱਤੇ। ਹੈਰਾਨੀ ਦੀ ਗੱਲ ਹੈ ਕਿ ਇਸੇ ਤਿੰਨ ਕਾਰਨਾਂ ਦੇ ਕਰਕੇ ਬਹੁਤ ਸਾਰੇ ਲੋਕ ਚੇਲ੍ਹੇ ਨਹੀਂ ਬਣਦੇ। ਸਾਨੂੰ ਚੇਲ੍ਹੇ ਹੋਣ ਦੀ ਕੀਮਤ ਕਿਉਂ ਅਦਾ ਕਰਨੀ ਚਾਹੀਦੀ ਹੈ?

1. ਸੁਰੱਖਿਆ। ਜੋ ਕੋਈ ਵੀ ਸਲੀਬ ਤੋਂ ਦੂਰ ਰਹਿ ਕੇ ਆਪਣੇ ਜੀਵਨ ਨੂੰ ਬਚਾਉਣ ਦਾ ਯਤਨ ਕਰਦਾ ਹੈ ਉਹ ਨਾਸ਼ ਹੋ ਜਾਵੇਗਾ (ਲੂਕਾ 9:24)।

2. ਅਸਲ ਅਮੀਰੀ। ਜੋ ਕੋਈ ਯਿਸੂ ਦੇ ਨਾਲ ਪਹਿਚਾਣੇ ਜਾਣ ਦਾ ਇਨਕਾਰ ਕਰੇਗਾ ਉਹ ਸਭ ਕੁਝ ਗੁਆ ਦੇਵੇਗਾ (ਲੂਕਾ 9:25)।

3. ਪ੍ਰਤੀਫ਼ਲ। ਜੋ ਯਿਸੂ ਦੇ ਪਿੱਛੇ ਚੱਲਦੇ ਹਨ ਉਨ੍ਹਾਂ ਦਾ ਹੀ ਰਾਜ ਦੇ ਵਿੱਚ ਸੁਆਗਤ ਹੋਵੇਗਾ (ਲੂਕਾ 9:26-27)।

► ਪੜ੍ਹੋ ਲੂਕਾ 14:25-33.

ਯਿਸੂ ਨੇ ਬਾਅਦ ਦੇ ਵਿੱਚ ਚੇਲ੍ਹੇਪਨ ਦੇ ਬਾਰੇ ਆਪਣੀ ਸਿੱਖਿਆ ਹੋਰ ਵਿਸਤਾਰ ਨਾਲ ਦਿੱਤੀ। ਉਸ ਦੀਆਂ ਹਦਾਇਤਾਂ ਤਿੰਨ ਹਿੱਸਿਆਂ ਦੇ ਵਿੱਚ ਹਨ:

1. ਚੇਲ੍ਹੇ ਹੋਣ ਦੀ ਕੀਮਤ (ਲੂਕਾ 14:26-27)

2. ਕੀਮਤ ਦੀ ਪਹਿਚਾਣ ਕੀਤੇ ਬਿਨਾਂ ਚੇਲ੍ਹੇ ਬਣਨ ਦੀ ਮੂਰਖਤਾ (ਲੂਕਾ 14:28-32)

3. ਚੇਲ੍ਹੇ ਹੋਣ ਦੀ ਕੀਮਤ ਦੇ ਬਾਰੇ ਯਾਦ ਦਿਵਾਉਣਾ (ਲੂਕਾ 14:33)

ਜੇਕਰ ਤੁਸੀਂ ਇੱਕ ਕਾਰ ਖਰੀਦਣ ਦੇ ਲਈ ਜਾਂਦੇ ਹੋ, ਤਾਂ ਕਈ ਵਾਰ ਕਾਰ ਵੇਚਣ ਵਾਲਾ ਸਾਡੇ ਤੋਂ ਇਸਦੀ ਅੰਤਿਮ ਕੀਮਤ ਨੂੰ ਲੁਕਾਉਂਦਾ ਹੈ। ਉਹ ਕਹਿੰਦਾ ਹੈ, “ਇਸ ਸੁੰਦਰ ਕਾਰ ਦੇ ਵੱਲ ਵੇਖੋ!” “ਇਸ ਕਾਰ ਦੀ ਤਾਕਤ ਨੂੰ ਮਹਿਸੂਸ ਕਰੋ!” ਜਦੋਂ ਤੁਹਾਨੂੰ ਉਸ ਕਾਰ ਦੇ ਨਾਲ ਪਿਆਰ ਹੋ ਜਾਂਦਾ ਫਿਰ ਹੀ ਉਹ ਤੁਹਾਨੂੰ ਇਸਦੀ ਕੀਮਤ ਦੇ ਬਾਰੇ ਦੱਸਦਾ ਹੈ।

ਯਿਸੂ ਨੇ ਕਦੇ ਆਪਣੇ ਚੇਲ੍ਹਿਆਂ ਨੂੰ ਰਾਜ ਦੇ ਲਈ ਕਿਸੇ ਆਸਾਨ ਰਾਹ ਦਾ ਪ੍ਰਸਤਾਵ ਨਹੀਂ ਦਿੱਤਾ। ਉਸਨੇ ਇਸਦੀ ਕੀਮਤ ਦੇ ਨਾਲ ਹੀ ਸ਼ੁਰੂਆਤ ਕੀਤੀ:

ਜੇ ਕੋਈ ਮੇਰੇ ਕੋਲ ਆਵੇ ਅਰ ਆਪਣੇ ਪਿਉ ਅਤੇ ਮਾਂ ਅਤੇ ਤੀਵੀਂ ਅਤੇ ਬਾਲ ਬੱਚਿਆਂ ਅਤੇ ਭਾਈਆਂ ਅਤੇ ਭੈਣਾਂ ਨਾਲ ਸਗੋਂ ਆਪਣੀ ਜਾਨ ਨਾਲ ਵੀ ਵੈਰ ਨਾ ਰੱਖੇ ਤਾਂ ਓਹ ਮੇਰਾ ਚੇਲਾ ਨਹੀਂ ਹੋ ਸੱਕਦਾ। ਜੋ ਕੋਈ ਆਪਣੀ ਸਲੀਬ ਚੁੱਕ ਕੇ ਮੇਰੇ ਮਗਰ ਨਾ ਆਵੇ ਮੇਰਾ ਚੇਲਾ ਨਹੀਂ ਹੋ ਸੱਕਦਾ (ਲੂਕਾ 14:26-27)।

ਇਸ ਵਚਨ ਦੇ ਵਿੱਚ ਕਿਸੇ ਚੀਜ਼ ਦੇ ਵੈਰ ਰੱਖਣ ਦਾ ਭਾਵ ਹੈ ਇਸਨੂੰ ਕਿਸੇ ਹੋਰ ਚੀਜ਼ ਨਾਲੋਂ ਘੱਟ ਪਿਆਰ ਕਰਨਾ। ਯਿਸੂ ਕਹਿ ਰਿਹਾ ਹੈ, “ਜਦੋਂ ਤੱਕ ਤੁਸੀਂ ਮੈਨੂੰ ਆਪਣੇ ਪਿਤਾ, ਮਾਤਾ, ਪਤਨੀ, ਬੱਚਿਆਂ, ਭਰਾਵਾਂ, ਭੈਣਾਂ ਅਤੇ ਇੱਥੋਂ ਤੱਕ ਕਿ ਆਪਣੇ ਜੀਵਨ ਨੂੰ ਮੇਰੇ ਨਾਲੋਂ ਪਿਆਰ ਕਰੋਗੇ ਉਦੋਂ ਤੱਕ ਤੁਸੀਂ ਮੇਰੇ ਚੇਲ੍ਹੇ ਨਹੀਂ ਬਣ ਸਕਦੇ!”

ਇੱਕ ਚੇਲ੍ਹਾ ਹੋਣ ਦੀ ਕੀ ਕੀਮਤ ਹੈ? ਸਭ ਕੁਝ! ਮਸੀਹ ਦਾ ਚੇਲ੍ਹਾ ਹੋਣਾ ਮਸੀਹ ਦੇ ਵਾਇਦਿਆਂ ਦੇ ਵਿੱਚ ਸਾਂਝੀ ਹੋਣ ਦੇ ਅਨੰਦ ਨਾਲੋਂ ਵੱਧ ਕੇ ਹੈ; ਇਹ ਸਲੀਬ ਵਿੱਚ ਸਾਂਝੀ ਹੋਣ ਦੀ ਮੰਗ ਕਰਦਾ ਹੈ।

►ਯੂਹੰਨਾ ਦਾ ਸ਼ੁਭਸਮਾਚਾਰ ਚੇਲ੍ਹੇ ਹੋਣ ਦੀਆਂ ਤਿੰਨ ਹੋਰ ਸ਼ਰਤਾਂ ਦਿੰਦਾ ਹੈ। ਪੜ੍ਹੋ ਯੂਹੰਨਾ 8:31, ਯੂਹੰਨਾ 13:35 ਅਤੇ ਯੂਹੰਨਾ 15:8. ਕੀ ਤੁਸੀਂ ਆਪਣੀ ਸੇਵਕਾਈ ਦੇ ਵਿੱਚ ਲੂਕਾ ਅਤੇ ਯੂਹੰਨਾ ਦੇ ਵਿੱਚ ਚੇਲ੍ਹੇ ਹੋਣ ਦੀਆਂ ਸ਼ਰਤਾਂ ਦੇ ਆਧਾਰ ਤੇ ਚੇਲ੍ਹੇ ਬਣਾ ਰਹੇ ਹੋ?

ਜਦੋਂ ਤੱਕ ਮਸੀਹ ਵਾਪਿਸ ਨਹੀਂ ਆਉਂਦਾ, ਉਸ ਸਮੇਂ ਤੱਕ ਅਸੀਂ ਰਾਜ ਦੇ ਬਾਰੇ ਉਸਦੀ ਸਿੱਖਿਆ ਦੇ ਸਾਰੇ ਵੇਰਵੇ ਨੂੰ ਨਹੀਂ ਜਾਣ ਸਕਦੇ। ਪਰ ਸ਼ੁਭਸਮਾਚਾਰ ਪਰਮੇਸ਼ੁਰ ਦੇ ਰਾਜ ਦੀਆਂ ਬਹੁਤ ਸਾਰੀਆਂ ਵਿਸ਼ੇਸ਼ਤਾਵਾਂ ਨੂੰ ਵਿਖਾਉਂਦੇ ਹਨ:

• ਪਰਮੇਸ਼ੁਰ ਦਾ ਰਾਜ ਆਤਮਿਕ ਰਾਜ ਹੈ। “ਕਿਉਂ ਜੋ ਪਰਮੇਸ਼ੁਰ ਦਾ ਰਾਜ ਖਾਣਾ ਪੀਣਾ ਨਹੀਂ ਸਗੋਂ ਪਵਿੱਤਰ ਆਤਮਾ ਵਿੱਚ ਸ਼ਾਂਤੀ ਅਤੇ ਅਨੰਦ ਹੈ (ਰੋਮੀਆਂ 14:17)।

• ਨਵਾਂ ਜਨਮ ਸਾਨੂੰ ਸ਼ੈਤਾਨ ਦੀ ਸ਼ਕਤੀ ਤੋਂ ਛੁਟਕਾਰਾ ਦਿੰਦਾ ਹੈ ਅਤੇ ਸਾਨੂੰ ਪਰਮੇਸ਼ੁਰ ਦੇ ਰਾਜ ਦਾ ਹਿੱਸਾ ਬਣਾ ਦਿੰਦਾ ਹੈ।

• ਅੰਤ ਸਮੇਂ ਦੇ ਵਿੱਚ ਪਰਮੇਸ਼ੁਰ ਦੇ ਰਾਜ ਵਿੱਚ ਭੋਤਿਕ, ਰਾਜਨੀਤਿਕ ਸ਼ਾਸਨ ਸ਼ਾਮਿਲ ਹੋਵੇਗਾ।

• ਪਰਮੇਸ਼ੁਰ ਦਾ ਰਾਜ ਵਿਸ਼ਵਵਿਆਪੀ ਹੈ; ਇਹ ਯਹੂਦੀ ਦੇਸ਼ ਤੱਕ ਸੀਮਿਤ ਨਹੀਂ ਹੈ।

• ਇਸ ਸਮੇਂ ਪਰਮੇਸ਼ੁਰ ਦਾ ਰਾਜ ਸੰਸਾਰ ਦੇ ਵਿੱਚ ਕੰਮ ਕਰ ਰਿਹਾ ਹੈ। ਰਾਜ ਕੋਈ ਸਰੀਰਰ ਰਾਜ ਨਹੀਂ ਹੈ। 10 ਅਸ਼ਰਫ਼ੀਆਂ ਦੇ ਦ੍ਰਿਸ਼ਟਾਂਤ ਵਿੱਚ, ਇੱਕ ਰਾਜ ਦੇ ਕੋਲ ਹਕੂਮਤ ਕਰਨ ਦਾ ਅਧਿਕਾਰ ਸੀ, ਇਹ ਕੋਈ ਭੂਗੋਲਿਕ ਸਥਾਨ ਨਹੀਂ ਸੀ (ਲੂਕਾ 19:11-12)।

• ਪਰਮੇਸ਼ੁਰ ਦਾ ਰਾਜ ਅਲੋਕਿਕ ਹੈ। ਮਨੁੱਖ ਬੀਜ਼ ਬੀਜ਼ਦਾ ਹੈ; ਉਹ ਇਸਨੂੰ ਵਧਾ ਨਹੀਂ ਸਕਦਾ। ਰਾਜ ਦਾ ਵਾਧਾ ਪਰਮੇਸ਼ੁਰ ਦੀ ਸ਼ਕਤੀ ਦੇ ਨਾਲ ਹੁੰਦਾ ਹੈ।

• ਪਰਮੇਸ਼ੁਰ ਦਾ ਰਾਜ ਭਵਿੱਖ ਦੀ ਇੱਕ ਧੁੰਦਲੀ ਉਮੀਦ ਨਾਲੋਂ ਜਿਆਦਾ ਹੈ; ਇਹ ਵਰਤਮਾਨ ਦੀ ਅਸਲੀਅਤ ਹੈ ਜੋ ਇੱਕ ਜਲਦੀ ਨਾਲ ਕੀਤੀ ਜਾਣ ਵਾਲੀ ਪ੍ਰਤੀਕਿਰਿਆ ਦੀ ਮੰਗ ਕਰਦੀ ਹੈ।

• ਪਰਮੇਸ਼ੁਰ ਦਾ ਰਾਜ ਯਿਸੂ ਦੀ ਸੇਵਕਾਈ ਦੇ ਨਾਲ ਅਰੰਭ ਹੋਇਆ। ਦੁਸ਼ਟ ਆਤਮਾਵਾਂ ਦੇ ਉੱਤੇ ਉਸਦੀ ਸ਼ਕਤੀ ਨੇ ਸ਼ੈਤਾਨ ਦੇ ਰਾਜ ਉੱਤੇ ਪਰਮੇਸ਼ੁਰ ਦੇ ਰਾਜ ਦੀ ਜਿੱਤ ਨੂੰ ਵਿਖਾਇਆ।

• ਪਰਮੇਸ਼ੁਰ ਦਾ ਰਾਜ ਕਲੀਸਿਆ ਦੀ ਸੇਵਕਾਈ ਦੇ ਦੁਆਰਾ ਲਗਾਤਾਰ ਵਿਕਸਿਤ ਹੋ ਰਿਹਾ ਹੈ। ਪਹਾੜੀ ਉਪਦੇਸ਼ ਵਿਖਾਉਂਦਾ ਹੈ ਕਿ ਵਿਸ਼ਵਾਸੀਆਂ ਨੂੰ ਇਸ ਵਰਤਮਾਨ ਯੁੱਗ ਦੇ ਵਿੱਚ ਕਿਵੇਂ ਜਿਉਣ ਦੇ ਲਈ ਬੁਲਾਇਆ ਗਿਆ ਹੈ।

• ਪਰਮੇਸ਼ੁਰ ਦਾ ਰਾਜ ਮਹਿਮਾ ਵਿੱਚ ਰਾਜ ਕਰਨ ਲਈ ਮਸੀਹ ਦੀ ਵਾਪਸੀ ਦੇ ਸਮੇਂ ਪੂਰੀ ਤਰ੍ਹਾਂ ਦੇ ਨਾਲ ਸਥਾਪਿਤ ਹੋ ਜਾਵੇਗਾ। ਸ਼ੈਤਾਨ ਦੀ ਸ਼ਕਤੀ ਟੁੱਟ ਜਾਵੇਗੀ, ਅਤੇ ਪਰਮੇਸ਼ੁਰ ਸਦਾ ਦੇ ਲਈ ਰਾਜ ਕਰੇਗਾ।

► ਇਸ ਕੋਰਸ ਦੇ ਬਿਲਕੁਲ ਪਿੱਛੇ ਇੱਕ ਪ੍ਰਚਾਰ ਸੰਦੇਸ਼ ਹੈ ਜਿਸਦਾ ਵਿਸ਼ਾ “ਰਾਜ ਦਾ ਸ਼ੁਭਸਮਾਚਾਰ” ਹੈ। ਪਾਠ 7 ਦੇ ਵਿੱਚ ਜਾਣ ਤੋਂ ਪਹਿਲਾਂ ਇਸਨੂੰ ਪੜ੍ਹੋ।

ਯਿਸੂ ਦੇ ਪਹਾੜੀ ਉਪਦੇਸ਼ ਦੇ ਆਧਾਰਿਤ ਤਿੰਨ ਪ੍ਰਚਾਰ ਸੰਦੇਸ਼ਾਂ ਦੀ ਲੜੀ ਤਿਆਰ ਕਰੋ। ਤੁਹਾਡੇ ਪ੍ਰਚਾਰ ਦਾ ਵਿਸਾ “ਪਰਮੇਸ਼ੁਰ ਦੇ ਰਾਜ ਵਿੱਚ ਜੀਵਨ” ਹੋਣਾ ਚਾਹੀਦਾ ਹੈ। ਵਿਖਾਓ ਕਿ ਅੱਜ ਸਾਨੂੰ ਸਵਰਗ ਰਾਜ ਦੇ ਨਾਗਰਿਕਾਂ ਵੱਜੋਂ ਕਿਵੇਂ ਜਿਉਣਾ ਚਾਹੀਦਾ ਹੈ। ਨਿਸਚਿਤ ਕਰੋ ਕਿ ਤੁਸੀਂ ਪ੍ਰਚਾਰ ਨੂੰ ਖੁਸ਼ਖ਼ਬਰੀ ਦੀ ਤਰ੍ਹਾਂ ਸੁਣਾਓ। ਵਿਖਾਓ ਕਿ ਕਿਵੇਂ ਪਰਮੇਸ਼ੁਰ ਦੀ ਕ੍ਰਿਪਾ ਸਾਨੂੰ ਰਾਜ ਦੇ ਨਾਗਰਿਕਾਂ ਦੀ ਤਰ੍ਹਾਂ ਜਿਉਣ ਲਈ ਸ਼ਕਤੀ ਪ੍ਰਦਾਨ ਕਰਦੀ ਹੈ।