Lesson 7: Pagtuklas sa mga maaaring maging Guro

1. Gagamitin ng isang tagapagsanay ang mga metodolohiya sa kabanatang ito upang mapaunlad ang mga lokal na guro. Kung wala pang may kakayahang magturo sa isang lokal na simbahan, ang tagapagsanay ay hindi maaring magpasimula ng isang lokal na programa. Ngunit sa kabanatang ito, malalaman ng tagapagsanay kung paano tulungang magsimula ang mga lokal na guro.

2. Tuturuan ng tagapagsanay ang mga lokal na guro sa paggamit ng metodolohiyang ito para sa kanilang mga mag-aaral. Kung ang lokal na guro ng pasisimulang bagong gawain ay may kakayahan ng magturo, hindi na kailangan pa ng tagapagsanay na gamitin ang mga gawain sa kabanatang ito. Ang tagapagsanay ang magtuturo ng mga pamamaraan sa mga lokal na guro upang magamit nila ang mga nasabing pagsasanay sa kanilang mga mag-aaral.

3. Ang lokal na guro ang magsasanay sa mga mag-aaral. Dapat na paunlarin ng guro ang kasanayan ng mga mag-aaral sa pagmi-ministeryo. Ang mga pamamaraan na ipinapakita sa kabanatang ito ay mabisang tulong sa mga mag-aaral na magawang makapagsalita sa harapan ng grupo.

Minsan, kapag bumibisita ang mga kinatawan ng SGC sa mga simbahan, sila ay nakatatagpo agad ng mga taong handang magsimulang magturo ng mga kurso. Karaniwan, ang mga potensyal na guro na ito ay mga taong mayroon ng akademikong kasanayan at karanasan sa pagtuturo. Madali nilang maunawaan at ituro ang kurso. May mga tuntunin na nakasulat sa harap ng bawat kurso. Mayroon ring mga pantalakay na tanong. Ang kurso ay hindi lamang aklat kundi kagamit-gamit sa pagtuturo.

Ang mga kurso ay dinisenyo upang ang taong may kasanayan sa pagbabasa, kaalaman sa Biblia, at kakayahang magturo, ay mabilis na matutong gamitin ang mga kurso. Gayunpaman, minsan ang mga taong walang sapat na akademikong kasanayan ay alangan na magturo. Madalas nilang isipin na ang sanay lamang sa pagtuturo ang pwedeng magturo ng kurso.

Ang Diyos ay may kakayahang magbigay ng kaloob ng pagtuturo sa mga taong hindi nagkaroon ng pagkakataong makapag-aral sa isang unibersidad. Dahil ang mga guro ay kailangan sa simbahan, maari tayong magtiwala na ang Diyos ay magbibigay ng mga taong may kakayahang magturo saanman naroroon ang simbahan (Efeso 4:11-12).

May mga taong walang kamalay-malay na nakabuo na pala sila ng kakayahang magturo hango sa kanilang karanasan sa buhay. Halimbawa, naipapaliwanag nila ang mga bagay-bagay sa kanilang tahanan at sa trabaho. Natutulungan nila ang ibang tao na lumutas ng mga problema. Nagkaroon sila ng reputasyon bilang mahusay na tagapagpaliwanag. O kaya, kahit noong sila ay mga mag-aaral pa lang sa isang paaralan, sila ay naging bihasa na sa pagbabasa, pag-unawa, at pagpapaliwanag. Ngunit wala silang kamalayan sa kanilang naging kakayahan.

Dapat tulungan ng isang tagapagsanay ang mga may potensyal na maging guro na matuklasan ang kanilang kakayahan sa pamamagitan ng paggabay sa kanila kung paano magturo. Sa pamamagitan ng karanasan, magkakaroon sila ng kumpiyansa na magsalita sa harapan ng mga tao.

(1) Bigyan ang mga mag-aaral ng mga paksang madali nilang talakayin. Maaring ilang minuto lang ang haba ng kanilang pagtalakay. Kung may mga mag-aaral na kinakabahan sa pagtayo sa harap ng grupo, maari nilang gawin ang kanilang pagtalakay habang nasa kanilang mga upuan.

• Halimbawa ng mga bagay na madaling talakayin o ibahagi:

• Magbahagi ng isang hamon na naranasan mo sa pagkabata.

• Magkwento ng tungkol sa isang kamag-anak na naging mahalaga sa iyo.

• Magtanong sa isang mag-aaral ng ilang mga katanugan at pagkatapos ay ipakilala siya sa inyong grupo.

• Ano ang isang lugar na gusto mong puntahan? Bakit?

• Ipaalam ang isa sa paborito mong talata sa Biblia.

• Ibahagi ang isang karaniwang araw sa iyong trabaho.

• Ano ang naalala mo mula sa isang sermon na narinig mo kamakailan lang

(2) Magbigay ng tanong sa mag-aaral. Ang tanong ay dapat na nangangailangan ng ilang paliwanag, hindi dapat maikling sagot. Ang tanong ay dapat na masasagot ng mag-aaral upang maging kumpiyansa siya at hindi mapahiya.

(3) Hilingin sa mga mag-aaral na ipaliwanag ang kanilang naisulat na takdang-aralin sa grupo. Ang mga kurso ay nangangailangan ng iba't ibang sulating takdang-aralin. Kahit na ang tagapagsanay ay naroroon lamang ng isang araw, ang mga mag-aaral ay maaring bigyan ng pagkakataon na isulat ang isa sa mga takdang-aralin at ibahagi ito.

(4) Pagpangkatin ang mga mag-aaral sa tatlong grupo bilang kanilang pagsasanay sa pagtuturo. Ipaturo sa bawat isa ang isang maikling seksyon. Sa pamamagitan nito’y makapagsasanay sila ng sabay-sabay sa harapan ng ilang tagapakinig.

(5) Hilingin sa isang mag-aaral na ipaliwanag ang isang seksyon mula sa isang aralin. May mga seksyon sa kurso na maikli lamang ang paliwanag sa isang konsepto. Maagang hilingin sa isang estudyante na maging handa sa pagpapaliwanag ng isang seksyon sa loob ng ilang minuto.

(6) Hilingin sa isang may kasanayang mag-aaral na magturo ng isang aralin mula sa kurso. Ang pinakamadaling paraan para sa isang mag-aaral na maituro ang isang aralin ay sa pamamagitan ng paksang narinig niyang itinuro ng iba. Ngunit isang mataas na antas ng kakayahan na ituro ang isang aralin na hindi pa naituro sa isang mag-aaral. Maaring madama ng tagapagsanay na pagturuin ang matalinong mag-aaral na iyon hangga’t maaari. Subalit maaaring mas gusto ng klase na pakinggan ang tagapagsanay. Ano man ang lagay, tiyaking makapagbigay ng pagkakataon sa iba na makapagturo.

(7) Gamitin ang “Table Talk” na paraan. Ang mga estudyante ay mauupo sa paligid ng isang mesa habang hawak ang kanilang mga aklat sa kurso. Hindi nila kasamang mauupo ang guro. Ang mga mag-aaral ay maghahalinhinan sa pag-uusap tungkol sa isang bagay sa aralin. May isang mag-aaral na mamumuno sa kanilang talakayan at pagbabahagi sa pamamagitan ng mga tanong. Maaring matuklasan ng grupo na maari pala silang matuto kahit na wala ang patnubay ng guro. Ang paraang ito ay magbibigay daan upang ang grupo ay makahanap ng magiging guro sa kanilang lugar.

Layon ng SGC na magtatag ng lokal na pagsasanay sa ministeryo saan mang lugar. Ang pagsasanay ay maaring mangyari sa lahat ng dako sa pamamagitan ng mga taong pinagkalooban ng Diyos ng kakayahan at pang-unawa sa Biblia. Dapat tandaan ng mga guro na ang kanilang layunin ay hindi lamang magbahagi ng kaalaman, kundi ang sanayin ang mga estudyante na maipaliwanag ang katotohanan sa iba.