Search through all lessons and sections in this course
Searching...
No results found
No matches for ""
Try different keywords or check your spelling
2 min read
by Randall McElwain
ਇਸ ਪਾਠ ਦੇ ਅੰਤ ਵਿੱਚ, ਵਿਦਿਆਰਥੀ ਹੇਠਾਂ ਦੱਸੇ ਕੰਮ ਕਰਨ ਦੇ ਯੋਗ ਹੋਣੇ ਚਾਹੀਦੇ ਹਨ:
(1) ਉਨਾਂ ਯੋਗਤਾਵਾਂ ਨੂੰ ਪਹਿਚਾਣਨਾ ਜਿੰਨਾਂ ਦਾ ਯਿਸੂ ਨੂੰ ਮਹਾਨ ਸਿੱਖਿਅਕ ਬਣਾਇਆ।
(2) ਇੱਕ ਸਿੱਖਿਅਕ ਦੇ ਰੂਪ ਵਿੱਚ ਵਿਕਸਿਤ ਹੋਣ ਦੀ ਅਭਿਆਸਿਕ ਵਿਧੀਆਂ ਨੂੰ ਸਿੱਖਣਾ।
(3) ਅਜਿਹੇ ਅਸਾਇਨਮੈਂਟ ਤਿਆਰ ਕਰਨੇ ਜੋ ਵਿਦਿਆਰਥੀ ਦੀ ਕਲਾਸ ਦੇ ਤਿਆਰੀ ਨੂੰ ਵਿਕਸਿਤ ਕਰਨ।
ਜਦੋਂ ਉਹ ਪੂਰੀ ਤਰ੍ਹਾਂ ਸਿਖ ਜਾਂਦੇ ਹਨ, ਸਾਡੇ ਵਿਦਿਆਰਥੀ ਆਪਣੇ ਸਿੱਖਿਅਕ ਦੀ ਤਰ੍ਹਾਂ ਬਣ ਜਾਂਦੇ ਹਨ।
► ਇਸ ਪਾਠ ਦੇ ਵਿੱਚ ਕੋਈ ਅਸਾਇਨਮੈਂਟ ਸ਼ਾਮਿਲ ਨਹੀਂ ਹਨ। ਪਰ ਸਾਰੇ ਪਾਠ ਦੇ ਦੌਰਾਨ ਛੋਟੇ-ਛੋਟੇ ਅਸਾਇਨਮੈਂਟ ਸ਼ਾਮਿਲ ਕੀਤੇ ਗਏ ਹਨ ਜੋ “ਪਾਠ ਦਾ ਅਭਿਆਸ ਕਰੋ” ਵਿਸ਼ੇ ਦੇ ਅਧੀਨ ਆਉਂਦੇ ਹਨ। ਇੰਨਾਂ ਵਿੱਚੋਂ ਕੁਝ ਦੇ ਵਿੱਚ ਲਿਖਣਾ ਅਤੇ ਅਭਿਆਸਕ ਕੰਮ ਕਰਨੇ ਪੈਣਗੇ। ਬਾਕੀ ਦੇ ਸਿਰਫ਼ ਸੋਚਣ ਅਤੇ ਚਰਚਾ ਕਰਨ ਵਾਲੇ ਅਸਾਇਨਮੈਂਟ ਹਨ। ਜਿਵੇਂ-ਜਿਵੇਂ ਤੁਸੀਂ ਪਾਠ ਦੀ ਸਮੱਗਰੀ ਨੂੰ ਸਿੱਖਦੇ ਹੋ ਇਸ ਦੇ ਨਾਲ ਹਰੇਕ ਅਸਾਇਨਮੈਂਟ ਕਰੋ।
ਸਿੱਖਿਆ ਦੀ ਸ਼ਕਤੀ ਦੇ ਬਾਰੇ ਇੱਕ ਬਹੁਤ ਹੀ ਡੂੰਘਾ ਬਿਆਨ ਯਿਸੂ ਤੋਂ ਮਿਲਿਆ ਹੈ। “ਚੇਲਾ ਗੁਰੂ ਨਾਲੋਂ ਵੱਡਾ ਨਹੀਂ ਪਰ ਹਰੇਕ ਜਦ ਪੂਰਾ ਹੋ ਗਿਆ ਤਦ ਆਪਣੇ ਗੁਰੂ ਵਰਗਾ ਹੋਵੇਗਾ” (ਲੂਕਾ 6:40)। ਯਿਸੂ ਜਾਣਦਾ ਸੀ ਕਿ ਜਦੋਂ ਉਹ ਆਪਣੇ ਚੇਲ੍ਹਿਆਂ ਨੂੰ ਸਿਖਲਾਈ ਦੇ ਦੇਵੇਗਾ, ਤਾਂ ਉਨ੍ਹਾਂ ਵਿੱਚ ਉਸਦੇ ਚਰਿੱਤਰ ਦੀ ਝਲਕ ਨਜ਼ਰ ਆਵੇਗੀ। ਇਸ ਦੇ ਕਾਰਨ, ਯਿਸੂ ਨੇ ਬਹੁਤ ਸਾਰੀ ਊਰਜਾ ਆਪਣੇ ਬਾਰ੍ਹਾਂ ਚੇਲ੍ਹਿਆਂ ਨੂੰ ਸਿਖਾਉਣ ਦੇ ਵਿੱਚ ਲਗਾਈ।
ਕਈ ਕਲੀਸਿਆਵਾਂ ਦੇ ਵਿੱਚ, ਸੰਡੇ ਸਕੂਲ ਦੇ ਸਿੱਖਿਅਕਾਂ ਨੂੰ ਬਿਨਾਂ ਕਿਸੇ ਅਨੁਭਵ ਜਾਂ ਸਿਖਲਾਈ ਦੇ ਇਹ ਕੰਮ ਦੇ ਦਿੱਤਾ ਜਾਂਦਾ ਹੈ। ਨਵੇਂ ਪਰਿਵਰਤਿਤ ਹੋਏ ਲੋਕਾਂ ਅਤੇ ਛੋਟੇ ਬੱਚਿਆਂ ਨੂੰ ਸਿਖਾਉਣ ਦੇ ਬਹੁਤ ਘੱਟ ਹੀ ਯਤਨ ਕੀਤੇ ਜਾਂਦੇ ਹਨ।
ਕਲੀਸਿਆ ਦੇ ਆਗੂਆਂ ਦੇ ਰੂਪ ਵਿੱਚ ਸਾਨੂੰ ਸਿੱਖਿਆ ਨੂੰ ਉਨੀ ਹੀ ਪ੍ਰਾਥਮਿਕਤਾ ਦੇਣੀ ਚਾਹੀਦੀ ਹੈ ਜਿੰਨੀ ਯਿਸੂ ਨੇ ਦਿੱਤੀ ਸੀ। ਜੇਕਰ ਵਿਦਿਆਰਥੀ ਆਪਣੇ ਸਿੱਖਿਅਕ ਵਰਗੇ ਹੋ ਜਾਣਗੇ, ਤਾਂ ਫਿਰ ਸਿਖਾਉਣ ਦਾ ਕੰਮ ਬਹੁਤ ਹੀ ਮਹੱਤਵਪੂਰਨ ਹੈ। ਸਾਨੂੰ ਸਿੱਖਿਅਕਾਂ ਨੂੰ ਯਿਸੂ ਦੇ ਨਮੂਨੇ ਤੇ ਚੱਲਣ ਦੀ ਸਿਖਲਾਈ ਦੇਣੀ ਚਾਹੀਦੀ ਹੈ, ਜੋ ਸਾਡਾ ਮੁੱਖ ਸਿੱਖਿਅਕ ਹੈ।
► ਉਨਾਂ ਗੱਲਾਂ ਦੇ ਬਾਰੇ ਸੋਚੋ ਜੋ ਤੁਸੀਂ ਯਿਸੂ ਦੇ ਸਿਖਾਉਣ ਦੀ ਵਿਧੀ ਦੇ ਬਾਰੇ ਪਹਿਲਾਂ ਤੋਂ ਹੀ ਜਾਣਦੇ ਹੋ। ਅਜਿਹੀਆਂ ਤਿੰਨ ਜਾਂ ਚਾਰ ਵਿਸ਼ੇਸ਼ਤਾਵਾਂ ਦੀ ਸੂਚੀ ਬਣਾਉ ਜਿੰਨਾਂ ਨੇ ਉਸਨੂੰ ਮਹਾਨ ਸਿੱਖਿਅਕ ਬਣਾਇਆ। ਹੁਣ ਤੁਸੀਂ ਉਸ ਸਭ ਤੋਂ ਉੱਤਮ ਸਿੱਖਿਅਕ ਦੇ ਬਾਰੇ ਸੋਚੋ ਜਿਸ ਤੋਂ ਤੁਸੀਂ ਅਧਿਐਨ ਕੀਤਾ ਹੈ। ਅਜਿਹੀਆਂ ਤਿੰਨ ਜਾਂ ਚਾਰ ਵਿਸ਼ੇਸ਼ਤਾਵਾਂ ਦੀ ਸੂਚੀ ਬਣਾਉ ਜਿੰਨਾਂ ਨੇ ਉਸ ਵਿਅਕਤੀ ਨੂੰ ਮਹਾਨ ਸਿੱਖਿਅਕ ਬਣਾਇਆ। ਇੰਨਾਂ ਦੋਨਾਂ ਸੂਚੀਆਂ ਦੇ ਵਿੱਚ ਕਿਹੜੀਆਂ ਵਿਸ਼ੇਸ਼ਤਾਵਾਂ ਮੇਲ ਖਾਂਦੀਆਂ ਹਨ?
ਯਿਸੂ ਦੀ ਸਿੱਖਿਆ ਦੀ ਸਮੱਗਰੀ ਸਿੱਖਿਅਕ ਦੇ ਚਰਿੱਤਰ ਤੇ ਆਧਾਰਿਤ ਸੀ। ਯਿਸੂ ਦੇ ਦਿਲ ਨੇ ਉਸਦੀ ਸਿੱਖਿਆ ਨੂੰ ਨੀਂਹ ਪ੍ਰਦਾਨ ਕੀਤੀ। ਇੱਕ ਮਹਾਨ ਸਿੱਖਿਅਕ ਦਾ ਦਿਲ ਕਸ ਤਰ੍ਹਾਂ ਦਾ ਹੁੰਦਾ ਹੈ?
ਯਿਸੂ, ਜੋ ਮੁੱਖ ਸਿੱਖਿਅਕ ਹੈ, ਉਸਨੇ ਆਪਣੇ ਵਿਦਿਆਰਥੀਆਂ ਦੀਆਂ ਜਰੂਰਤਾਂ ਨੂੰ ਸਮਝਿਆ
► ਪੜ੍ਹੋ ਲੂਕਾ 4:16-21.
ਸਕੂਲ ਦੇ ਅਧਿਆਪਕ ਹਰੇਕ ਦਿਨ ਦੀ ਕਲਾਸ ਦੇ ਲਈ ਸਬਕਾਂ ਦੀ ਯੋਜਨਾ ਬਣਾਉਂਦੇ ਹਨ। ਸਬਕਾਂ ਦੀ ਯੋਜਨਾ ਵਿਖਾਉਂਦੀ ਹੈ ਕਿ ਸਿੱਖਿਅਕ ਹਰੇਕ ਕਲਾਸ ਵਿੱਚ ਕੀ ਪ੍ਰਾਪਤੀ ਕਰੇਗਾ। ਪਾਠ ਦੀ ਯੋਜਨਾ ਵਿੱਚ ਕੁਝ ਅਜਿਹੀਆਂ ਗੱਲਾਂ ਸ਼ਾਮਿਲ ਹੁੰਦੀਆਂ ਹਨ:
ਉਦੇਸ਼: ਵਿਦਿਆਰਥੀ ਅੰਸ਼ਾਂ ਨੂੰ ਜੋੜਣਾ ਸਿੱਖਣਗੇ।
ਕਿਰਿਆ: ਵਿਦਿਆਰਥੀ ਕਲਾਸ ਦੇ ਕੰਮ ਦੀ ਕਿਤਾਬ ਦੇ ਵਿੱਚ ਪੰਨਾ ਨੰਬਰ 89 ਤੇ 1-20 ਦੇ ਵਿੱਚ ਸਮੱਸਿਆਵਾਂ ਹੱਲ ਕਰਨਗੇ।
ਯਿਸੂ ਦੇ ਕੋਲ ਉਸਦੀ ਸੇਵਕਾਈ ਦੇ ਲਈ ਯੋਜਨਾ ਸੀ, ਪਰ ਉਸਦੇ ਸਬਕਾਂ ਦੀ ਯੋਜਨਾ ਕਿਸੇ ਕੰਮ ਕਰਨ ਵਾਲੀ ਕਿਤਾਬ ਦੇ ਉੱਤੇ ਨਹੀਂ ਸਨ। ਇਸਦੀ ਬਜਾਏ, ਯਿਸੂ ਦੇ ਪਾਠ ਉਸਦੇ ਵਿਦਿਆਰਥੀਆਂ ਦੀਆਂ ਜਰੂਰਤਾਂ ਤੇ ਆਧਾਰਿਤ ਸਨ। ਯਿਸੂ ਨੇ ਆਪਣੇ ਸੁਣਨ ਵਾਲਿਆਂ ਨੂੰ ਦੱਸਿਆ ਕਿ ਉਸਨੂੰ ਕਿਹੜੇ ਕੰਮ ਕਰਨ ਦੇ ਲਈ ਭੇਜਿਆ ਗਿਆ ਹੈ:
ਗ਼ਰੀਬਾਂ ਦੇ ਲਈ ਸ਼ੁਭਸਮਾਚਾਰ ਘੋਸ਼ਿਤ ਕਰਨਾ।
ਬੰਧੂਆਂ ਦੇ ਲਈ ਛੁਟਕਾਰੇ ਦੀ ਘੋਸ਼ਣਾ ਕਰਨਾ।
ਅੰਨ੍ਹਿਆਂ ਦੇ ਲਈ ਵੇਖਣ ਦਾ ਪ੍ਰਚਾਰ ਕਰਨਾ।
ਦੱਬੇ-ਕੁਚਲਿਆਂ ਨੂੰ ਛੁਡਾਉਣਾ
ਪ੍ਰਭੂ ਦੇ ਮਨਭਾਉਂਦੇ ਸਾਲ ਦੀ ਘੋਸ਼ਣਾ ਕਰਨਾ (ਲੂਕਾ 4:18-19)।
ਯਿਸੂ ਦੇ ਉਦੇਸ਼ਾਂ ਨੇ ਉਸਦੇ ਵਿਦਿਆਰਥੀਆਂ ਦੀਆਂ ਜਰੂਰਤਾਂ ਪੂਰੀਆਂ ਕੀਤੀਆਂ। ਯਿਸੂ ਦੇ ਵਿਦਿਆਰਥੀ ਉਹ ਧਨੀ ਸਦੂਕੀ ਨਹੀਂ ਸਨ ਜਿੰਨ੍ਹਾਂ ਦਾ ਹੈਕਲ ਤੇ ਕਾਬੂ ਸੀ ਅਤੇ ਜੋ ਮਹਾਂ ਸਭਾ ਦੇ ਵਿੱਚ ਰਾਜਨੀਤਿਕ ਸ਼ਕਤੀ ਰੱਖਦੇ ਸਨ। ਉਸਦੇ ਵਿਦਿਆਰਥੀ ਸਾਧਾਰਨ ਯਹੂਦੀ ਸਨ ਜੋ ਰੋਮ ਦੇ ਦੁਆਰਾ ਦਬਾਏ ਹੋਏ ਸਨ। ਉਨ੍ਹਾਂ ਵਿੱਚੋਂ ਕੁਝ ਅੰਨ੍ਹੇ ਅਤੇ ਲੰਗੜੇ ਸਨ। ਉਨ੍ਹਾਂ ਵਿੱਚੋਂ ਬਹੁਤ ਸਾਰੇ ਲੋਕ ਗ਼ਰੀਬ ਸਨ ਜੋ ਬਹੁਤ ਜਿਆਦਾ ਕਰ ਦੇ ਕਾਰਨ ਦੁੱਖ ਉਠਾ ਰਹੇ ਸਨ।
ਯਿਸੂ ਦੇ ਪਾਠ ਦੀ ਯੋਜਨਾ ਸਾਧਾਰਨ ਸੀ; ਉਹ ਆਪਣੇ ਵਿਦਿਆਰਥੀਆਂ ਦੀਆਂ ਜਰੂਰਤਾਂ ਪੂਰੀਆਂ ਕਰਦਾ ਸੀ। ਉਹ ਬੰਧੂਆਂ ਨੂੰ ਛੁਟਕਾਰਾ ਦਿੰਦਾ ਸੀ। ਉਹ ਅੰਨਿਆਂ ਨੂੰ ਅੱਖਾਂ ਦਿੰਦਾ ਸੀ। ਯਹੂਦੀ ਕਲੰਡਰ ਦੇ ਵਿੱਚ ਪ੍ਰਭੂ ਦਾ ਮਨ ਭਾਉਂਦਾ ਸਾਲ ਜਸ਼ਨ ਮਨਾਉਣ ਦਾ ਸਮਾਂ ਸੀ। ਕਰਜ਼ੇ ਰੱਦ ਕਰ ਦਿੱਤੇ ਜਾਂਦੇ ਸਨ; ਜ਼ਮੀਨ ਇਸਦੇ ਮੂਲ ਪਰਿਵਾਰਾਂ ਨੂੰ ਮੋੜ ਦਿੱਤੀ ਜਾਂਦੀ ਸੀ; ਦਾਸਾਂ ਨੂੰ ਆਜਾਦ ਕਰ ਦਿੱਤਾ ਜਾਂਦਾ ਸੀ। ਯਿਸੂ ਨੇ ਘੋਸ਼ਣਾ ਕੀਤੀ ਕਿ ਉਹ ਪ੍ਰਭੂ ਦੇ ਮਨ ਭਾਉਂਦੇ ਸਾਲ ਨੂੰ ਦੱਬਿਆਂ-ਕੁਚਲਿਆਂ ਦੇ ਲਈ ਲਿਆਉਣ ਆਇਆ ਸੀ।
ਆਪਣੀ ਧਰਤੀ ਤੇ ਸਾਰੀ ਸੇਵਕਾਈ ਦੇ ਦੌਰਾਨ, ਯਿਸੂ ਨੇ ਆਪਣੇ ਵਿਦਿਆਰਥੀਆਂ ਦੀਆਂ ਜਰੂਰਤਾਂ ਨੂੰ ਸੰਬੋਧਿਤ ਕੀਤਾ। ਯਿਸੂ ਨੇ ਹਮੇਸ਼ਾਂ ਲੋਕਾਂ ਨੂੰ ਉਹ ਨਹੀਂ ਦਿੱਤਾ ਜੋ ਉਹ ਚਾਹੁੰਦੇ ਸਨ, ਪਰ ਉਸਨੇ ਉਨ੍ਹਾਂ ਨੂੰ ਉਹ ਦਿੱਤਾ ਜਿਸਦੀ ਉਨ੍ਹਾਂ ਨੂੰ ਜਰੂਰਤ ਸੀ। ਸਾਮਰੀ ਇਸਤਰੀ ਪਾਣੀ ਚਾਹੁੰਦੀ ਸੀ; ਪਰ ਉਸਨੂੰ ਛੁਟਕਾਰੇ ਦੀ ਜਰੂਰਤ ਸੀ (ਯੂਹੰਨਾ 4:7-42)। ਪਤਰਸ ਮੱਛੀਆਂ ਫੜਣਾ ਚਾਹੁੰਦਾ ਸੀ; ਉਸਨੂੰ ਇੱਕ ਮਿਸ਼ਨ ਦੀ ਜਰੂਰਤ ਸੀ (ਮੱਤੀ 4:18-22)। ਹਰੇਕ ਹਾਲਾਤ ਦੇ ਵਿੱਚ, ਯਿਸੂ ਨੇ ਆਪਣੇ ਵਿਦਿਆਰਥੀਆਂ ਦੀਆਂ ਡੂੰਘੀਆਂ ਜਰੂਰਤਾਂ ਪੂਰੀਆਂ ਕੀਤੀਆਂ।
► ਪੜ੍ਹੋ ਮਰਕੁਸ 10:17-22.
ਇਸ ਕਹਾਣੀ ਦੇ ਵਿੱਚ ਧਨੀ ਜੁਆਨ ਜੋ ਯਿਸੂ ਦੇ ਕੋਲ ਆਇਆ ਸੀ, ਵਾਰਤਾਕਾਰ ਉਸਦੇ ਬਾਰੇ ਦੱਸਦਾ ਹੈ, “ਯਿਸੂ ਨੇ ਉਸਦੇ ਵੱਲ ਵੇਖ ਕੇ ਉਸਨੂੰ ਪਿਆਰ ਕੀਤਾ।” ਇੱਥੇ ਵੇਖਣਾ ਸਬਦ ਸਾਧਾਰਨ ਵੇਖਣ ਨੂੰ ਨਹੀਂ ਦਰਸਾਉਂਦਾ ਹੈ। ਇਸਦਾ ਅਰਥ ਹੈ ਨੇੜਤਾ ਤੋਂ ਵੇਖਣਾ ਅਤੇ ਸਪੱਸ਼ਟ ਤੌਰ ਤੇ ਸਮਝਣਾ। ਯਿਸੂ ਨੇ ਇਸ ਜੁਆਨ ਪੁਰਸ਼ ਦੇ ਦਿਲ ਨੂੰ ਵੇਖਿਆ। ਬਾਕੀਆਂ ਨੇ ਸਿਰਫ਼ ਇੱਕ ਧਨੀ ਜੁਆਨ ਨੂੰ ਵੇਖਿਆ ਹੋਵੇਗਾ; ਯਿਸੂ ਨੇ ਇੱਕ ਭੁੱਖੇ ਦਿਲ ਨੂੰ ਵੇਖਿਆ।
► ਪੜ੍ਹੋ ਮਰਕੁਸ 16:1-8.
ਯਿਸੂ ਦਾ ਇਨਕਾਰ ਕਰਨ ਤੋਂ ਬਾਅਦ ਪਤਰਸ ਦੀ ਸ਼ਰਮਿੰਦਗੀ ਦੀ ਕਲਪਨਾ ਕਰੋ। ਇੱਥੋਂ ਤੱਕ ਕਿ ਜਦੋਂ ਉਸਨੇ ਮੁਰਗੇ ਦੇ ਬਾਂਗ ਦੇਣ ਬਾਰੇ ਸੋਚਿਆ ਹੋਵੇਗਾ ਤਾਂ ਯਿਸੂ ਦੇ ਮੁਰਦਿਆਂ ਵਿੱਚੋਂ ਜੀ ਉੱਠਣ ਦੀ ਪ੍ਰਸੰਨਤਾ ਵੀ ਇਸ ਘੱਟ ਗਈ ਹੋਵੇਗੀ। ਇਸ ਹਾਲਾਤ ਦੇ ਵਿੱਚ, ਸਵਰਗਦੂਤ ਨੇ ਮਰੀਅਮ ਨੂੰ ਕਿਹਾ, “ਪਰ ਜਾਓ, ਉਹ ਦੇ ਚੇਲਿਆਂ ਅਤੇ ਪਤਰਸ ਨੂੰ ਆਖੋ ਜੋ ਉਹ ਤੁਹਾਥੋਂ ਅੱਗੇ ਹੀ ਗਲੀਲ ਨੂੰ ਜਾਂਦਾ ਹੈ। ਤੁਸੀਂ ਉਹ ਨੂੰ ਉੱਥੇ ਵੇਖੋਗੇ ਜਿਵੇਂ ਉਹ ਨੇ ਤੁਹਾਨੂੰ ਆਖਿਆ ਸੀ।” ਯਿਸੂ ਜਾਣਦਾ ਸੀ ਕਿ ਸਾਰੇ ਚੇਲ੍ਹਿਆਂ ਨਾਲੋਂ ਜਿਆਦਾ ਇਹ ਪਤਰਸ ਸੀ ਜਿਸਨੂੰ ਇਸਦੇ ਬਾਰੇ ਪੁਨਰ-ਨਿਸਚਿਤ ਹੋਣ ਦੀ ਲੋੜ ਸੀ। ਬਾਕੀਆਂ ਨੇ ਉਸ ਕਮਜੋਰ ਨੂੰ ਵੇਖਿਆ ਜਿਸਨੇ ਆਪਣੇ ਸੁਆਮੀ ਦਾ ਇਨਕਾਰ ਕੀਤਾ; ਯਿਸੂ ਨੇ ਉਸ ਡਿੱਗੇ ਹੋਏ ਚੇਲੇ ਨੂੰ ਵੇਖਿਆ ਜਿਸਨੂੰ ਮੁੜ-ਬਹਾਲੀ ਦੀ ਜਰੂਰਤ ਸੀ।
ਯਿਸੂ ਸਮਝ ਗਿਆ ਕਿ ਜੇਕਰ ਅਸੀਂ ਆਪਣੇ ਵਿਦਿਆਰਥੀਆਂ ਸਮਝਣ ਤੋਂ ਬਿਨਾਂ ਅਸੀਂ ਉਨ੍ਹਾਂ ਨੂੰ ਸਿਖਾ ਨਹੀਂ ਸਕਦੇ। ਜੇਕਰ ਤੁਸੀਂ ਕਿਸੇ ਵਿਦਿਆਰਥੀ ਦਾ ਦਿਲ ਜਿੱਤਣਾ ਚਾਹੁੰਦੇ ਤਾਂ ਤੁਹਾਨੂੰ ਉਸਦੀ ਤਰ੍ਹਾਂ ਸੋਚਣਾ ਪਵੇਗਾ। ਜਿੰਨ੍ਹਾਂ ਨੂੰ ਤੁਸੀਂ ਸਿਖਾਉਂਦੇ ਹੋ ਤੁਹਾਨੂੰ ਉਨ੍ਹਾਂ ਲੋਕਾਂ ਦੇ ਦਿਲਾਂ ਨੂੰ ਸਮਝਣਾ ਚਾਹੀਦਾ ਹੈ। ਇੱਕ ਸਿੱਖਿਅਕ ਦੇ ਤੌਰ ਤੇ ਤੁਹਾਨੂੰ ਆਪਣੇ ਵਿਸ਼ੇ ਦਾ ਅਧਿਐਨ ਕਰਨਾ ਚਾਹੀਦਾ ਹੈ, ਪਰ ਇਸ ਤੋਂ ਵੀ ਵੱਧ, ਤੁਹਾਨੂੰ ਆਪਣੇ ਵਿਦਿਆਰਥੀਆਂ ਦਾ ਅਧਿਐਨ ਕਰਨਾ ਚਾਹੀਦਾ ਹੈ। ਤੁਹਾਨੂੰ ਆਪਣੇ ਵਿਦਿਆਰਥੀਆਂ ਦੀਆਂ ਜਰੂਰਤਾਂ ਨੂੰ ਸਮਝਣਾ ਚਾਹੀਦਾ ਹੈ।
ਪਾਠ ਦਾ ਅਭਿਆਸ ਕਰੋ
► ਜਿੰਨ੍ਹਾਂ ਨੂੰ ਤੁਸੀਂ ਪੜਾਉਂਦੇ ਹੋ ਉਨ੍ਹਾਂ ਬਾਰੇ ਸੋਚੋ (ਚਾਹੇ ਇਹ ਰਸਮੀ ਜਾਂ ਗੈਰ ਰਸਮੀ)। ਸੰਘਰਸ਼ ਕਰਨ ਵਾਲੇ ਵਿਦਿਆਰਥੀ ਤੇ ਧਿਆਨ ਦਿਓ। ਅਜਿਹੀਆਂ ਗੱਲਾਂ ਦੀ ਸੂਚੀ ਬਣਾਉ ਜਿੰਨਾਂ ਦੁਆਰਾ ਤੁਸੀਂ ਇਸ ਵਿਦਿਆਰਥੀ ਦੀਆਂ ਜਰੂਰਤਾਂ ਦੇ ਪ੍ਰਤੀ ਸੇਵਕਾਈ ਕਰ ਸਕਦੇ ਹੋ।
ਯਿਸੂ, ਮੁੱਖ ਸਿੱਖਿਅਕ, ਧੀਰਜਵਾਨ
ਯਿਸੂ ਆਪਣੇ ਵਿਰੋਧ ਕਰਨ ਵਾਲਿਆਂ ਦੇ ਪ੍ਰਤੀ ਧੀਰਜਵਾਨ ਸੀ।
► ਪੜ੍ਹੋ ਯੂਹੰਨਾ 6:41-71.
ਇਹ ਕਹਾਣੀ ਯਿਸੂ ਦੇ ਸੇਵਕਾਈ ਦੇ ਇੱਕ ਮਹੱਤਵਪੂਰਨ ਪਰਿਵਰਤਨ ਬਿੰਦੂ ਦੌਰਾਨ ਬੀਤਦੀ ਹੈ। ਪਿੱਛਲੇ ਸਾਲ ਯਿਸੂ ਨੇ ਬਹੁਤ ਸਾਰੀ ਪ੍ਰਸਿੱਧੀ ਦਾ ਅਨੰਦ ਮਾਣਿਆ ਸੀ। ਲੋਕ ਉਸਦੇ ਚਮਤਕਾਰਾਂ ਬਹੁਤ ਅਚੰਭਿਤ ਹੋਏ ਅਤੇ ਉਨ੍ਹਾਂ ਨੇ ਰੋਟੀਆਂ ਅਤੇ ਮੱਛੀਆਂ ਦਾ ਅਨੰਦ ਲਿਆ। ਹੁਣ ਯਿਸੂ ਨੇ ਘੋਸ਼ਣਾ ਕੀਤੀ, “ਮੈਂ ਜੀਵਨ ਦੀ ਰੋਟੀ ਹਾਂ।” ਉਸਨੇ ਅਜਿਹੀਆਂ ਗੱਲਾਂ ਕਹੀਆਂ ਜਿਸ ਨਾਲ ਉਸਦੇ ਸ੍ਰੋਤੇ ਪਰੇਸ਼ਾਨ ਹੋ ਗਏ। “ਮੈਂ ਤੁਹਾਨੂੰ ਸੱਚ ਸੱਚ ਆਖਦਾ ਹਾਂ ਜੇ ਤੁਸੀਂ ਮਨੁੱਖ ਦੇ ਪੁੱਤ੍ਰ ਦਾ ਮਾਸ ਨਾ ਖਾਓ ਅਤੇ ਉਹ ਦਾ ਲਹੂ ਨਾ ਪੀਓ ਤਾਂ ਤੁਹਾਡੇ ਵਿੱਚ ਜੀਉਣ ਨਹੀਂ ਹੈ।” ਇਸਦੇ ਬਾਅਦ ਉਸਦੇ ਬਹੁਤ ਸਾਰੇ ਚੇਲ੍ਹੇ ਪਿੱਛੇ ਹੱਟ ਗਏ ਅਤੇ ਅੱਗੇ ਤੋਂ ਉਸਦੇ ਨਾਲ ਨਹੀਂ ਚੱਲੇ।
ਯਿਸੂ ਨੇ ਇਹ ਜਾਣਦੇ ਹੋਏ ਵੀ ਹਜ਼ਾਰਾਂ ਨੂੰ ਸਿਖਾਇਆ ਕਿ ਉਹ ਉਸਦੀ ਸਿੱਖਿਆ ਨੂੰ ਸਵੀਕਾਰ ਨਹੀਂ ਕਰਨਗੇ। ਉਸਨੇ ਇਹ ਜਾਣਦੇ ਹੋਏ ਵੀ ਬਾਰ੍ਹਾਂ ਨੂੰ ਸਿਖਾਇਆ ਕਿ ਉਨ੍ਹਾਂ ਵਿੱਚੋਂ ਇੱਕ ਸ਼ੈਤਾਨ ਹੈ (ਯੂਹੰਨਾ 6:70)। ਉਹ ਇੱਕ ਧੀਰਜਵਾਨ ਸਿੱਖਿਅਕ ਸੀ।
ਯਿਸੂ ਉਨ੍ਹਾਂ ਵੀ ਧੀਰਜਵਾਨ ਸੀ ਜੋ ਉਸਨੂੰ ਸਮਝ ਨਹੀਂ ਪਾਉਂਦੇ ਸਨ।
► ਪੜ੍ਹੋ ਮਰਕੁਸ 8:27-33.
ਯਿਸੂ ਉਨ੍ਹਾਂ ਵਿਦਿਆਰਥੀਆਂ ਦੇ ਨਾਲ ਧੀਰਜਵਾਨ ਸੀ ਜੋ ਸਿੱਖਣ ਦੇ ਵਿੱਚ ਧੀਮੇ ਸਨ। ਧਿਆਨ ਦਿਓ ਕਿ ਇੰਜੀਲਾਂ ਦੇ ਵਿੱਚ ਕਿੰਨੀ ਵਾਰ ਚੇਲ੍ਹਿਆਂ ਦੇ ਸ਼ੱਕ ਅਤੇ ਅੰਨ੍ਹੇਪਨ ਦਾ ਜ਼ਿਕਰ ਕੀਤਾ ਗਿਆ ਹੈ। ਇੱਥੋਂ ਤੱਕ ਕਿ ਜਦੋਂ ਪਤਰਸ ਨੇ ਪਹਿਚਾਣ ਲਿਆ, “ਤੁਸੀਂ ਮਸੀਹ ਹੋ”, ਉਸ ਸਮੇਂ ਵੀ ਉਹ ਪੂਰੀ ਤਰ੍ਹਾਂ ਸਮਝ ਨਹੀਂ ਪਾਉਂਦਾ ਕਿ ਇਸਦਾ ਕੀ ਅਰਥ ਹੈ। ਸਿਰਫ਼ ਕੁਝ ਹੀ ਵਚਨਾਂ ਦੇ ਬਾਅਦ ਯਿਸੂ ਪਤਰਸ ਨੂੰ ਉਸਦੇ ਗ਼ਲਤ ਵਿਚਾਰਾਂ ਦੇ ਲਈ ਝਿੜਕਦਾ ਹੈ।
► ਪੜ੍ਹੋ ਯੂਹੰਨਾ 3:1-21.
ਯਿਸੂ ਇੱਕ ਅਜਿਹੇ ਫ਼ਰੀਸੀ ਦੇ ਨਾਲ ਧੀਰਜਵਾਨ ਸੀ ਜਿਸਨੇ ਉਸਦੀ ਸਿੱਖਿਆ ਨੂੰ ਨਹੀਂ ਸਮਝਿਆ। ਜਦੋਂ ਨਿਕੋਦਿਮੁਸ ਉਲਝਣ ਵਿੱਚ ਸੀ, ਤਾਂ ਯਿਸੂ ਨੇ ਹੈਰਾਨ ਹੋ ਕੇ ਪੁੱਛਿਆ, “ਕੀ ਤੂੰ ਇਸਰਾਏਲ ਦਾ ਸਿੱਖਿਅਕ ਹੋ ਕੇ ਵੀ ਇਹ ਗੱਲਾਂ ਨਹੀਂ ਸਮਝਦਾ?” ਨਿਕੋਦਿਮੁਸ ਨੂੰ ਇਹ ਸਮਝ ਜਾਣਾ ਚਾਹੀਦਾ ਸੀ ਹਿਜ਼ਕੀਏਲ ਨੇ ਉਸ ਦਿਨ ਦੇ ਬਾਰੇ ਭਵਿੱਖਬਾਣੀ ਕੀਤੀ ਸੀ ਜਦੋਂ ਇਸਰਾਏਲ ਪਾਣੀ ਅਤੇ ਆਤਮਾ ਤੋਂ ਪੈਦਾ ਹੋਵੇਗਾ। ਪਰ ਉਸਨੂੰ ਛੱਡ ਦੇਣ ਦੀ ਬਜਾਏ, ਯਿਸੂ ਨੇ ਬਹੁਤ ਧੀਰਜ ਦੇ ਨਾਲ ਨਿਕੋਦਿਮੁਸ ਨੂੰ ਇੱਕ ਪਾਠ ਸਿਖਾਇਆ।22F22F[1]
ਇੱਥੇ ਇੱਕ ਸਿੱਖਿਅਕ ਦੇ ਧੀਰਜ ਦਾ ਚੰਗਾ ਇਮਤਿਹਾਨ ਹੈ: “ਮੈਂ ਛੱਡ ਦੇਣ ਤੋਂ ਪਹਿਲਾਂ ਇਸ ਪਾਠ ਨੂੰ ਕਿੰਨੀ ਵਾਰ ਸਿਖਾਉਣ ਦਾ ਇਛੁੱਕ ਹਾਂ?” ਯਿਸੂ ਨੇ ਆਪਣੇ ਵਿਦਿਆਰਥੀਆਂ ਨੂੰ ਕਿੰਨੀ ਵਾਰ ਸਿਖਾਇਆ ਅਤੇ ਦੁਬਾਰਾ ਸਿਖਾਇਆ। ਜੇਕਰ ਉਸਨੇ ਵੇਖਿਆ ਕਿ ਵਿਦਿਆਰਥੀ ਉਸਦੀ ਸਿੱਖਿਆ ਨੂੰ ਸਵੀਕਾਰ ਕਰ ਰਹੇ ਹਨ, ਤਾਂ ਯਿਸੂ ਲਗਾਤਾਰ ਉਨ੍ਹਾਂ ਨੂੰ ਸਿਖਾਉਂਦਾ ਰਿਹਾ। ਯਿਸੂ, ਮੁੱਖ ਸਿੱਖਅਕ, ਧੀਰਜਵਾਨ ਸੀ।
ਪਾਠ ਦਾ ਅਭਿਆਸ ਕਰੋ
► ਕੀ ਤੁਸੀਂ ਆਪਣੇ ਧੀਮੇ ਵਿਦਿਆਰਥੀਆਂ ਨੂੰ ਛੱਡ ਦੇਣ ਦੀ ਪ੍ਰੀਖਿਆ ਵਿੱਚ ਹੋ? ਜਦੋਂ ਉਹ ਤੁਹਾਡੀ ਸਿੱਖਿਆ ਦੇ ਪ੍ਰਤੀ ਪ੍ਰਤੀਕਿਰਿਆ ਨਹੀਂ ਕਰਦੇ ਤਾਂ ਕੀ ਤੁਸੀਂ ਖਿਝ ਜਾਂਦੇ ਹੋ? ਤੁਸੀਂ ਆਪਣੇ ਵਿਦਿਆਰਥੀਆਂ ਦੇ ਲਈ ਮੁੱਖ ਸਿੱਖਿਅਕ ਵਾਲੇ ਧੀਰਜ ਨੂੰ ਕਿਵੇਂ ਵਿਖਾ ਸਕਦੇ ਹੋ?
ਯਿਸੂ, ਮੁੱਖ ਸਿੱਖਿਅਕ, ਆਪਣੇ ਵਿਦਿਆਰਥੀਆਂ ਨਾਲ ਪਿਆਰ ਕਰਦਾ ਸੀ
► ਪੜ੍ਹੋ ਮਰਕੁਸ 6:30-34.
ਯਿਸੂ ਆਪਣੇ ਚੇਲ੍ਹਿਆਂ ਨੂੰ ਗ਼ਲੀਲ ਦੀ ਝੀਲ ਦੇ ਕਿਨਾਰੇ ਇਕਾਂਤ ਵਿੱਚ ਲੈ ਕੇ ਗਿਆ ਜਿੱਥੇ ਉਹ ਭੀੜ ਅਤੇ ਸੇਵਕਾਈ ਦੇ ਦਬਾਅ ਤੋਂ ਕੁਝ ਆਰਾਮ ਕਰ ਸਕਦੇ ਸਨ। ਹਜ਼ਾਰਾਂ ਲੋਕਾਂ ਨੇ ਉਸਨੂੰ ਜਾਂਦੇ ਹੋਏ ਵੇਖਿਆ ਅਤੇ ਉਹ ਯਿਸੂ ਨੂੰ ਮਿਲਣ ਦੇ ਲਈ ਕਿਨਾਰੇ ਦੇ ਵੱਲ ਦੋੜੇ। ਯਿਸੂ ਨੇ ਕਿਨਾਰੇ ਤੇ 5000 ਪੁਰਸ਼ ਅਤੇ ਉਨ੍ਹਾਂ ਦੇ ਨਾਲ ਔਰਤਾਂ ਅਤੇ ਬੱਚਿਆਂ ਦੀ ਵੱਡੀ ਭੀੜ ਨੂੰ ਵੇਖਿਆ। ਤਾਂ ਉਸ ਨੇ ਨਿੱਕਲ ਕੇ ਇੱਕ ਵੱਡੀ ਭੀੜ ਵੇਖੀ “ਅਰ ਉਨ੍ਹਾਂ ਤੇ ਤਰਸ ਖਾਧਾ ਇਸ ਲਈ ਜੋ ਓਹ ਉਨ੍ਹਾਂ ਭੇਡਾਂ ਵਾਂਙੁ ਸਨ ਜਿਨ੍ਹਾਂ ਦਾ ਅਯਾਲੀ ਨਾ ਹੋਵੇ। ਉਹ ਉਨ੍ਹਾਂ ਨੂੰ ਬਹੁਤ ਗੱਲਾਂ ਦਾ ਉਪਦੇਸ਼ ਦੇਣ ਲੱਗਾ” (ਮਰਕੁਸ 6:34)। ਯਿਸੂ, ਮੁੱਖ ਸਿੱਖਿਅਕ ਨੇ ਸਿਖਾਇਆ ਕਿਉਂਕਿ ਉਹ ਆਪਣੇ ਵਿਦਿਆਰਥੀਆਂ ਨੂੰ ਪਿਆਰ ਕਰਦਾ ਸੀ।
ਇਸ ਪਾਠ ਵਿੱਚ ਅਸੀਂ ਪਹਿਲਾਂ ਉਸ ਧਨੀ ਜੁਆਨ ਦੀ ਕਹਾਣੀ ਨੂੰ ਪੜ੍ਹਿਆ ਜੋ ਦੁਖੀ ਹੋ ਕੇ ਚਲਾ ਗਿਆ ਕਿਉਂਕਿ ਉਹ ਯਿਸੂ ਨੇ ਪਿੱਛੇ ਚੱਲਣ ਦੀ ਕੀਮਤ ਨਹੀਂ ਚੁਕਾਉਣੀ ਚਾਹੁੰਦਾ ਸੀ (ਮਰਕੁਸ 10:17-22)। “ਯਿਸੂ ਨੇ ਉਸਦੇ ਵੱਲ ਵੇਖਿਆ, ਅਤੇ ਉਸਨੂੰ ਪਿਆਰ ਕੀਤਾ” (ਮਰਕੁਸ 10:21)। ਮੁੱਖ ਸਿੱਖਿਅਕ ਨੇ ਆਪਣੇ ਵਿਦਿਆਰਥੀਆਂ ਦੇ ਨਾਲ ਪਿਆਰ ਕੀਤਾ, ਅਜਿਹੇ ਵਿਦਿਆਰਥੀ ਦੇ ਨਾਲ ਵੀ ਜੋ ਉਸਨੂੰ ਛੱਡ ਕੇ ਚਲਾ ਗਿਆ।
ਯਿਸੂ ਨੇ ਭੀੜਾਂ, ਵਿਅਕਤੀਆਂ ਅਤੇ ਇੱਥੋਂ ਤੱਕ ਕਿ ਉਨ੍ਹਾਂ ਨੂੰ ਤਰਸ ਨਾਲ ਵੇਖਿਆ ਜਿੰਨ੍ਹਾਂ ਨੇ ਉਸਦਾ ਇਨਕਾਰ ਕੀਤਾ। ਇੱਕ ਪ੍ਰਚਾਰਕ ਨੇ ਆਪਣਾ ਪ੍ਰਚਾਰ ਇਸ ਵਿਸ਼ੇ ਦੇ ਨਾਲ ਕੀਤਾ, “ਯਹੂਦਾਹ, ਅਜਿਹਾ ਚੇਲ੍ਹਾ ਜਿਸਨੂੰ ਯਿਸੂ ਪਿਆਰ ਕਰਦਾ ਸੀ।” ਪ੍ਰਚਾਰਕ ਨੇ ਇਸ ਗੱਲ ਨੂੰ ਸਮਝਿਆ ਕਿ ਯਿਸੂ ਨੇ ਯਹੂਦਾਹ ਨੂੰ ਵੀ ਆਪਣਾ ਪਿਆਰ ਵਿਖਾਇਆ। ਇਹ ਜਾਣਦੇ ਹੋਏ ਵੀ ਕਿ ਯਹੂਦਾਹ ਉਸਨੂੰ ਧੋਖਾ ਦੇਵੇਗਾ, ਯਿਸੂ ਨੇ ਆਪਣੇ ਵਿਦਿਆਰਥੀ ਦੇ ਨਾਲ ਅੰਤ ਤੱਕ ਪਿਆਰ ਕੀਤਾ।
ਸਮੇਂ ਸਿਰ ਆਉਣ ਵਾਲੇ ਵਿਦਿਆਰਥੀ ਨੂੰ ਪਿਆਰ ਕਰਨਾ ਆਸਾਨ ਹੈ, ਜੋ ਸਾਰੇ ਦਿੱਤੇ ਹੋਏ ਕੰਮ ਕਰ ਲੈਂਦਾ ਹੈ ਅਤੇ ਜੋ ਸਿੱਖਣ ਦੇ ਵਿੱਚ ਉਤਸੁਕਤਾ ਵਿਖਾਉਂਦਾ ਹੈ। ਅਜਿਹੇ ਯਹੂਦਾਹ ਨੂੰ ਪਿਆਰ ਕਰਨਾ ਔਖਾ ਹੈ ਜੋ ਸਾਨੂੰ ਧੋਖਾ ਦਿੰਦਾ ਹੈ, ਅਜਿਹਾ ਧਨੀ ਜੁਆਨ ਜੋ ਪਿੱਠ ਫੇਰ ਕੇ ਚਲਾ ਜਾਂਦਾ ਹੈ, ਅਤੇ ਪਤਰਸ ਜੋ ਸਮਝਣ ਦੇ ਵਿੱਚ ਬਾਰ-ਬਾਰ ਅਸਫਲ ਰਹਿੰਦਾ ਹੈ। ਯਿਸੂ, ਮੁੱਖ ਸਿੱਖਿਅਕ, ਵਿਖਾਉਂਦਾ ਹੈ ਕਿ ਸਾਨੂੰ ਅਜਿਹੇ ਵਿਦਿਆਰਥੀਆਂ ਨਾਲ ਵੀ ਪਿਆਰ ਕਰਨਾ ਚਾਹੀਦਾ ਹੈ ਜੋ ਕਠਿਨ ਹਨ।
ਪਾਠ ਦਾ ਅਭਿਆਸ ਕਰੋ
► ਕਿਸੇ ਅਜਿਹੇ ਵਿਦਿਆਰਥੀ ਦੇ ਬਾਰੇ ਸੋਚੋ ਜਿਸਨੂੰ ਪਿਆਰ ਕਰਨਾ ਕਠਿਨ ਹੈ। ਸ਼ਾਇਦ ਇੱਕ ਅਜਿਹਾ ਸਟਾਫ਼ ਮੈਂਬਰ ਜੋ ਤੁਹਾਡੀ ਅਗਵਾਈ ਦਾ ਵਿਰੋਧ ਕਰਦਾ ਹੈ। ਸ਼ਾਇਦ ਇੱਕ ਅਜਿਹਾ ਕਲੀਸਿਆ ਦਾ ਮੈਂਬਰ ਜੋ ਤੁਹਾਡੀ ਆਲੋਚਨਾ ਕਰਦਾ ਹੈ। ਪ੍ਰਾਥਨਾ ਕਰਨੀ ਅਰੰਭ ਕਰੋ, “ਪਰਮੇਸ਼ੁਰ, ਮੈਂ ਇਸ ਵਿਅਕਤੀ ਦੇ ਨਾਲ ਸੰਘਰਸ਼ ਕਰਦਾ ਹਾਂ, ਪਰ ਮੈਂ ਜਾਣਦਾ ਹਾਂ ਕਿ ਤੁਸੀਂ ਉਨ੍ਹਾਂ ਨੂੰ ਪਿਆਰ ਕਰਦੇ ਹੋ। ਮੇਰੀ ਸਹਾਇਤਾ ਕਰੋ ਕਿ ਮੈਂ ਉਨ੍ਹਾਂ ਨੂੰ ਤੁਹਾਡੀਆਂ ਅੱਖਾਂ ਦੇ ਨਾਲ ਵੇਖ ਸਕਾਂ। ਮੈਨੂੰ ਉਨ੍ਹਾਂ ਦੇ ਨਾਲ ਇੰਝ ਪਿਆਰ ਕਰਨਾ ਸਿਖਾ ਜਿਵੇਂ ਯਿਸੂ ਆਪਣੇ ਵਿਦਿਆਰਥੀਆਂ ਨੂੰ ਪਿਆਰ ਕਰਦਾ ਸੀ।”
“ਮੁੱਖ ਸਿੱਖਿਅਕ ਦਾ ਦਿਲ” ਵਿੱਚ ਅਸੀਂ ਯਿਸੂ ਦੇ ਚਰਿੱਤਰ ਬਾਰੇ ਵੇਖਿਆ। ਜੋ ਕੁਝ ਵੀ ਯਿਸੂ ਨੇ ਸਿਖਾਇਆ ਉਹ ਸਭ ਉਸਦੇ ਚਰਿੱਤਰ ਦੇ ਨਿਰਭਰ ਸੀ। “ਮੁੱਖ ਸਿੱਖਿਅਕ ਦੇ ਹੱਥ” ਵਿੱਚ ਅਸੀਂ ਉਨ੍ਹਾਂ ਤਰੀਕਿਆਂ ਬਾਰੇ ਵੇਖਾਂਗੇ ਜੋ ਯਿਸੂ ਨੇ ਇਸਤੇਮਾਲ ਕੀਤੇ। ਜੇਕਰ ਅਸੀਂ ਯਿਸੂ ਦੀ ਤਰ੍ਹਾਂ ਸਿਖਾਉਣਾ ਚਾਹੁੰਦੇ ਹਾਂ, ਤਾਂ ਸਾਨੂੰ ਉਸਦੇ ਤਰੀਕੇ ਅਪਨਾਉਣੇ ਚਾਹੀਦੇ ਹਨ।
ਯਿਸੂ, ਮੁੱਖ ਸਿੱਖਿਅਕ ਨੇ ਆਪਣੇ ਟੀਚਿਆਂ ਦੇ ਬਾਰੇ ਦੱਸਿਆ
► ਪੜ੍ਹੋ ਲੂਕਾ 5:1-11.
ਜਦੋਂ ਯਿਸੂ ਗ਼ਲੀਲ ਦੇ ਸਮੁੰਦਰ ਨੇੜੇ ਸਿਖਾ ਰਿਹਾ ਸੀ, ਤਾਂ ਭੀੜ ਉਸਨੂੰ ਦਬਾਅ ਰਹੀ ਸੀ ਫਿਰ ਉਹ ਸ਼ਮਓਨ ਪਤਰਸ ਦੀ ਬੇੜੀ ਤੇ ਚੜ੍ਹ ਗਿਆ।[1] ਸਿਖਾਉਣ ਦੇ ਬਾਅਦ, ਯਿਸੂ ਸ਼ਮਊਨ ਦੇ ਵੱਲ ਮੁੜਿਆ ਅਤੇ ਕਿਹਾ, “ਭਈ ਡੂੰਘੇ ਪਾਣੀ ਵਿੱਚ ਲੈ ਚੱਲੋ ਅਤੇ ਸ਼ਿਕਾਰ ਲਈ ਆਪਣੇ ਜਾਲ ਪਾਓ” (ਲੂਕਾ 5:4)।
ਸ਼ਮਊਨ ਇੱਕ ਤਜ਼ੁਰਬੇਕਾਰ ਮਛਵਾਰਾ ਸੀ ਜੋ ਬਿਨਾਂ ਕਿਸੇ ਸਫਲਤਾ ਦੇ ਸਾਰੀ ਰਾਤ ਮੱਛੀ ਫੜਣ ਦੇ ਯਤਨਾਂ ਵਿੱਚ ਬਿਤਾ ਚੁੱਕਾ ਸੀ। ਉਹ ਜਾਣਦਾ ਸੀ ਕਿ ਉਸ ਸਮੇਂ ਮੱਛੀ ਫੜਣ ਦੇ ਯਤਨ ਬੇਕਾਰ ਸਨ, ਪਰ ਉਸਨੇ ਯਿਸੂ ਦੇ ਹੁਕਮ ਦੀ ਪਾਲਣਾ ਕੀਤੀ। ਪਤਰਸ ਹੈਰਾਨ ਹੋ ਗਿਆ ਕਿ ਮਛਵਾਰਿਆਂ ਨੇ ਬਹੁਤ ਸਾਰੀਆਂ ਮੱਛੀਆਂ ਫੜੀਆਂ। ਯਿਸੂ ਨੇ ਸ਼ਮਊਨ ਨੂੰ ਕਿਹਾ, “ਏਦੋਂ ਅੱਗੇ ਤੂੰ ਮਨੁੱਖਾਂ ਦਾ ਸ਼ਿਕਾਰੀ ਹੋਂਵੋਗਾ” (ਲੂਕਾ 5:10)।
ਯਿਸੂ ਨੇ ਇੱਕ ਚੰਗੇ ਸਿੱਖਿਅਕ ਦੀ ਤਰ੍ਹਾਂ ਯਿਸੂ ਨੇ ਆਪਣੇ ਟੀਚਿਆਂ ਨੂੰ ਆਪਣੇ ਵਿਦਿਆਰਥੀਆਂ ਦੇ ਅੱਗੇ ਸਪੱਸ਼ਟਤਾ ਨਾਲ ਦੱਸਿਆ। ਪੰਤੇਕੁਸਤ ਦੇ ਦਿਨ, ਪਤਰਸ ਨੇ ਵਿਖਾਇਆ ਕਿ ਉਹ ਉਨ੍ਹਾਂ ਟੀਚਿਆਂ ਨੂੰ ਪੂਰਾ ਕਰਨ ਲਈ ਤਿਆਰ ਹੈ ਜੋ ਯਿਸੂ ਨੇ ਉਸਦੇ ਲਈ ਨਿਰਧਾਰਿਤ ਕੀਤੇ ਹਨ।
ਪ੍ਰਭਾਵਸ਼ਾਲੀ ਸਿੱਖਿਅਕ ਆਪਣੇ ਟੀਚਿਆਂ ਦੇ ਬਾਰੇ ਸਿਖਾਉਂਦੇ ਹਨ। ਉਹ ਵਿਦਿਆਰਥੀਆਂ ਨੂੰ ਕਹਿੰਦੇ ਹਨ, “ਤੁਸੀਂ ਅੱਜ ਇਹ ਸਿੱਖੋਗੇ, ਉਹ ਪੁੱਛਦੇ ਹਨ, “ਅੱਜ ਤੁਸੀਂ ਕੀ ਸਿੱਖਿਆ?” ਉਹ ਇਸ ਗੱਲ ਨੂੰ ਪੱਕਿਆਂ ਕਰਦੇ ਹਨ ਕਿ ਵਿਦਿਆਰਥੀ ਵੇਖਣ ਕਿ ਪਾਠ ਦਾ ਟੀਚਾ ਪੂਰਾ ਹੋ ਗਿਆ ਹੈ।
ਪਾਠ ਦਾ ਅਭਿਆਸ ਕਰੋ
► ਤੁਹਾਡੇ ਸਿਖਾਉਣ ਦੇ ਅੱਗਲੇ ਮੌਕੇ ਵਿੱਚ, ਬੋਰਡ ਦੇ ਉੱਤੇ ਆਪਣੇ ਪਾਠ ਦੇ ਟੀਚੇ ਬਾਰੇ ਲਿਖੋ ਤਾਂ ਕਿ ਵਿਦਿਆਰਥੀ ਇਸਨੂੰ ਵੇਖ ਸਕਣ। ਇਸ ਗੱਲ ਨੂੰ ਪੱਕਿਆਂ ਕਰੋ ਕਿ ਟੀਚੇ ਸਪੱਸ਼ਟ ਹੋਣ ਅਤੇ ਆਸਾਨੀ ਨਾਲ ਸਮਝ ਆ ਜਾਣ। ਸਿੱਖਿਆ ਦੇ ਸ਼ੁਰੂਆਤ ਵਿੱਚ ਟੀਚੇ ਦੀ ਜਾਣ-ਪਛਾਣ ਕਰਵਾਓ। ਪਾਠ ਦੇ ਅੰਤ ਵਿੱਚ, ਵਿਦਿਆਰਥੀਆਂ ਤੋਂ ਪੁੱਛੋ, “ਕੀ ਅਸੀਂ ਆਪਣੇ ਟੀਚੇ ਨੂੰ ਪੂਰਿਆਂ ਕੀਤਾ?”
ਯਿਸੂ, ਮੁੱਖ ਸਿੱਖਿਅਕ ਨੇ ਅਭਿਆਸ ਦੇ ਲਈ ਮੌਕੇ ਪ੍ਰਦਾਨ ਕੀਤੇ
ਪ੍ਰਭਾਵਸ਼ਾਲੀ ਸਿੱਖਿਆ ਜਮਾਤ ਦੇ ਸਿੱਖਿਆ ਵਿਖਿਆਣ ਨਾਲੋਂ ਵੱਧ ਕੇ ਹੈ। ਸੱਚੀ ਸਿੱਖਿਆ ਦੇ ਵਿੱਚ ਲਾਗੂਕਰਨ ਹੁੰਦਾ ਹੈ।
► ਪੜ੍ਹੋ ਲੂਕਾ 10:1-24.
ਇਹ ਚੇਲ੍ਹੇ ਅਜੇ ਪੂਰੀ ਤਰ੍ਹਾਂ ਨਾਲ ਸਿੱਖਿਅਤ ਨਹੀਂ ਹੋਏ ਸਨ, ਪਰ ਯਿਸੂ ਨੇ ਉਨ੍ਹਾਂ ਨੂੰ ਉਨਾਂ ਸਬਕਾਂ ਦਾ ਅਭਿਆਸ ਕਰਨ ਦਿੱਤਾ ਜੋ ਉਹ ਸਿੱਖ ਰਹੇ ਸਨ। ਜਦੋਂ ਚੇਲ੍ਹੇ ਸੇਵਕਾਈ ਦੀ ਯਾਤਰਾ ਤੋਂ ਵਾਪਿਸ ਆਏ, ਉਨ੍ਹਾਂ ਨੇ ਯਿਸੂ ਨੂੰ ਜਾਣਕਾਰੀ ਦਿੱਤੀ। ਉਸਨੇ ਵੇਖਿਆ ਕਿ ਉਨ੍ਹਾਂ ਨੇ ਸਬਕਾਂ ਨੂੰ ਨਹੀਂ ਸਮਝਿਆ ਹੈ, ਇਸ ਲਈ ਉਸਨੇ ਉਨ੍ਹਾਂ ਨੂੰ ਹੋਰ ਜਿਆਦਾ ਹਦਾਇਤਾਂ ਦਿੱਤੀਆਂ। ਉਸਨੇ ਉਨ੍ਹਾਂ ਨੂੰ ਉਤਸ਼ਾਹਿਤ ਵੀ ਕੀਤਾ, “ਧੰਨ ਨੇ ਓਹ ਅੱਖੀਆਂ ਜਿਹੜੀਆਂ ਇਹ ਵੇਖਦੀਆਂ ਹਨ ਜੋ ਤੁਸੀਂ ਵੇਖਦੇ ਹੋ!” (ਲੂਕਾ 10:23) ਯਿਸੂ ਨੇ ਉਨ੍ਹਾਂ ਦੇ ਅਭਿਆਸ ਦਾ ਦਿਸ਼ਾ-ਨਿਰਦੇਸ਼ ਕੀਤਾ।
ਅਭਿਆਸ ਦਾ ਮੌਕਾ ਦੇਣਾ ਹੀ ਕਾਫੀ ਨਹੀਂ ਹੈ; ਅਭਿਆਸ ਦਾ ਮੁਲਾਂਕਣ ਹੋਣਾ ਚਾਹੀਦਾ ਹੈ ਅਤੇ ਇਸ ਤੋਂ ਬਾਅਦ ਹੋਰ ਜਿਆਦਾ ਸਿਖਲਾਈ ਹੋਣੀ ਚਾਹੀਦੀ ਹੈ। ਇੱਕ ਪ੍ਰਸਿੱਧ ਕਹਾਵਤ ਹੈ, “ਅਭਿਆਸ ਸੰਪੂਰਨ ਬਣਾਉਂਦਾ ਹੈ।” ਇਹ ਪੂਰੀ ਤਰ੍ਹਾਂ ਨਾਲ ਸੱਚ ਨਹੀਂ ਹੈ। ਗ਼ਲਤ ਅਭਿਆਸ ਦੇ ਨਾਲ ਸਹੀ ਕੰਮ ਕਰਨ ਦਾ ਨਤੀਜਾ ਨਹੀਂ ਨਿੱਕਲਦਾ ਹੈ। ਇਹ ਕਹਿਣਾ ਬਿਹਤਰ ਹੈ, “ਦਿਸ਼ਾ-ਨਿਰਦੇਸ਼ ਦੇ ਅਧੀਨ ਕੀਤਾ ਅਭਿਆਸ ਸੰਪੂਰਨ ਬਣਾਉਂਦਾ ਹੈ।” ਇੱਕ ਪ੍ਰਭਾਵਸ਼ਾਲੀ ਸਿੱਖਿਅਕ ਆਪਣੇ ਵਿਦਿਆਰਥੀਆਂ ਨੂੰ ਅਭਿਆਸ ਕਰਨ ਦਾ ਮੌਕਾ ਦੇਵੇਗਾ, ਵਿਦਿਆਰਥੀਆਂ ਦੇ ਨਾਲ ਅਭਿਆਸ ਦੀ ਸਮੀਖਿਆ ਕਰੇਗਾ, ਅਤੇ ਫਿਰ ਉਨ੍ਹਾਂ ਦਾ ਦਿਸ਼ਾ-ਨਿਰਦੇਸ਼ ਕਰੇਗਾ ਅਤੇ ਉਤਸ਼ਾਹਿਤ ਕਰੇਗਾ।
ਪੌਲੁਸ ਦਿਸ਼ਾ-ਨਿਰਦੇਸ਼ ਦੇ ਅਧੀਨ ਕੀਤੇ ਅਭਿਆਸ ਦਾ ਮਹੱਤਵ ਜਾਣਦਾ ਸੀ। ਉਸਨੇ ਤਿਮੋਥਿਉਸ ਅਤੇ ਤੀਤੁਸ ਨੂੰ ਸਿਖਲਾਈ ਦਿੱਤੀ ਅਤੇ ਫਿਰ ਉਨ੍ਹਾਂ ਨੂੰ ਸੇਵਕਾਈ ਦੇ ਸਥਾਨ ਤੇ ਰੱਖਿਆ। ਫਿਰ ਉਹ ਤਿਮੋਥਿਉਸ ਅਤੇ ਤੀਤੁਸ ਨੂੰ ਲਿਖੀਆਂ ਪਾਸਬਾਨੀ ਪੱਤ੍ਰੀਆਂ ਦੇ ਵਿੱਚ ਉਨ੍ਹਾਂ ਨੂੰ ਅੱਗਲੀਆਂ ਹਦਾਇਤਾਂ ਦਿੰਦਾ ਹੈ। ਜਦੋਂ ਉਸਦੇ ਵਿਦਿਆਰਥੀ ਉਸ ਦੁਆਰਾ ਸਿਖਾਏ ਸਿਧਾਂਤਾਂ ਦਾ ਅਭਿਆਸ ਕਰ ਰਹੇ ਸਨ ਤਾਂ ਉਸਨੇ ਉਨ੍ਹਾਂ ਦਾ ਦਿਸ਼ਾ-ਨਿਰਦੇਸ਼ ਕੀਤਾ।
ਦੱਖਣੀ ਅਫਰੀਕਾ ਦੇ ਇੱਕ ਸਕੂਲ ਵਿੱਚ, ਹਰੇਕ ਵਿਦਿਆਰਥੀ ਨੇ 1 ਕੁਰਿੰਥੀਆਂ 13 ਨੂੰ ਯਾਦ ਕੀਤਾ ਅਤੇ ਕਲਾਸ ਵਿੱਚ ਸੁਣਾਇਆ। ਇੱਕ ਵਿਦਿਆਰਥੀ ਬਹੁਤ ਹਫ਼ਤਿਆਂ ਤੱਕ ਇਸ ਸੌਂਪੇ ਹੋਏ ਕੰਮ ਦੇ ਨਾਲ ਸੰਘਰਸ਼ ਕਰਦਾ ਰਿਹਾ। ਉਸਨੇ ਚੰਗੀ ਤਰ੍ਹਾਂ ਯਾਦ ਨਹੀਂ ਕੀਤਾ ਅਤੇ ਉਹ ਬਾਕੀ ਦੇ ਵਿਦਿਆਰਥੀਆਂ ਦੇ ਸਾਹਮਣੇ ਬਹੁਤ ਸ਼ਰਮ ਮਹਿਸੂਸ ਕਰਦਾ ਸੀ।ਅੰਤ ਦੇ ਵਿੱਚ ਇੱਕ ਦਿਨ ਉਹ ਵਿਦਿਆਰਥੀ ਇਸ ਪੂਰੇ ਅਧਿਆਏ ਨੂੰ ਕਲਾਸ ਦੇ ਸਾਹਮਣੇ ਬੋਲਣ ਵਿੱਚ ਸਫਲ ਹੋ ਗਿਆ।
ਜਿਵੇਂ ਹੀ ਉਸਨੇ ਇਸਨੂੰ ਖ਼ਤਮ ਕੀਤਾ, ਬਾਕੀ ਦੇ ਵਿਦਿਆਰਥੀਆਂ ਨੇ ਇਸ ਬੱਚੇ ਦੀ ਹੋਂਸਲਾ ਅਫਜਾਈ ਕੀਤੀ। ਕਿਉਂ? ਇਹ ਅਧਿਆਏ ਪਿਆਰ ਦੇ ਬਾਰੇ ਹੈ, ਅਤੇ ਉਨ੍ਹਾਂ ਦੇ ਸਿੱਖਿਅਕ ਨੇ ਵਿਦਿਆਰਥੀਆਂ ਨੂੰ ਸਿਖਾਇਆ ਸੀ ਕਿ ਪਿਆਰ ਦੂਸਰਿਆਂ ਨੂੰ ਉਤਸ਼ਾਹਿਤ ਕਰਦਾ ਹੈ। ਜਦੋਂ ਉਹ ਆਪਣੇ ਜਮਾਤੀ ਨੂੰ ਉਤਸ਼ਾਹਿਤ ਕਰ ਰਹੇ ਸਨ, ਤਾਂ ਇਹ ਵਿਦਿਆਰਥੀ 1 ਕੁਰਿੰਥੀਆਂ 13 ਦੇ ਪਾਠ ਦਾ ਅਭਿਆਸ ਕਰ ਰਹੇ ਸਨ! ਪ੍ਰਭਾਵਸ਼ਾਲੀ ਸਿੱਖਿਅਕ ਆਪਣੇ ਵਿਦਿਆਰਥੀਆਂ ਨੂੰ ਉਤਸ਼ਾਹਿਤ ਕਰਦਾ ਹੈ ਕਿ ਉਹ ਸਿੱਖਣ ਵਾਲੇ ਸਿਧਾਂਤਾਂ ਦਾ ਅਭਿਆਸ ਕਰਨ।
ਪਾਠ ਦਾ ਅਭਿਆਸ ਕਰੋ
► ਆਪਣੇ ਵਿਦਿਆਰਥੀਆਂ ਨੂੰ ਉਨ੍ਹਾਂ ਦੀ ਸਿੱਖਿਆ ਦਾ ਅਭਿਆਸ ਕਰਨ ਦਾ ਮੌਕਾ ਦਿਓ। ਜੇਕਰ ਤੁਸੀਂ ਨਵੇਂ ਪਾਸਬਾਨਾਂ ਨੂੰ ਸਿਖਲਾਈ ਦੇ ਰਹੇ ਹੋ, ਤਾਂ ਉਨ੍ਹਾਂ ਨੂੰ ਪ੍ਰਚਾਰ ਕਰਨ ਦਾ, ਕਿਸੇ ਬਿਮਾਰ ਦੇ ਕੋਲ ਜਾਣ ਦਾ, ਜਾਂ ਕਿਸੇ ਅਵਿਸ਼ਵਾਸੀ ਦੇ ਨਾਲ ਸ਼ੁਭਸਮਾਚਾਰ ਸਾਂਝਾ ਕਰਨ ਦਾ ਮੌਕਾ ਦਿਓ। ਜਦੋਂ ਉਹ ਇਹ ਸਭ ਕਰ ਲੈਂਦੇ ਹਨ, ਉਨ੍ਹਾਂ ਦੀ ਸੇਵਕਾਈ ਦਾ ਮੁਲਾਂਕਣ ਕਰੋ, ਉਨ੍ਹਾਂ ਨੂੰ ਸੁਧਾਰ ਕਰਨ ਦੇ ਲਈ ਸੁਝਾਅ ਦਿਉ, ਅਤੇ ਜਿੰਨਾਂ ਖੇਤਰਾਂ ਦੇ ਵਿੱਚ ਉਹ ਸਫਲ ਰਹੇ ਹਨ ਉਨ੍ਹਾਂ ਨੂੰ ਧਿਆਨ ਵਿੱਚ ਰੱਖ ਕੇ ਉਤਸ਼ਾਹਿਤ ਕਰੋ।
ਯਿਸੂ, ਮੁੱਖ ਸਿੱਖਿਅਕ, ਲਚੀਲਾ ਸੀ
ਉਨ੍ਹਾਂ ਬਹੁਤ ਸਾਰੇ ਸਥਾਨਾਂ ਅਤੇ ਹਲਾਤਾਂ ਦੇ ਬਾਰੇ ਸੋਚੋ ਜਿੱਥੇ ਯਿਸੂ ਨੇ ਸਿਖਾਇਆ। ਉਸਨੇ ਸਿਖਾਇਆ:
ਸਮੁੰਦਰ ਦੇ ਕਿਨਾਰੇ (ਲੂਕਾ 5)
ਤੂਫਾਨ ਦੇ ਦੌਰਾਨ (ਲੂਕਾ 8:22-25)
ਇੱਕ ਵਿਦਿਆਰਥੀ ਨੂੰ ਸੰਘਰਸ਼ ਵਿੱਚ ਛੱਡਣ ਦੁਆਰਾ (ਮੱਤੀ 14:25-33)
ਜਦੋਂ ਉਸਦੇ ਪਾਠ ਵਿੱਚ ਉਸਨੂੰ ਮਿਲਣ ਆਉਣ ਵਾਲਿਆਂ ਦੁਆਰਾ ਰੁਕਾਵਟ ਆਈ (ਮੱਤੀ 12:46-50)
ਇੱਕ ਸਮੇਂ ਹੈਕਲ ਦੇ ਵਿੱਚ ਜਾਣ ਦੌਰਾਨ (ਮੱਤੀ 24)
ਜਦੋਂ ਇੱਕ ਵਾਰ ਕਿਸੇ ਨੇ ਉਸਦੇ ਕਲਾਸ ਦੇ ਕਮਰੇ ਦੀ ਛੱਤ ਉਧੇੜ ਦਿੱਤੀ ਸੀ (ਲੂਕਾ 5:18-26)
ਉਨ੍ਹਾਂ ਵਿਦਿਆਰਥੀਆਂ ਦੇ ਬਾਰੇ ਕਲਪਨਾ ਕਰੋ ਜੋ ਲੂਕਾ 5:18-26 ਦੇ ਵਿੱਚ ਹੋਏ ਚਮਤਕਾਰ ਤੋਂ ਬਾਅਦ ਘਰ ਗਏ ਹੋਣਗੇ। ਉਹ ਯਿਸੂ ਦੀ ਸ਼ਕਤੀ ਬਾਰੇ ਸਿੱਖੇ ਇਸ ਪਾਠ ਨੂੰ ਕਦੇ ਭੁੱਲ ਨਹੀਂ ਸਕੇ ਹੋਣਗੇ। ਲੂਕਾ ਲਿਖਦਾ ਹੈ “ਅਤੇ ਓਹ ਸੱਭੇ ਵੱਡੇ ਹੈਰਾਨ ਹੋ ਕੇ ਪਰਮੇਸ਼ੁਰ ਦੀ ਵਡਿਆਈ ਕਰਨ ਲੱਗੇ ਅਰ ਅੱਤ ਭੈਮਾਨ ਹੋ ਕੇ ਬੋਲੇ ਕਿ ਅਸਾਂ ਅੱਜ ਅਚਰਜ ਗੱਲਾਂ ਵੇਖੀਆਂ ਹਨ।” (ਲੂਕਾ 5:26)
ਯਿਸੂ ਇਹ ਜਾਣਨ ਦੇ ਲਈ ਇੰਨਾ ਲਚੀਲਾ ਸੀ ਕਿ ਇੱਕ ਮਹਾਨ ਸਿੱਖਿਅਕ ਵਿਦਿਆਰਥੀਆਂ ਦੇ ਅਜਿਹੇ ਸਿੱਖਣ ਵਾਲੇ ਪਲ ਲੱਭ ਲੈਂਦਾ ਹੈ ਜਦੋਂ ਉਹ ਸਿੱਖਣ ਦੇ ਲਈ ਤਿਆਰ ਹੁੰਦੇ ਹਨ। ਲੂਕਾ ਇਸ ਸਿਧਾਂਤ ਦੀ ਇੱਕ ਉਦਾਹਰਨ ਦਿੰਦਾ ਹੈ “ਤਾਂ ਐਉਂ ਹੋਇਆ ਕਿ ਉਹ ਕਿਸੇ ਥਾਂ ਪ੍ਰਾਰਥਨਾ ਕਰਦਾ ਸੀ ਅਰ ਜਾਂ ਕਰ ਹਟਿਆ ਤਾਂ ਉਹ ਦੇ ਚੇਲਿਆਂ ਵਿੱਚੋਂ ਇੱਕ ਨੇ ਉਹ ਨੂੰ ਆਖਿਆ, ਪ੍ਰਭੁ ਜੀ ਸਾਨੂੰ ਪ੍ਰਾਰਥਨਾ ਕਰਨੀ ਸਿਖਾਲ ਜਿਵੇਂ ਯੂਹੰਨਾ ਨੇ ਭੀ ਆਪਣੇ ਚੇਲਿਆਂ ਨੂੰ ਸਿਖਾਲੀ।” (ਲੂਕਾ 11:1) ਯਿਸੂ ਨੇ ਇੰਨ੍ਹਾਂ ਪਲਾਂ ਦਾ ਇਸਤੇਮਾਲ ਉਨ੍ਹਾਂ ਨੂੰ ਪ੍ਰਾਥਨਾ ਦੇ ਬਾਰੇ ਸਿਖਾਉਣ ਦੇ ਲਈ ਕੀਤਾ।
ਅੱਠ ਸਾਲਾਂ ਦੀ ਅਬੀਗੈਲ ਆਪਣੇ ਪਿਆਨੋ ਦੇ ਪਾਠ ਲਈ ਕਮਰੇ ਵਿੱਚ ਆਈ ਅਤੇ ਉਸਨੇ ਰੋਣਾ ਸ਼ੁਰੂ ਕਰ ਦਿੱਤਾ, “ਅੱਜ ਸਵੇਰੇ ਮੇਰੀ ਬਿੱਲੀ ਮਰ ਗਈ!” ਅਬੀਗੈਲ ਦੀ ਸੰਗੀਤ ਜਾਂ ਪਿਆਨੋ ਤਕਨੀਕ ਸਿੱਖਣ ਵਿੱਚ ਕੋਈ ਰੁਚੀ ਨਹੀਂ ਸੀ। ਪਰ ਉਸਦੇ ਸਿੱਖਿਅਕ ਨੇ ਉਸਨੂੰ ਪਿਆਨੋ ਦੇ ਸੰਗੀਤ ਦਾ ਇੱਕ ਪੀਸ ਦਿੱਤਾ ਜਿਸਦਾ ਨਾਮ ਸੀ “ਮੇਰਾ ਪਿਆਰਾ ਬਲੂੰਗੜਾ”, ਅਬੀਗੈਲ ਨੇ ਫੈਸਲਾ ਕੀਤਾ, “ਮੈਂ ਇਸਨੂੰ ਆਪਣੀ ਬਿੱਲੀ ਦੀ ਯਾਦ ਵਿੱਚ ਸਿੱਖਣਾ ਚਾਹੁੰਦੀ ਹਾਂ!”
ਸਿੱਖਿਅਕਾਂ ਦੇ ਤੌਰ ਤੇ, ਸਾਨੂੰ ਆਪਣੇ ਵਿਦਿਆਰਥੀਆਂ ਨੂੰ ਸੁਣਨਾ ਚਾਹੀਦਾ ਹੈ ਅਤੇ ਉਨ੍ਹਾਂ ਦੇ ਹਲਾਤਾਂ ਦੇ ਪ੍ਰਤੀ ਪ੍ਰਤੀਕਿਰਿਆ ਕਰਨੀ ਚਾਹੀਦੀ ਹੈ। ਯਿਸੂ, ਮੁੱਖ ਸਿੱਖਿਅਕ ਦੀ ਤਰ੍ਹਾਂ, ਸਾਨੂੰ ਆਪਣੀ ਸਿੱਖਿਆ ਦੇ ਵਿੱਚ ਲਚੀਲੇ ਹੋਣਾ ਚਾਹੀਦਾ ਹੈ। ਸਾਨੂੰ ਆਪਣੇ ਸਬਕਾਂ ਨੂੰ ਆਪਣੇ ਵਿਦਿਆਰਥੀਆਂ ਦੀਆਂ ਜਰੂਰਤਾਂ ਦੇ ਅਨੁਸਾਰ ਢਾਲਣ ਦੇ ਇਛੁੱਕ ਹੋਣਾ ਚਾਹੀਦਾ ਹੈ।
ਪਾਠ ਦਾ ਅਭਿਆਸ ਕਰੋ
► ਕੀ ਤੁਸੀਂ ਆਪਣੀ ਸਿੱਖਿਆ ਦੇ ਵਿੱਚ ਲਚੀਲੇ ਹੋ? ਆਪਣੇ ਇੱਕ ਪਾਠ ਨੂੰ ਸਿਖਾਉਣ ਦੇ ਲਈ ਘੱਟ ਤੋਂ ਘੱਟ ਦੋ ਅਲੱਗ ਤਰੀਕਿਆਂ ਬਾਰੇ ਸੋਚੋ। ਜੇਕਰ ਤੁਸੀਂ ਅਕਸਰ ਲੈਕਚਰ ਦਿੰਦੇ ਹੋ, ਤਾਂ ਇੱਕ ਪਾਠ ਦੀ ਯੋਜਨਾ ਚਰਚਾ ਜਾਂ ਬਿਨਾਂ ਲੈਕਚਰ ਵਾਲੀ ਕਿਰਿਆ ਦੇ ਨਾਲ ਬਣਾਓ। ਜੇਕਰ ਤੁਸੀਂ ਅਕਸਰ ਪਾਵਰਪੋਇੰਟ ਜਾਂ ਹੋਰ ਕੋਈ ਤਕਨੀਕ ਵਰਤਦੇ ਹੋ, ਤਾਂ ਬਿਨਾਂ ਕਿਸੇ ਬਿਜ਼ਲੀ ਉਪਕਰਨ ਦੇ ਪਾਠ ਸਿਖਾਉਣ ਦੀ ਯੋਜਨਾ ਬਣਾਉ। ਜੇਕਰ ਤੁਸੀਂ ਕਿਸੇ ਕਲਾਸ ਰੂਮ ਦੇ ਵਿੱਚ ਸਿਖਾਉਂਦੇ ਹੋ, ਤਾਂ ਇੱਕ ਬਾਹਰੀ ਸਿੱਖਿਆ ਦੀ ਯੋਜਨਾ ਬਣਾਓ ਅਤੇ ਇਸ ਵਿੱਚ ਕੁਦਰਤ ਨੂੰ ਸ਼ਾਮਿਲ ਕਰੋ।
ਯਿਸੂ, ਮੁੱਖ ਸਿੱਖਿਅਕ ਨੇ ਰਚਨਾਤਮਕ ਢੰਗ ਨਾਲ ਵਾਰਤਾਲਾਪ ਕੀਤਾ
ਯਿਸੂ ਨੇ ਕਦੇ ਬੈਠ ਕੇ ਅਜਿਹਾ ਨਹੀਂ ਕਿਹਾ, “ਅੱਜ ਅਸੀਂ ਆਪਣੀ ਕਿਤਾਬ ਦਾ ਪੰਨਾ ਨੰਬਰ 212 ਪੜ੍ਹਾਂਗੇ। ਪਤਰਸ ਤੁਸੀਂ ਸਾਡੇ ਲਈ ਪਹਿਲਾ ਪੈਰਾਗ੍ਰਾਫ ਪੜ੍ਹੋ।” ਇਸਦੀ ਬਜਾਏ ਯਿਸੂ ਨੇ ਵਾਰਤਾਲਾਪ ਕਰਨ ਦੇ ਨਵੇਂ ਤਰੀਕੇ ਲੱਭੇ।
► ਯਿਸੂ ਦੀ ਰਚਨਾਤਮਕ ਸਿੱਖਿਆ ਦੇ ਬਾਰੇ ਇੰਨ੍ਹਾਂ ਸਾਰੇ ਬਿੰਦੂਆਂ ਨੂੰ ਪੜ੍ਹੋ:
ਲੂਕਾ 6:39-42 ਇੱਕ ਅੰਨ੍ਹਾਂ ਦੂਸਰੇ ਅੰਨ੍ਹੇ ਨੂੰ ਰਾਹ ਵਿਖਾਉਣ ਦੇ ਵਿਅੰਗ ਬਾਰੇ ਸੋਚੋ। ਆਪਣੀ ਅੱਖ ਵਿੱਚ ਇੱਕ ਸ਼ਤੀਰ ਵਾਲੇ ਮਨੁੱਖ ਦੁਆਰਾ ਦੂਸਰੇ ਮਨੁੱਖ ਦੀ ਅੱਖ ਵਿੱਚੋਂ ਕੱਖ ਕੱਢਣ ਦਾ ਯਤਨ ਕਰਨ ਵਾਲੇ ਮਨੁੱਖ ਬਾਰੇ ਕਲਪਨਾ ਕਰੋ।
ਲੂਕਾ 18:18-30 ਕੀ ਸੰਸਾਰ ਦੇ ਧਨ ਦਾ ਉਪਯੋਗ ਕਰਕੇ ਸਵਰਗ ਦਾ ਦਾਖਲਾ ਪ੍ਰਾਪਤ ਕੀਤਾ ਜਾ ਸਕਦਾ ਹੈ? ਇੱਕ ਸੂਈ ਦੇ ਨੱਕੇ ਵਿੱਚੋਂ ਦੀ ਊਠ ਲੰਘਾਉਣ ਦਾ ਯਤਨ ਕਰਨ ਦੀ ਕਲਪਨਾ ਕਰੋ!
ਲੂਕਾ 9:46-48 ਯਿਸੂ ਨੇ ਹਲੀਮੀ ਦੀ ਇੱਕ ਸਜੀਵ ਉਦਾਹਰਨ ਦੇਣ ਦੇ ਲਈ ਇੱਕ ਬੱਚੇ ਦਾ ਉਪਯੋਗ ਕੀਤਾ।
ਲੂਕਾ 15:1-7 ਜਦੋਂ ਕੋਈ ਗੁਆਚੀ ਹੋਈ ਆਤਮਾ ਘਰ ਵਾਪਿਸ ਆਉਂਦੀ ਹੈ ਤਾਂ ਪਰਮੇਸ਼ੁਰ ਕਿਵੇਂ ਪ੍ਰਤੀਕਿਰਿਆ ਕਰਦਾ ਹੈ? ਯਿਸੂ ਨੇ ਭੇਡਾਂ ਦੀ ਕੀਮਤ ਲਈ ਕਿਸਾਨਾਂ ਦੇ ਵੱਲ ਸੰਕੇਤ ਕੀਤਾ।
ਲੂਕਾ 15:11-32 ਇੱਕ ਪਿਤਾ-ਪੁਰਖਿਆਂ ਤੇ ਆਧਾਰਿਤ ਸਮਾਜ ਦੇ ਲੋਕਾਂ ਨੂੰ ਸਿਖਾਉਂਦੇ ਹੋਏ ਜਿੱਥੇ ਮੁੱਖ ਅਧਿਕਾਰ ਪਿਤਾ ਦੇ ਕੋਲ ਹੁੰਦਾ ਸੀ, ਯਿਸੂ ਨੇ ਇੱਕ ਅਜਿਹਾ ਦ੍ਰਿਸ਼ਟਾਂਤ ਦੱਸਿਆ ਜਿੱਥੇ ਪਿਤਾ ਨੇ ਆਪਣੇ ਬਾਗੀ ਪੁੱਤਰ ਦਾ ਸੁਆਗਤ ਕਰਕੇ ਸਭਨਾਂ ਨੂੰ ਹੈਰਾਨ ਕਰ ਦਿੱਤਾ।
ਯਿਸੂ ਨੇ ਕਦੇ ਹੀ ਕਿਸੇ ਪ੍ਰਸ਼ਨ ਦਾ ਸਿੱਧਾ ਉੱਤਰ ਦਿੱਤਾ। ਇਸਦੀ ਬਜਾਏ, ਉਹ ਇੱਕ ਕਹਾਣੀ ਜਾਂ ਇੱਕ ਹੋਰ ਪ੍ਰਸ਼ਨ ਦੇ ਨਾਲ ਜੁਆਬ ਦਿੰਦਾ ਸੀ। ਲੂਕਾ 10 ਦੇ ਵਿੱਚ ਇੱਕ ਸ਼ਰਾ ਦੇ ਸਿਖਾਉਣ ਵਾਲੇ ਨੇ ਯਿਸੂ ਤੋਂ ਪੁੱਛਿਆ, “ਹੇ ਗੁਰੂ, ਸਦੀਪਕ ਜੀਵਨ ਪਾਉਣ ਦੇ ਲਈ ਮੈਂ ਕੀ ਕਰਾਂ?” ਯਿਸੂ ਨੇ ਉਸਨੂੰ ਨੇਕ ਸਾਮਰੀ ਦੀ ਕਹਾਣੀ ਦੇ ਨਾਲ ਉੱਤਰ ਦਿੱਤਾ (ਲੂਕਾ 10:25-37)।
ਯਿਸੂ ਜਾਣਦਾ ਸੀ ਕਿ ਵੱਡੇ ਪ੍ਰਸ਼ਨ ਕਿਵੇਂ ਪੁੱਛਣੇ ਹਨ। ਯਿਸੂ ਨੇ ਅਜਿਹੇ ਪ੍ਰਸ਼ਨ ਬਹੁਤ ਘੱਟ ਪੁੱਛੇ ਜਿਸਦਾ ਉੱਤਰ “ਹਾਂ” ਜਾਂ “ਨਾਂਹ” ਨਾਲ ਦਿੱਤਾ ਜਾ ਸਕਦਾ ਸੀ। ਇਸਦੀ ਬਜਾਏ, ਉਸਨੇ ਅਜਿਹੇ ਪ੍ਰਸ਼ਨ ਪੁੱਛੇ ਜਿੰਨਾਂ ਨੇ ਸੁਣਨ ਵਾਲੇ ਦੀਆਂ ਅੱਖਾਂ ਨਵੀਆਂ ਸੰਭਾਵਨਾਵਾਂ ਵੇਖਣ ਦੇ ਲਈ ਖੋਲ੍ਹ ਦਿੱਤੀਆਂ।
► ਇੰਨਾਂ ਉਦਾਹਰਨਾਂ ਨੂੰ ਪੜ੍ਹੋ:
ਲੂਕਾ 7:36-50 ਜਿਸ ਫ਼ਰੀਸੀ ਨੇ ਉਸਦੀ ਆਲੋਚਨਾ ਕੀਤੀ, ਯਿਸੂ ਨੇ ਉਸ ਤੋਂ ਪੁੱਛਿਆ, “ਕਿਹੜਾ ਵੱਧ ਪਿਆਰ ਕਰੇਗਾ, ਜਿਸਨੂੰ ਜਿਆਦਾ ਮਾਫ਼ ਕੀਤਾ ਗਿਆ ਹੈ ਜਾਂ ਉਹ ਜਿਸਨੂੰ ਘੱਟ ਮਾਫ਼ ਕੀਤਾ ਗਿਆ ਹੈ?”
ਮਰਕੁਸ 8:36 ਚੇਲ੍ਹੇਪਨ ਦੇ ਬਾਰੇ ਸਿਖਾਉਂਦੇ ਹੋਏ ਯਿਸੂ ਨੇ ਪੁੱਛਿਆ, “ਮਨੁੱਖ ਨੂੰ ਕੀ ਲਾਭ ਜੇ ਸਾਰੇ ਜਗਤ ਨੂੰ ਕਮਾਵੇ ਅਤੇ ਆਪਣੀ ਜਾਨ ਦਾ ਨੁਕਸਾਨ ਕਰੇ?”
ਲੂਕਾ 6:46 ਜੋ ਲੋਕ ਆਗਿਆਕਾਰੀ ਨਹੀਂ ਕਰਨੀ ਚਾਹੁੰਦੇ ਸਨ, ਯਿਸੂ ਨੇ ਉਨ੍ਹਾਂ ਨੂੰ ਕਿਹਾ, “ਤੁਸੀਂ ਮੈਨੂੰ “ਪ੍ਰਭੁ, ਪ੍ਰਭੁ” ਕਰਕੇ ਕਿਉਂ ਪੁਕਾਰਦੇ ਹੋ ਪਰ ਜੋ ਮੈਂ ਕਹਿੰਦਾ ਹਾਂ ਸੋ ਨਹੀ ਕਰਦੇ?”
ਇੰਨਾਂ ਵਿੱਚੋਂ ਕਿਸੇ ਵੀ ਪ੍ਰਸ਼ਨ ਦਾ ਆਸਾਨ ਉੱਤਰ ਨਹੀਂ ਹੈ। ਇੰਨਾਂ ਵਿੱਚੋਂ ਹਰੇਕ ਸਾਨੂੰ ਯਿਸੂ ਦੀ ਸਿੱਖਿਆ ਬਾਰੇ ਗਹਿਰਾਈ ਦੇ ਨਾਲ ਸੋਚਣ ਲਾ ਦਿੰਦਾ ਹੈ।
ਅਜਿਹੇ ਦੋ ਤਰੀਕੇ ਹਨ ਜਿੰਨਾਂ ਕਰਕੇ ਸਿੱਖਿਅਕ ਪ੍ਰਸ਼ਨਾਂ ਨੂੰ ਚੰਗੀ ਤਰ੍ਹਾਂ ਪੁੱਛਣ ਵਿੱਚ ਅਸਫਲ ਹੋ ਜਾਂਦੇ ਹਨ।
1. ਅਸੀਂ ਅਜਿਹੇ ਪ੍ਰਸ਼ਨ ਪੁੱਛਦੇ ਹਾਂ ਜੋ ਬਹੁਤ ਆਸਾਨ ਹਨ। ਜੇਕਰ ਅਸੀਂ ਚਾਹੁੰਦੇ ਹਾਂ ਕਿ ਸਾਡੇ ਵਿਦਿਆਰਥੀ ਗਹਿਰਾਈ ਦੇ ਨਾਲ ਸੋਚਣ, ਤਾਂ ਫਿਰ ਸਾਨੂੰ ਅਜਿਹੇ ਪ੍ਰਸ਼ਨ ਪੁੱਛਣੇ ਚਾਹੀਦੇ ਹਨ ਜਿੰਨਾਂ ਦੇ ਉੱਤਰ ਹਾਂ ਜਾਂ ਨਾਂਹ ਜਾਂ ਕਿਤਾਬ ਦੇ ਕਿਸੇ ਤੱਥ ਨੂੰ ਵੇਖ ਕੇ ਨਾ ਦਿੱਤਾ ਜਾ ਸਕੇ।
2. ਅਸੀਂ ਉੱਤਰ ਦੇ ਲਈ ਪੂਰੀ ਉਡੀਕ ਨਹੀਂ ਕਰਦੇ। ਖੋਜਕਰਤਾ ਕਹਿੰਦੇ ਹਨ ਕਿ ਜਿਆਦਾਤਰ ਸਿੱਖਿਅਕ ਇੱਕ ਪ੍ਰਸ਼ਨ ਦੇ ਉੱਤਰ ਲਈ ਇੱਕ ਤੋਂ ਦੂਸਰੇ ਵਿਦਿਆਰਥੀ ਦੇ ਜਾਣ ਲਈ ਸਕਿੰਟ ਨਾਲੋਂ ਵੀ ਘੱਟ ਉਡੀਕ ਕਰਦੇ ਹਨ। ਕਿਸੇ ਵਿਦਿਆਰਥੀ ਨੂੰ ਪ੍ਰਸ਼ਨ ਸਮਝਣ ਦੇ ਲਈ ਅਤੇ ਉੱਤਰ ਦੀ ਤਿਆਰੀ ਦਾ ਅਰੰਭ ਕਰਨ ਦੇ ਲਈ ਲਗਭਗ ਤਿੰਨ ਸਕਿੰਟਾਂ ਦਾ ਸਮਾਂ ਲੱਗਦਾ ਹੈ। ਆਪਣੇ ਪ੍ਰਸ਼ਨਾਂ ਦੇ ਉਪਯੋਗ ਵਿੱਚ ਸੁਧਾਰ ਕਰਨ ਦੇ ਲਈ ਉੱਤਰ ਦੇ ਲਈ ਇੱਕ ਵਿਦਿਆਰਥੀ ਤੋਂ ਦੂਸਰੇ ਵੱਲ ਜਾਣ ਦੇ ਵਿੱਚ 7 ਸਕਿੰਟਾਂ ਦੀ ਉਡੀਕ ਕਰੋ।
ਪਾਠ ਦਾ ਅਭਿਆਸ ਕਰੋ
► ਕੀ ਤੁਸੀਂ ਆਪਣੀ ਸਿੱਖਿਆ ਦੇ ਵਿੱਚ ਰਚਨਾਤਮਕ ਹੋ? ਗਲਾਤੀਆਂ 6:7-8 ਦੇ ਉੱਤੇ ਇੱਕ ਪਾਠ ਤਿਆਰ ਕਰੋ। ਬੀਜਣ ਅਤੇ ਵੱਢਣ ਦੇ ਬਾਰੇ ਅਜਿਹੇ ਪ੍ਰਸ਼ਨ ਤਿਆਰ ਕਰੋ ਜੋ ਤੁਹਾਡੇ ਵਿਦਿਆਰਥੀਆਂ ਦੀ ਗਹਿਰਾਈ ਦੇ ਨਾਲ ਸੋਚਣ ਦੇ ਵਿੱਚ ਸਹਾਇਤਾ ਕਰਨ। ਜਦੋਂ ਤੁਸੀਂ ਪ੍ਰਸ਼ਨ ਤਿਆਰ ਕਰ ਲੈਂਦੇ ਹੋ ਤਾਂ ਵਧੇਰੇ ਪ੍ਰਸ਼ਨਾਂ ਦੇ ਲਈ ਇਸ ਪੰਨੇ ਤੇ ਸਭ ਤੋਂ ਹੇਠਾਂ ਦਿੱਤੇ ਅਜਿਹੇ ਪ੍ਰਸ਼ਨ ਵੇਖੋ ਜੋ ਤੁਸੀਂ ਪੁੱਛ ਸਕਦੇ ਹੋ।[2]
ਦ੍ਰਿਸ਼ਟਾਂਤ ਯਿਸੂ ਦੀ ਸਿੱਖਿਆ ਦੇ ਪਸੰਦੀਦਾ ਤਰੀਕਾ ਸੀ। ਕਿਸੇ ਨੇ ਇੱਕ ਦ੍ਰਿਸ਼ਟਾਂਤ ਦੀ ਇਸ ਪ੍ਰਕਾਰ ਪਰਿਭਾਸ਼ਾ ਦਿੱਤੀ “ਸਵਰਗੀ ਪਾਠ ਵਾਲੀ ਧਰਤੀ ਦੀ ਕਹਾਣੀ।” ਯਿਸੂ ਨੇ ਆਮ ਪੇਂਡੂ ਜੀਵਨ ਦਾ ਉਪਯੋਗ ਕੀਤਾ (ਕਿਸਾਨ, ਚਰਵਾਹੇ ਅਤੇ ਭੇਡਾਂ), ਜਾਣੂ ਲੋਕ (ਸਾਮਰੀ, ਚੁੰਗੀ ਲੈਣ ਵਾਲੇ ਅਤੇ ਫਰੀਸੀ) ਅਤੇ ਜਾਣੂ ਹਾਲਾਤ (ਇੱਕ ਗੁਆਚੀ ਹੋਈ ਭੇਡ, ਇੱਕ ਗੁਆਚਿਆ ਹੋਇਆ ਸਿੱਕਾ, ਅਤੇ ਇੱਕ ਭੱਜਿਆ ਹੋਇਆ ਪੁੱਤਰ) ਤਾਂ ਕਿ ਉਹ ਆਪਣੇ ਵਿਦਿਆਰਥੀਆਂ ਦੀ ਰੁਚੀ ਇਸ ਨਾਲ ਜੋੜ ਸਕੇ।
Shepherds Global Classroom ਕੋਰਸ ਦੇ ਬਾਈਬਲ ਦੀ ਵਿਆਖਿਆ ਦੇ ਸਿਧਾਂਤ ਦੇ ਇੱਕ ਹਿੱਸੇ ਵਿੱਚ ਦ੍ਰਿਸ਼ਟਾਂਤਾਂ ਦਾ ਅਰਥ ਕਰਨਾ ਸ਼ਾਮਿਲ ਹੈ। ਇੱਥੇ ਉਸ ਕੋਰਸ ਵਿੱਚ ਸਿਖਾਏ ਜਾਣ ਵਾਲੇ ਸਿਧਾਂਤਾਂ ਦਾ ਸਾਰ ਦਿੱਤਾ ਗਿਆ ਹੈ। ਇੱਕ ਦ੍ਰਿਸ਼ਟਾਂਤ ਦਾ ਅਧਿਐਨ ਕਰਦੇ ਸਮੇਂ ਸਾਨੂੰ ਪੁੱਛਣਾ ਚਾਹੀਦਾ ਹੈ:
(1) ਇਸ ਦ੍ਰਿਸ਼ਟਾਂਤ ਦੀ ਪ੍ਰੇਰਨਾ ਕਿਸ ਪ੍ਰਸ਼ਨ ਜਾਂ ਸਥਿਤੀ ਨੇ ਦਿੱਤੀ?
ਨੇਕ ਸਾਮਰੀ ਦਾ ਦ੍ਰਿਸ਼ਟਾਂਤ ਸ਼ਰਾ ਦੇ ਸਿਖਾਉਣ ਵਾਲੇ ਦੇ ਪ੍ਰਸ਼ਨ ਦਾ ਉੱਤਰ ਸੀ, “ਮੇਰਾ ਗੁਆਂਢੀ ਕੋਣ ਹੈ?” ਯਿਸੂ ਦੀ ਕਹਾਣੀ ਉੱਤਰ ਦਿੰਦੀ ਹੈ, “ਮੇਰੇ ਰਾਹ ਵਿੱਚ ਆਉਣ ਵਾਲਾ ਕੋਈ ਵੀ ਜਰੂਰਤਮੰਦ ਮੇਰਾ ਗੁਆਂਢੀ ਅਤੇ ਮੇਰੀ ਜਿੰਮੇਵਾਰੀ ਹੈ” (ਲੂਕਾ 10:36-37).
ਯਿਸੂ ਨੇ ਉਜਾੜੂ ਪੁੱਤਰ ਦਾ ਦ੍ਰਿਸ਼ਟਾਂਤ ਉਨ੍ਹਾਂ ਧਾਰਮਿਕ ਆਗੂਆਂ ਨੂੰ ਦਿੱਤਾ ਸੀ ਜੋ ਪਾਪੀਆਂ ਦੇ ਨਾਲ ਉਸਦੀ ਦੋਸਤੀ ਦੀ ਅਲੋਚਨਾ ਕਰ ਰਹੇ ਸਨ। “ਸਭ ਮਸੂਲੀਏ ਅਰ ਪਾਪੀ ਉਹ ਦੀ ਸੁਣਨ ਲਈ ਉਹ ਦੇ ਨੇੜੇ ਆਉਂਦੇ ਸਨ। ਅਤੇ ਫ਼ਰੀਸੀ ਅਰ ਗ੍ਰੰਥੀ ਦੋਵੇਂ ਬੁੜਬੁੜਾ ਕੇ ਬੋਲੇ ਭਈ ਇਹ ਤਾਂ ਪਾਪੀਆਂ ਨੂੰ ਕਬੂਲ ਕਰਦਾ ਹੈ ਅਤੇ ਉਨ੍ਹਾਂ ਨਾਲ ਖਾਂਦਾ ਹੈ। ਤਾਂ ਉਸ ਨੇ ਉਨ੍ਹਾਂ ਨੂੰ ਇਹ ਦ੍ਰਿਸ਼ਟਾਂਤ ਦੇ ਕੇ ਆਖਿਆ।” (ਲੂਕਾ 15:1-3)।
ਇੱਕ ਚਰਵਾਹੇ ਨੇ ਆਪਣੀ ਭੇਡ ਗੁਆ ਦਿੱਤੀ। ਜਦੋਂ ਉਸਨੇ ਉਹ ਨੂੰ ਲੱਭ ਲਿਆ ਤਾਂ ਉਹ ਬਹੁਤ ਪ੍ਰਸੰਨ ਹੋਇਆ!
ਇੱਕ ਔਰਤ ਨੇ ਆਪਣਾ ਸਿੱਕਾ ਗੁਆ ਦਿੱਤਾ। ਜਦੋਂ ਉਸਨੂੰ ਉਹ ਲੱਭ ਪਿਆ ਤਾਂ ਉਹ ਬਹੁਤ ਪ੍ਰਸੰਨ ਹੋਈ!
ਇੱਕ ਪਿਤਾ ਆਪਣਾ ਪੁੱਤਰ ਗੁਆ ਦਿੱਤਾ। ਜਦੋਂ ਉਹ ਵਾਪਿਸ ਆਇਆ ਤਾਂ ਉਹ ਬਹੁਤ ਪ੍ਰਸੰਨ ਹੋਇਆ!
ਯਿਸੂ ਨੇ ਦੱਸਿਆ, “ਜਦੋਂ ਮੈਂ ਪਾਪੀਆਂ ਦੇ ਨਾਲ ਖਾਂਦਾ ਹਾਂ ਤਾਂ ਤੁਹਾਨੂੰ ਹੈਰਾਨ ਨਹੀਂ ਹੋਣਾ ਚਾਹੀਦਾ। ਜਦੋਂ ਕੋਈ ਪਾਪੀ ਤੌਬਾ ਕਰਦਾ ਹੈ ਤਾਂ ਸਵਰਗ ਵਿੱਚ ਖੁਸ਼ੀ ਮਨਾਈ ਜਾਂਦੀ ਹੈ!”
ਜੇਕਰ ਸਾਡੀ ਵਿਆਖਿਆ ਉਸ ਪ੍ਰਸ਼ਨ ਦਾ ਉੱਤਰ ਨਹੀਂ ਦਿੰਦੀ ਜਾਂ ਉਹ ਹਾਲਾਤ ਨੂੰ ਸੰਬੋਧਿਤ ਨਹੀਂ ਕਰਦੀ ਜਿਸਨੇ ਯਿਸੂ ਦੀ ਕਹਾਣੀ ਨੂੰ ਪ੍ਰੇਰਿਤ ਕੀਤਾ, ਤਾਂ ਫਿਰ ਅਸੀਂ ਦ੍ਰਿਸ਼ਟਾਂਤ ਦੇ ਸਹੀ ਬਿੰਦੂ ਨੂੰ ਪੇਸ਼ ਨਹੀਂ ਕੀਤਾ ਹੈ।
(2) ਦ੍ਰਿਸ਼ਟਾਂਤ ਦਾ ਮੁੱਢਲਾ ਬਿੰਦੂ (ਜਾਂ ਜਿਆਦਾ ਬਿੰਦੂ) ਕੀ ਹੈ?
ਇੱਕ ਦ੍ਰਿਸ਼ਟਾਂਤ ਦੇ ਵਿੱਚ ਕਹਾਣੀ ਦੇ ਹਰੇਕ ਪਾਤਰ ਦੇ ਲਈ ਇੱਕ ਮੁੱਖ ਬਿੰਦੂ ਹੁੰਦਾ ਹੈ। ਦ੍ਰਿਸ਼ਟਾਂਤ ਦਾ ਮੁੱਢਲਾ ਪਾਠ ਸਿੱਧੇ ਤੌਰ ਤੇ ਉਸ ਪ੍ਰਸ਼ਨ ਜਾਂ ਹਾਲਾਤ ਦੇ ਨਾਲ ਜੁੜਿਆ ਹੋਵੇਗਾ ਜਿਸਨੇ ਦ੍ਰਿਸ਼ਟਾਂਤ ਨੂੰ ਪ੍ਰੇਰਿਤ ਕੀਤਾ ਸੀ। ਬਾਕੀ ਦੇ ਪਾਠ ਉਸ ਕਹਾਣੀ ਦੇ ਪਾਤਰਾਂ ਦੇ ਵਿੱਚੋਂ ਨਿੱਕਲਦੇ ਹਨ।
ਉਜਾੜੂ ਪੁੱਤਰ ਦੀ ਕਹਾਣੀ ਦੇ ਵਿੱਚ ਤਿੰਨ ਪਾਤਰ ਪਾਏ ਜਾਂਦੇ ਹਨ। ਅਸੀਂ ਪਹਿਲਾਂ ਹੀ ਵੇਖ ਚੁੱਕੇ ਹਾਂ ਕਿ ਕਹਾਣੀ ਦਾ ਮੁੱਢਲਾ ਪਾਠ ਇਹ ਹੈ ਕਿ ਜਦੋਂ ਕੋਈ ਪਾਪੀ ਤੌਬਾ ਕਰਦਾ ਹੈ ਤਾਂ ਸਵਰਗ ਵਿੱਚ ਖੁਸ਼ੀ ਮਨਾਈ ਜਾਂਦੀ ਹੈ। ਇਹ ਪਾਠ ਉਸ ਪ੍ਰਸ਼ਨ ਦਾ ਉੱਤਰ ਦਿੰਦਾ ਹੈ ਜਿਸਨੇ ਯਿਸੂ ਦੀ ਕਹਾਣੀ ਨੂੰ ਪ੍ਰੇਰਿਤ ਕੀਤਾ। ਦ੍ਰਿਸ਼ਟਾਂਤ ਦਾ ਹਰੇਕ ਪਾਤਰ ਕਹਾਣੀ ਦੇ ਮੁੱਢਲੇ ਸੰਦੇਸ਼ ਦੇ ਨਾਲ ਜੁੜੇ ਹੋਰ ਪਾਠ ਸਿਖਾ ਸਕਦੇ ਹਨ। ਪਿਤਾ ਸਵਗਰੀ ਪਿਤਾ ਦੇ ਅਦਭੁੱਤ ਪਿਆਰ ਦੇ ਬਾਰੇ ਸਿਖਾਉਂਦਾ ਹੈ। ਊਜਾੜੂ ਪਾਪ ਦੀ ਕੀਮਤ ਅਤੇ ਤੌਬਾ ਦੀ ਸੰਭਾਵਨਾ ਦੋਵਾਂ ਦੇ ਬਾਰੇ ਸਿਖਾਉਂਦਾ ਹੈ। ਵੱਡਾ ਭਰਾ ਸਾਨੂੰ ਚੇਤਾਵਨੀ ਦਿੰਦਾ ਹੈ ਕਿ ਅਸੀਂ ਚੰਗੇ ਪੁੱਤਰ ਪ੍ਰਤੀਤ ਹੁੰਦੇ ਹੋਏ ਵੀ ਪਿਤਾ ਦੇ ਪਿਆਰ ਦੇ ਸੁਭਾਗ ਤੋਂ ਵਾਂਝੇ ਰਹਿ ਸਕਦੇ ਹਾਂ।
(3) ਇੱਕ ਦ੍ਰਿਸ਼ਟਾਂਤ ਦੇ ਲਈ ਕਿਹੜੇ ਸੱਭਿਆਚਾਰਕ ਵੇਰਵੇ ਮਹੱਤਵਪੂਰਨ ਹਨ?
ਯਿਸੂ ਦੇ ਦ੍ਰਿਸ਼ਟਾਂਤ ਅਕਸਰ ਸੱਭਿਆਚਾਰ ਦੇ ਕਾਨੂੰਨਾਂ ਦੇ ਵਿਰੋਧ ਵਿੱਚ ਹੁੰਦੇ ਸਨ। ਇਸੇ ਨੇ ਦ੍ਰਿਸ਼ਟਾਂਤਾਂ ਨੂੰ ਯਾਦਗਾਰ ਬਣਾਇਆ: ਇੱਕ ਪਿਤਾ ਆਪਣੇ ਬਾਗੀ ਪੁੱਤਰ ਦਾ ਸੁਆਗਤ ਕਰਨ ਦੇ ਲਈ ਭੱਜ ਕੇ ਆਉਂਦਾ ਹੈ; ਇੱਕ ਸਾਮਰੀ ਨਾਇਕ ਬਣ ਜਾਂਦਾ ਹੈ; ਇੱਕ ਸ਼ਕਤੀਹੀਨ ਵਿਧਵਾ ਇੱਕ ਸ਼ਕਤੀਸ਼ਾਲੀ ਨਿਆਂਈ ਨੂੰ ਹਰਾ ਦਿੰਦੀ ਹੈ। ਜਿੰਨਾ ਬਿਹਤਰ ਅਸੀਂ ਦ੍ਰਿਸ਼ਟਾਂਤ ਦੇ ਸੱਭਿਆਚਾਰਕ ਮਾਹੋਲ ਨੂੰ ਸਮਝਦੇ ਹਾਂ, ਉਨਾ ਹੀ ਬਿਹਤਰ ਅਸੀਂ ਯਿਸੂ ਦੇ ਸੰਦੇਸ਼ ਨੂੰ ਸਮਝ ਪਾਵਾਂਗੇ।
ਡਾ. ਹੋਵਾਰਡ ਹੈਂਡ੍ਰਿਕ[1] ਨੇ 60 ਸਾਲਾਂ ਤੋਂ ਜਿਆਦਾ ਡਾਲਸ ਥਿਓਲੋਜੀਕਲ ਸੈਮੀਨਰੀ ਦੇ ਵਿੱਚ ਪੜਾਇਆ। ਉਸਨੇ ਆਪਣੇ ਪੇਸ਼ੇ ਦੇ ਦੌਰਾਨ 10,000 ਵਿਦਿਆਰਥੀਆਂ ਨੂੰ ਸਿਖਾਇਆ। ਉਸਦੀ ਇੱਕ ਬਹੁਤ ਪ੍ਰਭਾਵਸ਼ਾਲੀ ਕਿਤਾਬ ਇੱਕ ਛੋਟੀ ਜਿਹੀ ਕਿਤਾਬ ਹੈ ਜਿਸਦੇ ਵਿੱਚ ਉਸਦੇ ਫਲਸਫੇ ਨੂੰ “ਇੱਕ ਸਿੱਖਿਅਕ ਦੇ ਸੱਤ ਨਿਯਮਾਂ” ਵਿੱਚ ਸੰਖੇਪ ਨਾਲ ਦੱਸਿਆ ਗਿਆ ਹੈ। ਇਹ ਨਿਯਮ ਯਿਸੂ ਦੀ ਸਿੱਖਿਆ ਸ਼ੈਲੀ ਤੇ ਆਧਾਰਿਤ ਹਨ। ਜਿਵੇਂ ਤੁਸੀਂ ਇੰਨਾਂ ਸਿਧਾਂਤਾਂ ਨੂੰ ਲਾਗੂ ਕਰੋਗੇ ਤਾਂ ਤੁਸੀਂ ਹੋਰ ਜਿਆਦਾ ਪ੍ਰਭਾਵਸ਼ਾਲੀ ਸਿੱਖਿਅਕ ਬਣ ਜਾਓਗੇ।
ਸਿੱਖਿਅਕ ਦਾ ਨਿਯਮ
ਸਿੱਖਿਅਕ ਦਾ ਨਿਯਮ: ਜੇਕਰ ਤੁਸੀਂ ਅੱਜ ਵਧਣਾ ਬੰਦ ਕਰ ਦੇਵੋਗੇ, ਤੁਸੀਂ ਕੱਲ ਨੂੰ ਸਿਖਾਉਣਾ ਬੰਦ ਕਰ ਦੇਵੋਗੇ।
ਡਾ. ਹੈਂਡ੍ਰਿਕ ਪੁੱਛਦਾ ਹੈ, “ਕੀ ਤੁਸੀਂ ਇੱਕ ਫਾਲਤੂ ਤਲਾਬ ਤੋਂ ਪੀਣਾ ਚਾਹੋਗੇ ਜਾਂ ਵੱਗਦੇ ਹੋਏ ਸੋਤੇ ਤੋਂ?” ਵੱਗਦੇ ਹੋਏ ਸੋਤੇ ਦਾ ਤਾਜ਼ਾ ਪਾਣੀ ਅਜਿਹੇ ਪਾਣੀ ਨਾਲੋਂ ਬਿਹਤਰ ਜੋ ਬਦਬੂਦਾਰ ਅਤੇ ਬਿਨਾਂ ਆਕਰਸ਼ਨ ਵਾਲਾ ਹੈ।
ਕੁਝ ਸਿੱਖਿਅਕ ਕਈ ਸਾਲਾਂ ਤੱਕ ਆਪਣੇ ਵਿਸ਼ੇ ਤੇ ਕੋਈ ਨਵੀਂ ਕਿਤਾਬ ਨਹੀਂ ਪੜਦੇ ਜਾਂ ਕਿਸੇ ਨਵੇਂ ਵਿਚਾਰ ਨੂੰ ਪ੍ਰਾਪਤ ਨਹੀਂ ਕਰਦੇ। ਉਨ੍ਹਾਂ ਦੀ ਸਿੱਖਿਆ ਬਦਬੂਦਾਰ ਅਤੇ ਰੁਕੇ ਹੋਏ ਤਲਾਬ ਵਰਗੀ ਬਣ ਜਾਂਦੀ ਹੈ। ਸਿੱਖਿਅਕਾਂ ਦੇ ਰੂਪ ਵਿੱਚ ਸਾਨੂੰ ਸਦਾ ਸਿੱਖਦੇ ਰਹਿਣਾ ਚਾਹੀਦਾ ਹੈ ਜਿਵੇਂ ਪਾਸਬਾਨਾਂ ਨੂੰ ਲਗਾਤਾਰ ਪਰਮੇਸ਼ੁਰ ਦੇ ਵਚਨ ਦਾ ਅਧਿਐਨ ਕਰਕੇ ਨਵਾਂ ਪ੍ਰਕਾਸ਼ ਪ੍ਰਾਪਤ ਕਰਦੇ ਰਹਿਣਾ ਚਾਹੀਦਾ ਹੈ।
ਪਾਠ ਦਾ ਅਭਿਆਸ ਕਰੋ
► ਕਲਪਨਾ ਕਰੋ ਕਿ ਇੱਕ ਵਿਦਿਆਰਥੀ ਤੁਹਾਨੂੰ ਪੁੱਛੇ, “ਸਿੱਖਿਅਕ ਜੀ, ਤੁਸੀਂ ਬਾਈਬਲ ਦੇ ਵਿੱਚੋਂ ਹਾਲ ਹੀ ਦੇ ਵਿੱਚ ਕੀ ਸਿੱਖਿਆ ਹੈ?” ਕੀ ਤੁਹਾਡਾ ਉੱਤਰ ਇਸ ਹਫ਼ਤੇ, ਇਸ ਮਹੀਨੇ, ਇਸ ਸਾਲ, ਜਾਂ ਲੰਬਾ ਸਮਾਂ ਪਹਿਲਾਂ ਦਾ ਹੋਵੇਗਾ? ਕੀ ਤੁਸੀਂ ਪ੍ਰਤੀਦਨ ਪਰਮੇਸ਼ੁਰ ਦੇ ਵਚਨ ਦੇ ਗਿਆਨ ਵਿੱਚ ਵਧ ਰਹੇ ਹੋ?
ਸਿੱਖਿਆ ਦਾ ਕਾਨੂੰਨ
ਸਿੱਖਿਆ ਦਾ ਕਾਨੂੰਨ : ਲੋਕ ਕਿਵੇਂ ਸਿੱਖਦੇ ਹਨ ਨਿਰਭਰ ਕਰਦਾ ਹੈ ਕਿ ਤੁਸੀਂ ਕਿਵੇਂ ਸਿਖਾਉਂਦੇ ਹੋ।
ਯਿਸੂ ਨੇ ਚਰਵਾਹਿਆਂ ਨੂੰ ਭੇਡਾਂ ਦੇ ਬਾਰੇ ਕਹਾਣੀਆਂ ਸੁਣਾ ਕੇ ਸਿਖਾਇਆ; ਉਸਨੇ ਮਛਵਾਰਿਆਂ ਨੂੰ ”ਮਨੁੱਖਾਂ ਨੂੰ ਫੜਣ ਵਾਲੇ”, ਦੱਸ ਕੇ ਸਿਖਾਇਆ; ਉਸਨੇ ਖੂਹ ਤੇ ਆਈ ਇਸਤਰੀ ਨੂੰ ਪਾਣੀ ਦੇ ਬਾਰੇ ਗੱਲ ਕਰਕੇ ਸਿਖਾਇਆ। ਯਿਸੂ ਜਾਣਦਾ ਸੀ ਕਿ ਇੱਕ ਪ੍ਰਭਾਵਸ਼ਾਲੀ ਸਿੱਖਿਅਕ ਹਰੇਕ ਵਿਦਿਆਰਥੀ ਦੀ ਜਰੂਰ ਦੇ ਅਨੁਸਾਰ ਸਿੱਖਿਆ ਨੂੰ ਢਾਲਦਾ ਹੈ।
[2]ਡਾ. ਹੈਂਡ੍ਰਿਕ ਸਿੱਖਿਆ ਦੇ ਕੰਮ ਦੀ ਤੁਲਨਾ ਇੱਕ ਫੁੱਟਬਾਲ ਦੇ ਕੋਚ ਨਾਲ ਕਰਦਾ ਹੈ। ਕੋਚ ਆਪ ਨਹੀਂ ਖੇਡਦਾ; ਕੋਚ ਖਿਡਾਰੀਆਂ ਨੂੰ ਉਤਸੁਕਤਾ ਦਿੰਦਾ ਹੈ ਅਤੇ ਉਨ੍ਹਾਂ ਦੀ ਅਗਵਾਈ ਕਰਦਾ ਹੈ। ਇਸੇ ਪ੍ਰਕਾਰ ਇੱਕ ਉੱਤਮ ਸਿੱਖਿਅਕ ਸਾਰੇ ਕੰਮ ਕਲਾਸ ਵਿੱਚ ਸਿਖਾਉਣ ਦੁਆਰਾ ਨਹੀਂ ਕਰਦਾ। ਇੱਕ ਉੱਤਮ ਸਿੱਖਿਅਕ ਹਰੇਕ ਵਿਦਿਆਰਥੀ ਨੂੰ ਉਸ ਤਰੀਕੇ ਨਾਲ ਸਿੱਖਣ ਦੇ ਲਈ ਪ੍ਰੇਰਿਤ ਕਰਦਾ ਹੈ ਜੋ ਉਸ ਵਿਦਿਆਰਥੀ ਦੇ ਲਈ ਪ੍ਰਭਾਵਸ਼ਾਲੀ ਹੈ।
ਮਾਈਕਾਹ ਇੱਕ ਬਾਈਬਲ ਕਲਾਸ ਵਿੱਚ ਵਿਦਿਆਰਥੀ ਸੀ। ਸਿੱਖਿਅਕ ਚਾਹੁੰਦਾ ਸੀ ਕਿ ਸਾਰੇ ਵਿਦਿਆਰਥੀ ਪ੍ਰੀਖਿਆ ਲਿਖਣ ਦੇ ਲਈ ਧਿਆਨਪੂਰਵਕ ਨੋਟਸ ਲਿਖਣ। ਮਾਈਕਾਹ ਨੋਟਸ ਨਹੀਂ ਲਿਖਦਾ ਸੀ। ਇਸਦੀ ਬਜਾਏ, ਜਦੋਂ ਸਿੱਖਿਅਕ ਸਿਖਾਉਂਦਾ ਸੀ ਤਾਂ ਮਾਈਕਾਹ ਆਪਣੀ ਨੋਟ ਬੁੱਕ ਤੇ ਤਸਵੀਰਾਂ ਬਣਾਉਂਦਾ ਰਹਿੰਦਾ ਸੀ। ਸਿੱਖਿਅਕ ਨੂੰ ਡਰ ਸੀ ਕਿ ਮਾਈਕਾਹ ਸੁਣ ਨਹੀਂ ਰਿਹਾ ਸੀ। ਉਸਨੇ ਕਈ ਵਾਰ ਕਿਹਾ, “ਮਾਈਕਾਹ, ਕ੍ਰਿਪਾ ਕਰਕੇ ਤਸਵੀਰਾਂ ਨਾ ਬਣਾਉ। ਜੋ ਮੈਂ ਸਿਖਾ ਰਿਹਾ ਹਾਂ ਉਹ ਲਿਖੋ।” ਮਾਈਕਾਹ ਨੇ ਸਿੱਖਿਅਕ ਦੇ ਕਹੇ ਅਨੁਸਾਰ ਕਰਨ ਦਾ ਯਤਨ ਕੀਤਾ ਪਰ ਉਹ ਬਹੁਤ ਖਿੱਝ ਗਿਆ।
ਫਿਰ ਸਿੱਖਿਅਕ ਨੂੰ ਡਾ. ਹੈਂਡ੍ਰਿਕ ਦਾ ਸਿੱਖਿਆ ਦਾ ਨਿਯਮ ਯਾਦ ਆਇਆ। ਉਸਨੇ ਕਿਹਾ, “ਮਾਈਕਾਹ, ਆਉ ਇੱਕ ਪ੍ਰੀਖਣ ਕਰਦੇ ਹਾਂ। ਜੇਕਰ ਤੁਸੀਂ ਮੇਰੇ ਕਲਾਸ ਵਿੱਚ ਕਹੇ ਸ਼ਬਦਾਂ ਦੀ ਤਸਵੀਰ ਬਣਾ ਸਕਦੇ ਹੋ ਤਾਂ ਇਹ ਕਰਕੇ ਤੁਸੀਂ ਵਿਖਾ ਸਕਦੇ ਹੋ ਕਿ ਇਹ ਤੁਹਾਨੂੰ ਯਾਦ ਹਨ।” ਪ੍ਰੀਖਣ ਸਫਲ ਰਿਹਾ। ਮਾਈਕਾਹ ਨੇ ਸ਼ਬਦਾਂ ਨੂੰ ਤਸਵੀਰਾਂ ਵਿੱਚ ਤਬਦੀਲ ਕਰਕੇ ਸਿੱਖਿਆ। ਸਿੱਖਿਅਕ ਨੇ ਆਪਣੀਆਂ ਉਮੀਦਾਂ ਨੂੰ ਬਦਲਣ ਬਾਰੇ ਸਿੱਖਿਆ ਕਿਉਂਕਿ “ਲੋਕਾਂ ਦੇ ਸਿੱਖਣ ਦਾ ਤਰੀਕਾ ਇਹ ਨਿਰਧਾਰਿਤ ਕਰਦਾ ਹੈ ਕਿ ਤੁਸੀਂ ਕਿਵੇਂ ਸਿਖਾਉਂਦੇ ਹੋ।”
ਪਾਠ ਦਾ ਅਭਿਆਸ ਕਰੋ
► ਕੀ ਤੁਹਾਡੇ ਕੋਲ ਕੋਈ ਅਜਿਹਾ ਵਿਦਿਆਰਥੀ ਹੈ ਜੋ ਬਾਕੀ ਦੀ ਕਲਾਸ ਨਾਲੋਂ ਅਲੱਗ ਤਰੀਕੇ ਨਾਲ ਸਿੱਖਦਾ ਹੈ? ਤੁਸੀਂ ਉਸ ਵਿਦਿਆਰਥੀ ਦੀ ਚੰਗੀ ਤਰ੍ਹਾਂ ਸਿੱਖਣ ਦੇ ਵਿੱਚ ਕਿ ਸਹਾਇਤਾ ਕਰ ਸਕਦੇ ਹੋ?
ਕਿਰਿਆ ਦਾ ਨਿਯਮ
ਕਿਰਿਆ ਦਾ ਨਿਯਮ: ਜਿਆਦਾ ਕਿਰਿਆ ਨਾਲ ਜਿਆਦਾ ਸਿੱਖਿਆ ਹੁੰਦੀ ਹੈ
[3]ਯਿਸੂ ਜਾਣਦਾ ਸੀ ਕਿ ਜੋ ਪਾਠ ਉਹ ਸਿਖਾ ਰਿਹਾ ਹੈ ਉਸਦੇ ਵਿਦਿਆਰਥੀਆਂ ਦੇ ਲਈ ਇਸਦਾ ਅਭਿਆਸ ਕਰਨਾ ਜਰੂਰੀ ਹੈ। ਉਸਨੇ ਉਨ੍ਹਾਂ ਨੂੰ ਸੇਵਕਾਈ ਦੀ ਯਾਤਰਾ ਤੇ ਘੱਲਿਆ; ਉਸਨੇ ਉਨ੍ਹਾਂ ਨੂੰ ਭੀੜਾਂ ਦੇ ਲਈ ਮੱਛੀ ਅਤੇ ਰੋਟੀ ਵਰਤਾਉਣ ਦਿੱਤੀ; ਉਹ ਉਨ੍ਹਾਂ ਨੂੰ ਇਕਾਂਤ ਦੇ ਵਿੱਚ ਪ੍ਰਾਥਨਾ ਕਰਨ ਦੇ ਲਈ ਲੈ ਗਿਆ; ਉਸਨੇ ਉਨ੍ਹਾਂ ਨੂੰ ਉਨ੍ਹਾਂ ਦੀ ਸਿੱਖਿਆ ਨੂੰ ਲਾਗੂ ਕਰਨ ਦੇ ਮੌਕੇ ਦਿੱਤੇ। ਇਸਦਾ ਨਤੀਜਾ ਕੀ ਨਿੱਕਲਿਆ? ਰਸੂਲ ਅਜਿਹੇ ਲੋਕ ਬਣ ਗਏ ਜਿੰਨ੍ਹਾਂ ਨੇ ਸੰਸਾਰ ਨੂੰ ਉਲਟਾ ਕਰ ਦਿੱਤਾ (ਰਸੂਲਾਂ ਦੇ ਕਰਤੱਬ 17:6)।
ਮਨੋਵਿਗਿਆਨੀ ਕਹਿੰਦੇ ਹਨ ਕਿ
ਜੋ ਅਸੀਂ ਸੁਣਦੇ ਹਾਂ ਉਸਦਾ 10% ਹੀ ਯਾਦ ਰੱਖਦੇ ਹਾਂ
ਜੋ ਅਸੀਂ ਵੇਖਦੇ ਅਤੇ ਸੁਣਦੇ ਹਾਂ ਉਸਦਾ 50% ਯਾਦ ਰੱਖਦੇ ਹਾਂ, ਪਰ
ਜੋ ਅਸੀਂ ਵੇਖਦੇ, ਸੁਣਦੇ ਅਤੇ ਕਰਦੇ ਹਾਂ ਉਸ ਦਾ 90% ਯਾਦ ਰੱਖਦੇ ਹਾਂ।
ਕਿਰਿਆਸ਼ੀਲ ਸ਼ਮੂਲੀਅਤ ਸਿੱਖਣ ਨੂੰ ਬਹੁਤ ਜਿਆਦਾ ਵਧਾ ਦਿੰਦੀ ਹੈ।
ਪਾਠ ਦਾ ਅਭਿਆਸ ਕਰੋ
► ਜਿਵੇਂ ਤੁਸੀਂ ਆਪਣੇ ਅੱਗਲੇ ਪਾਠ ਦੀ ਤਿਆਰੀ ਕਰਦੇ ਹੋ, ਤਾਂ ਇੱਕ ਅਜਿਹੀ ਕਿਰਿਆ ਦੀ ਤਿਆਰੀ ਕਰੋ ਜੋ ਵਿਦਿਆਰਥੀਆਂ ਸੀ ਉਸ ਸਿੱਖਿਆ ਦਾ ਅਭਿਆਸ ਕਰਨ ਵਿੱਚ ਸਹਾਇਤਾ ਕਰ ਸਕੇ।
ਵਾਰਤਾਲਾਪ ਦਾ ਨਿਯਮ
ਵਾਰਤਾਲਾਪ ਦਾ ਨਿਯਮ: ਸਹੀ ਤੌਰ ਤੇ ਸਿਖਾਉਣ ਦੇ ਲਈ, ਸਾਨੂੰ ਸਿੱਖਣ ਵਾਲੇ ਦੇ ਲਈ ਪੁਲ ਬਣਾਉਣਾ ਪਵੇਗਾ।
ਸਿੱਖਿਅਕ ਅਤੇ ਪਾਸਬਾਨ ਦੇ ਤੌਰ ਤੇ, ਅਸੀਂ ਵਾਰਤਾਲਾਪ ਦੇ ਕੰਮ ਵਿੱਚ ਹਾਂ। ਸਾਡਾ ਕੰਮ ਜਾਣਕਾਰੀ ਦੇਣ ਨਾਲੋਂ ਕਿਤੇ ਵੱਡਾ ਹੈ; ਸਾਡਾ ਕੰਮ ਸਾਨੂੰ ਸੁਣਨ ਵਾਲਿਆਂ ਦੇ ਲਈ ਸੱਚ ਦੱਸਣਾ ਹੈ। ਵਾਰਤਾਲਾਪ ਦੇ ਵਿੱਚ ਸਾਂਝੀ ਸਮਝ ਦੀ ਲੋੜ ਪੈਂਦੀ ਹੈ। ਵਾਰਤਾਲਾਪ ਦੇ ਲਈ ਸਾਨੂੰ ਸਿੱਖਣ ਵਾਲਿਆਂ ਦੇ ਨਾਲ ਜੁੜਣਾ ਪੈਂਦਾ ਹੈ।
ਯਿਸੂ ਨੇ ਸਿੱਖਣ ਵਾਲਿਆਂ ਦੇ ਨਾਲ ਜੁੜਣ ਦਾ ਇੱਕ ਨਮੂਨਾ ਪ੍ਰਦਾਨ ਕੀਤਾ ਹੈ। ਯਿਸੂ ਅਤੇ ਸਾਮਰੀ ਔਰਤ ਦੇ ਵਿਚਾਲੇ ਬਹੁਤ ਸਾਰੀਆਂ ਰੁਕਾਵਟਾਂ ਸਨ: ਜਾਤੀਵਾਦ, ਧਾਰਮਿਕ ਅਤੇ ਸਮਾਜਿਕ ਰੁਕਾਵਟਾਂ। ਯਿਸੂ ਯਹੂਦੀ ਸੀ; ਉਹ ਇੱਕ ਸਾਮਰੀ ਸੀ। ਯਿਸੂ ਇੱਕ ਪੁਰਸ਼ ਸੀ; ਉਹ ਇਸਤਰੀ ਸੀ। ਯਿਸੂ ਇੱਕ ਆਦਰਯੋਗ ਗੁਰੂ ਸੀ; ਉਸਦਾ ਅਤੀਤ ਵਿਭਚਾਰ ਭਰਿਆ ਸੀ। ਯਿਸੂ ਇੰਨਾਂ ਰੁਕਾਵਟਾਂ ਦੇ ਦਰਮਿਆਨ ਪੁਲ ਕਿਵੇਂ ਬਣਾ ਸਕਦਾ ਸੀ? ਉਸਨੇ ਇੱਕ ਸਾਂਝੀ ਗੱਲ ਨੂੰ ਲਿਆ; ਦੋਵੇਂ ਹੀ ਪਿਆਸੇ ਸਨ। ਇੱਕ ਸਰੀਰਕ ਜਰੂਰਤ ਨੇ ਇੱਕ ਜੀਵਨ ਬਦਲਣ ਵਾਲੀ ਮੁਲਾਕਾਤ ਦੇ ਵਿੱਚਕਾਰ ਪੁਲ ਦਾ ਕੰਮ ਕੀਤਾ (ਯੂਹੰਨਾ 4:1-42)।
ਡਾ. ਹੈਂਡ੍ਰਿਕ ਨੇ ਲਿਖਿਆ ਹੈ ਕਿ ਵਾਰਤਾਲਾਪ ਦੇ ਵਿੱਚ ਤਿੰਨ ਪੜਾਅ ਹੋਣੇ ਚਾਹੀਦੇ ਹਨ:
1. ਗਿਆਨ- ਜੋ ਮੈਂ ਜਾਣਦਾ ਹਾਂ। ਇਹ ਵਾਰਤਾਲਾਪ ਦਾ ਸਭ ਤੋਂ ਸਾਧਾਰਨ ਪੜਾਅ ਹੈ।
2. ਜੋਸ਼- ਜੋ ਮੈਂ ਮਹਿਸੂਸ ਕਰਦਾ ਹਾਂ। ਇਹ ਵਾਰਤਾਲਾਪ ਦਾ ਡੂੰਘਾ ਪੜਾਅ ਹੈ।
3. ਕਿਰਿਆ – ਜੋ ਮੈਂ ਕਰਦਾ ਹਾਂ। ਵਾਰਤਾਲਾਪ ਦਾ ਇਹ ਸਤਰ ਸਾਡੇ ਵਿਦਿਆਰਥੀਆਂ ਨੂੰ ਬਦਲਦਾ ਹੈ।
ਜਿਵੇਂ ਹੀ ਅਫਰੀਕਾ ਵਿੱਚ ਇੱਕ ਸੈਮੀਨਰੀ ਸੰਚਾਲਕ ਇੱਕ ਅਮੀਰ ਦਾਨੀ ਸੱਜਣ ਦੇ ਅੱਗੇ ਆਪਣਾ ਦਰਸ਼ਨ ਪੇਸ਼ ਕਰ ਰਿਹਾ ਸੀ ਤਾਂ ਜੋਏਲ ਉਸਨੂੰ ਸੁਣ ਰਿਹਾ ਸੀ। ਉਸਨੇ ਦਾਨੀ ਸੱਜਣ ਦੇ ਕੋਲੋਂ ਜੋਏਲ ਦੀ ਕਲਪਨਾ ਤੋਂ ਵੀ ਜਿਆਦਾ ਪੈਸਿਆਂ ਦੀ ਮੰਗ ਕੀਤੀ! ਜੋਏਲ ਨੂੰ ਬਹੁਤ ਹੈਰਾਨੀ ਹੋਈ ਕਿ ਦਾਨੀ ਸੱਜਣ ਨੇ ਖੁੱਲ੍ਹਦਿਲੀ ਦੇ ਨਾਲ ਦਿੱਤਾ। ਕਿਉਂ? ਸੈਮੀਨਰੀ ਸੰਚਾਲਕ ਨੇ ਤਿੰਨ ਪੜਾਵਾਂ ਦੇ ਵਿੱਚ ਗੱਲਬਾਤ ਕੀਤੀ:
1. ਗਿਆਨ – ਉਹ ਅਫਰੀਕਾ ਦੇ ਵਿੱਚ ਸੈਮੀਨਰੀ ਸਿਖਲਾਈ ਦੀ ਜਰੂਰਤ ਦੇ ਬਾਰੇ ਜਾਣਦਾ ਸੀ।
2. ਜੋਸ਼ – ਉਹ ਅਫਰੀਕਾ ਦੇ ਵਿੱਚ ਕਲੀਸਿਆ ਦੇ ਆਗੂਆਂ ਨੂੰ ਸਿਖਲਾਈ ਦੇਣ ਦਾ ਜੋਸ਼ ਰੱਖਦਾ ਸੀ।
3. ਕਿਰਿਆ – ਉਸਨੇ ਆਪਣਾ ਜੀਵਨ ਅਫਰੀਕਾ ਦੇ ਵਿੱਚ ਬਿਤਾਇਆ ਸੀ ਅਤੇ ਕਲੀਸਿਆ ਦੇ ਆਗੂਆਂ ਨੂੰ ਸਿਖਲਾਈ ਦੇਣ ਲਈ ਸਾਰੇ ਬਲੀਦਾਨ ਕੀਤੇ ਸਨ। ਸੰਚਾਲਕ ਨੇ ਦੱਸਿਆ ਕਿ ਉਹ ਅਫਰੀਕਾ ਦੇ ਵਿੱਚ ਕੀ ਕਰ ਰਿਹਾ ਹੈ।
ਪ੍ਰਭਾਵਸ਼ਾਲੀ ਢੰਗ ਦੇ ਨਾਲ ਸਿਖਾਉਣ ਦੇ ਲਈ, ਸਾਡੇ ਕੋਲ ਉਸ ਵਿਸ਼ੇ ਦੇ ਲਈ ਜੋਸ਼ ਹੋਣਾ ਚਾਹੀਦਾ ਹੈ। ਇਸ ਵਾਰਤਾਲਾਪ ਦੀ ਬਹੁਤ ਸਾਰੇ ਸੰਡੇ ਸਕੂਲਾਂ ਵਿੱਚ ਕਲਪਨਾ ਕਰੋ:
ਸਿੱਖਿਅਕ: “ਅੱਜ ਅਸੀਂ ਯੂਹੰਨਾ 6 ਤੋਂ 5000 ਨੂੰ ਖੁਆਉਣ ਬਾਰੇ ਅਧਿਐਨ ਕਰਾਂਗੇ।”
ਵਿਦਿਆਰਥੀ: “ਮੇਰਾ ਇੱਕ ਪ੍ਰਸ਼ਨ ਹੈ। ਬਾਈਬਲ ਦੱਸਦੀ ਹੈ ਕਿ ਉਨ੍ਹਾਂ ਨੇ ਸਿਰਫ਼ ਆਦਮੀਆਂ ਦੀ ਗਿਣਤੀ ਕੀਤੀ। ਅਜਿਹਾ ਕਿਉਂ?”
ਸਿੱਖਿਅਕ: “ਮੈਨੂੰ ਨਹੀਂ ਪਤਾ। ਇਹ ਮਹੱਤਵਪੂਰਨ ਨਹੀਂ ਹੈ। ਤੁਸੀਂ ਪਾਠ ਦੇ ਧਿਆਨ ਦਿਉ।”
ਅਚਾਨਕ ਹੀ ਇੱਕ ਉਤਸੁਕਤਾ ਭਰੀ ਬਾਈਬਲ ਕਹਾਣੀ ਅਕਾਉਣ ਵਾਲੀ ਹੋ ਜਾਂਦੀ ਹੈ। ਬੱਚੇ ਇਹ ਜਾਣਨਾ ਪਸੰਦ ਕਰਦੇ ਕਿ ਯਿਸੂ ਨੇ ਕੁਝ ਰੋਟੀਆਂ ਅਤੇ ਮੱਛੀਆਂ ਦੇ ਨਾਲ 20,000 ਲੋਕਾਂ ਨੂੰ ਕਿਵੇਂ ਰਜਾਇਆ। ਇਹ ਅਕਾ ਦੇਣ ਵਾਲੀ ਕਿਵੇਂ ਹੋ ਸਕਦੀ ਹੈ? ਇਹ ਸਿੱਖਿਅਕ ਗਿਆਨ ਨਹੀਂ ਦੇ ਰਿਹਾ ਹੈ; ਉਸਨੇ ਇਹ ਸਮਝਣ ਲਈ ਪਿਛੋਕੜ ਦਾ ਅਧਿਐਨ ਨਹੀਂ ਕੀਤਾ ਹੈ ਕਿ ਯਹੂਦੀ ਲੇਖਕਾਂ ਨੇ ਸਿਰਫ਼ ਆਦਮੀਆਂ ਨੂੰ ਕਿਉਂ ਗਿਣਿਆ ਹੈ। ਸਿੱਖਿਅਕ ਨੂੰ ਇਸ ਉਤਸੁਕਤਾ ਭਰੀ ਕਹਾਣੀ ਲਈ ਕੋਈ ਜੋਸ਼ ਮਹਿਸੂਸ ਨਹੀਂ ਹੁੰਦਾ। ਇਸ ਗੱਲ ਦੀ ਬਹੁਤ ਘੱਟ ਸੰਭਾਵਨਾ ਹੈ ਕਿ ਇਸ ਪਾਠ ਦੇ ਸਿੱਖਿਅਕ ਦੇ ਜੀਵਨ ਇਸ ਤਰੀਕੇ ਨਾਲ ਬਦਲਿਆ ਗਿਆ ਹੈ ਤਾਂ ਜੋ ਇਸੇ ਪ੍ਰਕਾਰ ਜੋ ਉਸਨੂੰ ਵਿਦਿਆਰਥੀਆਂ ਦੇ ਜੀਵਨ ਨੂੰ ਉਸੇ ਪ੍ਰਕਾਰ ਬਦਲਿਆ ਜਾ ਸਕੇ।
ਪਾਠ ਦਾ ਅਭਿਆਸ ਕਰੋ
► ਜਦੋਂ ਤੁਸੀਂ ਪਾਠ ਨੂੰ ਤਿਆਰ ਕਰਦੇ ਹੋ, ਤਾਂ ਆਪਣੀ ਅਤੇ ਵਿਦਿਆਰਥੀਆਂ ਦੀ ਵਿਚਾਰਧਾਰ ਦੇ ਵਿੱਚ ਫਰਕ ਦੇ ਬਾਰੇ ਸੋਚੋ। ਆਪਣੇ ਵਿਦਿਆਰਥੀਆਂ ਦੇ ਲਈ ਇੱਕ ਪੁਲ ਬਣਾਉਣ ਲਈ ਸਮਾਂ ਲਵੋ। ਇਸ ਪਾਠ ਦੇ ਪ੍ਰਤੀ ਆਪਣੇ ਵਿਦਿਆਰਥੀਆਂ ਦੀ ਰੁਚੀ ਖਿੱਚਣ ਦੇ ਬਾਰੇ ਕੋਈ ਤਰੀਕਾ ਲੱਭੋ।
ਦਿਲ ਦਾ ਨਿਯਮ
ਦਿਲ ਦਾ ਨਿਯਮ: ਪ੍ਰਭਾਵਸ਼ਾਲੀ ਸਿੱਖਿਆ ਸਿਰਫ਼ ਸਿਰ ਤੱਕ ਨਹੀਂ ਸਗੋਂ ਦਿਲ ਤੋਂ ਦਿਲ ਤੱਕ ਪਹੁੰਚਦੀ ਹੈ।
ਅਤੇ ਐਉਂ ਹੋਇਆ ਕਿ ਜਾਂ ਯਿਸੂ ਏਹ ਗੱਲਾਂ ਕਰ ਹਟਿਆ ਤਾਂ ਭੀੜ ਉਹ ਦੇ ਉਪਦੇਸ਼ ਤੋਂ ਹੈਰਾਨ ਹੋਈ, ਕਿਉਂ ਜੋ ਉਹ ਉਨ੍ਹਾਂ ਦੇ ਗ੍ਰੰਥੀਆਂ ਵਾਂਙੁ ਨਹੀਂ ਪਰ ਇਖ਼ਤਿਆਰ ਵਾਲੇ ਵਾਂਙੁ ਉਨ੍ਹਾਂ ਨੂੰ ਉਪਦੇਸ਼ ਦਿੰਦਾ ਸੀ (ਮੱਤੀ 7:28-29)। ਯਿਸੂ ਦੀ ਸਿੱਖਿਆ ਉਸਦੇ ਦਿਲ ਤੋਂ ਆਉਂਦੀ ਸੀ ਅਤੇ ਉਹ ਉਸਦੇ ਸੁਣਨ ਵਾਲਿਆਂ ਦੇ ਦਿਲ ਛੂਹ ਲੈਂਦੀ ਸੀ।
ਇੰਜੀਲਾਂ ਦੇ ਵਿੱਚ ਬਾਰ-ਬਾਰ ਯਿਸੂ ਦੇ ਤਰਸ ਬਾਰੇ ਜਿਕਰ ਕੀਤਾ ਗਿਆ ਹੈ। ਲੋਕ ਉਸਦੇ ਤਰਸ ਦੇ ਨਾਲ ਛੂਹੇ ਜਾਂਦੇ ਸਨ। ਉਸਦਾ ਦਿਲ ਉਨ੍ਹਾਂ ਦੇ ਦਿਲਾਂ ਤੱਕ ਪਹੁੰਚਦਾ ਸੀ। ਹੋਵਾਰਡ ਹੈਂਡ੍ਰਿਕ ਪ੍ਰਭਾਵਸ਼ਾਲੀ ਸਿੱਖਿਆ ਦੇ ਤੱਥਾਂ ਬਾਰੇ ਸਿਖਾਉਂਦਾ ਹੈ।
ਸਿੱਖਿਅਕ ਦਾ ਚਰਿੱਤਰ ਸਿੱਖਣ ਵਾਲਿਆਂ ਦੇ ਵਿੱਚ ਆਤਮ-ਵਿਸ਼ਵਾਸ ਨੂੰ ਪ੍ਰੇਰਿਤ ਕਰਦਾ ਹੈ।
ਜੇਕਰ ਵਿਦਿਆਰਥੀ ਸਿੱਖਿਅਕ ਦੇ ਚਰਿੱਤਰ ਤੇ ਭਰੋਸਾ ਕਰਦਾ ਹੋਵੇਗਾ ਤਾਂ ਉਸਦਾ ਸਿਖਾਈਆਂ ਜਾਣ ਵਾਲੀਆਂ ਗੱਲਾਂ ਦੇ ਵਿੱਚ ਪੂਰਾ ਆਤਮ-ਵਿਸ਼ਵਾਸ ਹੋਵੇਗਾ। ਇੱਕ ਪਾਸਬਾਨ ਅਤੇ ਸਿੱਖਿਅਕ ਦੇ ਰੂਪ ਵਿੱਚ, ਸਾਨੂੰ ਕਦੇ ਉਸ ਭਰੋਸੇ ਨੂੰ ਬਰਬਾਦ ਨਹੀਂ ਕਰਨਾ ਚਾਹੀਦਾ। ਭਰੋਸੇ ਨੂੰ ਦੁਬਾਰਾ ਜਿੱਤਣਾ ਸਭ ਤੋਂ ਕਠਿਨ ਕੰਮ ਹੈ। ਬੁੱਧੀਮਾਨ ਮਸੀਹੀ ਆਗੂ ਹਰੇਕ ਅਜਿਹੀ ਗੱਲ ਤੋਂ ਦੂਰ ਰਹਿੰਦੇ ਹਨ ਜੋ ਉਨ੍ਹਾਂ ਦੀ ਨੈਤਿਕ ਅਸਫਲਤਾ ਦਾ ਕਾਰਨ ਬਣ ਸਕਦੀ ਹੈ। ਤੁਹਾਡੇ ਚਰਿੱਤਰ ਦੇ ਦੁਆਰਾ ਤੁਹਾਡੇ ਸਿੱਖਣ ਵਾਲਿਆਂ ਦੇ ਮਨ ਵਿੱਚ ਆਤਮ-ਵਿਸ਼ਵਾਸ ਪ੍ਰੇਰਿਤ ਹੋਣਾ ਚਾਹੀਦਾ ਹੈ।
ਸਿੱਖਿਅਕ ਦੀ ਦਯਾ ਸਿੱਖਣ ਵਾਲਿਆਂ ਦੇ ਵਿੱਚ ਪ੍ਰੇਰਨਾ ਪੈਦਾ ਕਰਦੀ ਹੈ।
ਜਦੋਂ ਇੱਕ ਵਿਦਿਆਰਥੀ ਸਿੱਖਿਅਕ ਦੀ ਦਯਾ ਨੂੰ ਮਹਿਸੂਸ ਕਰਦਾ ਹੈ, ਤਾਂ ਉਸਨੂੰ ਸਿੱਖਣ ਦੀ ਪ੍ਰੇਰਨਾ ਮਿਲਦੀ ਹੈ। ਚੇਲ੍ਹੇ ਯਿਸੂ ਦੇ ਪਿੱਛੇ ਚੱਲਦੇ ਸਨ ਕਿਉਂਕਿ ਉਹ ਜਾਣਦੇ ਸਨ ਕਿ ਉਹ ਉਨ੍ਹਾਂ ਨੂੰ ਪਿਆਰ ਕਰਦਾ ਹੈ। ਜੇਕਰ ਤੁਸੀਂ ਆਪਣੇ ਵਿਦਿਆਰਥੀਆਂ ਨੂੰ ਪਿਆਰ ਨਹੀਂ ਕਰਦੇ, ਤਾਂ ਉਨ੍ਹਾਂ ਦੇ ਵਿੱਚ ਤੁਹਾਡੇ ਤੋਂ ਸਿੱਖਣ ਦੀ ਬਹੁਤ ਘੱਟ ਪ੍ਰੇਰਨਾ ਹੋਵੇਗੀ।
ਛੋਟੇ ਬੱਚਿਆਂ ਦੇ ਸਿੱਖਿਅਕਾਂ ਦੇ ਨਾਲ ਗੱਲ ਕਰਦੇ ਹੋਏ ਡਾ. ਹੈਡ੍ਰਿਕ ਨੇ ਕਿਹਾ, “ਜੇਕਰ ਜੋਨ੍ਹੀ ਦੇ ਨਵੇਂ ਬੂਟ ਪਾਏ ਹਨ ਤਾਂ ਤੁਹਾਨੂੰ ਉਨਾਂ ਨਵੇਂ ਬੂਟਾਂ ਵੱਲ ਧਿਆਨ ਦੇਣਾ ਚਾਹੀਦਾ ਹੈ, ਨਹੀਂ ਤਾਂ ਉਹ ਤੁਹਾਡੇ ਨਵੇਂ ਪਾਠ ਵੱਲ ਧਿਆਨ ਨਹੀਂ ਦੇਵੇਗੀ!” ਜਦੋਂ ਤੁਸੀਂ ਸਿੱਖਣ ਵਾਲਿਆਂ ਦੇ ਵਿੱਚ ਰੁਚੀ ਵਿਖਾਉਂਦੇ ਹੋ (ਪਿਆਰ ਦੇ ਕਾਰਨ), ਤਾਂ ਉਹ ਤੁਹਾਡੇ ਦੁਆਰਾ ਸਿਖਾਏ ਜਾਣ ਵਾਲੇ ਪਾਠ ਨੂੰ ਸਿੱਖਣ ਦੇ ਲਈ ਤਿਆਰ ਹੋ ਜਾਂਦੇ ਹਨ।
ਸਿੱਖਿਅਕ ਦੀ ਸਮੱਗਰੀ ਸਿੱਖਣ ਵਾਲੇ ਦੇ ਲਈ ਸਮਝ ਨੂੰ ਲਿਆਉਂਦੀ ਹੈ।
ਜਦੋਂ ਕੋਈ ਵਿਦਿਆਰਥੀ ਸਿੱਖਣ ਦੇ ਲਈ ਪ੍ਰੇਰਿਤ ਹੁੰਦਾ ਹੈ ਤਦ ਹੀ ਤੁਸੀਂ ਸਮੱਗਰੀ ਨੂੰ ਸਿਖਾਉਣ ਦੇ ਲਈ ਤਿਆਰ ਹੁੰਦੇ ਹੋ। ਜਦੋਂ ਤੁਸੀਂ ਉਨ੍ਹਾਂ ਦੇ ਭਰੋਸੇ ਨੂੰ ਜਿੱਤ ਲੈਂਦੇ ਹੋ, ਤਾਂ ਫਿਰ ਤੁਸੀਂ ਆਪਣੇ ਦਿਲ ਤੋਂ ਆਪਣੇ ਵਿਦਿਆਰਥੀ ਦੇ ਦਿਲ ਨਾਲ ਗੱਲ ਕਰ ਸਕਦੇ ਹੋ।
ਪਾਠ ਦਾ ਅਭਿਆਸ ਕਰੋ
► ਕੀ ਤੁਸੀਂ ਆਪਣੇ ਵਿਦਿਆਰਥੀਆਂ ਨਾਲ ਪਿਆਰ ਕਰਦੇ ਹੋ? ਜਿੰਨਾਂ ਮਹੱਤਵਪੂਰਨ ਉਨ੍ਹਾਂ ਦੇ ਲਈ ਇਹ ਜਾਣਨਾ ਹੈ ਕਿ ਤੁਸੀਂ ਉਨ੍ਹਾਂ ਨੂੰ ਪਿਆਰ ਕਰਦੇ ਹੋ? ਤੁਸੀਂ ਉਨ੍ਹਾਂ ਵਿਦਿਆਰਥੀਆਂ ਦੇ ਨਾਲ ਆਪਣੇ ਦਿਲ ਦਾ ਬਿਹਤਰ ਵਾਰਤਾਲਾਪ ਕਰ ਸਕਦੇ ਹੋ ਜਿੰਨ੍ਹਾਂ ਦੇ ਕੋਲ ਪਰਮੇਸ਼ੁਰ ਨੇ ਤੁਹਾਨੂੰ ਘੱਲਿਆ ਹੈ?
ਉਤਸ਼ਾਹਿਤ ਕਰਨ ਦਾ ਨਿਯਮ
ਉਤਸ਼ਾਹਿਤ ਕਰਨ ਦਾ ਨਿਯਮ: ਸਿੱਖਿਆ ਉਸ ਸਮੇਂ ਪ੍ਰਭਾਵਸ਼ਾਲੀ ਹੁੰਦੀ ਹੈ ਜਦੋਂ ਵਿਦਿਆਰਥੀ ਸਹੀ ਤਰ੍ਹਾਂ ਨਾਲ ਪ੍ਰੇਰਿਤ ਹੁੰਦਾ ਹੈ।
ਜਦੋਂ ਉਹ ਉਤਸ਼ਾਹ ਸ਼ਬਦ ਨੂੰ ਸੁਣਦੇ ਹਨ ਤਾਂ ਬਹੁਤ ਸਾਰੇ ਸਿੱਖਿਅਕ ਕੈਂਡੀ, ਸਰਟੀਫੀਕੇਟ, ਨੰਬਰ ਜਾਂ ਪ੍ਰੇਰਿਤ ਕਰਨ ਦੇ ਹੋਰ ਤਰੀਕਿਆਂ ਬਾਰੇ ਸੋਚਦੇ ਹਨ। ਇਹ ਪ੍ਰਤੀਫ਼ਲ ਗ਼ਲਤ ਨਹੀਂ ਹਨ ਅਤੇ ਉਹ ਜੁਆਨ ਲੋਕਾਂ ਦੇ ਵਿੱਚ ਰੁਚੀ ਲਿਆਉਣ ਦੇ ਵਿੱਚ ਸਹਾਇਤਾ ਕਰਦੇ ਹਨ ਪਰ ਇਹ ਇਨਾਮ ਅਸਲ ਟੀਚੇ ਦੇ ਨਾਲ ਜੁੜੇ ਹੋਏ ਨਹੀਂ ਹਨ। ਇੱਕ ਅਜਿਹਾ ਵਿਦਿਆਰਥੀ ਜੋ ਕਿਸੇ ਇਨਾਮ ਲੈਣ ਦੇ ਲਈ ਕੰਮ ਕਰ ਰਿਹਾ ਹੈ ਉਸਦੇ ਵਿੱਚ ਸਿਖਾਈ ਜਾਣ ਵਾਲੀ ਸਚਿਆਈ ਦੇ ਦੁਆਰਾ ਬਦਲਣ ਦੀ ਸੰਭਾਵਨਾ ਬਹੁਤ ਘੱਟ ਹੋਵੇਗੀ। ਸਿੱਖਿਅਕ ਦੇ ਲਈ ਇਹ ਬਿਹਤਰ ਹੈ ਕਿ ਉਹ ਵਿਦਿਆਰਥੀਆਂ ਦੇ ਅੰਦਰੂਨੀ ਮਨੋਰਥ ਨੂੰ ਸੰਬੋਧਿਤ ਕਰੇ।
ਡਾ. ਹੈਡ੍ਰਿਕ ਕੁਝ ਅੰਦਰੂਨੀ ਮਨੋਰਥਾਂ ਦੀ ਸੂਚੀ ਬਣਾਉਂਦਾ ਹੈ:
ਸਵਾਮੀਕਤਾ। “ਇਹ ਮੇਰੀ ਕਲੀਸਿਆ ਹੈ, ਇਸਨੂੰ ਵਧਾਉਣ ਦੇ ਲਈ ਮੈਂ ਹੋਰ ਲੋਕਾਂ ਨੂੰ ਸੱਦਾ ਦੇਵਾਂਗਾ।”
ਜਰੂਰਤ। “ਮੈਨੂੰ ਪ੍ਰੀਖਿਆ ਤੇ ਜਿੱਤ ਹਾਸਿਲ ਕਰਨ ਦੇ ਲਈ ਪਰਮੇਸ਼ੁਰ ਦੇ ਵਚਨ ਦੀ ਜਰੂਰਤ ਹੈ, ਇਸ ਲਈ ਮੈਂ ਵਚਨਾਂ ਨੂੰ ਯਾਦ ਕਰਾਂਗਾ।”
ਪ੍ਰਵਾਨਗੀ। “ਮੈਂ ਆਪਣੇ ਸਿੱਖਿਅਕ ਨਾਲ ਪਿਆਰ ਕਰਦਾ ਹਾਂ ਅਤੇ ਉਸਨੂੰ ਖੁਸ਼ ਕਰਨਾ ਚਾਹੁੰਦਾ ਹਾਂ, ਇਸ ਲਈ ਮੈਂ ਪਾਠ ਦਾ ਅਧਿਐਨ ਕਰਾਂਗਾ।”
ਅਜਿਹੀਆਂ ਪ੍ਰੇਰਨਾਵਾਂ ਟੌਫੀ ਜਾਂ ਨੰਬਰ ਦੇਣ ਨਾਲੋਂ ਜਿਆਦਾ ਲੰਬੇ ਸਮੇਂ ਤੱਕ ਪ੍ਰਭਾਵਿਤ ਕਰਦੀਆਂ ਹਨ। ਜਿਵੇਂ ਅਸੀਂ ਇੰਨਾਂ ਪ੍ਰੇਰਨਾਦਾਇਕ ਸਾਧਨਾਂ ਦਾ ਉਪਯੋਗ ਕਰਦੇ ਹਾਂ, ਤਾਂ ਅਸੀਂ ਆਪਣੇ ਵਿਦਿਆਰਥੀਆਂ ਨੂੰ ਲੰਬੇ ਸਮੇਂ ਦੀ ਸਿੱਖਿਆ ਦੇ ਲਈ ਉਤਸ਼ਾਹਿਤ ਕਰਦੇ ਹਾਂ।
ਪਾਠ ਦਾ ਅਭਿਆਸ ਕਰੋ
► ਅਜਿਹੀਆਂ ਪ੍ਰੇਰਨਾਵਾਂ ਦੀ ਸੂਚੀ ਬਣਾਉ ਜਿੰਨਾਂ ਦਾ ਉਪਯੋਗ ਤੁਸੀਂ ਆਪਣੇ ਵਿਦਿਆਰਥੀਆਂ ਦੇ ਲਈ ਕਰ ਸਕਦੇ ਹੋ। ਤੁਸੀਂ ਸਿੱਖਣ ਦੇ ਲਾਭ ਦੇ ਨਾਲ ਉਨ੍ਹਾਂ ਨੂੰ ਪ੍ਰੇਰਨਾ ਕਿਵੇਂ ਦੇ ਸਕਦੇ ਹੋ?
ਤਿਆਰੀ ਦਾ ਨਿਯਮ
ਤਿਆਰੀ ਦਾ ਨਿਯਮ: ਜਦੋਂ ਸਿਖਾਉਣ ਤੇ ਸਿੱਖਣ ਵਾਲਾ ਦੋਵੇਂ ਸਹੀ ਤਰ੍ਹਾਂ ਨਾਲ ਤਿਆਰ ਹੁੰਦੇ ਹਨ ਤਾਂ ਸਿੱਖਿਆ ਸਭ ਤੋਂ ਜਿਆਦਾ ਪ੍ਰਭਾਵਸ਼ਾਲੀ ਹੁੰਦੀ ਹੈ।
ਕੀ ਇਹ ਤੁਹਾਡੀ ਕਲੀਸਿਆ ਦੇ ਵਿੱਚ ਇੱਕ ਆਮ ਸੰਡੇ ਸਕੂਲ ਪਾਠ ਦੀ ਤਰ੍ਹਾਂ ਹੈ?
ਸਿੱਖਿਅਕ: “ਅੱਜ, ਅਸੀਂ ਅਫ਼ਸੀਆਂ 5 ਦਾ ਅਧਿਐਨ ਕਰਾਂਗੇ, ਕ੍ਰਿਪਾ ਕਰਕੇ ਆਪਣੀਆਂ ਬਾਈਬਲਾਂ ਖੋਲ੍ਹੋ।”
ਵਿਦਿਆਰਥੀ ਸੋਚਦੇ ਹਨ: “ਸਾਨੂੰ ਅਫ਼ਸੀਆਂ 5 ਦਾ ਅਧਿਐਨ ਕਰਨ ਦੀ ਕੀ ਜਰੂਰਤ ਹੈ?”
ਸਿੱਖਿਅਕ ਅਫਸੀਆਂ 5 ਸਿਖਾਉਣ ਦੇ ਵਿੱਚ ਇੱਕ ਘੰਟਾ ਬਿਤਾਉਂਦਾ ਹੈ। ਇੱਕ ਘੰਟੇ ਦੇ ਅੰਤ ਵਿੱਚ ਵਿਦਿਆਰਥੀ ਪੌਲੁਸ ਦੇ ਸੰਦੇਸ਼ ਨਾਲ ਪ੍ਰੇਰਿਤ ਹੋ ਜਾਂਦੇ ਹਨ। ਪਾਠ ਸਮਾਪਤ ਹੋ ਜਾਂਦਾ ਹੈ, ਅਤੇ ਵਿਦਿਆਰਥੀ ਘਰ ਚਲੇ ਜਾਂਦੇ ਹਨ। ਇੱਕ ਹਫ਼ਤੇ ਦੇ ਬਾਅਦ, ਅਸੀਂ ਇਹ ਸੁਣਦੇ ਹਾਂ:
ਸਿੱਖਿਅਕ: “ਅੱਜ, ਅਸੀਂ ਅਫ਼ਸੀਆਂ 6 ਦਾ ਅਧਿਐਨ ਕਰਾਂਗੇ, ਕ੍ਰਿਪਾ ਕਰਕੇ ਆਪਣੀਆਂ ਬਾਈਬਲਾਂ ਖੋਲ੍ਹੋ।”
ਵਿਦਿਆਰਥੀ ਸੋਚਦੇ ਹਨ: “ਸਾਨੂੰ ਅਫ਼ਸੀਆਂ 6 ਦਾ ਅਧਿਐਨ ਕਰਨ ਦੀ ਕੀ ਜਰੂਰਤ ਹੈ?”
ਜੇਕਰ ਵਿਦਿਆਰਥੀ ਅਫਸੀਆਂ 6 ਦਾ ਕਲਾਸ ਤੋਂ ਪਹਿਲਾਂ ਹੀ ਅਧਿਐਨ ਕਰਨ ਤਾਂ ਇਹ ਕਿੰਨਾ ਬਿਹਤਰ ਹੋਵੇਗਾ! ਜੇਕਰ ਵਿਦਿਆਰਥੀ ਕਲਾਸ ਦੇ ਵਿੱਚ ਕੁਝ ਪ੍ਰਸ਼ਨ ਲੈ ਕੇ ਆਉਣਗੇ ਤਾਂ ਕਿ ਪਾਠ ਦੇ ਦੁਆਰਾ ਜਿਆਦਾ ਪ੍ਰਾਪਤੀ ਨਹੀਂ ਹੋਵੇਗੀ? ਜੀ ਹਾਂ! ਅਸੀਂ ਇਸਦੀ ਪ੍ਰਾਪਤੀ ਕਿਵੇਂ ਕਰ ਸਕਦੇ ਹਾਂ? ਪ੍ਰੋਫੈਸਰ ਹੈਂਡ੍ਰਿਕ ਅਜਿਹੇ ਅਸਾਇਨਮੈਂਟ ਦੇਣ ਦਾ ਸੁਝਾਅ ਦਿੰਦਾ ਹੈ ਜੋ ਵਿਦਿਆਰਥੀਆਂ ਨੂੰ ਪਾਠ ਦੇ ਲਈ ਤਿਆਰ ਕਰਦੇ ਹਨ। ਉਦਾਹਰਨ ਦੇ ਲਈ:
ਅਜਿਹੇ ਅਸਾਇਨਮੈਂਟ ਦਿਓ ਜਿੰਨਾਂ ਦੇ ਨਾਲ ਵਿਦਿਆਰਥੀ ਉਸ ਪਾਠ ਦੇ ਬਾਰੇ ਸੋਚ ਸਕਣ ਜਿਸਦਾ ਉਨ੍ਹਾਂ ਨੇ ਅੱਗਲੇ ਹਫ਼ਤੇ ਅਧਿਐਨ ਕਰਨਾ ਹੈ। “ਅੱਗਲੇ ਐਤਵਾਰ ਤੋਂ ਪਹਿਲਾਂ, ਰਸੂਲਾਂ ਦੇ ਕਰਤੱਬ 19 ਨੂੰ ਇਹ ਸਿੱਖਣ ਲਈ ਪੜ੍ਹੋ ਕਿ ਪੌਲੁਸ ਨੇ ਅਫ਼ਸੁਸ ਦੇ ਵਿੱਚ ਕਲੀਸਿਆ ਦੀ ਸ਼ੁਰੂਆਤ ਕਿਵੇਂ ਕੀਤੀ।”
ਅਜਿਹੇ ਅਸਾਇਨਮੈਂਟ ਦਿਓ ਜੋ ਪਾਠ ਦਾ ਪਿਛੋਕੜ ਪ੍ਰਦਾਨ ਕਰਦੇ ਹਨ। “ਅੱਗਲੇ ਐਤਵਾਰ ਤੋਂ ਪਹਿਲਾਂ, ਅਫ਼ਸੁਸ ਦੇ ਵਿੱਚ ਅਰਤਿਮਿਸ ਦੇ ਮੰਦਿਰ ਬਾਰੇ ਅਬਦਕੋਸ਼ ਦੇ ਵਿੱਚ ਪੜ੍ਹੋ। ਇਹ ਪੌਲੁਸ ਦੁਆਰਾ ਅਫ਼ਸੀਆਂ 6:10-20 ਦੱਸੇ ਆਤਮਿਕ ਯੁੱਧ ਤੇ ਦਿੱਤੇ ਜ਼ੋਰ ਦੀ ਵਿਆਖਿਆ ਕਰਨ ਵਿੱਚ ਸਹਾਇਤਾ ਕਰੇਗਾ।”
ਅਜਿਹੇ ਅਸਾਇਨਮੈਂਟ ਦਿਓ ਜੋ ਵਿਦਿਆਰਥੀ ਦੀ ਖੁਦ ਅਧਿਐਨ ਕਰਨ ਦੀ ਯੋਗਤਾ ਨੂੰ ਵਿਕਸਿਤ ਕਰੇ। “ਇਸ ਹਫ਼ਤੇ ਵਿੱਚ ਹਰ ਦਿਨ ਇੱਕ ਵਾਰ ਅਫ਼ਸੀਆਂ 6 ਨੂੰ ਪੜ੍ਹੋ। ਜਿਵੇਂ ਤੁਸੀਂ ਪੜ੍ਹਦੇ ਹੋ, ਤਾਂ ਉਸ ਇੱਕ ਪ੍ਰਸ਼ਨ ਨੂੰ ਲਿਖੋ ਜੋ ਇਸ ਅਧਿਆਏ ਦੇ ਵਿੱਚ ਤੁਹਾਨੂੰ ਮਿਲਦਾ ਹੈ। ਅੱਗਲੇ ਐਤਵਾਰ ਅਸੀਂ ਤੁਹਾਡੇ ਪ੍ਰਸ਼ਨਾਂ ਤੇ ਚਰਚਾ ਕਰਾਂਗੇ।”
ਪਾਠ ਦਾ ਅਭਿਆਸ ਕਰੋ
► ਜਦੋਂ ਤੁਸੀਂ ਅੱਗਲੀ ਕਲਾਸ ਵਿੱਚ ਸਿਖਾਉਂਦੇ ਹੋ, ਤਾਂ ਵਿਦਿਆਰਥੀਆਂ ਨੂੰ ਅੱਗਲੇ ਪਾਠ ਦੇ ਲਈ ਤਿਆਰ ਕਰਨ ਦੇ ਲਈ ਇੱਕ ਅਸਾਇਨਮੈਂਟ ਦਿਓ। ਇਸ ਗੱਲ ਨੂੰ ਯਕੀਨੀ ਬਣਾਓ ਕਿ ਅਸਾਈਨਮੈਂਟ ਉਹਨਾਂ ਨੂੰ ਉਸ ਪਾਠ ਦੀ ਬਿਹਤਰ ਸਮਝ ਲਈ ਤਿਆਰ ਕਰ ਸਕੇ ਜਿਸ ਦਾ ਉਹ ਅਧਿਐਨ ਕਰਨਗੇ।
- ਡਾ.ਹੋਵਾਰਡ ਹੈਂਡ੍ਰਿਕ
ਮੈਂ ਵੇਖਦਾ ਹਾਂ...ਅਤੇ ਯਾਦ ਰੱਖਦਾ ਹਾਂ।
ਮੈਂ ਕਰਦਾ ਹਾ...ਅਤੇ ਸਮਝ ਜਾਂਦਾ ਹਾਂ।”
ਚੀਨੀ ਕਹਾਵਤ
ਯਿਸੂ ਜਾਣਦਾ ਸੀ ਕਿ “ਪਰ ਹਰੇਕ ਜਦ ਪੂਰਾ ਹੋ ਗਿਆ ਤਦ ਆਪਣੇ ਗੁਰੂ ਵਰਗਾ ਹੋਵੇਗਾ” (ਲੂਕਾ 6:40)। ਉਸਦੇ ਚੇਲ੍ਹੇ ਇਸ ਸਿਧਾਂਤ ਨੂੰ ਦਰਸਾਉਂਦੇ ਹਨ। ਕਿਉਂਕਿ ਉਹ ਇੱਕ ਸੰਪੂਰਨ ਪਿਆਰ ਦੇ ਨਮੂਨੇ ਦੁਆਰਾ ਸਿਖਾਇਆ ਗਿਆ ਸੀ, ਇਸ ਲਈ ਯੂਹੰਨਾ “ਗਰਜ਼ਣ ਦੇ ਪੁੱਤਰ” ਤੋਂ ”ਪਿਆਰ ਦਾ ਰਸੂਲ” ਬਣ ਗਿਆ। ਕਿਉਂਕਿ ਉਹ ਵਿਸ਼ਵਾਸ ਦੇ ਨਮੂਨੇ ਦੁਆਰਾ ਸਿਖਾਇਆ ਗਿਆ ਸੀ, “ਸ਼ੱਕ ਕਰਨ ਵਾਲਾ ਥੋਮਾ”, “ਭਾਰਤ ਦਾ ਰਸੂਲ” ਬਣ ਗਿਆ। ਜਦੋਂ ਉਹ ਪੂਰੀ ਤਰ੍ਹਾਂ ਸਿੱਖ ਗਏ, ਚੇਲ੍ਹੇ ਆਪਣੇ ਗੁਰੂ ਵਰਗੇ ਬਣ ਗਏ।
ਕਿਸੇ ਸਿੱਖਿਅਕ ਦੇ ਲਈ ਪਹਿਲਾ ਕਦਮ ਅਜਿਹਾ ਵਿਅਕਤੀ ਬਣਨਾ ਹੈ ਜਿਸ ਤਰ੍ਹਾਂ ਦੇ ਉਹ ਆਪਣੇ ਵਿਦਿਆਰਥੀਆਂ ਨੂੰ ਬਣਾਉਣਾ ਚਾਹੁੰਦਾ ਹੈ। ਜੇਕਰ ਯਿਸੂ ਖੁਦ ਸਥਿਰਤਾ ਦਾ ਨਮੂਨਾ ਨਾ ਹੁੰਦਾ ਤਾਂ ਉਹ ਅਸਥਿਰ ਪਤਰਸ ਨੂੰ ਕਦੇ ਵੀ “ਚੱਟਾਨ” ਨਹੀਂ ਬਣਾ ਸਕਦਾ ਸੀ। ਜੋ ਅਸੀਂ ਆਪਣੇ ਵਿਦਿਆਰਥੀਆਂ ਨੂੰ ਬਣਦੇ ਵੇਖਣਾ ਚਾਹੁੰਦੇ ਹਾਂ, ਸਾਨੂੰ ਆਪ ਉਹ ਬਣਨਾ ਚਾਹੀਦਾ ਹੈ।
ਪੌਲੁਸ ਨੇ ਇਸ ਸਿਧਾਂਤ ਨੂੰ ਸਮਝ ਲਿਆ। ਉਸਨੇ ਕੁਰਿੰਥੀਆਂ ਨੂੰ ਕਿਹਾ, “ਤੁਸੀਂ ਮੇਰੀ ਰੀਸ ਕਰੋ ਜਿਵੇਂ ਮੈਂ ਵੀ ਮਸੀਹ ਦੀ ਰੀਸ ਕਰਦਾ ਹਾਂ” (1 ਕੁਰਿੰਥੀਆਂ 10:33)। ਕਿੰਨੀ ਦਿਲੇਰੀ ਵਾਲਾ ਬਿਆਨ ਹੈ! ਪੌਲੁਸ ਕਹਿੰਦਾ ਹੈ, “ਜੇਕਰ ਤੁਸੀਂ ਸਹੀ ਜੀਵਨ ਜਿਉਣਾ ਚਾਹੁੰਦੇ ਹੋ, ਮੇਰੀ ਰੀਸ ਕਰੋ।” ਕਿਉਂਕਿ ਪੌਲੁਸ ਮਸੀਹ ਦੇ ਪਿੱਛੇ ਚੱਲ ਰਿਹਾ ਸੀ, ਇਸ ਲਈ ਕੁਰਿੰਥੀਆਂ ਦਾ ਉਸਦੇ ਪਿੱਛੇ ਚੱਲਣਾ ਸੁਰੱਖਿਅਤ ਸੀ।
ਜੇਕਰ ਮੇਰੇ ਵਿਦਿਆਰਥੀ ਮੇਰੇ ਜਿਹੇ ਬਣਨਗੇ, ਤਾਂ ਮੈਨੂੰ ਪ੍ਰਸ਼ਨ ਪੁੱਛਣੇ ਚਾਹੀਦੇ ਹਨ, ਕੀ ਮੈਂ ਚਰਿੱਤਰ ਦੀਆਂ ਅਜਿਹੀਆਂ ਯੋਗਤਾਵਾਂ ਵਿਖਾਉਂਦਾ ਹਾਂ ਜੇਕਰ ਮੇਰੇ ਵਿਦਿਆਰਥੀ ਮੇਰੀ ਨਕਲ ਕਰਨ ਤਾਂ ਮੈਂ ਸ਼ਰਮਿੰਦਾ ਹੋਵਾਂਗਾ?” ਜੇਕਰ ਮੈਂ ਵਿਦਿਆਰਥੀਆਂ ਦੇ ਨਾਲ ਗੁੱਸੇ ਅਤੇ ਬੇਸਬਰੀ ਦੇ ਨਾਲ ਵਿਵਹਾਰ ਕਰਦਾ ਹਾਂ, ਤਾਂ ਫਿਰ ਮੈਨੂੰ ਹੈਰਾਨ ਨਹੀਂ ਹੋਣਾ ਚਾਹੀਦਾ ਕਿ “ਜਦੋਂ ਮੇਰੇ ਵਿਦਿਆਰਥੀ ਪੂਰੀ ਤਰ੍ਹਾਂ ਨਾਲ ਸਿੱਖ ਲੈਣਗੇ” ਤਾਂ ਉਹ ਵੀ ਦੂਸਰਿਆਂ ਦੇ ਪ੍ਰਤੀ ਗੁੱਸੇ ਅਤੇ ਬੇਸਬਰੀ ਦੇ ਨਾਲ ਵਿਵਹਾਰ ਕਰਨਗੇ।
ਚਰਿੱਤਰ ਸਿੱਖਿਅਕ ਦੇ ਲਈ ਕੇਂਦਰੀ ਹੈ। ਤੁਸੀਂ ਆਪਣੇ ਵਿਦਿਆਰਥੀਆਂ ਦੇ ਜੀਵਨ ਵਿੱਚ ਅਜਿਹੇ ਚਰਿੱਤਰ ਗੁਣ ਵਿਕਸਿਤ ਨਹੀਂ ਕਰ ਸਕਦੇ ਜਿੰਨਾਂ ਦਾ ਨਮੂਨਾ ਤੁਹਾਡੇ ਆਪਣੇ ਜੀਵਨ ਵਿੱਚ ਨਹੀਂ ਹੈ। ਕਿਸੇ ਸਿੱਖਿਅਕ ਦੇ ਲਈ ਵੱਡੀ ਸਿੱਖਿਆ ਵਿਖਾਉਣ ਨਾਲੋਂ ਕਿਤੇ ਜਿਆਦਾ ਮਹੱਤਵਪੂਰਨ ਭਗਤੀ ਵਾਲਾ ਚਰਿੱਤਰ ਵਿਖਾਉਣਾ ਹੈ। ਜੋ ਅਸੀਂ ਚਾਹੁੰਦੇ ਹਾਂ ਕਿ ਸਾਡੇ ਵਿਦਿਆਰਥੀ ਬਣਨ ਸਾਨੂੰ ਆਪ ਉਹ ਬਣਨਾ ਚਾਹੀਦਾ ਹੈ।
ਪਾਠ ਦਾ ਅਭਿਆਸ ਕਰੋ
► ਜਿਵੇਂ ਅਸੀਂ ਯਿਸੂ ਦੀ ਤਰ੍ਹਾਂ ਸਿਖਾਉਣਾ ਪਾਠ ਨੂੰ ਸਮਾਪਤ ਕਰਦੇ ਹਾਂ, ਤਾਂ ਪਰਮੇਸ਼ੁਰ ਤੋਂ ਆਪਣੇ ਚਰਿੱਤਰ ਦੇ ਅਜਿਹੇ ਔਗੁਣਾਂ ਨੂੰ ਵਿਖਾਉਣ ਲਈ ਕਹੋ, ਜੋ ਤੁਸੀਂ ਚਾਹੁੰਦੇ ਹੋ ਕਿ ਤੁਹਾਡੇ ਵਿਦਿਆਰਥੀ ਉਨਾਂ ਦੀ ਨਕਲ ਨਾ ਕਰਨ। ਜਰੂਰੀ ਬਦਲਅ ਕਰਨ ਦੇ ਲਈ ਪਰਮੇਸ਼ੁਰ ਦੇ ਪਾਸੋਂ ਲੋੜੀਂਦੀ ਕ੍ਰਿਪਾ ਮੰਗੋ ਤਾਂ ਕਿ ਜਦੋਂ ਤੁਹਾਡੇ ਵਿਦਿਆਰਥੀ ਪੂਰੀ ਸਿਖਲਾਈ ਲੈ ਲੈਣ, ਤਾਂ ਤੁਸੀਂ ਉਨ੍ਹਾਂ ਦੇ ਜੀਵਨਾਂ ਵਿੱਚ ਪਰਮੇਸ਼ੁਰ ਦੇ ਚਰਿੱਤਰ ਦੀ ਝਲਕ ਨੂੰ ਵੇਖ ਸਕੋ।
ਇਸ ਪਾਠ ਦੇ ਲਈ ਅਸਾਇਨਮੈਂਟ ਇਸ ਪੂਰੇ ਪਾਠ ਦੇ ਦੌਰਾਨ ਕੀਤੇ ਗਏ ਹਨ। ਜੇਕਰ ਤੁਸੀਂ ਪਾਠ ਦੇ ਦੌਰਾਨ ਦੱਸੀਆਂ ਸਾਰੀਆਂ ਕਿਰਿਆਵਾਂ ਨੂੰ ਪੂਰਾ ਕੀਤਾ ਹੈ, ਤਾਂ ਫਿਰ ਪਾਠ 4 ਦੇ ਲਈ ਹੋਰ ਜਿਆਦਾ ਅਸਾਇਨਮੈਂਟ ਨਹੀਂ ਹਨ।
SGC exists to equip rising Christian leaders around the world by providing free, high-quality theological resources. We gladly grant permission for you to print and distribute our courses under these simple guidelines:
All materials remain the copyrighted property of Shepherds Global Classroom. We simply ask that you honor the integrity of the content and mission.
Questions? Reach out to us anytime at info@shepherdsglobal.org
By submitting your contact info, you agree to receive occasional email updates about this ministry.
