Lesson 4: Pag-unawa sa mga Mag-aaral

Yamang ang layon ng programa ng SGC ay pagsasanay sa ministeryo, ang estudyante ay dapat na isang Kristyano na may mabuting patotoo at makaDiyos na pamumuhay. Hindi mauunawaan at maiibigan ng Di-Mananampalataya ang nilalaman ng mga kurso.

Dapat na naniniwala ang isang estudyante sa mahahalagang katuruang Kristyano sa kasaysayan, kasama na rito ang ebanghelikal na doktrina. Nilikha ang programang ito upang paglingkuran ang Katawan ni Cristo sa iba’t ibang panig ng mundo, kaya’t ang tinatanging paniniwala ng isang denominasyon ay hindi kinakailangan.

Ang estudyante ay dapat miyembro at nakikibahagi sa panambahan at pagsasama ng kanyang simbahan. Ang mga estudyante na walang kinabibilangan at pinaglilingkurang simbahan ay hindi mabuting kandidato sa pagsasanay na ito. Marapat, na kabahagi sila ng isang simbahan upang maibahagi nila rito ang kanilang natutuhan. May ilan sa mga takdang-aralin na nangangailangan ng partisipasyon sa iyong simbahan.

Ang disenyo ng ating lokal na institusyon ay para maglingkod sa mga mag-aaral na marunong bumasa at sumulat. Hindi kinakailangan na sila’y nagtapos ng paaralan, ngunit dapat na marunong bumasa at sumulat upang maunawaan nila ang mga kurso at matapos ang mga takdang aralin. Ang Institusyon ay magbibigay ng certificate o katibayan ng pag-aaral sa antas na ito.

May ibang pamamaraan ng pagtuturo na maaaring ibigay sa mga estudyante na nais matuto ngunit hindi magawa ang mga takdang aralin. Halimbawa, maaring magturo ang isang guro sa pangkalahatang pagtitipon o kaya’y sa kanilang bahay; ito’y para sa mga taong hirap magbasa at hindi magawa ang mga takdang-aralin.

Ang mga mag-aaral na naka-enrol sa lokal na institusyon ng SGC ay naiiba sa estudyante ng ibang mga institusyon. Hindi na sila mga batang nag-aaral sa eskwela. Iba sila sa mga estudyante ng unibersidad at maging sa mga estudyante sa Bible College. Dahil rito, ang mga guro ay dapat na makibagay sa ganitong kalagayan. Maaaring ang akademikong antas ng ilan sa mga estudyante ay mababa kumpara sa mga nag-aaral sa kolehiyo. Dapat na ibaba ng mga guro ang kanilang mataas na ekspektasyon. Dapat nilang ipaliwanag kung paano gawin ang takdang-aralin. Hindi nila dapat hayaan ang katamaran at kapabayaan, ngunit dapat na isagawa nila ang pagtutuwid sa paraang kagalang-galang at nagpapalakas ng loob.

Tandaan na kung talagang tinatawag ng Diyos ang isang tao sa ministeryo, siya’y bibigyan ng Diyos ng mga kakayahan na kinakailangan. Maaaring may iba sa mga estudyante na naipapakita na ang basbas at pagpapala ng Diyos sa kanilang ministeryo. Ating tungkulin kung gayon na sila’y hubugin. Isang pagkakamali na panghinain ang kanilang loob.

Maaaring magkaroon ng magkakaibang edad sa mga estudyante sa bawat grupo ng SGC. May iba na maaaring katatapos lang sa isang paaralan. May iba na maaaring lolo at lola na sa edad. Maaari rin na may ibang nagpapastor na sa matagal na panahon. Minsan, ang estudyante ay mas matanda pa sa guro.

Ang estudyante na dalawangpung taon ang edad na katatapos lang sa isang paaralan ay maaring lampas sa akademikong husay kumpara sa pastor na animnapung taon ang edad. Gayunpaman, bawat isa sa kanila ay dapat pakitaan ng paggalang. Hindi natin dapat parangalan ang akademikong kakayahan sa paraang ibinababa natin ang karanasan at maturidad. Bagamat binibigyang diin natin ang akademikong pangangailangan, hindi natin dapat ipahiya ang mga estudyanteng hindi nakarating sa gayong antas.

Ang adultong mag-aaral ay tumutukoy sa estudyanteng nasa hustong gulang. Sila’y maaring may asawa na at mga anak. Sila’y maaring nagtratrabaho sa isang uri ng hanapbuhay o kaya’y nasa isang ministeryo. Ang mga tulad nila’y may iba’t iba ng karanasan sa buhay. Kapag ang isang adulto ay nagpasyang maging estudyante muli, sila ay may mga nais na makamit na adhikain.

Ang istilo ng guro at ng kanyang klase ay dapat na dinisenyo sa pangangailangan ng adultong mag-aaral.

1. Nais ng mga adultong mag-aaral ang pagsasanay na mabilis na makatutulong sa kanila. Dapat nilang matalakay at magawa ang mga bagay na kanilang natututuhan. Ang klase ay dapat na magbigay ng panahon sa mga estudyante na maisip kung paano nila maisasagawa ang kanilang natutuhan. Hindi dapat ubusin ng guro ang kanyang panahon sa pagtuturo ng mga materyales na hindi nakikipagtalakayan sa mga estudyante.

2. Nais madama ng adultong mag-aaral ang respeto. Mayroon na silang mga malalaking pananagutan sa buhay at ayaw nilang tratuhin silang parang mga bata. Ang mga guro ay dapat na magpakita ng ugali na handang matuto mula sa kanila. Dapat nilang igalang ang karanasan at pananaw ng kanilang mga estudyante.

3. Nais ng mga adultong mag-aaral na mahasa ang kanilang pagpapasya habang sila’y nag-aaral. Dahil sa kanilang mga karanasan at pangarap sa buhay, may mga pag-aaral na maaaring maging napapanahon at kawiliwili sa kanila. Dapat silang bigyan ng kalayaan na linangin ang kanilang interes at paunlarin ang estilo ng pag-aaral.

4. Gusto ng adultong mag-aaral na naipra-praktis sa klase ang kanyang natutunan. Dapat na bigyan sila ng guro ng mga gawain na kanilang maipri-presenta; mga seksyon sa aklat na ipapaliwanag; at mga tanong na sasagutin. May mga pagkakataon na magbabahagi sila ng kwento sa kanilang karanasan. Bagamat hindi nais ng isang guro na maaksaya ang kanilang oras, subalit dapat niyang maunawaan na ang pagkwekwento ay maaring paraan ng kanyang mga estudyante na isabuhay ang kanilang natutuhan.

5. Bumubuo ng ugnayan ang adultong mag-aaral sa kanyang kapwa mag-aaral. Natututo sila sa pananaw ng bawat isa. Nahuhubog sa kanila ang paggalang sa isa’t isa. Hindi nila malilimutan ang makabuluhang pakikipag-ugnayan sa isa’t isa. May pagkakataon na kailangang pagpangkatin sila sa grupo para sa talakayan.

6. Nais ng adultong mag-aaral na bumuo ng kanyang sariling konklusyon. Inaasahan niya ang bukas na pakikinig sa iba’t ibang opinyon.

7. Likas sa adultong mag-aaral na hangaan at igalang ang kanyang guro. Hindi nila nais na may pagitan sa kanilang katatayuan at ng guro, na madalas ay nangyayari sa mga unibersidad. Higit nilang pinapahalagahan ang personal na pansin ng guro. Hindi lamang nila hinahangaan ang kaalaman ng guro kundi pati na rin ang kanyang karakter.

Dapat na nagbibigay ng panahon ang guro na mapag-usapan ng mga estudyante ang magandang gawi sa pag-aaral. Mahalagang magkaroon sila ng disiplina at isaayos ang kanilang iskedyul.

Dapat ingatan ng guro ang rekord ng mga takdang aralin at attendance. Sa pagtatapos ng kurso, ang mga rekord na ito ang siyang magiging batayan ng grado. Habang pinag-aaralan ang kurso at may mga estudyante na hindi makasabay ng maayos, kailangang kausapin sila ng guro at turuan kung paano mapapalago ang sarili.

Mahalagang natitiyak ng guro na nauunawaan ng estudyante kung paano gawin ang takdang-aralin. Ang mga takdang-aralin na hindi nagawang maayos ay dapat na isauli sa estudyante upang ayusin at pabutihin. Subalit dapat na tiyakin ng guro na nauunawaan ng estudyante kung paano pabutihin ang kanyang aralin.

Kapag ng dahil sa attendance o takdang-aralin ang grado ng estudyante ay bumababa, kailangang kausapin sila ng guro kung paano nila ito mapapabuti. Hindi dapat masurpresa ang mga estudyante sa lagay ng kanilang grado sa katapusan ng kurso.